<sup>بڕیارە ئەمڕۆ ژمارەیەک سەرۆک و نوێنەری وڵاتان روو لە ئیستەنبوڵ بکەن بۆ بەشداربوون لە لوتکەی ئاشتی، کە بڕیارە لە 23- ئەم مانگە دەستپێبکات و تاوەکو 25-ی مانگ بەردەوام بێت.

بەشێک لە میدیاکانی تورکیا سازکردنی ئەو لوتکەیە وا نیشاندەدەن کە لەبەرامبەر یادکردنەوەی کۆمەڵکوژی ئەرمەنەکان رێکخراوە، چونکە هەموو ساڵێک لە 24 ی نیسان یادی کۆمەڵکوژیی ئەرمەنییەکان دەکرێتەوە، کە لە ساڵی 1915 لەلایەن ئیمپراتۆریەتی عوسمانییەوە روویدا و ژمارەی قوربانییەکان لەنێوان 600 هەزار تاوەکو ملیۆنێک و 800 هەزار کەس بوو.

لەماوەی دوو هەفتەی رابردوودا پاپای ڤاتیکان لە گوتاری هەفتانەی خۆیدا گوتبووی: "یەکەمین کۆمەڵکوژی سەدەی بیستەم بەرامبەر بە ئەرمەنەکان کراوە".

لەبەرامبەردا رۆژی 12-4-2015 ، وەزارەتی دەرەوەی تورکیا باڵیۆزی ڤاتیکانی لە ئەنقەرە بانگهێشتکرد و بەفەرمی هەڵوێستی وڵاتەکەی پێڕاگەیاند، بۆیە ئەمڕۆ کاردیناڵ پێتەر تورکسۆن، نوێنەری پاپای ڤاتیکان لە تورکیا، بە بیانووی "نەخۆشییەوە" ناتوانێ بەشداری لوتکەی ئاشتی بکات.

ئەو لوتکەیەی ئەمڕۆ لە ئیستەنبوڵ سازدەکرێت، بەبۆنەی 100 ساڵەی شەڕەکانی چەناککالەن کە لە ساڵی 1915، هەمان ئەو ساڵەی ئەرمەنییەکانی تورکیا کۆمەڵکوژ کراون، ئەنجامدراوە.
 
بڕیارە 21 سەرۆککۆمار، 2 سەرۆکی پەرلەمان،  3 جێگری سەرۆککۆمار و 5 سەرۆکوەزیرانی وڵاتان بەشداری لوتکەی ئاشتی بکەن لە ئیستەنبوڵ.

چاوەڕێ دەکرێ لە بەریتانیا پرێنس چارلس بەشداری بکات و کوڕێکیشی یاوەری بکات. لە سووریا خالید خۆجا، سەرۆکی هاوپەیمانی نیشتمانی سووری بەشداردەبێت.

بەڵام هەریەکە لە ڤلادیمیر پوتین، سەرۆکی رووسیا و فرانسوا ئۆلاند، سەرۆکی فەرەنسا بەشداری تێدا ناکەن و ئەوان دەچنە ئێریڤان، پایتەختی ئەرمینیا بۆ ئەوەی بەشداری رێوڕەسمی کۆمەڵکوژی ئەرمەنەکان بکەن. تاوەکو ئێستاش ئەمریکا بڕیاری خۆی لەبارەی بەشداریکردن و نەکردن نەداوە.</sup>

^23/4/2015

<sup>ئارام شێخ محەممەد، جێگری سەرۆكی ئەنجوومەنی نوێنەرانی عێراق رایدەگەیێنێت، كە ئازادی رادەبڕین، پێوەری سەرەكی ناسینەوە و جیاكردنەوەی سیستەمە دیموكراتخوازەكانە لە سەركوتكارەكان.

