<sup>لە دووەمین رۆژی کۆبوونەوەکانی گرووپی G7  باراک ئۆباما، سەرۆکی ولایەتە یەکگرتووەکانی ئەمریکا رایگەیاند:" ئابووری جیهان رووبەڕووی مەترسی بووەتەوە و قەیرانی ئۆکرایناش زیانی گەورەی بە کەرتی ئابووری رووسیا گەیاندووە".

سەبارەت بە دۆسیەی ئەتۆمی ئێران ئۆباما گوتی " پێویستە ئێران سوود لە دانووستاندنەکان وەربگرێت بۆ چارەسەرکردنی دۆسیەی ئەتۆمی وڵاتەکەی".

رەوشی عێراق و شەڕی داعش، تەوەرێکی دیکەی گوتارەکەی باراک ئۆباما بوو کە تێیدا سەرۆکی ئەمریکا گوتی "یارمەتییە سەربازییەکانمان بۆ عێراق زیاددەکەین و بەرەوپێشچوونێکی زۆر هەیە لە شەڕی داعش، چونکە ئەوان پاشەکشێیان کردووە، هەروەها لەگەڵ عەبادی تاوتوێی هاوکاریکردنی هێزە سونییەکانی عێراقمان کردووە".

ئۆباما نەخشە رێگایەکی بۆ عێراق دانا و ئاماژەی بەوەکرد" پێویستە حکومەتی عێراق، هێزێکی نیشتمانی درووستبکات بۆ دوورخستنەوەی مەترسییەکانی تیرۆر، هاوکات پێویستە لەسەر حکومەتی تورکیا کە دراوسێی عێراق  و سووریایە، هاوکار بێت لە رێگەگرتن لە چوونی چەکدارانی بیانی بۆ سووریا و هەوڵی زیاتر بدات بۆ قایمکردنی سنوورەکانی".

G7  گرووپی 7 وڵاتی پیشەسازی بەهێزە، کە ئەمریکا، ئەڵمانیا، کەنەدا، بەریتانیا و فەرەنسا،  ئیتاڵیا و ژاپۆن لەخۆدەگرێت.

کۆبوونەی G7 لە رۆژی یەکشەممە 7-6-2015 لە میونشنی ئەڵمانیا دەستیپێکردووە و دوو رۆژی تەواو دەخایەنێت، کە چەندین دیپلۆماتکاری جیهان تێیدا بەشدار دەبن.</sup>

^8/6/2015

<sup>نێچیرڤان بارزانی لە کۆنفڕانسێکی رۆژنامەڤانی کە رۆژی یەکشەممە لەسلێمانی ئەنجامیدا رایگەیاند:" تەبایی لایەنەکانی نێو ئەنجوومەنی پارێزگای سلێمانی دڵخۆشکەر بوون". ئەو هەروەها گوتی":ئەگەر گەیشتینە ئەو بڕیارەی کە ناگەینە چارەسەر لەگەڵ بەغدا، ئەو بژاردەی دیکەمان هەیەو پەنای بۆ دەبەین".

نێچیرڤان بارزانی، سەرۆکی حکومەتی هەرێمی کوردستان لە کۆنفڕانسە رۆژنامەڤانییەکەدا رایگەیاند، بەڵێندەران و وەبەرهێنانی شاری سلێمانی لەگەڵ حکومەتی هەرێمی کوردستان زۆر پشودرێژبوون،ئێمە بە جیدی هەوڵی چارەسەری کێشەکانیان دەدەین.

بارزانی گوتی "من ئێستا تێگەیشتم کە کێشەی بەڵێندەران زۆر گەورەتربوون لەوەی من پێشبینم دەکرد، ئەمەش وادەکات کە ئێمە بڕیاری پێویست بدەین بۆ چارەسەری ئەم کێشانە".

سەبارەت بە کێشەکانی نێوان هەولێر و بەغدا سەرۆکوەزیرانی هەرێمی کوردستان گوتی " ئەم بارودۆخە ئابوورییەی هەرێمی کوردستان قابیلی بەردەوامی نییە، ئێمە پێمانخۆشە و هەوڵدەدەین کێشەکانمان لەگەڵ بەغدا چارەسەر بکەین و پشوو درێژ بووین و هەوڵمان لەگەڵ بەغدا داوە، بەڵام حکومەتی بەغدا پابەند نەبووە بە رێککەوتنەکەی لەگەڵ هەرێمی کوردستان, ئەگەر گەیشتینە ئەو بڕیارەی کە ناگەینە چارەسەر لەگەڵ بەغدا، ئەو بژاردەی دیکەمان هەیەو پەنای بۆ دەبەین".

