^{بەرپرسی فەرمانگەی پەیوەندییەکانی دەرەوەی هەرێمی کوردستان رایگەیاند، بڕیارەکەی دادگای باڵای عێراق بە راگرتنی پرۆسەی ریفراندۆم، هیچ کاریگەرییەکی نییە.}

^{فەلاح مستەفا، کە بۆ ئامادەبوون لە کۆبوونەوەکانی کۆمەڵەی گشتی نەتەوە یەکگرتووەکان لە نیویۆرکە، رایگەیاند، هەولێر پێیوایە سیستمی دادوەری لە عێراق نییە تاکوو بڕیارێکی لەمشێوەیە دەربکات.}

^{جەختیکردەوە، بڕیارەکەی بەغدا هیچ کاریگەری لەسەر گەلی کوردستان و سەرکردایەتی کورد نابێت.}

^{فەلاح مستەفا راشیگەیاند، پێشنیازەکەی ویلایەتە یەکگرتووەکانی ئەمریکا و بەریتانیا و نەتەوە یەکگرتووەکان لە ئاستی داواکارییەکانی هەرێمی کوردستان نییە، هەربۆیە تا ئێستا هیچ بەدیلێك پێشکەش نەکراوە کورد پێی رازیبێت.}

^{لە بەشێکی دیکەی وتەکانیدا فەلاح مستەفا گوتی، هەرێمی کوردستان ناتوانێت بگەڕێتەوە هاوکێشەی رابردوو لەگەڵ عێراق و بەرپرسی یەکەمیش لەم پرسە بەغدایە.}

19/9/2017