حوسێن مەدەنی، نووسەر و سیاسەتمەداری حزبی دیموکراتی کوردستان بە یەکگرتنەوەی حزب گەشبین نییە، بەڵام دەڵێ "واقع بینم و ئەمڕۆکە کوردستانی ئێران پێویستی بە یەکگرتنێکی سیاسی هەیە".

لە لێدوانێکدا بۆ "ناوەندی نووچە و شڕۆڤەی رۆژ"، حوسێن مەدەنی جەختی کردەوە کە ئەمڕۆکە بزووتنەوەی سیاسیی کورد لە رۆژهەڵاتی کوردستان لە بەرامبەر دەوڵەتی مەرکەزیدا دەبێ یەک بگرێ. 

بە بۆچوونی حوسێن مەدەنی، هەموو شتەکانی هەر دوو حزبی دیموکرات یەکن و تەنیا ناوەکەیان گۆڕانی بە سەردا هاتووە.

رۆژی هەینی رابردوو (٨ی نۆڤامبر)، ژمارەیەک لە لایەنگرانی یەکگرتنی هەر دوو حزبی دیموکرات، خۆپیشاندانێکیان لە کەمپی ئازادی، شوێنی نیشتەجێبوونی هەر دوو دیموکرات ئەنجام دا و بە وتنەوەی دروشمی جۆراوجۆر سەردانی رێبەرایەتی هەردوو لایان کرد. 

رێبەرایەتی هەر دوو لایەنی دیموکرات، پێشوازییان لە خۆپیشاندەران کرد و بەڵێنیان پێدان کە بێ هیوایان نەکەن.

حوسێن مەدەنی، ئەو خۆپیشاندانە و چالاکییەکانی دیکە، دەگەڕێنێتەوە بۆ "چاوەڕوانی لە رادەبەدەر لە حزبی دیموکرات" و پێی وایە دەبێ هەرێمی کوردستانیش نێوبژیوانی بۆ بکا و پڕۆسەکە پێشتر بخا.

- ئەوەندەی ئیستیعدادمان هەیە بۆ دوژمنایەتی کردنی یەکتری، ئەوەندە ئیستعدادمان نییە بۆ یەکگرتنەوە و لێک نزیک بوونەوە. مەدەنی وای گوت.

حوسێن مەدەنی پێی وایە "جاران هەم پارتی و هەم یەکێتی بە لەتبوونی حزبی دیموکرات کەیفیان ساز دەبوو، چونکە حزبی دیموکراتی کوردستانیان لە بەرامبەری خۆیاندا دەدەی و پێیان خۆش بوو هەمیشە لە گەڵ حزبێکی لەر و لاواز تەڕەف بن. بەڵام ئێستا بارودۆخ گۆڕاوە و ئەوانیش حەز دەکەن ئێمە یەک بگرین." هەر لە گەڵ وروژاندنی باسی یەکگرتنەوەی دوو لایەنی دیموکرات، دوێنێ تەیموور مستەفایی ئەندامی دەفتەری سیاسی حزبی دیموکراتی کوردستانی ئێران لە لێدوانێکدا بۆ تەلەڤزیۆنی "رووداو"، رایگەیاند کە "ئەوان ناتوانن حدک وەک حزبێکی سیاسی بناسن." مستەفایی گوتیشی: "ئێمە لە سەرەتای ئەو مەسەلەیە داین و لە ڕوانگەی بۆچوونەوە لێک جیاوازین". حوسێن مەدەنی رەخنە لەو دیدگایە دەگرێ و دەڵێ "بەر لە هەموو شتێک دەبێ فەرهەنگێکی سیاسیی نوێ بێتە ئاراوە." ناوبراو لە درێژەدا دەڵێ: "ئەگەر ئەو فەرهەنگە سیاسییە نەگۆڕدرێ، ئێمە حاسێ دەمێنینەوە. ئیدی دەبێ لە دروشم بێینە دەرێ و بەرژەوەندییە نەتەوەییەکان لە بەرچاو بگرین." هەر چەند لە سەر ئەو بڕوایەشە کە "نابێ چاوەڕێی ئەوە بین لە یەک کاتدا هەموومان ببینە شتێکی تازە. ئەوە پڕۆسەیەکی درێژخایەنە و دەبێ فەرهەنگ سازی بۆ بکرێ. بەڵام نابێ لێشی ماندوو بین." حوسێن مەدەنی کە پێشتریش ئەزموونی دابڕان لە حزبی دیموکراتی هەیە و یەکێک بووە لە رێبەرانی حزبی دیموکراتی کوردستان - رێبەرایەتی شۆڕشگێڕ، نموونەکانی رابردوو بە بیر دێنێتەوە و پێی وایە دەبێ بە پشت بەستن بە قۆناغە مێژووییەکانی پێشتر، کار بۆ یەکگرتنەوە بکرێ.  دوایین جیابوونەوە لە حزبی دیموکرات، کۆتاییەکانی ساڵی ٢٠٠٦ کرا و لەو کاتەوە تا ئێستا، چەندین جار باسی یەکگرتنەوە وروژاوە، بەڵام هیچ دەرئەنجامێکی نەبووە.

