<sup>بڕیارە ئەمڕۆ هەینی 22ی ئایاری 2015، لە چوارچێوەی كۆڕبەندی ئابووریی جیهانیی دەریای مردوو لە ئوردن، مەسعود بارزانی سەرۆکی هەرێمی کوردستان گوتارێک پێشكەش بكات.

خوێندنەوەی گوتارەکەی بارزانی، بە گوێرەی کارنامەی کۆڕبەندەکە کاژێر 11:45 خولەک دەبێت و لەگەڵ ئەیاد عەلاوی، جێگری سەرۆککۆماری عێراق بە هاوبەشی دەبێت، کە تێیدا باس لە ئاشتی و سەقامگیری و بەرەوپێشچوونی رۆژهەڵاتی ناوەڕاست دەکەن.

کۆڕبەندەكە تا 23 ی ئەم مانگە لە ناوەندی کۆبوونەوکانی شا حوسێن لە کەناری دەریای مردوو بەردەوامدەبێت، چاوەڕواندەکرێت سەرکردەکانی وەک عەبدول فەتاح سیسی سەرۆکی میسر ، شا عەبدوڵڵای پاشای ئوردن و مەحموود عەباسی سەرۆکی فەڵەستین لە کۆڕبەندەکەدا بەشداربن. 

رۆژی پێنجشەممە 21ـی  ئایار، مەسعود بارزانی، سەرۆكی هەرێمی كوردستان لەگەڵ شاندێكی یاوەری لەسەر بانگهێشتی فەرمیی شا عەبدوڵڵای شای ئوردن گەیشتە عەممان بە مەبەستی بەشداریکردن لە كۆڕبەندی ئابووریی جیهانیی دەریای مردوو. 

هەریەك لە مەسروور بارزانی، راوێژکاری ئەنجوومەنی ئاسایشی ھەرێمی کوردستان و د.فوئاد حوسێن، سەرۆکی دیوانی سەرۆکایەتیی ھەرێمی کوردستان یاوەری بارزانی دەكەن. دوێنێش بە ئاڵای كوردستان پێشوازییان لێكراو لەگەڵ شا عەبدوڵڵاش كۆبوونەوە.</sup>

^22/5/2015

^{رەجەب تەیب ئەردۆغان، سەرۆککۆماری تورکیا کەمێک پێش ئێستا لە هەڤپەیڤینێکدا لەگەڵ کەناڵی ئا تیڤی تورکیا لەبارەی ئەگەری دروستبوونی دەوڵەتی کوردی لە عێراق ئاماژەی بەوەکرد کە دژی ناوەستێتەوە و جیابوونەوەی کورد کێشەیەکی ناوخۆی عێراقە، ئەمەش یەکەمجارە سەرۆکی تورکیا بەمشێوە باسی دەوڵەتی کوردی بکات.}

^22/5/2015

<sup>حەیدەر عەبادی سەرۆکوەزیرانی عێراق، ئێوارەی رۆژی چوارشەممە عێراقی جێهێشت و بە سەردانێکی فەرمی بەرەو مۆسکۆ بەڕێکەوت، بڕیاریشە دۆسیە ئەمنیی و سەربازییەکان لەگەڵ دەسەڵاتدارانی ئەو وڵاتە تاوتوێ بکات.

بەپێی راگەیێندراوێكی نووسینگەی سەرۆکوەزیرانی عێراق، بڕیارە عەبادی لە سەردانەکەیدا سبەی پێنجشەممە 21ی ئایاری 2015، چاوی بە ڤلادیمێر پووتینی سەرۆکی رووسیا بکەوێت و، سەبارەت بە هاوکاریی سەربازی و ئەمنی نێوان رووسیا و عێراق و بەرەنگاربوونەوەی داعش گفتوگۆبکەن، سەرەڕای بەهێزکردنی پەیوەندی نێوانیان لە بواری ئابووری و وزە و وەبەرهێنان.

راگەیێندراوەکە ئاماژە بەوەش دەکات، هەریەک لە وەزیرانی ناوخۆ، کارەبا، گواستنەوە، رۆشنبیری و چەندین راوێژکاری مەدەنی و سەربازی یاوەری سەرۆکوەزیران دەکەن، سەردانەکەش یەک رۆژ دەخایێنێت.

