رۆز رایس بە 400 هەزار دۆلارە

بەپێی بەدواداچوونی (رووداو) بۆ بازاڕی ئۆتۆمبێل، ساڵانە زیاتر لە 20 ملیار دۆلار دەبرێتە دەرەوەی كوردستان بۆ كڕینی ئۆتۆمبێل، گرانبەهاترین ئۆتۆمبێلیش كە نرخەكەی دەگاتە 400 هەزار دۆلار لە كوردستانە.

كۆتایی هەفتەی رابردوو شەشەمین پێشانگای ئۆتۆمبێل لە هەولێر كرایەوە، بەڵام پێشانگای ئەمجارە تەواو جیاواز بوو لەوانەی ساڵانی رابردوو. بەشداربووان و سەردانیكەرانی پێشانگاكە ژمارەیان كەم بوو، بەڕێوەبەری پێشانگاكەش دەڵێ "هۆیەكەی دۆخی ئابووری و ئەمنی و شەڕی داعش بوو".

عەبدوڵڵا عەبدولڕەحیم، بەڕێوەبەری پێشانگای نێودەوڵەتی هەولێر بە (رووداو)ی گوت "ساڵی رابردوو 75 كۆمپانیا بەشداربوون، بەڵام ئەمساڵ 50 كۆمپانیا بەشداربوون و تەنیا 11 كۆمپانیا ئۆتۆمبێلیان نمایش كرد، ئەوانی دیكە كەلوپەلی یەدەگیان هێنابوو".

رۆز رایس بە 400 هەزار دۆلارە

پێدەچێ‌ قەیرانی ئابووری كاریگەری لەسەر گیرفانی هەموو خەڵك نەبووبێت، چونكە هەندێك لە سەردانیكەرانی پێشانگاكە بەدوای ئۆتۆمبێلی مۆدیل و نرخ بەرزدا دەگەڕان.

لای راستی پێشانگاكە ئۆتۆمبێلە گرانبەهاكانی وەك رەنج رۆڤەر و جاكواری لێ‌ نمایش كرابوو. كازیوە كەمال، بەرپرسی فرۆشتن لە كۆمپانیای رەنج رۆڤەر دەڵێ خەڵك لە هەرێمی كوردستان "سەلیقەی لێخۆرێنی ئۆتۆمبێلیان نییە، نازانن خۆشی لە ئۆتۆمبێل وەربگرن".

كازیوە زۆر پەسنی ئۆتۆمبێلی كۆمپانیاكەیانی دەدا و دەیگوت "رەنج رۆڤەر ئۆتۆمبێلی خەڵكی تایبەتە، نرخەكەی تاوەكو 220 هەزار دۆلار دەڕوات، لە كوردستان سێ ئۆتۆمبێل بەو نرخە فرۆشراوە". هەروەها گوتی "جاكواریشمان هەیە كە نرخیان لە نێوان 100 - 150 هەزار دۆلارە و حەوت دانەمان لێ فرۆشتووە".

ئۆتۆمبێلی رۆز رایس كە زۆرتر بە دەست سەرمایەدار و سەرۆك و شای وڵاتانەوەیە، ماركەی بەریتانیایە و ئێستا لە ئەڵمانیا دروستدەكرێ‌، بەڵام ئەو ئۆتۆمبێلە ئێستا لە كوردستانیش بازاڕی پەیدا كردووە.

كازیوە كەمال باسی ئۆتۆمبێلی رۆز رایس دەكات و دەڵێت "خەڵكی ئێمە كە دەچنە دەرەوە و ئەو هەموو ئۆتۆمبێلە جوانانە دەبینن، دێنەوە و ئەوانیش ئۆتۆمبێلی جوان دەكڕن، بۆ نموونە ئێستا رۆز رایس بە 400 هەزار دۆلار (40 دەفتەر)ەو 15 ئۆتۆمبێلی لە هەرێمی كوردستان فرۆشراوە".