نووچە و شڕۆڤەی رۆژ

11/11/2013

^{ئێوارەی ئەمڕۆ 10 _ 11 _ 2013، لێژنەی ئامادەكاری كۆنگرەی نەتەوەیی كورد لە شاری هەولێر كۆبۆوەو دوای نزیكەی سێ‌ كاتژمێر گفتوگۆكردن بڕیاریدا بەستنی كۆنگرە بۆ كاتێكی نادیار دوابخات.
ئێوارەی ئەمڕۆ یەكشەممە، لێژنەی ئامادەكاری كۆنگرەی نەتەوەیی كورد لە شاری هەولێر كۆبۆوە, ئەم كۆبوونەوەیەی دوای زیاتر لەمانگێك لە راگرتنی كۆبوونەوەكانی دێت, لە كۆبوونەوەكەدا كە نزیكەی سێ‌ كاتژمێری خایاند, دوای گفتوگۆی ئەندامانی لەسەر بەستن یا نەبەستنی كۆنگرەكە لە كاتی خۆیدا, لێژنەی ئامادەكاری كۆنگرە بڕیاریدا بە دواخستنی كۆنگرەكە بۆ كاتێكی نادیار, غەفوور مەخمووری ئەندامی لێژنەی ئامادەكاری كۆنگرەی نەتەوەیی كورد لە لێدوانێكیدا بۆ ( میدیا ) رایگەیاند كەوا " دواخستنی كۆنگرەی نەتەوەیی كورد دەگەڕێتەوە بۆ دوو هۆكار, هۆكاری سیاسی و هۆكاری تەكنیكی", هەروەها ئەوەشی گوت كەوا " لێژنەی ئامادەكار لەماوەی داهاتوودا كاردەكات بۆ تەواكردنی ئامادەكارییەكان و هەوڵدەدات ئاستەنگەكانی بەردەم بەستنی كۆنگرەی نەتەوەیی كورد نەهێڵێت, بۆئەوەی كۆنگرە كە هیوای هەموو كوردانە لە كاتێكی گونجاودا ببەسترێت". 
شیانی باسە كۆنگرەی نەتەوەیی كورد بڕیار بوو لە رۆژانی 25 _ 27 / 11 / 2013 لە شاری هەولێر ببەسترێت, بەڵام ئەمڕۆ لێژنەی ئامادەكار لە راگەیاندنێكیدا كە وێنەیەكی بۆ میدیا نێردراوە, دواخستنی كۆنگرەكەی بۆ "كاتێكی گونجاو" راگەیاندو داوای لێبووردنیشی لە گەلی كوردستان كردووە, كە ناتوانێت كۆنگرەكە لە كاتی خۆیدا ببەستێت, ئەمەش دەقی راگەیاندنەكەیە:
راگەیاندنێك لە لێژنەی ئامادەكاری كۆنگرەی نەتەوەیی كورد
ئەمرۆ 10/11/2013 لێژنەی ئامادەكاری كۆنگرەی نەتەوەیی كورد لە شاری هەولێر كۆبوونەوەی خۆی ئەنجامدا, دوای گفتوگۆیەكی ڕاشكاوانە سەبارەت بە تەواونەبوونی پێویستییەكانی بەستنی كۆنگرە كە بڕیاربوو لە 25 ی ئەم مانگەدا ببەسترێت ، كە بەهۆی هەندێ‌ گرفتی سیاسی و 
تەواونەبوونی ئامادەكارییەكان ناتوانین كۆنگرەی نەتەوەیی كورد لە كاتی دیاریكراوی خۆیدا ببەستین، بۆیە دەمانەوێ‌ بە هەموو لایەكی رابگەیەنین بەناوی گشت ئەندامانی لێژنەی ئامادەكاری كۆنگرە كە نوێنەرایەتی حیزب و لایەنە سیاسییەكانی گشت پارچەكانی كوردستان دەكەن داوای لێبوردن لە گەلی كوردستان دەكەین .
لەلایەكی دیكەوە جەخت لەسەر ئەوە دەكەینەوە كە وەكو لێژنەی ئامادەكار بەردەوام دەبین لە كارەكانمان بۆ تەواوكردنی پێویستییەكانی بەستنی كۆنگرە لە كاتێكی گونجاودا ، ئۆمێدیش دەكەین كە گیروگرفتە سیاسییەكان بە دیالۆگ و بەهەند وەرگرتنی بەرژەوەندی باڵای نەتەوەیی چارەسەر بكرێن كە ئەوەش زەمینە خۆشتر دەكات بۆ بەستنی كۆنگرە.
هەروەها دووپاتی دەكەینەوە كە بەردەوام دەبین لە كۆبوونەوەكانمان بۆ تەواوكردنی كاری تەكنیكی و بەدواداچوون بۆ چارەسەری هەر گرفتێك كە بێتە پێش بەستنی كۆنگرەی نەتەوەیی كورد.}