هاوکات سەعد حەدیسی، گوتەبێژی نووسینگەی راگەیاندنی سەرۆکوەزیران روونیکردەوە، ئامانجی سەردانەکەی عەبادی بۆ مۆسکۆ، بریتییە لە تاوتوێکردنی دۆسیەیی ئەمنی و پڕچەککردنی ھێزە ئەمنییەکانی عێراق و دابینکردنی پێداویستییە ھەنووکەییەکانی سوپا بۆ بەرەنگاربوونەوەی داعش.

ئەوەشی خستەڕوو، کە ئاڵوگۆڕکردنی زانیاری ھەواڵگری سەبارەت بە جموجوڵی تیرۆریستان تەوەرێکی دیکەی گفتوگۆکان دەبێت.

گوتەبێژی نووسینگەی عەبادی ئاماژەی بەوەشدا، پرسی پتەوکردنی پەیوەندییەکانی نێوان ھەردوو وڵات و بانگھێشتکردنی کۆمپانیا رووسییەکان بۆ وەبەرھێنان لە عێراق، چەند تەوەرێکی دیکەی گفتوگۆکانی عەبادی و لێپرسراوە روسییەکان دەبن.</sup>

^21/5/2015

<sup>باڵیۆزی تورکیا لە بەغدا داوا لە وەزیری دەرەوە دەكات رەزامەندی پیشانبدات لەبارەی کردنەوەی کونسوڵخانەی گشتیی تورکیا لە هەردوو شاری کەرکووک و بەسرە.

رۆژی چوارشەممە 20 ی ئایاری 2015، ئیبراهیم جەعفەری، وەزیری دەرەوەی عێراق لە کۆبوونەوەیەکدا لەگەڵ فارووق قەیماغچی، باڵیۆزی تورکیا لە عێراق رایگەیاند:" عێراق پێویستی بە هاوکاری وڵاتانی جیهان و دراوسێ هەیە لە رووبەڕووبوونەوەی شەڕ لەگەڵ چەکدارانی داعشدا، هاوکات پەیوەندییەکانی عێراق و تورکیا لەو بارەیەوە گفتوگۆی لەسەرکرا".

نووسینگەی راگەیاندنی وەزیری دەرەوەی عێراق لە رێگەی بەیاننامەیەکی رۆژنامەڤانیدا رایگەیاندووە، لە کۆبوونەوەی نێوان وەزیری دەرەوەی عێراق و باڵیۆزی تورکیا، پاراستنی بەرژەوەندییەکانی نێوان هەردوو وڵات و بارودۆخی ئەمنی عێراق تەوەری سەرەکی کۆبوونەوەکە بوونە، هاوکات وەزیری دەرەوەی عێراق ئاماژەی بەوە کردووە، ئێستای عێراق پێویست بەوەدەکات وڵاتانی جیهان و دراوسێ هاوکاریی سەربازی بکەن بۆئەوەی سوپاو هێزە ئەمنییەکان بتوانن لە شەڕی دژ بە داعشدا سەربکەون.

بەگوێرەی بەیاننامەکە، باڵیۆزی تورکیا داوای لە وەزیری دەرەوە کردووە کە رەزامەندی پیشان بدەن بۆئەوەی تورکیا کونسوڵخانەی گشتی  وڵاتەکەی لە هەردوو پارێزگای کەرکووک و بەسرە بکاتەوە.</sup>

^21/5/2015

<sup>سەرچاوەیەکی ئەمنی لەواشنتن ئاشکرایکرد، ئەمریکا تیمێکی لێکۆڵینەوەی رەوانەی عێراق کردووە، بۆئەوەی لێکۆڵینەوە لە هاوژینەکەی ئەبو سەیاف، گەورە بەرپرسی رێکخراوی داعش بکات کە چەند رۆژێک لەمەوبەر لە سووریا، لەلایەن هێزێکی نهێنی سەربازی ئەمریکا کوژرا و هاوژینەكەی دەستگیركرا. 

