<sup>فڕۆکەکانی هاوپەیمانان بەچڕی بنکەکانی چەکدارانی حوسیان لە شاری سەنعا بۆردوومانکرد و کۆگای سەرەکی چەک وتەقەمەنی ئەو
گروپەیان تەقاندەوە.

کاژێر ٦ ی بەیانیی رۆژی چوارشەممە ٣ ی حوزەیرانی ٢٠١٥، سەرچاوەیەکی ئەمنی لەسەنعای پایتەختی یەمەن رایگەیاند:" بەهۆی بۆردوومانی فڕۆکەکانی هاوپەیمانان چەندین چەکداری توندڕەو کوژراون و فڕۆکەکانی هاوپەیمانان کۆگای چەک و تەقەمەنی چەکدارە توندڕەوەکانیان لە کۆمەڵگەی ٢٢ یۆنیۆ لەسەنعا تەقاندەوە، بەوهۆیەوە چەکدارە توندڕەوەکانی یەمەن زیانی زۆریان بەرکەوتووە".

بەپێی زانیارییەکانی سەرچاوە ئەمنییەکە" بەهۆی بۆردوومانکردنی کۆگای چەک وتەقەمەنی گرووپە توندڕەوەکان لەسەنعا، حوسییەکان ناتوانن وەک پێشووتر چالاکییان هەبێت".

هاوپەیمانی وڵاتانی عەرەبی بە سەرکردایەتی سعودیە، نزیکەی دوومانگ دەبێت هێرشی ئاسمانی بۆ سەر بارەگا و بنکەی حوسیییەکان لە یەمەن دەستپێکردووە، دوای ئەوەی ئەو گرووپە سەنعای پایتەختی یەمەنی کۆنتڕۆڵکرد. حوسییەکان ئەم هێرشانە بە دەستدرێژی بۆ سەر سەروەریی خاکی یەمەن وەسفدەکەن، وڵاتانی کەنداویش حوسییەکان بەوە تۆمەتبار دەکەن، کە رێگەی بۆ ئێران خۆشکردووە بۆ ئەوەی دەست لە کاروباری یەمەن وەربدات.</sup>

^3/6/2015

<sup>گەورە کۆمپانیاکانی نەوتی جیهان کە لە باشووری کوردستان کاردەکەن، ئامادەیی خۆیان نیشانداوە لە بەرامبەر پێدانی نەوت، بودجەی هەرێمی کوردستان دابینبکەن، بەڵام ئەوەی تەنیا ماوەتەوە بۆ ئەنجامدانی رێکەوتن، یەکلایی بوونەوەی چارەنووسی رێکەوتنەکەی نیوان هەولێر و بەغدایە .

دڵشاد شەعبان جێگری سەرۆکی لێژنەی سامانە سرووشتییەکانی پەرلەمانی کوردستان لە لێدوانێکدا بۆ (تۆڕی میدیایی رووداو) دەڵێت"زۆر کۆمپانیا هەن کە ئامادەن نەوتی کوردستان بکڕن، لەبەرامبەر ئەو نەوتەدا رەنگە بتوانێ 8 ملیار دۆلار بداتە هەرێمی کوردستان، کۆمپانیا هەیە ئامادەیی دەربڕیوە کە 3 ملیار دۆلار پێشەکی بدات، ئێستا کڕیاری نەوتی کوردستان زۆر لەوە زیاترە کە لە ساڵی 2014 هەبوو".

لە رووی یاساییەوە حکومەتی هەرێمی کوردستان بێ باکە بۆ فرۆشتنی نەوت، چونکە لە دەستووری عێراقی هاتووە لە بوونی هەرکێشەیەک پێشینە بۆ یاسای هەرێمەکانە، بە گوێرەی یاسای نەوت و گازی هەرێمی کوردستانیش، هەولێر خاوەن دەسەڵاتە بۆ کردنەوەی قوفڵی بۆرییەکانی نەوت ، ئامادەیی کۆمپانیاکانی نەوتیش بۆ پێدانی چەندان ملیار دۆلار بە حکومەتی هەرێمی کوردستان، چەندان رەهەندی سیاسی و ئابووری لە خۆ دەگرێت .

