<sup>لە ناوچەی شرناخ لە باکووری کوردستان، لایەنگرانی پارتی دیموکراتی گەلان HDP و لایەنگرانی هوداپار، کە هەردووکیان دوو پارتی کوردین، دەبێتە شەڕیان و دوو کەس بەهۆی پێکدادانیانەوە کوژراون.

7ی حوزەیران هەڵبژاردنی پەرلەمانی لە تورکیا بەڕێوەدەچێت و بانگەشەی هەڵبژاردن لەنێوان ئەو لایەنانەی بەشدارن لە هەڵبژاردنەکەو لایەنگرانیان تادێت تووندتر دەبێت.</sup>

^29/5/2015

<sup>یەکەمین ژنە کوردی ئێزدی خۆی بۆ ئەندامی پەرلەمانی تورکیا بەربژێر دەکات و بەناوی کوردانی ئێزدییەوە بەشداری دەکات. ئەو لەسەر لیستی پارتی دیموکراتی گەلان  HDP خۆی هەڵدەبژێرێت.

لەناو HDPدا نوێنەرایەتی کوردانی  ئێزدی دەکات، کوردانی ئێزدی پێشتر تەنها ئەنجوومەنێکی بچووک بوون، بەڵام لەدوای ساڵی ٢٠١٤ و ئاوارەبوونی کوردانی ئێزدی لە باشووری کوردستان و هێرشی داعش بۆسەریان وایکرد ناوی ئێزدی ببێتە ناوێکی دیار لە جیهاندا و بناسرێت ئەو دۆخە لە تورکیاش کاریگەری خۆی هەیە و ئەنجوومەنەکەی ئەوانی فراوانتر کردووە. 

یەکێکی دیکە لەو ئەنجوومەنانەی نوێنەرایەتی کەمەنەتەوەییەکانی تورکیا دەکەن ئەرمەنییەکانن، لەم هەڵبژاردنە یەکەمین ژنە ئەرمەنی خۆی بۆ پەرلەمان کاندید کردووە. ئەویش هاوشێوەی فەلەکناس نایەوێت تەنها کارەکانی لەچوارچێوەی نوێنەرایەتی ئەرمەنییەکاندا سنوورداربێت.

دۆغان  لەسەر لیستی پارتی گەلی کۆماری تورکیا CHP خۆی کاندید کردووە کە بە ئۆپۆزیسیۆنی سەرەکی تورکیا دادەنرێت.

چاودێرانی سیاسی دەڵێن کاری نوێنەرانی کەمە نەتەوەیی و ئاینییەکان لە تورکیا ئاسان نابێت، چونکە هەندێک جار لەوانەیە سیستەمی سیاسی ریگربێت لە جێبەجێکردنی ئەجێندای نوێنەرەکانیان.

ئەرمەنییەکان تەنها لەناو لیستی CHPدا نین، بەڵکو لەسەر لیستی پارتە کوردییەکە واتە HDP سێ نوێنەرایان هەیە و لە لیستی پارتی دەسەڵاتدار  پارتی داد و گەشەپێدان AKP یەک نوێنەرانیان هەیە. جگە لە ئەرمەنییەکانیش عەلەوی و سریانی بە هەمانشێوە لەنێو لیستە جیاوازەکاندا نوێنەری خۆیان هەیە.</sup> 

^29/5/2015

<sup>لەكاتی ئەنجامدانی نوێژی هەینی، تەقینەوەیەكی خۆكوژی لە مزگەوتێكی سعودیە روویدا و ژمارەیەك قوربانی لێكەوتەوە. رێکخراوی داعشیش بەرپرسیارێتی تەقینەوەكەی لەئەستۆگرت.

سەرچاوەکانی هەواڵی سعودی رایانگەیاندووە، تەقینەوەکە لە مزگەوتی ئیمام حوسێن لە شاری دەمام بووە، خۆکوژەکەش بە پۆشاکی ژنانەوە چووەتە نێو مزگەوتەکە.

سەرچاوەکان ئاماژە بەوەش دەکەن، کە بەپێی ئامارە سەرەتاییەکان 4 کوژراو و 10 بریندار هەن، خۆكوژەكەش لەنێو كوژراوەكاندا هەیە.

