^{ناوەندی لێكۆڵینەوەی تۆڕی میدیایی رووداو دەستبەكار دەبێت و یەكەم لێكۆڵینەوە لەژێر ناونیشانی "كوردستان پۆست و - داعش" بڵاودەكاتەوە.}

^{ناوەندی لێكۆڵینەوەی رووداو، بەشێكی تۆڕی میدیایی رووداوە. لە سەرەتای ئەمساڵەوە بە ستافێك لە لیكۆلینڤانان دەستبەكاربووە. ئەمڕۆش وەك یەكەمین كار، بە سازكردنی كۆنفرانسێك خۆی دەناسێنێت.}

^{ناوەندی لێكۆڵینەوەی رووداو، ناوەندێكی لێكۆلینڤانی پرۆفیشناڵ دەبێت كە ئامانجی پێدانی زانیاری و شرۆڤەی ئەكادیمیانەیە . بۆ ئەو مەبەستەش بەردەوام دەیەوێت كار لەگەڵ لێكۆڵینڤانانی بەتوانادا بكات.}

^{ئەم ناوەندە كاری ئەو لێكۆڵینەوانە دەبێت كە بۆ ئێستا و پاشەڕۆژی كوردستان و ناوچەكە پێویستن و ئامانجەكانیشی لە چەند خاڵێكدا خۆیان دەنوێنن. هەروەها ئازاد عەلی بەڕێوەبەری ناوەندی لێكۆڵینەوەی رووداو دەبێت.}

^{ناوەندی لیكۆڵینەوەی رووداو، رۆژی چوارشەممە 18-5-2016 كۆنفرانسێك لەژێر ناونیشانی "لە پۆست داعشەوە بۆ پۆست سایكس - پیكۆ" رێكدەخات، كۆنفرانەسەكەش ساڵانە بەردەوام دەبێت. كۆنفرانسەكە لەلایەن بێژەر و پێشكەشكاری دیاری رووداو، شاهۆ ئەمین پێشكەش دەكرێت.
رووداو هەوڵدەدات زۆرینەی ئەو لێكۆڵینەوانەی ناوەندەكە ئامادەیان دەكات چاپیان بكات. زمانی یەكەمی چاپەمەنیی ناوەندەكە كوردییە. شانبەشانی زمانی كوردی، بە زمانەكانی عەرەبی، ئینگلیزی، فارسی و توركیش لێكۆڵینەوەكان بڵاودەكاتەوە.}

^{پانێلیستەكان:}

^{- پرۆفیسۆر ئەنوەر عەشقی، لێكۆلینڤان لە نێوەندی رۆژهەڵاتی نێوەڕاست بۆ لێكۆڵینەوەی ستراتیژی و یاسایی لە جددە.}

^{- پرۆفیسرۆ رینیێ پارپۆت، لێكۆلینڤان لە زانكۆی مۆنتریال لە كەنەدا.}

^{- پرۆفیسۆر بیلال سامبوور، لێكۆلینڤان لە زانكۆی ئەنقەرە لە توركیا.}

^{- پرۆفیسۆر سەعید شەمس، ئەكادیمی لە زانكۆی سۆران.}

^{لێكۆڵینەوەكە بەسەرپەرشتی مامەند رۆژە لەلایەن لیكۆلینڤانان (ئازاد عەلی، هاورێ باخەوان، بیلال سامبوور، عەبدولڕەحمان دەروێش، مەسعوود رۆستەمی و حیسام دەستپیش) ئەنجامدراوە، باسی كوردستانی دوای داعش دەكات، هەروەها باسی كوردستانی دوای 100 ساڵ لە رێككەوتننامەی سایكس- پیكۆ دەكات، لەهەمانكاتدا تێزی راڕەوی كوردی كە بە دیواری كوردیش دەناسرێت وەك یەكێك لە فاكتەرەگانی پۆست - داعش و پۆست - سایكس پیكۆ دەخاتەڕوو.}

^{خۆڕاگەیاننامەی ناوەندی لێكۆڵینەوەی رووداو}

^{ناوەندی لێكۆڵینەوەی رووداو، بەشێكی تۆڕی میدیایی رووداوە . لە سەرەتای ئەمساڵەوە بە ستافێك لە لیكۆلینڤانان دەستبەكاربووە. ئەمڕۆ وەك یەكەمین كار ، خۆی لەگەڵ ئێوەدا ئاشكرا دەكات و دەناسێنێت.}

^{ناوەندی لێكۆلینەوەی رووداو ، ناوەندێكی لێكۆلینڤانی پرۆفیشناڵ دەبێت كە ئامانجی پێدانی زانیاری و شرۆڤەی ئەكادیمیانەیە . بۆ ئەو مەبەستەش بەردەوام دەیەوێت كار لەگەڵ لێكۆڵینڤانانی بە توانادا بكات.}

^{ئەم ناوەندە كاری ئەو لێكۆڵینەوانە دەبێت كە بۆ ئێستا و پاشەڕۆژی كوردستان و ناوچەكە پێویستن و ئامانجەكانیشی لەم خاڵانەدا خۆیان دەنوێنن:}

