^{ره‌جه‌ب ته‌یب ئه‌ردۆگان سه‌ركۆماری توركیا به‌بۆنه‌ی 12ی حوزه‌یرانەوە، رۆژی نه‌ته‌وه‌یی رووسیا، پەیامێكی پیرۆزبایی ئاراسته‌ی ڤلادێمیر پوتین سەرۆکی رووسیا كرد.}

^{به‌پێی ئه‌و زانیارییانه‌ی له‌ سه‌رۆكایه‌تیی كۆماری توركیا وه‌رگیراون، ئه‌ردۆان له‌ پەیامەكه‌یدا كه‌ به‌بۆنه‌ی 12ی حوزه‌یران رۆژی نه‌ته‌وه‌یی رووسیاوه‌، ئاراسته‌ی پوتینی كردووه‌، هیوای خواستووه‌ له‌ قۆناخی ئاینده‌دا په‌یوه‌ندییه‌كانی توركیا-رووسیا بگاته‌وه‌ ئاستی شایسته‌.}

^{له‌ ده‌قی پەیامەكه‌ی ئه‌ردۆگاندا هاتووه‌ "به‌بۆنه‌ی رۆژی نه‌ته‌وه‌یی رووسیاوه‌، به‌ناوی گه‌له‌كه‌مه‌وه‌ پیرۆزبایی ئاراسته‌ی خودی خۆت و گه‌له‌كه‌ت ده‌كه‌م و ئومێد ده‌كه‌م له‌ قۆناغی ئاینده‌دا په‌یوه‌ندییه‌كانی توركیا - رووسیا بۆ ئاستی شایسته‌ی خۆی به‌رزببێته‌وه‌".
15/6/2016}

^{وەزارەتی بەرگری ئەمریکا رایگەیاند ھیچ زانیارییەکیان بەدەست نەگەیشتووە کە پشتگیری لە دەنگۆی كوژرانی ئەبوبەكر بەغدادی بكات.}

^{جیڤ دافیس گوتەبێژی وەزارەتی بەرگری ئەمریکا لە لێدوانێکی بۆ رۆژنامەوانان وەڵامی ئەو دەنگۆیانەی دایەوە کە گوایە بەغدادی لە ھێرشی فڕۆکەکانی ھاوپەیمانان بۆ سەر داعش لە رەققە کوژرابێت.}

^{داڤیس لەوبارەیەوە دەنگۆکانی سەر تۆڕە کۆمەڵایەتییەکانی وەبیرھێنایەوە و گوتی "ھیچ زانیارییەکمان بەدەست نەگەیشتووە کە پشتگیری لەو دەنگۆیانە بکات".}

^{گوتەبێژی وەزارەتی بەرگری ئەمریکا ئاماژەی بەوەش دا کە پێشتریش ھەمان دەنگۆ لەسەر کوژرانی بەغدادی بڵاو کرابووەوە و بەم پێیەش گوتی "ھیچ شتێکیمان لەبەردەست نییە کە راستی ئەمە بسەلمێنێت".}

^{جێگەی باسە ئاژانسێکی ھەواڵ کە پەیوەنی بە داعشەوە ھەیە ئاماژەی بەوە دا کە بەغدادی لە ھێرشێکی رۆژی یەکشەممەی رابردوو بۆ سەر رەققە کوژراوە. ھاوکات ھەفتەی رابردوو ھێزەکانی ھاوپەیمانان برینداربوونی بەغدادی لە ھێرشێک ئاسمانی رایگەیاندبوو. بەرپرسانی ئەمریکا پێیان وایە بەغدادی ھێشتا لەژیاندا ماوە.
15/6/2016}

<sup>مەسعود بارزانی، سەرۆکی پارتی دیموکراتی کوردستان كە هاوكات سەرۆكی هەرێمی كوردستانە، لەگەڵ ئەو حەوت لیژنەیە كۆدەبێتەوە كە لە مانگی 5ی ئەمساڵ بۆ چاکسازی لەنێو حیزبەكەی پێكهێنرابوون.

سەنگەر عەبدولڕەحمان، پەیامنێری تۆڕی میدیایی رووداو رایگەیاند، کۆبوونەوەكە لە پیرمام دەستیپێكردووە و هەر لیژنەیەك راپۆرتی خۆی دەخاتە بەردەست بارزانی و گفتوگۆی لەسەر دەكەن.

