به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
رێکخراوی داعش بڵاویکردەوە، یەکێک لەو خۆکوژانەی لە بێجی خۆی تەقاندووەتەوە ئەمریکیی بووە.
رێکخراوی دەوڵەتی ئیسلامی ناسراو بە "داعش" لە بەیاننامەیەکدا بڵاویکردەوە"ئەبو عەبدوڵڵا-ی ئەمریکی بە ئۆتۆمبێلێکی بۆمبڕێژکراو خۆی بە بنکەیەکی سەربازی سوپای عێراقی تەقاندووەتەوە لە رۆژئاوای بێجی بە دووری 200کم لە باکووری بەغدا".
داعش، رۆژی چوارشەممە چوار کردەی خۆکوژی لە دەوروبەری بێجی ئەنجامدا، کە یەکێکیان ئەمریکی و دوویان تاجیکی و ئەوی دیکەشیان عێراقی بوو، پاشان وێنەیەکی ئەو خۆکوژە ئەمریکییە بڵاوکردووەتەوە، کە کردەوە خۆکوژییەکەی ئەنجامداوە.
20/8/2015
میدیاکانی ئێران گرینگییان بە پرسی سەرۆکایەتیی هەرێمی کوردستان و ناکۆکییەکانی لایەنە سیاسییەکانی باشووری کوردستان لەسەر ئەو بابەتە داوە. ماڵپەڕی فەرمی حکومەتی ئێران لە راپۆرتێکدا دەڵێت، رۆژ بە رۆژ مەترسی گرژی کۆمەڵایەتی لەنێو خەڵکی باشووری کوردستان لەسەر ئەو پرسە زیاتر دەبێت. هەروەها ماڵپەڕێکی سەر بە سوپای پاسدارانیش گوتوویەتی، بارزانی لەسەر داوای ئەمریکا و بەریتانیا لەسەر پۆستەکەی دەمێنێتەوە و ئەو دوو وڵاتە داوایانکردووە گۆڕانکارییە سیاسییەکان بەهۆی دۆخی تایبەتی هەرێمی کوردستان، دوو ساڵ دوابخرێن.
پرسی سەرۆکایەتی هەرێمی کوردستان و ناکۆکی نێوان پارتە سیاسییەکانی باشووری کوردستان، بووەتە رۆژەڤی میدیا فارسییەکان و راگەیاندنە فەرمییەکانی ئێران و بایەخێکی زۆری پێدەدرێت.
ماڵپەڕی پرێس تی ڤی، تەلەڤزیۆنی ئینگلیزی زمانی حکومەتی ئێران بە ئاماژەدان بە بڕیاری ئەنجوومەنی شورای هەرێمی کوردستان نووسیویەتی، مەسعود بارزانی تاوەکوو ماوەیەکی نادیار وەکو سەرۆکی هەرێمی کوردستان دەمێنیتەوە.
کەناڵی ئەلعالەمیش، کە کەناڵی فەرمی عەرەبی زمانی ئێرانە، لە دوایین راپۆرتیدا لەو بارەوە ئاماژەی بەوەداوە، سەرەڕای بڕیاری ئەنجوومەنی شوورا، چەند لایەنی سیاسی بەتووندی دژایەتی درێژکردنەوەی ماوەی سەرۆکایەتی مەسعود بارزانی بۆ دوو ساڵی دیکە دەکەن.
بەشی فارسی هەواڵدەری دۆیچێوێلەی ئەڵمانیش نووسیویەتی "بڕیاری ئەنجوومەنی شوورای هەرێمی کوردستان بۆ تێپەڕبوونی قەیرانێکە کە لە هەرێمی کوردستان هاتووەتە ئاراوە، بەڵام ناکۆکی حیزبە سیاسییەکان لەسەر ئەو پرسە هەروا بەردەوامە".
ئیرنا، ماڵپەڕی فەرمی حکومەتی ئێران لەنێو میدیا فارسییەکاندا زۆرترین راپۆرت و هەواڵی لەبارەی ئەو پرسە بڵاوکردووەتەوە و باسی لەڕوانگە جیاوازەکان لەو بارەوە کردووە. لە راپۆرتەکانیشیدا ئاماژەی بەوەداوە ناکۆکی لایەنە سیاسییەکان کاریگەری لەسەر خەڵک هەبووە و ئەوانیش وەک لایەنە سیاسییەکانیان لێهاتووە. ئیرنا نووسیویەتی، رۆژ بە رۆژ مەترسی روودانی گرژی کۆمەڵایەتی لەسەر ئەو بابەتە زیاتر دەبێت.
هەواڵدەری فارسی سەر بە سوپای پاسدارانیش بە مانشێتی "ئەمریکا و بریتانیا داوای مانەوەی مەسعود بارزانی دەکەن" راپۆرتێکی لەبارەی دانیشتنی لووتکەی هێز و لایەنە سیاسییەکانی باشووری کوردستان بڵاوکردووەتەوە کە تێیدا هاتووە، نوێنەرانی ئەمریکا، بریتانیا و نەتەوە یەکگرتووەکان داوایان کردووە گۆڕانکارییە سیاسییەکان لە هەرێمی کوردستان 2 ساڵ دوا بخرێن و راشیانگەیاندووە، دۆخی ئێستای هەرێمی کوردستان بۆ ئەو ئاڵوگۆڕانە گونجاو نییە.
تۆڕە کۆمەڵایەتییەکانیش بەدەر نەبووە لە باسکردنی ئەو ئاڵۆزییە سیاسییەی هەرێمی کوردستان و لەنێو چالاکوانانی سیاسی کورد و ئێرانیدا پرسی ناکۆکییەکانی سەرۆکایەتی هەرێمی کوردستان باسێکی گەرمە و زۆریان باس لەوە دەکەن، کە هەوڵەکانی وڵاتانی رۆژئاوایی بۆ نێوبژیوانی لەنێوان لایەنە سیاسییەکانی باشووری کوردستان بەسەر هەوڵەکانی ئێراندا سەرکەوت، کە ئاماژەیە بۆ ئەو هەواڵانەی لەبارەی کۆبوونەوەی قاسم سلێمانی، فەرماندەی سوپای قودسی ئێران لە گەڵ بەرپرسانی لایەنە سیاسییەکانی باشووری کوردستان لە ماوەی رابردوودا بڵاو بوونەتەوە.
ئەمڕۆ وادەی ولایەتی سەرۆکایەتی مەسعوود بارزانی، سەرۆکی هەرێمی کوردستان کۆتایی پێدێت و پارتی دیموکراتی کوردستان و چەند لایەنێکی دیکە داوای ئەوە دەکەن ماوەکەی هەتا هەڵبژاردنێکی دیکە درێژ بکرێتەوە، بەڵام بەشێک لە لایەنەکان تا ئێستا بەم داوایە رازی نەبوون و دانووستاندن و گفتووگۆکان بۆ گەیشتن بە سازان بەردەوامە.
rudaw/ nasr piroti
20/8/2015
سەرۆكایەتیی هەرێمی كوردستان لە راگەیێندراوێكدا وەڵامی نووری مالیكی دەداتەوە و رایدەگەیێنێت "مالیکی كۆمەڵێك بۆچوونی بێ بنەمای خستووەتەڕوو و كەوتنی شاری موسڵی بە موئامەرەیەكی هاوبەشی نێوان هەرێمی كوردستان و وڵاتی توركیای لەقەڵەم داوە".
گوتەبێژی فەرمیی سەرۆكایەتیی هەرێمی كوردستان ئەم لێدوانەی سەرۆكوەزیرانی پێشووی عێراقی بە بێ بنەماو دوور لە راستی و خۆدزینەوە لە هۆكارە راستەقینەكانی كەوتنی موسڵ وەسفكردووە. جەختیشدەكاتەوە كە مالیکی بەرپرسیارێتی یەكەمی کەوتنی موسڵی لەسەرشانە.