^{•هەر كێشەیەكی كوردستانی و نەتەوەیی بۆ ناوەند پڕۆژەیەكە و زۆرینەی لێكۆڵینەوەكانمان تایبەت دەبن بە كوردستان و ناوچەی رۆژهەڵاتی نێوەڕاست .}

^{•ناوەندی ڵێكۆڵینەوەی رووداو، بایەخی بە گۆڕانكارییە ناوچەیی و جیهانییەكان و كاریگەرییان لەسەر كوردستان دەدات و ئەوەش لە لێكۆڵینەوەكانیدا رەنگدەداتەوە.}

^{•لێكۆڵینەوەكانمان لە چوارچێوەیەكی ئەكادیمییانەدا دەنووسرێن و هیچ لایەنگرییەكیان تێدا نابێت.}

^{•لێكۆڵینەوەكانمان هەندێكیان ناوكۆیی دەبن و هەندێكیشیان تەنیا یەك لێكۆڵەر ئامادەیان دەكات ، بەڵام دوای پێداچوونەوەیان لەلایەن ناوەندی لێكۆڵینەوەی رووداو .}

^{•ناوەندی لێكۆڵینەوەی رووداو ، ئەڵقەی گفتوگۆ و شرۆڤەی بەپەلە لەسەر رووداوە رۆژەڤییەكان رێكدەخات و، بەشێوەی لێكۆڵینەوەی پووختی نووسراو و گفتوگۆی ڤیدیۆیی بڵاودەكاتەوە.}

^{•یەكێك لە سەرەكیترین كارەكانی ناوەند ئامادەكردنی شرۆڤە و لێكۆڵینەوەیە بۆ تۆڕی میدیایی رووداو. دەشێت هەندێك لەو لێكۆڵینەوانە ببنە دۆكیومێنتەری یان دیبەیتی تەلەڤزیۆنییان لێوە ئامادە بكرێن.}

^{•بەدڵنیاییەوە ستافی ناوەندی لێكۆڵینەوەی رووداو لە هەموو بابەتێكدا پسپۆڕ نییە. هەر بۆیە بۆ ئەو بابەتانەی كە لە دەرەوەی پسپۆڕیێتی ستافی ناوەندەكەن، ناوەند هەندێك لێكۆڵەری پسپۆڕ و ئەكادیمیی دیكە رادەسپێرێت تاوەكو توێژینەوە لە بابەتێكی دیاریكراودا بكەن. لەو رووەوە ناوەندەكە تەنیا كاری هاوئاهەنگی و پلاندانان و بڵاوكردنەوەی لێكۆڵینەوەكان دەبێت.}

^{•هەوڵدەدەین زۆرینەی ئەو لێكۆڵینەوانەی كە ناوەندەكەمان ئامادەیان دەكات چاپیان بكەین. زمانی یەكەمی چاپەمەنیی ناوەندەكەمان كوردییە. شانبەشانی زمانی كوردی، بە زمانەكانی عەرەبی، ئینگلیزی، فارسی و توركیش لێكۆلینەوەكانمان بڵاودەكەینەوە.}

^{•ناوەندی لێكۆڵینەوەی رووداو هەر لە سەرەتای دەستبەكاربوونییەوە هەوڵی پێكهێنانی تۆڕێكی لێكۆڵینەوەیی ناوخۆیی و دەرەكی داوە. بەهیوایە ئەم تۆڕە فراوانتر بكات و لێكۆلینڤانان لە هەموو لایەك بۆ توێژینەوە لەسەر بابەتێكی گرنگ سەبارەت بە باسێكی دیاریكراو بكەن .}

^{•ناوەندی لێكۆڵینەوەی رووداو ، ساڵانە كۆنفرانسێك رێكدەخات بۆ پانێلبەستن لەسەر چەند رۆژەڤێكی گرنگ و دەستەبژێرێكی پسپۆڕی ناوخۆیی و دەرەكی بۆ بەشداریكردن بانگهێشت دەكات.}

^{زۆر گەشبینین كە ناوەندەكەمان لە داهاتوویەكی نزیكدا پەرەدەستێنێت و ئەو تۆڕی توێژینەوەییەی كە ئامانجمانە دەهێنێتەدی و بەهۆیەوە كۆمەڵێك لێكۆڵینەوەی گرنگ پێشكەشدەكەین.}

^{هیوادارین بە تێبینی و رێنماییەكانتان بەردەوام هاوكارمان بن و كارەكانمان زۆرتر پێشبخەین.}

^{هەولێر
18-5-2016}

<sup>محەمەد سەدیق کەبوودوەند، سەرۆکی بەندکراوی ڕێکخراوی بەرگری لە مافی مرۆڤی کوردستان ماوەی دە رۆژە مانی لە خواردن گرتووە و ئێستا گیانی لە مەترسی دایە.

ئەمڕۆ سێشەممە (17.5.2016)، رێکخراوی بەرگری لە مافی مرۆڤی کوردستان ، سەبارەت بە بارودۆخی خراپیی باری تەندروستیی محەمەد سەدیق کەبوودوەند، ڕاگەیاندراوێکی بڵاو کردووەتەوە و هۆشداری داوە و بەگوێرەی زانیارییەکان بنەماڵەی ئەو چالاکوانە دەڵێن، تا ئێستا بەهۆی بارودۆخی خراپی تەندروستییەوە چەندین جار ڕەوانەی نەخۆشخانەی بەندیخانە کراوە.