 هاورێ مەنسوور بەگ پسپۆری بواری وزە بە (رووداو)ی گوت" کۆمپانیاکانی نەوت ئێستا هەلێکی زێڕین دەقۆزنەوە، چونکە نەوت ئێستا هەرزانەو ئەو قەرزە لەلایەن حکومەتی هەرێمی کوردستانەوە ئێستا بە نەوت دەدرێتەوە، بۆیە هەرێمی کوردستان دەبێتە عەمبارێکی ستراتیژی بۆ ئەو کۆمپانیایانە، بەبڕوای من پێدانی قەرز لەو ئاستە کە کۆمپانیا نەوتییەکان ئامادە بن بوودجەی هەرێمی کوردستان دابین بکەن، سەرکەوتنێکی سیاسی و ئابووری زۆر گرینگە و رەنگدانەوەی قوڵایی متمانەی کۆمپانیا نەوتییەکانە بە هەرێمی کوردستان و داهاتووی ئابووری و سیاسیی هەرێمی کوردستان".

کورد چەندان رێگای لە پێشە بۆ تێپەراندنی قەیرانی داراییەکەی، رۆژی 31-5-2015 نێچیرڤان بارزانی سەرۆکوەزیرانی حکومەتی هەرێمی کوردستان، لە کۆبوونەوەی ئەنجوومەنی وەزیران رایگەیاند" خه‌ریكه‌ ده‌گه‌نە قۆناخێك كه‌ كێشه‌كان چاره‌سه‌ر بكه‌ن".</sup>

^3/6/2015

<sup>فرۆکەکانی هاوپەیمانی عەرەبی کە عەرەبستانی سعودی پێشەوایەتی دەکات  دەستیان  کرد بە قۆناغێکی نوێ لە کردە سەربازییەکانیان، کە بە زنجیرەیەک بۆردومانی ئاسمانی  دەستیان پێکرد بۆ سەر ماڵی سەرکردە ناوەنجییەکان لە گروپی حوسییەکان و سەرکردە نزیکەکان لە عەلی عەبدوڵا ساڵح سەرۆکی پێشوی  یەمەن. لەچەندین شوێنی جیاجای ئەو وڵاتە.
.
ماڵی مجاهید حەیدەر، سەرۆک عەشیرەتێکی نزیک لە گروپی ئەنساروڵا، کە لە ناوچەی بەنی حەوات نیشتەجێیە، لە نزیک فرۆکەخانەی سەنعا، یەکێک بوو لە ئامانجەکانی بۆردومانە ئاسمانییەکان، کە بە هۆیەوە ژمارەیەک لە پاسەوانەکانی برینداربوون و ماڵەکەشی رووخا، کە گومان دەکرا ئەو ماڵە بۆ کۆبوونەوەی هەندێ لە ئەندامانیان و هەڵگرتنی چەک و تەقەمەنی بەکارهاتبێ.

لەدوای هەموو بۆردومانێک دانیشتوانی ئەو ناوچانە تووشی پێکان و زیانکەوتن بە ماڵەکانیان دەبنەوە و لەوە دەترسن هێرشی دیکە رووبدات.

لە ماوەی دوو رۆژی رابردوودا زنجیرەیەک هێرشی ئاسمانی چڕوپڕ روویداوە کە هەندێ لە پێگە سەربازییەکان و ماڵی سەرکردەکانی لە سەنعا، سەعدە، حجە و مەئرەب، گرتووەتەوە، کە بە هۆیانەوە دەیان کەس کوژراون و بریندار بوون.

