(2).jpeg)
بەپێی راپۆرتی وەزارەتی تەندروستیی ئێران، 60 تووشبووی نەخۆشیی کۆلێرا تۆمارکراون، لەو ژمارەیە تەنیا یەک کەسیان نەبێت، ئەوانی دیکە خەڵکی رۆژهەڵاتی کوردستانن.
مریەم مەسعودی فەڕ، سەرۆکی بەڕێوەبەرایەتی نەخۆشییە گوازراوەکانی وەزارەتی تەندروستیی ئێران رایگەیاند: 42 کەس لە پارێزگای سنە، 15 کەس لە پارێزگای کرماشان، دوو کەس لە پارێزگای ورمێ و کەسێکیش لە پارێزگای بوشێهر پەتای کۆلێرایان گرتووە.
بەگوتەی مریەم مەسعودی فەڕ، تاوەکو ئێستا هیچ کەسێک لە ئێران و رۆژهەڵاتی کوردستاندا بەهۆی نەخۆشیی کۆلێراوە گیانی لەدەستنەداوە.
ئەو کەسانەی کۆلێرایان گرتووە، تەمەنیان لەنێوان 30 بۆ 60 ساڵان دایە؛ 75٪یان پیاون و 78٪یان دانیشتووی شارەکانن.
بەگوتەی بەرپرسانی تەندروستیی پارێزگای سنە، زۆربەی تووشبووانی کۆلێرا خەڵکی شاری مەریوانن کە بەهۆی هاتووچۆیان بۆ باشووری کوردستان کۆلێرایان گرتووە.
کۆلێرا نەخۆشییەکی بەکتریاییە، لەڕێی ئاو یان ماددەی خۆراکیی خاوەوە دەگوازرێتەوە. 80%ـی ئەوانەی دەیگرن نیشانەی نەخۆشییەکەیان نییە، نیشانە گرنگەکانی سکچوون، رشانەوە، تینوێتی و گیرانی ماسوولکەکانە.
بۆ پێشگیری لە تووشبوون بە کۆلێرا، دەبێت ئاوی تەندروست بخورێتەوە، میوە و سەوزە بە دەرمانی دژە بەکتریا بشۆردرێنەوە و پێش نانخواردن دەستەکان بە ئاو و سابوون بشۆردرێن.
کۆلێرا لە جیهاندا وەک هەڕەشەیەک بۆ سەر تەندروستیی گشتیی لە قەڵەم دەدرێت و بەپێی توێژینەوەکان، ساڵانە 3 - 4 ملیۆن کەس ئەم نەخۆشییە دەگرن و نزیکەی 210 هەزار کەسیش گیان لەدەست دەدەن.
نەهێشتنی ئەم نەخۆشییە پێویستیی بە چاودێریی، دابینکردنی ئاوی خواردنەوە خاوێن و رەچاوکردنی رێوشوێنە تەندروستییەکانە.
3/8/2022
