^{دوای هەڵگرتنی پارێزبەندی لەسەر ژمارەیەک پەرلەمانتاری تورکیا، هەریەک لە جەهەپە و هەدەپە بە نیازی تۆمارکردنی سکاڵان لەسەر پەرلەمانی تورکیا لە دادگای مافی مرۆڤی ئەوروپا، هەدەپەش لە هەوڵی ئەوەدایە کە بە هاوکاری جەهەپە لە دادگای دەستووری تورکیا سکاڵا تۆماربکەن کە پێویستیان بە واژۆی 110 پەرلەمانتار هەیە بۆ ئەوەی دادگای دەستووری داواکەیان رەتنەکاتەوە.}

^{کەمال ئاڤچی، پەیامنێری رووداو لە ئەنکەرە رایگەیاند، دوای ئەوەی لە مانگی رابردوو خاڵی 83 ی دەستوور دەستکاری کرا و دواتر لەلایەن پەرلەمانەوە پارێزبەندی لەسەر 152 پەرلەمانتار هەڵگیراو سەرۆککۆماری تورکیا بڕیارەکەی پەسندکرد، چەندین کێشەو کاردانەوەی جیاوازی بەدوای خۆیداهێنا.}

^{پەیامنێری رووداو ئاماژەی بەوەشکرد، دوای بڕیاری هەڵگرتنی پارێزبەندی لەسەر پەرلەمانتاران، هەدەپە سەردانی دادگای دەستووری تورکیای کردبوو بۆ ئەوەی بتوانێت بڕیارەکە هەڵبوەشێنێتەوە و سکاڵا تۆمار بکەن بۆ ئەو مەبەستەش دەبوو 110 پەرلەمانتار ئامادەبن، بەڵام جەهەپە پشتیوانی هەدەپەی نەکردووە بۆ ئەوەی رێژەکە لەدادگای دەستووری تورکیا تەواو بکەن.}

^{کەمال ئاڤچی هەروەها گوتی" هەدەپە و جەهەپە ئامادەکاری بۆ ئەوە دەکەن کە 110 پەرلەمانتار کۆبکەنەوە بۆ ئەوەی بتوانن سکاڵا رادەستی دادگای دەستووری تورکیا بکەن بۆ ئەوەی بتوانن لەبارەی پارێزبەندی داواکانیان بگەیێنێنن و ئەو بڕیارەی پەرلەمان هەڵبوەشێننەوە، هاوکات بەنیازیشن هەدەپە و جەهەپە پرسی هەڵگرتنی پارێزبەندی ببەنە دادگای مافی مرۆڤی ئەوروپا و سکاڵا تۆماربکەن".}

^10/6/2016

^{میدیاکانی ئەمریکا بڵاویانکردووەتەوە کە دادگای تاوانی ڤێرجینیا، به‌ تۆمه‌تی، تاوانی پیلانگێڕی و هاوكاریكردنی رێکخراوی داعش، محەممه‌د جه‌مال خوه‌یسی بە زیاتر لە 20 ساڵ زیندانیکردن و هاوکات پێبژاردنی 250 هەزار دۆلار سزادا.}

^{خوه‌یسی ته‌مه‌ن 26 ساڵ، خەڵکی ویلایەتی ڤێرجینیایە و لە مانگی 3-2016 له‌ لایه‌ن هێزه‌كانی پێشمه‌رگه‌ له‌ نزیك شنگال ده‌ستگیركرا.}

^{لە پرۆسەی دادگایی کردنەکەیدا، دانی به‌وه‌دا ناوە كه‌ له‌ رێگه‌ی فڕۆكه‌خانه‌ی باڵتیمۆره‌وه‌ له‌ مانگی دیسێمبه‌ری ساڵی 2015، به‌مه‌به‌ستی په‌یوه‌ندیكردن به‌ رێكخراوی داعش ئه‌مریكای به‌جێهێشتووه‌ و چووەتە سووریا.}

