<sup>هێزە کوردییەکانی کوردستانی رۆژئاوا دوا کشانەوەیان لە شارەکانی منبج و جەڕابلوس ، بەرەو شاری رەققەی پایتەختی خەلافەتی رێکخراوی توندڕەوی داعش پێشڕەوی دەکەن.

بەپێی زانیارییە بڵاو کراوەکان، چەکدارانی سوپای ئازادی ئۆپۆزیسیۆنی سووریا بە پشتگیریی سوپای تورکیا و لە چوارچێوەی ئۆپەراسیۆنی قەڵغانی فورات، ناوچەکانی ژێر دەسەڵاتیان فراوان کردووە و پێنج گوندی دیکەی گوندەوارەکانی جەڕابلوسیان خستووەتە ژێر دەسەڵاتی خۆیان.

دوای کشانەوەیان لە شارەکانی منبج و جەڕابلوس، یەکینەکانی پاراستنی گەل (یەپەگە) و هێزەکانی سووریای دیموکراتی، کە یەپەگە باڵی سەرەکییەتی، بەرەو گوندەوارەکانی رۆژئاوای شاری رەققە پێشڕەویی دەکەن.

ئەو پێشڕەوییەی ئەو دوو هێزە بە مەبەستی بڕینی رێگای گەیشتنی هاوکارییە لە رەققەوە بۆ گوندەوارەکانی رۆژهەڵاتی شاری حەلەب.

لەلایەکی دیکەوە ئەحمەد عوسمان، سەرۆکی میلیشیای سوڵتان موراد، کە سوپای تورکیا پشتگیرییان دەکات، بە ئاژانسی (رۆیتەرز)ی راگەیاندووە، کە هێزەکانی سووریای دیموکراتی لە منبج نەکشاونەتەوە و ”بە دڵنیاییەوە“ ئەوان بە پشتگیریی سوپای تورکیا، بەرەو منبج دەڕۆن.

دوای راگەیاندنی ئۆپەراسیۆنی ”قەڵغانی فورات“ لەلایەن سوپای تورکیاوە لە رۆژی چوارشەممە 24ـی ئابی 2016، کە وەک راگەیەندراوە ئامانج لێی دەرکردنی رێکخراوی توندڕەوی داعشە لە باکووری سووریا، هێزەکانی سوپای ئازادی ئۆپۆزیسیۆنی سووریا، دەستیان بەسەر زۆربەی ناوچەکانی شاری جەڕابلوسدا گرتووە و هێزێکی سوپای تورکیاش چووەتە ناو خاکی سووریا لەو ناوچەیە.

ئۆپەراسیۆنەکە لە رۆژی سێشەممە 23ـی ئاب بە بۆردومان کردنی بنکە و بارەگاکانی داعش لە شاری جەڕابلوس لە باکووری سووریا، لەلایەن سوپا و فڕۆکە جەنگییەکانی تورکیا دەستی پێکرد.

هێزەکانی سوپای ئازاد بە پشتگیریی فڕۆکە جەنگییەکانی تورکیا و سوپا و تانکەکانەوە لەسەر خاکی کوردستانی باکوورەوە گەیشتنە ناو خاکی سووریا و بەرەو جەڕابلوس پێشڕەوییان کرد.

دوای داگیر کردنی چەند شارێک لە هەردوو وڵاتی عێراق و سووریا لە ساڵی 2014، ئەبوبەکر بەغدادی، خەلافەتی رێکخراوەکەی راگەیاند و شاری رەققەی وەک پایتەختی خەلافەتەکەی دەست نیشان کرد.</sup>

^29/8/2016

<sup>سکرتێری گشتیی کۆمەڵەی شۆڕشگێڕی زەحمەتکێشانی کوردستانی ئێران رایدەگەیەنێت، کە سەربەخۆیی کوردستانی باشوور کۆتایی بە دەستوەردانەکانی کۆماری ئیسلامیی ئێران لە هەرێمی کوردستان دەهێنێت.

رۆژی دووشەممە 29ـی ئابی 2016، عەبدوڵڵا موهتەدی، سکرتێری گشتیی کۆمەڵەی شۆڕشگێڕی زەحمەتکێشانی کوردستانی ئێران بە رۆژنامەی (شەرقولئەوسەت)ی راگەیاندووە، کە ئێران سوننەمەزهەبەکانی عێراقی لاواز کردووە و ناوچەکانیانی رادەستی رێکخراوی توندڕەوی داعش کردووە.

