به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
ژمارەیەک وڵاتی عەرەبی لەبەر هۆکاری ئەمنی و سیاسی بە نهێنی هاوکاری سەربازیی و لۆجیستی عێراقیان کردووە لە شەڕی دژی داعش.
ماجید غەڕاوی، ئەندامی لیژنەی ئاسایش و بەرگریی پەرلەمانی عێراق لە لێدوانێکی رۆژنامەوانیدا رایگەیاند، کۆمەڵێک وڵاتی عەرەبی کە لە مەترسی داعش تێگەیشتوون بۆ سەر ناوچەکە، هاوکاری دارایی و سەربازيی و لۆجیستیان پێشکەشی عێراق کردووە بۆ ئەوەی بتوانێت رووبەڕووی داعش ببێتەوە.
بە گوتەی ئەو ئەندامەی لیژنەی ئاسایش و بەرگریی عێراق، پشتیوانی وڵاتانی عەرەبی بۆ عێراق لەشەڕی دژی داعش بەمەبەستی لاوازکردنی رێکخراوەکەیە هەنگاو بە هەنگاو و دواتر لەناوبردنی.
غەڕاوی ئاماژەی بۆ کوەیت و ئیمارات کرد لەنێو ئەو وڵاتانەی هاوکاری عێراقیان کردووە، بەڵام لەبەر هۆکاری ئەمنی و سیاسی ناوی ژمارەیەک وڵاتی دیکەی عەرەبی ئاشکرانەکرد.
نزیکەی 6 مانگە پێشمەرگە و هێزە عێراقییەکان لە شەڕێکی سەختدان لەگەڵ چەکدارانی داعش، کە هێزەکانی هاوپەیمانان بە فڕۆکە پشتیوانی ئەو هێزانە دەکەن و ئەو هێزانەی پێشمەرگە و هێزە عێراقییەکان توانیوویانە ژمارەیەک ناوچە لەدەستی ئەو رێکخراوە رزگار بکەن، بەڵام هێشتا رووبەرێکی فراوانی عێراق لەدەستی ئەو چەکدارە تووندڕەوانەدا ماون.
19/1/2015
وەزیری دەرەوەی ئێران هەڵوێست لە لێدوانی بەرپرسێکی باڵای سعودیە وەردەگرێت و سەردانەکەشی کە بڕیاربوو بۆ سعودیە بیکات، هەڵدەوەشێنێتەوە، جێگری وه‌زیری دهرهوهی ئێرانیش دەڵێت " هه‌ندێك هه‌ڵوێست و كردەوەی سعودیه جێگه‌ی نیگه‌رانین به‌تایبه‌ت هه‌وڵه‌كانی دابه‌زاندنی نرخی نه‌وت".
مه‌حه‌مه‌د جه‌واد زه‌ریف، وه‌زیری دهرهوهی ئێران وه‌ك ناڕه‌زایی ده‌ربڕینێك به‌رامبه‌ر لێدوانێكی وه‌زیری دهرهوهی سعودیه، سه‌ردانه‌كه‌ی بۆ ئەو وڵاتە هه‌ڵوه‌شانده‌وه.
له هەڤپەیڤینێكدا له‌گه‌ڵ تەلەڤزیۆنی عاله‌می ئێرانی، حوسێن عه‌بدوڵاهیان، جێگری وه‌زیری دهرهوهی ئێران رایگەیاند، كە ئەو سەردانەی بڕیابوو محه‌مه‌د جه‌واز زه‌ریف له سه‌ر بانگێشتی سعود فه‌یسه‌ڵ، وه‌زیری دهرهوهی سعودیه بۆ ئەو وڵاتە ئەنجامی بدات، به هۆی لێدوانێكی تووند و چاوه‌ڕواننه‌كراوی سعود فه‌یسه‌ڵ له بارەی سووریا، هه‌ڵوه‌شاوه‌ته‌وه.
عه‌بدوڵاهیان ئاشکرایکردووە، ماوەی رابردوو زه‌ریف و فه‌یسه‌ڵ له نیویۆرك كۆبوونه‌وه‌یه‌كیان ئه‌نجامداوه، دواتریش جارێكی دیكە له شاری جه‌ده چاویان بەیەك كەوتووە و فەیسەڵ بانگهێشتنامەیەكی پێشكەشی زه‌ریف كردووه، به‌ڵام به هۆی ئه‌وه‌ی له ژێر گوشاردان ناچارن گەشتەكەیان هه‌ڵبوه‌شێننەوە.
19/1/2015
فراکسیۆنی گۆڕان لە پەرلەمانی کوردستان، شنگال بە بەشێک لە هەرێمی کوردستان ناودەبات و حیزبی سۆسیالیست دیموکراتی کوردستانیش داوادەکەن "هیچ لایەنێک دەستێوەردان لە بەشەکانی دیکەی کوردستان نەکات".
رۆژی چوارشەممە 14/1/2015 ، لە كۆبوونەوەیەكدا، كە بە ئامادەبوونی ژمارەیەك بەرپرسی PKK لە چیای شنگال بەڕێوەچوو، ئەنجوومەنێكی سەربەخۆ بۆ "خۆبەڕێوەبەری دیموكراتی" بۆ شنگال دروستكرا و وەک یەکەمین هەنگاو بۆ دروستکردنی کانتۆنی شنگال ناوی دەهێنرێت، لایەنە سیاسییەکان و حکومەت و پەرلەمان و سەرۆکایەتی هەرێمی کوردستانیش بە تووندی رەتیانکردەوە.
لەو بارەیەوە سەرۆکی فراکسیۆنی گۆڕان لە پەرلەمانی کوردستان لە لێدوانێکدا بۆ تۆڕی میدیایی رووداو گوتی: " ئێمە پێش رووداوەکان ناکەوین و تاوەکو ئێستاش پەکەکە بە رەسمی راینەگەیاندووە کە شنگال دەکاتە کانتۆن".
رابوون مەعرووف دەشڵێ: "ئێمە وەک فراکسیۆنی گۆڕان لە پەرلەمانی کوردستان و وەک بزووتنەوەی گۆڕانیش، شنگال بە بەشێک لە هەرێمی کوردستان دەزانین و لێی جیا ناکرێتەوە، ئێمە رێز لە سنوورە نێودەوڵەتییەکان دەگرین، هەرکاتێکیش ئەم سنوورانە لە رۆژهەڵاتی ناوەڕاست بیەوێت گۆرانکاری تێدا بکرێت دەبێت بە رێککەوتن و لێکتێگەییشتن بێت، لە نێوان هێزە سیاسییەکان و کۆمەڵگەی نیودەوڵەتی، خۆ ناکرێت بۆ خۆمان نەخشەی سنوورەکان بگۆڕین".