سەلیم زران: "ئەو ناوچەیە هەمووی شوێنی نیشتەجێبوونە، هیچ لە خانوی دراوسێکانمان پێگەی حوسییەکان نییە،و هیچ پێگەیەکی سەربازی لێنییە تەنانەت بۆ بەرگری ئاسمانی، تەنانەت ئەو ئاپارتمانەش کە گومانی ئەوەی پێبراوە حوسییەکانی لێبێت، کەسی تێدا نییە جگە لە پاسەوانەکان."

عەبدوللەتیف حەمید: " خانوەکەمان لە بەردەم ئەو ئاپارتمانەیە هەموو پەنجەرەکانی شکاون، دەرگا دەرەکانی سوتاون و خێزانەکەمان رەوانی ئەو گەرمایە کردووە نەوەک زیانیان پێبکەوێت."</sup>

^2/6/2015

<sup>باراک ئۆباما، سەرۆکی ئەمریکا لە هەڤپەیڤینێکدا لەگەڵ کەناڵی دووی تەلەفزیونی ئیسرائیل گوتی:" هێرشی سەربازی بۆ سەر ئێران تەنانەت بە راوێژی ئەمریکاش بێت، پرسی بەرنامەی ئەتۆمی ئەو وڵاتە  چارەسەر ناکات".

ئۆباما دەشڵیت:" لە سەر بنەمای هەڵسەنگاندنی راستییەکان، دەتوانم ئەوە بسەلمێنم کە رێککەوتنێکی کۆتایی، پێش بە ئێران دەگرێت لە بەدەستهێنانی چەکی ئەتۆمی".

سەرۆکی ئەمریکا هەروەها دەڵێت:" تەنانەت ئەگەر ئەمریکا لە هێرشێکی سەربازیدا بۆ سەر ئێران هاوکاری بکات، بەرنامەی ناوکی ئێران راناگیرێت".

ئۆباما لە وەڵامی پرسیارێکدا کە ئایا ئیسرائیل بە بێ هاوئاهەنگی ئەمریکا هێرشی سەربازی دەکاتە سەر ئێران یان نا؟ گوتی:" پێم وانییە، بەڵام درک بە ترس و نیگەرانییەکانی خەڵکی ئیسرائیل دەکەم."</sup>

^2/6/2015

<sup>فەرمانگەى پەیوەندییەکانیى دەرەوە لە راگەیێندراوێکدا هەڵوێستى هەرێمى کوردستان سەبارەت بە کۆنگرەى پاریس دەخاتەڕوو و تێیدا ناڕەزایەتی دەردەبڕێت بەوەی" ئەمجارەش حکومەتى فیدڕاڵ بانگهێشتى نوێنەری هەرێمى كوردستانى بۆ ئەم کۆنگرەیە نەکرد و بە تەنها بەشداریان لە کۆنگرەى پاریس کرد".

لە راگەیێندراوەکەدا هاتووە، كۆنگرەی پاریس تایبەتە بەو وڵاتانەی لەگەڵ ڕێكخراوی تیرۆریستی داعش لەشەڕدان، دیارە هەرێمى کوردستان لەم رووەوە پشکى شێرى بەرکەوتووەو تاکە هێزە تاکو ئێستا توانیویەتى بە قارەمانیەتى هیزەکانى پێشمەرگە گەورەترین سەرکەوتن بەسەر تیرۆرستان بەدەست بێنێت و تیرۆریستان تووشى شکستى گەورە بکات و ناوچەکانیان لێ پاکبکاتەوە.

سەبارەت بە هەڵوێستی حکومەتی عێراق و بانگهێشتنەکردنی هەرێمی کوردستان بۆ کۆنگرەکە، لە راگەیێندراوکەدا زیاتر هاتووە، دواى کۆنگرەکانى پێشوو، چاوەڕوانى ئەوە بووین کە حکومەتى عیراقى فیدڕاڵ و کۆمەڵگاى نێودەوڵەتى ڕێز لە قوربانیدانی گەلی كوردستان و قارەمانێتیی پێشمەرگە بگرێ و بە بایەخەوە سەیرى هەوڵەکانى حکومەتى هەرێم بکات بۆنیشتەجێکردنى زیاتر لە ١,٥ ملیۆن ئاوارەو پەنابەر. کەچى ئەمجارەش حکومەتى فیدڕاڵ بانگهێشتى نوێنەری هەرێمى كوردستانى بۆ ئەم کۆنگرەیە نەکرد و بە تەنها بەشداریان لە کۆنگرەى پاریس کرد.