عەبدوڵڵا موهتەدی هەروەها رایگەیاندووە، کە نوری مالیکی، سەرۆک وەزیرانی پێشووی عێراق بە فەرمانی ئێران بەشەبودجەی هەرێکی کوردستانی بڕیوە و ”ئێران گەورەترین دوژمنی هەرێمی کوردستانە“.

سکرتێری گشتیی کۆمەڵەی شۆڕشگێڕی زەحمەتکێشانی کوردستانی ئێران پێیوایە ئێران بە هێمنی کارە هەوڵگری و سیاسییەکانی لە هەرێمی کوردستان لەرێگای چالاکییە رۆشنبیرییەکان و جموجۆڵی بازرگانی جێبەجێ دەکات، چونکە ”زۆرینەی کۆمپانیا ئێرانییەکان سەر بە سوپای پاسدارانی ئێرانن“.</sup>

^29/8/2016

^{بەهۆی رووبەڕووبوونەوەی چەکداری لە نێوان یەکینەکانی پاراستنی گەل (یەپەگە) و سوپای تورکیا، چوار سەربازی تورکیا کوژران و بریندار بوون.}

^{شەرەکە لە شەوی شەممە 27ـی ئابی 2016 لە باشووری شاری جەڕابلوس رووی داوە و میدیاکانی نزیک لە پارتی یەکێتیی دیموکراتی(پەیەدە)، کە باڵی سیاسیی یەپەگەیە، باس لەوە دەکەن، سێ تانکی سوپای تورکیایان تەقاندووەتەوە.}

^{بەپێی زانیارییە بڵاوکراوەکان، سوپای تورکیا هێزی زیاتری بەرەو ناوچەکە ناردووە.}

^{دوای راگەیاندنی ئۆپەراسیۆنی ”قەڵغانی فورات“ لەلایەن سوپای تورکیاوە لە رۆژی چوارشەممە 24ـی ئابی 2016، کە وەک راگەیەندراوە ئامانج لێی دەرکردنی رێکخراوی توندڕەوی داعشە لە باکووری سووریا، هێزەکانی سوپای ئازادی ئۆپۆزیسیۆنی سووریا، دەستیان بەسەر زۆربەی ناوچەکانی شاری جەڕابلوسدا گرتووە و هێزێکی سوپای تورکیاش چووەتە ناو خاکی سووریا لەو ناوچەیە.}

^{ئۆپەراسیۆنەکە لە رۆژی سێشەممە 23ـی ئاب بە بۆردومان کردنی بنکە و بارەگاکانی داعش لە شاری جەڕابلوس لە باکووری سووریا، لەلایەن سوپا و فڕۆکە جەنگییەکانی تورکیا دەستی پێکرد.}

^{هێزەکانی سوپای ئازاد بە پشتگیریی فڕۆکە جەنگییەکانی تورکیا و سوپا و تانکەکانەوە لەسەر خاکی کوردستانی باکوورەوە گەیشتنە ناو خاکی سووریا و بەرەو جەڕابلوس پێشڕەوییان کرد.}

^28/8/2016

^{شیعەکانی عێراق لە ناوەڕاستی وڵاتەکەوە خەریکی جیا کردنەوەی سنووری خۆیانن لەگەڵ سوننەکانی عێراق.}

^{دوای رووخاندنی رژێمی بەعسی عێراق لە ساڵی 2003، بەهۆی زۆریی ژمارەیانەوە، شیعەکانی عێراق دەستیان بەسەر حوکمڕانیی و جومگە گرنگەکانی عێراقدا گرت و شەڕی تائیفی لەنێوان سوننە و شیعەمەزهەبەکان رووی دا.}

^{بەپێی زانیارییەکان، سوپا و هێزە عێراقییەکان خەریکی کارکردنن بۆ دروستکردنی خەندەقێک لە نێوان پارێزگای ئەنباری سوننەنشین و پارێزگای کەربەلا، کە شارێکی گرنگ و پیرۆزی شیعەکانە.}

^{دروستکردنی ئەم خەندەقە لە نێوان ئەو دوو پارێزگایە، جیاکردنەوەی سنوورە و بەمەش هاووڵاتییانی سوننەی ئەنبار، مەگەر بە دەروازە فەرمییەکان، ئەگینا ناتوانن بچنە ناو شاری کەربەلاوە.}