لە راگەیێندراوەكەدا سەرۆكایەتیی هەرێمی كوردستان دەڵێت " نووری مالیكی بەرپرسی یەكەمی ئەو كارەساتەیە كە بەسەر شاری موسڵدا هاتووە و بە قسە و تۆمەتی بێ بنەما ناتوانێ خۆی لێ بێبەری بكات، هەروەها ئەوەی بە سیاسەتە هەڵەكانی زەمینەی بۆ داعش رەخساند و گوێی بە هۆشدارییەكانی بەڕێز سەرۆكی هەرێمی كوردستان نەدا و بووە هۆی كەوتنی موسڵ، شەخسی نووری مالكی بوو".
رۆژی 6ی حوزەیرانی 2014، چەكدارانی داعش هێرشیان بۆ سەر شاری موسڵ دەستپێكرد و رۆژی 10ی مانگ موسڵیان بە تەواوی كۆنترۆڵ كرد. سەربازانی سوپای عێراق بەبێ بەرگریكردن لە شارەكە هەڵاتن و زۆربەی چەك و تەقەمەنی و ئۆتۆمبێلە سەربازییەكانیان كەوتنە دەست چەكدارانی داعش.
بۆ لێكۆڵینەوە لە كەوتنی موسڵ، پەرلەمانی عێراق لە 1/12/2014 لیژنەیەكی بە ئەندامیەتی 26 پەرلەمانتار پێكهێنا. دوای ئەنجامدانی لێكۆڵینەوە لەگەل زیاتر لە 100 كەسایەتی سیاسی و سەربازی عێراقی، رۆژی یەكشەممە 16-8-2015 لیژنەكە راپۆرتەكەیان خستە دەنگدانەوە كە لەكۆی 26 ئەندامی لیژنەكە 17 ئەندامیان بەبەڵێ دەنگیان بۆ دابوو، راپۆرتەكەش رادەستی سەرۆكایەتیی پەرلەمانی عێراق كرا.
لە راپۆرتەكەدا ناوی نووری مالیكی، سەرۆكوەزیرانی پێشووی عێراق و فەرماندەیی گشتیی هێزە چەكدارەكانی هاتبوو، لە یەكەم كاردانەوەشدا مالیكی هەولێر و ئەنقەرەی بە كەوتنی موسڵ تۆمەتباركردن و رایگەیاند " كەوتنی موسڵ موئامەرەیەك بوو و پلانەكەی بە پاڵپشتی دەزگای هەواڵگری توركیا لە هەولێر جێبەجێكرا".
لێدوانێك لە گوتەبێژی سەرۆكایەتیی هەرێمی كوردستان
نوری مالیكی سەرۆكوەزیرانی پێشووی عێراق كە ئێستا بە سەردانێك لە كۆماری ئیسلامیی ئێرانە لە بەرامبەر ئەنجامەكانی لیژنەی تایبەتی ئەنجوومەنی نوێنەرانی عێراق بۆ لێكۆڵینەوە لە كەوتنی موسڵ لە لێدوانێكدا كۆمەڵێك بۆچوونی بێ بنەمای خستووەتەڕوو و كەوتنی شاری موسڵی بە موئامەرەیەكی هاوبەشی نێوان هەرێمی كوردستان و وڵاتی توركیای لەقەڵەم داوە.
لە وەڵامیدا بە گشت لایەك رادەگەیێنین كە ئەم لێدوانەی سەرۆكوەزیرانی پێشووی عێراق هیچ بنەمایەكی نییە و دوورە لە راستی و خۆدزینەوەیە لە هۆكارە ڕاستەقینەكانی كەوتنی موسڵ كە ناوبراو بەرپرسیارێتیی یەكەمی ئەم ڕووداوەی دەكەوێتە سەر شان.
ئەنجامەكانی لێكۆلینەوەی لیژنەی تایبەتی ئەنجوومەنی نوێنەرانی عێراق بۆ لێكۆڵینەوە لە كەوتنی موسڵ زۆر بە ڕوونی دەریدەخات كە نووری مالكی بەرپرسی یەكەمی ئەو كارەساتەیە كە بەسەر شاری موسڵدا هاتووە و بە قسە و تۆمەتی بێبنەما ناتوانێ خۆی لێ بێبەری بكات. ئەوەی بە سیاسەتە هەڵەكانی زەمینەی بۆ داعش رەخساند و گوێی بە هۆشدارییەكانی بەڕێز سەرۆكی هەرێمی كوردستان نەدا و بووە هۆی كەوتنی موسڵ، شەخسی نووری مالكیە. ئەوەیشی ئێستا لە هێڵی یەكەمی شەڕی تیرۆریستانە و ئەفسانەی داعشی شكاندووە، هێزی پێشمەرگەی كوردستانە.
گوتەبێژی فەرمیی سەرۆكایەتیی هەرێمی كوردستان
19ـی 8ـی 2015
رۆژی چوارشەممە 19 ی ئابی 2015 ، د. فواد مەعسووم، سەرۆککۆماری عێراق لە شاری هەولێر پێشوازی لە برێت مەکگۆرگ، یاریده‌ده‌ری جێگری وه‌زیری ده‌ره‌وه‌ی ئه‌مریكا بۆ كاروباری عێراق و ئێران کرد. لە کۆبوونەوەیەکیشدا گفتوگۆ لەسەر په‌یوه‌ندییه‌كانی نێوان عێراق و ویلایه‌ته یه‌كگرتووه‌كانی ئه‌مریكا و، دوایین پێشهات و گۆڕانكارییە ئه‌منی و سیاسییەكان له هه‌رێمی كوردستان و عێراق كرا.
بەپێی راگەیێندراوێكی نووسینگەكەی، فوئاد مەعسووم سەرۆککۆماری عێراق دەربارەی رێککەوتنی نێوان لایەنەکان سەبارەت بە پرسی سەرۆکایەتی هەرێمی کوردستان، گەشبینی خۆی بەو لێكنزیكبوونه‌وه و روانین و بۆچوونی نێوان لایه‌نه‌كان له هه‌رێمی كوردستان و چارەسەرکردنی هه‌موو قه‌یرانه‌كان دەربڕیوە.
هەروەها سه‌رۆككۆماری عێراق جەختی لە پێویستی پته‌وكردن و په‌ره‌پێدانی چوارچێوه‌ی هاریكاریی و په‌یوه‌ندیی دووقۆڵی عێراق و ویلایه‌ته یه‌كگرتووه‌كانی ئه‌مریكای له هه‌موو ئاسته‌كاندا كردووەتەوە، به‌و جۆره‌ی كه به‌رژه‌وه‌ندیی باڵای گه‌لی هه‌ردوو وڵات زامن بكات.
لە بەرامبەریشدا مەکگۆرگ، كە هاوكات جێگری نێردەی تایبەتی سەرۆكی ئەمریكایە بۆ شەڕی داعش و، لەبارەی پرسی سەرۆكایەتی سەردانی لایەنەكانی كردووە و هەروەها بەشداری كۆبوونەوەی 16 لایەنەكەی دوێنێ و كۆبوونەوەی پێنج قۆڵی شەوی رابروودی كرد، پابه‌ندبوونی وڵاته‌كه‌ی بۆ پشتیوانیكردنی عێراقییه‌كان به‌تایبه‌ت له جەنگی دژ بە داعش دووپاتکردەوە.
مەکگۆرگ خۆشحاڵیشی نیشانداوە له‌ئاست ئه‌و هه‌ڵكردن و هارمۆنیكه سیاسییه‌ی له‌نێوان هێزه سیاسییه‌كانی هه‌رێمی كوردستاندا له‌ئارادایه، ئه‌وه‌ش ئاماژه‌یه‌كی پۆزه‌تیڤی ده‌ستپێكی قۆناخێكی نوێیه له مێژووی عێراقدا، له‌پێناو به‌هێزكردنی یه‌كڕیزیی نیشتمانی ناوخۆیی و به‌رفراوانكردنی پشتیوانیی نێوده‌وڵه‌تیی بۆ عێراق به‌تایبه‌تیی له‌م قۆناخه ناسكه‌دا.
19/8/2015
لەبەردەم کۆشکی دۆڵمەباهچە لەئیستەنبوڵ دەنگی تەقە بیستراو هێزە ئەمنییەکانی تورکیا لەچواردەوری کۆشکەکە بڵاوبوونەتەوەو رێگەی هاتوچۆ دەگرن.
