گرووپی تەنبورژەنانی لاوچ، یەکێک لە گرنگترین و پرۆفیشناڵترین گرووپەکانی تەنبورژەنی کوردستان و جیهانە. ئەو گرووپە لە لایەن عەلی ئەکبەر مورادی گەورە تەنبورژەنی کوردی کرماشان لە ساڵی 1984 دامەزرا و نزیکەی 10 ساڵ بەرنامەی هونەری و کۆنسێرتی تەنبورژەنی پێشکەش کرد.
دوای 10 ساڵ لە بێدەنگبوون و هەڵوەشاندنەوەی گرووپەکە، چەند ساڵێکە گرووپی تەنبورژەنی لاوچ، بە پێشنیاری عەلی ئەکبەر مورادی چالاکییەکانی خۆی دەست پێکردووەتەوە. ئەمجارە رۆڵی سەرپەرشتی ئەو گرووپە خراوەتە ئەستۆی حەیدەر کاکی.
حەیدەر کاکی لەلایەن عەلی ئەکبەر مورادی مەشقی تەنبورژەنینی کردووە و لە ساڵی 2011 بە یاوەریی چەند هونەرمەندێکی تری رۆژهەڵاتی کوردستان، بەتایبەت لە پارێزگای کرماشان گرووپی ’لاوچ’ی لەسەر رێنماییەکانی مامۆستاکەی دامەزراندەوە و لەم ماوە کەمەدا توانیویەتی ناوبانگێکی زۆر دەربکات.
گرووپی تەنبورژەنانی لاوچ لە هۆڵە ناسراوەکانی هونەری تاران وەک نیاوەران و لە شارەکانی رۆژهەڵاتی کوردستان وەک کرماشان بەرنامەی تەنبورژەنین و ئاوازی رەسەنی کوردییان پێشکەش کردووە.
کۆنسێرتەکانیان بۆ ئەوەی جەماوەری فارس زمانیش لە شارەکانی ئێران چێژی لێ وەربگرن، بە دوو زمانی کوردی و فارسی بەڕێوە دەچێ.
’فیراق’ و ’خەزان’ و ’مەهجوری و’ نەورۆز’ و ’پەرواز’ و ’دیوانە شەو’ و ’دڵا چۆنی’ و ’گەردون بێکەران’ و ’بیداد’ ئەو پارچە مۆسیقا رەسەنانەن کە زیاتر لە لایەن گرووپی لاوچ دەژەنرێن. هەروەها ئەو گرووپە دەستی بەسەر هەندێ گۆڕانکاری لە مۆسیقای کوردی کردووە، ئاوازی تێکەڵ بە تەنبوور و ئاوازی هەورامی کردووە.
گرووپەکە زیاتر تەنبوور دەژەنن بەڵام لە ئامێرە مۆسیقاییەکانی تری وەک کەمانچە و شورئەنگیز و بەم تار و دەف و دمەک و دەهۆڵ کە زیاتر تایبەت بە مۆسیقای کرماشان و لوڕستانە سوود وەردەگرن.
ئەندامانی ئەو گرووپە لە زەکەریا یوسف (ژەنیاری دەف) و خاتوو بیهنوش کازمی زادە (کەمانچە ژەن) و خاتوو حوسنا فەتحی(تەنبورژەن) و خاتوو پیگاە سەلیمی(تەنبورژەن) و فەرزاد بازگیر( تەنبورژەن) و فەرزان خاکپور (تەنبورژەن) ئەرسەلان عەباسی (تەنبورژەن و بەم تار) و سەیاد محەمەدی (تەنبورژەن و دەهۆڵژەن) و هومایون کاکی (دمەک ژەن) پێکهاتوون.
گرووپی لاوچ سوود لە هۆنراوەی شاعیرانی وەکوو مەولەویی کورد و باباتاهیری هەمەدانی و پەرتەو کرماشانی و سەید ساڵحی مایەشتی و بێسارانی وەردەگرن.
23/05/2014