پزیشکانی بەندیخانە هۆشدارییانداوە کە دەبێ بە زۆترین کات مانگرتنەکەی بشکێنێت.

محەمەد سەدیق کەبوودوەند، ڕوژنامەنووس و سەرۆکی رێکخراوی بەرگری لە مافی مرۆڤی کوردستان چەندین ساڵە لە بەندیخانەیە، بەمەبەستی دەربڕینی ناڕەزایەتی بەرامبەر گوشاری بەرپرسە ئەمنییەکانی ئێران لە بەندیخانە بۆ سەر ئەو چالاکوانە سیاسییە، ماوەی 10 رۆژە مانی لە خواردن گرتووە.

پڕوسەی دادگایی کەبوودوەند ماوەی چوار مانگە دەستی پێکردووە و تا ئێستا سێ جار بە تۆمەتی هەوڵدان بۆ تێکدانی ئاسایشی نیشتمانی دادگایی کراوە.

پێشتر دادگای ئینقلابی ئیسلامیی تاران، حوکمی 10 ساڵ و 6 مانگ بەندکرانی بۆ کەبوودوەند دەرکردبوو، بەڵام بە لەبەرچاو گرتنی ئەو تۆمەتانەی بەم دوایە دراوەتە پاڵی، پێدەچێ، دوای تەواوبوونی حوکمەکەشی ئازاد نەکرێت.

ئەوە لە کاتێک دایە کە محەمەدسەدیق کەبوودوەند، چالاکوانی سیاسیی کورد، لە بەندیخانە تووشی چەندین نەخۆشی وەکوو نەخۆشیی دڵ و خوێنبەرەکان، گورچیلە و پرۆستات بووە و مانگرتن لە خواردنیش گیانی خستووەتە مەترسییەوە.

محەمەدسەدیق کەبوودوەند مانگی 11ی ساڵی 2007 لەلایەن هێزە ئەمنییەکانی ئێرانەوە دەستبەسەر کراوە و لە دادگای ئینقلابی ئیسلامیی تاران، بە تۆمەتی "هەوڵدان بۆ تێکدانی ئاسایشی نیشتمانی" لەڕێگەی دامەزرانی رێکخراوی بەرگری لە مافی مرۆڤی کوردستان، سزای 10 ساڵ و 6 مانگ بەندکردنی بۆ دەرچووە.

هاوکات بەهۆی کەیسی تایبەت بە چالاکیی رۆژنامەنووسی، ئەو دادگایە سزای ساڵێک بەندکرانی هەڵپەسێراو و 5 ساڵیش دوورخستنەوە لە کاری رۆژنامەنووسی بۆ دەرکردووە.</sup>

^17/5/2016

<sup>ئەنکەرا و زۆر لە وڵاتانی ئەوروپی، پێیان باشە مەسعود بارزانی سەرۆکی ھەرێمی کوردستان ناوەنگیری لە نێوان پەکەکە و حکوومەتی تورکیا بکات بۆ دووبارە گیان بەبەرداکردنەوەی پرسی ئاشتی و چارەسەری.

کۆمەڵێک لە پەرلەمانتارانی پارتی دیموکراتی گەلان (ھەدەپە)یش پێیان وایە بارزانی کەسایەتییەکی گرنگی ناوچەکەیە، بۆیە رۆڵێکی ئەرێنی دەبینێت بۆ راگرتنی شەڕ و لێک نزیککردنەوەی پەکەکە و ئەنکەرا. ھەروەھا پێیان وایە کە بە لای ئەمەریکاوە بارزانی کەسایەتییەکی بە ھێزی ناوچەکەیە، بۆیە لە کۆبوونەوەی نھێنیدا بە باشی زانیوە بارزانی رۆڵی ناوەنگیری لە نێوان ئەو ٢ لایەنەدا ببینێت.

ئادەم گەڤەری ئەندام پەرلەمانی ھەدەپە پێیوایە، ئێستا بارودۆخی تورکیا زۆر خراپە و پرسی کورد لەو وڵاتە لە مەترسییەکی گەورەدایە، بۆیە ئەگەر کەسێکی وەکو بارزانی لەو بارودۆخە خراپەدا گرنگی بە پرسی چارەسەری بدات، ھەنگاوێکی یەکجار گەورەیە.
ئەو تایبەت بۆ (باس) گوتی: "زۆر ئاساییە کە بەرێز بارزانی پەیوەندیی باشی لەگەڵ ئاکپارتیدا ھەبێت. لە پەرلەمانی تورکیا ھەموو ھەوڵێک گیراوەتە بەر تا ھەدەپە بخەنە دەرەوەی پەرلەمانەوە و، بەوەی پارێزبەندییان لەسەر ھەڵبگیرێت و بخرێنە زیندانەوە.
پارتی سەرەکیی ئۆپۆزسیۆنی تورکیا جەھەپە دەڵێت ئەگەر لە تورکیا سیستەمی سەرۆکایەتی جێبەجێ بکرێت، دڵنیا بن خوێنێکی زۆر لەم وڵاتە دەرژێت و بەبێ خوێنڕشتن ئەو سیستەمە لە پەرلەمان بەڕێ ناکرێت. کێشەی کوردیش لە تورکیا زۆر لە مەترسیدایە بەوەی بە رێگەیەکی دیموکراییانە چارەسەری بۆ ناکرێت. دیارە ئەمەریکا و ئەوروپایش زۆر نیگەرانن بەو بارودۆخەی تورکیا، بۆیە لەو باردۆخە خراپەدا ئەگەر بارزانی ھەوڵی ناوەنگیری لە نێوان پەکەکە و ئەنکەرادا بدات ھەنگاوێکی زۆر گەورەیە و مایەی شانازییە".

