(2).jpeg)
لە فەرهەنگی ویکیپیدیادا کە بە ویکشنەری یان ویکیفەرهەنگ ناودەبرێت، کوردی بووەتە هەشتەم دەوڵەمەندترین زمانی جیهان و لە پێش فارسی، تورکی و عەرەبیشەوەیە.
بە گوێرەی ماڵپەڕی ئینگلیزیی فەرهەنگەکە، ژمارەی وشە کوردییەکانی نێو فەرهەنگەکە گەیشتوونەتە 918 هەزار و 123 وشە. فەرهەنگەکە لە جۆری فەرهەنگی ئازادە، واتە هەموو بەکارهێنەرێک لە ئینتەرنێت دەتوانێت وشەی بۆ زیادبکات، بەڵام لە لایەن 7 سەرپەرشتیارەوە پێداچوونەوەیان بۆ دەکرێت و بڕیار لەسەر پەسندکردنیان دەدرێت.
کوردی لە کۆی 168 زمانی نێو فەرهەنگەکە، لە ریزی هەشتەمە و لە دوای ئینگلیزی، فەرەنسی، مالاگاسی (واتە زمانی مەدەگاسکار)، چینی، رووسی، یۆنانی و ئەڵمانییەوە دێت.
لە ویکیفەرهەنگەکەدا زمانی عەرەبی 67 هەزار و 624 وشە؛ فارسی 104 هەزار و 581 وشە و تورکی 359 هەزار و 195 وشەیان هەیە.
ئەو وشە کوردییانەی کە بۆ ویکیفەرهەنگ زیادکراون، تەنیا سەر بە شێوەزارەکانی کرمانجیی سەروو و کرمانجیی خواروون، واتە وشەی زارەکانی گۆرانی، زازایی و لوڕی لەخۆناگرێت، لە کاتێکدا کە بە گوێرەی لاپەڕەی ئینگیلیزیی ویکیپیدیا، زمانی کوردی بە گشتی بە هەموو زار و بنزاراوەکانییەوە لەسەر ئاستی زمانەکانی جیهان لە دوای فینلەندی و کۆرییەوە بە ملیۆنێک و 200 هەزار وشە و دەربڕین، لە پلەی سێیەمدا دێت.
زمانی کوردی سەر بە خێزانی هیندۆئەوروپییە و بە گوتەی محەممەد کاروانی، سەرۆکی ئینیستیتیوتی کوردی لە سویسرا بۆ رووداو، زیاتر لە 70 ملیۆن کورد لە جیهاندا دەژیت.
30/9/2023
