^{ژووری بازرگانی و پیشەسازیی سلێمانی لەبارەی مانۆری سەربازیی ئێران و حەشدی شەعبی لە سنووری باشووری کوردستان روونکردنەوە دەدات و رایدەگەیێنێ، کاریگەرییەکی ئەوتۆی نەبووە و جووڵەی بازرگانی لە خاڵە سنوورییەکان بەردەوامە ‌و نەوەستاوە.}

^{سیروان محەممەد، سەرۆكی ژووری بازرگانی و پیشەسازیی سلێمانی بە (تۆڕی میدیایی رووداو)ی راگەیاند، ژوورەكەیان بۆ بەردەوامیدان بە جووڵەی بازرگانی لەنێوان باشووری كوردستان و وڵاتانی دراوسێ لەهەوڵدایە.}

^{گوتیشی: "ئێستا كاری بازرگانی لە خاڵە سنوورییەکانی پەروێزخان و سەرتەك و باشماخ ئاساییە ، هاتووچۆی ئۆتۆمبێل و بارهەڵگرەكان بەردەوامە، مانۆڕی سەربازیی ئێران و عێراق كاریگەرییەکی زۆری لەسەر كارە بازرگانییەكان نەبووە و هەموو شتێك وەك رۆژانی ئاساییە".}

^{سەرۆكی ژووری بازرگانی و پیشەسازی سلێمانی باسی لەوەش كرد کە بۆ بەردەوامیدان بە كاری بازرگانی، لەگەڵ یەكێتی ژوورە بازرگانییەكان لە پەیوەندی بەردەوامدان لەگەڵ نوێنەری وڵاتان بەتایبەت ئێران و توركیا، گوتیشی :"ئەوانیش لەگەڵمان هاوڕان بۆ بەردەوامیدان بە كارە بازرگانییەكان".}

^{هاوکات بەختیار قادر، پەیامنێری رووداو لە چۆمان رایگەیاند، سەرەڕای مانۆڕی سەربازی لە نزیک ئەو خاڵە سنوورییەش، بەڵام جووڵەی بازرگانی بەردەوامە و خاڵە سنوورییەکە دانەخراوە.}

^{وەک کاردانەوەیەک بەرامبەر گشتپرسی، رۆژی دووشەممە 2-10-2017 كۆماری ئیسلامیی ئێران ‌و حەشدی شەعبی عێراق لە دیوی رۆژهەڵاتی کوردستانەوە بەدرێژایی سنووری باشووری کوردستان مانۆڕێکی سەربازیی هاوبەشیان ئەنجامدا.}

2/10/2017