رووداو- بەغدا
هۆشیار زێباری، وەزیری دەرەوەی عێراقی فیدراڵ رایگەیاند "ئێران پێشنیاری کردووە که وتوووێژی ئێران و وڵاتانی 5+1 که تایبەته به بەرنامە ئەتۆمییەکەی ئێران، لە جیاتی تورکیا لە عێراق بەڕێوە بچێت.
به گوتەی زێباری، شاندێکی ئێرانی دۆینێ سێ شەممە، به فەرمی ئەو پێشنیارەیان به بەغدا داوە.
ئەو داوایەی ئێران لە کاتێکدایه کە سەرەتای ئەم هەفتەیه، هیلاری کلینتۆن، وەزیری دەرەوەی ئەمریکا رایگەیاندبوو که ووتوووێژەکانی تایبەت به بەرنامە ئەتۆمییەکەی ئێران لە ئیستەمبۆڵی تورکیا بەڕێوە دەچێت.
چاودێرانی سیاسی هۆکاری ئەم پێشنیارەی ئێران بۆ گۆڕینی شوێنی وتوووێژەکان له ئیستەمبۆڵەوە بۆ بەغدا، بۆ ئاڵۆزی پەیوەندییەکانی تاران و ئەنکەره به تایبەت سەبارەت به پرسی سوریا دەگەڕێننەوە.
هەفتەی رابردوو، ره‌جه‌ب ته‌یب ئه‌ردۆغان، سه‌رۆك وه‌زیرانی توركیا، سەردانی کۆماری ئیسلامی کرد و لەگەڵ گەورە بەرپرسانی ئەو وڵاته سەبارەت به بەرنامه ئەتۆمییەکەی ئێران و پرسی سوریا کۆبووە بەڵام لێدوانەکانی ئەردۆغان لەسەر سوریا، پەیوەندی نێوان ئەو دوو ولاتەی ئاڵۆزتر کردەوە.
ئاخرین دانیشتنی ئێران و گروپی 5+1 لە کانوونی دووەمی ساڵی رابردووودا بەڕێوە چوو، که بەبێ هیچ ئەنجامێک کۆتایی پێ هات.
گروپی 5+1 لە 5 ئەندامی هەمیشەیی ئەنجەمەنی ئاسایشی رێکخراوی نەتەوە یەکگرتووەکان و ئەڵمانیا پێک هاتووە.
ئامانجی سەرەکی ئەم گروپه هاوکاری و هەماهەنگی کۆمەڵگای نێودەوڵەتی لە بەرامبەر بەرنامه ناوەکییەکەی ئێرانه.
