^{بیناسازی مێهر کە لە دەوڵەتی ئەحمەدی نە‌ژاد وەکوو پرۆژەیەکی ئاوەدانکردنەوەو ئاسانکاریی بۆ چینی کەم داهات کە ببن بە خاوەنی خانوو و بەرە، بانگەشەی زۆری بۆ کرا، لە بوومەلەرەزەکەی پارێزگای کرماشان بە خانووەکانی مەرگ ناویان دەرکرد و سەتا ٩٠ی ئەو بنیا و خانوویانە رووخاون و بۆ بە هۆی مەرگی سەدان کەس و برینداربوونی هەزاران کەسی دیکەشی لێکەوتەوە.
دەنگدانەوەی پتەونەبوونی بنەڕەت و ژێرخانی خانووەکانی پرۆژەی مێهر لە پارێزگای بوومەلەرزە لێدراوی کرماشان بەرپرسانی کۆماری ئیسلامیی و کەسانی بەرپرس لەو بارەوە کەوتنە یەکتر تاوانبار کردن.
ئیسحاق جیهانگیری جێگری یەکەمی سەرۆک‌کۆماری ئێران رۆژی دوای کارەساتی بوومەلەرزەی پارێزگای کرماشان ڕایگەیاند: زۆرترین ماڵوێرانی و خەساری گیانی بۆ خانووەکانی پرۆژەی مێهر دەگەڕێتەوە.
ناوبراو لە قسەکانی‌دا دەوڵەتی ئەحمەدی نەژادی بە تاوانبار زانی.}

^{هەروەها بەرپرسی گشتیی ڕێگەوبانی پارێزگای کرماشان وتی: بوومەلەرزەی ٧.٣ڕێشتێری زیاتر لە ٩٠دەرسەدی خانوەکانی مێهری لەو پارێزگایە رووخاندوە.}

^{لە بەرانبەر وتەکانی جێگیری یەکەمی سەرۆک‌کۆماری و بەرپرسی گشتیی ڕیگەوبانی ئێران رۆژی ٢٣ی خەزەڵوەر رۆژنامەی کەیهان سەر بە باڵی بناژۆخوازان لە بابەتێک‌دا نووسی ٥٣٧١ خانوو لە پرۆژەی مێهر لە دەوڵەتی یازدەیەم سازکراون کەواتە دەبێ دەوڵەتی ڕوحانی وڵامدەربێ.}

^{دەمبەدەمەی دەمڕاستەکانی نیزام و یەکتر تاوانبار کردنیان لە کاتێکدایە کە بە هۆی بوومەلەرزەی شەوی ٢١خەزەڵوەر خەڵکێکی زۆر لە پارێزگای کرماشان تووشی خەسار وزیان بوون و هەواڵەکان باس لە کەمتەرخەمیی ناوەندە دەوڵەتییەکان دەکەن، لە پێڕاگەیشتن و خزمەتگوزاریی بە خەڵكی لێقەوماو.}

^{تەنانەت یەکێک لە بەرپرسانی سەردەمی ئەحمەدی نەژاد بە چەواشەکارییەوە ڕایگەیاند: دژبەران و بەرهەڵستکارانی نیزام بە بڵاوکردنەوەی شارە وێرانەکانی سووریە وعێراق و بوومەلەرزەی میسر بە نێو کرماشانەوە دەیانهەوێ پرۆژەی مێهر بەدناو بکەن!
قسەکانی عەلی نیکزاد وەزیری ڕێگەوبانی سەردەمی ئەحمەدی نە‌ژاد لە کاتێک‌دایە کە بە دەیان وێنەو فیلم لە قەسرشیرین و سەرپێڵ زەهاو و شوێنە کانی دیکەی پارێزگای کرماشان بڵاوکراوەتە و، باس لەوە دەکا کە خانووەکانی مێهر بە هۆی گەندەڵیی ماڵیی و کەمتەرخەمیی بەرپرسان، بناغەکانی پتەو قایم نەبوون و بە هۆی بوومەلەرزەوە بوون بە پرۆژەیەکی مەرگهێنەر.}

16/11/2017