سەرۆکوەزیرانی هەرێمی کوردستان ژمارەی ئەو ئاوارانەی بەهۆی شەڕەوە لە عێراق  وسووریا روویان لە هەرێمی کوردستان کردووە ئاشکرا کرد و گوتی "زیاتر لە ملیۆنێک و 800 هەزار ئاوارە لە هەرێمی کوردستان هەن, هەرێمی کوردستان دەرگاکانی کراوەن تا ئیستا، بەڵام نایشارینەوە هەرێمی کوردستان بارگرانییەکی زۆری لەسەرە، بۆیە پێویستە کۆمەڵگەی نێودەوڵەتی هاوکاری زیاتر پێشکەشی هەرێمی کوردستان بکات و نوێنەری حکومەتی هەرێم لە برۆکسل داوای پاڵپشتی لە کۆمەڵگەی نێودەوڵەتی کردووە".

سەبارەت بەو بڕیارانەی لە کۆبوونەوەکەی لەگەڵ ئەنجوومەنی پارێزگای سلێمانی دراوە، سەرۆکی حکومەتی هەرێمی کوردستان لە وەڵامێکی پرسیاری پەیامنێری رووداو سەبارەت بە ناوەڕۆکی کۆبوونەوەکەی لەگەڵ ئەنجوومەنی پارێزگای سلێمانی و بڕیارەکان، گوتی "هەندێک لە بڕیارەکان ئیداری بوون، بەشێک تایبەت بوون بە شێوەی بەڕێوەچوونی کارەکان، بەشی دوای ئەوە باس لە دارایی کراوە کە پەیوەندی بە کێشەی هەولێر و بەغداوە هەیە و هیوادارین زوو چارەسەر بکرێت".

گوتیشی" تەبایی لایەنەکانی نێو ئەنجوومەنی پارێزگای سلێمانی دڵخۆشکەر بوون".

پرسی یەکگرتنەوەی وەزارەتی کارەبا و سامانە سرووشتییەکان بەشێکی دیکە بوو لە کۆنفڕانسە رۆژنامەڤانییەکەی سەرۆکوەزیران و رایگەیاند:" کێشەی وەزارەتی کارەبا پەیوەندی بە برایانی یەکگرتوو یان وەزیری کارەباوە نییە، کە بلێین  خوا نەخواستە لە کارەکە نازانێت یان فاشل بووە، بەپێچەوانەوە زۆر کاری باشی کردووە، هەر لە بنەڕەتدا وەزارەتی کارەبا و سامانە سرووشتییەکان دەبێ یەک وەزارەت بن".

نیچیرڤان بارزانی سوپاسی پەرلەمانی کوردستان و جێگری سەرۆکی حکومەتی هەرێمی کوردستانی کرد سەبارەت بە مەسەلەی قەرزی نێودەوڵەتی  و پەسەندکردنی لەلایەن پەرلەمانەوە و راشیگەیاند:" قەرزی نێودەوڵەتی تەنیا رەهەندی ئابووری نییە، بەڵکو رەهەندی سیاسیشی هەیە، دوای واژۆکردنی لەلایەن سەرۆکی هەرێمی کوردستانەوە، حکومەت دەست بە گفتووگۆکانی دەکات لەگەڵ بانکەکانی جیهان".</sup>

^7/6/2015

<sup>بەپێی ئەنجامە بەراییەکان لە هەڵبژاردنی گشتی تورکیا و ئەو بنکانەی لەباکووری کوردستان دەنگەکانی جیاکراوەتەوە، ئەنجامەکان بەمشێوەیە..

HDP لەم شارانە لە پێشە</sup>

<sup>ئامەد، وان  ، مووش ، بەدلیس ، ئاگری ، سێرت ، ماردین ، دێرسیم ، ئیدیر، جۆلەمێرگ ، شڕناخ و ئێلیح.