سەبارەت بە مافی بەشداریکردنی هەرێمی کوردستان لە کۆنگرەی پاریس بەپێی دەستووری عێراقی، راگەیێندراوەکەی حکومەتی هەرێمی کوردستان دەڵێت " هەرێمى کوردستان وەک تاکە هەرێم لە عیراقى فیدراڵ بە مافى رەواى خۆى دەزانێت لەم جۆرە کۆنگرەو کۆبوونەوانە نوێنەری خۆی هەبێت و گوزارشت لە هەڵوێست و سیاسەتى هەرێمى کوردستان بکات کە ئەمەش مافێکى دەستووریەو ماددەى ١٠٥ ى دەستوورى هەمیشەیى عیراق ئاماژە بە هاوسەنگى نوێنەرایەتى کردن دەکات لە نێوەندە نێودەوڵەتیەکان".

وەزیرانی 20 وڵاتی بەشدار لە هاوپەیمانی دژی رێکخراوی دەوڵەتی ئیسلامی (داعش)، بە مەبەستی تاوتوێکردنی ستراتیژی خۆیان ئەمڕۆ سێشەممە 2/6/2015 لە پاریس کۆ دەبنەوە.

بڕیارە حەیدەر عەبادی، سەرۆکوەزیرانی عێراق و لۆران فابیۆس، وەزیری دەرەوەی فەرەنسا سەرۆکایەتی دانوستاندنەکان بگرنە ئەستۆ. 

دەقی راگەیێندراوکەوە..

بە مەبەستى هەڵسەنگاندنى رەوتى هەوڵ و هێرشەکانى هاوپەیمانان بۆ لێدان و لاواز کردنى گرووپى تیرۆریستى داعش لە سوریاو عیراق و تاوتوو کردنى دوایین پێشهاتى ئەمنى لە عیراق و ناوچەکە، ڕۆژى سێشەممە ٢/٦/٢٠١٥ نزیکەى ٢٠ لە وڵاتانى ئەندام لە هاوپەیمانى نێودەوڵەتى دژ بە رێکخراوى تیرۆریستى داعش لە پاریسى پایتەختى فەڕەنسا کۆنگرەیەکى نێودەوڵەتى گرێدەدەن.

كۆنگرەی پاریس تایبەتە بەو وڵاتانەی لەگەڵ ڕێكخراوی تیرۆریستی داعش لەشەڕدان، دیارە هەرێمى کوردستان لەم رووەوە پشکى شێرى بەرکەوتووەو تاکە هێزە تاکو ئێستا توانیویەتى بە قارەمانیەتى هیزەکانى پێشمەرگە گەورەترین سەرکەوتن بەسەر تیرۆرستان بەدەست بێنێت و تیرۆریستان تووشى شکستى گەورە بکات و ناوچەکانیان لێ پاک بکاتەوە.

