ناسرقادرپوور
بە لەبەر چاوگرتنی گۆڕانكاریەكانی ناوچەكە، دەكرێ بە دەرفەتی گونجاوی بزانین بۆ راگەیاندنی دەوڵەتی كوردی لە باشوری كوردستان، لەبەر ئەم هۆكارانە:
١. نەك هەر سیتسەمی سیاسی ناوچەكە، بەڵكو نەخشەی جوغرافیای هەندێك لە وڵاتانی ناوچەكەش دەگۆڕێت، وەك نمونەی باشوری سودان، كۆمەڵێك لە سیاسەتوان و رۆژنامەكانی ئیسرائیل و ئامریكا و ئەوروپا، ئاماژەیان بە سەرهەڵدانی چەند دەوڵەتێكی تا...زە كردووە، لەوانە، دەوڵەتی فەلەستین و كوردستان. تەنانەت ئۆباما لە وتاری سالانەیدا ئاماژەی بە دامەزراندنی دەوڵەتی فەلەستین و كۆمەڵێك گۆڕانكاری نوێ دا.
٢. ئامریكا لە ناوچەكەدا بە دوای هاوپەیمانی نوێدا دەگەڕێت، ئەمەش وەك پەرژینێك بۆ پاراستنی بەرژەوەندییەكانی، بەتایبەتی بەرامبەر بە یەكێتی ئەوروپا و زاڵبوون بەسەر دەست باڵایی ئێران لەناوچەكەدا. دوای راپەرینی وڵاتانی ناوچەكە ئیستا بۆ ئامریكا روون بۆتەوە كە دەیان گروپی نووستووی ئیسلامی لەو وڵاتانەدا سەریان هەڵداوە، بە تایبەتی لە میسر و بەحرەین، كە بە ژمارەی ئێران هەژمار دەكرێن.
٣. هەموو وڵاتانی ناوچەكە، بە ئێران و سوریا و توركیاشەوە، بەدەست كێشە و قەیرانی ناوخۆیی خۆیانەوە گیرۆدە بوون، ئەمەش وا دەكات كە نەپرژێنە سەر كاروباری وڵاتانی تر و دەستێوەردان نەكەن. بە تایبەتی كە لە سوریا راپەڕین بۆ روخاندنی حكومەتەكەی بەشار ئەسەد دەستی پێكردووە، لە توركیاش خۆپیشاندانی ناڕەزایی و خەباتی مەدەنی حیزبە كوردییەكان درێژەی هەیە، لە ئێرانیش نارەزایەتی بەناو سەوزەکان هێشتا بەردەوامە.
با بەهەموو مان کۆك بین لەسەر، یەکدەنگی و یەکریزی و بەرژەوەندی گەلەکەمان، دیالۆگێکی ئوسۆلی و زانستیانە، تۆڵرانس و دیمۆکراتی بکەینە بنەمایی دامەزراندنی دەوڵەتی کوردی و کوردستانێکی ئازاد.
خۆ نوێ کردنەوە و بەخۆداهاتنەوە، بکەینە هەوێنی سەرەتای کۆمەڵگایەکی تەندروست و مودێرن.
ناسرقادرپوور