پۆلیسی تورکیا لەشوێنی رووداوەکە دووچەکداریان دەستگیر کردووە و ئۆتۆمبێلەکانی فریاکەوتن بەرەو شوێنی رووداوەکە دەڕۆن.
19/8/2015
سەرۆککۆماری عێراق و عەلی باپیر، ئەمیری کۆمەڵی ئیسلامیی كوردستان، گەشبینن بە رێککەوتنی نێوان لایەنە سیاسییەکانی هەرێمی کوردستان.
پێشنیوەڕۆی ئەمڕۆ چوار شەممە 2015/8/19، سەرۆککۆماری عێراق د.فوئاد مەعسووم، سەردانی بارەگای کۆمەڵی ئیسلامیی کوردستانی کرد لە شاری هەولێر لەگەڵ عەلی باپیر و ئەندامانی مەکتەبی سیاسی و سەرکردایەتی کۆمەڵ کۆبووەوە.
لەدیدارێکدا بارودۆخ و کێشەکانی عێراق و هەرێمی کوردستان خرانە بەرباس و گفتوگۆ، بەتایبەتی قەیرانە سیاسییەکان و دۆزینەوەی میکانیزمی گونجاو بۆ چارەسەرکردنیان، لەو بارەیەوە جەخت لەسەر پێویستیی خستنەگەڕی هەموو تواناکان كرایەوە بە ئاراستەی سەرخستنی کۆشش و تەقەلاکان کە لەو بارەیەوە لە ئارادان.
عەلی باپیر باسی لەو پێشکەوتنە ئومێدبەخشانە کرد کە لەنێوان لایەنە سیاسییە سەرەکییەکاندا هاتووەتە ئاراوە بە ئاراستەی چارەسەرکردنی کێشەکان.
دواتریش لە لێدوانێکی رۆژنامەڤانیدا مەعسووم گەشبینی خۆی بەسەرکەوتنی هەوڵەکان دەربڕی و داوایکرد دانیشتن و کۆبوونەوە بەردەوامەکان بگەنە ئەنجامێکی دڵخۆشکەر کە لەبەرژەوەندی باڵای کۆمەڵانی خەڵکدابێت.
19/8/2015
پەیامنێری رووداو رایگەیاند:" رێژەی یاسایی پەرلەمانتارانی کوردستان بۆ کۆبوونەوەی پەرلەمانی کوردستان تەواو نەبوو و کۆبوونەوەکە نەکرا".
پەیامنێری رووداو لە پەرلەمانی کوردستان رایگەیاند:" وێڕای چوونە ژوورەوەی ئەندامانی فراکسیۆنی گۆران، یەکێتی و کۆمەڵی ئیسلامی و چەن ئەندامێکی یەکگرتوو بۆ هۆڵی پەرلەمان، بەڵام رێژەی یاسایی تەواو نەکرا و 53 پەرلەمانتار ئامادەی کۆبوونەوەکە بوون و بەهۆی ئامادە نەبوونی 3 ئەندام پەرلەمانی دیکە رێژەی یاسایی تەواو نەبوو".
بە پێی زانیارییەکان ئەبوکاروان لە فراکسیۆنی شیوعی و شوان قەڵادزەیی لە بزووتنەوەی ئیسلامی بەشدارییان لە کۆبوونەوەکەی پەرلەمان نەکردوە.
19/8/2015
مامۆستایانی ئایینی ئیسلام و سەرجەم پێکهاتە و ئایینە جیاوازەکانی کوردستان، داوا لە لایەنە سیاسییەکان دەکەن لەسەر پرسی سەرۆکایەتی هەرێمی کوردستان بگەنە رێککەوتن . ئەوان داوا دەکەن لەم کات و ساتەدا کە شەڕی داعش و قەیرانی دارایی بەرۆکی هەرێمی کوردستان گرتووە و تەنانەت هەندێک لە مزگەوت و کەنیسە و پەرستگاکانی سەرجەم ئایینەکان لە دەستی داعشدان، یەکڕیزی خۆیان بپارێزن و کۆتایی بە قەیرانی دارایی بهێنن و بژێوی خەڵک باش بکەن.
مامۆستا و پیاوانی ئاینی پێکهاتە و ئایینە جیاوازەکان پەیامی خۆیان بۆ لایەنە سیاسییەکان بۆ رێککەوتن لەسەر پرسی سەرۆکایەتی هەرێمی کوردستان بە سازان نارد، پێچەوانەی لایەنە سیاسییەکان مامۆستایانی ئاینی ئیسلام و پیاوانی ئاینی مەسیحی و ئێزیدی و کاکەیی و سابیئەی مەندایی لە یەک ریز پەیامیان هەبوو بۆ پاراستنی ئارامی باشووری کوردستان .
ئەو کاتەی ئەوان داوای کۆتایی هێنان بە قەیرانی سیاسی دەکەن لە باشووری کوردستان ، هێشتا هەندێک لە مزگەوت و کەنیسە و پەرستگاکانی سەرجەم پێکهاتەکانی دیکە لەژێر دەستی داعشدان ،بۆیە بەپەلە لە رووی ئایینی و نەتەوەییەوە داوادەکەن خاڵی کۆتایی بۆ ناکۆکییەکان دابندرێت و لە جیاتی بەردەوامیی قەیرانی سیاسی، سەرجەم لایەنەکان کۆتایی بە قەیرانی دارایی بهێنن و بژێوی خەڵک باشبکەن.
لەماوەی دوو مانگی رابردوو لەلایەن چین و توێژەکانی باشووری کوردستان چەندین کەمپین و هەڵمەتی واژۆ کۆکردنەوە ئەنجامدراون، بۆ دروستکردنی فشار لەسەر لایەنەکان، لە هەموو پەیامەکانیش داوای سازان کراوە.
19/8/2015
ئه‌نجوومه‌نی شورای دادوه‌ری كوردستان بڕیاریدا، مه‌سعود بارزانی به‌ته‌واوی ده‌سه‌ڵاته‌كانییه‌وه له پۆسته‌كه‌یدا بمێنێته‌وه، تا ئەنجامدانی هەڵبژاردن.
نه‌ریمان تاڵیب، وته‌بێژى وه‌زاره‌تى داد، بۆ (باسنیوز) راى گه‌یاند، به‌پێی بڕیاره‌كه‌ی ئه‌نجوومه‌نی دادوه‌ری مه‌سعود بارزانی تاوه‌كو هه‌ڵبژاردنی داهاتوو به‌ته‌واوی ده‌سه‌ڵاته‌كانییه‌وه له پۆسته‌كه‌یدا ده‌مێنێته‌وه.
ئه‌و ئه‌نجوومه‌نه رایده‌گه‌یێنێت: “بڕیاره‌كه‌مان هه‌م راوێژكارییه، هه‌م ئیلزامییه”.
جه‌ختى له‌سه‌ر ئه‌وه‌ش كرده‌وه “ئه‌و بڕیاره بۆ ئه‌وه دراوه ئه‌گه‌ر بێت و لایه‌نه‌كان نه‌گه‌ن به رێككه‌وتن ئه‌وه بۆ ئه‌وه‌ى بۆشایی یاسایی دروستنه‌بێت ئه‌و بڕیاره دراوه”.
18/8/2015
“جۆن كاستیچ” پاڵێوراوی كۆمارییه‌كان بۆ به‌ده‌ست هاوردنی كارتی كۆمارییه‌كان بۆ هه‌ڵبژاردنی 2016 جه‌خت له‌وه ده‌كاته‌وه كه عێراق دابه‌ش ده‌بێت بۆ 3 به‌ش. هه‌روه‌ها پێی وایه كۆتایی كێشه‌كانی عێراق و ئه‌نجامه‌كانی جه‌نگی هاوپه‌یمانان له‌دژی داعش ده‌بنه هۆی دابه‌شكردنی عێراق بۆ 3 به‌ش.