هەروەها رزگار غەفوور گوتەبێژی حیزبی سۆسیالیست دیموکراتی کوردستان لە لێدوانێکدا بۆ تۆڕی میدیایی رووداو گوتی" ئێمە باوەڕمان وایە کە کورد یەک نەتەوەیە لە هەرشوێنێک بێت و یەک خاکیشی هەیە، بەڵام واقیعێک لە هەرێمی کوردستان هاتووەتە ئاراوە کە پێویستە هەموو لایەنێک رەچاوی ئەو واقیعە بکات، نابێت هیچ لایەنێکی سیاسی دەستێوەردان بکات لە هیچ بەشێکی دیکەی کوردستان".
18/1/2015
سێ بۆمب لە ئیستانبوڵ لە سێ شوێنی جیاواز دانران و یەکێک لەو بۆمبانە لە گەڕەکی فاتیح تەقییەوە، بەڵام هیچ زیانێکی گیانی لێنەکەوتەوە. هاوکات بۆمبەکانی دیکە، کە لە هەردوو ناوچەی ماڵتەپە و سوڵتان غازی دانرابوون لە رێگەی کۆنتڕۆڵەوە تەقێنرانەوە.
تەقینەوەکەی فاتیح لە بەردەم نەخۆشخانەی کۆلێژی چاپای پزیشکی زانکۆی ئیستەنبوڵ دانرابوو، لە کاژێر 11.00 ی سەرلەبەیانی تەقینەوەکە روویدا، کە لەنێو بگۆڕێکی کارەبا دانرابوو، دوای رووداوەکەش ژمارەیەکی زۆر لە پۆلیس و تیمی پووچەڵکردنەوەی بۆمب رەوانەی شوێنی رووداوەکە کران.
بۆمبێکی دەستیش لە ناوچەی فندکڵی ماڵتەپە لەبەردەم پەیکەری ئەتاتورک، کە کەوتووەتە بەردەم بنکەی پۆلیسی ئەو ناوچەیە دانرابوو، لەسەر بۆمبەکەش نووسرابوو "تۆڵەی جزیرە دەکرێتەوە"، بەڵام لە رێگەی کۆنتڕۆڵەوە تەقێنرایەوە و هیچ زیانێکی لێنەکەوتەوە.
لێکۆڵینەوەی پۆلیس لەوبارەیەوە بەردەوامە و پارچە نەتەقیوەکانی بۆمبەکە بەمەبەستی لێکۆڵینەوە برانە بنکەی پۆلیس.
بۆمبی سێیەم لە ناوچەی سوڵتان غازی لەلایەن چەند کەسێکی دەمامکدارەوە لە شەقامی ئادەم یاوز لە وێستگەیەکی پاس لەنێو پاکێتێکی پێچراوە دانرابوو، شایەتحاڵەکانی رووداوەکە گوتیان کە دوو کەسی دەمامکدار لە وێستگەی پاس کارتۆنێکیان داناوە.
لەسەر ئەو بۆمبەی کە لە سوڵتان پاشا دانرابوو نووسرابوو "رێکخستننی لاوانی شۆڕشگێڕ YDG-H". بۆمبەکە دوای هاتنی ژمارەیەکی زۆر پۆلیس و تیمی پووچەڵکردنەوەی تەقینەوە لەرێگەی کۆنتڕۆڵەوە تەقێنرایەوە، کە بە بوتڵێکی غازی بچووکەوە بەسترابوو.
18/1/2015
دوای چەندساڵ کەمڕەنگبوونەوەی چالاکییەکانیان، دوانیوەڕۆی رۆژی پێنجشەممە لە کانون تەوحیدی شاری تاران، گەورەترین کۆنفرانسی لایەنە ریفۆرمخوازەکانی ئێران بەڕێوەچوو. ئەو کۆنفرانسە لەلایەن ئەنجوومەنی هاوئاهەنگی بەرەی ریفۆرمخوازانەوە رێکخرابوو و تێیدا نزیکەی 20 دامەزراوە و رێکخراوی ریفۆرمخواز تێیدا بەشداربوون. هەروەها تێیدا پەیامی محەممە خاتەمی، سەرۆک کۆماری پێشووتر و هاشمی رەفسەنجانی، سەرۆکی کۆڕی دەستنیشانکردنی بەرژەوەندییە باڵاکانی ئێرانیش خوێندرایەوە.
ریفۆرمخوازانی ئێران کە دەڵێن ماوەی هەشت ساڵەی سەرۆک کۆماری مەحمود ئەحمەدی نەژادیان بە تێچوو و قورساییەکی زۆرەوە بەڕێکردووە، دوای هاتنەسەرکاری حەسەن رۆحانیش یەکەمجارە بتوانن رێوڕەسمی لەو شێوەییە بەڕێوە ببەن. رێوڕەسمێک کە لەوانەیە بەر لە هەر شتێک پەیوەندی بە هەڵبژاردنی داهاتووی پەرلەمانی لەو وڵاتە هەبێ و ریفۆرمخوازان دەیانەوێ بە یەکگرتوویی بەرەو پیری ئەو هەڵبژاردنە بچن.
لەو کۆنفرانسەدا ژمارەیەک چالاکڤانی سیاسی رۆژهەڵاتی کوردستانیش کە ئەندامی پێکهاتە ریفرۆمخوازییەکانن بەشداربوون، بەڵام ریفۆرمخوازانی کوردی دەرەوەی حیزبەکان بانگهێشت نەکرابوون.
محەممەد محەممەد رەزایی، نوێنەری پێشووی شاری بیجار بە تۆڕی میدیایی رووداو دەڵێت هەرچەشەنە جووڵەیەک کە ریفۆرمخوازان بۆ گەیشتن بە ئامانجەکانیان کە بریتییە لە سەقامگیرکردنی دیموکراسی و گەشەپێدانی وڵات بیکەن، شیاوی پشتیوانیلێکردنە.
ئەو چالاکڤانەی رۆژهەڵاتی کوردستان ئاماژە بۆ ئەوەشدەکات، چالاکڤانانی سیاسی کورد لە بەڕێوەبەری رێکخراو و پێکهاتە ریفۆرمخوازەکاندا رۆڵی کاریگەر دەگێڕن.
محەممەدرەزایی دەشڵێت خەڵکی کوردستانیش هەمیشە لایەنگری ریفۆرمخوازانیان کردووە و دەنگیشیان پێیداوە، ئەگەرچی بە گوتەی خۆی ئەو کاتەی ریفۆرمخوازان لەدەسەڵاتدا بوونە، بەپێچەوانەی دروشمەکانیان گرینگییەکی ئەوتۆیان بە خواستەکانی خەڵکی کوردستان نەکردووە.