AKP لەم شارانە لە پێشە

ئەردەخان، چەولیگ ، قەرس ، روحا ، خاریێت ، سەمسوور، ئەرزگان ، سێواس ، مەڵەتی ، مەراش ، دیلۆک ، کیلیس و ئەرزڕۆم .</sup>

^7/6/2015

<sup>لە ئەنجامی بۆردوومانی فڕۆکە جەنگییەکانی هاوپەیمانانی عەرەبی بە رێبەرایەتی سعودیە بۆ سەر بنکەی فەرماندەیی گشتی سوپای یەمەن لە سەنعا، 44 کەس کوژران و بەدەیانی دیکەیش برینداربوون.

میدیاکانی یەمەن بڵاویانکردوەتەوە، رۆژی یەکشەممە 7 ی حوزەیرانی 2015، لە ئەنجامی هێرشەکانی فڕۆکە سعودییەکان بۆ سەر حوسییەکان لە شاری سەنعا، 44 کەس کوژران و زیاتر لە 100 کەسی دیکەش برینداربوون .

دانیشتوانی شاری سەنعاش بە دەزگاکانی راگەیاندنیان گوتوە، فڕۆکە سعودییەکان 5 هێرشیان بۆ سەر بنکەی فەرماندەیی گشتی سوپای یەمەن لە سەنعا ئەنجامداوە.

بەپێی راپۆرتەکانیش زۆرینەی قوربانییەکان ئەو سەربازانەن کە بەمەبەستی وەرگرتنی مووچە سەردانی بنکەی فەرماندەیی گشتی سوپای یەمەنیان لە سەنعا کردبوو.

هاوپەیمانی وڵاتانی عەرەبی بە سەرکردایەتی سعودیە، نزیکەی دوومانگ دەبێت هێرشی ئاسمانی بۆ سەر بارەگا و بنکەی حوسیییەکان لە یەمەن دەستپێکردووە، دوای ئەوەی ئەو گرووپە سەنعای پایتەختی یەمەنی کۆنتڕۆڵکرد.

حوسییەکان ئەم هێرشانە بە دەستدرێژی بۆ سەر سەروەریی خاکی یەمەن وەسفدەکەن، وڵاتانی کەنداویش حوسییەکان بەوە تۆمەتبار دەکەن، کە رێگەی بۆ ئێران خۆشکردووە بۆ ئەوەی دەست لە کاروباری یەمەن وەربدات.</sup>

^7/6/2015

^{سەرۆک بارزانی دووپاتیدەکاتەوە کە گەلی كوردستان نابێتە بەشێك لەو ململانێ تاییفیەی لە ناوچەكەدا لە ئارادایە. وڵاتی کوێتیش ئامادەی هەموو جۆرە هاوکارییەکی بۆ کوردستان دەردەبڕێت}

^{بەپێی راگەیاندراوێکی سەرۆکایەتی هەرێمی کوردستان، ڕۆژی شەممە 6ـی6ـی 2015 لە سەلاحەدین مەسعود بارزانی، سەرۆكی هەرێمی كوردستان پێشوازی لە عومەر ئەحمەد ئەلكەندەری، كونسوڵی كوەیت لە شاری هەولێر كرد.}

^{لە دیدارێكدا كونسوڵی كوەیت لە شاری هەولێر سڵاوی شێخ سەباح ئەلئەحمەد ئه‌لجابر ئەلسەباح، ئەمیری كوەیتی بە سەرۆك بارزانی گەیاند. هەروەها ڕێز و پێزانینی خۆی بۆ خەبات و قوربانیدانی گەلی كوردستان بۆ گەییشتن بە ئازادی نیشان دا و دەستخۆشیشی لە سەرۆك بارزانی و هێزی پێشمەرگەی كوردستانی كرد بۆ ئەو ڕۆڵە كاریگەرەی لە دژایەتیكردنی تیرۆردا گێڕاویانە. هەروەها وێڕای جەختكردنەوەی لە دۆستایەتیی و پەیوەندییە مێژووییەكانی گەلی كوردستان و گەلی كوەیت كردنەوەی كونسوڵخانەی وڵاتەكەی لە شاری هەولێر بە قۆناغێكی تازەی پەرەپێدانی پەیوەندییەكانی نێوان هەردوولا لە قەڵەم دا. ئەوەیشی ڕاگەیاند كە وڵاتەكەی ئامادەیە ئەوەی لەدەستی بێت بۆ یارمەتیدانی گەلی كوردستان بیكات.}