له‌دیدارێكی تایبه‌تدا له‌گه‌ڵ تۆڕی “سی.ئێن.ئێن” ناوبراو گوتی: ” له‌كۆتاییدا عێراق دابه‌ش ده‌بێت بۆ سێ به‌ش”.
سه‌باره‌ت به‌تیرۆر و كرده‌وه خۆكوژییه‌كانیش، ناوبراو گوتی: ” پێویسته له‌سه‌ر هه‌موو ئاینه‌كان له‌جیهاندا، كه هه‌ڵوه‌سته بكه‌ن و به‌كه‌سی خۆكوژن بڵێن، تۆ ئه‌گه‌ر واده‌زانیت به‌وه‌ی خۆت به‌ته‌قێنیته‌وه به ژن و منداڵی بێ تاواندا ده‌چیته به‌هه‌شته‌وه، ئه‌وا تۆ شێتیت، ئه‌گه‌ر ده‌ستی ئێمه بكه‌ویت ده‌تخه‌ینه زیندانه‌وه بۆ ئه‌وه‌ی پاشماوه‌ی ژیانت له‌زیندان به‌سه‌ر به‌ریت”.
هه‌روه‌ها ده‌ڵێت: “ده‌بوو به‌لایه‌نی كه‌مه‌وه یه‌ك بنكه‌ی سه‌ربازیمان له‌عێراق بهێشتایه‌ته‌وه”.
هه‌روه‌ها ده‌ڵێت: ” كورده‌كان هاوپه‌یمانی باشی ئه‌مریكان، ده‌بێ ئاگامان له‌پێداویستییه‌كانیان بێت، ده‌بێ ئه‌وان هاوسه‌نگ بكه‌ینه‌وه له‌گه‌ڵ توركیادا، ئه‌وه‌ش هه‌ندێك كێشه‌مان له‌و ئاسته‌دا بۆ دروست ده‌كات”.
18/8/2015
وەزیری وزەی توركیا دەڵێت لەگەڵ بەغدا رێككەوتنیان هەیە و لەگەڵ هەرێمی كوردستانیش بەڵێننامەیان هەیە. ئاشكراشیكرد لە 15 مانگی رابردوودا هەولێر 66 ملیۆن بەرمیل نەوتی هەناردەكردووە كە بەشێكی بەشێوەی سەربەخۆ فرۆشتووە.
تانەر یڵدز لە ئۆفیسی خۆی لە ئەنكەرە پێشوازی لە كۆمەڵێك رۆژنامەنووسی باشووری كوردستان كرد و وەڵامی چەند پرسیارێكی تایبەت بە پەیوەندییەكانی توركیا و هەرێمی كوردستان و بەغدا و داعشی دایەوە.
لەسەرەتای قسەكانیدا یڵدزدا دەركەوت كە تورکیا زۆر چاوی لەسەر بەشەكانی دیكەی عێراقە، چونكە زۆر بە تۆنێكی نەرمەوە باسی گرنگیی سامانە سروشتییەكانی عێراقی دەكرد و خۆشحاڵ بوو بە باشبوونی پەیوەندییەكانی نێوان بەغدا و ئەنقەرە.
وەزیری وزەی تورکیا ئاماژەی بەوە كرد کە توركیا لە پڕۆژەیەكی گەورەی وەبەرهێنانی خزمەتگوزاری نەوت و گاز لە عێراقدا بەشدارە، كە بەهاكەی دەگاتە 41 ملیار دۆلار، بەتایبەتی لە بواری نەوت لە میسان و بەدرە و رومێلە، لە گازی سروشتیش لە مەنسوور و سیا.
لە وەڵامی پرسیارێكی (رووداو)دا كە ئایا ئەو پڕۆژە گەورانە كار ناكەنە سەر رێككەوتنی وزە لەنێوان هەولێر و ئەنقەرە، وەزیری وزەی توركیا گوتی "توركیا پشتگیری هەموو پێكهاتەكانی عێراق دەكات و دەیەوێ هاوكارییان بكات لە سوودوەرگرتن لە داهاتەكانیان بە یەكسانی".
یڵدز گوتیشی "ئەو رێككەوتنەمان لەگەڵ بەغدا نوێ نییە تاوەكو كاریگەریی هەبێ بەسەر هەولێرەوە، بەشێكی دەگەڕێتەوە بۆ سەردەمی شەهرستانی و بەشێكیشی رێككەوتنێكی كۆنی ساڵەكانی حەفتاكانە".
یڵدز لەسەر پەیوەندیی ئەنقەرە و بەغدا زیاتر دوا و گوتی "دەبێ بزانن ئەنقەرە لەگەڵ بەغدا رێككەوتنی وزەی هەیە، بەڵام لەگەڵ هەولێر بەڵێننامەی وزەی هەیە كە جیاوازن، چونكە هەولێر دەستوور و بانكی ناوەندیی نییە".
بەرپرسەكەی توركیا دانی بەوەشدا نا كە ئەو بەڵێننامەی توركیا لەگەڵ هەرێمی كوردستان بۆ 50 ساڵە و گوتی: "تەنیا لە بواری وزەدا نییە". بەبێئەوەی زانیاریی زیاتر بدات. ئێستا کۆمپانیا توركییەکان خاوەنی 6 كێڵگەی نەوتین لە باشووری كوردستان و بەنیازن بیكەنە 11 دانە.
زۆر لە پرسیارەكان لە وەزیرەكەی توركیا كە ئاگاداری ورد و درشتی هەناردەكردنی نەوتی كوردستان و عێراق بوو، تایبەت بوو بە پەیوەندییەكانی هەولێر و بەغدا.
یڵدز بەنەرمییەوە دەستی دەهێنا بە ریشیدا و دەیگوت: "لە بەرژەوەندیی هەرێمی كوردستاندایە، هەولێر و بەغدا رێكبكەون، چونكە بەبێ سەقامگیری ناتوانرێ سوود لە سامانە سروشتییەكان وەربگیرێ".
لەبارەی هەناردەكردنی نەوتی كوردستان بۆ بەندەری جەیهان، یڵدز كۆمەڵێك زانیاریی دا و گوتیشی هیچ دەستوەردانێك ناكەن لە رێككەوتنی نێوان هەولێر و بەغدا.
بەگوتەی وەزیری وزەی توركیا "لە مانگی مایسی 2014ەوە هەرێمی كوردستان 71 ملیۆن تۆن نەوت كە دەكاتە 66 ملیۆن بەرمیل هەناردەكراوە بۆ بەندەری جەیهان و بە ئامادەبوونی نوێنەری هەولێر و بەغدا هەمووی تۆماركراوە".
رۆژانە هەندێكجار 500 هەزار بەرمیل بووە، هەروەها گەیشتووەتە 640 هەزاریش. یڵدز بە دووریشی نەزانی بەمزووانە بگاتە ملیۆنێك بەرمیل نەوت. لەبارەی ئەوەی كە ئایا ئەوان رازین هەولێر بە سەربەخۆیی نەوت بفرۆشێ، وەزیری وزەی توركیا هەرچەندە جەختی لەسەر گرنگیی رێككەوتن لەگەڵ بەغدا كردەوە، بەڵام گوتی: "ئێستا هەرێمی كوردستان بەسەربەخۆیی نەوت دەفرۆشێ و پارەكە ناگەڕێنێتەوە بەغدا، چونكە عێراق بەهۆی كێشەی داراییەوە پارەی هەولێر ناداتەوە".
لەبارەی داهاتەكەشیەوە گوتی: "ئەوە داهاتی خەڵكی عێراقە. توركیا تەنیا بەپێی رێككەوتنێكی لەگەڵ سۆمۆ پارەی خزمەتگوزاری وەردەگرێ و هەقی ئەوەمان نییە چۆن دابەشدەكرێ".
تانەر یڵدز ئاشكراشیكرد كە یەك بەرمیل نەوتی عێراق یان كوردستان لە جەیهان بفرۆشرێ ئەوان تۆماریدەكەن و بەهەردوولا دەڵێن و ئامادەنین بەهیچ شێوەیەك بیشارنەوە و بۆ كەس كەم و زیادیبكەن. وەزیری وزەی توركیا نەیشاردەوە كە ئەو پارەیەی ئێستا لە (هاڵك بانك)ە لە توركیا پارەی هەموو عێراقە.
