عەبدولڕەحمان سدیق 

راوێژكاری پرۆسەی پێشكەشكردنی ئەزموونێكی تەواوكارییە بۆ جێبەجێكاران و خاوەن پۆستە كارگێڕییەكان، نەك ئەڵتەرناتیڤی ئەوان و فەرمانبەرەكانیان بێت.

كاری سەرەكی راوێژكارانیش لەكاتی پێویستدا بریتییە لە:

یەكەم : پێدانی زانیاری و وەڵامی ورد بە دروستكارانی بڕیار.

دووەم : خستنەڕووی زیاد لە ئەگەرێك بۆ مامەڵەكردن لەگەڵ هەر بابەت و باسێكدا.

سێیەم: گەیاندنی هەست و كاردانەوەی كۆمەڵگە بۆ خاوەن بڕیار لەبارەی بڕیارەكانییەوە.

سەبارەت بەو پڕۆژەو پێشنیازانەش كە پێشكەشی خاوەن بڕیاری دەكەن ، پێویستە :

یەكەم : روون بن ، بەجۆرێك دارێژڕابن كە تێگەیشتن لێیان ئاسان بێت.

دووەم: وردبن ، دووربن لە گشتیبوون و زیادەڕۆیی.

سێیەم: خۆماڵی بن ، یان خۆماڵی كرابن ئەگەر لە دەرەوەش وەرگیرابن.

چوارەم: توانا مرۆیی و ماددییە بەردەستەكانی رەچاو كردبێت.

هەروەها لەسەر دەزگاكانی خاوەن بڕیار و لایەنی پەیوەندیداریش پێویستە :

یەكەم : جیاوازی بكەن لەنێوان راوێژكار و ئەو خاوەن پۆستە جێبەجێكارانەی كە بە پلەی راوێژكار دامەزراون.

دووەم: جیاوازی بكەن لەنێوان كاری راوێژكاری و كاری سكرتێری.

سێیەم : ژمارەی راوێژكارانی هەر دەزگایەك دیار بكەن ، نەك كراوەبێ و زیاد لەپێویست بن.

ئێستا لە هەرێمی كوردستاندا هەرسێ سەرۆكایەتییەكە و وەزارەتەكان ژمارەیەكی زۆر راوێژكاریان هەیە ، كە هەندێكیان تەنها بۆ راوێژكاری دامەزرێنراون و ، هەندێكیشیان كاری جێبەجێكردنیان هەیە و پلەی راوێژكاریان هەیە.

هەندێك لەم راوێژكارانە لەوانەیە دەوام نەكەن، هەندێكیشیان لەوانەیە لە دەرەوەی وڵات بن ، هەندێكیشیان لەوانەیە وەك خەڵاتكردنی خەباتیان دانرابن، هەندێكیشیان كاری دیكە دەكەن ، ژمارەیەك لەوانە دەمێننەوە كە دەیانەوێ راوێژیان پێبكرێت ، بەڵام وەك زۆربەیان لەدیدارەكانیاندا ئاماژەی بۆ دەكەن هەستدەكەن وەك پێویست گوێیان لێناگیریت .

بۆ ئەم راوێژكارانە كە وادیارە بەتەنها ناتوانن كاری بەرچاو ئەنجامبدەن ، واچاكە لە هەر سەرۆكایەتییەكدا كۆبكرێنەوە لە دەستەیەكدا و سەرۆكێكیان بۆ دابنرێت، دەستەیەكیان هەبێ بەناوی (دەستەی راوێژكاری)، كە ئەم دەستەیە سوودی زۆری دەبێت ، لەوانە :

یەكەم : بەدامەزراوەییكردنی كاری راوێژكاران.

دووەم : خستنەگەڕی تواناكانی راوێژكاران.

سێیەم : كۆكردنەوەی كار و چالاكییەكان و كاركردن بەگیانی كۆكاری و یەك تیمی.

چوارەم : گێڕانەوەی پێگەی شایان بۆ كاری راوێژكاری.

