^{پەرلەمانتارێكی كورد لە ئێران رایگەیاند، ئەو كۆڵبەرانەی بە تەقەی ھێزە ئەمنییەكانی دەكوژرێن، شەھیدی رێگەی نانن و داوای چارەسەری بەپەلەی دۆخەكەیان دەكات.}

شەھاب نادری، نوێنەری شارەكانی پاوەو سەلاسی باوەجان لە پەرلەمانی ئێران بە ئاژانسە خۆجێییەكانی رۆژھەڵاتی كوردستانی راگەیاندووە، لە ناوچەكانی وەكوو ھەورامان، مەریوان و بانەو سەردەشت خەڵك بەھۆی نەدارییەوە روو لە كۆڵبەری دەكەن.

^{نادری دەڵێ، لە كوردستان كارگەی وەبەرھێنان و دەرفەتی كاركردن نیە و خەڵك بە ناچاری ژیانی ناخۆشی كۆڵبەریان ھەڵبژاردووە، ھەربۆیە ئەو كۆڵبەرانەی بە تەقەی ھێزە ئەمنییەكان گیان لەدەست دەدەن بە شەھیدی رێگەی نان ناودەبات و داوا دەكات چارەسەری بەپەلەی دۆخی ژیانیان بكرێ.}

^{ئەمە لەكاتێكدایە لە 4 ئەم مانگە دوو كۆڵبەری شاری بانەی رۆژھەڵاتی كوردستان بە تەقەی ھێزە ئەمنییەكانی ئێران كوژران، ئەمەش نیگەرانی خەڵكی بانەی بەدوای خۆیدا ھێنا و خۆپێشاندان لەبەردەم دەزگا حكوومیەكانی بانە دەستی پێكرد و گرژی كەوتە نێوان ھاووڵاتیانی شارەكە و ھێزە ئەمنییەكان.}