(2).jpeg)
ئه‌ندامێكى سه‌ركردایه‌تى پارتى دیموكراتى كوردستان، ڕاى ده‌گه‌یه‌نێت، نابێ له‌م دۆخه‌دا بێ ئومێد بین و ده‌بێ به‌هێزه‌وه هه‌ستینه‌وه.
عه‌لى عه‌ونى، ئه‌ندامى سه‌ركردایه‌تى پارتى دیموكراتى كوردستان به (باسنیوز)ى ڕاگه‌یاند: "حكوومه‌تى عێراق فێره خه‌ڵكى بیانی بهێنێته سه‌ر میلله‌تى خۆی، پێشتر به‌شێكى خاكى عێراقیان به ئێران دا بۆ شكاندنى شۆڕشى ئه‌یلوول، ئێستاش سوپای پاسدارانى ئێران و حه‌شدى شه‌عبی كه به‌شێكه له‌و سوپایه بۆ سه‌ر هه‌رێمى كوردستانیان هێناوه، به‌ڵام تا یه‌ك كورد بمێنێ واز له مافى خۆی ناهێنێ و به‌رگرى ده‌كا و سه‌ربه‌خۆیی كوردستانیش ڕاده‌گه‌یه‌نرێ".
ئه‌ندامه‌كه‌ى سه‌ركردایه‌تى پارتى ئه‌وه‌شى خسته‌ڕوو، كه گه‌لى كوردستان كاره‌سات و ڕۆژى ڕه‌شترى بینیوه و ده‌بێ بێ ئومێد نه‌بین به هێزه‌وه هه‌ستینه‌وه، چونكه ئه‌م ڕووداوانه‌ى به‌سه‌رماندا دێ باج و شیربای سه‌ربه‌خۆیی كوردستانە، ده‌شڵێت: "پرۆژه‌یه‌كى گه‌وره‌مان له پێشه و بۆ ئه‌وه‌ش ده‌شكێین و قوربانى ده‌ده‌ین و بۆیه ئه‌م میلله‌ته ده‌بێ خۆڕاگربێ و به‌رگرى بكات".
به‌ره‌به‌یانى دوێنێ دووشه‌ممه، میلیشیاى حه‌شدى شه‌عبی و سوپاى پاسدارانى كۆماری ئیسلامى ئێران، هێرشیان كرده سه‌ر كوردستان و به پشتیوانیی هێزه‌كانى سه‌ربه لایه‌نێكى سیاسی ده‌ستیان به‌سه‌ر كه‌ركووك و چه‌ندان ناوچه‌ی دیكه‌دا گرت.
17/10/2017
