^{بارزانی نامەیەک ئاراستەی پەرلەمانی کوردستان دەکات و لە دانیشتنی رۆژی یەکشەممە دەخوێندرێتەوە و گفتوگۆی لەسەر دەکرێت.}

^{جەعفەر ئیبراهیم، جێگری سەرۆکی پەرلەمانی کوردستان بە تۆڕی میدیایی رووداوی راگەیاند، مەسعود بارزانی، سەرۆکی هەرێمی کوردستان رۆژی شەممە 28-10-2017 نامەیەکی بۆ پەرلەمانی کوردستان ناردووە و لە دانیشتنی سبەی یەکشەممەشدا نامەکە دەخوێندرێتەوە.}

^{هاوکات پەیامنێری رووداو لە هەولێر رایگەیاند، نێوەڕۆکی نامەکەی بارزانی دابەشکردنی دەسەڵاتەکانییەتی وەکو سەرۆکی هەرێمی کوردستان بەسەر سەرۆکایەتی پەرلەمان و حکومەتدا.}

^{دوای دووجار دواخستن، رۆژی یەکشەممە 29-10-2017 پەرلەمانی کوردستان کۆدەبێتەوە. بەپێی سەرچاوەیەکی تۆڕی میدیایی رووداو، کۆبوونەوەکە تایبەت دەبێت بە پرسی سەرۆکایەتیی هەرێمی کوردستان.}

^{دوای دەرکردنی یاسای ژمارە یەکی ساڵی 2005ـی سەرۆکایەتیی ھەرێمی کوردستان لە پەرلەمانی کوردستان، مەسعود بارزانی لە 12-5-2005 وەکو یەکەم سەرۆکی ھەرێمی کوردستان لە پەرلەمان ھەڵبژێردرا و سوێندی یاسایی خوارد.}

^{دوای چوار ساڵ لە ھەڵبژاردنی راستەوخۆی سەرۆکایەتیی ھەرێمی کوردستان لە 25-7-2009دا، مەسعود بارزانی توانی یەک ملیۆن و 266 ھەزار و 397 دەنگ (رێژەی 69.60%ـی دەنگەکان) بەدەستبهێنێت و جارێکی دیکە بە سەرۆک ھەڵبژێردرایەوە، لە 20-8-2009 سوێندی یاسایی خوارد.}

^{دوای رێککەوتنی نێوان مەکتەبی سیاسی پارتی و یەکێتی بۆ ئەنجامنەدانی ھەڵبژاردنی سەرۆکایەتی لە 30 حوزەیرانی 2013 دا، ماوەی سەرۆکایەتی بارزانی بۆ ماوەی دوو ساڵ بە یاسا درێژکرایەوە، دواتر شاندێکی ھاوبەشی مەکتەبی سیاسی پارتی و یەکێتی داوایان کرد یاساکە واژۆبکات، بەڵام بارزانی یاساکەی نە رەتکردەوە، نە واژۆی لەسەرکرد.}

^{لە ساڵی 2015 شدا بەهۆی شەڕی داعش لەلایەن ئەنجوومەنی شوورای هەرێمی کوردستانەوە ماوەی سەرۆکایەتییەکەی بۆ دوو ساڵی دیکە درێژکرایەوە. لە 1-11-2017 دا دوو ساڵەکەی ئەنجوومەنی شوورا تەواودەبێت، ئەمە لەکاتێکدایە هەردوو هەڵبژاردنی پەرلەمانی کوردستان و سەرۆکایەتیی هەرێمی کورستان لەلایەن پەرلەمانەوە بۆ 1-7-2018 دواخراون.}

29/10/2017