رووداو- هەولێر
ئەدهەم بارزانی، دەڵێ "ئەوانەی ئێستا حاکمی بەغدان لەوە بچوکترن شانسیان تاقی بکەنەوە و ئێف 16 و هەموو ئێفەکانی پێشوتر هیچیان پێنەکرا".

ئەدهەم بارزانی، ئەندامی سەرکردایەتی پارتی دیموکراتی کوردستان، دوای وتارەکەی ئێوارەی ئەمڕۆی مەسعود بارزانی سەرۆکی هەرێمی کوردستان، لە پەیجی فەیسبوکی تایبەت بەخۆی نووسیویەتی "ئەوانەی ئێستا حاکمی بەغدان لەوە بچوکترن شانسی خۆیان تاقیبکەنەوە و ئێف 16 و هەموو ئێفەکانی پێشوتر هیچیان پێنەکرا؟".

ئەدهەم بارزانی دەڵێ "ئێمەی کورد چۆکمان بۆ عوسمانییەکان، شاهی شاهان، لیوای یەرموکی حافز ئەسەد، مەلیکەکان، عەبدەکان کەریم و سەلام و رەحمان و ئەحمەد بەکر و سەدام حوسێنیان دانەداوە".

 هەروەها نووسیویەتی "وێرانکردنی 5000 گوندی کوردستان، ئەنفالکردنی 195000 کورد، مەقابری جەماعی و کیمیابارانی هەڵەبجە و ئیعدامکردنی هەزاران لە ڕوڵەی شۆڕشگێری کورد نەیانتوانی کورد لەناو ببن و ئێمەمان لە مافە ڕەوایەکانمان پاشگەزبکەنەوە و هەر بەرەو پێشچووین و ئەچین و ئەوانیش بە تێکڕای بەرەو زبڵدانی مێژوو چوون".

ئەدهەم بارزانی دەڵێ "گومانی تێدانیە ئەوانەی ئێستا حاکمی بەغدان لەوە بچوکترن شانسی خۆیان تاقیبکەنەوە و ئێف 16 و هەموو ئێفەکانی پێشوتر هیچیان پێنەکرا".هەروەها ئومێدەوارە "لەم عەقلیەتە شۆفینیەی ساڵی 1921 پاشگەز ببنەوە، تا وەک ئەوانەی پێشوتر بەرەو زبڵدانی مێژوو نەچن".