^{دادگای ئینقلابی شاری ورمێ وێنەگرێکی کوردی خەڵکی شاری پیرانشاری بە ٦ ساڵ و سێ مانگ زیندان مەحکووم کرد.}

^{بەپێێ هەواڵی گەیشتوو بە ئاژانسی هەواڵدەریی کوردپا، وێنەگرێکی کوردی خەڵکی شاری پیرانشار، بە ناوی "سەعید ئەحمەدی" کوڕی محەممەد پاش ٨ مانگ ناڕوونی لە چارەنووسی، بە ٦ ساڵ و سێ مانگ زیندان مەحکووم کرا.}

^{سەعید ئەحمەدی لە دادگای ئینقلابی شاری ورمێ، بە تۆمەتی "هاوکاریی لەگەڵ یەکێک لە حیزبە کوردییەکانی دژبەری حکوومەتی ئیسلامیی ئێران" تاوانبار کراوە.}

^{سەعید ئەحمەدی
ڕۆژی هەینی ٢٠ی ڕەشەمە، مەئموورە ئەمنیەتییەکان، لە شاری پیرانشار هێرشیان کردە سەر دووکانی وێنەگریی "نایس" و خاوەن دووکانەکەیان دەسبەسەر کرد.}

^{سەرچاوەی هەواڵدەریی کوردپا، ئەوەی پشتڕاست کردەوە؛ کە بنەماڵەی سەعید پێشتر خاوەنی" پێشینەی سیاسی" بوون و باوکی سەعید لە سەرەتای شۆڕشی گەلانی ئێراندا لە لایەن ‌هێزە ئەمنیەتییەکانەوە بێسەروشوێن کراوە و هەروەها برایەکی سەعیدیش ساڵی ڕابردوو، لە زانکۆی ورمێ لە خوێندن بێبەش کراوە.}

^{هەر لەو پەیوەندییەدا، ڕۆژی سێشەممە ٢ی خەزەڵوەر، لقی یەکی دادگای نیزامیی ورمێ سەربازێکی کوردی بەبێ بوونی پارێزەری دیاریکراو بە ١٠ ساڵ زیندان و دوورخستنەوە بۆ زیندانی ئەردەبێڵ مەحکووم کرد.}

^{دادسەرای نیزامیی ورمێ، ئەو سەربازە کوردەی بە "سیخوڕی و هاوکاریی لەگەڵ یەکێک لە حیزبە ئۆپۆزسیونەکانی حکوومەتی ئیسلامیی ئێران" تاوانبار کردووە.}

^{ئەو حوکمە قورسەی دەزگای قەزایی ئێران کە بە دژی ئەو سەربازە کوردە دەر کراوە، لە ڕۆژی پێنجشەممە ٤ی خەزەڵوەر ناوبراوی لێ ئاگادار کراوەتەوە.}

31/10/2017