عەبدوڵڵا سۆهرابی، نوێنەری پێشووی شاری مەریوانیش لە پەرلەمانی ئێران پێی وایە کورد پێش ئێرانییەکان ستارتی ریفۆرمخوازی لێداوە و لە بەراوەردی نێوان باڵەکانی نێو دەسەڵاتیش، ریفۆرمخوازان زیاتر لە کورد نزیکن. بەگوتەی عەبدوڵڵا سۆهرابی رەوتی ریفۆرمخوازانیش دانیان بە پێگەی بەهێزی کورد لەو رەوتەدا داناوە. ئەگەرچی جەخت لەسەر ئەوەش دەکاتەوە کە ریفۆرمخوازانیش کێشەیان لەگەڵ مافی نەتەوەیی هەیە، بەڵام لەگەڵ بناژۆخوازان وەکوو یەکیش نین. ئەو پەرلەمانتارەی پێشوو دەڵێت لەکاتی هەڵبژاردنەکاندا بۆ بەدەستهێنانی دەنگ، ریفۆرمخوازان بۆلای کورد دێن بەڵام دوای هەڵبژاردن مەودای لێدەگرن. نموونەش بە حەسەن رۆحانی دێنیتەوە.
لەلایەکی دیکەوە، حامید فەرازی، چالاکڤانی سیاسی لەشاری سنە بە رووداو دەڵێت، بەستێنی ریفۆرمخوازی لەنێو خەڵکی کوردستاندا هەیە، بەڵام نابێ ریفۆرمخوازی لەچوارێچێوەی لایەنێک یا رەوتێکی سیاسی بەرتەسک بکرێتەوە. رەخنەش لە ریفۆرمخوازانی کورد دەگرێ و دەڵێت ئەوان خاوەنی ستراتیژییەکی روون نین و لە ئاکامدا ناتوانن بۆ بزووتنەوەی کورد کە بزووتنەوەیەکی شوناسخواز و رزگاریخواز هیچیان پێبێ و رێبەری ئەو بزوتنەوە بکەن و خەڵکیش وەدوای ئەو بیرۆکەیە ناکەوێ. بەگوتەی فەرازی، لە هەڵبژاردنەکانیشدا کە خەڵک بژاردەی زۆری لەبەردەست نییە لە بەرامبەر بناژۆخوازاندا دەنگ بە ریفۆرمخوازان دەدا. ئەو چالاکڤانە سیاسییە دەڵێت، ئێمە خاوەنی بزووتنەوەیەکی سیاسی و کۆمەڵایەتین و هەر رەوتێکی سیاسی لە کوردستان ئەگەر نەتوانێ هەڵسوکەوت لەگەڵ ئەو بزووتنەوەیە بکا، شانسی سەرکەوتنی کەمە.
17/1/2015
ئەنجوومەنی وەزیرانی هەرێمی كوردستان لەبارەی دروستکردنی ئەنجوومەنی بەڕێوەبەریی و کانتۆنی شنگال لەلایەن پەکەکەوە، رایگەیاند، "كارێكی نایاساییە و بە پێچەوانەی دەستوور و یاسا كارپێكراوەكانی كوردستان و عێراقی دەبینین و ئەو دەستوەردانانە لە كاروباری كوردستانی عێراقدا قبوڵكراو نین".
ئەنجوومەنی وەزیرانی هەرێمی كوردستان لە راگەیەندراوێكدا هەوڵەكانی دروستكردنی ئەنجوومەن و "ئیدارەی نایاسایی'' لە دەڤەری شنگال ئیدانە كرد و رایدەگەیەنێت: "مەینەتییەكانی ئەو دەڤەرە نابێ به شێوەیەكی سیاسیی و حیزبی، مامەڵەیان پێوە بكرێت، كە لە ئەنجام دا له جیاتی ساڕێژكردنی برینەكانی، ئاڵۆزییەكی سیاسی و ئیداری لە دەڤەرەكەدا دروستبكات".
رۆژی چوارشەممە 14/1/2015 ، لە كۆبوونەوەیەكدا، كە بە ئامادەبوونی ژمارەیەك بەرپرسی PKK لە چیای شنگال بەڕێوەچوو، وەك یەكەمین هەنگاو بۆ دروستكردنی كانتۆنی شەنگال ، ئەنجوومەنێكی سەربەخۆ بۆ "خۆبەڕێوەبەری دیموكراتی" بۆ شنگال دروستكرا .
ئەو ئەنجوومەنە لە 27 كەس پێكدێت، كە هەروەك میدیای PKK دەڵێت ، ئەو ئەنجوومەنە بناخەی ئیدارەی كانتۆنی شنگال دادەنێت ، ناوی ئەنجوومەنەكەش ئێستا بریتییە لە (ئەنجوومەنی ئێزدییەكانی شنگال).
بەپێی هەواڵی میدیای PKK، ئەو 27 كەسە نوێنەرایەتی پەنابەرانی كوردی ئێزدی كامپی نەورۆز لە دێرك ، كوردانی ئێزدی كامپەكانی باشووری كوردستان و چیای شنگال دەكەن.
دەقی راگەیەندراوەكە:
راگەیەندراوی ئەنجوومەنی وەزیرانی هەرێمی كوردستان سەبارەت بە هەوڵەكانی شێواندنی دۆخی دەڤەری شنگال:
دەڤەری شەنگال لە دوای هێرشی تیرۆریستانی داعشەوە لە 2014/8/3دا، لە دۆخێكی زۆر ناخۆشدا دەژیت، كە ئێستاش هەموو گەلی كوردستان وەك برینێكی نوێ لە جەستەی كوردستاندا تەماشای كۆمەڵكوژی و ڕفاندنی ئافرەتانی كوردی ئێزدی دەكات لەو دەڤەرەدا.
هەر لەبەر ئەو برینە سەختەشە، بەڕێز مەسعوود بارزانی سەرۆكی هەرێمی كوردستان و فەرماندەی گشتیی هێزی پێشمەرگە، به خۆی ڕاستەوخۆ سەرپەرشتیی پلان و هێرشەكانی هێزی پێشمەرگەی كردووە و دەكات دژی چەكدارانی داعش لەو دەڤەرەدا. هەروەها حكوومەتی هەرێمی كوردستانیش، هەرچی لە توانایدا بووە لەو دۆخە ناهەموارەدا كردوویەتی بۆ بەهاناوەچوونی خەڵكی دەڤەرەكە و گەڕاندنەوەی كچان و ژنانی كوردی ئێزدی، كە ئێستاش ژمارەیەكی زۆریان لە دەست تیرۆریستانی داعشدان. هەروەها حكوومەتی هەرێمی كوردستان هەوڵی خۆی لە ڕێگەی لیژنەیەكەوە خستووەتە گەڕ، لەپێناو بەجینۆسایدناساندنی ئەو كۆمەڵكوژی و ڕفاندنە بەكۆمەڵەی لەو دەڤەرەدا كراون، كە ئەنفالێكی نوێیە بەرامبەر كوردانی ئێزدی ئەنجام دراوە.