دواى کۆنگرەکانى پێشوو، چاوەڕوانى ئەوە بووین کە حکومەتى عیراقى فیدڕاڵ و کۆمەڵگاى نێودەوڵەتى ڕێز لە قوربانیدانی گەلی كوردستان و قارەمانێتیی پێشمەرگە بگرێ و بە بایەخەوە سەیرى هەوڵەکانى حکومەتى هەرێم بکات بۆنیشتەجێ کردنى زیاتر لە ١,٥ ملیۆن ئاوارەو پەنابەر. کەچى ئەمجارەش حکومەتى فیدڕاڵ بانگهێشتى نوێنەری هەرێمى كوردستانى بۆ ئەم کۆنگرەیە نەکرد و بە تەنها بەشداریان لە کۆنگرەى پاریس کرد. بە داخەوە دواى هەوڵەکانمان لەگەڵ وەزارەتى دەرەوەى فیدڕاڵ و نووسینگەى بەڕێز سەرۆک وەزیرانى عیراقى فیدراڵ ئەم بابەتە یەکلا نەبووەوە، ئەمە لە کاتێکدا کە كاریگەرترین هێز كە بەشێوەیەكی ڕاستەوخۆ و كردەیی ڕووبەڕووی تیرۆرستانى داعش وەستاوە هێزی پێشمەرگەی كوردستانە.

ئێمە نیگەرانى و ناڕەزایەتی خۆمان و خەڵكی كوردستان ئاراستەی حکومەتى عیراقى فیدراڵ دەکەین کە تاکلایەنە بەشدارى ئەم کۆنگرەیان کردو گوێیان بە داوەتنامەى هاوپەیمانى نێودەوڵەتى نەدا کە دەخوازن لەسەر ئاستى عیراق هەمووان بەشداربن، هەرێمى کوردستان وەک تاکە هەرێم لە عیراقى فیدراڵ بە مافى رەواى خۆى دەزانێت لەم جۆرە کۆنگرەو کۆبوونەوانە نوێنەری خۆی هەبێت و گوزارشت لە هەڵوێست و سیاسەتى هەرێمى کوردستان بکات کە ئەمەش مافێکى دەستووریەو ماددەى ١٠٥ ى دەستوورى هەمیشەیى عیراق ئاماژە بە هاوسەنگى نوێنەرایەتى کردن دەکات لە نێوەندە نێودەوڵەتیەکان.

فەرمانگەى پەیوەندیەکانى دەرەوەی حکومەتی هەرێمی کوردستان</sup>

^2/6/2015

<sup>پارێزگاری ورمێ لە وەڵامی رەخنەکان بە بەشداری پێنەکردنی کورد لە بەڕێوەبەریی ئەو پارێزگایەدا دەڵێت، لەسەر بنەمای روانگەی نەتەوەپەرستیی کورد و تورکەکان کار ناکەن.

قوربان عەلی سەعادەت، پارێزگاری ورمێ لەوەڵامی پرسیارێکدا لەبارەی کەڵک وەرنەگرتن لە بەڕێوەبەرانی کورد و ریفۆرمخواز لە بەڕێوەبردنی ئەو پارێزگایەدا بە ماڵپەڕەکانی ئێرانی راگەیاندووە" بەیەک چاو سەیری هەموو پێکهاتەکانی پارێزگای ورمێ دەکەین و لە بەڕێوەبەری ئەو پارێزگایەدا تێڕوانینی ئیتنیکیمان نییە".

دەشڵێت:"شیاوبوون تەنیا پێوەرمانە بۆ هەڵبژاردنی بەڕێوەبەرانی پارێزگاکە".

بەپێی ئامارە نافەرمییەکان زیاتر لە 60 لەسەدی دانیشتووانی پارێزگای ورمێ کوردن، بەڵام زۆربەی بەرپرسیارێتییەکان بە پێکهاتەی ئازەری زمانی ئەو پارێزگایە سپێردراوە.

بەگوتەی پارێزگاری ورمێ، هەڵبژاردن و دانانی بەرپرسان لەسەر بنەمای بەشی پێکهاتەکان نییە. ئاماژە بەوەشدەدات، کە لەماوەی رابردوودا بەڕێوەبەرایەتی گشتی وەرزش و لاوانی ئەو پارێزگایەیان بە کوردێکی پارێزگای سنە داوە.