سەرچاوە ئەمنییەكە بڵاویكردووەتەوە، ئەو تیمەی ئەمریکا بۆ لێکۆڵینەوە رەوانەی عێراقی کردووە، لە نوێنەرانی وەزارەتی بەرگری (پنتاگۆن) و سی ئای ئەی و پۆلیسی فیدراڵی ئەمریكا پێكهاتووە، بۆئەوەی لێكۆڵینەوە لە هاوژینەكەی ئەبو سەیاف، گەورە بەرپرسی پێشووی داعش لە سووریا بكەن.

ئاشكراشیكردووە،  مەبەستی سەرەكی تیمە ئەمریكییەكە وەرگرتنی زانیارییە  لەبارەی  چۆنییەتی دەستگیركردنی بارمتە بیانییەكان لەلایەن داعشەوە، بۆئەوەی  هاوژینەكەی ئەبو سەیاف زانیاری نوێ و تاکتیکی داعش بداتە تیمەکەی ئەمریکا.

چەند رۆژ لە مەوبەر هێزێكی سەربازی ئەمریكا چالاكییەكی نهێنی لە ناو خاكی سووریا ئەنجامدا، بەهۆیەوە ئەبو سەیاف، بەرپرسی كاروباری نەوت و دارایی داعش كوژرا و هاوژینەكەشی دەستگیركرا.</sup>

^21/5/2015

video: 

http://rudaw.net/sorani/culture/190520158

<sup>ئەوان زیاتر لە 11 هەزار کێلۆمەتریان بڕیوە بۆئەوەی لەگەڵ هێزی پێشمەرگە پێشڕەوییەکانی داعش بووەستێنن ، وەک خۆیان دەیانگوت لە ئەمریکاوە هاتوون بۆئەوەی شەقێکی بەهێز لە داعش بدەن.

سەربازە خۆبەخشەکانی ئەمریکا لە سەرشانی خۆیان نووسیوە "شانبەشانی پێشمەرگە شەڕی گرووپێک دەکەین کە دەیانەوێ دنیا تاریک بکەن".

کێورت شەڕکەرێکی ئەمریکییە، ماوەی سێ مانگە لە واشنتنەوە هاتووەتە کەرکووک، چەکێکی کۆنی پێشمەرگەی لەدەستدایە، ئەو دەڵێ دەزانم ئەم چەکە پێشکەوتوو نییە، بەڵام چونکە پێشمەرگەکان ئیرادەیان هەیە، سەردەکەون.

ئێروین شەڕڤانێکی دیکەی ئەمریکایە لەگەڵ 19 سەربازی دیکەی ئەمریکی لە سەنگەرەکانی شەڕدا لەگەڵ پێشمەرگەدان، شارەزایی باشی هەیە لە شەڕی دژە تیرۆر، ماوەی پێنج ساڵ لەگەڵ هێزە ئەمریکییەکان بووەو ساڵێکیش لە نێوەڕاستی عێراق شەڕی کردووە، ئێستا وەکو خۆبەخشێک لەگەڵ تفەنگەکەی لە هێڵی پێشەوەی شەڕدا لە میحوەری داقووق شەڕدەکات و کوردستان دەپارێزن.

ئەو دەڵێ بۆ ماوەی شەش مانگ هاتبووم و بگەڕێمەوە، بەڵام کە داعشم بینی ئیدی بڕیارمداوە تاوەکو داعش لەنێو ببەین لێرە بجەنگم.

ئەمریکا یەکەم دەوڵەت بوو مەترسی داعشی لەسەر باشووری کوردستان دوورخستنەوەو ماوەی نزیکەی 10 مانگیشە بەردەوامە و دەڵێن هێشتاش بەردەوام دەبین.

فەرماندەی لیوای 9ی هێزی پیادەی پێشمەرگەش باسی کاریگەری سەربازانی ئەمریکا دەکات لەنێو هێزەکانی پێشمەرگەدا و دەڵێن کاتێ شەڕێک روودەدات ئەوان لە پێشی پێشەوەی شەڕدان.