گەڤەڕی ئاماژە بۆ ئەوەیش دەکات کە خوازیارن بارزانی بە زووترین کات ئەو رۆڵە بگێڕێت، تا زووتر شەڕ رابوەستێت.

عەلی ئاتەلان ئەندام پەرلەمانی ھەدەپە لەسەر شاری باتمان پێی وایە کە بۆ پرسی چارەسەری پێویستە کەسی سێیەم بێتە ناوەوە، تا ئەو ٢ لایەنە لە یەکتری نزیک بکاتەوە، بۆیە گرنگە بارزانی ببێت بە کەسی سێیەم بۆ نزیک بوونەوەی پەکەکە و ئەنکەرا.

ئەو تایبەت بۆ (باس خەبەر) دەڵێت: "پەکەکە و تورکیا زۆر بە توندی بەگژ یەکتریدا چوونەتەوە، بۆیە تاکە رێگە بوونی کەسی سێەمە کە بێت و ئاوێک بەو ئاگرەدا بکات و دووبارە ئەو ٢ لایەنە بگەڕێنێتەوە بۆ سەر مێزی گفتوگۆ. ئەگەر بارزانیش ئەو ناوەنگیرییە ئەنجام بدات زۆر خۆشحاڵمان دەکات".

ھەروەھا باسی لەوەیش کرد کە ئەو شەڕەی لە نێوان پەکەکە و دەوڵەتی تورکیا ھاتووەتە ئاراوە، زیانی ملیاران دۆلاری لە باکوور داوە، ھەروەھا ئەو زیانە بەر باشووریش کەوتووە بەوەی قەبارەی بازرگانی لەنێوان تورکیا باشووری کوردستان کەم بووەتەوە، بۆیە پێویستە ئەو شەڕە کۆتایی پێ بێت.

گوتیشی: "بارزانی بە لای وڵاتانی ئەوروپییەوە کەسایەتییەکی زۆر گرنگە و ھەروەھا یەکێکە لەو سەرۆکانەیشی رۆڵی زۆر جیدیی بینیوە لە رووبەرووبونەوەی گرووپی تیرۆرستیی داعش، بۆیە پێم وایە لە ناوەندگیریی پەکەکە و دەوڵەتی تورکیاشدا رۆڵی ئەرێنی دەبینێت".

بۆ ئەوەی دووبارە پرسی چارەسەری بێتەوە بەر باس، پێشتریش ھەوڵی لەو شێوەیە دراوە، بۆ نموونە ئەحمەد داودئۆغلو بە ناراستەوخۆ پێی باش بووە کە دووبارە پرسی چارەسەری بێتەوە بەر باس، بەڵام ھەوڵەکان سوودی نەبووە. ئەمە گوتەی لۆزگین بۆتانە ئەندام پەرلەمانی ھەدەپە لەسەر شاری وان.

لۆزگین تایبەت بۆ (باس خەبەر) پێی وایە کە ئەو شەڕە زیانی زۆری ئابووریی بە باکوور و ھەرێمی کوردستانیش داوە جگە لە ماڵوێرانییەکی زۆر، بۆیە ئەگەر بارزانی رۆڵی ناوەندگیری لە نێوان ئەو ٢ لایەنەدا بگیڕێت و شەڕ کۆتایی پێ بێت، ئەوکات ھەموو لایەک سوودمەند دەبن.

ھەروەھا گوتیشی: "من بۆیە ئومێدی زۆرم بە بارزانی ھەیە کە دەتوانێت پەکەکە و ئەنکەرا لە یەکتری نزیک بکاتەوە، چونکە بارزانی رۆڵێکی سەرەکیی گێڕاوە بۆ رووبەرووبونەوەی داعش و ئەمەیش وای کردووە کە ئەوروپا و ئەمەریکا رێزێکی زۆری لێ بگرن و وەکو سەرکردەیەکی گرنگیش تەماشای بکەن، بۆیە ئەگەر بۆ پرسی چارەسەری ھەنگاوی ئاشتی بگرێتە بەر ئەنجامی باش دەبێت".