^{لێژنەی ئامادەكاری كۆنگرەی نەتەوەیی كورد
10 / 11 / 2013
هەولێر - كوردستان}

سەرچاوە/ میدیا

^{ئەمڕۆ شەممە 9/11/2013 وەزیری ناوخۆی حکومەتی هەرێمی کوردستان لەگەڵ كونسوڵی گشتی كۆماری ئیسلامی ئێران لە هەولێر کۆبوونەوە. لە راگەیەندراوێکدا، کە وێنەیەکی بۆ (رووداو) نێردراوە هاتووە:"لە دانیشتنێكدا كە نەوزاد هادی پارێزگاری هەولێر و عەبدوڵا ئاكرەیی بەڕێوەبەری گشتی فەرمانگەی پەیوەندییەكانی دەرەوە بۆ كاروباری ئێران ئامادەی بوون، باس لە رووداوە نەخوازراوەكەی دوێنێ هەینی بەردەم كونسوڵخانەی كۆماری ئیسلامی ئێران لە شاری هەولێر كرا، كە چەند گێرەشێوێنێك هەڵیان كوتایە سەر باڵەخانەی كونسوڵگەری كۆماری ئیسلامی ئێران و كاری تێكدەرانە و نایاساییان ئەنجامدا. " لە بەشێکی دیکەی ئەو راگەیەندراوەدا، وەزیری ناوخۆ بە تووندی ئیدانەی ئەو توندوتیژییانەی کردووە لە بەرامبەر كونسوڵخانەی كۆماری ئیسلامی ئێران و رایگەیاند :"ئەمە بەهیچ شێوەیەك لەگەڵ سیاسەتی حكوومەتی هەرێم یەك ناگرێتەوە" و جەختیکردەوە ئەنجامدەرانی ئەم كارە نەشیاوە رووبەڕووی سزای یاسایی دەبنەوە، كە سوودیان لەو كەشە ئازادییەی هەرێمی كوردستان بینی، كە "رێگەیان پێدرابوو تەنها لە بەردەم پاركی شانەدەر گردبوونەوە ئەنجامبدەن"، بەڵام ئەوان بەشێوەیەكی "نایاسایی" ئەنجامیان دا، كە لە بەرژەوەندی هیچ لایەنێكدا نەبوو و تەنها بۆ "مەبەستی ئاژاوەگێڕی بوو". كاژێر 4ی ئێوارەی رۆژی هەینی 8-11-2013، خۆپیشاندانێك دژی لەسێدارەدانی لاوانی كورد لە ئێران بۆ بەردەم كونسوڵخانەی كۆماری ئیسلامی ئێران لە هەولێر سازكرا، كە بەشی زۆری خۆپێشاندەرەكان ئەندامانی پارتەكانی رۆژهەڵاتی كوردستان بوون. دواتر لەلایەن ژمارەیەك خۆپێشاندەر كۆنسوڵخانەی ئێران بەردباران كرا.}