بە پێی بەیاننامەیەكی نووسینگەی رۆژنامەوانیی ئارام شێخ محەممەد، جێگری سەرۆكی ئەنجوومەنی نوێنەرانی عێراق كە بە بۆنەی ساڵیادی رۆژنامەگەریی كوردییەوە ئاراستەی رۆژنامەڤانانی كوردستانی كردووە و وێنەیەكی بۆ (تۆڕی میدیایی رووداو) نێردراوە، ئارام شێخ محەممەد، وێڕای پیرۆزبایی لە رۆژنامەنوسانی كوردستان، هیواخوازیشە ئەو یادە ببێتە وێستگەیەك بۆ بەرەو پێشبردنی زیاتری كایەی رۆژنامەوانیی و فەراهەمكردنی  ئازادی زیاتر و رێزگرتن لە كاری ڕۆژنامەوانیی، هاوكات وەستانەوە بەڕووی ئەو هەوڵانەی كە دەیانەوێت ئاستەنگ بۆ ئەو ئەركە پیرۆزە دروستبكەن، یاخود لەڕێی بەكارهێنانی توندوتیژییەوە هەوڵی چاوترستاندنیان بدەن.

ئارام شێخ محەممەد، جەختیشی كردووەتەوە كە ئازادی رادەبڕین پێوەرێكی سەرەكییە بۆ لێك جیاكرنەوەی سیستەمە دیموكراتییەكان و سەركوتكارەكان لە یەكتر، بۆیە هاوشانی قبوڵكردنی یەكتر و چەسپاندنی بنەماكانی دیكەی دیموكراسی، ئەركی بەرپرسانی هەرێمە،  نەك تەنها كار بۆ فەراهەمكردنی ئازادی كاری رۆژنامەوانیی بكەن، بەڵكو دەبێت ببنە پارێزەر و بەرگریكاری، تا بە فیعلی بۆ دونیای بسەلمێنێن كورد گەلێكی ئازادیخوازە و رێز لە هەموو جیاوازییەكان دەگرێ.</sup>

^23/4/2015

<sup>جۆن کێربی، گوتەبێژی پێشووی پنتاگۆن لە پنتاگۆنەوە گوێزرایەوە بۆ وەزارەتی دەرەوە و ئەمجارەیان بوو بە گوتەبێژی وەزارەتی دەرەوەی ویلایەتە یەکگرتووەکانی ئەمریکا.

رۆژی  چوارشەممە، 22 ی نیسان، رۆژنامەکانی ئەمریکا بڵاویان کردەوە جۆن کێربی گوتەبێژی پێشووی وەزارەتی بەرگری ئەمریکا، لە شوێنی جین ساکی کە ئێستا پۆستی بەڕێوەبەری پەیوەندییەکانی لە کۆشکی سپی پێ سپێردراوە، پۆستی گوتەبێژی وەزارەتی دەرەوەی ئەمریکا وەردەگرێت.

کێربی لە مانگی دووی ئەمساڵدا، دوای وەرگرتنی پۆستی وەزیری بەرگری لەلایەن ئاشتۆن کارتەر، پۆستی گوتەبێژی ئەو وەزارەتەی جێهێشت، بەرپرسێکی ئەمریکیش کە نەیویستووە ناوی بهێندرێت، رایگەیاندووە "لەسەر داوای جۆن کێری وەزیری دەرەوەی ئەمریکا، کێربی کراوەتە گوتەبێژی وەزارەتی دەرەوەی ئەمریکا"، بە گوتەی ئەو بەرپرسە هۆکاری هەڵبژاردنی کێربی وەک گووتەبێژ لەلایەن جۆن کیرییەوە بۆ ئەوە دەگەڕێتەوە کە کێربی ئەزموونێکی فراوان و قووڵی لە پرسە نیودەوڵەتییەکاندا هەیە. 

  کێربی تاوەکو کاتی خانەنشینکردنی لە سوپادا لەلایەن وەزارەتی بەرگری ئەمریکاوە، ناتوانێت وەک گوتەبێژی وەزارەتی دەرەوە دەستبەکاربێت.</sup>

^23/4/2015

<sup>لەگەڵ نزیکبوونەوەی هەڵبژاردنە گشتییەکەی تورکیا، هەڵمەتی هەڵبژاردنی پارتەکانی ئەو وڵاتە دەستیپێکرد.

لەو چوارچێوەیەدا هەر 4 پارتە سەرەکییەکە، کە چاوەڕێدەکرێت لە پەرلەمان نوێنەرایەتی بکرێن، گۆرانی و سروودیان بەرهەمهێنا بۆ راکێشانی دەنگدەران بەلای خۆیاندا.

لە ناویاندا پارتی داد و گەشەپێدان AKP و پارتی دیموکراتی گەلان HDP گۆرانییان بە زمانی کوردی بەرهەمهێنا، بەڵام پارتەکانی CHP و MHP تەنها زمانی تورکیان بەکارهێنا بۆ سروودەکانیان.