^{هێزە عێراقییەکان رایانگەیاندووە، کە ئەم خەندەقە بۆ سنووردار کردنی چالاکییەکانی رێکخراوی توندڕەوی داعشە لە ناوچە، هەرچەندە زۆربەی ناوچەکانی پارێزگای ئەنبار رزگار کراونەتەوە.}

^{چەکدارانی داعش لە مانگی حوزەیرانی 2014، دوای هەرەس پێهێنانی سوپا و هێزە ئەمنییەکانی عێراق، شاری مووسڵ و زۆربەی ناوچەکانی پارێزگاکانی نەینەوا، دیالە، سەڵاحەدین و ئەنباریان داگیر کرد.}

^{28 8 2016}

^{راپۆرتێکی ئەمریکی چۆنێتی ناردنی چەک و سەربازی ئێرانی بۆ رژێمی سووریا ئاشکرا دەکات.}

^{لە راپۆرتەکەدا، کە لە گۆڤاری (فۆربیس) بڵاو کراوەتەوە، باس لەوە کراوە،  کۆمپانیای ماهانی فڕۆکەوانیی ئێرانی، گەشتی ئاسمانی بە ژمارەی ساختە لە نێوان وڵاتەکەی و سووریا ئەنجام دەدات.}

^{هەروەک لە راپۆرتەکەدا بڵاو کراوەتەوە، کۆمپانیای فڕۆکەوانیی ماهان چەک و سەربازی وڵاتەکەی بە نهێنی دەگوازێتەوە و دیمەشق و لەوێشەوە بۆ بەرەکانی جەنگی دژ بە ئۆپۆزیسیۆنی سووریا دەنێردرێن.}

^{لە سەرەتای شەڕی ناوخۆیی سووریاوە، کە لە مانگی ئاداری 2011ـەوە لە نێوان لەنێوان رژێمی سووریا و گرووپەکانی ئۆپۆزیسیۆنی ئەو وڵاتە دروست بووە و بەهۆیەوە زیاتر لە 300 هەزار هاووڵاتی کوژراون و زیاتر لە پێنج ملیۆن هاووڵاتیی دیکەش ئاوارە بوون،  ئێران بە هەموو توانایەکیەوە بەرگریی لە رژێمی بەشار ئەسەدی سەرۆکی سووریا دەکات و زیاتر لە هەزار چەکداری ئێرانیش لە شەڕەکانی سووریادا کوژراون.}

^{28 8 2016}

^{سەرەڕای ھۆشداریی ئەحمەد شەھید، ڕێپۆرتێری نەتەوە یەكگرتووەكان تایبەت بە دۆخی مافی مرۆڤ لە ئێران و داوای ڕاگرتنی لەسێدارەدانیان، ئەمڕۆ 12 كەس بە تۆمەتی بازرگانیكردن بە مادەی ھۆشبەر لە بەندیخانەی كەرەج لەسێدارە دران.}

^{بەگوێرەی زانیارییەكانی ناوەندی ھەواڵی كۆمەڵەی چالاكانی مافی مرۆڤ لە ئێران (ھێرانا)، سەرلەبەیانیی ئەمڕۆ شەممە (27/8/2016)، 12 بەندكراو بە تۆمەتی بارزگانیكردن بە مادەی ھۆشبەر لەسێدارە دراون.}

^{ئەحمەد شەھید لە بەیاننامەیەكدا لەبارەی لەسێدارەدانی ئەو 12 كەسە نیگەرانی دەربڕی و ھۆشداری دا، بە گوتەی ئەحمەد شەھید و بەپێی یاسا نێودەوڵەتییەكان، بازرگانیكردن بە مادەی ھۆشبەر ناچێیەتە چوارچێوەی تاوانی جدییەوە.}

^{بەپێی زانیارییەكان ئەو 12 بەندكراو ڕۆژی 24ی ئابی 2016 بەمەبەستی جێبەجێكردنی سزای سێدارە بەسەریاندا، ڕەوانە ژووری تاكەكەسیی بەندیخانەی كەرەج كراون و بۆ دوایین جار ڕێگەیان پێ دراووە، بنەماڵەكانیان ببینن.}

^{ماڵپەڕی ھێرانا ناوی 9 كەس لەو بەندكراوانەی بڵاو كردووەتەوە، عەلیڕەزا مەدەدپوور، بەھمەن ڕەزایی، ئارمان بەھرامی، عەلیڕەزا ئەسەدی، موحسین ئیسلامی، مەھدی ڕۆستەمی، ئەمیر سەرخاە، عەلیڕەزا سەرخاە و حوسێن بایرامی و سێ كەسی دیكە كە ناوەكانیان ئاشكرا نەبووە، لەسێدارە دراون.}