^rudaw

^10/11/2013

رێبه‌ری گه‌لی کورد عه‌بدولڵا ئۆجالان له‌ دیداره‌که‌ی ئه‌مڕۆیدا له‌گه‌ڵ شانده‌که‌ی BDP له‌باره‌ی قۆناخه‌که‌وه‌ هۆشیاری دا و رایگه‌یاند که‌ به‌سه‌ر پردی سیراتدا ده‌ڕوات، ده‌ستنیشانی کرد که‌ بۆ به‌ره‌و پێشه‌وه‌چوونی چاره‌سه‌ری پێویسته‌ حکومه‌ت " بنه‌مای یاسایی و پڕکردنه‌وه‌ی زه‌مینه‌ " فه‌راهه‌م بکات . 
 دوای ئه‌وه‌ی له‌ کاتژمێر 10:30ی پێشنیوه‌ڕی ئه‌مڕۆ له‌ ناوچه‌ی گه‌ملیکه‌وه‌ به‌ره‌و ئیمراڵی به‌ڕێکه‌وتن و له‌وێ (12) هه‌مین دیداریان له‌گه‌ڵ‌ رێبه‌ری گه‌لی کورد عه‌بدولڵا ئۆجالان ئه‌نجامدا، جێگرانی سه‌رۆکی فراکسیۆنی BDP ( په‌روین بوڵدان و ئیدریس بالوکه‌ن ) و جێگری هاوسه‌رۆک و به‌رپرسیاری قۆناخی رێکه‌وتن و چاره‌سه‌ری HDP ( سڕی سوره‌یا ئۆنده‌ر ) گه‌ڕانه‌وه‌ بۆ گه‌ملیک . 
سه‌باره‌ت به‌ چۆنێتی به‌ڕێوه‌چوون و په‌یامه‌کانی رێبه‌ری گه‌لی کورد عه‌بدولڵا ئۆجالان، سڕی سوره‌یا ئۆنده‌ر کاتژمێر 17:00 به‌کاتی ئه‌وروپا به‌شداری له‌ هه‌واڵه‌کانی زمانی تورکی که‌ناڵی ئاسمانی STÊRK.TV کرد و ئاماژه‌ی به‌وه‌ کرد که‌ ئۆجالان رایگه‌یاندووه‌ :" پرۆسه‌ی چاره‌سه‌ری به‌ قۆناخێکی جددی گه‌یشتووه‌، هاوکات له‌گه‌ڵ‌ به‌رده‌وامییدا، قۆناخه‌که‌ له‌سه‌ر پردی سیراته‌ . سه‌ره‌ڕای هه‌موو دۆخێکی نه‌رێنیش، به‌ بڕیارین له‌ به‌رده‌وامیدان به‌ ئیراده‌ی ئاشتی ئه‌گه‌ر تاکه‌ زیندووێکیش بمێنێته‌وه‌ . " 
ئۆنده‌ر سه‌باره‌ت به‌ ته‌ندروستی ئۆجالانیش ده‌ستنیشانی کرد : " ته‌ندروستی زۆر باش بوو، وه‌کو هه‌ر کات زینده‌ و به‌ مۆراڵ بوو ." 
ئۆنده‌ر ئاماژه‌ی به‌وه‌ کرد که‌ دیداره‌که‌یان نزیکه‌ی (3.5) کاتژمێر به‌رده‌وام بووه‌ و وتی :" به‌ڕێز ئۆجالان له‌ سه‌ره‌تای دیداره‌که‌دا وتی که‌ زۆر گرنگه‌ کۆتایی به‌ ده‌ستوه‌ردان له‌ شانده‌که‌ بهێندرێت و به‌مشێوه‌یه‌ رێکخستنه‌وه‌شی به‌ گۆڕانکارییه‌کی به‌نرخ له‌قه‌ڵه‌م دا ." 
سڕی سوره‌یا ئۆنده‌ر له‌ به‌رده‌وامی لێدوانه‌که‌یدا رایگه‌یاند :" به‌ر له‌ هه‌موو شتێک داوای لێکردین که‌ سوپاس و پێزانینی به‌و که‌سانه‌ بگه‌یه‌نین که‌ بڕوایان به‌ ئاشتی یه‌ و به‌ره‌و ئه‌و ئامانجه‌ رێگه‌یان گرتووه‌ و هاوکاری ده‌که‌ن . پێیشی راگه‌یاندین که‌ پرۆسه‌که‌ به‌ قۆناخێکی زۆر جددی گه‌یشتووه‌ و له‌گه‌ڵ‌ به‌رده‌وامکردنی قۆناخه‌که‌شدا ئۆجالان جه‌ختی له‌سه‌ر ئه‌وه‌ کرده‌وه‌ که‌ قۆناخه‌که‌ له‌سه‌ر پردی سیراته‌ . " 