هاوكات رێکخراوی داعش لە تۆڕی کۆمەڵایەتی تویتەر، بەرپرسیاریێتی خۆی لە تەقینەوەکە راگەیاند.</sup>

^29/5/2015

<sup>دوای ئەوەی ژماره‌یه‌ك له‌ پێشمه‌رگه‌ دێرینه‌كانی یه‌كێتیی نیشتمانیی كوردستان له‌به‌رده‌م باره‌گای مه‌كته‌بی سیاسی یه‌كێتی كۆبوونه‌وه ‌و خوازیاری چاره‌سه‌كردنی كێشه ‌ناوخۆییه‌كانی یه‌كێتی و کۆبوونەوەی مەکتەبی سیاسی حیزبەکەیان بوون، لێپرسراوی ده‌سته‌ی كارگێڕی یه‌كێتی نیشتمانیی كوردستان رایگه‌یاند: "دوای كۆبوونه‌وه‌مان له‌گه‌ڵ هه‌ڤاڵ مام جه‌لال مه‌كته‌بی سیاسی و سه‌ركردایه‌تی كۆده‌بێته‌وه"‌.

بە پێی هەواڵی میدیاکانی یەکێتی ژماره‌یه‌ك له‌ پێشمه‌رگه‌ دێرینه‌كانی یه‌كێتیی نیشتمانیی كوردستان له‌به‌رده‌م باره‌گای مه‌كته‌بی سیاسی یه‌كێتی كۆبوونه‌وه‌ و داوای چاره‌سه‌كردنی كێشه‌ناوخۆییه‌كانی یه‌كێتی بوون و داوای کۆبوونەوەی مەکتەبی سیاسیی ئەو حیزبەیان دەکرد.

مه‌لا به‌ختیار لێپرسراوی ده‌سته‌ی كارگێڕی یه‌كێتی نیشتمانی كوردستان رایگه‌یاند:" له‌گه‌ڵ گه‌یشتنی نامه‌كه‌تان ده‌سته‌ی كارگێڕی مه‌كته‌بی سیاسی كۆبووه‌و تاوتوێی نامه‌كه‌ كراو بڕیاریش درا رۆژی 31 ی مانگ سه‌ركردایه‌تی یه‌كێتی له‌گه‌ڵ مام جه‌لال كۆببێته‌وه‌ و دواتر بڕیار له‌سه‌ر كۆبوونه‌وه‌ی مه‌كته‌بی سیاسی و سه‌ركردایه‌تی ده‌درێت بۆ ئه‌وه‌ی یه‌كێتی بگه‌ڕێته‌وه‌ بۆ سه‌ر رێچكه‌كه‌ی خۆی".</sup>

^{رووداو - سلێمانی}

^{٢٨/٥/٢٠١٥}

<sup>لە راپۆرتێکیدا نەتەوە یەکگرتووەکان ئاشکرایکرد، کە ژمارەی چەکدارە توندڕەوە بیانییەکانی نێو گرووپی داعش لە چەند مانگی رابردوودا بەشێوەیەکی بەرچاو بەرزبووەتەوە.

راپۆرتەکەی نەتەوە یەکگرتووەکان کە لە ئەنجوومەنی ئاسایشی سەر بەو رێکخراوە گفتوگۆی لەسەر دەکرێت، دەریخستووە، ئێستا نزیکەی ٣٠ هەزار چەکداری بیانی لەنێو ریزەکانی دەعشدان.
 
بەگوێرەی ئەو راپۆرتە، ئەو ژمارەیەی چەکدارانی بیانی نێو ریزەکانی داعش لە ١٠٠ وڵاتی جیاوازی جیهانەوە روویان کردووەتە سووریا و عێراق.

چاوەڕێدەکرێت ئەنجوومەنی ئاسایش رۆژی هەینی ٢٩ی ئایار لە دانیشتنی خۆیدا لێکۆڵینەوەی تەواو لەو راپۆرتەدا بکات و گفتوگۆی لەبارەوە بکرێت.