لە بواری گازی سروشتیش، وەزیرەكەی توركیا پلانی خۆیانی هەبوو، كە بڕیارە لە هەرێمی كوردستانەوە گاز وەربگرن لە ساڵی 2017دا، ئەو گوتی: "ئەوكات بەهۆی نزیكیی سنوورەوە دەتوانین بە نرخی كەمتر وەریبگرین، بەڵام ئەو قسانە راست نین كە باس لەوە دەكەن بە نیوەی نرخ بیكڕین".
لە بارەی گازی بەشەكانی دیكەی عێراقیش، تانەر یڵدز ئاماژەی بەوەكرد كە بەپێی رێسای بەغدا هەر كاتێك گاز بەشی خەڵك و كارەبای دابینكرد ئەوكات دەتوانن بیفرۆشن بەدەرەوە.
تەقاندنەوەی بۆری نەوتی كوردستان - جەیهان بەشێكی دیكەی قسەكان بوو، وەزیری وزەی توركیا گوتی: "ئەو كارەی پەكەكە دەیكات زۆرترین زیانی بۆ كورد بووە". قسەكانی حكومەتی هەرێمی كوردستانی دووپاتكردەوە كە زیانی 250 ملیۆن دۆلاری لێداون.
بەشێكی دیكە بریتیبوو لەو دەنگۆیانەی كە باس لەوە دەكەن توركیا سوود لە نەوتی ژێر دەستی داعش دەبینێ.
تانەر یڵدز بە پێكەنینەوە وەڵامی دایەوە: "هاوڕێیان داعش بۆ ئێمە گروپێكی تیرۆریستییە و هیچ جۆرە مامەڵەیەكی لەگەڵ ناكرێ و ئەوانە هەڵمەتێكی پروپاگەندەیە و هیچ بەڵگەیەك نییە، جارێكیان كەسێك هات بۆ لام گوتی بەڵگەم هەیە، گوتم باشە بیهێنە ئەوا 15 مانگە چاوەڕوانم و نەیهێنا".
تانەر یڵدز گوتیشی "توركیایەك كە تەنیا ساڵی پار 52 ملیار دۆلار داهاتی لە بواری وزەدا هەبووە، چ پێویستی بە مامەڵەیە لەگەڵ گروپێكی تیرۆریستیدا!".
18/8/2015
محەممەدی حاجی مەحموود، سكرتێری حیزبی سۆشیالیست-دیموكراتی كوردستان، قسەی خۆی لەسەر رەوشی ئەمڕۆی كوردستان هەیە و دەڵێت دەبێ هەڵبژاردنی پێشوەخت بكرێ. چونكە هەڵبژاردنی پێشوەخت ساڵێكی دەوێ و ئەو ماوەیە تاراددەیەك دۆخەكە هێوردەبێتەوە. بە بڕوای محەممەدی حاجی مەحموود، چارەسەری ئەو دۆخە تەنیا لەلای پارتی و یەكێتییە "چونكە ئەوان خاوەنی هێز و ئاسایش و پێشمەرگەن". كاكەحەمە لەم هەڤپەیڤینەدا لەگەڵ (رووداو) هۆشداریدەدات لە سەرهەڵدانەوەی دوو ئیدارەیی و دەڵێت "ئەگەر ئەمە رووبدات، داعش زۆر بەئاسانی دێتە كوردستان".
رووداو: دۆخی سیاسی و گفتوگۆ سیاسییەكانی دەرەوەی پەرلەمان، گەیشتوونەتە بنبەست؟
محەممەدی حاجی مەحموود: بەڵێ، گەیشتوونەتە بنبەست. دیمەنەكان وا دەردەكەون کە كەس بەقسەی كەس رازی نییە. تەنانەت كەس بە نێوبژیوانیی كەسیش رازی نییە. كەس خوازیاری ئەوە نەبوو كە ئێستا دەیبینین، بەڵام بەداخەوە وا دەبینین شتەكان لە گرێژنە دەرچوون. دەبێ هەموو لایەنەكان هەست بە بەرپرسیارێتی بكەن و بگەڕێنەوە سەر مێزی گفتوگۆ.
رووداو: ئێوەش پڕۆژەتان خستەڕوو، داوای چیتان كرد؟
محەممەدی حاجی مەحموود: ئێمە 3 خاڵمان باسكرد، خولاسەی پێشنیازەكان بەگشتی لای ئێمە گونجاو بوون، بەڵام ئێمە داوامانكردووە سازانی هەمەلایەنە بكرێ، كاتی خۆی 5 حیزبەكە رێككەوتوون لەسەر ئەوەی بۆ پرسەكان رێكبكەون و هەموو شتێك لەو پێنج حیزبەدا كۆكراوەتەوە، دواتر بینیمان دۆخەكە چووە كەناری نائارامی، بۆیە هەموو جۆرە قۆرخكردنێك ئەنجامی خراپی لێدەكەوێتەوە.
رووداو: واتە رێككەوتنی لایەنەكان بۆ پێكهێنانی حكومەت، قۆرخكردن بوو؟
محەممەدی حاجی مەحموود: بەڵێ، ئەوە قۆرخكردنی دەسەڵاتەكانی نەوت و داهات و پەرلەمان و پۆستەكانی دیكەی نێو حكومەت بوو كە هیچیان بۆ لایەنەكانی دیكە نەهێشتەوە و میللەتیان تووشی قەیران كرد. ئینجا با من باسی خاڵەكانی دیكەی پڕۆژەكەمان بكەم، هەروەها داوامانكردووە ئەگەر سازان ناكرێ، با سیستمی حوكمڕانی بدەنە دەست خەڵك، خەڵك دەنگبدات ئاخۆ سیستمەكە چۆن بێت. ئەگەر ئەوەش ناكەن، فەرموو با رایبگەیێنن كە هەڵبژاردنی پێشوەخت بكەن. بەبڕوای من هەڵبژاردنی پێشوەخت لانیكەم ساڵێك زیاتری پێویستە و لەو ماوەیەدا هەندێك دۆخەكە ئارامدەبێتەوە. ئێستا دۆخەكە تا دێ بەرەو ئاڵۆزتربوون دەڕوات، هەموو لایەك شمشێریان دەرهێناوە و خستویانەتە سەرشانیان، كەس بیر لە داعش و شەڕی توركیا و بۆردومانەكانی توركیا و پرسە چارەنووسسازەكانی دیكە ناكاتەوە. كەس بیر لە قەیرانی دارایی و كێشەی ئابووری و كێشەكانی دیكە ناكاتەوە.
ئێستا دۆخەكە بە بنبەست گەیشتووە و چارەسەر لەلای یەكێتی و پارتییە. ئەگەر پارتی و یەكێتی بگەنە ئەنجام، دۆخەكە چارەسەردەبێ. چونكە ئەو دوو لایەنە هێز و پێشمەرگە و ئاسایشیان هەیە و ئەوكات ئەوان دەتوانن لایەنەكانی دیكە بڕواپێبهێنن كە رێكبكەون یان ناچاریانبكەن. بەبڕوای من چارەسەر تەنیا بەو دوو لایەنە دەكرێ.
رووداو: بەڵام لەدوای پڕۆژەكەی د.بەرهەم ساڵح، دەركەوت ئێستا یەكێتی نیشتمانی بووەتە دوو بەش بۆ ئەو كێشەیە، بەشێك لە سەركردەكانی لەگەڵ گۆڕان پێداگیری لە پڕۆژەكەی پەرلەمان دەكەن و بەشێكیشیان جەخت لە سازان دەكەنەوە؟
محەممەدی حاجی مەحموود: راستە لەناو یەكێتی دۆخەكە وایە، كاك كۆسرەت جێگری یەكەمی سكرتێری گشتی راوبۆچوونی خۆی هەیە و پشتیوانی لە پرۆژەكەی كاك بەرهەم دەكات، هێشتا راگۆڕینەوە و پەیوەندی هەیە و ئومێددەكەم نەگاتە دۆخی مەترسیدار.