بەپێی ئامارە نافەرمییەکان زیاتر لە 60 لەسەدی دانیشتووانی پارێزگای ورمێ کوردن، بەڵام زۆربەی بەرپرسیارێتییەکان بە پێکهاتەی ئازەر زمانی ئەو پارێزگایە سپێردراوە.</sup>

رووداۆ/ 

ناسر پیرۆتی

^1/6/2015

<sup>سەرۆکوەزیرانی تورکیا پاش ئاشکرابوونی ناردنی چەکو تەقەمەنی بۆ سووریا، گوتی: "ئەو بارهەڵگرانەی کە لە سنووری سووریا گیراون، هەڵگری یارمەتیی لۆجستی بوون بۆ تورکمانەکانی سووریا و پێوەندیی بە کەسەوە نییە کە بارەکەیان چیبووە.

ماڵپەڕی رۆژنامەی جمهووریەتی تورکیا، لەم دواییەدا ڤیدیۆیەکی بڵاوکردووەتەوە کە تێیدا هەزاران جۆری چەک و گوللە، لەژێر پاکەتی دەوا و دەرماندا شاردراونەتەوە.  ئەم گرتە ڤیدیۆییە رەوتی پشکنینی کۆمەڵێک بارهەڵگر لە سنووری نێوان تورکیا و سووریا پیشان دەدات. هێزە خۆجێییەکان کە ئاگایان لە بابەتەکە نەبووە، پاش پشکنین و گەڕان، کەسێکی سەربە رێکخراوەی هەواڵگری نیشتمانی تورکیا لەناو یەکێک لە بارهەڵگرەکاندا دەبیننەوە.

داودئوغڵو دەڵێت:" ئەو بارهەڵگرانە یارمەتیی لۆجستییان بۆ تورکمانەکان دەبرد، کە لە هێرشەکانی سوپای بەشار ئەسەد زیانیان پێگەیشتووە و ئەگەر تورکیا پشتگیرییان نەکات ٥٠٠ هەزار ئاوارەی دیکەش روو دەکەنە تورکیا.

سەرۆکوەزیرانی تورکیا گوتی: "بۆچی پاش ئەو هەموو ماوەیە، ئێستا ئەو ڤیدیۆیە بڵاودەکەنەوە؟ ئەوان دەیانەوێت بڵێن پارتی دەسەڵاتداری داد و گەشەپێدان، پشتیوانیی تیرۆریستان دەکات. ئەمە شتێکی ساختەیە و ئەوەی کە باری ئەو لۆرییانە چییە، پێوەندیی بە کەسەوە نییە.

ئەو هەروەها جەختی لەوەکردەوە کە ئەم بابەتە پرۆژەیەکی نهێنیی دەوڵەتییە و گوتی: "فەرمانی بە دەزگا پێوەندیدارەکان داوە بە وردی ئاگایان لە تورکمانەکانی سووریا بێت لە بەرامبەر دەوڵەتی ئەسەددا.

گوتیشی:" ئانقەرە لە ئاستی گۆڕانکارییەکانی ناوچەکەدا کەمتەرخەم نابێت و لە هەمبەر ئەو هەوڵانەشدا کە بە دژی تورکیا لە کۆمەڵگەی نێودەوڵەتیدا لەئارادان، بێدەنگی ناکات و کاردانەوەی دەبێت.

تورکیا هەمیشە ئەو بابەتەی رەتکردووەتەوە، کە بە شێوەی راستەوخۆ پشتیوانیی لە نەیارانی حکومەتی سووریا کردبێت.</sup>

^1/6/2015

<sup>بڕیارە سبەی کۆبوونەوەی وڵاتانی بەشداربوو لە هاوپەیمانێتی نێودەوڵەتی لە دژی داعش لە عێراق و سووریا لە پایتەختی فەرەنسا لە پاریس بەڕێوەبچێت. بۆ تاوتوێکردنی رەوشی عێراق وسووریا بە بەشداری حەیدەر عەبادی، سەرۆکوەزیرانی عێراق و نوێنەری 24 وڵات کە تورکیا و سعودییە و قەتەر وئیماراتیان تێدایە.

