^{پارتی و یەکێتی هەڵوەشاندنەوەی ئەنجامی گشتپرسی و بژاردەی سەربازی رەتدەکەنەوە، سووربوونی خۆیشیان لەسەر چارەسەرکردنی سەرجەم کێشەکان بە دیالۆگێکی بێ مەرجی بەرپرسیارانەی بنیاتنەر لەنێوان هەولێر و بەغدا رادەگەیێنن.}

^{پارتی دیموکراتی کوردستان و یەکێتیی نیشتمانیی کوردستان رۆژی یەکشەممە 15-10-2017 لە دووکان بەسەرپەرشتی د. فوئاد مەعسووم، سەرۆککۆماری عێراق و مەسعود بارزانی، سەرۆکی هەرێمی کوردستان کۆبوونەوە.}

^{دوای کۆبوونەوەکەش راگەیێندراوێکی 5 خاڵییان ئاراستەی رای گشتی کوردستان و حکومەتی عێراق و کۆمەڵگەی نێودەوڵەتی کرد. پارتی و یەکێتی بژاردەی سەربازی بەهەموو شێوەیەک رەتدەکەنەوە و رایدەگەیێنن: "لەسەر کێشەی سەربازی و ئاسایش لە ناوچەکانی دەرەوەی هەرێمی کوردستان یان هەر ناوچەیەکی دیکە، هەر چەشنە دەستوەردانێکی سەربازی، یان جوڵاندنی هێز و هەڕەشە و گوڕەشە، جگە لە پەیوەندییەکانی لەسەر هەرێم و بەغدا، هەڕەشەش لەسەر هەر جۆرە هەوڵێکی راستگۆیانەیە بۆ چارەسەرکردنی کێشەکان و راستەوخۆ پێشێلکردنی یاسا و رێساکانە کە بڕیاریان لێدراوە".}

^{لە کۆنگرەیەکی رۆژنامەڤانی هاوبەشیشدا نێچیرڤان بارزانی و مەلا بەختیار رایانگەیاند، هەڵوەشاندنەوەی ئەنجامی گشتپرسی بەهەموو شێوەیەک رەتدەکەنەوە و تەنانەت ئامادەنین گفتوگۆشی لەسەر بکەن.}

^{پارتی و یەکێتی لە خاڵێکی دیکەدا ئامادەیی بۆ گفتوگۆی بێمەرج دەردەبڕن و دەڵێن: "هێزە کوردستانییەکان ئێستاش هەر ئامادەن گفتوگۆیەکی بێ مەرج و کراوە و بنیاتنەر، لەسەر بنەمای بەرژەوەندییەکانی بەغدا و هەولێر و پرەنسیپە دەستوورییەکان ئەنجامبدەن".}

^{هەروەها پارتی و یەکێتی بەباشی دەزانن سەرجەم لایەنە سەرەکییەکانی هەرێمی کوردستان و عێراق بەشداری دانوستاندنەکان بکەن و لایەنە نێودەوڵەتییەکانیش چاودێری پرۆسەکە بکەن.}

^{نێچیرڤان بارزانی و مەلا بەختیار لە کۆنگرە رۆژنامەڤانییەکەدا رایانگەیاند، پەیامەکەیان بە د. فوئاد مەعسووم بۆ حکومەتی عێراق دەنێرن و چاوەڕێی وەڵام دەکەن.}

15/10/2017