رووداو : دەتوانی وێنای بكەی دوای 20ی ئاب چی روودەدات؟
محەممەدی حاجی مەحموود: هەموو رووداوەكان پەیوەندیی بە پارتی و یەكێتییەوە هەیە. ئەگەر ئەو دوو لایەنە بگەنە ئەنجام، ئەوە باشە. ئەگەرنا ئەنجامێكی خراپ لەپێشمانەوەیە و دوو ئیدارەیی قسەیەكی دیكەیە.
رووداو: بڕیاردان لە دوو ئیدارەیی هەروا ئاسانە؟
محەممەدی حاجی مەحموود: ئاسان نییە، بەڵام كە واقیعەكە سەپاندی بەسەرتدا چیدەكەیت؟ ئەنجامەكە روونە كە دوای لێكترازان دوو ئیدارەیی دێتە پێشەوە.
رووداو: دەركەوت لە ساتە هەستیارەكاندا ئەمریكی و بەریتانییەكان بێدەنگی هەڵدەبژێرن؟ ئایا ئەوان رۆڵیان نییە؟
محەممەدی حاجی مەحموود: لە زووەوە گوتوومانە ئەمریكا سەربەخۆیی ناخاتە سەر سینی بۆ كورد. چارەسەری كێشە نێوخۆییەكانیشی ناكات. ئەوە سەركردەكانی كورد خۆیانن كە نابێ بهێڵن مەترسی لەسەر دەستكەوتەكان دروستببێ. ئەمریكا تەنیا لەدوای بەرژەوەندیی خۆی دەكەوێت و میللەتێك خۆی هەست بە چارەنووس و كێشەكانی خۆی نەكات، نابێ چاوەڕێی ئەمریكا بێت.
رووداو: داعش دڵخۆشە بەو دۆخەی لە كوردستان دروستبووە؟ ئایا ئەوان بۆ هەل دەگەڕێن؟
رووداو: كەوایە سەركردەكانی كورد ئەو هەلە لەدەستدەدەن؟
محەممەدی حاجی مەحموود: پێشتر گوتم واقیعەكە ئەوە دەسەپێنێ. دەبێتە دوو جەبهە و دوو هێزی جیاواز و ئەوكات كورد هێزی جارانی نامێنێ بەرامبەر داعش.
رووداو: بەبڕوای تۆ بارزانی لە دوا ساتەكاندا چیدەكات؟
رووداو: دوای 20ی ئاب چی روودەدات، كاتێك قسەیەكی دیكە ئەوەیە كە سەرۆكی پەرلەمان بەشێوەی كاتی جێگای سەرۆكی هەرێمی كوردستان دەگرێتەوە؟
رووداو: بزووتنەوەی گۆڕان پێداگیری لەسەر پرۆژەكەی دەكات و یەكێتی و كۆمەڵی ئیسلامیش چاویان لە هەڵوێستی گۆڕانە، پارتیش پێداگیری لەسەر هەڵوێستی خۆی دەكات، كەواتە تۆ لەم دۆخە تەنگەبەرەدا هێشتا ئومێد دەكەی سازان بێتە ئاراوە؟
محەممەدی حاجی مەحموود: مەرج نییە هەموو لایەنەكان بمێننەوە، گۆڕان لە رای خۆی بەردەوام دەبێ، هەرچەندە نازانم كاتی خۆی گۆڕان و پارتی چۆن رێككەوتوون و لەسەرچی رێككەوتوون، بەڵام سەرۆكی هەرێمی كوردستان داوایكردووە لایەنەكان كۆببنەوە و حیزبەكان رووبەروو قسەی خۆیان بكەن.
رووداو : بۆ مەگەر حیزبەكان پێشتر كۆبوونەوەیان نەكرد، ئێستا ئەم كۆبوونەوەیە چی سەوز دەكات؟
رووداو: دوایین هەوڵی نێوبژیوانی چییە ؟
محەممەدی حاجی مەحموود: ئێستاش قسە لەسەر پڕۆژەكەی بەرهەم ساڵح دەكرێ، چونكە وەك گوتم كاك كۆسرەت پشتیوانیی دەكات و ئەوان هەردووكیان جێگری سكرتێری گشتیی یەكێتین. بەڵام لەوانەیە سیغەی پڕۆژەكە هەندێك دەستكاریی بكرێت و كە شتێك هاتە پێشەوە و گونجاو بوو، دەبێ هەنگاوی خێری بۆ بنرێ.
رووداو: وڵاتانی دراوسێ رۆڵیان لە گەورەكردنی ئەم پرسەدا هەیە؟
محەممەدی حاجی مەحموود: نازانم بە دیاریكراوی باسی كام وڵات بكەم، بەڵام ئەوەی گرنگە ئێمە باسی بكەین ئەوەیە كە كورد خۆی ئەسڵی مەسەلەكەیە و خۆی قەیرانساز و هەرخۆشی چارەسەرسازی مەسەلەكانە. من بڕواموایە دەبێ كورد خۆی حەكیمی دەردەكانی خۆی بێت.
رووداو: بۆچوونێكیش هەیە دەڵێ بارزانی دەیتوانی مێژوویەكی گەورە بۆخۆی دروستبكات، دەستبەرداری پۆستەكەی ببێت؟ ئایا بارزانی ئەو هەلەی لەدەستچووە؟
محەممەدی حاجی مەحموود: من ئەوە بۆ رای كاك مەسعود خۆی دەگێڕمەوە، بەڵام لەم حاڵەتەی ئێستا لەبیری نەكەیت ئێمە لەشەڕداین و كێشەی زۆرمان هەیە و توركیا هێرشدەكات و بریندارەكانی زارگەلی هێشتا خوێنیان لێدەچۆڕێ. پێویستە و زۆر پێویستە كاك مەسعود بۆ دووساڵی دیكە بمێنێتەوە، ئێ خۆ دوو ساڵ زۆریش نییە ئەگەر لایەنەكان بیانەوێ رێكبكەون.
رووداو: بەغدا و بەتایبەتی لایەنی شیعە ئاسوودە دەردەكەون، دەبینن كورد لەنێوخۆیدا ئاڵۆزكاوە؟
جا بۆ گلەیی بكەین، ئەی راگەیاندنەكانی خۆمان؟ بۆ ئێستا كەس باسی بەرەكانی جەنگی داعش و پێشمەرگە دەكات؟ كەس باسی ئەوە دەكات كە ئێستا رۆژانە چەند ساروخ دراوە لە پێشمەرگە، كەس باسی چەكی كیمیاوی دەكات كە لەپێشمەرگە دەدرێ؟ ئەی كەس باسی برسێتی و نەبوونی و بێ مووچەیی و گەرما دەكات؟
رووداو: بۆ پارتی تەنیا كەوتووە؟ ئایا ئەو تەنیاییە بەرهەمی هەڵەی خۆیەتی؟
بارزانی باجی سیاسەتی هەڵەی پارتی دەدات
مەسعود و ئەو باجەكەی دەدات. بارزانی لەم شەڕەدا بووەتە ئامانج و یەخەی ئەوی گرتووە، بێگومان ئەویش سیاسەتی هەڵەی پارتی.
17/8/2015
نەوشیروان مستەفا بە مەرج رازی بووە بەشداری كۆبوونەوەی لوتكەی سەركردەی پێنج حیزبەكە بكات. ئەمیری كۆمەڵی ئیسلامی كوردستان مەرجەكان دەخاتە بەردەم بارزانی. پارتیش دەڵێ ئەگەر نەگەیشتنە ئەنجام ئەوە لە هەڵبژاردنی پێشوەختە "پارتی و یەكێتی باش سەردەكەون، گۆڕانیش زۆرترین زەرەری بەردەكەوێ".