کورد هێشتا سنوورێکی درێژی نائەمینی هەیە، کە بەرامبەرەکەی داعشە. پێشمەرگەکانیش لەم سنوورانە کوردستان دەپارێزن. بەگوێرەی زانیارییەکانی رووداویش لە دوایین سەردانی بارزانی بۆ ئەمریکا، لە کۆشکی سپی باسی کەرکووک وەک بەشێک لە سنووری هەرێمی کوردستان کراوە، ئێستا شەڕڤانانی ئەمریکاش هەر لەو سنوورە بۆ کورد شەڕدەکەن.</sup>

^20/5/2015

<sup>بە هەزاران چەکداری حەشدی شەعبی شیعە گەیشتنە سەربازگەی حەبانییە لە نزیکی شاری رومادی ناوەندی پارێزگای ئەنباری سوننەنشین لە رۆژئاوای عێراق، ئامانجی ئەو هێزانە گرتنەوەی شاری رومادییە، کە چەکدارانی داعش لە چەند رۆژی رابردوو کۆنترۆڵیان کرد.

کەوتنی شاری رومادی بە دەستی داعش تەنها کەوتنی ناوەندی فراوانترین پارێزگای عێراق نەبوو بە دەستی ئەو گرووپەی کە دەستی لە یەخەی بەغدا نابێتەوە، بگرە بە کۆنترۆڵکردنی رومادی دەستی بەسەر دەیان چەکی قورس و ئۆتۆمبێلی زرێپۆش و تانکدا گرتووە، جگە لە گۆشەگیرکردنی هێزەکانی عێراق لە ناوچەیەکی نیمچە داخراو کە پشتی لە بەغدایە. لەوەش خراپتر وەک چاودێران دەڵێن کەوتنی رومادی رێگەی بۆ چەکدارانی حەشدی شەعبی شیعە خۆشکرد لە شەڕی ئەنباردا بەشداربن، بەواتایەکی دیکە ئەو چەکدارە شیعانە کە دەزگاکانی راگەیاندنی سەر بە سعودییە بە باڵی سەربازی ئێرانیان دەناسێنن، وا روویان لە ناوچەیەک کردووە سنوورە لەگەڵ سعودییە و ئەگەری هەیە ئەم پێشهاتە سعودییە بێنێتە دەنگ و هاوشێوەی هەڵوێستی بەرامبەر چەکدارانی حوسی یەمەن هەڵوێست بنوێنێ.

ئەم پێشهاتانە لەکاتێکدان جەنەراڵ لوید ئۆسن، فەرماندەی ناوەندی سوپای ئەمریکا بەغدای جێهێشت و لەسەروبەندی کەوتنی رومادی و بڕیاری بەشداریکردنی حەشدی شەعبی لە شەڕی ئەنباردا، حوسێن دەهقانی، وەزیری بەرگری ئێران گەیشتە بەغدا، ئاماژەکانی ئەمریکا و ئێران لەبارەی رومادییەوە تا رادەیەک لە یەکدەچوون بەبێ هەماهەنگی لەبارەی خێرایی رزگارکردنی شاری رومادی.

هاوکات ئەیهەم کامل، بەڕێوەبەری لقی گرووپی ئۆراسیا بۆ توێژینەوە لە رۆژهەڵاتی ناوەڕاست و ئەفریقا دەڵی "کاریگەری عەبادی لەسەر چەکدارانی حەشدی شەعبی سنووردارە، ئەمڕۆ ئەوە یەکەم تەحەدی راستەقینەیە بۆ دەسەڵاتی عەبادی، نەک تەنها لە ئاستی ئەمنیدا، بگرە لەسەر ئاستی سیاسیشدا".</sup>

^20/5/2015

<sup>ئەحمەد عەسیری، گوتەبێژی فەرمی هێزەکانی هاوپەیمانی عەرەبی بۆ پاڵپشتیكردن لە حکومەتی یەمەن رایگەیاند "تەرمی فڕۆکەوانە مەغریبییەکەمان لەلایەن خاچی سوورەوە رادەستکرایەوە، کە ماوەیەک بەر لە ئێستا بەهۆی کەوتنی فڕۆکەکەیەوە لە یەمەن گیانی لەدەستدابوو".

ئاژانسەکانی یەمەن ئاماژە بەوە دەدەن " لایەنی مەغریبی بۆ دڵنیابوون لە ناسنامەی فڕۆکەوانەکە، پشکنینی DNA بۆ تەرمەکە ئەنجامداوە و دەرکەوتووە تەرمەکە هی فڕۆکەوانە مەغریبییەکەیە".