^{سەرچاوە سەربازییەكان لە حكومەتی عێراق رایانگەیاند لە چوارچێوەی ئەو رێككەوتننامەیەی لەنێوان حكومەتی عێراق و حكومەتی رووسیا بۆ كڕینی چەك لە مۆسكۆ واژوو كراوە، عێراق 4 هەلیكۆپتەری جەنگی جۆری (MI 35) لە رووسیاوە بەدەست گەیشتووە. لیوا فازڵ جەمیل بەرواری، فەرماندەی فیرقەی (زەهەبی) بۆ ئەنجامدانی پرۆسە تایبەتەكان لە حكومەتی عێراق، لەسەر پەیجی تایبەتی خۆی لەسەر تۆڕی كۆمەڵایەتی (فەیسبو‌وك) نووسیویەتی:"فڕۆكە جەنگییەكانی رووسیا لە جۆری (MI 35)  گەیشتنە عێراق". ئەو فەرماندەیە بە چاكترین فڕۆكەش ناویان دەبات. ئاژانسی هەواڵی رووسیاش جەختیكردووەتەوە، كە بەپێی رێككەوتنی نێوان هەردوو وڵات ئەو چوار هەلیكۆپتەرە رادەستی عێراق كراون. ئەمە لەكاتێكدایە عەباس بەیاتی، پەرلەمانتاری دەوڵەتی یاسا لەلێدوانێكی رۆژنامەوانیدا رایگەیاند:"رووسیا سەرجەم ئەو فڕۆكانە رادەستی عێراق دەكات كە لە چوارچێوەی ئەو رێككەوتننامەیەی ساڵی رابردوو لەسەری رێككەوتوون، بەم نزیكانەش فڕۆكە جەنگییەكانی رووسیا لەعێراق دەخرێنە بواری خزمەتی سەربازییەوە". عێراق گرێبەستێكی لەگەڵ رووسیا واژوو كردووە بۆ كڕینی 40 فڕۆكەی هەلیكۆپتەری جۆری (MI 35) (meو (MI 28)  كە بە ڕاوكەری شەو دەناسرێن.}

^10/11/2013

^{رۆژنامەی واشنتۆن پۆستی ئەمەریکایی نووسیویەتی، هەرێمی کوردستانی عێراق بە هاوكاریی تورکیا بەرەو هێنانەدی خەونی سەربەخۆیی دەچێت، ئەمەیش لە كاتێكدایە كە بەشەكانی دیكەی عێراق، بەرەوڕووی شەپۆلێكی توندوتیژی و تەقینەوە بوونەتەوە.} 

