(2).jpeg)
جەلال خۆشکەلام
زۆر لەمێژە دەمهەوێ سیاسەتی بانێکەو دوو هەوای بەشێک لە ئەحزابی کوردی کوردستانی ئێران (ڕۆژهەڵاتی کوردستان)، بەرامبەر بە شێوە بیرکردنەوه و تێڕوانینەی کە هەیانە بەرامبەر بە دەوڵەتی ئێستای ئێران، دەوڵەت و نیزامی ڕێژیمی ئاخوندیی ئێران بدوێم، بەڵام بە حورمەتی ئازادی بیڕکردنەوە و شێوە و ڕێباز و سیاسەت و بۆچوونی جیاواز لەناو ماڵی کوردی دا و بەشێکی تریش بەو دەلیلەی كە ڕۆژگارێکی ئاڵۆز و هەستیار و فەزایەکی نائارام باڵێ بەسەر شەقامی کوردی دا کێشابوو، بەتایبەتیش لە نێوان هێزو لایەنە سیاسیەکانی کوردستانی ئێراندا،(ڕۆژهەڵاتی کوردستان) بێدەنگیم هەڵبژارد و بڕیارم دا هیچ لەو بارەیەوه نەڵێم، بەڵام ئێستا هەمدیسان بەحورمەتی ڕای جیاواز و کەم تا کورتێکیش هێورکردنەوەی بارودخەکە دەمهەوێ بەبێ توانج و تانە و تەشەر هاویشتن بۆ هیچ کەس و لایەنێک، سوکە باسێک لە سەر سیاسەتی بانێکەو دوو هەوا، ی هەندێك ئەحزاب و سیاسەتوانانی کوردی سەر بە کوردستانی ئێران (ڕۆژهەڵاتی کوردستان) بکەم.
ڕاستە دنیایی سیاسەت سەر و بنی بۆ نیە و بە مروری زەمان و ڕۆژ گۆڕانی بە سەر دادێ، بەڵام ئەهمیەت نەدان بە مێژووی ٣٣ ساڵە لەگەڵ ئەو ڕێژیمە دا و نەبین و هەست نەکردن بە ئەمری واقع و تێڕوانین لە سیاسەتی بێ سەر و بەرە و دیکتاتۆریانەی ڕێژمی ئاخوندی، هیوابوون بە یاری و گەمەی سیاتی ڕۆژ تەنها و تەنها دەبێتە خەونێکی خەیاڵی و خۆ دزینەوە لە ئەمری واقع.
ڕەوا نیە ئێمە پاش ئەو هەموو ماڵوێرانی و دەربەدەریە، کوشتن و بڕین و ئەو هەموو ناعەدالەتی کۆمەڵایەتی و ئابوریەیی کە بەسەر گەلانی ئێراندا بەگشتی و گەلی کوردی چەوساوەدا بەتایبەتی، دا هاتوە، لە فەزایەکی ئاوادا، کە ڕێژیمێکی جەلاد و خوێنڕێژ و دیکتاتۆری وەک ڕێژیمی ئاخوندی دەسەڵاتی خۆی پەیڕە و دەکا و هەموو دنیا دژیەتی تۆ بێی داوای ماف و ئازادیەکانت لەژێر سێبەر و دەسەڵاتی ئەو ڕێژیمە دا بکەی و ئامادەبی لەگەڵی دابنیشی و هاوکاری بی، بە مەرجێک هەندێک دەسەڵاتی سەرەتایی کلتوریت بداتێ، یان گریمان زۆربەی هەرە زۆری ئەو مافانەی کە تۆ داوایان دەکەی بۆ نەتەوەکەت بۆت مسۆگەر بکا و بیخاتە ژێر ڕکێفی جەنابتانەوە.
وای دابنێ، گریمان ڕژیمی دیکتاتۆر و نەگریسی ئاخوندەکان فەرمایشتی فەرموو کە بەڵێ ڕازیم لەگەڵ ئەو ئەحزابە کوردیانە دابنیشم و مافە سەراتاییەکانی کوردیش بدەم . با کەمێکی تر خەیاڵ پڵاوەکەمان چەورتر کەین و وای دابێین کە ئەو ئەحزابە کوردیانەی کە سەری زمان و بنی زمانیان باسکردنە لە دنیایی دیموکراسی و مافی یەکسانی گەلانە وەبەر خوانی ئەو خەیاڵ پڵاو کەوتن و چونەوە کوردستانی ئێران، تاکو ڕێبەرایەتی ئەو ماف و ئازادیانە بکەن کە ڕێژیمی ئاخوندی بۆ گەلی کوردی دابین کردوە.