^{بەمداوییانە بەشێك لە بەرپرسانی ئێرانی پرسی پێداچوونەوە بە یاسای سزای سێدارە بۆ قاچاغچییەكانی مادەی ھۆشبەریان ورووژاندووە، ڕووحوڵا حەزرەتپوور، ئەندامی فراكسیۆنی ماف و دادوەریی لە پەرلەمانی ئێران پێشتر ڕای گەیاند، 4500 بەندكراو سزای سێدارەیان بۆ دەرچووە.}

 ^{27 8 2016}

^{ئەندامێکی دەوڵەتی یاسا باس لە هەوڵەکانی سەرۆکی هەرێمی کوردستان بۆ ڕیفراندۆم دەکات و ڕای دەگەیەنێت: "حزبە کوردییەکان لەگەڵ ئەو هەنگاوەدا نین". سیاسەتمەدارێکیش ڕای دەگەیەنێت: "ئەوە مافی خەڵکی کوردستانە، نەک حزبەکان".}

^{جاسم محه‌مه‌د، ئه‌ندامی ئیئتیلافی ده‌وڵه‌تی یاسا له‌ ئه‌نجومه‌نی نوێنه‌رانی عێراق ڕای گەیاندووە کە حزبە کوردییەکان لەگەڵ هەوڵەکانی مەسعود بارزانی، سەرۆکی هەرێمی کوردستان نین بۆ ڕیفراندۆم و سەربەخۆیی کوردستان، لە کاتێکدا پارتی دیموکراتیی کوردستان و بارزانی و تورکیا ڕێککەوتن لەسەر کۆنفیدرالیەتی کوردستان لە ناوچەکە، بە مەبەستی دەرفەتی زیاتر بە کوردانی عێراق و تورکیا.}

^{ئەو قسەکانی بارزانی بەبیری خەڵک دەهێنێتەوە و ئاماژە بەوە دەکات کە له‌ کۆنفڕانسێکی ڕۆژنامه‌وانی لەدوای دیداری له‌گه‌ڵ به‌رپرسانی باڵای تورکیا له‌ ئه‌نقه‌ره‌ ڕای گه‌یاندبوو، به‌مزووانه‌ گۆڕانکارییه‌کی زۆر له‌ ناوچه‌که‌ ڕوو ده‌دات.}

^{لە بەرامبەردا د. دیندار دۆسکی، سیاسەتمەدار و ئەندامی دەست لەکار کێشاوەی مەکتەبی سیاسیی یەکگرتووی ئیسلامیی کوردستان، بە (باسنیوز)ی ڕاگەیاند: “سەبەخۆیی و ڕیفراندۆم مافێکی خەڵکی کوردستانە، هیچ حزبێک بۆی نییە لەسەر ئەو مافە بڕیار بدات”. جەختیشی لەوە کردەوە: “بۆ دەوڵەتی یاسا نییە بڕیار لەسەر ئیرادەی خەڵکی کوردستان بدات، بەپێی میساقی نەتەوە یەکگرتووەکان، هەر گەلێک مافی خۆی هەیە بڕیار لەسەر چارەنووسی خۆی بدات، بۆیە هیچ حزبێکی کوردستان بە فەرمی نەیگوتووە لەگەڵ دەوڵەتدا نییە، ئەگەر هەشبێت، ئەو مافەی نییە، چونکە ڕیفراندۆم کە دەکرێت لەسەر بنەمای گەل دەکرێت”.}

^{ئەو سیاسەتمەدارە کوردە ئەوەشی ڕوون کردەوە: “لە ڕاپرسییەکەی زانکۆی ئەمەریکی، نزیکەی ٪85ی زیاتری خەڵکی کوردستان لەگەڵ ڕیفراندۆمدا بوون، بۆیە ئێستا ئەوان دەیانەوێت شەقامی کوردستان بکەنە دوو بەشەوە".}

^{دۆسکی لە لێدوانەکەیدا بۆ (باسنیوز) ئاماژەی بەوەش کرد: “خەباتی هەموو هێزە کوردییەکان بۆ ئەو ئامانجە بووە، ئەمە کێشەیەکە پەیوەندی بە گەلی کوردستانەوە هەیە، سەرۆکی هەرێمی کوردستان وەک واقیعی هەرێمی کوردستان، داوای ڕیفراندۆم دەکات، چونکە ئەمە خواستی خەڵکی کوردستانە”.}