لە 5-5-2016 پارتی دیموکراتی کوردستان بەسەرپەرشتی مەسعود بارزانی کۆبووەوە، لەو کۆبوونەوەیەدا بارزانی بڕیارەکانی چاکسازی دایە سەرکردایەتی و مەکتەبی سیاسی حیزبەكەی، بۆ ئەوەی چاکسازی بکەن، دوای دوو بۆ سێ رۆژ جارێکی دیکە مەکتەبی سیاسی پارتی کۆبووەوە و بڕیاری پێكهێنانی چەند لیژنەیەکی دا.

لە کۆبوونەوەکەی مەکتەبی سیاسی پارتیدا بڕیاری پێكهێنانی یەک لە لیژنەکانی راگەیاندن بەسەرپەرشتی مەحموود محەممەد، لیژنەی رێکخستن بەسەرپەرشتی مەسروور بارزانی، لیژنەی وەبەرهێنان بەسەرپەرشتی ئازاد بەرواری، لیژنەی پەیوەندییەکان بەسەرپەرشتی هۆشیار زێباری، لیژنەی جەماوەری و پیشەییەکان بەسەرپەرشتی رێبوار یەڵدا، لیژنەی هەڵبژاردن بەسەرپەرشتی د.رۆژ نووری شاوێس لەگەڵ لیژنەی دارایی درا.

پەیامنێری رووداو راشیگەیاند "ئەم لیژنانە لە 9-5-2016 وە تاوەکو رۆژی دووشەممە 14-6-2016، بەردەوام لەگەڵ رێکخستنەکان و بەرپرسانی پارتی و لەگەڵ خەڵکی ئەکادیمی و پسپۆر کۆبوونەتەوە، ئەمڕۆ هەر سەرۆکی لیژنەیەک راپۆرتی لیژنەکەی ئامادەکردووە و دەیخاتە بەردەم بارزانی، هەموو لیژنەکان گفتگۆی راپۆرتەکان دەکەن".</sup>

^14/6/2016

<sup>کچە کوردێکی باشووری کوردستان، وەک نوێنەری کوردستان خۆی بۆ پێشبڕکێی شاجوانی جیهان لە ساڵی 2016 دا کاندیدکردووە. ئەو ئامانجی بەشداریکردنی لە پێشبڕکێکەدا ئاشكرا دەكات و دەڵێت "من دەمەوێت ناوی کورد و کولتووری کوردی بە جیهان بناسێنم".

نینا موراد، نوێنەری کوردستان بۆ پێشبڕکێی شاجوانی جیهان، لەکاتی بەشداریکردنی لە هەواڵەکانی کاژێر 8:00 ی رادیۆ و تەلەڤزیۆنی رووداو، سەبارەت بەوەی ئایا چ چاوەڕوانییەکی لە پێشبڕکێیە هەیەو  چۆن دەتوانێت لە رۆژی پێشبڕکێکەدا پیشانی خەڵکی بدات کە ئەو خەڵکی کوردستانە، رایگەیاند "من دەمەوێت ناوی کورد و کولتووری کورد بە جیهان بناسێنم و بە جلی کوردییەوە خۆم نیشان بدەم، هەروەها هیوام ئەوەیە ناوی کوردستان بە جیهان بناسێنم و وەک وڵاتێکی سەربەخۆ ناوی بێنم".</sup>

<sup>نینا، خەڵکی رانیەیە و لە ئوسترالیا دەژیت، ئەو بە رووداوی گوت یەکەمجار لیژنەی وەرگرتنی پێشبڕکێ رەتیانکردووەتەوە بە ناوی کوردستانەوە بەشداربێت، بە پاساوی ئەوەی کوردستان دەوڵەت نییە، بەڵام پاشئەوەی بە وردی سەبارەت بە کوردستان و پێگەی هەرێمی کوردستان قسەی لەگەڵدا کردوون، رازیبوونە وەک شاجوانی کوردستان وەریبگرن.

