سه‌ڵاحه‌دین ده‌میرتاش، هاوسه‌رۆكی پارتى ئاشتى‌و دیموكراسى، له‌گه‌ڵ په‌رله‌مانتار‌و به‌رپرسانی پارته‌كه‌ی سه‌ردانی سه‌رۆك شاره‌وانی‌و ئه‌نجوومه‌نی شاره‌وانییه كورده‌كانیان كرد بۆ ئیدانه‌كردنی گۆشه‌گیری عه‌بدولڵا ئۆجه‌لان رێبه‌ری PKK، هه‌روه‌ها له باره‌گای سه‌ره‌كی BDP مانیان گرتووه.
ده‌میرتاش له قسه‌كانیدا ئاماژه‌ی به‌وه كرد كه "كورد له‌پێناو ژیانێكی ئازاد ئاماده‌ی هه‌موو قوربانییه‌كه‌‌و پێویسته هه‌موو كه‌س زیاتر له‌و چالاكییه‌ی ئێوه خاوه‌نداریه‌تی بكات، ئه‌و چالاكییه رێگای سیاسه‌تی دیموكراتی به‌بنبه‌ستبوو ده‌كاته‌وه".
ده‌میرتاش له قسه‌كانیدا ره‌خنه‌ی له میدیای توركی گرت‌و رایگه‌یاند "گه‌لی كورد بۆ دوارۆژێكی ئازاد خاوه‌نداریه‌تی له ئازادی خۆی ده‌كات، به‌ڵام به‌داخه‌وه ئه‌نقه‌ره ئه‌و راستیه نابینێت".
ده‌میرتاش له به‌شێێكى دیكه‌ى قسه‌كانیدا ئاماژه به په‌یوه‌ندی نێوان كورد و ده‌وڵه‌ت ده‌كات‌و گوتى "كورد له‌لایه‌نی رۆحی‌و هه‌سته‌وه له ده‌وڵه‌ت دابڕاوه، به‌شێكی گه‌لی كورد ئه‌و ده‌وڵه‌ته به ده‌وڵه‌تی خۆی دانانێ"، گوتیشى "ئێمه لایه‌نگری جیابوونه‌وه ناكه‌ین، ده‌خوازین به‌یه‌كه‌وه بژین، به‌ڵام ناخوازین وه‌كو كۆیله بژین، چونكه گه‌لی كورد خاوه‌نی ره‌سه‌نی ئه‌و خاكه‌یه‌‌و ده‌بێت دان به‌هه‌موو مافه نه‌ته‌وه‌ییه‌كانی بنرێت بۆئه‌وه‌ش پێویسته له‌گه‌ڵ ئۆجه‌لان‌و KCK و BDP گفتوگۆ بكرێت".
ده‌میرتاش داوای له حكومه‌تى توركیا ده‌كات ئاماده‌كاری بۆ راپرسی بكات ده‌رباره‌ی داواكارییه‌كانى كورد گوتى "ده‌خوازین به سندوقی ده‌نگدان كورد چاره‌نووسی خۆی دیاری بكات، كه ئایا ئۆتۆنۆمی؟ یان فیدڕالی؟ ده‌وێت".