مەرجەكەی نەوشیروان مستەفا
بەپێی زانیارییەكانی (رووداو)، بێجگە لە عەلی باپیر، لەمڕۆژانەدا هەریەكە لە كۆسرەت رەسووڵ، بەرهەم ساڵح و محەممەد فەرەج، ئەمینداری گشتیی یەكگرتوو بەجیا لەگەڵ بارزانی كۆبوونەتەوە. بارزانی رای ئەوانی وەرگرتووە كە چۆن ئەم كێشەیە چارەسەردەكرێ.
رۆژی یەكشەممە 16/8/2015 هەریەكە لە عەلی باپیر و كۆسرەت رەسووڵ عەلی سەردانی نەوشیروان مستەفایان كرد.
سەرچاوەیەكی ئاگادار لە كۆبوونەوەكەدا، كە داوایكرد ناوی بڵاونەكرێتەوە، زانیاری لەسەر قسەكانی رێكخەری گشتیی بزووتنەوەی گۆران ئاشكراكرد و گوتی: "كاك نەوشیروان بەمەرج رازی بووە بەشداری لە كۆبوونەوەی لوتكەی سەرۆكی هەر پێنج حیزبە سەرەكییەكە بكات".
دەربارەی مەرجی نەوشیروان مستەفا، ئەو سەرچاوەیە گوتی "كاك نەوشیروان داوایكردووە پێش كۆبوونەوەكە ئەجێندای كۆبوونەوەكە ببینێ كە چیی تێدایە و باسی چی دەكرێ، چونكە داوایكردووە لە مەلەفی نەوت، ئاسایش، سەربازی، دارایی، پەیوەندییەكانی دەرەوە، ئیدارە بنەمای ئاگاداری و شەریكایەتی هەبێ".
گوتیشی "عەلی باپیر داواكانی كاك نەوشیروان دەباتە لای بارزانی و وەڵامەكەش دەگەیێنێتە كاك نەوشیروان".
هەروەها گوتی "كاك نەوشیروان داوایكردووە كە دەبێ پارتیش قسەی هەبێ لەسەر مانەوەی بارزانی لە پۆستەكەی بۆ دوو ساڵی دیكە، پارتی هەر دەڵی با بارزانی بمێنێتەوە بەبێئەوەی هیچ پڕۆژەیەك پێشكەش بكات".
نیوه‌ڕۆی رۆژی یەکشەممە 16-8-2015 كۆسره‌ت ره‌سوڵ عه‌لی جێگری یه‌كه‌می سكرتێری گشتی یه‌كێتیی نیشتمانیی كوردستان، نه‌وشیروان مسته‌فا رێكخه‌ری گشتی بزووتنه‌وه‌ی گۆڕان و عه‌لی باپیر ئه‌میری كۆمه‌ڵی ئیسلامی كوردستان كۆبوونه‌وه.
له كۆبونه‌وه‌كه‌دا، دۆخی سیاسیی هه‌رێمی كوردستان و پرسی ویلایه‌تی سه‌رۆكی هه‌رێم تاوتوێ کراوەو نەوشیروان مستەفا لەدوای کۆبوونەوەکە رایگەیاند:" لە چەند رۆژی داهاتودا ئەنجامی كۆبونەوەكان دەبینن و هەڵویستی گۆڕانیش رادەگەیەنین".
17/8/2015
بە دەموچاوێكی هیلاكەوە خۆی كرد بە ژووردا. لەلایەك هێشتا دروستكردنی حكومەتی هاوپەیمانی سەرینەگرتووە، لەلایەكی دیكەوە پرۆسەی چارەسەریی پرسی كورد خەریكە بە بنبەست دەگات، وڵاتەكەشی لەبەردەم هێرشی پەكەكە و داعشدایە. ئەحمەد داودئۆغڵۆ سەرۆكوەزیرانی توركیا لەسەر خواستی خۆی لە جەنجاڵترین كاتەكانیدا چاویكەوت بە كۆمەڵێك رۆژنامەنووسی باشووری كوردستان. داودئۆغڵۆ رۆژی پێنجشەممە 13ی ئابی 2015، لە كۆشكی چانكای لە ئەنكەرە وتارێكی پێشكەشكرد، كە تێیدا دیدگای خۆی بۆ مەسەلەی كورد و رۆڵی توركیا لە رۆژهەڵاتی نێوەڕاست باسكرد.
داودئۆغڵۆ باسی ئەوەیكرد كە كورد و تورك و عەرەب هەموویان برای یەكن و سنوورە دەستكردەكان لێكی جیاكردوونەتەوە. ئەو گوتی: "سنوورەكانیش جیامانبكاتەوە هەر بەدڵ دەبێ یەكبین".
بۆ رۆڵی وڵاتەكەشی لە ناوچەكەدا، سەرۆكوەزیرانی توركیا، كە یەكێكە لە پرۆفیسۆرەكانی مێژوو و تیۆریستەكانی پەیوەندییە نێودەوڵەتییەكان، باسی لە دوو بەرە كرد كە لە چاویلكەكەیەوە تەماشای پێدەكات و ئێستا ئەجێندای سیاسەتی وڵاتەكەیەتی، "بەرەی یەكەم: ئەو كەسانەن کە باوەڕیان بە ئاشتی و تەبایی و پێكەوەژیان هەیە، كە كورد و تورك و عەرەب و فارسی تێدایە"، بەرەكەی دیكەش ئەو كەسانەن، وەك خۆی گوتی: "عەرەبی تێدایە وەك داعش و كوردیشی تێدایە وەك پەكەكە و توركیشیان تێدایە كە باوەڕیان بە كوشتنە".
سنوورەكان بۆ داودئۆغڵۆ دەستكردن و پێیوایە رۆژێك دێت لابچن. ئەو باسی لەوە دەكرد كە لە دانیشتنەكانیدا لەگەڵ شاندی وڵاتانی دراوسێی توركیا بە هەرێمی كوردستانەوە هەمیشە گوتوویەتی "رەنگە ئەگەر سنوورێك كەمتر یان شاخێك كەمتر لەنێوانماندا هەبووایە، ئەوە یەكێك لە ئەندامەكانی شاندەكەی ئێوە رەنگە لە ریزی ئێمەدا دابنیشتایە یان بە پێچەوانەوە".
قسە تیۆرییەكانی داودئۆغڵۆ، لەسەر خۆرهەڵاتی نێوەڕاست لە واقیعدا جۆرێكی دیكەن. ئێستا لە نێوخۆدا توركیا دووچاری كێشەی پێكنەهێنانی حكومەت و پەكەكە بووەتەوە لە دەرەوەش هەڕەشەی داعش و نەبوونی پەیوەندیی باش لەگەڵ زۆر لە وڵاتانی درواسێی دەبینرێ.
بۆ ئەم مەسەلەیەش داودئۆغڵۆ مێژوو دەكاتە بنچینەی سیاسەت و دەڵێ بڕیاری دروست بدەیت خۆت لە مێژوویەكی راستدا دەبینیتەوە و مێژوو رەحم بە زۆرداران و دۆستەكانی ناكات.
بۆ مەسەلەی كێشەی كوردیش لە توركیا، بەبڕوای سەرۆكوەزیرانی و راوێژكارانی ئێستا لە توركیا كوردێك و توركێك وەك یەك كێشەیان هەیە و ئەوە نەما كەس لەسەر كولتوور و زمان بچەوسێتەوە.
لەكاتێكدا داودئۆغڵۆ باسی ئاشتیی دەكرد لە ئەنقەرە لە باشووری رۆژهەڵاتی وڵاتەكەی كە باكووری كوردستانە، هەواڵی كوژرانی سەربازەكانی و شەڕ و پێكدادان دەهات.
داودئۆغڵۆ لە بارەی هەڵگیرسانەوەی شەڕ گوتی "چ دەوڵەتێك كوژرانی دوو پۆلیسی خۆی قبوڵدەكات؟" ئەو كوژرانی دوو پۆلیسەكەی توركیا وەك بیانوویەك بۆ هەڵگیرسانەوەی شەڕ باسکرد.
