^{یەکێتی ئەوروپا ڕۆژی دووشەممە سزای بەسەر جێگری وەزیری بەرگریی کۆماری ئیسلامی ئێران و ئەندامانی باڵای سوپای پاسداران و سێ هێڵی ئاسمانی ئیراندا سەپاند کە دەوترێت فڕۆکەی بێفڕۆکەوان و مووشەک و کەرەستەی دیکەیان بۆ ڕووسیا ناردووە بۆ بەکارهێنانی لە شەڕەکەی دژی ئۆکرانیا.}

^{هێڵە ئاسمانییەکان بریتین لە ئێران ئەیر، ماهان ئەیر و ساها و هەروەها سەید حەمزە قەلەندەری، جێگری وەزیری بەرگری کۆماری ئیسلامی ئێران، لە نێو ئەو کەسانەدایە کە سزایان بەسەردا سەپێنراوە.}

^{حەمزە قەلەندەری کە یەکێکە لەو حەوت بەرپرسە باڵایەی کۆماری ئیسلامی ئێران، ئێستا گەشتکردنی بۆ ئەورووپا قەدەغە کراوە و سەروەت و سامانەکەی لەو یەکێتییەدا سڕکراوە. بەگوێرەی بەیاننامەی یەکێتیی ئەورووپا، بەهۆی پێگەی بەرزی قەلەندەری لە حکومەتدا، ناوبراو بەشدار بووە لە پەرەپێدانی فڕۆکەی بێفڕۆکەوان و بەرنامەی مووشەکی کۆماری ئیسلامیدا.}

^{بەپێی سزا نوێیەکانی یەکێتیی ئەورووپا، سەروەت و سامانی ئەو سێ هێڵە ئاسمانییەی سزایان بەسەردا سەپێندراوە، سڕ دەکرێن. یەکێتیی ئەورووپا ڕایگەیاند کە فڕۆکەی ئەو کۆمپانیایانە چەندین جار بۆ گواستنەوەی فڕۆکەی بێفڕۆکەوان و تەکنۆلۆژیای پەیوەندیدار بە ئێران بەکارهێنراون و ڕووسیاش لە جەنگەکەی دژی ئۆکرانیا بەکاری هێناون.}

^{ئەمەریکا و یەکێتی ئەوروپا لە بەرامبەر هاوکارییە سەربازییەکانی کۆماری ئیسلامی ئێران لەگەڵ ڕووسیا، چەندین پاکێجی سزایان بەسەر کەس و دامەزراوە ئێرانییەکاندا سەپاندووە کە بەشدارن لە پەرەپێدانی ئەو پەیوەندییانە.}

^{سەرچاوە/ڕۆیتەرز}

14/10/2024