كازیوە نهێنییەكی ئەوانەی ئاشكرا كرد كە ئەم جۆرە ئۆتۆمبێلە دەكڕن و گوتی "بەرپرسانی حكومی ئەو جۆرە ئۆتۆمبێلانە لە كوردستان ناكڕن و لێ ناخوڕن، چونكە ئەوكات لە نێو قافڵەی ئۆتۆمبێلەكانیدا ئاشكرا دەبێت، ئێ‌ خۆ 10 ئۆتۆمبێلی لەو جۆرەش ناكڕێت، بۆیە كاتێك دەچنە دەرەوە لەوێ‌ ئەو ئۆتۆمبێلە لێدەخوڕن".

زەوقی سلێمانییەكان جیاوازە

زۆربەی ئەو ئۆتۆمبێلانەی لەو پێشانگایە نمایش كرابوون جگە لە ئۆتۆمبێلە گرانبەهاكان رەنگیان سپی بوو. كازیوە كەمال باسی زەوقی خەڵكی كوردستان دەكات لە هەڵبژاردنی ئۆتۆمبێلدا "خەڵكی سلێمانی حەزیان لە رەنگی جیاوازە بۆ ئۆتۆمبێل، بەڵام خەڵكی هەولێر و دهۆك زۆربەیان حەزیان لە رەنگی سپییە".

مارسیدیس لە كیمیاباران دەتپارێزێ

هێمن عەلی، بەرپرسی بەشی فرۆشیاری مارسیدس باسی پێشكەوتنی ئۆتۆمبێلی مارسیدس دەكات كە بە "شای ئۆتۆمبێلان" ناسراوە و 13 جۆری هەیە. هێمن گوتی "گرانترین مارسیدس S CLASS ە كە نرخەكەی 200 هەزار دۆلارە، ئەو ئۆتۆمبێلە بایی 72 كاژێر ئۆكسجینی تێدایە و لە حاڵەتی كیمیاباران بۆ نموونە وەك ئەوەی لە هەڵەبجە روویدا، دەتوانی 72 كاژێر لە نێو ئۆتۆمبێلەكەتدا بمێنیتەوە، بەبێ‌ ئەوەی بخنكێی".لەبارەی ئەوانەی كڕیاری ئۆتۆمبێلی مارسیدسن، هێمن عەلی دەڵێت "ئەوانەی حەزیان لە فەخامەتە مارسیدس دەكڕن".

جگە لە مارسیدس BMW مودێلە هەرە بەرزەكانی خۆی لەو پێشانگەیە نمایش كردبوو. لاوەند دڵشاد، بەڕێوەبەری فرۆشتن لە كۆمپانیای BMW لە هەولێر دەڵێ "كەسە دەوڵەمەندەكان BMW  دەكڕن و نرخیشی گونجاوە لە 38 هەزار دۆلار تاوەكو 180 هەزار دۆلارە".

سەرباز حوسێن كە یەكێك بوو لە سەردانیكەرانی پێشەنگاكە گوتی "رەنج رۆڤەر، BMW  و پۆرشم هەیە و بڕیارم داوە كە تەمەنم بوو بە 45 ساڵ مارسیدسیش بكڕم، بۆیە رەنج رۆڤەرم كڕیوە چونكە زۆر سەلامەتە، BMW بۆ خێزان بەكاردێنم و پۆرشیش بۆ گەنجایەتی خۆم بەكاردێنم، بەڵام ئەگەر تەمەنم بوو بە 45 ساڵ مارسیدسێك دەكڕم، چونكە مارسیدس ئۆتۆمبێلی كەسایەتییەكانە".

تۆیۆتا گۆڕانكاری دەكات

بازاڕی ئۆتۆمبێل لە كوردستان بۆ ئۆتۆمبێلەكانی ژاپۆنی و كۆرییە، چۆنە نرخەكانیان گونجاون بەتایبەت ئۆتۆمبێلی تۆیۆتا.

محەممەد قەیس، لە بەشی فرۆشیاری TOYOTA ئاشكرای كرد كە ساڵانە شەش هەزار ئۆتۆمبێل لە كوردستان دەفرۆشن "تۆیۆتا بۆ هەموو كەسێكە و لە عێراق تەنیا تۆیۆتا یەكەمە".