ئێمە لە ئەنجومەنی وەزیرانی هەرێمی كوردستان، سوپاسی هاوكاریی شەڕڤانانی یەكینەكانی پاراستنی گەل دەكەین، كە بوونە هاوكاری پێشمەرگە له سەرەتای هێرشی داعشدا بۆ ڕزگاركردنی كوردانی ئاوارەبووی دەڤەری شەنگال، بەڵام ئێمە لە ڕوانگەی یاسایی و دەستوورییەوە ڕایدەگەیەنین هەوڵی پارتی كرێكارانی كوردستان لە ڕۆژی 14/1/2015دا بۆ دروستكردنی ئەنجومەن و ئیدارەیەك بۆ دەڤەری شەنگال، بە كارێكی نایاسایی و پێچەوانەی دەستوور و یاسا كارپێكراوەكانی كوردستان و عێراق دەبینین و ئەو دەستوەردانانە لە كاروباری كوردستانی عێراقدا قبوڵكراو نین و دەبێ پارتی كرێكارانی كوردستان بە تەواوی لەو دەستوەردانانە لە كاروباری كوردستانی عێراقدا دوور بكەوێتەوە. نابێ مامەڵەی سیاسی و حزبی بە مەینەتییەكانی ئەو دەڤەرە بریندارەوە بكرێت، لەبەر ئەوەی كارێكی نایاساییە و دەبێتە دروستبوونی ئاڵۆزیی سیاسی و ئیداری.
هەرێمی كوردستان و عێراق خاوەن دەزگای دەستووری و شەرعیی خۆیەتی، كوردانی ئێزدی و دەڤەری شەنگالیش خاوەن نوێنەری خۆیانن لە پەرلەمانی كوردستان و ئەنجومەنی نوێنەرانی عێراق و ئەنجومەنی پارێزگای نەینەوادا. بۆیەش هەموو كارێك كە ئێستا و ئایندە بكرێت لە ڕێگەی دەزگا شەرعییەكانی هەرێمی كوردستان و عێراقەوە بۆ دەڤەری شەنگال ئەنجام دەدرێن، نەك لە ڕێگەی نایاسایی و دەستوەردانی ناپەسەندكراوەوە. ئێمە لە ئەنجومەنی وەزیرانی هەرێمی كوردستان، هەموو هەوڵێكمان بۆ ئەوەیە كە هاوكاریی خەڵكی بەشەكانی دیكەی كوردستان لەگەڵ دەڤەری شەنگال و ناوچەكانی دیكەی كوردستانی عێراق، ببێتە هۆی باشتربوونی پەیوەندییەكان و تێكەڵاویی باشتر، نەك دروستبوونی دووبەرەكی و ئاڵۆزی، بۆیەش داوا لە پارتی كرێكارانی كوردستان دەكەین، دەستبەجێ ئەو هەوڵە نایاساییانەی، لە كوردستانی عێراقدا بوەستێنێت.
هەر لێرەشدا جەخت لەسەر لێدوانەكانی بەڕێزان میری كوردانی ئێزدی و پیاوانی ئایینی و كەسایەتییەكانی كوردی ئێزدی دەكەینەوە، كە ئەو دەستوەردانە دەبێتە هۆی ئاڵۆزی لە دەڤەری شەنگالدا و لە ئەنجامدا كوردستانی عێراق و دەڤەری شەنگال بەتایبەتی لێی زەرەرمەند دەبێت، بۆیە دەبێ كۆتایی بە هەر جۆرە هەوڵێكی لەو جۆرە بهێنرێت.
هێزی پێشمەرگە لە هەوڵی كۆنترۆڵكردنەوەی تەواوەتیی دەڤەری شەنگالدایە، هەروەها حكوومەتی هەرێمی كوردستان لە هەوڵەكانی بۆ یارمەتیدانی خەڵكی دەڤەرەكە و ئاوەدانكردنەوەی ئەو دەڤەرە خۆشەویستە بەردەوام دەبێت، بۆ ئەو مەبەستە لەگەڵ حكوومەتی فیدرالی عێراقیشدا لە هەوڵداندایە.
لە هەمان كاتدا ئەنجومەنی وەزیران لەو پێشنازەش دەكۆڵێتەوە كە داوا دەكات شەنگال بكرێتە پارێزگایەكی دیكە، ئەوەش به شێوەیەكی یاسایی و دەستووری و بەپێی ڕێوشوێنە یاسایی و دەستوورییەكان، لەگەڵ حكوومەتی فیدرالی عێراقدا باس دەكات، هەموو جۆرە گفتوگۆیەكیش لەوبارەیەوە بە ئاگاداری و بەشداریی ئەنجومەنی پارێزگای نەینەوا دەبێت.
ئەنجومەنی وەزیرانی هەرێمی كوردستان
17/1/2015
چەند چەكدارێكی نەناسراو لە نزیك بارەگای ئەمیندارێتی گشتی سەرۆكایەتی كۆماری یەمەن، بەڕێوەبەری نووسینگەی سەرۆککۆماریان رفاندووە.
میدیا نێوخۆییەكانی یەمەن رایانگەیاند، ''سەرلەبەیانی ئەمڕۆ 17/1/2015، چەند چەكدارێكی نەناسراو بە جلوبەرگی سەربازی و مەدەنی ئەحمەد عەوز موبارەك، بەڕێوەبەری نووسینگەی سەرۆككۆماری یەمەنیان لە نزیك بارەگای ئەمیندراێتی گشتی سەرۆكایەتی یەمەن لە سەنعای پایتەخت رفاند''.
ئەحمەد عەوز موبارەك، جگە لەوەی بەڕێوەبەری نووسینگەی سەرۆككۆمار بووە، هاوكات ئەمینداری گشتی حیزبی كۆنگرەی یەمەن بووە، ئەم رووداوەش دوای ئەوە دێت، كە چەكدارانی حوسی دەستیان بەسەر زۆربەی دامودەزگاكانی یەمەندا گرتووە.
17/1/2015
هێرشەکی پاریس و کوشتنی 17 فەرەنسی لەلایەن ئیسلامییە تووندئاژۆکان، دەزگای هەواڵگریی و پۆلیسی ئەوروپای بەئاگاهێناو ئەمڕۆ هەینی 16-1-2015 دەیان کەس لە ئەڵمانیا و بەلجیکا و فەرەنسا دەستگیرکران.
بەلجیکا
لە بەلجیکا پۆلیس شانەیەكی نوستووی گرووپێکی ئیسلامی توندئاژۆ ( گورگە تەنهاکان) هەڵدەوەشێنێتەوە، لە کاتی هەڵکوتانە سەریشیان دوو کەس لە تووندئاژۆكان دەکوژرێن و کەسێکی دیکەش بە برینداری دەستگیردەکرێت.
داواکاری گشتیی بەلجیکا رایگەیاند ئەو چەکدارانە پێشتر لە سووریا شەڕیانکردووە و دواتر گەڕاونەتەوە بۆ بەلجیکا، بۆ ئەنجامدانی کردەوەیەکی تیرۆرستیش پیلانیان داڕشتووە.