نینا لە ئوسترالیا ئەندامی تیپێکی هونەری هەڵپەڕکێیە و وەک خۆی دەڵێت، هەمیشە ئارەزووی بووە لەو رێیەوە ناسنامە و بەشێک لە کولتووری کوردستان نیشانی جیهان بدات، ئەم پێشبڕکێیە بەهەلێکی گونجاو دەزانێت بۆ ئەو ئامانجەی هەیەتی.</sup>

^{رۆژی 8-7-2016 پێشبڕکێی شاجوانی جیهان بەڕێوەدەچێت.}

^14/6/2016

^{رۆژنامه‌ڤانێكی ئیسپانی كتێبێك له‌باره‌ی ئازایه‌تی و بوێری گه‌لی كورد و به‌ره‌نگاربوونه‌وه‌ی داعش لە عێراق و سووریا به‌ زمانی ئیسپانی بڵاودەكاتەوە.}

^{مانوێل مارتۆرێل، رۆژنامه‌ڤانی به‌نێوبانگی ئیسپانی و شاره‌زا له‌ كاروباری رۆژهه‌ڵاتی نێوه‌ڕاست، دوایین كتێبی له‌ژێر ناونیشانی "چاخی كورد" به‌چاپ گه‌یاند، تێیدا باسی هاوچه‌رخی گه‌لی كورد و باسی‌ ئازایه‌تیی و بوێرییان ده‌كات، هه‌روه‌ها به‌بایه‌خه‌وه‌ باسی رۆڵی گرنگییان له‌ به‌ره‌نگاربوونه‌وه‌ی داعش ده‌كات له‌ عێراق و سووریا.}

^{مارتۆرێل له‌ كتێبه‌كه‌یدا داوا له‌ كورد ده‌كات سووربن لەسەر‌ مافه‌كانیان و تیشك ده‌خاته‌ سه‌ر مێژووی سته‌مدیده‌ی كورد، جه‌ختیش ده‌كاته‌وه‌ كات و سه‌رده‌می ئه‌وه‌ هاتووه‌ كورد به‌ره‌و ئامانج و خه‌ونه‌ گه‌وره‌كه‌یان هه‌نگاوی جددیتر بنێن.}

^{ئه‌م رۆژنامه‌ڤانه‌ ئیسپانییه‌ له‌دوای راپه‌ڕینی ساڵی 1991 چه‌ندینجار سه‌ردانی باشووری كوردستانی كردووه ‌و له‌ نزیكه‌وه‌ ئاگاداری سه‌رجه‌م چالاكییه‌كانی كورد له‌ باشووری كوردستان بووه‌، مارتۆرێل خۆی به ‌هاوڕێ و دۆستی گه‌لی كورد ده‌ناسێنێت و رۆڵی باڵای هه‌بووه‌ له‌ دروستكردنی په‌یوه‌ندی سیاسی و دۆستانه‌ی حكومەتی هه‌رێمی كوردستان و ئیسپانیا.}

^{مانوێل مارتۆرێل، كە نووسەرێكی شارەزای كێشەی كوردە، لە كتێبە نوێیەكەیدا ئاماژە بەوە دەكات كە جەنگی سووریا و عێراق بوونە هۆی ئەوەی چاوی هەموو جیهان بكەوێتە سەر كورد، ئەمەش دەرفەتی ئەوەی پێداون كە بە وردی كار بۆ بەدیهێنانی خەونی خۆیان بكەن.}

^{پێشتر مارتۆرێل دەربارەی ئەوە بە (رووداو)ی گوت "كورد لە ساتەوەختێكی مێژوویی بێوێنەدا دەژین. بۆ یەكەمجارە لە مێژوودا، هەموو زلهێزەكانی جیهان، رووسیا، ئەمریكا و یەكێتی ئەوروپا دان بە بایەخی فاكتەری كورد لە رۆژهەڵاتی ناوەڕاستدا دەنێن."}

^{مارتۆرێل كە بەمدواییە كتێبە نوێیەكەی بە ناوی كورد (Kurdos) بە ئیسپانی بڵاوبووەتەوە، پێیوایە بۆ یەكەمجارە جیهان خەریكە پەی بەوە دەبات كە كورد تێڕوانینێكی سێكولار و میانڕەوانەی هەیە، ئەمە جگە لەوەی شارەزایی و توانایەكی باشیشیان لە جەنگی دژی چەكدارانی گرووپی دەوڵەتی ئیسلامی (داعش) پێشانداوە.}

