رۆژنامه‌ى هائارتيسى ئيسرائيلى بڵاويكرده‌وه، هه‌ريه‌ك له ئه‌مريكا و ئيسرائيل به رێگه‌ى "ناياسايى" نه‌وتى كێڵگه نه‌وتييه‌كانى هه‌رێمى كوردستانيان كڕيوه.
به گوێره‌ى راپۆرتێكى رۆژنامه‌كه، ئه‌مريكا دوو هه‌فته له‌مه‌و به‌ر يه‌كه‌م كاروانى تانكه‌رى نه‌وتى خاوى عێراقى له رێگه‌ى هه‌رێمى كوردستانه‌وه كڕيوه و هه‌روه‌ها ئيسرائيليش له سه‌ره‌تاى ئه‌مساڵه‌وه دوو كاروانى تانكه‌رى نه‌وتى خاوى پێگه‌يشتووه، دواى ئه‌وه‌ى له هاوينى رابردووشدا دوو كاروانى ديكه‌ى تانكه‌رى نه‌وتى خاوى به‌ده‌ستگه‌يشتبوو.
له لايه‌ن خۆيه‌وه حكومه‌تى عێراق، چه‌ندين جار كۆمپانيا نه‌وتييه‌كان و وڵاتانى كڕيارى نه‌وتى هه‌رێمى كوردستانى له مه‌ترسى كڕينى نه‌وتى هه‌رێم به شێوه‌ى "ناياسايى" ئاگادار كردووه‌ته‌وه و رايگه‌ياندووه، رێككارى ياسايى له دژيان ده‌گرێته به‌ر ئه‌گه‌ر به بێ گه‌ڕانه‌وه بۆ به‌غدا نه‌وتى هه‌رێم بكڕن.
هائارتسى ئيسرائيلى نووسيويه‌تى: "سه‌ره‌ڕاى هۆشدارييه‌كانى حكومه‌تى عێراق، هه‌ندێك له كۆمپانيا ئه‌وروپاييه‌كان به‌رده‌وامن له كڕينى نه‌وتى خاوى سووك و قورس له هه‌رێمى كوردستان".
رۆژنامه‌كه ئه‌وه‌شى نووسيوه: حكومه‌تى عێراق وه‌ك هه‌ندێك وڵاتى ديكه‌ى عه‌ره‌بى ره‌تيده‌كاته‌وه نه‌وت به ئيسرائيل بفرۆشێت".
سه‌باره‌ت به‌و پرسه وه‌زاره‌تى وزه‌ى ئيسرائيل ره‌تيكردووه‌ته‌وه قسه له‌سه‌ر ئه‌و مه‌سه‌له‌يه بۆ رۆژنامه‌كه بكات.
وه‌زاره‌تى وزه‌ى ئيسرائيل به رۆژنامه‌كه‌ى راگه‌ياندووه، "پێويست به‌وه ناكات ناوى ئه‌و سه‌رچاوانه بدركێنين كه نه‌وتيان لێوه‌رده‌گرين".
رۆژنامه‌كه، له سه‌ر زمانى به‌رپرسێكى باڵاى وه‌زاره‌تى نه‌وتى عێراقيشه‌وه به بێ ئه‌وه‌ى ناوى ئاشكرا بكات ئه‌وه‌ى گواستووه‌ته‌وه، كه "به‌غدا هه‌ندێك زانيارى له‌به‌ر ده‌سته له باره‌ى ئه‌و جۆره بازرگانى و گرێبه‌ستانه و له ئێستادا لێكۆڵينه‌وه‌يان له باره‌وه ده‌كات".
به‌رپرسه عێراقييه‌كه ئه‌وه‌شى وتووه: "ساغبوونه‌وه‌ى راستى ئه‌و راپۆرته رۆژنامه‌وانييانه سزاى توندى به‌دوادادێت".
هه‌ولێر له كانوونى دووه‌مى رابردووه‌وه، ده‌ستى به هه‌نارده‌كردنى نه‌وتى خاو بۆ به‌نده‌رى جه‌يهانى توركيا كردووه، به‌ڵام به‌هۆى رازى نه‌بوونى به‌غدا له‌سه‌ر فرۆشتنى نه‌وت، تا ئێستا نه‌يتوانييوه له رێگه‌ى بۆرييه‌وه نه‌وته‌كه‌ى بفرۆشێت".
چاوه‌ڕوانده‌كرێت، "هه‌نارده‌كردنى نه‌وت بۆ ئيسرائيل" و فرۆشتنى به شێوه‌ى "ناياسايى" به ئه‌مريكا، به‌رپرسانى هه‌رێمى كوردستان رووبه‌ڕووى فشارى به‌غدا بكاته‌وه و ئاڵۆزى زياتر له نێوان هه‌ردوولا بێنێته‌ئاراوه.
تا ئێستا به ره‌سمى وه‌زاره‌تى نه‌وتى حكومه‌تى هه‌رێم وه‌ڵامى ئه‌و راپۆرته‌ى رۆژنامه ئيسرائيليه‌كه‌ى نه‌داوه‌ته‌وه.
پێشتر راپۆرته رۆژنامه‌وانييه‌كان باسى هه‌نارده‌كردنى نه‌وتيان به تانكه‌ر بۆ به‌نده‌ر عه‌باسى ئێران و ئه‌فغانستان و توركيا ده‌كرد.
ئه‌مه يه‌كه‌مجاره پرسى ناردنى نه‌وتى خاوى سوك و قورسى هه‌رێمى كوردستان بۆ ئيسرائيل بێته ئاراوه.
له ساڵى 1948ه‌وه و له ساته‌وه‌ختى راگه‌ياندنى ده‌وڵه‌تى ئيسرائيل له‌سه‌ر خاكى فه‌له‌ستين، ده‌وڵه‌تى عێراق ئاماده نه‌بووه، دان به بوونى ئيسرائيلدا بنێت و مامه‌ڵه‌ى ئابوورى و سياسى و ديبلۆماتى له‌گه‌ڵ بكات.
له ماوه‌ى 60 ساڵى رابردوودا و له ساڵانى 1948، 1967، 1973 به جياوازى ده‌سه‌ڵاتدارانى به‌غدا، به‌ڵام سوپاى عێراق به‌شدارى شه‌ڕه‌كانى دژ به ئيسرائيلى له به‌ره‌ى سوپاى وڵاتانى عه‌ره‌بى سوريا، ميسر، ئه‌رده‌ن، فه‌له‌ستين كردووه.
راپۆرته‌كه‌ى رۆژنامه‌ى هائارتسى ئيسرائيلى دواى ئه‌وه دێت، كه دوێنێ ئاژانسى هه‌واڵده‌رى رۆيته‌رز بڵاويكرده‌وه، هه‌ريه‌ك له ئيسرائيل و ئه‌مريكا بوونه‌ته كڕيارى نه‌وتى هه‌رێمى كوردستان به شێوه‌ى "ناياسايى".
17/05/2014