محەممەد قەیس باسی ئایندەی بەرهەمەكانی كۆمپانیای تویۆتا دەكات و دەڵێت "ساڵی داهاتوو تەواوی دیزاینی پیك ئاب و فۆرچنەر دەگۆڕدرێ و بەشێوازێكی نوێ دێتە بازاڕ".
20 ملیار دۆلار دەچێتە دەرەوە، عەبدوڵڵا عەبدولڕەحیم (ئەبو بەنگین) دەڵێ "ساڵانە زیاتر لە 20 ملیار دۆلار بۆ كڕینی ئۆتۆمبێل دەچێتە دەرەوەی كوردستان، بەڵام ئەوە پێش هاتنی داعش بووە و ئێستا كەمتر بووە".

كۆری و ژاپۆنییەكانی كوردستان سووكن

كارمەندی یەكێك لە كۆمپانیاكانی ئۆتۆمبێل فێڵێكی بازرگانانی كوردستان ئاشكرا دەكات. ئەحمەد عەبدوڵڵا، فرۆشیاری ئۆتۆمبێلەكانی سكۆدا دەڵێ "ئۆتۆمبێلی ژاپۆنی و كۆری لە كوردستان قورساییان كەمە، چونكە لەسەر داوای بازرگانانی ئێرە دروست دەكرێن، بەڵام كۆمپانیاكانی ئەڵمانیا ئەوە قبووڵ ناكەن و كواڵیتی بەرهەمی خۆیان بۆ كڕیار ناهێننە خوارەوە، لەبەرئەوەشە كە ئۆتۆمبێلە كۆری و ژاپۆنییەكان لە سەرانسەری دنیادا یەك مواسەفات نین و هەمان ئەو ئۆتۆمبێلە كۆرییەی لە ئەوروپا هەیە، جیاوازە لەوەی كوردستان، بەڵام مارسیدس لەهەموو دنیادا هەر یەك كواڵیتییە". گوتیشی "ئەوان ئۆتۆمبێلی ژاپۆنی و كۆری بە فوول عادی دێنن، لێرە دەستكاری دەكەن و بەناوی فوول مواسەفات بە نرخێكی گران دەیفرۆشنەوە".

13/3/2015

<sup>میشێل ئۆباما، خانمی یەکەمی ئەمریکا رایگەیاند، کە ئەمساڵ لە کۆشکی سپی جەژنی نەورۆز دەکات. میشێل لە کۆشکی سپی بە زمانی فارسی دەڵێت "نەورۆزتان موبارەک".  دوێنێ پێنجشەممە 12-3-2015، به‌ سه‌رپه‌رشتیی‌ میشێل ئۆباما، خانمی‌ یه‌كه‌می‌ ئه‌مریكا‌و به‌بۆنه‌ی‌ نه‌ورۆزه‌وه‌، رێوڕه‌سمێك به‌ڕێوه‌چوو. 

لە رێورەسمەكەدا میشێل ئۆباما گوتی:"زۆر خۆشحاڵ دەبم کە ئێوە لێرەبن و لە کۆشکی سپی ئاهەنگی نەورۆز بگێڕین". خانمی یەکەمی ئەمریکا راشیگەیاند کە نزیکەی سێ هەزار ساڵ دەبێت کۆمەڵگا جیاوازەکانی رۆژهەڵاتی ناوەڕاست و ئاسیا ئاهەنگی نەورۆز دەگێڕن،"نەورۆز ساڵی نوێی ئەو گەلانەیە و ئاماژەیە بە بەهارێکی نوێ و ساڵی تازە".