^{بەگوتەی خۆی له‌ له‌نده‌ن و هۆڵه‌ندا ماوه‌یه‌ك ماوه‌ته‌وه‌و پاشان له‌ رێگه‌ی توركیاوه‌ په‌ڕیوه‌ته‌وه‌ ناو خاكی سووریا. هه‌روه‌ها دانی به‌وه‌دا ناوە كه‌ ماوه‌یه‌ك له‌ ره‌ققه‌ ماوه‌ته‌وه‌و، جارێك لێیان پرسیوه‌ كه‌ ئاماده‌یه‌ خۆی بته‌قێنێته‌وه‌ ئه‌ویش له‌ وه‌ڵامدا گوتوویه‌تی به‌ڵێ ئاماده‌م.}

^10/6/2016

^{موحسین رەفیقدوست یەکێ لە فەرماندەکانی پێشووی سوپای پاسدارانی ئێران رایگەیاند كە لەسەر داوای حکوومەتی عێراق، دەتوانێ ھاوکار بێت بۆ پێکھێنانی سوپای پاسدارانی عێراق.}

^{رەفیقدوست لە لێدوانێکیدا بۆ ماڵپەڕی 'یانەی رۆژنامەنووسانی گەنج' کە سەر بە کەناڵی دەوڵەتی ئێرانە گوتی "ئەگەر سوپای پاسدارانی عێراقی پێک بھێنرێ، ئەوا ئێمە بە گشت توانا و ئەزموونمانەوە ئامادەین ھاوکاری بکەین".}

^{رەفیقدوست راشیگەیاند کە سوپای پاسدارانی ئێران لەنێو کۆمەڵگەی نێودەوڵەتی مۆدێلێکی سەرکەوتووە و دەبێتە مۆدێلێکی باش بۆ وڵاتانی ناوچەکەش.}

^{سوپای پاسدارانی ئێران یەکێکە لە ھێزە سەربازییە گرنگەکانی ئێران و رۆڵی بەرچاوی ھەیە لە بواری ئابووری ئەو وڵاتەش. سوپای پاسداران راستەوخۆ سەر بە رێبەری ئاینی ئێرانە.}

^{لە لایەکی دیکەش ئەو سوپایە بەئەنجامدانی کاری تیرۆریستی و تێکدەری لە دەرەوەی وڵات تۆمەتبار دەکرێت.}

^9/6/2016

^{سه‌رۆكوه‌زیرانی توركیا رایگه‌یاند، كه‌سانی نزیك له‌ گرووپه‌ جوداخوازه‌كان هه‌واڵمان پێده‌گه‌یه‌نن كه‌ سه‌رانی په‌كه‌كه‌ داوامان لێده‌كه‌ن دانووستانیان له‌گه‌ڵ ساز بكه‌ین.}

^{بیناڵی یڵدرم، سه‌رۆكوه‌زیرانی توركیا له‌ ئێواره‌ خوانێكی له‌گه‌ڵ په‌رله‌مانتاری فراكسیۆنی ئاكپارتی رایگه‌یاند، له‌ كه‌سه‌ نزیكه‌كانی گرووپه‌ جوداخوازه‌كاندا هه‌واڵمان پێده‌گات، به‌وه‌ی سه‌رانی په‌كه‌كه‌ داوای دانووستانمان لێده‌كه‌ن و له‌ به‌رامبه‌ردا ده‌ستبه‌رداری چه‌كه‌كانیان ده‌بن، ئێمه‌ش به‌هیچ شێوه‌یه‌ك دانووستانیان له‌گه‌ڵ ساز ناكه‌ین.}

^{یڵدرم له‌ به‌شێكی وتاره‌كه‌یدا داوای له‌لایه‌نه‌كانی ئۆپۆزیسیۆن كرد پشتیوانی ئاكپارتی بن بۆ سه‌رله‌نوێ داڕشتنه‌وه‌ی ده‌ستوور و په‌سندكردنی سیسته‌می سه‌رۆكایه‌تی بۆ ئه‌وه‌ی توركیا زیاتر گه‌شه‌بكات و هاوكات بێت له‌گه‌ڵ دوایین پێشهاته‌كانی جیهان.}

