^{وەزیری دەرەوەی ئەمریکا رایدەگەیێنێ، مافە دەستوورییەکان بە کورد نەدراون و کورد زۆر داوایان لە حکومەتی عێراق هەبووە بۆیان جێبەجێ نەکراون. داواش دەکات هەردوولا بە دەستوور پابەندبن و لەبارەی سنووریش بەگوێرەی رێککەوتنی نێوانیان مامەڵە بکەن.}

^{رێکس تیلەرسن، وەزیری دەرەوەی ئەمریکا، دوای ئەوەی لە سعودیەوە گەیشتە قەتەر کۆنگرەیەکی رۆژنامەڤانی رێکخست، لە سعودیەش لەگەڵ حەیدەر عەبادی، سەرۆکوەزیرانی عێراق کۆبووەوە و باسی کێشەکانی نێوان باشووری کوردستان و بەغدایان کرد.}

^{وەزیری دەرەوەی ئەمریکا داوای کرد ئەو مافانەی لە دەستووردا بۆ کورد دانراون، حکومەتی عێراق بە هەرێمی کوردستانیان بدات. ئاماژەی بەوەش کرد کە تاوەکو ئێستا مافە دەستوورییەکان بە کورد نەدراون و گوتی: "کورد لە عێراق زۆر داوایان هەبووە بۆیان جێبەجێ نەکراون، دەستووری عێراق زۆر مافی بۆ کورد داناوە، بەڵام هیچ کاتێک لە بەغدا ئەو مافانە بە کورد نەدراون".}

^{بە جەختکردنەوە لەوەی هەردوولا هاندەدەن دەستووری عێراق جێبەجێ بکەن، رێکس تیلەرسن گوتی: "لە سەرەتاوە داوامان کردووە دەستوور جێبەجێ بکەن و لە سنووریشدا بەگوێرەی رێککەوتنی نێوانیان مامەڵە بکەن".}

^{شەوی رابردووش ماک ماستەر، راوێژکاری ئاسایشیی نیشتمانی ئەمریکا لەبارەی هەڵوێستی ئەمریکا لەسەر رووداوەکانی کەرکووک رایگەیاند: "پێویستە ئەمریکا بەشێوەیەک نێوەندگیری لەم ململانێیەدا بکات ئاسایش و سەلامەتی و خۆشگوزەرانی دۆستە کوردەکانمان وەک خۆی بمێنێتەوە، کە ئەوان بە چەندین ساڵ بنیاتیان ناوە، نەوەک پاشەکشە لەوەش بکرێت، هەروەک کورد عێراقیان لەسەر رێگەی بەهێزبوون هێشتووەتەوە، تاوەکو لەگەڵ ئێران هاوئاهەنگ نەبێت".}

23/10/2017