لە گۆرانییەکەی AKP دا داوا لە دەنگدەران دەکرێت جارێکی دی متمانە بەو پارتە بدرێتەوە.

لە گۆرانییەکەی HDP شدا ئەو پارتە بە پارتی کوردان ناودەبرێت و درووشمەکانی برایەتی و پێکەوە ژیان جەختیان لەسەر دەکرێتەوە.</sup>

^23/4/2015

<sup>ئەنجوومەنی زەردەشتییەکان لە کوردستان رایدەگەیێنێ، کار بۆ دووبارە ئاوەدانکردنەوەی په‌رستگا‌ی زه‌رده‌شتییەکان لە كوردستان و هەروەها بۆ بڵاوکردنەوەی ئایینی زەردەشتی لە ناو کۆمەڵگەی کوردی دەکەن.
 
لوقمان حاجی کەریم، بەرپرسی ئەنجوومەنی زەردەشتیانی کوردستان بە ئاژانسی هەواڵی رۆیتەرزی رایگەیاندووە، زەردەشتیانی باشووری کوردستان پلانیانداناوە بۆ بڵاوکردنەوەی ئایینەکەیان لە ناو کۆمەڵگەدا و ئاشناکردنی هاووڵاتیان بە ئایینەکە.

کەریم ئاماژەی بەوەش کردووە، بەهۆی ئەوەی ئایینی زەردەشتی ئایینێکی کۆنی کوردانە، لەبەرئەوە بڕیاریانداوە پەرستگایەک لە باشووری کوردستان بکەنەوە و چالاکییەکانی خۆیان ئەنجامبدەن. 
  
بەرپرسی ئەنجوومەنی زەردەشتییەكان لە کوردستان ئەوەشی خستووەتەڕوو،  پێش ماوەیەک ئەنجوومەنەکەیان لە هەردوو شاری سلێمانی و هەولێر دامەزراوە و  ئێستا کار لەسەر بڵاوکردنەوەی مەفاهیمەکانی ئایینی زەردەشتی دەکەن. 

ئەنجوومەنی زەردەشتییان  لە ساڵی 2006 لە وڵاتی بەریتانیا دامەزراوە و لە سەرەتای ساڵی 2015 لە باشووری کوردستان دەستی بە چالاکییەکانی کردووە. 

زەردەشتی ئایینی سەرەکی ئیمپراتۆرییەتەکانی ئەخمینی و بارسی و ساسانی بووە، بەپێی دوا ئامارەکان ژمارەی شوێنکەوتووانی ئایینەکە لە نێوان 145 هەزار تا  2،6 ملیون کەسە، کە  زۆربەیان لە "هیند و ئێران و ئەفغانستان و ئازەربایجان" دانیشتوون، هەندێکی دیکەش  بەهۆی ئاوارەبوونیان ئێستا لە ناوچەکانی ئەمەریکا و ئەوروپا و ئوسترالیا و کەنەدا و سەنگافوورە نیشتەجێن. لە کوردستانیش پێش 3000 هەزار ساڵ زەردەشتییەکان ژیاون.</sup>

هشیار عادل/ روداو

^22/4/2015

<sup>مەسعود بارزانی، سەرۆكی هەرێمی كوردستان بەبۆنەی ساڵیادی رۆژنامەگەریی كوردی پەیامێك بڵاودەكاتەوە و رایدەگەیێنێ،" ئێستا كە نەیارانی گەلی كوردستان میدیا وەك ئامرازێك بۆ دژایەتیكردنی مافە رەواكانی گەلی كوردستان بەكاردەهێنن، دەكرێ میدیای كوردستانی سەنگەرێكی زۆر بەهێزبێت بۆ بەرپەرچدانەوەی هەوڵی نانەوەی دووبەرەكی و پشێویی كۆمەڵایەتی و سیاسی لە لایەن ناحەزانی كوردستانەوە".

