^{مه‌سعود بارزانی، سه‌رۆكی هه‌رێمی كوردستان، له‌ كۆبوونه‌وه‌یدا له‌گه‌ڵ ئه‌حمه‌د ئه‌بو غه‌یت، ئه‌مینداری گشتی كۆمكاری عه‌ره‌بی رایگه‌یاند، بڕیاری ریفراندۆم بڕیاری تاكه‌ كه‌سێك نییه‌ تا دوابخرێت و دووپاتیشی كرده‌وه‌، له‌كاتی دیاریكراوی خۆیدا ئه‌نجام ده‌درێت.}

^{له‌ كۆبوونه‌وه‌كه‌دا، كه‌ ئه‌ندامانی ئەنجوومەنی باڵای ڕیفراندۆمی هەرێمی كوردستان ئامادەی بوون، ئەمینداری گشتیی كۆمكاری عەرەبی ستاییشی ڕۆڵی هێزی پێشمەرگەی كوردستانی كرد لە تێكشكاندنی داعش و پیرۆزبایی سەركەوتنەكانی پێشمەرگە و ئازادكردنی موسڵی لە سەرۆك بارزانی كرد. هەروەها پێزانینی هەبوو بۆ پێشكەوتنە هەمەلایەنەكانی هەرێمی كوردستان و جەختی لەوە كردەوە كە هەرێمی كوردستان بۆ كۆمكاری عەرەبی جێگەی بایەخە و كۆمكاری عەرەبی خوازیاری سەقامگیری و بەهێزبوونی كوردستانە.}

^{پێشتریش ئه‌بو غه‌یت، له‌ نامه‌یه‌كدا، كه‌ ئاراسته‌ی سه‌رۆكی هه‌رێمی كوردستانی كردبوو، داوای دواخستنی ریفراندۆمی سه‌ربه‌خۆی ده‌كرد، له‌ وه‌ڵامی نامه‌كه‌شدا، سه‌رۆك بارزانی جه‌ختی له‌ ئه‌نجامدانی ریفراندۆم له‌ كاتی دیاریكراوی خۆیدا كرده‌وه‌ و رایگه‌یاند، هه‌موو رێگه‌كان تاقیكراونه‌ته‌وه‌ و متمانه‌ له‌ عێراقدا نه‌ماوه‌.}

^{ئەمینداری گشتیی كۆمكاری عەرەبی ئاماژەی بە ئەو نەهامەتییانەدا كە بەسەر گەلی كوردستاندا هاتووە و ڕایگەیاند كە لەژێر ڕۆشنایی وەڵامی سەرۆك بارزانی بۆ نامەكەی، هاتووە كە لە نزیكەوە لەبارەی كێشەكان و ئاییندەی هەرێمی كوردستان و عێراق لەگەڵ سەرۆك بارزانی بدوێت و ئەوەی خستەڕوو كە بەو ئەنجامە گەییشتووە كە پێویستە گەلی كوردستان بپارێزرێت و هەروەها دەرفەتێك بە هەرێمی كوردستان و عێراق بدرێتەوە كە بەیەكەوە بژیێنەوە و نیگەرانیەكانیشی بە سەرۆك بارزانی ڕاگەیاند لە بەڕێوەچوونی ڕیفراندۆم لە هەرێمی كوردستان و داوای كرد كە ڕیفراندۆم بۆ ماوەیەك دوابخرێت و لەژێر چاودێریی كۆمەڵگەی نێودەوڵەتی دانوساندن لەنێوان هەرێم و بەغدادا بكرێت.}

^{لەبەرانبەردا سەرۆك بارزانی بەخێرهاتنی ئەمینداری گشتیی كۆمكاری عەرەبی و شاندی یاوەری كرد و وێڕای ئاماژەدان بە ڕەهەندە جۆراوجۆرەكانی شەڕی تیرۆریستانی داعش ڕایگەیاند كە سەرباری نەبوونی چەك و دۆخی نالەباری ئابووری پێشمەرگە بە خوێنی خۆی ئەفسانەی داعشی شكاند و ئەوە بۆ گەلی كوردستان مایەی شانازییە.}

^{هەروەها باسی هەڕەشەكانی تیرۆری كرد لەسەر ئاشتی و ئاسوودەیی گەلان و ڕایگەیاند كە ڕووبەڕووبوونەوەی تیرۆر هەوڵێكی هەمەلایەنەی پێویستە و دەبێ شەڕی فكری و كۆمەڵایەتی و ئابووریی تیرۆریش بكرێت.}

^{لەبارەی بابەتی ڕیفراندۆمیش سەرۆك بارزانی ئەوەی بە ئەمینداری گشتیی كۆمكاری عەرەبی ڕاگەیاند كە ڕیفراندۆم بڕیارێكی تاكەكەسێك نییە كە بە ئاسانی دوابخرێت بەڵكو بڕیاری خەڵك و هێزە سیاسییەكانی كوردستانە.}

^{هەروەها ئاماژەی بە مێژووی هاوبەشی گەلی كوردستان و دەوڵەتی عێراق و ئەو نەهامەتیانەدا كە بەسەر گەلی كوردستاندا هاتووە و جەختی لەوە كردەوە كە لەو مێژووە هاوبەشەدا شەراكەت جێبەجێنەكرا و تەوافوق و دەستوور و ڕێككەوتنەكانیش پێشێل كران.}

^{سەرۆك بارزانی ئەوەیشی دووپاتكردەوە كە بەپێی ئەزموونە شكستخواردووەكان لە قۆناغی جۆراوجۆر و جێبەجێنەبوونی شەراكەت و پێشێلكاریی دەستوور و ڕێككەوتنەكان، متمانە لەنێوان هەرێمی كوردستان و عێراقدا نەماوە، بۆیە گەلی كوردستان بڕیاری ڕیفراندۆمی داوە و، ڕیفراندۆمیش لە كاتی دیاریكراوی خۆیدا ئەنجام دەردرێت و گەلی كوردستان بە ئامرازی ئاشتیانە و دیالۆگ و دانوساندن مافەكانی خۆی مسۆگەر دەكات.}

10/9/2017