^{بەڕای نووسەرە ئیسپانیەكەی كتێبی كورد "هەتا ئێستا هێزە جیهانییەكان تەنیا پشتگیرییان لە دیكتاتۆر و بزووتنەوە ئیسلامییەكان دەكرد، بەڵام ئێستا خەریكە تێدەگەن لەوەی روانگەی فیدراڵیی كورد لە رۆژهەڵاتی ناوەڕاست دەكرێت رێگەیەك بێت بۆ دەرچوون لەو قەیرانە گەورەیەی كە ئەو بەشەی جیهانی داگرتووە، ئەمەش لە كاتێكدا رۆژهەڵاتی ناوەڕاست خۆی لەڕووی ئایینی و كولتوورییەوە ناوچەیەكی فرە رەنگە."}

^{مانوێل مارتۆرێل بە یەكێك لە شارەزاترین لێكۆڵەرە ئیسپانییەكان لەبارەی كورد لە قەڵەم دەدرێت، ئەو لە كتێبەكەیدا دەیەوێت ئەوە روون بكاتەوە كە بۆچی كوردی زۆرینە سوننە، ئەم جەنگە قورسە لە دژی داعش و گرووپ و بزووتنەوە ئیسلامییە توندڕەوەكانی دیكە لە عێراق و سووریا دەكات، لەم پەیوەندییەدا مارتۆرێل دەڵێت "كتێبەكەی من دەیەوێت ئەوە بۆ رۆژئاواییەكان روون بكاتەوە كە ئەمجۆرە هەڵوێستەی وا دەكات ئیسلام لەگەڵ دیموكراسی و پێكەوەژیانی ئایین و كولتوورە جیاوازەكان بگونجێ، شتێكی نوێ نییە و كورد هەموو كات پشتگیریی لێكردووە."}

^{یەكێكی دیكە لە ئامانجەكانی كتێبەكەی ئەم لێكۆڵەرە ئیسپانییە ئەوەیە دڵنیایی بە رۆژئاواییەكان بدات كە تەنیا جۆرە تێڕوانینێكی دیاریكراو بۆ ئیسلام دەكرێت مەترسی بۆ سەر جیهان دروستبكات و زۆربەی كۆمەڵگا ئیسلامییەكان هیچ مەترسییەك بۆ سەر جیهان دروست ناكەن. مارتۆرێل رای وایە "موسوڵمانەكان و كۆمەڵگە نا-موسڵمانەكان زیاتر لە هەموو كەس حەز دەكەن هەڕەشەی داعش كۆتایی بێت، لە كاتێكدا ئەم گرووپە هەڕەشەیە بۆ سەر ئەو شێوازە ژیانەی بۆ سەدان ساڵە لە ناوچەكەدا پەیڕەو دەكرێت."}

^{بەشێكی دی لە كتێبی "كورد" بۆ باسكردن لە رەوشی ئێران، عێراق، توركیا و سووریا لە ماوەی چەندین ساڵی رابردوودا تەرخان كراوە. لەوێدا ئیدانەی هەڵمەتی حكومەتەكەی رەجەب تەیب ئەردۆغان، سەرۆككۆماری توركیا لە دژی كورد دەكات كە نووسەری كتێبەكە بە هەڵمەتی "پاكتاوی نەتەوەی كورد" ناوی دەبات.}

^{جەنگی دژی داعش و ئیدانەكردنی جینۆسایدی كوردە ئێزدییەكانی ناوچەی شنگال و كۆمەڵگە كوردی و مەسیحییەكانی دیكە لەسەر دەستی ئەم گرووپە بەشێكی دیكە لە كتێبەكە پێكدەهێنن و ئەمە لە هەڵبژاردنی بەرگی كتێبەكەشدا رەنگدانەوەی هەبووە: بەرگی كتێبەكە شەڕڤانێكی ئافرەتی كوردە كە پەنجەكانی بە نیشانەی سەركەوتن بەرزكردووەتەوە، وەكوو مارتۆرێل ئاماژەی بۆ دەكات "وێنەكە لەلایەن دەزگای چاپی كتێبەكەوە هەڵبژێردراوە، هۆی ئەمەش بۆ ئەوە دەگەڕێتەوە ئافرەتانی كورد بەهۆی بەشدارییان لە جەنگی دژی داعشدا جەماوەرێكی زۆریان هەیە. بەشداریی ئافرەتانی كورد لە جەنگ لە سووریا، عێراق، ئێران و توركیا ئەو وێنە باوەی سڕیوەتەوە كە لەبارەی ئافرەتانی رۆژهەڵاتی ناوەڕاستەوە هەبوون".}