دەربارەی جۆری خواردنەکانی کە لە نەورۆزدا ئامادەدەکرێن، میشیل رایگەیاند، کۆشکی سپی حەوت سین دادەنێت. کە حەوت جۆر خواردن لەسەر خوان دادەنرێن و هەموویان بە پیتی سین دەستپێدەکەن، ئەمەش نەریتێکی کۆنی گەلانی ئێرانییە.</sup>

^13/3/2015

<sup>ئەنجوومەنی نیشتمانیی کورد لە سووریا بە راگەیێندراوێک ئەندامێتی خۆی لە لێڤەگەری سیاسی هەڵپەسارد. ئەنجوومەنی نیشتمانیی کورد لە سووریا ENKS، راگەیێندراوێکی بڵاوکردەوە و تێیدا ئەندامێتی خۆی لە لێڤەگەری سیاسی هەڵپەسارد، ئەوان دەڵێن بەهۆی پێداگری تەڤگەری جڤاكی دیموكراتی TEV-DEM بۆ ئەنجامدانی هەڵبژاردنی شارەوانییەکانی کانتۆنی جزیرە، ئەندامێتی خۆیان لە لێڤەگەری سیاسی هەڵپەساردووە.

لە بەشێكی دیکەی راگەیێندراوەکەدا هاتووە:'' ئێمە لە پێناو پابەندبوونمان بە رێککەوتنەکەی دهۆک بۆ ئەنجامدانی کاری هاوبەش هەوڵی بێوچانماندا تاوەکو هەڵبژاردنەکانی کانتۆنی جزیرە دوابخرێت، کە بڕیاربوو لە 13/3/2015 ئەنجامبدرێت، چونکە ئەو هەڵبژاردنە کەشوهەوایەکی لەبار بۆ رێککەوتنەکە دەستبەر ناکات و هاوکات زیان بە هاوبەشی دەگەیێنێت''.

لە کۆتایی راگەیەندراوەکەی ENKS  كە لە 12 پارتی كوردی پێكهاتووە و لە دەرەوەی ئیدارەی كانتۆنەكانی رۆژئاوای كوردستانە، ئەوەش هاتووە:'' ئێمە بۆ هەموو لایەکی رادەگەیێنین کە ئەندامێتیمان لە لێڤەگەری سیاسی هەڵدەپسێرین، دوای ئەوەی لە کۆبوونەوەی 5/3/2015 بڕیاری لەسەردرا''.</sup>

^13/3/2015

<sup>ئەندامێکی ئەنجوومەنی باڵای هۆزەکانی ئەنبار، داوایکرد لەپێناو بەرەنگاربوونەوەی چەکدارانی داعش، حکومەتی عێراق پەلەبکات لە  پڕچەککردنی هۆزەکانی پارێزگای ئەنبار. راشیگەیاند چەندین سەرکردەی داعش بەرەو سنووری ئوردن و سووریا هەڵاتوون.
 
فوئاد جابر حەلبووسی، ئەندامی ئەنجوومەنی باڵای هۆزەکانی ئەنبار، رایگەیاند "دوای سەرکەوتنی هێزە عێراقییەکان لە ئەنجامدانی ئۆپەراسیۆنەکان بۆ سەر ناوچەکانی پارێزگای ئەنبار، زیاتر لە 270 سەرکردەی داعش بەرەو سنووری ئوردن و سووریا هەڵاتوون".

حەلبووسی ئاماژەی بەوەدا، چەکدارانی داعش لە ناوچەکانی روممادی و بەغدادی و شارۆچکەی هیت دووچاری لێکترازان و دابەشبوون هاتوون.

ئەو ئەندامەی ئەنجوومەنی باڵای هۆزەکانی ئەنبار داوای لە حکومەتی عێراق کرد، پەلە بکات لە پڕچەککردنی هۆزەکانی ئەنبار، لە پێناو بەرەنگاربوونەوەی چەکدارانی داعش لە پارێزگاکەدا.
 