بەگوێرەی ئەو راپۆرتە چەکدارە بیانییەکانی نێو داعش، تەنها لە سووریا و عێراق نین، بەڵکو ژمارەیەکیشیان روویان کردووەتە ئەفغناستان و لیبیا. 

راپۆرتەکە ئاماژە بەوەشدەکات لە دوای نیوەی یەکەمی ساڵی رابردوەوە چوونی چەکداری بیانی بۆ نێو داعش بەرێژەی لەسەدا ٧٠ زیادیکردووە.</sup>

^28/5/2015

<sup>سەرۆکی بەرەی نوسرە لە سووریا دەڵێت گرووپەکەی چڕبووەتەوە لەسەر گرتنی دیمەشق و روخاندنی حکومەتی بەشار ئەسەد.

ئەبوو محەممەد جەولانی، سەرۆکی بەرەی نوسرە لە هەڤپەیڤینێکدا لەگەڵ کەناڵی جەزیرە دەڵێت :" ئێمە هەوڵی خۆمان لەسەر دیمەشق و روخاندنی حکومەتەکەی چڕ کردووە و دڵنیاتان دەکەم رووخاندنی ئەسەد زۆر ناخایەنێت".

لە هەڤپەیڤینەکەدا سەرۆکی بەرەی نوسرە پشتی لە کامێرایە و روخساری پێشان نادرێت ، دیاریش نییە کە هەڤپەیڤینەکە لە کوێ سازدراوە.

جەولانی هەروەها بەرامبەر عەلەوییەکانی سووریا کە بنەماڵەی ئەسەدیش بەشێکن لەوان، دەڵێت:" ئەگەر دەیانەوێ لە ئەماندا بن شەڕ نەکەن و روو بکەنە ئیسلام، ئەو کات برای ئێمە دەبن".</sup>

^28/5/2015

<sup>پیاوێکی سووری لە خەفەتی خیانەتی ژنەکەی بە ڕووتی هاتە سەرشەقام و دواتر وێنەی گیراو و خەڵکی لە تۆڕە کۆمەڵایەتییەکان بڵاویان کردەوە.

لە کامپێکی ئاوارە سورییەکان لە وڵاتی نەرویج گەنجێکی سووری لە نزیک خێمەکەی خۆی لە کامپی ئاوارەکان بەڕووتی هاتە سەر شەقام و مانیگرت.

ئەو گەنجە باسی ئەوەی کردووە کە پێش ئەوەی خۆی بچێتە نەرویج  ژنەکەیی و منداڵەکانی ناردوون بۆ ئەوەی سەرەتا ئەوان لە دۆخی ناڕەحەتی سوریا ڕزگاریان بێت، بەڵام دواتر کە خۆی گەیشتۆتە نەرویج بە تێپەڕبوونی کات بۆی دەرکەوتووە کە ژنەکەی لەگەڵ پیاوێکی دیکە پەیوەندی هەیە.

پیاوە سورییەکە دەڵێت " لەدوای ئەوەی کە بەڕووداوەکەم زانیوە داوام لە ژنەکەم کردووە کە مناڵەکانیش بۆ خۆی ببات و لای من نەبن، بەڵام ئەو بەتەنها ڕٶیشتووە و منداڵەکانیشی بەسەر مندا بەجێهێشتوون".</sup>

^28/5/2015

ئەم وێنەیش بریتییە لە یەکێک لە رێکلامەکانی ئەمساڵی ئاک پارتی

<sup>هەندێک کەس باوەڕی وایە کە پارتی دادوگەشەپێدان AKP ئیسلامییە یان ئیخوانە، کە لە راستیدا بەمجۆرە نییە و ئیسلامییەکانی کوردستانیش زۆر هەڵەن کە وابزانن نزیکن لەوانەوە. لە پەیڕەوی ناوخۆی ئەو پارتەدا هاتووە:" ئێمە پارتێکی سیاسی ناوەندی مرۆڤدۆستین کە بنەما سەرەکییەکانی حیزبەکەمان بریتییە لە عەلمانیەت و دیموکراسی و ئازادی و هەلی یەکسان و دادی کۆمەڵایەتی بۆ تورکیا". کاتێک ئەردۆغان لە دوای بەهاری عەرەبی سەردانی میسری کرد داوایکرد کە محەممەد مورسی دەوڵەتێکی عەلمانی دروست بکات و دامەزراوەکان نەکاتە شوێنی ئیسلامی سیاسی، بەڵام هەر ئەو رۆژە بە فەرمی ئیخوان وەڵامی دایەوە، کە ئەردۆغان بۆی نییە دەستوەربداتە کاروباری میسر.