ئەو باسی لەوەیش کرد کە ئاساییشی ڤییەنا و بەرلین پەیوەستە بە ئاساییشی ھەولێر و کۆبانێ و ئامەد، ئەگەر ئەو شارانە ئارام نەبن ئەوێش نائارامە.</sup>

^17/5/2016

<sup>کۆماری ئیسلامیی ئێران، پێدانی ڤیزای بە هاووڵاتییانی هەرێمی کوردستان لە ڕێگای مەرزی حاجی ئۆمەران ڕاگرت، وەک فشارێک بۆ چارەسەرکردنی کێشەیەکی هاووڵاتییانی ئێرانی.

سەرچاوەیەکی ئاگادار لە بەڕێوەبەرایەتیی مەرزی حاجی ئۆمەران، تایبەت بە (باسنیوز)ی ڕاگەیاند، لە دوێنێ دووشەممە 16\5\2016ەوە، کۆماری ئیسلامیی ئێران بە بڕیاری کونسوڵخانەی ئێران لە هەولێر، پێدانی ڤیزای بەو هاووڵاتییانەی هەرێمی کوردستان ڕاگرتووە کە بە نیازن لە ڕێگای ئەو مەرزەوە، گەشت بۆ ئێران بکەن. ئەوەشی ئاشکرا کرد کە کونسوڵخانەی ئێران بڕیارەکەی دەرکردووە و هۆکارەکەی بۆ ئەوە دەگەڕێتەوە، شۆفێری تاکسییەکان لە مەرزی حاجی ئۆمەران، ڕێگا بە نەفەرهەڵگرەکانی ئێران (ئوتوبوس) نادەن، گەشتیار لە حاجی ئۆمەرانەوە بۆ هەولێر بگوازنەوە و بە پێچەوانەشەوە.

سەرچاوەکە ئەوەشی بۆ (باسنیوز) ئاشکرا کرد کە ئێستا لە مەرزی حاجی ئۆمەرانەوە، ڤیزا بە هاووڵاتییانی هەرێمی کوردستان نادرێت و داوا لەو کەسانە دەکەن کە دەیانەوێت لە ڕێگای حاجی ئۆمەرانەوە بچنە ئێران، یان لە ڕێگای فڕۆکەخانە و بە فڕۆکە گەشتەکەیان ئەنجام بدەن، یانیش لە ڕێگای مەرزی (باشماخ) و مەرزەکانی سنووری پارێزگای سلێمانی، بچنە کۆماری ئیسلامیی ئێران.</sup>

^17/5/2016

<sup>لە ماڵی مام جەلال لە دەباشان رێککەوتننامەی نێوان یەکێتی نیشتمانی کوردستان و بزووتنەوەی گۆڕان لەلایەن جێگری یەکەمی سکرتێری گشتی یەکێتی و رێکخەری گشتی بزووتنەوەی گۆڕان واژۆدەکرێت و ئێوارەی ئەمڕۆش لە رێوڕەسمێکدا رادەگەیێندرێت.

زیاد جەبار، جێگری لێپرسراوی مەڵبەندی یەکی رێکخستنی یەکێتی نیشتمانی کوردستان لە سلێمانی، لە کاتی بەشداریکردنی لە ماوەی هەواڵی نووڕۆژی رادیۆ و تەلەڤزیۆنی رووداو رایگەیاند " رێککەوتننامەی نێوان یەکێتی نیشتمانی کوردستان و بزووتنەوەی گۆڕان تەواوبووە و ئەمڕۆ نێوەڕۆ لە ماڵی مام جەلال تاڵەبانی لە دەباشان واژۆ دەکرێت و، کاژێر 6ی ئێوارە لە شاری جوان رێککەوتنەکە رادەگەیێندرێت".

جێگری لێپرسراوی مەڵبەندی یەکی یەکێتی ئاماژەی بەوەشکرد، لە رێوڕەسمی راگەیاندنی رێککەوتننامەکە هەموو پارت و لایەنە سیاسییەکان و کەسایەتییەکان داوەتکراون و، سەرکردایەتی یەکێتی و جڤاتی گشتی و نیشتمانی بزووتنەوەی گۆڕانیش ئامادەی مەراسیمەکە دەبن، هەروەها پارتی دیموکراتی کوردستانیش داوەتی رێورەسمەکە کراوە.

زیاد جەبار گوتیشی" رێککەوتننامەکە لەلایەن کۆسرەت رەسوڵ عەلی، جێگری یەکەمی سکرتێری گشتی یەکێتی و، نەوشیروان مستەفا، رێکخەری گشتی بزووتنەوەی گۆڕان لەبەردەم مام جەلال واژۆدەکرێت و دواتر لە رێوڕەسمەکەدا رادەگەیێندرێت، کە کونسوڵی وڵاتانی بیانی لە هەرێمی کوردستان ئامادەی دەبن، رێککەوتننامەکەش دەستپێشخەرییەکی باشە بۆ باشترکردنی دۆخی هەرێمی کوردستانە و لەبەرژەوەندی خەڵکی کوردستانیشە".</sup>

^17/5/2016

<sup>ڕاوێژکاری ئەنجومەنی ئاسایشی هەرێمی کوردستان، لە یادی 100 ساڵەی ڕێککەوتننامەی (سایکس بیکۆ) ڕای گەیاند، پێویستە ڕێگا بە خەڵکی ڕۆژهەڵاتی ناوەڕاست بدرێت، بڕیار لەسەر چارەنووسی خۆیان بدەن.