وەسام حەردان، سەرۆکی کۆنگرەی سەحوەی عێراقیش رۆژی چوارشەممە 11ی ئاداری 2015 رایگەیاندبوو" لە ئەنجامی ئۆپەراسیۆنی هێزە عێراقییەکان، بۆ سەر شارەدێی کەڕەمە، زیاتر لە 400 چەکداری داعش کوژراون، هەروەها بەدەیان ئۆتۆمبێلی سەربازی و چەندین بنکەیان تێکشکێندراوە".</sup>

^12/3/2015

<sup>رۆژی ١١ی ئادار، وەزارەتی بەرگریی فەڕەنسا رایگەیاند، حکومەتی فەڕەنسا دەیان هەزار سەربازی وڵاتەکەی ناردووەتە سەر شەقامەکانی ئەو وڵاتە بۆ پارێزگاریکردن لە سەدان ئایین، گەشتیارو لایەنەکانی دیکە لە هێرشە خۆکوژییەکان و پاراستنیان لەدەست ئەو هێرشانە و دەڵێن تا ئەو کاتەی پێویست بکات ئەم رێوشوێنە ئەمنیە بەردەوام دەبێت. 

جێن یەڤیس لی درەین، وەزیری بەرگریی فەڕەنسا رایگەیاند، حکومەتی وڵاتەکەی کۆمەڵێک رێگای تایبەتی بۆ رووبەڕووبوونەوەی تیرۆر و پاراستنی فەڕەنسا لەدەست هێرشەکان گرتووەتەبەر. یەک لەو رێگایانە بڵاوکردنەوەی دەیان هەزار هێزی ئاسایش، پۆلیس و هێزە سەربازییەکانی ئەو وڵاتەیە لەپێناو پاراستنی ئەو خەڵکانەی کە بۆ گەشتکردن دێنە فەڕەنساو ئەو کەسانەی ئایینی جیاوازیان هەیە.

یەڤیس هەروەها راشیگەیاند ئەم شێوازە کارکردنە بەردەوام دەبێت تا ئەو کاتەی کەمترین هەڕەشە بۆسەر وڵاتەکەیان هەبێت. 

دەیان هەزار سەربازی فەڕەنسی لەنێو ئەو هێزانەی ئاسایش و پۆلیسدان، کە لە دوای هێرشەکانی سەر شارلی ئێبدۆ و سوپەرمارکێتی جوولەکەکان بە پاریسدا بڵاوکراونەتەوە.</sup> 

^12/3/2015

<sup>مێژووی داخستنی پارتە سیاسییەکان لە تورکیا لە ساڵی 1925، واتە دوای دوو ساڵ لە دامەزراندنی کۆماری تورکیا، بە داخستنی پارتی کۆماری پێشکەوتنخواز دەستپێدەکات و لە ساڵی 2009شدا بە داخستنی کۆنگرەی کۆمەڵگای دیموکراتی کۆتایی پێدێت.

لەماوەی 84 ساڵدا 58 پارتی سیاسی لە تورکیا داخراون، کە بەشی زۆریان بە فەرمانی دادگای سەربازی داخراون، دوایین دوو پارتیش هەریەکە لە پارتی دیموکراتی گەل و کۆنگرەی کۆمەڵگای دیموکراتی بوون کە دوو پارتی کوردی بوون.

دوێنێ سێشەممە 10ی ئاداری 2015 پێشنیازی ئاستەنگکردنی داخستنی پارتە سیاسییەکان بە 224 واژۆی پەرلەمانتارانی تورکیاوە رادەستی لیژنەی هەموارکردنەوەی دەستووری کرا، کە بەپێی ئەو زانیاریانەی لە لیژنەی هەموارکردنەوەی دەستووری تورکیاوە دەست میدیاکان کەوتوون، لە رۆژی هەینییەوە گفتوگۆکان لەبارەیەوە دەستپێدەکەن.

پرسی بەربەستدانان لەبەردەم داخستنی پارتە سیاسییەکان لەسەرەتا لەسەر زاری ئەحمەد داودئۆغڵو، سەرۆکوەزیرانی تورکیاوە هات کاتێک رۆژی 8ی ئاداری 2015 لە مێردینی باکووری کوردستان داوای لە پارتە سیاسییەکانی تورکیا کرد، هەموویان هەوڵ بدەن لەرێگەی هەموارکردنەوەی دەستووری تورکیاوە ئەگەری داخستنی هەر پارتێکی سیاسی کۆتایی پێبهێنن.