سەرۆكوەزیرانی توركیا گوتی: "لە ماڵەوە بووم كاتێك هەواڵی كوژرانی دوو پۆلیسەكەیان بۆ هێنام، بە دەزگا ئەمنییەكانم گوت لێكۆڵینەوە بكەن بزانن كێیە، یەكسەر پەكەكە تۆمەتبار مەكەن، چونكە گرووپی زۆر هەیە حەزی لە هەڵگیرسانەوەی جەنگە، بەڵام پەكەكە دوای دوو كاژێر لێپرسراوێتیی گرتە ئەستۆی خۆی".
لەبارەی كوژرانی مەدەنییەكانی زارگەلیش، سەرۆكوەزیرانی توركیا نكۆڵیی لەوە كرد كە سوپای وڵاتەكەی خەڵکی مەدەنی بكاتە ئامانج و گوتی: "پەكەكە خەڵکی مەدەنیی بردووەتە كەمپی سەربازیی خۆی".
وەك یەكێك لە چارەسەرەكان لە گفتوگۆكەی رۆژنامەنووسانی باشوور و داودئۆغڵۆ، ئازادكردنی ئۆجەلان درایە بەرگوێی سەرۆكوەزیرانی توركیا، كە ئێستا كۆشكەكەی ئەتاتورك مەنزڵیەتی، بەڵام ئەو گوتی "پەكەكە بەگوێی ئۆجەلانیش ناكەن، ئەگەر بیانكردایە دەبووایە لە ساڵی 2013 چەك دابنێن".
17/8/2015
بڕیاربوو سێشەممە 18 ی ئابی 2015، كاژێر 10:00 ی بەیانی لایەنەکانی هەرێمی کوردستان بەمەبەستی گەیشتن بە سازان لەسەر پرسی سەرۆکایەتیی هەرێمی کوردستان کۆببنەوە، بەڵام كۆبوونەوەكە بۆ كاژێر 06:00 ی ئێوارە دواخرا.
فوئاد حوسێن، سەرۆكی دیوانی سەرۆكایەتیی هەرێمی كوردستان بە تۆڕی میدیایی رووداوی گوت كە كۆبوونەوەكە بۆ كاژێر 06:00 ی ئێوارە دواخراوە. كۆبوونەوەكە لە هۆڵی سەعد عەبدوڵڵای شاری هەولێر لەبارەی دۆزینەوەی چارەسەر و هەوڵدان بۆ گەیشتن بە رێككەوتن لەبارەی پرسی سەرۆکایەتیی هەرێمی کوردستان ئەنجامدەدرێت.
بەپێی زانیارییەكانی رووداو، کۆبوونەوەکە تایبەت نابێت بە پێنج لایەنە سەرەکییەکە، بەڵکو هەموو حیزب و لایەنە سیاسییەکان، ئەوانەی مۆڵەتی یاساییان هەیە، بەبێ ئەوەی رەچاوی ئەوە بکرێت کە کورسییان لە پەرلەمانی کوردستان هەیە یان نا، بەشداری کۆبوونەوەکە دەکەن.
وەك رووداو زانیویەتی، هۆكاری دواخستنی كۆبوونەوەكە ئەوەیە، كە سبەی لایەنە سیاسییەکان سەرەتا لەنێوخۆی حیزبەکانیاندا کۆبوونەوە دەکەن، دواتر دەچنە کۆبوونەوەی نێوان لایەنەکان، ئەمەش بۆئەوەیە تاوەکو سەرجەم نوێنەری حیزبە بەشداربووەکان، دوایین بۆچوون و هەڵوێستی حیزبەکانیان سەبارەت بە پرسی سەرۆکایەتیی هەرێمی کوردستان پێبێت.
سەبارەت بە بەشداربوونی بارزانی لە كۆبوونەوەكەدا، مه‌حموود محه‌ممه‌د، ئەندامی مەكتەبی سیاسی پارتی دیموكراتی كوردستان بە ماڵپەڕی فەرمی حیزبەكەی راگەیاندووە " كە كۆبوونه‌وه‌كه له‌سه‌ر ئاستی باڵای حیزبه‌كان ده‌بێت، به‌ڵام مەسعود بارزانی، سه‌رۆكی هه‌رێمی كوردستان به‌شدارنابێت و، له سه‌ر ئاستی باڵای حزبه‌كانی گۆڕان، یه‌كێتی، پارتی، كۆمه‌ڵ، یه‌كگرتوو و نوێنه‌ره‌كانی په‌رله‌مان و نوێنه‌ری لایه‌نه‌كانی نه‌ته‌وه‌یی و ئایینی به‌شدارده‌بن".
کۆبوونەوەکە وەڵامدانەوەی داواکارییەکەی مەسعود بارزانی، سەرۆکی هەرێمی کوردستانە بۆ چارەسەرکردنی پرسی سەرۆکایەتی، كە داوایكردبوو پێش 20 ی ئاب كۆببنەوە و كام بڕیار بە باش و گونجاو دەزان لەسەری رێكبكەون.
18/8/2015
- داواکاری گشتیی کرماشان: لێکۆڵینەوە لەبارەی لێدانی قوتابیان دەکەین
- هونەرمەندی نەتەوەیی کورد سەید عەلی سەردەشتی لەوڵاتی سوید کۆچیدوایی کرد
- گفتوگۆكانی ئێران و ئەمریكا لە عومان دوای دو کاتژمێر کۆتایی هات
- ئێران شەڕو دانوستانی ناڕاستەوخۆی پێ باشە!
- داواکارییەکانی ئێران و ئەمریکا لەیەکتریی چیە؟
- وەزیری بەرگریی ئیسرائیل هۆشداری دەداتە ئەحمەد شەرع
- وادەی هێرشی ئەمریکا بۆ سەر ئێران ئاشکرا کرا
- دەستووری کاتی سوریا نیگەرانی لایەن کوردییەکان و چاودێرانی لێدەکەوێتەوە
- بارودۆخی نالەباری ئابووریی ئێران پێدەچێت کۆماری ئیسلامی ناچار بکات لەگەڵ سەرۆک ترامپ ڕێککەوتن بکات
- عڕاقچی: هێشتا نامەکەی ترەمپ بە دەستمان نەگەیشتووە
- وەزیری دەرەوەی ئێران دەڵێت بڕیارە نامەکەی ترامپ لە لایەن نێردراوێکی وڵاتێکی عەرەبیەوە بگەیەنرێتە تاران
- مەزڵوم عەبدی و ئەحمەد ئەلشەرع بە ڕێکەوتن دەگەن
- 8ی مارس.. شۆڕشێك لەپێناو مافی ژنان
- سری سورەییا ئۆندەر: باخچهلی پێی گوتم، ڕۆژێک دێت پێکەوە هەڵپەڕکێی ئاشتیی دەکەین
- حكوومهتی ئێران : له‌گه‌ڵ ئهورووپا درێژه به گفتوگۆ ئهتۆمییهكان دهدهین
- عەلی باپیر، سەرۆکی کۆمەڵی دادگەری کوردستان سەبارەت بە پەیامی ئۆجەلان"هیوادارم هەردوولا بە کردەوە بەدەم بانگەوازەکەوە بچن."
- ئەمینداری گشتیی یەکگرتوو پەیامی ئۆجەلان "پەیامێکی پڕ لە بەرپرسیاریەتی و بایەخ و واقعیەتە"
- سەرۆك بافڵ جەلال تاڵەبانی: پێشوازی لە پەیامەکەی بەڕێز عـ.ـەبدوڵا ئـ.ـۆجەلان دەکەین
- سەرۆک بارزانی: هیوادارین پەیامەکەی ئۆجەلان دەستپێکێک بێت بۆ ئەوەی پڕۆسەی ئاشتی رێی خۆی بگرێت
- زەینەب جەلالیان لە 17هەمین ساڵی زیندانیکردنیدا لە ناو زیندانەوە باس لە ئازارەکانی دەکات
- بزووتنەوەی کۆماریخوازانی ڕۆژهەڵاتی کوردستان ٢ی ڕێبەندان، ٧٩هەمین سالرۆژی دامەزرانی یەکەم کۆماری کوردستان، لە نەتەوەی کورد پیرۆزدەکات
- پەیامی پیرۆزبایی کۆماریخوازان بۆ بەرێز مەسعوود پزیشکیان
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