ئەمڕۆ دووشەممە 16\5\2016، مەسرور بارزانی، ڕاوێژکاری ئەنجومەنی ئاسایشی هەرێمی کوردستان، لە پێگەی تایبەتیی خۆی لە تۆڕی کۆمەڵایەتیی (فەیسبووک)، نووسینێکی سەبارەت بە 100 ساڵەی سایکس بیکۆ بڵاو کردەوە و تێیدا ئاماژەی بەوە کرد: ”ئەمڕۆ سەد ساڵ بەسەر ڕێککەوتنی سایکس_بیکۆ تێدەپەرێت کە بۆ بەشێکی زۆری خەڵکی ناوچەکە و بە تایبەتی کورد، پڕ بووە لە وێرانکاری و ژێردەستی و نادادپەروەری. ڕۆژهەڵاتی ناوەڕاستیش لەو کاتەوە ئاشتی و سەقامگیریی بەخۆیەوە نەبینیوە، چونکە دانانی سنوورەکان و دابەشکردنی ناوچەکە لە پێناو پاراستنی بەرژەوەندیی گەورە هێزەکانی ئەوسا بووە، بە بێ ڕەچاوکردنی ویستی نەتەوە جیاوازەکانی ناوچەکە بۆ بڕیاردان لە سەر چارەنووسی خۆیان و بەرژەوەندییەکانیان“. جەختیشی لەوە کردووەتەوە کە لە ئەنجامی ئەم چەوتییە مێژووییە، ناوچەکە دووچاری قەیران و شەڕ و وێرانکاریی زۆر بووە و گەلەکی کورد قوربانیی زۆری لە پێناو پاراستنی ناسنامەی خۆی داوە.

هەر لەو نووسینەدا مەسرور بارزانی جەختی لەوە کردووەتەوە: ”ئێستا کاتی ئەوە هاتووە هەموو لایەک دان بەم هەڵە کارەساتبارە دابنێن. بۆ ڕاستکردنەوەی ئەم ستەم و نادادپەروەرییە، پێویستە ڕێگە بە خەڵکی ناوچەکە بدرێت، بڕیار لە سەر ماف و چارەنووسی خۆیان بدەن“. هیواشی خواستووە، چیتر گەلی کوردستان ڕێگا نەدات، لە ژێر هیچ بیانوو و فشارێک، هێز یان لایەنێک یاری بە چارەنووسیان بکات و ئەم دەرفەتەی هاتووەتە پێشەوە، لەدەست بچێت. دووپاتیشی کردووەتەوە: ”دەبێت گەلەکەمان خۆی بڕیار لە چارەنووسی خۆی بدات و بەرەو و سەربەخۆیی هەنگاو بنێت“.

ڕاوێژکاری ئەنجومەنی ئاسایشی هەرێمی کوردستان ئەوەشی ڕوون کردووەتەوە کە سەربەخۆیی لە ناخەوە دەست پێ دەکات. دەشڵێت: ”دەبێت بمانەوێت سەر بە خۆمان بین تاکو سەربەخۆ بین. نابێت ڕێگا بدەین یارییە سیاسییەکان و بەرژەوەندیی تەسکی حیزبی یان ویستی کەسی، بەربەست بۆ گەیشتن بەم ئامانجە دروست بکات“. ئەگەر خۆمان ژێردەستی قبول نەکەین، هیچ هێزێک ناتوانێت بمانچەوسێنێتەوە. با خۆمان بڕیار بدەین و ڕێگە نەدەین هیچ کەس و لایەنێک لە جیاتی ئێمە بڕیار بدات. با چیتر ڕێگە نەدەین بە بیانووی جیاواز کە کاتی ئەوە نییە یاخود بارودۆخ گونجاو نییە، هەر بە پاشکۆ بمێنینەوە. کاتی ئەوەیە خۆمان بڕیاری خۆمان بدەین“.

لە کۆتاییشدا داوای لە هەموو جیهان و گەلانی ڕۆژهەڵاتی ناوەڕاست کردووە، ڕێز لە قوربانییەکانی گەلی کورد و بڕیارەکەی بگرن و ئەم هەڵوێستەی کورد بە دەستپێشخەرییەکی ئاشتییانە و چارەسەری بنەڕەتی وەربگرن و بە دۆست و دراوسێی هاوتا و یەکسان یەکتر قەبول بکەین.

ئەمڕۆ 16\5\2016، سەد ساڵی تەواو بەسەر ڕێککەوتننامەی سایکس بیکۆ تێپەڕ دەبێت کە بەهۆیەوە وڵاتانی ڕۆژهەڵاتی ناوەڕاست و ئەو ناوچانەی کە بە میراتی دەوڵەتی عوسمانیی کۆن دەناسرێن، دابەش کران و مافی نەتەوەی کورد کە ئێستا 50 ملیۆن دەبێت، تێیدا پشتگوێ خرا و مافی دەوڵەتداری پێ نەدرا.</sup>

^16/5/2016

<sup>100 ساڵ بەسەر واژۆکردنی رێککەوتننامەی سایکس- پیکۆ تێپەڕدەبێت کە تێیدا کوردستان بەسەر چوار وڵاتدا دابەشکرا، شارەزایەکی مێژووش باسی ئەو هۆکارانە دەکات کە رێگربوون لەوەی کوردستان ببێتە دەوڵەت پێش واژۆکردنی ریککەوتننامەکە.