^{له‌باره‌ی ته‌قینه‌وه‌كانی ئیسته‌نبوڵ و میدیات، سه‌رۆكوه‌زیرانی توركیا گوتی "په‌كه‌كه‌ به‌رپرسیاری یه‌كه‌مه‌ له‌ هه‌ردوو ته‌قینه‌وه‌كه‌دا. كاره‌ له‌ پێشینه‌كانی 65مین حكومه‌تی توركیا، دژایه‌تیكردنی په‌كه‌كه‌و سه‌رجه‌م گرووپه‌ تیرۆریسته‌كانه‌ به‌تووندترین شێوه‌".}

^{زۆرترین به‌رنامه‌ی بیناڵی یڵدرم سه‌رۆكوه‌زیرانی توركیا له‌ مانگی ره‌مه‌زاندا، له‌ باكووری كوردستان ده‌بێت و چالاكییه‌كانی له‌ شار و شارۆچكه‌كانی كوردستان ده‌بێت و به‌شداری له‌ ئێواره‌ خوانه‌كانی ره‌مه‌زان ده‌كات.}

^9/6/2016

^{بەگوتەی بەرپرسانی پارێزگای سنە، لە گەڕەکە کۆنەکاندا نەخۆشییەکان چوار هێندە زیاتر لە گەڕەکە یاساییەکانی شارەکان بڵاودەبنەوە. هەر لەم گەڕەکانەدا دابەزینی ئاستی خوێندنیش لەواندا دوو قات لە گەڕەکە سەرەکییەکانی شارەکان زیاترە.}

^{بەپێی ئامارەکانی وەزارەتی رێگاوبانی ئێران نزیک بە 15%ی رووبەری ئێران لە گەڕەکە نافەرمییەکان و خانووە کۆنەکان پێکهاتووە. ئەم رووبەرە 130 هەزار هێکتار لە رووبەری هەمووی ئێران لەخۆی دەگرێت.}

^{لەو رووبەرەدا 18 ملیۆن کەس دەژین. واتە شتێک نزیک بە یەک لەسەر چواری سەرجەم دانیشتوانی ئێران. بەگوتەی بەرپرسان ئاماری گەڕەکە کۆنەکان و دانیشتووانەکانیان لە پارێزگای سنە، زیاتر لە ئاستی سەرتاسەری ئێرانە.}

^{گەڕەکە کۆنەکان و گەڕەکەکانی قەراخ شارەکان بوونەتە هۆکاری کێشەیەکی کۆمەڵایەتی و حکومەت سەرەڕای هەوڵەکانی هێشتا نەیتوانیوە ئەم کێشەیە چارەسەر بکات.}

^{بەپێی بڕیارێکی حکومەت ساڵی 2011 چەندین گوندی گەورەی نزیک شارەکان بە سنووری ئیداری شارەکانەوە زیاد کران، کە بەگوتەی شارەزایان، ئەم کارە بەبێ لێکۆڵینەوە ئەنجام درا و ئەم گەڕەکە نوێیانە دەرەنجامی خراپی لێ کەوتووە. بۆ نموونە دیاردەی گەڕەکەکانی قەراخ شارەکان پەرەیان سەند و خەڵکێکی زۆر روویان لە قەراخ شارەکان کرد، کە پێداویستییەکیان تێدا نییە.}

^{پارێزگاری سنە، نەبوونی پلان و گەڕەکەکانی قەراخ شارەکان وەک دوو کێشەی سەرەکی بواری ئاوەدانکردنەوەی شارەکان لە قەڵەمدەدات.}

^{رەوشی ئەمجۆرە گەڕەکانە بە رادەیەک خراپە کە جێگری پارێزگاری سنە بۆ بواری ئاوەدانکردنەوە، بە قەیراناوی لە قەڵەمی دان. ئەمیر قادری دەڵێت "پارێزگای سنە بە گەڕەکە نایاساییەکان گەمارۆ دراوە و لە ئاکامدا دەتوانێت زەرەر و زیانی قەرەبوو نەکراوی لێبکەوێتەوە".}