ئۆپەراسیۆنەکە لە ناوچەی ڤێرڤیە لە نزیک سنووری ئەڵمانیا ئەنجامدرا. ئێرک ڤان در سیبت، داواکاری گشتیی بەلجیکا رایگەیاند جگە لە کوژرانی ئەو دوو کەسە، کەسێکی دیکەش بە برینداری گیراوە. بە گوتەی پۆلیس 10 ئۆپەراسیۆنی جیاواز لە بەلجیکا دژ بە شانە نووستووەکانی ئیسلامییەکان ئەنجامدراون، بەڵام پۆلیس رەتیکردەوە هیچ پەیوەندییەک لە نێوان کردەوەکەی پاریس و ئەو شانە نووستووەی بەلجیکا هەبێت.
فەرەنسا
لە پاریس هێزەکانی پۆلیسی فەرەنسا لە باشووری هەرێمی مۆنتریۆگ 13 کەسیان بە تۆمەتی ئەوەی پەیوەندییان بە رووداوەکانی هەفتەی رابردووەوە هەبووە، دەستگیرکردوون.
ئەمڕۆ 16 ی کانوونی دووەم لەگەڵ گەیشتنی جۆن کێری، وەزیری دەرەوەی ویلایەتە یەکگرتوەکانی ئەمریکا بۆ فەرەنسا 13 کەس لە باشووری هەرێمی مۆنتێریۆگ دەستگیرکران، هێزەکانی ئەو وڵاتە رایانگەیاندووە کە ئەو 13 کەسە پەیوەندییان بە رووداوەکانی هەفتەی رابردووی پاریسەوە هەبووە کە لە 7ی کانوونی دووەمەوە هێرشیان كردە سەر گۆڤاری شارلی ئێبدۆ و بەهۆی ئەو رووداوە و رووداوەكانی چەند رۆژ دواتری 17 كەس كوژران، ئەو کەسانەی دەستگیرکراون هاوکاری چەکدارەکانی دیکەیان کردووە بۆ ئەنجامدانی ئەو هێرشانە.
ئەم ئۆپەراسیۆنانەی هێزەکانی پۆلیسی فەرەنسا لە کاتێکدایە کە جۆن کێری گەیشتووەتە فەرەنسا و بڕیارە لەگەڵ فرانسوا ئۆلاندی سەرۆکی ئەو وڵاتە کۆببێتەوە.
ئەڵمانیا
لە ئەڵمانیا هاوشێوەی فەرەنسا و پاریس پۆلیس چاودێری ئەو کەسانە دەکات کە گومان دەکرێت پەیوەندییان بە داعشەوە هەبێت. پۆلیسی ئەڵمانیا لە بەرلینی پایتەختەوە دوو کەسیان دەستگیرکردوون کە گومان دەکرێت هاوکاریی دارایی داعشیان کردبێت و ژمارەیەک گەنجی ئەو وڵاتەشیان رەوانەی سووریا کردبن بۆ پەیوەندیکردنیان بەداعشەوە.
سەرلەبەیانی ئەمڕۆ پۆلیسی دژە تیرۆری ئەڵمانیا کە ژمارەیان 250 کەس دەبوو،
11 ماڵیان لە بەرلین پشکنین و دوو کەسیشیان بە گومانی هاوكاریكردنی داعش دەستیگرکردن. بەپێی میدیاکانی ئەڵمانیا ماڵی ئەو دوو کەسە لە ناوچەی موئابیدی بەرلینە لە نزیک ناوەندی کولتووری تورک و هەردووکیان تورکن.
لە لایەکی دیکەوە لە شاری فۆڵسبۆرگی ویلایەتی سەکسۆنیای خواروو، کەسێکی تەمەن 26 ساڵ کە بەڕەچەڵەک تونسییە دەستگیرکراوە، داواکاری گشتیی ئەڵمانیا رایگەیاندووە، ئەو کەسە لە ریزی چەکدارانی داعش لە سووریا گەڕاوەتەوە، بەڵام هێشتا هیچ بەڵگەیەک نییە لەسەر ئەوەی کە پلانی ئەنجامدانی هێرشی داڕشتبێت.
16/1/2015
پارتی كرێكارانی كوردستان PKK ، لە چیای شنگال ئەنجوومەنێكی بۆ كانتۆنی شەنگال دروستكرد . كە PKK ئەوە بە " هەنگاوێكی مێژوویی " بۆ كوردانی ئێزدی ناودەنێت ،لەپێناو " خۆبەڕێوەبەری دیموكراتی" هەروەك PKK ناویناوە .
رۆژی چوارشەممە 14/1/2015 ، لە كۆبوونەوەیەكدا كە بە ئامادەبوونی ژمارەیەك بەرپرسی PKK لە چیای شنگال بەڕێوەچوو ، وەك یەكەمین هەنگاو بۆ دروستكردنی كانتۆنی شەنگال ، ئەنجوومەنێكی سەربەخۆ بۆ "خۆبەڕێوەبەری دیموكراتی" بۆ شنگال دروستكرا .
ئەو ئەنجوومەنە لە 27 كەس پێكدێت ، كە هەروەك میدیایی PKK دەڵێت ، ئەو ئەنجوومەنە بناخەی ئیدارەی كانتۆنی شەنگال دادەنێت ، ناوی ئەنجوومەنەكەش ئێستا بریتییە لە (ئەنجوومەنی ئێزدییەكانی شنگال) ، كە هەروەك میدیایی PKK بڵاویكردووەتەوە ، ئەو 27 كەسە نوێنەرایەتی پەنابەرانی كوردی ئێزدی كامپی نەورۆز لە دێرك ، كوردانی ئێزدی كامپەكانی باشووری كوردستان و چیای شنگال دەكەن .
لەو كۆنفرانسەدا كە لە ژێر ناوی ( خۆبەڕێوەبەری دیموكراتی ئیرادەی ئێمەیە ) سازكرا ، ژمارەیەك بەرپرسی PKK و ژمارەیەك كوردی ئێزدی دەڤەری شنگال تێیدا ئامادەبوون ، كە میدیای PKK دەڵێ جگە لە ئامادەبوونی 200 نوێنەری ئێزدی شەنگال ، حوسێن دەرمان جێگری بەرپرسی مەڵبەندی موسڵی یەكێتی نیشتمانیی كوردستانیش تێیدا ئامادەبوو، هەروەها نوێنەری هەندێ كۆمەڵە و پارتی كوردانی ئێزدی نزیك لە PKیش تێیدا بەشداربوون .
هەروەك میدیای PKK بڵاویكردووەتەوە ، حوسێن دەرمان جێگری بەرپرسی مەڵبەندی موسڵی یەكێتی لەو كۆبوونەوەیەدا ، بەناوی یەكێتییەوە قسەیكردووەو گوتوویەتی : دەستخۆشی لەبەستی ئەم كۆبوونەوەیە دەكەم و، دەبووایە زووتر ببەسترێت و ئێمە وەك یەكێتی لەگەڵ ئیرادەی گەلداین، ئێمە نامانەوێت شەنگال بگەڕێتەوە بۆ شەنگالی پێش 3ی ئاب، دەبێ خەڵك ئازادانە بۆچوونی خۆی و ئیرادەی خۆی دەربڕێت و كەس هیچ شتێكیان بەسەردا نەسەپێنێ. ئێمە وەك یەكێتی لەحكومەتی هەرێمی كوردستاندا بەشدارین ، بەڵام هەمیشە گوزارشت لە خۆمان و حیزبەكەمان دەكەین، سیاسەتی ئێمە روونەوە داوای یەكبوون و ئازادی بۆ هەرچوارپارچەی كوردستان دەكەین، دەبێ بەهەموو جۆرێك گەل ئازاد بێت لە بۆچوون و هەڵبژاردنی خۆی.