وەزارەتی دەرەوەی ئەمریکا رایگەیاند:"ئەنتۆنی پێڵنکن، بریکاری وەزیری دەرەوەی ئەمریکا لە بری جۆن کیری، وەزیری دەرەوەی ئەمریکا سەرۆکایەتی شاندی ویلایەتە یەکگرتووەکانی ئەمریکا دەکات لە کۆبوونەوەی بچووککراوی وەزیرانی هاوپەیمانێتی نێودەوڵەتی بۆ لەناوبردنی رێکخراوی (داعش) کە سبەی لە پاریس گرێدەدرێ".

وەزارەتی دەرەوەی ئەمریکا دەشڵێ "ئەندامانی هاوپەیمانێتی نێودەوڵەتی لەو کۆبوونەوەدا بە پێشکەوتنە بەدیهاتووەکان دەچنەوە لەبارەی هەوڵەکان بە بەشداری ویلایەتە یەکگرتووەکان لە چوارچێوەی هاوپەیمانێتی نێودەوڵەتی بۆ لەناوبردنی رێکخراوی (داعش) وجەختکردنەوە لە پاڵپشتی ویلایەتە یەکگرتووەکان بۆ حەیدەر عەبادی، سەرۆک وەزیران وهەوڵمەتی عێراق لە دژی (داعش)".

ئەمە لەکاتێکدایە دوا کۆبوونەوەی نوێنەرانی هاوپەیمانێتی نێودەوڵەتی دژی داعش لە لە مانگی ئەیلولی ساڵی 2014 لە پاریس بە بەشداری نوێنەری 30 وڵات ورێکخراو بەڕێوەچوو، لەودەمەی ژمارەی وڵاتانی بەشدار لە هاوپەیمانێتی نێودەوڵەتی دژی داعش لە 60 وڵات زیاترن.</sup>

^1/6/2015

<sup>سەڵاحەدین دەمیرتاش هاوسەرۆکی پارتی دیموکراسی گەلان (HDP) هەموو ئەو قسانەی رەتکردەوە کە ئەگەر نەیانتوانی بچنە پەرلەمان کاردانەوەی توندیان دەبێت. دەمیرتاش گوتی" لە سەدا ١٠ نەبڕین وەک پارتێکی هەموو تورکیا دەمێنینەوە و پابەندی بەڵێنەکانمان دەبین".

لە دیدارێکی رۆژنامەوانی لەگەڵ رۆژنامەی حورییەتی تورکی دەمیرتاش وەڵامی چەند پرسێکی دایەوەو لە بارەی ئەوەی گەر نەیانتوانی رێژەی لە سەدا 10 ببڕن ، دەمیرتاش گوتی" ئێمە وەک پارتێکی هاوبەشی نێوان تورک و کورد دەمێنینەوە و پێمانوایە لەم رێگەوە کێشەکان چارەسەردەبن".

دەمیرتاش خۆشحاڵی خۆشی دەربڕی بەوەی ئاڵای تورکیا لەناو جەماوەرەکەیدا دەبینێ و ئەوە بە نیشانەی ئاسایبوونەوە دەبینێ، ئاماژەشی بەوەکرد" ئەوان لە پرۆسەیەکدان بۆ ئەوەی ببنە پارتی هەموو تورکیا نەک ئیتنیكێکی دیاریکراو و بەردەوام دەبن تا دەگەنە دەسەڵات".

لەبارەی کاندیدیکردنی کەسێکی هاورەگەزبازەوە، هاوسەرۆکی پارتی دیموکراسی گەلان ئەوە بەئاسایی بینی و بەبەشێکی گرینگی کۆمەڵگەی دانان، ئەو دەڵێت” ئەگەر تەنیا هاورەگەزبازەکان پارتێکی سیاسی پێکبهێنن لە سەدا 10 تێدەپەڕێنن".

