(2).jpeg)
سەرۆک وەزیری ئیسڕائیل بنیامین ناتانیاهۆ وتی دەبێت بە تێپەڕبوونی کات ڕێکەوتنە ناوەکییەکە لەگەڵ ئێراندا بگۆڕدرێت بۆ نەهێشتنی ئەو بەندانەی کە فشارەکان لادەبات لەسەر بەرنامە ناوەکییەکەی ئێران یان ئەوەتا دەبێت هەڵبوەشێنرێتەوە.
لە وتارەکەیدا لەبەردەم کۆبوونەوەی ساڵانەی سەرکردەکانی جیهان لە کۆمەڵەی گشتی نەتەوە یەکگرتووەکان ناتانیاهۆ وتی " بیگۆڕن یان هەڵیبوەشێننەوە، چاکی بکەن یان ڕەتی بکەنەوە." وتیشی " ئێسڕائیل ڕێگە نادات ئێران بنکەی سەربازیی هەمیشەیی لە سوریا دابمەزرێنێت بۆ هێزە ئاسمانی و دەریایی و وشکانییەکانی."
شایەنی باسە چەند کاتژمێرێک پێش ئەوەی ناتانیاهۆ وتارەکەی پێشکەش بکات لە کۆبوونەوەکەدا، ئیسڕائیل فڕۆکەیەکی بێ فڕۆکەوانی خستە خوارەوە کە بەسەر گۆلاندا فڕیوە و ئاماژەشیان بەوەدا کە فڕۆکەکە دروستکراوی ئێران بووە لە ئەرکێکی سیخوڕی کۆمەڵەی حیزبوڵادا بووە بەدرێژایی سنوری نێوان ئیسڕائیل لەگەڵ سوریادا فڕیوە.
وتەبێژێکی سەربازیی ئیسڕائیل کۆڵۆنێل جۆناثان کۆنیکۆس بە ڕۆژنامەنووسانی وت " ئەوەی تێیگەیشتووین ئەوەیە کە فڕۆکەکە لە ئەرکێکی سیوخوڕیدا بووە بۆ حیزبوڵا بەدرێژاریی سنورەکە بەسەر بەرزاییەکانی گۆلاندا فڕیوە."
وتیشی ": زانیارییە هەواڵگرییەکانمان پێمان دەڵێن کە فڕۆکەکە دروستکراوی ئێران بووە."
کۆنیکۆس وتی " پەیامەکەمان ئەمەیە: هێزەکانی بەرگری ئیسڕائیل ڕێگە نادەن بە هیچ پێشێلکارییەکی سنوورەکانی ئیسڕائیل و ڕێگە نادەین بە هێزەکانی ئێران یان حیزبوڵا یان جیهادی ئیسلامی یان میلیشیا شیعەکان نزیک ببنەوە لە سنورەکانی ئیسڕائیل."
21/9/2017