لەو كۆبوونەوەیەدا ، پێنج كۆمیتە دروستكران ، هەروەك میدیای PKK دەڵێ " ئەو كۆمیتانە بە مەبەستی رێكخستنی كۆمەڵگەی ئێزدییەكان" دروستكراون . كە بریتین لە كۆمیتەكانی : رێككەوتن و رێكخستن، بەرگری، ئابووری و دارایی ، دیپلۆماسی . هەروەها بۆ دیاریكردنی چارەنووسی ئەو كەسانەی كە لەلایەن داعشەوە بەدیلگیراون، كۆمیتەی لێكۆلینەوە لە راستییەكان لەو كۆبوونەوەیەدا دروستكراوە .
هەروەك بەرپرسێكی PKK لەو كۆبوونەوەیەدا رایگەیاند ، ئەوان دەیانەوێ ئێزدییەكانی هەموو پارچەكانی كوردستان و ئەوروپا لە دەوری ئەو ئەنجوومەنە كۆببنەوە.
چاوەڕواندەكرێت كە ئەو هەنگاوەی PKK ، كاردانەوەی جیاجیای لێبكەوێتەوە.
rudaw
16/1/2015
جێگرى سه‌رۆك كۆمار، له‌باره‌ى هۆكارى ده‌ستبه‌سه‌راگرتنى شارى موسڵ له‌لایه‌ن داعش_ه‌وه، له تۆمه‌ته‌كانى پێشووى په‌شیمان ده‌بێته‌وه و رایده‌گه‌یه‌نێت، كه هۆكارى كه‌وتنى ئه‌و شاره، به‌هارى عه‌ره‌بى بووه.
نورى مالیكی، جێگرى سه‌رۆك كۆمارى عیراق، له‌نوێترین لێدوانیدا له‌باره‌ى هۆكاره‌كانى كه‌وتنى شارى موسڵ، ئه‌مڕۆ په‌یامێكى بڵاوكرده‌وه و رایگه‌یاند :" كه‌وتنى شارى موسڵ به‌ده‌ستى داعش، به‌هۆى ئه‌و ئه‌و ره‌شه‌بایه‌وه بوو كه ناوى نراوه به‌هارى عه‌ره‌بى".
مالیكی، كه له كاتى هاتنى داعش و گرتنى شارى موسڵ و چه‌ند شار و شارۆچكه‌یه‌كی تر، سه‌رۆكى حكومه‌ت بوو، ئه‌وكات تۆمه‌تى ئه‌وه‌ى دایه پاڵ سه‌ركرده سیاسییه‌كان و ئه‌فسه‌ره باڵاكان، كه به پیلانى ئه‌وان داعش توانیویه‌تى موسڵ بگرێت.
له راگه‌یه‌ندراوه‌كه‌یدا، كه له‌دواى سه‌ردانێكى بۆ پارێزگاى به‌سره بڵاویكردووه‌ته‌وه و وێنه‌یه‌كی ده‌ست خه‌ندان كه‌وتووه، مالیكی، ده‌ڵێت :" عیراق سه‌ر له‌نوێ هه‌ستاوه‌ته‌وه، ئه‌مه‌ش دواى ئه‌و وێرانییه‌ى كه رژێمى پێشووى به‌عس بۆمانى به‌جێهێشتبوو".
دواى هاتنى داعش له حوزه‌یرانى ساڵى رابردوو، چه‌ندین ئه‌فسه‌رى پله باڵا تۆمه‌تبار كران به‌وه‌ى نه‌یانتوانیوه وه‌كو پێویست ئه‌ركه‌كانیان به‌جێبگه‌یه‌نن، بۆیه به‌شێكیان رووبه‌ڕووى دادگا كرانه‌وه و به‌شێكیشیان له پۆسته‌كانیان دوورخرانه‌وه و خانه‌نشین كران.
مالیكی، ته‌ئكیدی له‌سه‌ر ئه‌وه ده‌كرده‌وه، كه تا ئێستاش عیراق له‌ناو هاوكێشه نێوده‌وڵه‌تییه‌كاندایه، به‌ڵام وه‌كخۆى وتى :" ئه‌وانه‌ى باوه‌ڕیان به دیموكراسى نییه نایانه‌وێت عیراق به‌ته‌واوه‌تى هه‌ستێته‌وه، بۆیه پیلانیان له‌دژ گێڕا، ئه‌مه‌ش دواى ئه‌وه‌ى توانیمان قۆناغى به‌عس تێبپه‌ڕێنین و سه‌ربكه‌وین له‌گه‌ڕانه‌وه‌ى ئاسایش و سه‌قامگیری و ده‌ستمانكرد به ئاوه‌دانكردنه‌وه".
16/1/2015
شێخێکی عەشیرەتەکانی پارێزگای نەینەوا رایدەگەیێنێت، ئەبوبەکر بەغدادی بریندارە و بەهۆی برینەکەشیەوە گەیێندراوەتە نەخۆشخانەی نەینەوا، لەوێشەوە گواستراوەتەوە نەخۆشخانەی دێرەزوور لە سووریا.
شێخ یونس جبووری، یەکێک لە شێخەکانی عەشیرەتی جبوور لە پارێزگای نەینەوا ئەمڕۆ پێنجشەممە 15ی کانوونی دووەمی 2015 رایگەیاند:" ئەبوبەکر بەغدادی، خەلیفەی رێکخراوەی دەوڵەتی ئیسلامی ناسراو بە (داعش) بریندارە و بەهۆی برینەکەشیەوە گەیێندراوەتە نەخۆشخانەی نەینەوا، لەوێشەوە گواستراوەتەوە نەخۆشخانەی دێرەزوور لە سووریا".
جبووری ئاماژە بەوە دەدات ئەندامانی رێکخراوەکە نهێنیی سەرکردەکانیان دادەپۆشن، بۆیەش خزمەتگوزاری مۆبایل و ئینتەرنێتیان راگرتووە، بۆ ئەوەی رێگری لە گواستنەوەی زانیارییەکانی نێو رێکخراوەکە بکەن.
ئەمڕۆ لە چەندین ماڵەپەڕ لەسەر زاری سەرچاوە پزیشکییەکان لە پارێزگای نەینەوا، هەواڵی برینداربوونی ئەبوبەکر بەغدادی لە ئەنجامی بۆردوومانی فڕۆکە جەنگییەکانی هاوپەیمانان بڵاوکرایەوە، بەڵام تا ئێستا نە ڕێكخراوەکەو نە لایەنە فەرمییەکان هەواڵی برینداربوونی بەغدادیان پشتڕاست نەکردووەتەوە.
