^{ڕۆژی هەینی ٣ی بەفرانبار "سەید نەجمەدین ئەنیسی" ناسراو بە "بەهار"، شاعیر، نووسەر و لێکۆڵەری خەڵکی مەهاباد لە تەمەنی ٧٠ ساڵیدا بەهۆی جەڵتەی مێشکەوە لە نەخۆشخانەی ئەو شارە کۆچی دوایی کرد.}

^{"سەید نەجمەدین ئەنیسی" لە سەرەتای لاوێتییەوە ئۆگرییەکی زۆری بە زمان، ئەدەبیات و فەرهەنگی کوردی هەبووە و لەو ڕاستایەدا هەنگاوی بە پێزی هەڵێناوە. دەستێکی کریگەری لە کۆکردنەوە و ڕێکوپێککردنی شێعری شاعیران و ئەدیبان و هەروەها مێژووی ئەدەبیاتی کوردیدا هەبووە.}

^{ناوبراو تا ئێستا دەیان بەرهەمی لە کۆکردنەوە و ڕێکوپێککردنی شێعری شاعیران و ئەدیبانی کورد لە چاپ داوە کە بەشێکیان بریتین لە: "دیوانی حەقیقی، دیوانی ئاوات (سەید کامیل ئیمامی)، دیوانی ئەحمەدی کۆر، دیوانی سابیری، دیوانی چاوەش و دیوانی زەبیحی و...".}

^{بەرهەمێکی "ئەنیسی" بە ناوی "ئاوێنەی موکریانی" کە لە ٢٤ بەرگدا نووسراوە، هێشتا چاپ نەبووە. هەروەها دیوانی شێعرەکانی کە لە چەندین قاڵبدا و بە نێوەڕۆکی ئەوینداری و عیرفانی و کۆمەڵایەتی نووسراون، هێشتا چاپ نەکراون.}

^{"سەید نەجمەدین ئەنیسی" ساڵی ١٣٢٥ی هەتاوی لە گەڕەکی وەفایی شاری مەهاباد لەدایک بووە. خوێندنی سەرەتایی و ناوەندی و دواناوەندیی لەو شارە تەواو کردووە. ناوبراو کەسێکی خۆشناو و جێگای ڕێزی خەڵک بووە.}

^{ناوبراو ڕۆژی چوارشەممە ١ی بەفرانبار بەهۆی جەڵتەی مێشک بۆ نەخۆشخانەی شاری مەهاباد گوازرایەوە و دوای دوو ڕۆژ مانەوە لە نەخۆشخانە، ڕۆژی هەینی ٣ی بەفرانبار کۆچی دوایی کرد. ئەمڕۆ شەممە ٤ی بەفرانبار "ئەنیسی" لە گۆڕستانی ئەو شارە لە بەشی هونەرمەندان بە خاکی پیرۆزی کوردستان ئەسپێردرا.}

25/12/2021