د. هێرش عەبدوڵڵا، مامۆستای مێژوو لە زانکۆی سلێمانی، لە کاتی بەشداریکردنی لە ماوەی هەواڵی نووڕۆژی رادیۆ و تەلەڤزیۆنی رووداو، لەبارەی 100 ساڵ تێپەڕبوون بەسەر رێککەوتننامەی سایکس- پیکۆ رایگەیاند "رێککەوتننامەی سایکس- پیکۆ کە لە ساڵی 1916 لە نێوان فەرەنسا و بەریتانیا واژۆکرا، رێککەوتنێکی سیاسی بوو لە نێوان وڵاتانی خۆرئاوا بە گشتی و، بەریتانیا و فەرەنسا بەتایبەتی، کە بەهۆیەوە کۆمەڵێک کێشەی نێوان ئەو وڵاتانە چارەسەر کران".

مامۆستاکەی زانکۆ ئاماژەی بەوەشکرد، لە بنەڕەتدا مەبەست لە رێککەوتننامەی سایک- پیکۆ  دابەشکردنی دەوڵەتی عوسمانی بوو کە دواتر نەخشەی رۆژهەڵاتی ناوەڕاستیان گۆڕی، بەڵام رووسیا لە رێککەوتنەکە کشایەوە، دواتر دوو ئەفسەری بەریتانی و فەرەنسی رێککەوتنەکەیان واژۆکرد، هاوکات واژۆکردنی رێککەوتننامەی سایکس- پیکۆ بۆ پاراستنی بەرژەوەندی فەرەنسا و بەریتانیا بوو بە بێئەوەی بیر لە گەلانی رۆژهەڵاتی ناوەڕاست بکەنەوە.

لەبارەی کورد لە نێو رێککەوتننامەی سایکسپیکۆ و نەبوونی بە دەوڵەت لەو سەردەمەدا، هێرش عەبدوڵلا گوتی" کورد لەو سەردەمەدا نەبوو بە دەوڵەت،  لەبەرئەوەی یەکەی سیاسی یەکگرتووی نەبووە لەگەڵ بنەماکانی دروستکردنی دەوڵەت. هەروەها عەرەب و فارس  و تورک خاوەنی کیانی دامەزراوەی پێشوەختە بوون و، زمان و کولتووریان رێگەخۆشکەربوون بۆ ئەوەی لە نەخشە و رێککەوتنامەکەی سایکس- پیکۆدا ببنەوە بە دەوڵەت،  لەبەرامبەریشدا عەرەب رێگربووە لە وەی کورد ببێتە دەوڵەت و کیانی خۆی هەبێت".</sup>

^16/5/2016

<sup>بارزانی وەزیری ئیتڵاعاتی ئێران كۆدەبنەوە و تاووتوێی ئامادەكارییەكانی كۆنترۆڵكردنەوەی موسڵ دەكەن.

رۆژی یەكشەممە 15-5-2016 مەسعود بارزانی، سەرۆكی هەرێمی كوردستان پێشوازی لە ئایەتوڵڵا دكتۆر سەید مەحموود عەلەوی، وەزیری ئیتڵاعاتی ئێران و ئەندامی ئەنجوومەنی شارەزایانی رێبەری و شاندێكی یاوەری كرد.

ماڵپەڕی سەرۆكایەتی هەرێمی كوردستان بڵاویكردووەتەوە، وەزیری ئیتیڵاعاتی ئێران بۆچوونی وڵاتەكەی لەبارەی رەوشی سیاسیی عێراق و ناوچەكە خستەڕوو و جەختیكردەوە كە ئێران لە پشتیوانیكردنی هەرێمی كوردستان بەردەوام دەبێت. 
هەروەها داوای لە بارزانی كرد پێشبینی و بۆچوونی خۆی لەبارەی رووداو و پێشهاتەكانی ناوچەكە بخاتەڕوو.

لە كۆبوونەوەكەدا بارزانی كورتەیەكی لەسەر رەوشی مەیدانیی بەرەكانی شەڕ لەگەڵ داعش و بارودۆخی سیاسیی عێراق بۆ شاندی ئێرانییەكە خستەڕوو و جەختی لەوەشكردەوە كە شەڕی داعش پێویستی بە هەماهەنگی و هاوكاریی جددیی كۆمەڵگەی نێودەوڵەتییە.

سەرۆكی هەرێمی كوردستان ئاماژەی بەوەداوە كە بۆ تێكشكاندنی تەواوی داعش تەنیا رووبەڕووبوونەوەی سەربازی بەس نییە، بەڵكو پێویستە لەڕووی فكريی، ئابووريی و سیاسیشەوە داعش و هزری تووندئاژۆيى تێكبشكێندرێت.