^{بەگوتەی بەرپرسان، نێونجی خزمەتگوزارییەکان لە گەڕەکە نایاسایی و کۆنەکاندا زۆر کەمتر لە نێونجی خزمەتگوزاری لە گەڕەکە سەرەکییەکانی شارەکاندایە و خزمەتگوزارییەکان بەشێوەی یەکسان دابەشنەکراون.}

^9/6/2016

^{كه‌مال كلیچدارئۆغلو سه‌رۆكی پارتی گه‌لی كۆماری جه‌هه‌په‌، له‌ دیمانه‌یه‌كی تایبه‌تدا ره‌خنه‌ی له‌ حكوومه‌تی توركیا گرت به‌وه‌ی له‌ كاتی دروستبوونی گروپی تیرۆریستی داعشدا رووبه‌رووی ئه‌و گروپه‌ تیرۆریستیه‌ نه‌بووه‌ته‌وه‌.}

^{كلیچدارئۆغلو له‌ دیمانه‌یه‌كی تایبه‌تدا له‌گه‌ڵ كه‌ناڵی سی ئێن ئێنی توركی، ئاماژه‌ی دا كه‌ له‌ كاتی دروستبوونی داعشدا ئه‌وان به‌ حكوومه‌تیان گوتووه‌ كه‌ ئۆپه‌راسیۆنی سه‌ربازی دژی داعش ئه‌نجام بده‌ن و بڕۆنه‌ ناو خاكی سووریاوه‌، به‌ڵام حكوومه‌ت گوێ لێ نه‌گرتوون.}

^{باسی له‌وه‌ش كرد كه‌ ئێستە یه‌كێتی ئه‌وروپا و چه‌ندین وڵاتی دیكه‌، توركیا تۆمه‌تبار ده‌كه‌ن به‌وه‌ی هاوكاری داعشه‌، چونكه‌ به‌ هیچ شێوه‌یه‌ك توركیا دژی داعش هه‌نگاوی نه‌ناوه‌.}

^{ئه‌و له‌ به‌شێكی دیكه‌ی قسه‌كانیدا ئاماژه‌ی دا ئه‌گه‌ر ئۆپه‌راسیۆن دژی داعش ئه‌نجام بدرابوایه‌، ئه‌وكات ره‌نگه‌ برا كورده‌كانمان له‌ كۆبانێ نه‌كه‌وتبانه‌ ده‌ستی داعش و نه‌ده‌كوژران.}

^{له‌ باره‌ی ئه‌وه‌ی ئه‌حمه‌د داودئۆغلو له‌ پۆسته‌كه‌ی دوور خرایه‌وه‌ و له‌ جێگه‌ی ئه‌و بیناڵی یڵدرم بووه‌ سه‌رۆك وه‌زیران، كلیچدارئۆغلو پێیوابوو كه‌ كوده‌تایه‌ك بوو ئه‌ردۆگان به‌سه‌ر داودئۆغلوی كرد، چونكه‌ ئه‌و به‌ ده‌نگی خه‌ڵك بووبووه‌ سه‌رۆك وه‌زیران. هه‌روه‌ها داودئۆغلو له‌ رووی ئیكۆنۆمییه‌وه‌ رابردوویه‌كی پاكی هه‌یه‌، وه‌لێ بیناڵی یڵدرم چه‌ندین گه‌نده‌ڵی ئه‌نجام داوه‌ و له‌ رووی ئیكۆنۆمییه‌وه‌ رابردووی پیسه‌.}

^8/6/2016

<sup>ئەنجومەنی جیهانیی قەڵەم بە بڵاوکردنەوەی بەیاننامەیەک، نیگەرانیی زۆریان لەبارەی بارودۆخی محەمەدسدیق كەبوودوەند ڕۆژنامەنووسی كورد هەیە و داواكارن بە زووترین كات خزمەتگوزاری پزیشكی پێ بگات.