پارتەکانی ئۆپۆزیسیۆن بە روانگەیەکی جیاوازترەوە لە پرسی بەربەستدانان لەبەردەم داخستنی پارتە سیاسییەکان نزیک دەبنەوە، نەوزاد کۆرکماز، پەرلەمانتاری نەتەوەپەرستی تورک پێیوایە کە ئەم هەوڵە بۆ ئەوەیە کە شەرعیەت بە پارتی کرێکارانی کوردستان بدرێ لەنێوخۆی تورکیا و لەئێستاوە رێگری لە هەر هەوڵێک بکەن بۆ داخستنی PKK.

بەڵام هەریەکە لە پارتی گەلی کۆماری CHP و پارتی دیموکراتی گەلان HDP مەرجی پشتیوانیکردن لە هەموارکردنەوەی بڕگەی 69ی دەستووری تورکیا دەبەستنەوە بە بەربەستی سەدا 10 ی هەڵبژاردنەوە.</sup>

^12/3/2015

^{کاندیدی سەرۆکایەتیی کۆمارییەکانی ئەمریکا، پشتگیری لە کوردستان دەکات و دەڵێت چەک بدەن بە کورد بۆ ئەوەی جەنگی ئیسلامی رادیکاڵ بکەن و کوردستانیان پێببەخشن.}

^{سیناتۆر راند پاول، یەکێکە لەو سیناتۆرانەى ناوی لەنێو ئەو کەسانەدایە، کە لەلایەن کۆمارییەکانەوە بۆ هەڵبژاردنی سەرۆکایەتیی ئەمریکا لە ساڵی 2016 کاندیددەکرێت، نێوبراو لە هەڤپەیڤینێکدا لەگەڵ تۆڕی هەواڵی برێیتبارتی ئەمریکی سەبارەت بە سیاسەتی دەرەوەی ئەمریکا لە رۆژهەڵاتی ناوەڕاست قسەدەكات.}

^{راند پاوڵ ئاماژە بەوە دەكات، چەکدارکردنی هێزەكانی کورد لە عێراق پێویستییەکە و دەبێت زۆر لەوە زیاتر هاوکاریی سەربازی بکرێن کە تا ئێستا کراون، بۆ ئەوەی بتوانن لە شەڕی دژ بە داعشدا سەرکەوتووبن. هەروەها باس لەوەش دەکات کە دەبێت پشتگیری دروستبوونی دەوڵەتێکی نوێ بەناوی کورستانەوە بکرێت.}

^{پاوڵ لەو هەڤپەیڤینەدا رایگەیاندووە، یەکێک لە کێشەکان ئەوەیە کە کورد چەکی تەواویان لەبەردەستدا نییە، ئەوان لەکاتێکدا کە باشترین جەنگاوەرن، کەچی چەک لەرێگەی بەغداوە دەگاتە ئەوان، بۆیە پێشمەرگە ناتوانێت هەموو چەکێک بەدەستبهێنێت کە پێوسیتی پێیەتی.}

^{ئەو کاندیدەی سەرۆکایەتیی ئەمریکا بە ئاشکرا باسی لەوەش کردووە، کە بەبۆچوونی ئەو هەرچەکێک لە ئەمریکاوە یان لە هەر وڵاتێکی ئەوروپییەوە رەوانەی پێشمەرگە بکرێت، پێویستە راستەوخۆ بگاتە هەولێر.}

^{پاوڵ دەشڵێت:" من دەمەوێت هەنگاوێک لەوە پێشتریش بڕۆم و هێڵی نوێ بۆ کورستان بکێشم و پەیمانی دەوڵەتی خۆیان پێبدەم". پێشیوایە ئەگەر پەیمانی دەوڵەت بە کورد بدرێت، ئەوان زۆر بە سەختی شەڕدەکەن}

^12/3/2015

^{هاوپه‌یمانێتیی نێوده‌وڵه‌تی دژی رێكخراوی تیرۆریستیی ده‌وڵه‌تی ئیسلامی ناسراو به‌ داعش رایگه‌یاند، توانیویه‌تی چه‌ند رێگه‌یه‌ك كه‌ تیرۆریستانی داعش له‌نێوان سوریاو عیراق له‌ناوچه‌ی ته‌ل حه‌میس له‌باكوری رۆژهه‌ڵاتی سوریا به‌كاریان هێناوه‌، ببڕێت.}