پرسیار لێرەدا ئەوەیە، ئایە تا چەند ئەم ئەحزابگەلە دەتوانن دەتوانن کاریگەریان بەسەر گۆڕانی نیزام و عەقڵیەتی ئاخوندەکاندا هەبێ و لەژێر سایە و سێبەری ئەواندا باس و خواسی دیموکراسی بێننە گۆڕێ؟ ئەو دیموکراسیەیی کە لە هەزێنە و شکڵی دەوڵەتێکی ئاوا دیکتاتۆردا بوونی نەبوە و نابێ و دەچێتە خانەی خەون و خەیاڵەوە. گومانم نیە هێندەی نوکە دەرزیەک ناتوانن تەئسیر و کاریگەریان هەبێ لە سەر ڕێژم و نیزامی ئاخوندەکان، بەڵام وای دابنێ ئەم ئەحزابگەلە توانیان هیچ نەبێ لەچوارچێوەی سنووری کوردساندا توانیان پرەنسیپی دیموکراسی بەڕێوە بەرن و زمان و کلتور و مافە سەرەتاییەکان بۆ کوردان مسۆگەر کرا و کورد ئاهێکی هاتەوە بەرێ، ئەدی مامەڵە کردن و هاوبەشی کردنت لەگەڵ حکومەتی مەرکەزیدا، کە مەرکەزەکەی لە تارانە و دەسڵەتەکەش بە دەست ئاخوندەکانەوەیە چۆن دەبێ و دەگا بە کوێ؟
ئەو کات ئەو ئەحزابگەلە هەلوێستیان چ دەبێ بەرامبەر ڕاوەدونان و گرتن و کوشتن و ئازاردان و چەوساندنەوەی نەتەوەکانی تری غەیری کورد، کە لە ئێراندا دەژین؟
ئەو ئەحزابگەلە خۆ ناتوانن چاو لە هەموو شتێک بنوقێنن و بێدەنگی هەلبژێرن، دەنا باسی دیموکراسی و مافی یەکسانی گەلان و ئازادی و … هتد هەمووی کەوتونەتە ژێر پرسیارەوە. بەشداری کردن و داوای وەرگرتنی ماف و ئازادیەکانت لە دەوڵەت و نیازمێک کە دەستەسڕی سەرچۆپیەکەی بە دەست ئەم ئاخوندانەوە بێت کە ئێستا ووڵات بەڕێوە دەبەن غەیری خەوێکی خەوێکی خەیاڵی نەبێ هیچی تر نیە.
با لە کورتی بیبڕمەوە، سیاسەتی چەپڵە لێدان و هەڵپەڕکێ بۆ هاتنەدی ئەو خەون و ئامانجانەی کە لەژێر سیاسەت و نیزام و دەسەڵاتی ڕێژیمی ئاخوندی دا دەتوانن وەدەست بێن دوورن لە واقع و ڕاستیەوە. با ئەو خەون و خەیاڵ پڵاوە لە سیاسەت و ڕێبازمان دا بسڕینەوە و چی تر گەلەکەمان فیڕی خەونە خۆشکەی ناو پێخەفی ئاخوندان و خەیاڵ پڵاوی سەر خوانی ئاخوندان نەکەین و بەو ئاواتەوەش سەر لەخۆمان و نەتەوەکەمان نەشێوێنین، بەڵکو ڕاستی ئەوەیە کە کار بۆ ڕوخان و لەناوچوونی ئەو نیزام و ڕێژیمە بکەین و بۆ هاتنە سەر کاری دەوڵەتێکی نوێی دیموکراتیک، بۆ ئێران هەوڵ بدەین و لە و سۆنگەیەشەوە دەتوانین گەلمان ئازاد کەین و باس لە دەوڵەتی سەربەخۆیی بۆ کورد، یان هەر مافێکی دیکە کە شیاوە بۆ کورد بکەین.