16/1/2015
گوته‌بێژی وه‌زاره‌تی دهرهوهی ئێران هۆشداری دەداتە بەرپرسانی ئه‌مریکا بەتایبەتی کۆمارییەکان، کە گەمارۆی زیاتر نەخەنە سەر ئێران و دەڵێت "ئەمریکا هەڵەکانی رابردوو دووبارە نەکاتەوە".
مه‌رزییه ئه‌فخه‌م، گوته‌بێژی وه‌زاره‌تی دهرهوهی ئێران ئەمڕۆ چوارشەممە له پرێس کۆنفرانسێکدا لە تاران، سه‌باره‌ت به هه‌ڕه‌شه‌ی کۆمارییەکانی ئه‌مریکا دژ به ئێران بۆ سه‌پاندنی گەمارۆی زیاتر بۆ سەر ئەو وڵاتە و کاریگه‌ری ئه‌و هه‌ڕه‌شانه له‌سه‌ر دانوستاندنه‌کانی ئێران و گرووپی 1+5 گوتی:" دووبارەکردنەوەی هەڵەکان لەلایەن ئەمریکاوە بە سەپاندنی سزای زیاتر بەسەر ئێراندا، کاریگەری نەرێنی دەبێت بۆسەر دانوستاندنەکان".
گوته‌بێژی وه‌زاره‌تی دهرهوهی ئێران گوتیشی:" دانوستاندنی ئه‌تۆمی نێوان ئێران و گرووپی 1+5 له خولی نوێدا به‌رده‌وامه و دوو لایه‌ن رێککه‌وتوون که بگه‌نه چوارچێوەیەکی سیاسی تا به‌پێی ئەو چوارچێوه‌یە بتوانن رەهەندەکان لێکبده‌نه‌وه."
ئه‌فخه‌م جەختی لەوە کردووەتەوە کە به گشتی گه‌لی ئێران سه‌لماندوویه‌تی به پێی ئامانجه‌کانی خۆی له ره‌وشێکی دیکه‌دا، به‌رنامه‌ی ئابووری، سیاسی و ئاسۆی چالاکییه‌کانی ده‌باته پێشه‌وه.
15/1/2015
پرۆژەیاسای نوێ بۆ رووبەڕووبوونەوەی تیرۆریزم و پاراستنی ئاسایشی بەریتانیا، دەسەڵاتی ئەوە بە بەرپرسانی باڵای بەریتانیا دەدات پاسپۆرتی ئەو کەسانە کانسڵ بکەنەوە، کە پێیان وایە بۆ شەڕ دەچن یاخود لە شەڕ دەگەڕێنەوە، هەروەها فشار بۆ دابینکەرانی ئینتەرنێت بهێنێت، کە داتای زیاتر لای خۆیان زەخیرە بکەن.
ئەم پرۆژەیاسایانە جارێکی دیکە بوونەوە هۆی دروستکردنی مشتومڕ بۆ پەسەندکردن یاخود نەکردنی لەنێوان پارتەکانی بەریتانیا و سەبارەت بە پرۆژەیاسای نوێ بۆ بواری پەیوەندی ، یان ئەوەی کە لە بەریتانیا بە سنوپەرس چارتەر ناودەبرێت، کە لەلایەن پارتی لیبراڵ دیموکراتی بەریتانیاوە رەتکرابووەوە لە ساڵی 2012.
بەپێی ئەو پرۆژە یاسایە بەرپرسان دەتوانن بچنە نێو ئیمەیل و پەیامەکانی سۆشیەڵ میدیا، هەروەها ژمارەی ملیۆنی بەرکاهێنەرانی ئینتەرنێتیش بزانن. ئەو کەسانەی کەمپینەکانیان پێکهێناوە دەڵێن ئەو پڕۆژەیاسایانەی دانراون دەبنە هۆی تێکدانی ئازادی کەسێتی و ئەوان هەوڵدەدەین ئازادی کەسێتی لەم وڵاتە پارێزراوبێت.
سەرەتای ئەم هەفتەیە دەیڤید کامیرۆنی سەرۆکوەزیرانی بەریتانیا لەگەڵ بەرپرسانی باڵای پۆلیس و ئاسایشی کۆبووەوە. ئەوان لەسەر ئەوە رێککەوتن کە دەبێت ئەو هێرشانەی پاریس ببنە هۆکارێک بۆ پەرەدان بە راهینانی دژ بە تیرۆریزم، بەڵام شارەزایان دەڵێن هێرشی لە شێوەی هێرشەکەی پاریس کە بە شێوەیەکی تەکنیکی زۆر سادە بوو، زۆر گرانترە بۆ هێزەکانی ئاسایش بۆ ئەوەی رێگری لێ بکەن.
ئێستا حکومەتی ئەو وڵاتە هیواخوازە ئەم پرۆژەیاسایەی دژ بە تیرۆریزم و پاراستی ئاشتی پێش ئەنجامدانی هەڵبژاردنی گشتی بەریتانیا لە مانگی ئایار كاری پێبکرێت.
سەرۆکوەزیران داوای لە هەردوو هێزەکانی پۆلیس و هێزە سەربازییەکانی وڵاتەکەی کردووە، پێکەوە کاربکەن بۆ ئەوەی دڵنیاببنەوە لەوەی وەڵامی هەرهێرشێک دەدەنەوە بە خێراترین کات و رەوشەکە کۆنترۆڵ دەکەن. ئاستی هەرەشەی تیرۆر لە بەریتانیا وەک خۆی دەمێنێتەوە و هێشتا هەڕەشەیەکی مەترسیدارە، واتە ئەگەری هێرشی توندوتیژی زۆر بە فراوانی لە ئارادایە.
rudaw
15/1/2015
رۆژنامەیەکی ئەڵمانی رایگەیاندووە، کە سیخوڕێكی دەزگای هەواڵگری ئەڵمانیاBND، كە گوماندەکرێ هاوكات كاری بۆ دەزگای هەواڵگری ئەمریكا CIA كردووە، لیستی ناوی سێ هەزار و 500 سیخوڕی دزیوە و گوماندەكرێت لیستەكەی فرۆشبێتە CIA یان دەزگایەكی هەواڵگری دیکە.
ئەو زانیارییە لە رۆژنامەی BILD ی ئەڵمانی بڵاوكراوەتەوە، كە لە زاری چەند سەرچاوەیەكی هەواڵگری ئەڵمانیاوە دەستیكەوتووە، لە لیستەكەدا ناوی راستەقینەی ژمارەیەك سیخوڕ و هەندێكی دیكەش، کە ناویان بەشێوەی كۆد نووسراوە، هاتووە.
