ساکار عەبدوڵڵازاده

رووداو- هەولێر

سبەی حەوتەمین پێشانگای نێودەوڵەتی کتێب به بەشداری زیاتر له 12 وڵات، لە هەولێری پایتەختی هەرێمی کوردستان دەکرێتەوە.

ئەمرۆ یەکشەممه، له‌ هۆڵی به‌رِێوه‌چوونی پێشانگای نێوده‌وڵه‌تی هه‌ولێر، ده‌زگای مه‌دای رۆشنبیری و راگه‌یاندنی و وه‌زاره‌تی رِۆشنبیری و لاوانی حكومه‌تی هه‌رێمی كوردستان، له‌ كۆنگره‌یه‌كی رِۆژنامه‌وانیدا رایانگەیاند "به چاودێری سەرۆکی هەرێمی کوردستان له رۆژانی 2-11/04/2012 حەوتەمین پێشانگای نێودەوڵەتی کتێب له هەولێر بەڕێوە دەچێت".

ڤیان یوسف، بەڕێوەبەری گشتی لاوان لە وەزارەتی رۆشنبیری و لاوانی حکومەتی هەرێمی کوردستان لەو بارەوە به (رووداو)ی راگەیاند "سبەی دووشەممه کاژێر 11، به ئامادە بوونی دکتۆر بەرهەم ساڵح، سەرۆکی حکومەتی هەرێمی کوردستان و به ئامادەبوونی نوێنەرانی رۆشنبیری و راگەیاندنی زیاتر له 12 وڵات، پێشانگاکە دەکرێتەوە".

له کۆی 330 دەزگای چاپەمەنی بەشدار لەو پێشانگایه، تەنیا 32 چاپەمەنی کوردی لە هەر چوار پارچەکەی کوردستان بەشداریان کردووە.

ئازاد دارتاش، بەڕێوەبەری پەیوەندیه گشتییەکانی وەزارەتی رۆشنبیری و لاوانی حکومەتی هەرێمی کوردستان لەم بارەوە به (رووداو)ی راگەیاند "چاپەمەنییه کوردیەکان تەنها 10% رێژەی بەشداربووانی ئەم پێشانگایه پێک دەهێنن. پێویست بوو رێژەی بەشداری چاپەمەنیه کوردیەکان زۆر لەوە زیاتر با. به تایبەت که له رۆژهەڵات و رۆژئاوای کوردستان هیچ دەزگایەکی چاپەمەنی بەشداری نەکردووه".

بڕیار وایه سبەی لە میانەی کردنەوەی حەوتەمین پێشانگای کتێبدا، چەندین چالاکی موزیکی و نمایشی هونەری بەڕێوە بچێت.

هەر سبەی دوو پێشانگای شێوەکاری و فتۆگرافی لە شوێنی پێشانگای نێودەوڵەتی هەولێر دەکرێتەوە، جگه لەوەی وەزارەتی رۆشنبیری و لاوانی حکومەتی هەرێمی کوردستان، چوار كۆرِ بۆ نووسه‌ر و رِۆشنبیرانی كورد ساز ده‌دات.