^{فەرماندەی گشتیی هێزەکانی پێشمەرگەی کوردستان هێرشی بەربڵاوی هێزەکانی عێراق و حەشدی شەعبی بۆ شاری کەرکووکی بە هێرش دژی خەڵکی کوردستانەوە ناوزەد کرد.}

^{دەقی بەیاننامەی فەرماندەی گشتیی هێزەکانی پێشمەرگەی کوردستان بەم چەشنە خوارەوەیە:}

^{بەڕەبەیانیی ئەمڕۆ ١٦ـی ١٠ـی ٢٠١٧ هێزەكانی حەشدی شەعبیی سەر بە سپای پاسدارانی ئێرانی بە فەرماندەیی ئیقباڵپوور و بە هاوكاریی هێزەكانی عێراقی هێرشێكی بەرفراوانیان بۆ سەر كەركووك و ناوچەكانی دەوروبەری كەركووک دەست پێكردووە. ئەو هێرشە بە ئاشكرا ڕاگەیاندنی شەڕە لەدژی گەلی كوردستان.}

^{ئەو پەلامارە كە لە لایەن حكوومەتی عێراق و حەشد و هێزەكانی سەر بە قەرارگای قودسی سپای پاسداران ئەنجام دراوە، تۆڵەسەندنەوەیە لە خەڵكی كوردستان كە داوای ئازادیان كردووە و تۆڵەیە لە خەڵكی سەربەرزی كەركووك كە هەڵوێستی مەردانەیان نواندووە.}

^{بە داخەوە هەندێ بەرپرسی یەكیەتیش یارمەتیدەری ئەو پیلانگێڕییەی دژی گەلی كوردستان بوونە و خیانەتێكی گەورە و مێژوویییان لە كوردستان و ئەو شەهیدانە كردووە كە لەژێر ئاڵای یەكیەتی گیانی خۆیان فیدای كوردستان كردووە. ئەم چەند بەرپرسە، هەندێ شوێنی هەستیاریان بە بێ شەڕ بۆ هێزەكانی حەشد و سوپای پاسدارانی ئێرانی چۆڵ كردووە و كاک كۆسرەتیان بە تەنیا جێ هێشتووە.}

^{بە گشت لایەكیش ڕادەگەیێنین كە ئەو پەلامارەی حەشد و هێزەكانی عێراقی بە چەك و زڕێپۆش و دەبابەی ئابرامزی ئەمەریكی و چەکی تری هاوپەیمانان ئەنجام دراوە. ئەو چەكە ئەمەریكیانە دەمێكە لەژێر ناوی شەڕی داعش بە سپای عێراق و حەشد دەدرێت، ئەوە لە حاڵێكدابوو كە لە شەڕی داعشدا پێشمەرگە چەكی پێویستی پێ نەدرا بۆ شەڕ و بەرگری لە بەرانبەر تیرۆریستاندا.}

^{لێرەدا گەلی كوردستان لەوە دڵنیا دەكەینەوە كە سەرباری بوونی ناپاكی هەندێک بەرپرس و پیلانگێڕیی حكوومەتی عێراق و سوپای پاسدارن بەڵام هێزی پێشمەرگەی كوردستان بە ورەیەكی بەرزەوە لە هەموو شوێنەكان بەرگرییەكی قارەمانانە دەكات و جەختیش لەوە دەكەینەوە كە مومكین نییە بە پیلانگێڕی ئیرادەی گەلی كوردستان تێكبشكێت و ڕێگە بدەین نەیارانی گەلی كوردستان سەربكەون.}

^{داوا لە هەموو پێشمەرگە ڕاستەقینەكانی گەل و وڵات و جەماوەری خۆڕاگر و دوژمن بەزێن دەكەین ئەوەی لە دەستیان بێت بیكەن بۆ بەرخودان و تێكشكاندنی پەلاماردەران. بەرپرسی یەكەمی شەڕفرۆشتن بە گەلی كوردستان حكوومەتەكەی عەبادییە و دەبێ بە قورسی باجی ئەو زوڵمەی بدات.}

18/10/2017