^{لە بەرانبەر دا سەرۆك بارزانی خۆشحاڵیی خۆی بۆ كردنەوەی كونسوڵخانەی كوەیت نیشان دا و پێشوازیشی لە فراوانتربوونی پەیوەندییەكانی نێوان هەردوولا كرد. هەروەها ڕۆشنایی خستە سەر پەیوەندییەكانی نێوان هەردوو گەلی كوردستان و گەلی كوەیت و ئەوەی خستەڕوو كە گەلی كوردستان لەو نەهامەتییە دەگات كە لەلایەن ڕژێمی بەعس بەسەر گەلی كوەیتدا سەپێندرا بوو. سەرۆك بارزانی باسی لە هەڕەشەكانی تیرۆریستان بۆ سەر ئاساییشی ناوچەكە و جیهان كرد و ئەوەی دووپات كردەوە كە گەلی كوردستان نابێتە بەشێك لەو ململانێ تاییفیەی لە ناوچەكەدا لە ئارادایە.}

^6/6/2015

^{کونسوڵی گشتی ئەڵمانیا لە هەرێمی کوردستان رایگەیاند، کە بۆ هاوکاریکردنی پێشمەرگە، “لە بڕیارێکی خۆمان پەشیمانبووینەتەوە”.}

^{دیتەر لاملێ، کونسوڵی گشتی ئەڵمانیا لە هەرێمی کوردستان رایگەیاند، کە حکوومەتی وڵاتەکەی هاوکاریی سەربازی چەکدارانی حەشدی شەعبی نەکردووە، کە ئێستا شەڕی داعش دەکەن، بەڵام پێچەوانەی بڕیارێکی خۆی، کە رایگەیاندبوو “ئەڵمانیا بە هیچ شێوەیەک هاوکاری گرووپە چەکدارییەکان ناکات”، هاوکاریی سەربازی پێشکەشی پێشمەرگە کرد، بۆ رووبەڕووبوونەوەی چەکدارانی داعش.}

^{دیتەر لاملێ هەروەها باسی لەوەکرد، کە پەیوەندی هەرێمی کوردستان و ئەڵمانیا لەسەر ئاسەکانی سیاسەت، سەربازیی و مرۆیی “زۆر باشە”.}

^{ئه‌و قسانه‌ی كونسوڵی گشتی ئه‌ڵمانیا له‌ مەراسیمی به‌خشینی خه‌ڵاتی “چاوی كراوه”‌ بوو به‌سه‌ر سێ رۆژنامه‌نووس، كه‌ ساڵانه‌ ئه‌كادیمیای ئه‌ڵمانی له‌ عێراق بۆ كاری رۆژنامه‌وانی رێكی ده‌خات.}

^{حکوومەتی ئەڵمانیا هەر لە سەرەتای شەڕی داعشدا، بە کەلوپەلی سەربازیی بەتایبەت چکی میلان و یارمەتیی مرۆیی بۆ ئاوارەکان، هاوکاریی باشووری کوردستانی کردووە.}

^6/6/2015

^{سەرەتای ئەمساڵ رێکخراوی توندڕەوی دەوڵەتی ئیسلامی (داعش) چەند جارێک هەوڵی دا بە رێگەی کاتیۆشای ناوەندی شاری هەولێر بۆردومان بکات.}

^{بۆ ئەم مەبەستە چەند جارێک چەند کاتیۆشایەکی ئاراستەی ناوەندی شاری هەولێر کرد, بەڵام لە دەوروبەری هەولێر کەوتنە خوارەوە و بەوهۆیەشەوە لە قەزای خەبات کە چەند کیلۆمەترێک لە شاری هەولێرەوە دوورە, کەسێکی شەهید کردوو چەند کەسێکی دیکەشی بریندار کردن. 
دوا هەوڵی داعش بۆ بۆردومانکردنی سەنتەری شاری هەولێر ئەوەبوو ئەویش چەند کاتیۆشایەکی ئاراستەی شاری هەولێر کرد بەڵام لە نزیک عەلوەی شاری هەولێر کەوتنە خوارەوەو هیچ زیانێکی گیانی و مادیان نەبوو.}

^{دواتریش فەرماندەی گشتی هێزەکانی پێشمەرگە ڕایگەیاند ,لە رێگەی کۆکردنەوەی زانیاری لەگەڵ هاوپەیمانان توانیمان ئەو چەکانەی داعش بەکاری دەهێنانن بە رێگەی بۆردومانێکی تایبەتەوە لەناویان ببەین.} 

^6/6/2015

<sup>لەشەڕ و پێکدادانی نێوان هێزەکانی ساڵح و حوسییەکان  بۆسەر هەردوو ناوچەی سنووریی جیزان و نەجران نێوان یەمەن و سعودییە چوار سەربازی عەرەبستانی سعودیە کوژران.