سوپای مەغریبی لە 11-5-2015 رایگەیاندبوو " یەکێک لە فڕۆکە جەنگییەکانی وڵاتەکەی لە جۆری (F16)،كە بەشداری هێرشە ئاسمانییەكانی گەردەلوولی یەکلاییکەرەوەی كردووە بە سەرۆکایەتیی سعودیە، دیارنەماوە". لەوکاتەشدا حوسییەکان بەرپرسیارێتی خستنەخوارەوەی ئەو فڕۆکەیان لە ناوچەی دۆڵی نشور لە پارێزگای سەعدە لە ئەستۆگرت. 

بەپێی راپۆرتەکان، شەش فڕۆکەی جەنگیی ئێف 16ی مەغریبی لە هێرشە ئاسمانییەكانی هاوپەیمانێتی عەرەب بۆ سەر حوسییەکانی یەمەن بەشدارن.
داوی ماوەیەک لە دیارنەمانی فڕۆکەکە، تۆڕی CNN گرتەیەکی ڤیدیۆیی بڵاوكردوە و لە گرتەکەدا فڕۆكەیەكی جەنگی دەردەكەوێت بە ئاڵای مەغریبەوە، کە لەلایەن حوسییەكانەوە خراوەتە خوارەوە.</sup>

^20/5/2015

<sup>لە کۆبوونەوەی رۆژی دووشەممەی نێوان سەرۆکی هەرێمی کوردستان و لایەنە سیاسییەکان، باسی ریفراندۆم کراوەو جەختکراوەتەوە کە دەبێ هەنگاوی بۆ بنرێ.

مەسعود بارزانی، سەرۆکی هەرێمی کوردستان رۆژی دووشەممە 18-5-2015 لەگەڵ سەرکردەو نوێنەری لایەنە سیاسییەکانی هەرێمی کوردستان کۆبووەوە. لەو کۆبوونەوەیەدا یوسف محەممەد سەرۆکی پەرلەمانی کوردستان و قوباد تاڵەبانی ، جێگری سەرۆکی حکومەتی هەرێمی کوردستانیش بەشداربوون. بەپێی زانیارییەکانی رووداو لەو کۆبوونەوەیەدا باسی سەربەخۆیی ئابووری کراوەو هەمووانیش لەسەر ئەوە کۆک بوون، کە کورد دەبێ لە قۆناخی یەکەمدا هەوڵی سەربەخۆیی ئابووری بدات، پاشان ریفراندۆمێک لەسەر سەربەخۆیی بکات.

عیرفان عەلی عەبدولعەزیز ، رابەری گشتیی بزووتنەوەی ئیسلامی کوردستان لەبارەی ریفراندۆمەوە بۆ رووداو گوتی "باسمان لەوەکرد کە دەبێ هەنگاو بەرەو ریفراندۆم بنرێ و ئامادەکاریی پێویستی بۆ بکرێ بۆئەوەی سەرکەوتوو بێت".

سەبارەت بە سەربەخۆیی کوردستانیش، رابەری گشتیی بزووتنەوەی ئیسلامی گوتی "کۆبوونەوەکەمان ئومێدبەخش بوو، باسی زۆر شت کرا، ئێستا لە دەزگا ئەکادیمییەکانی ئەمریکا و ئەوروپا تێگەیشتنی باشتر هەیە بۆ کێشەی کورد".

ئێستا کە لەهەموو کات زیاتر کورد باسی سەربەخۆیی دەکات، وەک لە کۆبوونەوەکەدا باسکراوە، هۆکارەکەی ئەوەیە عێراق لەرووی کردەییەوە یەکپارچە نەماوەتەوە، هەروەها بەغدا پابەند نییە بەو رێکەوتنەی لەگەڵ هەولێر هەیەتی. کورد داوادەکات حکومەتی عێراق و دەوڵەتمەداری حکومەتەکە، چیتر دەستی بە دەستی بە مافی سامان و داهات و بودجە و مووچەی بڕیارلێدراوی هاوبەشی حکومەتی عێراق و کوردستان نەکات، بەڵکو بە زووترین کات ئەم کێشەیە چارەسەری یاسایی بۆ بکرێت.</sup>

^19/5/2015