دەمیرتاش رەخنەی تووندی لە ئەردۆغانیش گرت بەوەی کە کۆنتڕۆڵی هەموو شتێکی کردوە و داوای لە خەڵکی تورکیا کرد بەشداری هەڵبژاردن بکەن چونکە پێیوایە"تەنیا بە دەنگدان ئەردۆغان دەوەستێنرێت".

رۆژی 7-6-2015، دانیشووانی تورکیا بە هاونیشتمانییانی باکووری کوردستانەوە دەچنە سەر سندوقەکانی دەنگدان بۆ هەڵبژاردنی پەرلەمانی بۆ خولی 25 ەم لەو وڵاتە.</sup>

^1/6/2015

<sup>وادەی یەکەم هەنگاوی پێکهێنانی سێ لیوای پێشمەرگەی خۆبەخشی وەزارەتی پێشمەرگە، کە بڕیارە ئەمریکا هەم مەشقیان پێبکات هەم پڕچەکیان بکات لە نزیکبوونەوەدایە ، بڕیارە چەند رۆژێکی دیکە پرۆسەی تۆمارکردنی ناوی پێشمەرگە خۆبەخشەکان دەستپێبکات بۆ نێو ئەو لیوایانە.

مستەفا سەید قادر، وەزیری پێشمەرگە بە تۆڕی میدیایی رووداوی راگەیاند: "خۆمان ئامادە کردووەو پلانمان هەیە بۆئەوەی ئەم سێ لیوایە بکەینە سێ لیوای رێکخراوی نیشتمانی ، هەموو خەڵکی ئاسایی ئەم نیشتمانە دەتوانێت لەم لیوایانە ببێتە پێشمەرگە، تەنیا مەرجی پێشمەرگایەتی تێدا بێت کە لە پاشاندا لە راگەیێندراوێکدا بڵاویدەکەینەوە ، لە رێگەی بنکەی خۆبەخشی وەزارەتی پێشمەرگەوە وەردەگیرێن و مەشقیان پێدەکرێت و رێکدەخرێت".

بڕیارە ژمارەی پێشمەرگەکانی ئەو سێ لیوایە 6600 پێشمەرگە بێت، بەجۆرێک هەر لیوایەک لە 2200 پێشمەرگە پێکدێت، ئەو کەسەی وەک پێشمەرگەی خۆبەخش وەردەگیرێت دەبێت تەمەنی لەنێوان 18 بۆ 30 ساڵ بێت.

گوتەبێژو بەرپرسی پەیوەندییە دیپلۆماسییەکانی ئەمریکا لە هەولێر بە رووداوی گوت، لە چوارچێوەی هاوپەیمانێتی نێودەوڵەتیدا بۆ رووبەڕووبوونەوەی چەکدارانی داعش، ویلایەتە یەکگرتووەکانی ئەمریکا وێڕای ئەوەی تاوەکوئێستا بە بەهای زیاتر لە 180 ملیۆن دۆلار هاوکاریی کەلوپەل و تەقەمەنی بۆ وەزارەتی پێشمەرگە ناردووە، هاوکات 18 ملیۆن و 500 هەزار دۆلاری بۆ کرێی گواستنەوەی کۆمەکی هاوپەیمانان خەرجکردووەو هەمو کەلوپەلەکانیش بەهەماهەنگی حکومەتی عێراق گواستراونەتەوە. 

لە بەردەوامیی هاوکارییە سەربازییەکان بۆ هێزی پیشمەرگە، ئەمریکا دەیەوێت سەرپەرشتی ئەو سێ لیوایەی وەزارەتی پیشمەرگە بکات لە رووی مەشق و پڕچەککردنیانەوە، کە بڕیارە لە داهاتوویەکی نزیکدا دابمەزرێت. فەرماندەی ئەو سێ لیوایەش وەزارەتی پێشمەرگە دیاریدەکات نەک ئەمریکا.</sup> 

^31/5/2015