^{هاوپه‌یمانێتییه‌كه‌ له‌به‌یاننامه‌یه‌كدا ده‌ڵێت: "هه‌فته‌ی رابردوو هێزه‌كانی دژی رێكخراوی داعش به‌ پاڵپشتی لێدانی ئاسمانی له‌لایه‌ن هاوپه‌یمانێتییه‌كه‌وه‌ كۆنتڕۆڵی ناوچه‌یه‌كی بنچینییه‌یان له‌نزیك ته‌ل حه‌میس كردووه‌".}

^{به‌گوێره‌ی به‌یاننامه‌كه‌، چیتر داعش ناتوانێت مانۆڕ له‌ناوچه‌كه‌دا ئه‌نجامبدات و به‌هۆی ئه‌م پرۆسه‌یه‌وه‌ ئه‌و رێگه‌ی په‌یوه‌ندییه‌ی كه‌ رێكخراوه‌كه‌ به‌شێوه‌یه‌كی كلاسیكی بۆ ناردنی چه‌ك و چه‌كدار بۆ ته‌له‌عفه‌رو موسڵ له‌ عیراق به‌كاری هێناوه‌، ببڕێت.}

^{هه‌ر له‌م چوارچێوه‌یه‌دا هاوپه‌یمانێتییه‌كه‌ رونیشیكردووه‌ته‌وه‌، ئه‌و هێزانه‌ی روبه‌ڕوی رێكخراوی تیرۆریستی داعش ده‌بنه‌وه‌، كۆنتڕۆلًَی چه‌ند به‌شێكی گرنگیان له‌ڕێگه‌ی 47 كردووه‌ كه‌ خۆرهه‌ڵاتی سوریا به‌ ته‌له‌عفه‌رو موسڵ ده‌به‌ستێته‌وه‌.}

^{له‌ 27ی مانگی رابردوو هێزه‌كانی پێشمه‌رگه‌ توانییان كۆنتڕۆڵی شارۆچكه‌ی ته‌ل حه‌میس بكه‌ن كه‌ مۆڵگه‌یه‌كی رێكخراوی تیرۆریستی داعش بوو.}

^11/3/2015

<sup>لەکاتی بانگەشەکردن بۆ هەڵبژاردنی پەرلەمان، کە لە ١٧ی ئەم مانگەدا بەڕێوەدەچێت، وەزیری دەرەوەی ئیسرائیل ئەڤیگدۆر لیبەرمان دەڵێت، "عەرەبەکانی ئیسرائیل کە وەفادار نین بەرامبەر دەوڵەتی ئیسرائیل، پێویستە سەریان بپەڕێنرێت". ماڵپەری گۆڤاری نیوس ویک ئەوەی بڵاوکردووەتەوە. 

"ئەوانەی لەگەڵ ئێمەن، شایەنی هەموو شتێکن، بەڵام ئەوانەی دژی ئێمەن، هەقە بە تەور سەریان لە لاشەیان جیابکرێتەوە"، لیبەرمان وا دەڵێت.

قسەکانی لیبەرمان لەلایەن نوێنەرانی کەمینەی عەرەب، کە لە 20%ی دانیشتووانی ئیسرائیل پێکدەهێنن، ناڕەزایی تووندی لێکەوتەوە. ئەحمەد تیبی سەر بە لیستی پارتی یەکێتی لیستی عەرەبی قسەکانی لیبەرمانی بە کردەوەکانی داعش بەراورد کرد.
   
لیبەرمان، وەزیری دەرەوەی ئیسرائیل لە درێژەی قسەکانیدا باسی لەو عەرەبانە کرد، کە لە یادی دامەزراندنی ئیسرائیلدا پەڕۆی رەشیان هەڵکردووە، دەڵێت "ئەوانە جێگایان ئێرە نییە، من بەخۆشحاڵییەوە دەتوانم پێیان بڵێم با بچن بۆ لای سەرۆکی فەڵەستین، مەحموود عەباس".