ئەردۆغان خۆی زۆر جار باسی ئەوەی کردووە کە ئەو هەرگیز لەگەڵ تێکەڵکردنی دین و دەوڵەت نییە، بەڵکو باوەڕی وایە کە دەبێ سیاسییەکان عەلمانی بن بۆ دەوڵەت و دینداریش بن بۆ رەوشتی خۆیان.

ئەردۆغان وەک سەرۆک باوەش دەکات بە ژنە هونەرمەندەکانی تورکیا و گوێ لە گۆرانی دڵداریش دەگرێ و هولیا ئاڤشار و ئیبراهیم تاتڵیسێس یەکێکن لە دۆستە نزیکەکانی و دانیشتنیش بەجێناهێڵێ کە شەراب و خواردنەوەی تێدا بێت.

سەرکردەکانی ئاکپارتی دوو بەشن، وەک کۆمەڵگەی تورکیا بەشێکیان دیندارن و بەشێكیان پابەندبوونی دینییان نییە، بەڵام موحافیزەکارن کە زۆرینەی تورکیا پێکدێنن. هەروەها بەپێی راپرسییەکان لە سەدا ١٠ی دەنگدەری ئەم پارتە ئەو گەنجانەن کە لەچک ناکەن و مەی دەخۆنەوە.

دروشمی پارتەکە بریتییە لە: خۆشگوزەرانی - ئاشتی- سەلامەتی و تەندروستتییەکی باش. ئاک پارتی باش دەزانێ کە ئەوکاتە کۆتایی دێت، کە سەلامەتی و ئازادیی یانە شەوانەکانی وەک مزگەوتەکانی ئیستەنبوڵ نەپاراست.</sup>

^27/5/2015

<sup>بنیامین ناتانیاهۆ ، سەرۆکوەزیرانی ئیسرائیل داوایەکەی سەبارەت بە دەستپێکردنەوەی گفتوگۆی ئاشتی نێوان فەلەستین و ئیسرائیل پێشکەش بە شاندی دانوستاندنکاری فەلەستینی کردووە، بەڵام ئاماژەی بەوە کردووە کە چاوەڕێدەکات دانوستاندنەکان لەگەڵ بەردەوامیی مانەوەی ئیسرائیلییەکان لەو ناوچانە دەستپێبکاتەوە، کە فەلەستینییەکان بە خاکی داگیرکراوی دەزانن.

رۆژنامەکانی ئیسرائیل ئاشکرایان کردووە ناتانیاهۆ بۆ ئەو مەبەستە ئاگاداری فێدریکا مۆگێرینی بەرپرسی کاروباری دەرەوەی یەکێتی ئەوروپای کردووەتەوە. بەگوێرەی زانیارییەکانی میدیا نێوخۆییەکانی ئیسرائیل، ناتانیاهۆ بە مۆگێرینی راگەیاندووە کە ئیسرائیل ئامادەی دەستپێکردنەوەی دانوستاندنەکانە ، بەڵام هیوای وایە لەسەر ئەو سنوورانە رێکبکەون کە ئێستا ئیسرائیلییەکانی تێدا دەژین و پرۆژە نیشتەجێیەکانی ئیسرائیل بمێننەوە.

ئیسرائیل لە جەنگی ١٩٦٧دا کەرتی رۆژئاوای کۆنترۆڵکرد و فەلەستینییەکانیش دەیانەوێت ئەو ناوچەیە وەربگرنەوە و بیکەنە بەشێک لە دەوڵەتی داهاتووی خۆیان.