سەرۆكی هەرێمی كوردستان وێڕای ئەوەی لە پەیامەكەیدا پیرۆزبایی لە رۆژنامەنووسانی كوردستان دەكات، جەختدەكاتەوە كە رۆژنامەگەریی كوردی هەر لەسەرەتای دەركەوتنیەوە و لە قۆناغە جیاجیاكانی خەباتی گەلی كورد شانبەشانی چین و توێژە خەباتگێڕەكانی دیكەی كوردستان لە دژی داگیركاری و دیكتاتۆری وەستاوەتەوە، رۆشنگەریی و دژایەتیی زوڵم و نەیارانی كوردستان خەسڵەتی دیاری رۆژنامەنووسی كورد بووە.

بارزانی داوا لە گشت لایەك دەكات پاڵپشتی توێژی هۆشیار و كاریگەری رۆژنامەنووسان بن و یارمەتیی كەمكردنەوەی كێشەكانیان و باشتركردنی گوزەرانیان بدەن. دەشڵێت:" ئێستا لەو كاتەی  وڵاتمان رووبەڕووی شەڕێكی زاڵمانەیی تیرۆریستان بووەتەوە و تیرۆریستان لەڕێگەی میدیاكانیانەوە شەڕی دەروونی لەدژی خەڵكی كوردستان و پێشمەرگە دەكەن، ئەو چاوەڕوانییەش لە میدیاكارانی خۆشەویستی كوردستان هەیە كە لەبەرانبەر ئەم هەوڵەی تیرۆریستان بووەستنەوە و ببنە بەشێكی كاریگەر لە بەرەی رووبەڕووبوونەوەی تیرۆر و هزری توندڕۆیی".

دەقی پەیامەكە:

پەیامی سەرۆك بارزانی بە بۆنەی ساڵیادی ڕۆژنامەگەریی كوردی

بەبۆنەی سەدوحەڤدەهەمین ساڵوەگەڕی دەرچوونی یەكەم ڕۆژنامەی كوردی و حەڤدەهەمین ساڵیادی دامەزراندنی سەندیكای ڕۆژنامەنووسانی كوردستان و ڕۆژی ڕۆژنامەگەریی كوردی پیرۆزبایی خۆم ئاراستەی سەندیكای ڕۆژنامەنووسانی كوردستان و هەموو میدیاكار و ڕۆژنامەنووسانی كوردستان دەكەم.

ڕۆژنامەگەریی كوردی هەر لەسەرەتای دەركەوتنیەوە و لە قۆناغە جیاجیاكانی خەباتی گەلەكەمان شانبەشانی چینوتوێژە خەباتگێڕەكانی دیكەی كوردستان لەدژی داگیركاری و دیكتاتۆری وەستاوەتەوە و ڕۆشنگری و دژایەتیی زوڵم و نەیارانی كوردستان خەسڵەتی دیاری ڕۆژنامەنووسی كوردی بووە.

ئێستایش كە نەیارانی گەلی كوردستان میدیا وەك ئامرازێك بۆ دژایەتیكردنی مافە ڕەواكانی گەلی كوردستان بەكار بهێنن دەكرێ میدیای كوردستانی سەنگەرێكی زۆر بەهێز بێت بۆ بەرپەرچدانەوەی هەوڵی نانەوەی دووبەرەكی و پشێویی كۆمەڵایەتی و سیاسی لە لایەن ناحەزانی كوردستانەوە.

ئێستایش لەو كاتەی كە وڵاتمان ڕووبەڕووی شەڕێكی زاڵمانەیی تیرۆریستان بووەتەوە و تیرۆریستان لەڕێگەی میدیاكانیانەوە شەڕی دەروونی لەدژی خەڵكی كوردستان و پێشمەرگە دەكەن ئەو چاوەڕوانییەش لە میدیاكارانی خۆشەویستی كوردستان هەیە كە لەبەرانبەر ئەم هەوڵەی تیرۆریستان بوەستنەوە و ببنە بەشێكی كاریگەر لە بەرەی ڕووبەڕووبوونەوەی تیرۆر و هزری توندڕۆیی.

جێگەی شانازییە كاری ڕۆژنامەگەری لە كوردستاندا هەنگاوی باشی ناوە و بە ئازادییەكی تەواو و دوور لە هەموو سانسۆرێك لە هەرێمی كوردستاندا درێژە بە چالاكییەكانی دەدات و بە بەراورد لەگەڵ وڵاتانی ناوچەكە میدیا و ڕۆژنامەنووسی لە دۆخێكی زۆر باش دایە لەڕووی ئازادی و نەبوونی كوسپ و تەگەرە بۆ كاری ڕۆژنامەنووسی. ئەو كاتەیش ئازادیی ڕۆژنامەنووسی دەبێتە هۆكارێك بۆ پێشكەوتنی كۆمەڵگە كە پێكەوەگرێدانێك هەبێت لەنێوان ڕۆژنامەنووسی و بەرپرسیارێتیی كۆمەڵایەتی و پابەندبوون بە پیشەییبوون و بەهاكانی ڕۆژنامەنووسی.