^{پێشتر نووری مالیکی، سەرۆکی ئیئتیلافی دەوڵەتی یاسا، لە میانی لێدوانێکیدا بۆ میدیاکانی ئێران و لە پاش سەردانەکەی بۆ سلێمانی، ڕای گەیاندبوو: ”یەکێتیی نیشتمانیی کوردستان و بزووتنەوەی گۆڕان بە ئاراستەی سەربەخۆیی کوردستان ناڕۆن“.}

^{27 8 2016}

^{قەبارەی بارزگانیی نێوانیان 6.1. ملیار دۆلارە}

^{له‌ په‌یوه‌ندییه‌ بازرگانه‌كانی نێوانیاندا، له‌مه‌ودوا ئێران و كۆریای باشوور، یۆرۆ له‌ جیاتی دۆلار به‌كاردێنن.}

^{حه‌مید به‌یدینیجاد، به‌ڕێوه‌به‌ری گشتیی ئاسایش و سیاسه‌تی نێوده‌وڵه‌تی له‌ وه‌زاره‌تی ده‌ره‌وه‌ی ئێران رایگه‌یاند، له‌مه‌ودوا مامه‌ڵه‌ بازرگانییه‌كانی نێوان ئێران و كۆریای باشوور به‌یۆرۆ ده‌كرێت و چیدی مامه‌ڵه‌ به‌دۆلار ناكرێت.}

^{ئه‌م به‌رپرسه‌ ئێرانییه‌ روونیكرده‌وه‌ به‌مه‌به‌ستی چاره‌سه‌ركردنی كێشه‌كانی به‌رده‌م بازرگانی هه‌ردوو وڵات و، به‌گوشاری ئێران، سیئۆل دانووستانی له‌گه‌ڵ واشنتۆن كرد بۆ ئه‌م پرسه‌ و ئه‌مریكاش ره‌زامه‌ندی ده‌ربڕی كه‌ راسته‌وخۆ، وۆن (دراوی كۆریای باشوور) بۆ یۆرۆ بگۆڕێت.}

^{به‌مشێوه‌یه‌ به‌پێی رێككه‌وتنی نێوان هه‌ردوولایه‌ن له‌ 29-8-2016 به‌ولاوه‌ ئێران و كۆریای باشوور له‌ جیاتی دۆلار یۆرۆ به‌كاردێنن.}

^{قەبارەی بازرگانی نێوان ئێران و کۆریای باشوور لە ساڵی 2011 گەیشتبووە 17 ملیار دۆلار. لە ساڵی 2012 بەھۆی گەمارۆی ئابووری سەر ئێران، ئەم رێژەیە دابەزی. هاوکات قەبارەی بازرگانی ھەردوو وڵات لە ساڵی رابردوو گەیشتە ئاستی 6.1 ملیار دۆلار.}

^27/8/2016

^{شەهیدكردنی دیلەكان لەلایەن داعش}

^{رۆژی هەینی 26-8-2016، داعش ڤیدیۆی شەهیدكردنی 15 دیلی بڵاوكردەوە، پێنج لەو دیلانەش کە لەلایەن پێنج منداڵەوە شەهید کران کوردن و خەڵکی رۆژئاوای کوردستانن.}

^{بەپێی ڤیدیۆكە یەكێك لە منداڵە بكوژەكان كوردە و داعش به‌ ناوی‌ "ئه‌بو فوئاد كوردی‌" ناساندوویەتی.}

^{داعش جگە لەوەی ئاماژەی بەوە كردووە دیلەكان كوردن و لە رەققە شەهیدكراون، هیچ زانیارییەكی دیكەی لەبارەی دیلەكان بڵاونەكردووەتەوە و، باسی لەوەش نەكردووە دیلەكان خەڵكی كام بەشی كوردستانن و، كەی و لەكوێ گیراون.}

^{سەعید مەموزینی، بەرپرسی راگەیاندنی لقی14ـی پارتی دیموکراتی کوردستان بە تۆڕی میدیایی رووداوی راگەیاند " ئەو پێنج کوردەی لەلایەن داعشەوە شەهید کران، سەرجەمیان خەڵکی رۆژئاوای کوردستانن".}