هێزەکانی سوپای سعودیە رایانگەیاند " چوار سەربازی سعودیە لە شەڕ و پێکدادانی  نێوان هێزەکانی سوپای سعودیە و هێزەکانی عەلی عەبدوڵڵا ساڵح، سەرۆکی پێشووی یەمەن و چەکدارانی حوسی لەسنووری نێوان سعودیە و یەمەن لەناوچەکانی جیزان و نەجران کوژراون".

بەگوێرەی راگەیێندراوی سوپای سعودیە، هێرشەکە لەدیوی یەمەنەوە کراوەتە سەر هێزەکانیان لە جیزان و نەجران، شەڕەکەش ماوەی 5 کاژێری خایاندووە، هەر بەگوێرەی راگەیێندراوەکە دەیان چەکداری یەمەنی کوژراون.   

ئەو سەربازە کوژراوانەی هێزەکانی سوپای سعودیەش، بریتین لە ئەفسەرێکی گاردی نیشتمانی و دوو سەربازی هێزەکانی پیادە و پاسەوانێکی سنوور.

پەیامنێری رووداو لە یەمەن باسی لەوە کرد، کە بەگوێرەی ئەو زانییارییانەی دەست (تۆڕی میدیایی رووداو) کەوتوون  لایەنگرانی عەلی عەبدوڵا ساڵح، سەرۆکی پێشووی یەمەن و چەکدارانی حوسی دەستیان بەسەر چەند پێگەیەکی سوپای سعودیە لەنێو خاکی سعودییەدا گرتووە.</sup>

^6/6/2015

^{“تاریق عەزیز” جێگری پێشووی سەرۆكی ئەنجوومەنی وەزیرانی عێراق لە سەردەمی ڕژێمی بەعسی لە ناوچوو، بە هۆی نەخۆشیەوە لە بەندیخانەی شاری ناسڕیە كۆچی دوایی كرد .}

^{“عادل دەخیل” جێگری یەكەمی پارێزگاری زیقاڕ بە سۆمەرییە نیوزی ڕاگەیاندووە: “دوانیوەڕۆی ئەمڕۆ هەینی تاریق عەزیز جێگری پێشووی سەرۆكی ئەنجوومەنی وەزیرانی عێراق لە سەردەمی ڕژێمی بەعسی لە ناوچوو لە بەندیخانەی ناسریە كۆچی دوایی كرد و، تەرمەكەشی بۆ نەخۆشخانەی حوسەینی فێركاری لە شاری ناسڕیە گواستراوەتەوە”.}

^{تاریق عەزیزی تەمەن 79 ساڵ ناوی ڕاستەقینەی میخائیل یوحەننایە و لە ساڵی 1936 لە نزیك شاری مووسڵ لە خێزانێكی كلدانی كاسۆلیكی لە دایك بووە و، بە تاكە بەرپرسی مەسیحی لە نێو ڕژێمی بەعس دادەندرا. پێشتر دادگای تاوانەكان لە عێراق لە 26ی تشرینی یەكەمی ساڵی 2012 سزای لە سێدارەدانی بەسەر تاریق عەزیز دا سەپاندبوو.}

^5/6/2015

<sup>لە بەرەبەیانی رۆژی پێنجشەممەوە، ئاگر بەرۆکی دارستانەکانی ناوچەی شەلەمی ئیلامی گرتووە. ئاگرێک کە تا رۆژی هەینی 5-6-2015  بەردەوامبوو، واتە رۆژی جیهانیی ژینگەپارێزی.