ئەو ئەنجومەنە ئەوەشی ئاشکرا کردووە كە كەبوودوەند تووشی چەندین نەخۆشیی وەك دڵ و گورچیلە و پرۆستات بووە و بەهۆی مانگرتنەكەی بارودۆخی خراپتر بووە.

لە بەیاننامەکەی ئەنجومەنی جیهانیی قەڵەمدا هاتووە "كەبوودوەند بەهۆی ڕادەربڕینەوە زیندانی كراوە و بەپێی مادەی 19 جاڕنامەی نێودەوڵەتی مافی مەدەنی و سیاسی داوای ئازادكردنی بێ‌ مەرجیان كردووە كە ئێرانیش لەو پەیماننامەیە ئەندامە."

لە ڕاگەیەندراوی ئەو ئەنجومەنەدا باس لەوە دەكرێت كە كەبوودوەند ئەندامی فەخریی ئەنجومەنی قەڵەمی نەمسا، ئەنجومەنی قەڵەمی سوید، ئەنجوومەنی قەڵەمی ماتالا و ئەنجوومەنی قەڵەمی سیدنی و هەروەها رۆژنامەنووسی ساڵی بەریتانیا لە ساڵی 2009 و براوەی خەڵاتی "هلمت همت" لە ساڵی 2008 ە.

ئەو ئەنجومەنە داوای لە خۆێنەرانی ئەو ڕاگەیەندراوە كردووە كە بە نووسینی نامە بۆ عەلی خامنەیی ڕێبەری کۆماری ئیسلامی، سادق لاریجانی سەرۆكی دەزگای دادوەری و محەمەدجەواد لاریجانی بەرپرسی ناوەندی مافی مرۆڤی ئێران، هەروەها بڵاوكردنەوەی لە تۆڕە كۆمەڵایەتییەكانی وەك فەیسبوك و تویتەر ئەو داواكارییانە بگەیەنن:

- دەربڕینی نیگەرانی لەسەر تەندروستیی محەمەدسەدیق كەبوودەوەند ڕۆژنامەنووس و نووسەر، و دواوای گەیاندنی خزمەتگوزاریی تەندروستیی بەپەلە.

- لە بەرپرسانی ئێران داوای لادانی هەر تۆمەتێكی نوێ‌ لەسەر كەبوودوەند بكرێت.

- داوا لە ئێران بكرێت كە پابەند بێت بە مادەی 19ی جاڕنامەی نێودەوڵەتی مافی مەدەنی و سیاسی كە ئێران خۆی لەو هاوپەیمانەتییە ئەندامە.

محەمەدسدیق كەبوودوەند، سەرۆكی ڕێکخراوی بەرگری لە مافی مرۆڤی كوردستان ماوەی 9 ساڵە بە تۆمەتی دامەزراندنی ڕێكخراوی بەرگری لە مافی مرۆڤی كوردستان، لە بەندیخانەیە و ئێستاش بەرپرسانی دادوەری ئێران دۆسیەیەكی دیكەیان لە دژی كردۆتە و بەو هۆیەوەماوەی 32 رۆژە مانی لە خواردن گرتووە.</sup>

^8/6/2016

<sup>نرخی دراوەکان بۆ ئەمڕۆ چوارشەممە 8ـی حوزەیرانی 2016 بەمشێوەیەیە:

100 دۆلاری ئەمریکی = 128.300 دینار

100 یۆرۆ = 145.250 دینار

100 پاوەند = 185.250 دینار

100 ھەزار تومەن = 37 ھەزار دینار

100 لیرەی تورکی = 43.750 ھەزار دینار</sup>

^8/6/2016

<sup>رۆژهەڵاتی کوردستان جەمسەرێکی سەرەکی بەرهەمهێنانی کشتوکاڵی ناوچەكەیە. پێشبینیدەکرێت ئەمساڵ زیاتر لە 16 ملیۆن و 300 هەزار تۆن بەرهەمی کشتوکاڵی و ئاژەڵداری لە رۆژهەڵاتی کوردستان بەرهەمبێت. 