لە بەشێكی دیكەی كۆبوونەوەكەی نێوان بارزانی و وەزیری ئیتڵاعاتی ئێران باس لە ئامادەكارییەكان كۆنترۆڵكردنەوەی موسڵ، پەیوەندییەكانی نێوان بەغدا و هەرێمی كوردستان و دوا پێشهاتە سیاسییەكانی ناوچەكە كرا.

لە كۆبوونەوەكەدا، هەر یەك لە مەسروور بارزانی، راوێژكاری ئەنجوومەنی ئاسایشی هەرێمی كوردستان و فوئاد حوسێن سەرۆكی دیوانی سەرۆكایەتی هەرێمی كوردستان ئامادەبوون.</sup>

rudaw

^15/5/2016

<sup>ئێوارەی دوێنێ شەممە نێچیرڤان بارزانی، سەرۆک وەزیرانی هەرێمی کوردستان لە هەولێر لەگەڵ مەحموود عەلەوی، وەزیری ئیتلاعاتی کۆماری ئیسلامیی ئێران کۆبووەوە.

لە دیدارەکەدا باس گرنگیی پەیوەندیی دوو قۆڵیی نێوان هەرێمی کوردستان و کۆماری ئسیلامی کردیەوە و هەردوولا جەختیان لەسەر پەردەان بە پەیوەندییەکانیا کردووەتەوە.

لەم بارەوە ماڵپەڕی ئەنجومەنی وەزیرانی حکوومەتی هەرێمی کوردستان، پوختەیەک لە ناوەرۆکی دیدارەکەی بۆ ئاژانسی (باسنیوز) ناردووە.

دەقی پوختەی ناوەرۆکی دیدارەکە:

ئێوارەی ئەمڕۆ شەممە 14 - 5 - 2016 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە بەڕێز سەید د. مەحموود عەلەوی وەزیری ئیتڵاعاتی كۆماری ئیسلامیی ئێران و شاندێكی یاوەری كرد.

لە دیدارێكدا شاندی میوان خۆشحاڵیی خۆیان بە سەردانی هەرێمی كوردستان دەربڕی و باسیان لەوە كرد كە ئەوان گرنگییەكی زۆر بە پەیوەندییە دووقۆڵییەكانی نێوان هەرێمی كوردستان و كۆماری ئیسلامیی ئێران دەدەن. هەروەها دووپاتیان كردەوە كە ئەو پەیوەندییانە ڕەگ و ڕیشەیەكی مێژووییان هەیە و ئێران هەردەم هەرێمی كوردستانی بە دۆست و هۆكاری پەیوەندی باش و ئارامی ناوچەكە دەزانێت.

لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانە و كۆماری ئیسلامیی ئێرانی كرد كە هەردەم پشتیوانی هەرێمی كوردستان بووە و جەختی لەوە كردەوە كە هەرێمی كوردستان هەردەم ئامادەیە دۆستایەتی و پەیوەندییەكانی لەگەڵ كۆماری ئیسلامیی ئێران فراوانتر و تۆكمەتر بكات و ئامادەیی خۆیشی دەربڕی كە ئەو پەیوەندییانە لە هەموو بوارەكاندا پەرەیان پێ بدرێت.

لە بەشێكی دیكەی دیدارەكەدا هەردوولا بیروبۆچوونیان لەبارەی بارودۆخی ئێستای هەرێمی كوردستان و عێراق و ناوچەكە و شەڕی دژی تیرۆرستانی داعش ئاڵوگۆڕ كرد.</sup>

^15/5/2016

<sup>پارتی دۆزی ئازاد ناسراو بە " هوداپار"،  رۆژی یەکشەممە 15ی ئایاری 2016 لە ئەنقەرەی پایتەختی تورکیا دووەمین کۆنگرەی ئاسایی دەبەستێت، لە باشووری كوردستانیش پارتی، یەکێتی و گۆڕان بانگهێشتكراون.

شەوکەت هەرکی، پەیامنێری رووداو لە ئەنقەرە رایگەیاند "هوداپار وەک پارتێکی ئیسلامی لە باکووری کوردستان و تورکیا چالاکییە سیاسییەکانی ئەنجامدەدات، ئەمڕۆش تەواوی ئامادەکارییەکان بۆ بەستنی کۆنگرە كراون و بەرنامەی کۆنگرەکەش بەسەر ئەندامان دابەشکراوە".</sup>

<sup>شەوکەت هەرکی ئاماژەی بەوەش کرد، لە دووەمین کۆنگرەی هوداپار، سەرۆکێکی نوێ بۆ پارتەکە هەڵدەبژێردرێت، هاوکات 28 کەس بۆ ئەندامی کۆمیتەی ناوەندی و 10 کەسیش بۆ لیژنەی دیسپلین هەڵدەبژێردرێن.

هەركی گوتیشی "هەریەک لە نوێنەرانی پارتی دیموکراتی کوردستان، یەکێتی نیشتمانیی کوردستان، بزووتنەوەی گۆڕان و پارتە ئیسلامییەکان ئامادەی دووەمین کۆنگرەی هوداپار دەبن، بەڵام پارتی دیموکراتی گەلان- هەدەپە بۆ كۆنگرەكە بانگهێشت نەكراوە".</sup>

^15/5/2016