^{هاوکات داعش دیمەنی کوشتنی پێنج کەسی دیکەی بڵاوکردووەتەوە، کە لەلایەن پێنج چەکداری ریشسپییەوە بە دەمانچە دەکوژرێن و لە گرتەیەکی دیکەدا دیمەنی سەربڕینی 5 کەسی بڵاوکردووەتەوە.}

^{داعش رایگەیاندووە نەوەی نوێ پێدەگەیێنێ، كە بریتییە لە راهێنانی جەستەیی بە منداڵان، داعش لە کەمپە تایبەتەکانی منداڵان مێشک دەشواتەوە و لەسەر کوشتن و چالاکی سەربازیی و خۆتەقاندنەوە رایاندەهێنێت.}

^27/8/2016

^{رەجەب تەیب ئەردۆغان و ڤلادیمێر پوتین}

^{لە پەیوەندییەکی تەلەفۆنیدا سەرۆککۆماری تورکیا زانیاری لەبارەی ئۆپەراسیۆنی سوپای وڵاتەکەی لە جەرابلوس بە سەرۆکی رووسیا دا و، هەردوولا هاوڕابوون لەبارەی گەیاندنی هاریکاری بە شاری حەلەبی سووریا.}

^{بەپێی ئەو زانیارییانەی ئاژانسی هەواڵی تورکیا بە پشتبەستن بە سەرچاوەیەکی سەرۆکایەتی کۆماریی تورکیا بڵاویکردوونەتەوە، رۆژی هەینی 26-8-2016، رەجەب تەیب ئەردۆغان، سەرۆککۆماری تورکیا پەیوەندی بە ڤلادیمیر پوتین، سەرۆکی رووسیاوە کردووە و زانیاری لەبارەی ئۆپەراسیۆنی سوپای وڵاتەکەی بۆ شاری جەرابلوسی رۆژئاوای كوردستان (باكووری سووریا) داوەتێ.}

^{ئاژانسی هەواڵی تورکیا رایگەیاندووە، لە پەیوەندییە تەلەفۆنییەکەدا، هەردوولا رێککەوتن لەسەر ئەوەی لە پەراوێزی کۆبوونەوەی لووتکەی G-20 لە چین، کۆبوونەوەیەکی دوو قۆڵی ئەنجام بدەن.
هەروەک راشیگەیاندووە، هەردوولا هاوڕابوون لەسەر خێراکردنی هەوڵەکان بۆ گەیاندنی یارمەتییە مرۆییەکان بۆ شاری حەلەب لە سووریا.}

^{هەر لەبارەی پەیوەندییە تەلەفۆنییەکەوە، سەرۆکایەتی رووسیا "کریملین" راگەیێندراوێکی بڵاوکردەوە و ئاماژەی بەوەکرد، پەیوەندییە تەلەفۆنییەکە لەسەر خواستی تورکیا بووە و باسی بارودۆخی سووریایان کردووە.}

^{لە راگەیێندراوەکەی کریمیلندا هاتووە: "لە پەیوەندییە تەلەفۆنییەکەدا جەخت لەسەر کاری هاوبەش لە بەرەنگاربوونەوەی تیرۆردا کرایەوە و، هەردوولا هاوڕابوون لەسەر بەردەوامیدان بە تاووتوێکردنی بابەتە نێودەوڵەتییەکان."}

^{رۆژی چوارشەممە 24-8-2016، بە بەشداری سوپای سووریای ئازادی سەر بە ئۆپۆزیسیۆنی سووریا، ئۆپه‌راسیۆنی ئاسمانی و وشكانی بۆ سه‌ر جه‌رابلوس له‌ رۆژئاوای كوردستان (باكووری حه‌له‌ب) له‌لایه‌ن سوپای توركیا دەستیپێكرد و لە ئێوارەی هەمان رۆژدا جەرابلوس لەژێر دەستی داعش دەرهێنرا.}

^{ئەمە كاردانەوەی تووندی یەپەگە و پەیەدەی لێكەوتەوە و رایانگەیاند داعش بیانووە و هێرشەكە بۆ رێگریكردنە لە پێشڕەوی هێزە كوردییەكان و ئۆپەراسیۆنەكەیان بە داگیركاری وەسفكرد، هاوكات حكومەتی سووریاش ئۆپەراسیۆنەكەی ئیدانەكرد و رایگەیاند پێویستە توركیا رێز لە سنوورە نێودەوڵەتییەكان بگرێت.}

^27/8/2016