وەزیرانی کابینەی نوێی حکومەتی ئیسرائیل لە کۆبوونەوەی هەفتانەی خۆیاندا قسەی خۆیان لەسەر ئەو پرسە کرد و رایانگەیاند پشتیوانی لەو هەوڵە نوێیەی حکومەتی ئیسرائیل دەکەن.

بەرپرسانی ئیسرائیلی ئەوەیان دووپاتکردووەتەوە کە پرسی پرۆژە نیشتەجێیەکانی ئیسرائیل لەسەر خاکی فەلەستین بەشێک دەبێت لەهەر رێککەوتنێک لە داهاتوودا. بەڵام شاندی دانوستاندنکاری فەلەستینی لەبەرامبەردا داوا دەکەن هێڵە سنوورییەکانی پێش ساڵی ١٩٦٧ جیابکرێنەوە لەجیاتی ئەوەی ناتانیاهۆ بەردەوام بێت لەسەر پرۆژە نیشتەجێیەکان، زیاتر کار لەسەر چارەسەری دوو دەوڵەتی بکات.

پێشنیازەکەی ئیسرائیل ناتوانێت فەلەستینییەکان رازیبکات و بیناهێنێتە سەر مێزی دانوستان، چونکە ئەوەی ناتایاهۆ داوای دەکات بەردەوامیدانە بە پرۆژە نیشتەجێیەکانی ئیسرائیل.</sup>

^27/5/2015

<sup>لە باکووری ئەفغانستان بزووتنەوەی تاڵیبان، چەکدارانی داعش، بزوتنەوەی ئیسلامی ئۆزبەکستان و رێکخراوی قاعیدە هاوپەیمانێیتییەکیان دژ بە حکومەت و هێزەکانی ئەفغانستان  پێکهێناوە. 

ئامانج لە هاوپەیمانێتییەکە کۆنترۆڵکردنی شارەکانی باکووری ئەفغانستانە هاوشێوەی عێراق و سووریا کە پێگەیەکی جوگرافی بەهێز دروستبکەن.

پارێزگاری کوندوز رایگەیاند، لە چەند رۆژی رابردوودا هێرشکی داعش و تاڵیبان بۆ کۆنترۆڵکردنی شارەکە شکستپێهێنراوە.

بەهۆی هێرشی تووندی هێزەکانی سوپای پاکستان لە ناوچەکانی وەزیرستان و ناوچەی خێڵەکان، چەکدارە تووندڕەوەکان بەرەو باکووری ئەفغانستان هەڵدێن، ئەمەش کاریگەری  ئەمنی لێکەوتووەتەوە و هەڕەشەکانی داعشی لە ئەفغانستان گەورەتر کردووە. 

هاوشێوەی عێراق حکومەتی ئەفغانستان بۆ بەرگریکردن لە شارەکان پەنا بۆ میلیشیاکان دەبات، بەڵام لە عێراق پێیدەگوترێت حەشدی شەعبی و لە ئەفغانستان بە موجاهدین بانگدەکرێن.

بەگوتەی بەرپرسانی حکومەت، ئەفغانستان چەکداری تاجیکی و ئۆزبەکی و پاکستانی لەنێو ریزەکانی تاڵیبان و داعشدا هەن.
 
حکومەتی ئەفغانستان هۆشداری دەدات لە بوونی داعش لە ئەفغانستان، هەروەها هاوپەیمانییەتی نێوان تاڵیبان و قاعیدە و داعش و بزووتنەوەی ئیسلامی ئۆزبەکستان بە هەڕەشەیەکی گەورە دادەنێت، بەڵام دەزگای هەواڵگریی ئەمریکا بەوردی چاودێریی رەوشی ئەفغانستان دەکات. چەند جارێک بەرپرسانی ئەمریکا رایانگەیاندووە کە ئەفغانستان بۆ ئاسایشی ئەمریکا گرنگە.

ئەوەی کە ئەفغانییەکان دڵخۆش دەکات، بوونی رێککەوتننامەی ئەمنی نێوان کابول و واشنتنە، هەروەها بوونی سێزدە هەزار سەربازی هاوپەیمانانە لە کابول.</sup>

^27/5/2015