^{مارتۆرێل هەروەها گوتی "بوونی ئافرەتی كورد لە بەرەكانی پێشەوەی جەنگ بەمەبەستی وەستاندنی ئەو گرووپەی هەڕەشە لە هەموو جیهان دەكات، وای كرد چاوەكان بكرێنەوە."}

^{"كورد"ەكەی مانوێل مارتۆرێل لەلایەن دەزگای چاپ و وەشانی لۆس لیبرۆس دێ لا كاراتا چاپكراوە و ئەم مانگە بۆ یەكەمجار لە شاری پاپملۆنا نمایش كرا، مارتۆرێل ئەزموونێكی درێژی لەگەڵ كولتووری كوردیدا هەیە و چەندین ساڵ لەمەوبەر داستانی مەم و زینی بە زمانی باسكی داڕشتەوە.}

^{چاپكراوەكانی مانوێل مارتۆرێل لەبارەی كوردەوە}

^{كورد... مێژووی خۆڕاگری- ساڵی 1991
كوردستان- ساڵی 2002
كوردستان... گەشتێك بۆ وڵاتێكی قەدەغە- ساڵی 2005
مەم و زین بە زمانی باسكی- ساڵی 2010
كورد ئەمەیە... شرۆڤەكردنی نەتەوەیەك- ساڵی 2014
كورد- ساڵی 2016.}

^14/6/2016

^{سەرۆککۆماری تورکیا رایدەگەیێنێت، ئۆپەراسیۆنەکانی سوپای وڵاتەکەی لە دژی پارتی کرێکارانی کوردستان- پەكەكە ناوەستێندرێن، بە ئۆپۆزیسیۆنیش دەڵێت روو لە شاخ بكەن.}

^{لە خوانێکی بەربانگدا لە ئیستەنبوڵ، ئێوارەی رۆژی یەكشەممە 12-6-2016، رەجەب تەیب ئەردۆغان، سەرۆککۆماری تورکیا رایگەیاند، خەڵکی تورکیا رێگەنادات ئۆپەراسیۆنەکان کۆتاییان بێت و نایانەوێت سەقامگیری ئاشتی لەدەست بدەن.}

^{ئەردۆغان گوتی: "گەلەکەم رێگە نادات ئەو سەقامگیرییەی کە بە فیداکردنی گیان و سامانی رۆڵەکانی بەدەستی هێناوە، ببێتە قوربانی سێ چوار تاڵانکەر."}

^{زیاتر گوتی: "رووی دەمم دەکەمە هەموو ئەو هاووڵاتیانەی لە تەلەڤزیۆنەوە دەمانبینن و جیهان؛ خەباتمان لە دژی تیرۆر و ئۆپەراسیۆنەکانمان، تا بەدەستهێنانی سەقامگیری کۆتایی نایەت."}

^{ئەردۆغان هێرشیکردە سەر ناڕازییەکانی تورکیا و گوتی: "تورکیا ئیدی جێگەی گێزیچییەکان(خۆپیشاندەرانی پارکی گێزی)، پێکهاتەی هاوتەریب (بزوتنەوەی گویلەن) و هەستانەوەی نوێی تێدا نابێتەوە، بەڵکو لە سەقامگیری و ئاشتیدا سەرقاڵی بوژانەوە و گەشەکردنی ئابووری دەبێت."}

^13/6/2016

^{دوای ئەو هێرشەی کرایە سەر یانە شەوانەکە، هێزەکانی پۆلیس و هێزەکانی FBI، کە زیاتر هێزی هەواڵگری و هێزی ئاسایشن، لەگەڵ چەندین ئاژانسی ئەمنی ئەو وڵاتە لە لێکۆڵینەوەدان لەم کەیسە، بۆ ئەوەی بگەنە دوا دەرئەنجام، کە ئایا بکوژەکە کێیە و کێ هانی داوە ئەم کارە بکات؟ ئایا راستە داعش فەرمانی پێکردووە؟}