ئەوە یەکەمجار نییە لیبەرمان لێدوانی تووند ئاراستەی عەرەبەکان بکات، مانگی رابردوو بە ئاشکرا باسی لەوە کردووە کە ئەو ئامادەیە بڕیاری لەسێدارەدان دژی "تیرۆریستان"ی فەڵەستینی جێبەجێ بکات. 

تا ئێستایش وەزیری دەرەوەی ئیسرائیل یەکەم وەزیرە لە دنیادا کە بە فەرمی لەناو وڵاتەکەی خۆیدا ناژی کە نوێنەرایەتی دەکات، ئەو ماڵەکەی لە خانوویەکدایە کە دەکەوێتە ئەو بەشەی کەنارەکانی رۆژئاوا، کە هێشتا لەژێر دەستی ئیسرائیلدایە.
 
بە گوێرەی ئامارەکانی هەڵبژاردن لە ئیسرائیل کە هەفتەی رابردوو بڵاوکراوەتەوە، ئەوە نیشاندەدات کە سەرۆکی پارتی ئۆپۆزیسیۆن هەرزۆگ دەتوانێت حکومەتێکی کولیسیۆنی پێکبهێنێت لەگەڵ پارتە راستڕەوەکەی لیبەرمان و وەزیری ئابووری ئێستا.

سەرۆکوەزیرانی ئێستا، ناتانیاهۆ، ئەوەی ئاشکرا کردووە کە دەستێکی دەرەکی نایەوێت لە هەڵبژاردنەکانی ئەمجارەدا سەربکەوێت، ئەگەرچی ئەو ئاشکرای نەکرد ئەو دەستە کێیە، بەڵام پێدەچێت مەبەستی ئەمریکا بێت.
 
وەزیری دەرەوەی ئیسرائیل، ئەڤیگدۆر لیبەرمان لە جوولەکەکانی رووسایە و لە ساڵی ٢٠١٣ پۆستی وەزیری دەرەوەی ئیسرائیلی وەرگرتووە.</sup> 

^11/3/2015

<sup>ڕێکخراوی جایکای ژاپۆنی لە باشووری کوردستانە، بۆ گەشەپێدانی کەرتی کشوکاڵی بە تەکنیکی تازە و توێژینەوەی زانستی لەو بوارە، لەسەر خاک و ئاو و هەوای کوردستان، بەمەش باشووری کوردستان دەبێتە 150مین ناوچەی جیهان کە جایکا چالاکی کشتوکاڵی تێدا دەکات، بە تایبەتیش لە بواری پەرەپێدانی تەکنیک و پێشکەشکردنی قەرزی کشتوکاڵی.

راوێژکارانی رێکخراوە ژاپۆنییەکە دەڵێن ئەگەر جوتیارانی کوردستان واز لە شێوازە کلاسیکییەکە بێنن و بەکەڵک وەرگرتن لە زانست و کەرەستەی سەردەمییانە کشتوکاڵ بکەن، ئیدی پێویست ناکات، هیچ بەروبوومێکی کشتوکاڵی لە دەرەوە هاوردە بکرێت، بەمەش بەرهەمی نێوخۆیی شوێنی بەرهەمی دەرەوە دەگرێتەوە.

لە باشووری کوردستان زۆربەی ئەو بەرهەمە کشتوکاڵییانەی هەن، وەرزین و جوتیاران تەنیا لە یەک یان دوو وەرزی ساڵدا بەرهەمیان دەبێت. ژاپۆنییەکان هەوڵدەدەن دوای دەستنیشکانکردنی گرفتە کشتوکاڵییەکان، بەهێنانی تەکنیک و کەرەستەی نوێی کشتوکاڵی، جوتیارانی باشووری کوردستان لەسەر ئەوە رابێنن کە لەهەر چوار وەرزی ساڵدا بەرهەمیان هەبێت.</sup> 

^11/3/2015