بەگوتەی چالاکڤانانی ژینگەپارێزی رۆژهەڵاتی كوردستان، ئاگرەکە لە هەشت خاڵەوە دەستیپێکردووە، لە سەرەتاوە هاونیشتمانییانی پارێزگای ئیلام بە نامە یەکدیان ئاگادارکردووەتەوە و قۆڵیان بۆ کوژاندنەوەی ئاگرەکە هەڵماڵیوە، بەڵام بە کەمترین و سەرەتاییترین توانا و ئامێرەكان، پێمەڕە و چڵ و لقی دارەکان، بەهۆی هاتنی باوە ئاگرەکە بە خێراییەکی زۆرتر گواستراوەتەوە، بەشێوەیەک کە شەوی پێنجشەممە ئاگرەکە گەیشتووەتە بەرزاییەکانی دەور و پشتی شار.

هاونیشتمانییەکی شاری ئیلام بە تۆڕی میدیایی رووداوی گوت " ئاگرەکە لە ناو شارەوە دیاربوو، ئەوەش ترس و دڵەڕاوکێ و نیگەرانییەکی زۆری بۆ هاونیشتمانیان دروستکردبوو".

لەگەڵ فراوانبوونی ناوچەی ئاگرەکە، بەرپرسانی حکومیش هەوڵی خۆیان داوە، بە گوتەی محەممەد رەزا موروارید پاریزگاری ئیلام ، هێزەکانی سوپای پاسداران، بەسیج، یەکینەکانی ژینگەپارێزی، بەڕێوەبەرایەتی سەرچاوە سرووشتییەکان، شارەوانی، پارێزگاری، فریاکەوتن و ئاگرکوژێنەوە دەستیان داوەتە دەستی هاونیشتمانییان و شانبەسانی ئەوان سەرقاڵی کوژاندنەوەی ئاگرەکە بوونە.

تەلەڤزیۆنی حکومی پارێزگای ئیلام بە ژێرنووس و بەڕێوەبەرایەتیی هەواڵگریش بە کورتەنامە داوایان لە هاونیشتمانییان کردبوو خۆیان بگەیێنە بەرزاییەکانی ئیلام بۆ کۆنترۆڵکردنی ئاگرەکە.

محەممەد رەزا موروارید، پارێزگاری ئیلام سەرلەبەیانی رۆژی هەینی رایگەیاند، کە بە یارمەتی هاونیشتمانییان  و هەموو دەزگاکان توانیویانە ئاگرەکە کۆنترۆڵ بکەن.

پارێزگاری ئیلام رەخنەشی لە بنکەی بەرەنگاربوونەوەی قەیرانی ئەو پارێزگایە گرت و رایگەیاند " چۆن دەبێت پارێزگایەک بەو هەموو رووبەرە دارستانەوە هەلیکۆپتەری ئاگركوژێنەوەی نەبێت".
بە گوتەی نێوبراو بەهۆی شاخاویبوونی ناوچەی شەلەم، لە کاتی خۆیدا و بە شێوەی پێویست نەتوانراوە ئاگرەکە کۆنترۆڵبکرێت، بۆیە پێویستە بنکەی بەرەنگاربوونەوەی قەیرانی ئیلام بۆ حاڵەتی لەو شێویە هەلیکۆپتەری هەبێت .

بە گوتەی چالاکڤانانی ژینگەپارێزی کە لە ناوچەی شەلەم جێگیربوونە، لە کاتژمێر 10ی بەیانەی رۆژی هەینییەوە ئاگر لە بەشی باکووری ناوچەی شەلەم دەستیپێکردووەتەوە. بە گوتەی ئەو چالاکڤانانە زیاتر لە 800 دۆنم واتە 200 هێکتار لە دارستانەکانی ئیلام تا ئێستا سووتاون و روونیش نەبووەتەوە هۆكاری ئاگركەوتنەوەكە چیبووە.

لە سەرەتای ساڵی نوێوە تا ئێستا 13 حاڵەتی ئاگرکەوتنەوە تەنیا لە دارستانەکانی پارێزگای ئیلام تۆمارکراوە، دارستانەکانی ئیلام لەگەڵ چەند کێشەیەكی دیکە وەک نەخۆشی لۆرانتوس، وشکەساڵی و گردیلەکانیش بەرەوڕوون. رووبەری دارستانەکانی پارێزگای ئیلام 2.500.00 دۆنمە و بەشێکە لە دارستانەکانی زنجیرە چیای زاگرۆس کە رووبەریان زیاتر لە 21 ملیۆن دۆنمە.</sup>

^{ئومێد بەرین/ رووداو}

^5/6/2015