^{لە راپۆرتێکی واشنتۆن پۆستدا كە دوێنێ شەممە بڵاو كراوەتەوە هاتووە، هەرێمی کوردستان لە زۆر ڕووەوە وەکو دەوڵەتێکی خاوەن سەروەری و سەربەخۆ رەفتار دەکات؛ دەستەڵاتدارێتیی كورد هەموو پێداویستی و خزمەتگوزارییەكی گشتییان بۆ خەڵكی دابین كردووە، سوپای تایبەتی هەیە و سنووری هەرێم لە دەست خۆیاندایە و پاسەوانییەكی چڕی سنووری هەرێم لەگەڵ بەشەكانی دیكەی عێراق كە عەرەبن، دەكەن؛ زۆرینەی باڵاخانە حكوومییەكان لە هەولێر ئاڵای كوردستانیان لەسەر دەشەكێتەوە نەك هیی عێراق، نەوەی تازە پێەگەییوی كوردستان، فێری زمانی عەرەبی نەبوون و تەنیا بە كوردی قسە دەكەن.} 

 ^{ڕۆژنامەكە ڕوونی كردووەتەوە هێشتا هەرێمی کوردستان بە هۆی بەشە بودجەیەوە كە لە خەزێنەی عێراقەوەیە بە بەغداوە بەستراوەتەوە، بەڵام ئەمە ڕەنگە بە خێرایی بگۆڕێت، بە چاوپۆشینی ئەو دوژمنایەتییەی ساڵانێكی زۆر لەنێوان هەرێمی کوردستان و تورکیا درێژەی هەبوو، ئێستا هەردوولا رێکكەوتنی ئابووری و وزەییان لە نێواندا هەیە و بەهۆی ئەو پەیوەندییەش هەرێمی کوردستان لە رووی ئابوورییەوە سەربەخۆ دەبێت.}

^{واشنتۆن پۆست پێی وایە، یەكەم هەنگاوی سەرەكیی ئەو پلانەیش كە سەربەخۆیی هەرێمی كوردستانە لە بواری وزەدا، بە ڕاكێشانی ڕاستەوخۆی هێڵی بۆریی نەوتە بۆ توركیا كە كۆتایی ئەمساڵ دەكەوێتە كار.}

 ^{رۆژنامەکە لە زاری بەرپرسێکی کوردکە نەیویستووە ناوی ئاشکرا بکرێت ،گواستویەتیەوە "سەربەخۆیی ئامانج و هیوای  دڵی هەموو  کوردێکە، بەڵام دەبێ ستراتیژیانە بێت."}

^{راپۆرتەکە ئاماژەیشی داوە، لە جیاوازییەكانی پەیوەندیی نێوان تورکیا و هەرێمی کوردستان لە ئێستا و رابردوودا ئەوەیە، سەرباری ئەوەی كە پێشتر تورکیا بە هەموو شێوەیەک  دژی دروستکردنی هەرێمێکی کوردی بوو  لە عێراق، بە بیانووی ئەوەی كوردانی توركیایش هان دەدات داوای جیابوونەوە بكەن، بەڵام ئێستا رەنگە تورکیا فاكتەری سەرەكیی خەونەکانی کورد بێت.}

^10/11/2013

^{وەزارەتی ناوخۆی هەرێمی كوردستان كارە تووندوتیژییەكانی دوێنێی هەولێر، كە بەردبارانكردنی كونسوڵخانەی ئێرانی لێكەوتەوە "ئیدانە" دەكات و جەختدەكاتەوە كە ئەنجامدەرانی ئەو كارە رووبەڕووی سزای یاسایی دەبنەوە. دوێنێ هەینی نزیكەی كاژێر 4ی ئێوارە، لەلایەن ژمارەیەك خۆپێشاندەر، كە خۆپێشاندانێكیان دژی لەسێدارەدانی لاوانی كورد لە ئێران بۆ بەردەم كونسوڵخانەی كۆماری ئیسلامی ئێران لە هەولێر سازكردبوو و بەشی زۆری خۆپێشاندەرەكان ئەندامانی پارتەكانی رۆژهەڵاتی كوردستان بوون، كونوسڵخانەی ئێران بەردباران كرا. بە گوتەی پەیامنێری رووداو كە لە شوێنی رووداوەكە ئامادەبوو، ژمارەیەك خۆپێشاندەر ئاراستەی خۆپێشاندانەكەیان گۆڕیوەو كونسوڵخانەی ئێرانیان بەردباران كردووە. لەبارەی مۆڵەتی خۆپێشاندانەكەوە، لە روونكردنەوەیەكدا كە كۆپییەكی بۆ (رووداو) نێردراوە، وەزارەتی ناوخۆی هەرێمی كوردستان رایگەیاندووە "ژمارەیەك رێكخراوی كۆمەڵگەی مەدەنی داواكاری وەرگرتنی مۆڵەتیان پێشكەش بە پارێزگای هەولێر كرد بۆ ئەنجامدانی گردبوونەوەیەك لە رۆژی هەینی 8 / 11 / 2013 لە پاركی شانەدەر، پارێزگای هەولێریش لە سۆنگەی بڕوابوون بە مافی هاووڵاتییان لە دەربڕینی بیروڕا و جێبەجێكردنی یاسا مۆڵەتی پێ دان". سەبارەت بەو رووداوانەی لەدوای خۆپێشاندانەكە كەوتنەوە، وەزارەتی ناوخۆ بە "كاری نایاسایی و گێرەشێوێنی" لە قەڵەمی دەدات ‌و سەرباری ئیدانەكردنی، جەختدەكاتەوە "ئەنجامدەرانی رووبەڕووی سزای یاسایی دەكەینەوە".}