لەم یادەدا داوا لە گشت لایەك دەكەم پاڵپشتی توێژی هۆشیار و كاریگەری ڕۆژنامەنووسان بن و یارمەتیی كەمكردنەوەی كێشەكانیان و باشتركردنی گوزەرانیان بدەن و ڕۆژنامەنووسەكانی كوردستان دوور لە دەستێوەردانی سیاسی بتوانن بە شێوەیەكی ئازاد و سەربەخۆ خزمەتی دۆزی ڕەوای گەلەكەمان و پێشكەوتنی كولتووری و كۆمەڵایەتی بكەن.

دووبارە پیرۆزبایی لە هەموو ڕۆژنامەنووسانی ئازیزی كوردستان دەكەم و هیوای سەركەوتنیان بۆ دەخوازم.

مسعود بارزانی

سەرۆكی هەرێمی كوردستان</sup>

<sup>رۆژی 21-4-2015، پارتی دیموکراتی گەلان HDP راگەیێندراوی هەڵبژاردنی خۆی بڵاوکردەوە. لە رێورەسمێکدا سەڵاحەدین دەمیرتاش و فیگەن یوکسەکداغ، هاوسەرۆکانی پارتی دیموکراتی گەلان HDP پلانەکانی پارتەکەیان پێكەوە خاڵ خاڵ خوێندەوە.

سەرەتا دەمیرتاش بە کوردی سڵاوی لە ئامادەبووان کرد و لەگەڵ یوکسەکداغ ئاشکرایانکرد کە لە بەرنامەیاندایە فەرمانگەی کاروباری ئاینی دابخەن و سنووری ئەرمینیاش بکەنەوە.

هاوسەرۆکانی HDP ئەوەشیان خستەڕوو، کە وەزارەتێکی تایبەت بە ژنان پێکدەهێنن و 8 ی مارتیش دەکەن بە پشووی فەرمی. سەبارەت بە سیستەمی حوکمڕانی تورکیاش رایانگەیاند، کە سیستەمی هاوسەرۆکایەتی پەیڕەودەکەن و پارێزگارەکان لەڕێگەی هەڵبژاردنەوە دەهێننە سەرکار، هاوکات خزمەتی سەربازی زۆرەملێش کۆتایی پێدەهێنن.

لەسەر ئازادییەکانی تاکیش HDP پەیمانی ئەوە دەدات، کە مافی هاوڕەگەزبازان بدات، بە شێوەیەک کە بتوانن ژیانی ئاسایی خۆیان بژین، بەبێ ئەوەی فشاریان بخرێتەسەر لەسەر هەڵبژاردە سێکسییەکانیان.

سەبارەت بە پلانەکانی پارتەکەیان لەسەر ئابووری و بواری کار، هاوسەرۆکانی HDP ئەوەیان خستەڕوو کە لە ئەگەری هەڵبژاردنیاندا، دەرماڵەیەکی 200 لیرەیی بۆ گەنجانی تەمەن 12 بۆ 25 ساڵ دەبڕنەوە، کرێ لەسەر خوێندن هەڵدەگرن، سەرمایەگوزارییەکانی بواری بەرنامەی ئەتۆمی رادەگرن، کەمترین ئاستی مووچە بەرزدەکەنەوە بۆ 1800 لیرە و کاژێرەکانی کارکردن دادەبەزێنن بۆ 35 کاژێر لە هەفتەیەکدا.</sup>

^22/4/2015

<sup>لە بۆردوومانێکی فڕۆکە جەنگییەکان لە شاری موسڵ دەیان چەکداری رێکخراوی داعش کوژران.

