^{نەجمەدین کەریم لەنێو گەنجە خۆبەخشەکانی کەرکووک لەبارەی تەواوبوونی وادەی عەبادی بۆ کورد و پێشمەرگە رایگەیاند، باکیان بە هەڕەشەکان نییە و خەڵکی کوردستانیان لەپشتە.}

^{ئەمشەو لەگەڵ نزیکبوونەوەی وادەی حەیدەر عەبادی بۆ کورد و زیادبوونی مەترسیی هێرشی سوپای عێراق و حەشدی شەعبی بۆ سەر کەرکووک، سەتان گەنجی خۆبەخشی کەرکووک بە چەکەوە رژانە شەقامەکان و وێڕای دەربڕینی پشتیوانی بۆ پێشمەرگە، جەختیان کردەوە تا یەک دڵۆپ خوێنیان مابێ بەرگری لە شارەکەیان دەکەن، نەجمەدین کەریمیش سەردانیکردن و دەستخۆشی لێکردن.}

^{لە وەڵامی پرسیارێکی رووداودا نەجمەدین کەریم رایگەیاند: "گەنجانی کەرکووک دڵسۆزی خۆیان بۆ شار و خاکەکەیان و وڵاتەکەیان نیشاندا، ئەوان دەزانن ئەم شارە بە خوێنی شەهیدان و گۆڕی ئەنفالکراوان و شوێنبزرەکان هاتووەتەدی، با دوژمنیش هەستنەکات بەئاسانی دەتوانێت بێتە نێو کەرکووکەوە، دەیانەوێ کەرکووکیش وەکو خورماتوو لێبکەن، ئێمە نەک هەر ناهێڵین کەرکووک وەکو ئەوێ لێبکەن، بەڵکو خورماتووش وەک کەرکووک لێدەکەین".}

^{لەبارەی تەواوبوونی وادەی عەبادی و دوایین زانیاریش لە سەنگەرەکانی پێشمەرگەوە نەجمەدین کەریم گوتی: "ئێستا ئێمە گوێمان لێ نییە، چونکە میللەتەکەمان لەپشتمانە، میللەتەکەمان ئەوەندە نەهامەتی و زەحمەتی دیوە، ئەوەندە شەهیدی داوە، با دووژمن بەهیچ شێوەیەک جارێکی دیکە بیرنەکاتەوە بەئاسانی دێتە شارەکەمانەوە، دێتە کوردستان و وڵاتی ئێمە و بتوانێ دەستی بۆ بەرێ".}

15/10/2017