ئەگەر (ئەنجوومەنی وەزیران) بە نموونە وەربگرین ، ئەوا دەتوانرێ راوێژكاران لە دەستەیەكی راوێژكارییدا پەیڕەوێكی ناوخۆیی كاركردنیان هەبێ لەم چەشنەی لای خوارەوە:

ناوی دەستە: دەستەی راوێژكاریی ئەنجوومەنی وەزیران.

پێناسە:

پێكدێت لە سەرۆك و ژمارەیەكی دیاریكراو لە راوێژكاران كە لەلایەن سەرۆكایەتی ئەنجوومەنی وەزیرانەوە دیار دەكرێن و، لە بوارێكی دیاریكراودا شارەزایی پێویستییان هەیەو یەكلابوونەتەوە بۆ كاری راوێژكاری و پڕۆژەو پێشنیاز پێشكەش دەكەن ، یان ئەو بابەت و پڕۆژانە تاوتوێ دەكەن كە لەلایەن ئەنجوومەنەوە بۆیان رەوانە دەكرێن.

ئامانجەكانی دەستە :

یەكەم : بەشداربوون لە دانانی پلان و ستراتیژییەتی نیشتمانی .

دووەم : بەشداربوون لە ئامادەكردنی ئەو باس و توێژینەوانەی كە ئەنجوومەن داوایان دەكات.

سێیەم : بەشداربوون لە دۆزینەوەی میكانیزمی نوێ بۆ دەزگاكانی كار راپەڕاندنی دەوڵەت.

چوارەم : بەشداربوون لە خستنەڕووی راو پێشنیازی بەسوود بۆ باشتر جێبەجێكردنی پڕۆژەكانی حكومەت.

میكانیزمی كاركردنی دەستە :

یەكەم : كۆبوونەوە بەتەواوی ئەندامەكانییەوە بۆ تاوتوێكردنی بابەتێكی نێو كارنامەی سەرۆكایەتی ئەنجوومەن.

دووەم : رێكخستنی كۆڕ و سەمینار و وۆركشۆپ بۆ تاوتوێكردنی ئەو بابەتەی كە ئەندامانی دەستە بە پێویستیی دەزانن.

سێیەم : پێكهێنانی تیمی توێژینەوەی تایبەت بە تاوتوێكردنی بابەتێكی تایبەت.

چوارەم : راسپاردنی یەكێك یان زیاتر لە ئەندامێكی دەستە بۆ ئەنجامدانی توێژینەوەی تایبەت.

گرووپەكانی دەستە:

گرووپی ئابووری: بۆ راوێژكارانی بواری نەوت و دارایی و وەبەرهێنان و گەشتوگوزار و كشتوكاڵ و پیشەسازی.

گرووپی خزمەتگوزاری: بۆ راوێژكارانی بواری سەرچاوەكانی وزە و ئاو و كارەبا و تەندروستی و ژینگە و كارگێڕی و ئاوەدانكردنەوەو نیشتەجێكردن و تەكنەلۆژیای زانیارییەكان.

گرووپی گەشەپێدانی مرۆیی: بۆ راوێژكارانی بواری ئایینی و رۆشنبیری و لاوان و وەرزش و ئافرەتان و پەروەردەو خوێندنی باڵا.

گرووپی پەرەپێدانی سیاسی: بۆ راوێژكارانی بواری بەرگریی و ناوخۆو پەیوەندییە دەرەكییەكان و سیستمی فەرمانڕەوایی و یاسادانان .

كۆبوونەوەكانی دەستەو گرووپەكان ، كۆبوونەوەكان دوو جۆر دەبن:

یەكەم : كۆبوونەوەی ئاسایی دەستە كە مانگی جارێكەو كۆبوونەوەی نائاساییش لەكاتی پێویستدا.

دووەم : كۆبوونەوەی گرووپەكان لەكاتی پێویستدا .

www.abdulrahmansidiq.com

www.prdek.com

 نووسەرو توێژەر، یەكەم وەزیری ژینگەی عێراق دوای رووخاندنی رژێمی سەدام