سەعید مەموزینی، بەرپرسی راگەیاندنی لقی 14ی موسڵی پارتی دیموکراتی کوردستان، بە تۆڕی میدیایی رووداوی راگەیاند:" ئەمشەو 20/4/2015 فڕۆکە جەنگییەکانی هاوپەیمانان هێرشیانکردە سەر بنکەیەکی چەکدارانی داعش لە موسڵ، لە ئەنجامدا دەیان چەکدار کوژراون و برینداربوون".

هاوكات سەرچاوەیەک لە موسڵ بە رووداوی گوت:" بنکەکەی داعش لە گەڕەکی عەدەن بووە لە نزیک وێستگەی کارەبای موسڵ، فڕۆکە جەنگییەکان چوار مووشەکیان ئاراستەی ئەو بنکەیە کردوون و بە تەواوی خاپووربووە".</sup>

^{٢١/٤/٢٠١٥}

<sup>لەگەڵ نزیکبوونەوەی 1 ی مای، پۆلیسی تورکیا دەستی بە ئامادەباشی كرد بۆ رێگریكردن لە رێکخستنی گردبوونەکان لەو رۆژەدا.

رۆژی 20-4-2015، پۆلیسی تورکیا یەکەم هەنگاوی خۆی نا بە بردنی ئاسنی بەربەستی ئەمنی بۆ مەیدانی تەقسیم.

ساڵانە ناکۆکی و قەیران دروستدەبێت لەنێوان سەندیکاکانی کرێکاران و حکومەتی تورکیا سەبارەت بە گردبوونەوە لە مەیدانی تەقسیم.

سەندیکاکان ئەمساڵیش بڕیاری یەکلاییكەرەوەی خۆیانیان دووپاتکردەوە بۆ ئەنجامدانی کۆبوونەوەی جەماوەری لە تەقسیم.

بەرپرسانی ئیداریی و ئەمنی پارێزگای ئیستەنبوڵیش کە چاوەڕێ ناکرێت رێگەبدەن بە کۆبوونەوەیەکی لەو شێوەیە، هەر لە ئێستاوە ئاسنی بەربەستی ئەمنییان بردە مەیدانەکە بۆ رێگرتن لێی.</sup>

^21/4/2015

^{گۆڤارێكی ئه‌ڵمانی، ئاشكرای‌ ده‌كات، ئه‌فسه‌رێكی ده‌زگای هه‌واڵگریی سه‌رده‌می به‌عسی عێراق، به‌رپرسه‌ له‌ داڕشتنی بیرۆكه‌ی داگیركردنی باكووری سوریا له‌لایه‌ن داعشه‌وه‌. گۆڤاری دێرشبیگلی ئه‌ڵمانی، له‌ راپۆرتێكیدا به‌ناونیشانی (دۆسێ نهێنییه‌كان، په‌یكه‌ری ده‌وڵه‌تی ئیسلامیی ئاشكرا ده‌كات)، بڵاوی كردوه‌ته‌وه‌: به‌پێی ئه‌و به‌ڵگه‌نامانه‌ی له‌به‌رده‌ستدان، ئه‌فسه‌رێكی عێراقی به‌پله‌ی عه‌قید كه‌ له‌سه‌رده‌می حزبی‌ به‌عسدا له‌ عێراق، له‌ده‌زگای هه‌واڵگریی كاری كردوه‌و نازناوی حاجی به‌كری هه‌یه‌، به‌رپرسه‌ له‌ داڕشتنی بیرۆكه‌و نه‌خشه‌ی داگیركردنی باكووری سوریا و له‌ساڵی 2012شدا به‌ به‌شداریی چه‌ند ئه‌فسه‌رێكی پێشووی عێراق، بڕیار له‌وه‌دراوه‌ ئه‌بو به‌كر به‌غدادی بكرێته‌ خه‌لیفه‌ی داعش. به‌پێی هه‌مان سه‌رچاوه‌: ئه‌و ئه‌فسه‌ره‌ی سه‌رده‌می به‌عس، كه‌سێكی ئیسلامیی نییه‌، به‌ڵكو كه‌سێكی نه‌ته‌وه‌په‌رستی عه‌ره‌به‌و به‌ سه‌رپه‌رشتیی خۆی له‌گه‌ڵ تیرۆریستانی بیانی كه‌ هیچ جۆره‌ ئه‌زموونێكی سه‌ربازییان نه‌بوه‌، ده‌ستی كردوه‌ به‌ داگیركردنی باكووری سوریا.}

^21/4/2015