بەشێک لەو بەرهەمانە لەناوخۆی رۆژهەڵاتی کوردستان و ئێران بەکاردێت و بەشی زۆریشی بەناوی بەرهەمی ئێران هەناردەی وڵاتانی دیکە دەکرێت. 

لە رۆژهەڵاتی کوردستان زیاتر لە 4 ملیۆن و 300 هەزار هێکتار زەوی کشتوکاڵی هەیە، کە زیاتر لە 70%ی دێم و نزیک بە 30%یشی زەوی بەراوە.

بوونی چەند ملیۆن هێکتار زەوی کشتوکاڵی کوردستانی کردووە بە جەمسەری سەرەکی بەرهەمهێنانی کشتووکاڵی لە ئێران و رۆژهەڵاتی ناوەڕاست. 

پێشبینیدەکرێت ئەمساڵ لە رۆژهەڵاتی کوردستان زیاتر لە 16 ملیۆن و 300 هەزار تەن بەرهەمی کشتوکاڵی و ئاژەڵداری بەرهەم بێ، بەشێکی زۆری ئەو بەرهەمەش هەناردەی وڵاتانی دەرەوە و ناوچەکانی دیکەی ئێران دەکرێت.</sup>

^8/6/2016

^{ئەو ‌هاوڵاتیایە سویسرانەی کە بەشداری ریفراندۆمیان کرد، بۆ وەرگرتنی مووچەیەکی مانگانەی 2500 فرانکی بەبێ کارکردن، ئەو ئیمتیازەیان رەتکردەوە.}

^{بەپێی ئەنجامەكانی ریفراندۆمەكە، زۆرینەی بەشداربووان دەنگیان بە نەخێر داوە و نایانەوێت ئەو بڕە پارەیە بەبێ کارکردن لە حکومەت وەربگرن.}

^{دانیشتووانی سویسرا لەڕێگەی بەشداریکردنیان لە ریفراندۆمێک پێشنیارێکیان رەتکردەوە کە تایبەت بوو بە پێدانی مانگانەیەک بۆ هەر دانیشتوویەکی وڵات لە لایەن حکومەتەوە.}

^{پێشنیارەکە لە لایەن کۆمەڵیک چالاکوانی چەپەوە خرایەڕوو، ئەوەش پاش ئەوەی توانیان واژۆی 100 هەزار کەس کۆبکەنەوە کە پێویست بوو بۆئەوەی پێشنیارەکەیشیان بخەنە ریفراندۆمەوە.}

^{ئەو چالاکوانانە پێشنیاری ئەوەیان کردبوو "مانگانە حکومەت بڕی 2 هەزار و پێنج سەد فرانک، کە دەکاتە 2560 دۆلار بداتە هەر دانیشتوویەکی وڵات، بەڵام دەنگدەران پشتگیرییان لە پێشنیارەکە نەکرد.}

^{دانیشتوویەکی سویسرا دەڵێت، پێویستە خەڵک فێری ئیشکردن بێت و ئەم پێشنیارە وادەکات ئیدی کەس ئیش نەکات.}

^{تەنیا چالاکوانە چەپەکان نەبوون پشتگیرییان لەم پێشنیارە کرد، بەڵکو ژمارەیەک لە پسپۆڕانی بواری ئابووریش پێیان وابوو جێبەجێکردنی باشە، چونکە هەمان دەرفەتی ژیان دەداتە هەموو کەس.}

^{8 ملیۆن و 211 هەزار کەس لە سویسرا دەژین و دەرئەنجامەکانیش دەریدەخەن کە 78%ی دەنگدەران بە "نەخێر" دەنگیانداوە و 22%ەکەی دیکەیشیان بە "بەڵێ"، واتە خەڵک رەتیکردەوە بێبەرامبەر پارە لە حکومەت وەربگرێت.}

^7/6/2016