^{نامۆ عەبدوڵڵا، بەڕێوەبەری نووسینگەی رووداو لە واشنتن، لە فلۆریداوە رایگەیاند، ئەو زانیاریانەی لەسەر زاری بەرپرسانی ئەمریکاوە بە ئێمە گەیشتوون، عومەر مەتین ساڵی 1986 لە دایک و باوکێکی بەڕەچەڵەک ئەفغانی لە نیویۆرک لەدایکبووە، ماوەی چەند مانگێ لەژێر چاودێری FBI بووە، بەجۆرێک FBI گومانیان لێ دروستکردبوو، کە ئەم کەسە پەیوەندی هەبووە بە چەند کەسایەتییەکی تووندڕەوەوە.}

^{وەك پەیامنێری رووداو باسیكرد، لە لێکۆڵینەوەکاندا FBI نەگەیشتووەتە ئەو ئەنجامەی بڵێت ئەم کەسە شایستەی ئەوەیە بگیرێت، یاخود شایستەی ئەوەبێت چەکەکانی لێوەربگیرێنەوە، چونکە ئەو چەکانەی کە کڕیونی، هەمووی بە یاسایی کڕیون، جیا لەوەش لە کۆمپانیایەکی ئەمنی لە وڵاتە کاری کردووە، ئەو کۆمپانیا ئەمنییەش کار بۆ حکومەتی ئەمریکا دەکات.}

^{عومەر مەتین بەر لە ئەنجامدانی ئەو کارە خوێناویە بۆ سەر یانەی (پەڵس)، واتە لێدانی دڵ، تەلەفۆنی بۆ 911 کردووە، 911 ژمارەی لەناکاوی پۆلیسی ئەمریکایە و گوتوویەتی من ئەم کارە بۆ داعش ئەنجام دەدەم.}

^{لەبارەی دوایین ئاماری کوژراو و بریندارەکان نامۆ عەبدوڵڵا گوتی "زیاتر لە 50 کەس کوژراون و 53 کەسیش برینداربوونە، ئەم رووداوە بە گەورەترین هێرشی خوێناوی لەڕێگەی چەکەوە لە هەموو مێژووی ئەمریکا دادەنرێت".}

^13/6/2016

<sup>سوپای پاسدارانی ئێران كوشتنی پێنج گەریلای پارتی ژیانی ئازادی کوردستان- پژاکی لە ناوچەی سەردەشتی رۆژهەڵاتی كوردستان راگەیاند. سوپای پاسداران بەپرسیاریەتی كوشتنی دوو پاسدار و ئەندازیارێكی خستووەتە ئەستۆی ئەو گەریلایانەی پژاك.

قەرارگەی حەمزەی سەیدولشوهەدای سەر بە سوپای پاسداران، لە راگەیێندراوێكدا رۆژی دووشەممە 13-6-2016 رایگەیاند، ئەو تیمە پێنج کەسییە لە ئۆپەراسیۆنێکی وردی هەواڵگریدا لە سەردەشت، دوای شوێنهەڵگرتن كوژراون.

قەرارگەی حەمزەی سەیدولشوهەدا کاتی كوژرانی گەریلاکانی پژاکی رانەگەیاندووە، بەڵام گوتوویەتی بڕێکی زۆر چەک و چۆڵ و بەڵگەیان لێگیراوە.

راگەیێندراوەكەی سوپای پاسداران بەرپرسیاریەتی كوژرانی دوو ئەندامی خۆجێیی پاسداران و ئەندازیارێكی بەسیجی لە ناوچەی سەردەشت خستووەتە ئەستۆی ئەو گەریلایانە. هەرچەندە  ئاشكرای نەكردووە ئەو ئەندازیارە هەر لەو هێرشەی پژاكدا كوژراوە، یان لە كات و شوێنێكی دیكەدا.

رۆژی 4-5-2016، لە نزیک شارەدێی رەبەتی سەر بە شارۆچكەی سەردەشت، هێرشکرایە سەر ژمارەیەک لە ئەندامانی خۆجێیی سوپای پاسداران و شەڕ و پێكدادان روویدا.

هێزەکانی پاراستنی رۆژهەڵاتی کوردستان - یەرەكە، لقی سەربازی پارتی ژیانی ئازادی کوردستان- پژاک بەرپرسایەتی ئەو هێرشەی لەئەستۆگرت. 