گومانی ئەوەدەكرێت، زانیارییەکان لەلایەن MARKUS R، کارمەندی هەواڵگری ئەڵمانیا، كە لە هاوینی 2014 لەلایەن دەزگای هەواڵگری ئەڵمانیا دەستگیركرابوو، دزرابێت و لیستەكەی فرۆشبێتە دەزگایەكی دیكەی هەواڵگری، ئەوا سێ هەزار و 500 سیخوڕی دیکەی دەزگای هەواڵگری ئەڵمانیا ناویان ئاشكرا دەبێت.
گۆڤاری DER SPIEGELی ئەڵمانی نووسیویەتی: "ماركۆس ر.، كە تەمەنی 31 ساڵە، لە ساڵی 2010ـەوە بۆ دەزگای هەواڵگری ئەمریكا كاریكردووە و لەبەرامبەریشدا 75.000 یۆرۆی وەرگرتووە، لیستە دزراوەكە لیستی ساڵی 2011یە و تایبەتە بە سیخوڕەكانی "دەرەوەی وڵات". ماركۆس ئەو لیستەی لە ماڵەكەی خۆیدا لەسەر دیسكێكی كۆمپیوتەرە كەسییەكەی، هەڵگرتبوو.
ماركۆس لە بەشی هەواڵگری دەرەوەی وڵات كاری كردووە، بەوە تۆمەتبار دەكرێت، كە بەلایەنی كەمەوە 208 راپۆرتی دەزگای هەواڵگری ئەڵمانیای فرۆشتبێتە CIA.
بەپێی زانیارییەكانی گۆڤاری DER SPIEGEL، ماركۆس لەلایەن باڵیۆزخانەی ئەمریكا لە ڤیەنناوە كاری پێدەكرا، كاری هەواڵدەریی ماركۆس دوای ئەوە ئاشكرابوو، كە لە مانگی نیسانی 2014دا نامەیەكی تایبەتی بە ئیمەیلی googlemail بۆ كونسوڵخانەی رووسیا ناردووە لە مونشن و داوای هاوكاری لێكردوون، ئەو ئیمەیلە دانەخراوە، لەلایەن دەزگای هەواڵگریی ئەڵمانیاوە خوێندراوەتەوە و دوای ئەوە ماركۆس بە فەرمانی دادگا دەستگیركرا.
14/1/2015
ئەمڕۆ پێنجشەممە 15ـی کانوونی دووەمی 2015، دووەمین خولی دادگاییكردنی چالاكانی كەمپینی "بەرگری لە كۆبانێ" لە شاری سنەی رۆژهەڵاتی كوردستان بەڕێوەدەچێت.
ئەو چالاکانە، كە بە تۆمەتبارانی دۆسیەی رۆژی یەكی تشرینی دووەم ناسراون، رۆژی سێشەممە یەكەمین خولی دادگاییكردنیان بەڕێوەچوو.
14 كەس لە چالاكانی مەدەنی شاری سنە كە لە رێپێوانەكانی ئەو شارە بۆ پشتیوانی لە كۆبانێ رۆڵیان هەبوو، ماوەیەك دەستبەسەركران. ئەوان بە دەستتێوەردانی سەید ئەحسەن عەلەوی نوێنەری شاری سنە ئازادكران.
ئەو چالاكانە تۆمەتی "پڕوپاگەندە دژی كۆماری ئیسلامی ئێران و تێكدانی رەوشی گشتی"یان خراوەتەپاڵ.
یەكێك لەو چالاكانە بە رووداوی راگەیاندووە، "لە دادگا زۆر بە خراپی هەڵسوكەوتیان لەگەڵمانكردووە".
رێپێوانەكانی شارەكانی پارێزگای کوردستان و بەتایبەت شاری سنە، بە ئاگاداری و دواتریش لەسەر داواكاریی پارێزگار بەڕێوەچوون.
rudaw
15/1/2015
- داواکاری گشتیی کرماشان: لێکۆڵینەوە لەبارەی لێدانی قوتابیان دەکەین
- هونەرمەندی نەتەوەیی کورد سەید عەلی سەردەشتی لەوڵاتی سوید کۆچیدوایی کرد
- گفتوگۆكانی ئێران و ئەمریكا لە عومان دوای دو کاتژمێر کۆتایی هات
- ئێران شەڕو دانوستانی ناڕاستەوخۆی پێ باشە!
- داواکارییەکانی ئێران و ئەمریکا لەیەکتریی چیە؟
- وەزیری بەرگریی ئیسرائیل هۆشداری دەداتە ئەحمەد شەرع
- وادەی هێرشی ئەمریکا بۆ سەر ئێران ئاشکرا کرا
- دەستووری کاتی سوریا نیگەرانی لایەن کوردییەکان و چاودێرانی لێدەکەوێتەوە
- بارودۆخی نالەباری ئابووریی ئێران پێدەچێت کۆماری ئیسلامی ناچار بکات لەگەڵ سەرۆک ترامپ ڕێککەوتن بکات
- عڕاقچی: هێشتا نامەکەی ترەمپ بە دەستمان نەگەیشتووە
- وەزیری دەرەوەی ئێران دەڵێت بڕیارە نامەکەی ترامپ لە لایەن نێردراوێکی وڵاتێکی عەرەبیەوە بگەیەنرێتە تاران
- مەزڵوم عەبدی و ئەحمەد ئەلشەرع بە ڕێکەوتن دەگەن
- 8ی مارس.. شۆڕشێك لەپێناو مافی ژنان
- سری سورەییا ئۆندەر: باخچهلی پێی گوتم، ڕۆژێک دێت پێکەوە هەڵپەڕکێی ئاشتیی دەکەین
- حكوومهتی ئێران : له‌گه‌ڵ ئهورووپا درێژه به گفتوگۆ ئهتۆمییهكان دهدهین
- عەلی باپیر، سەرۆکی کۆمەڵی دادگەری کوردستان سەبارەت بە پەیامی ئۆجەلان"هیوادارم هەردوولا بە کردەوە بەدەم بانگەوازەکەوە بچن."
- ئەمینداری گشتیی یەکگرتوو پەیامی ئۆجەلان "پەیامێکی پڕ لە بەرپرسیاریەتی و بایەخ و واقعیەتە"
- سەرۆك بافڵ جەلال تاڵەبانی: پێشوازی لە پەیامەکەی بەڕێز عـ.ـەبدوڵا ئـ.ـۆجەلان دەکەین
- سەرۆک بارزانی: هیوادارین پەیامەکەی ئۆجەلان دەستپێکێک بێت بۆ ئەوەی پڕۆسەی ئاشتی رێی خۆی بگرێت
- زەینەب جەلالیان لە 17هەمین ساڵی زیندانیکردنیدا لە ناو زیندانەوە باس لە ئازارەکانی دەکات
- بزووتنەوەی کۆماریخوازانی ڕۆژهەڵاتی کوردستان ٢ی ڕێبەندان، ٧٩هەمین سالرۆژی دامەزرانی یەکەم کۆماری کوردستان، لە نەتەوەی کورد پیرۆزدەکات
- پەیامی پیرۆزبایی کۆماریخوازان بۆ بەرێز مەسعوود پزیشکیان
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