^{دەقی روونكردنەوەكە:}

^{روونكردنەوەیەك لە وەزارەتی ناوخۆ ژمارەیەك رێكخراوی كۆمەڵگەی مەدەنی داواكاری وەرگرتنی مۆڵەتیان پێشكەش بە پارێزگای هەولێر كرد بۆ ئەنجامدانی گردبوونەوەیەك لە رۆژی هەینی 8 / 11 / 2013 لە پاڕكی شانەدەر. پارێزگای هەولێریش لە سۆنگەی بڕوابوون بە مافی هاووڵاتییان لە دەربڕینی بیروڕا و جێبەجێكردنی یاسا مۆڵەتی پێ دان، بەڵام دوای تەواوبوونی گردبوونەوەكە و بڵاوەكردنیان بە داخەوە هەندێكیان بەرەو كونسوڵخانەی كۆماری ئیسلامی ئێران چوون و كاری نایاسایی و گێرە شێوێنیان ئەنجام دا. لێرەدا ئێمە وەك وەزارەتی ناوخۆ ئەم كارە گێرەشێوێنییە بەتوندی ئیدانە دەكەین و راشی دەگەیەنین كە ئەنجامدەرانی رووبەڕووی سزای یاسایی دەكەینەوە.}

^{وتەبێژی فەرمی وەزارەتی ناوخۆ} 

^9/11/2013

^{ڕۆژنامەی مەعاریفی ئیسرائیلی گرتەیەكی ڤیدۆیی لە تەلەڤزیۆنی ئێرانییەوە گواستوەتەوە دەربارەی چۆنیەتیی هێرشكردنە سەر ئیسرائیل و پێكانی ئەو ئامانجانەی كە دەستنیشان كراون.} 

^{لە گرتە ڤیدۆییەكەدا ئەو مووشەكە دوورهاوێژانە نیشان دراون كە لە خاكی ئێرانەوە ئاراستەی ئیسرائیل دەكرێن؛ هاوكات ساتی گەیشتنی مووشەكە ئێرانییەكان بۆ ئاسمانی ئیسرائیل و چۆنیەتیی بەرگریی ئاسمانیی ئەو وڵاتە و پۆچەڵكردنەوەی هەندێ مووشەك و پێكانی هەندێ ئامانجی دیاریكراو لە نێو جەرگەی تەل ئەبیب لە لایەن مووشەكە ئێرانییەكانەوە دیاری كراوە.}

^{لە گرتە ڤیدیۆییەكەدا هەروەها ئەو شوێنانە ڕوون كراونەتەوە كە بە شوێنی هەستیاری ئیسرائیل ناو براون، وەك فڕگەی بن گوریۆن و وێستگەی ئەتۆمیی دەیمونە و یەكەكانی بەرگریی لە تەل ئەبیب و بانكی ناوەندیی ئیسرائیل.}

^{لینكی ڤیدیۆكە}

^{http://www.youtube.com/watch?v=68CsCjIJaeE}

^9/11/2013