یەرەکە دواتر رایگەیاند، لەو تێکهەڵچوونەدا 6 ئەندامی سوپای پاسداران کوژراون، بەڵام تاوەكو ئێستا هیچ زانیاری و هەڵوێستێكی لەبارەی ئەو راگەیێندراوەی سوپای پاسداران رانەگەیاندووە.</sup>

^rudaw

^13/6/2016

<sup>بەپیی زانیارییەکانی پەیامنێری ئاژانسی (باسنیوز) هەر ئێستا لە نووسینگەی سەرۆكی حكوومەتی هەرێمی كوردستان لە شاری هەولێر كۆبوونەوەی نێوان هەردوو شاندی پارتی دیموكراتی كوردستان و یەكێتتیی نیشتمانی كوردستان دەستی پێكرد.

ئێستا سەرجەم تیمەكانی ڕاگەیاندنە ناوخۆیی و بیانییەكان لە شاری هەولێر لە نووسینگەی سەرۆكی حكوومەتی هەرێمی كوردستانن و چاوەڕوانی تەواوبوونی كۆبوونەوەكە دەكەن.

بەپێی ئەو زانیارییانەی كە لە هۆڵی كۆبوونەوەكەوە سەرچاوە دەگرن شاندەکەی پارتی دیموكراتی كوردستان پێكهاتوون لە هەریەك لە نێچرڤان بارزانی و د. رۆژ نووری شاوەیش و فازڵ میرانی و مەحموود محەمەد و ئازاد بەرواری و شاندەکەی یەكێتی نیشتمانی كوردستانیش پێكهاتوون لە كۆسرەت رەسووڵ و ئەرسەلان بایز و عەدنان موفتی و قادر حەمە جان و عومەر فەتاح و ڕزگار عەلی و مەلا بەختیار.

هەر بەپێی زانیارییەكان وابڕیارە دوای كۆبوونەوەكە لەجیاتی كۆنگرەی ڕۆژنامەوانی، بەیاننامەیەكی هاوبەش دەربچێت.</sup>

^12/6/2016

<sup>هەموو ساڵێک لە 12ی حوزەیران گەل و حکومەتی رووسیا یادی رۆژی سەربەخۆیی رووسیا دەکەنەوە، کە لەو رۆژەدا رووسیا بووە وڵاتیکی سەربەخۆ و لە یەکێتی سۆڤیەت جیابووەوە.

خالید حوسێن، پەیامنێری تۆڕی میدیایی رووداو لە مۆسکۆ رایگەیاند " گەل و حکومەتی رووسیا ناوی لێنانێن رۆژی سەربەخۆیی رووسیا، بەڵکو چەند ناوێکی جیاوازیان لێناوە، بۆ نموونە دەڵێن رۆژی رووسیا و پێشتر ناوی رۆژی راگەیاندنی سەروەری رووسیا بووە، ئەوان پێیان وانییە لە رابردوودا لەژێر دەسەڵاتی حکومەتێکدابوون تاوەکو ئەمڕۆ سەربەخۆ بن".

پەیامنێری رووداو، ئاماژە بەوەش دەدات، گەل و حکومەتی رووسیا ئەو رۆژە وەکو رۆژێکی گەورە لە مێژووی خۆیان سەیر دەکەن، لەبەرئەوەی پەرلەمانی وڵاتەکەیان لە 12-6-1990 بە کۆی دەنگ بڕیاریاندا رووسیا وڵاتێکی سەربەخۆبێت و جیابێتەوە لە یەکێتی سۆڤیەت.

سەبارەت بە ئامادەکارییەکان بۆ ئەو رۆژە، پەیامنێری رووداو گوتی "لە سەرتاسەری رووسیا، لە زۆربەی شار و شارۆچکە و گوندەکانیش خەڵک بە شێوازی جیاجیا یادی ئەو رۆژە دەکەنەوە، لە کاژێر 12:00 لە مەیدانی سوور چەند چالاکییەکی هونەری ئەنجام دەدرێن و، پێشبینی دەکرێت لە پارک و شوێنە گشتییەکانیشدا ئاهانەگ و کۆنسێرت بەڕێوەبچن".</sup>

^12/6/2016