<sup>سەرۆکی هەرێمی کوردستان بە بۆنەی ساڵی نوێوە، پەیامێکی بڵاوکردووەتەوە، کە تێیدا وێڕای پیرۆزبایی ساڵی تازە، "هەزارن سڵاو بۆ گیانی پاكی ئەو پێشمەرگە قارەمانانەی لەشەری دژی تیرۆریستانی داعش ئازایانە گیانی خۆیان فیدای گەل و نیشتیمان كرد" دەنێرێت.

مەسعود بارزانی، سەرۆکی هەرێمی کوردستان لە پەیامەکەیدا ئاماژە بۆ سەرکەوتنی گەلی کوردستان دەکات و رایدەگەیەنێت، کە "لەوە دڵنیام كە گەلی كوردستان بەو بەها باڵایانەی كە هەیەتی سەردەكەوێت".

لەپەیامەکەیدا، مەسعود بارزانی، سوپاسی "خۆڕاگریی تاك تاكی خەڵكی كوردستان" دەکات، کە "لە بارودۆخێكی سەخت و دژواردا" لە ساڵی 2014، "تەحەمولی قەیران و ناخۆشییەكانیان كرد و پاڵپشتی هێزی پێشمەرگە و دامودەزگەی هەرێمی كوردستان بوون".

سەرۆکی هەرێمی کوردستان هیوایەک دەبەخشێتە ئاوارەکان لە هەرێمی کوردستان و دەڵێ، "پشت بە خوای مەزن و گەلی كوردستان، لە ساڵی تازەدا هەموویان بە سەربەرزی بۆ سەر ماڵ و حاڵی خۆیان دەگەڕێنەوە".

دەقی پەیامەکەی بارزانی:

بەناوی خودای بەخشندە و میهرەبان

هیوادارم ساڵی 2015 ساڵی بەختەوەری و خۆشگوزەرانی بێت بۆ گشت هاووڵاتیانی خۆشەویستی كوردستان و هەموو مرۆڤایەتی. ئومێد دەكەم ساڵی نوێ ساڵی كۆتایهاتنی تیرۆر و نكۆلیكاری و توندڕۆیی بێت و چیتر شكۆ و كەرامەتی مرۆڤ پێشێل نەكرێت و ئاشتی باڵ بەسەر ناوچەكەماندا بكێشێت و بەها مرۆڤییەكان بەسەر شەڕانگێزی و ڕقدا سەربكەون.

بەبۆنەی سەری ساڵی تازە هەزارن سڵاو بۆ گیانی پاكی شەهیدانی ڕێگەی ئازادی و، بۆ ڕۆحی بێگەردی ئەو پێشمەرگە قارەمانانەی لەشەری دژی تیرۆریستانی داعش ئازایانە گیانی خۆیان فیدای گەل و نیشتیمان كرد. لەوە دڵنیام كە گەلی كوردستان بەو بەها باڵایانەی كە هەیەتی سەردەكەوێت و شكست و سەرشۆڕی بۆ دوژمنانی دەمێنێتەوە. 

بە پێویستی دەزانم لەم بۆنەیەدا سوپاسی خۆڕاگریی تاك تاكی خەڵكی كوردستان بكەم و هەروەها هەموو ئەو ئازیزانەی لە ئاوارەیی و كەمپەكاندا ژیان بەسەر دەبەن كە لە بارودۆخێكی سەخت و دژواردا تەحەمولی قەیران و ناخۆشییەكانیان كرد و پاڵپشتی هێزی پێشمەرگە و دامودەزگەی هەرێمی كوردستان بوون. پشت بە خوای مەزن و گەلی كوردستان لە ساڵی تازەدا هەموویان بە سەربەرزی بۆ سەر ماڵ و حاڵی خۆیان دەگەڕێنەوە.</sup>

^31/12/2014

<sup>سەرۆک وەزیرانی تورکیا لە دوایین وتاری فەرمی ساڵی 2014 یدا باسی لە پرۆسەی چارەسەری کرد و 3 مەرجی بۆ بەرەوپێشبردنی ئەو پرۆسەیە خستنەڕوو.

ئەحمەد داودئۆغڵو، سەرۆک وەزیرانی تورکیا دوایین وتاری فەرمی ساڵی 2014 ی پێشکەشکرد. لە وتارەکەیدا باسی لە چالاکییەکانی حکومەتەکەی و پێشهاتەکانی تورکیا کرد لە مانگی کانوونی یەکەمی 2014 بەتایبەتی و درێژایی ساڵەکە بە گشتی.

داودئۆغڵو لە وتارەکەیدا باسی لە پرۆسەی چارەسەریش کرد و 3 مەرجی بۆ بەرەوپێشچوونی دانان.یەکەمیان پەیوەندیدارە بە ئاسایشی گشتی، لەو بارەیەوە سەرۆک وەزیرانی تورکیا گوتی: "پرۆسەی چارەسەری ئەڵتەرناتیڤی ئاسایشی گشتی نییە، هەر چ رووداوێک وەک ئەوەی جزیرە رووبدات ئێمە رێوشوێنی ئەمنی دەگرینە بەر".

یەکێکی دیکە لە مەرجەکانی داودئۆغڵو گشتگیری پرۆسەکە بوو، سەبارەت بەوەش گوتی:" پرۆسەی چارەسەری بابەتی هاوبەشی سەرجەم هاووڵاتیانی تورکیایە، هەر بۆیە هۆشیاری کۆمەڵایەتی لەسەر پرۆسەکە بەرزدەکەینەوە".

لە دوایین مەرجیدا سەرۆک وەزیرانی تورکیا رووی قسەی کردە ئەو کەسانەی پێیانوایە لە هەوڵی گواستنەوەی شەڕدان بۆ نێو تورکیا و گوتی: "رێگە بە کەس نادەین تورکیا بخاتە ناو ئەو ئاگرەی لە چواردەورمانە، چی پێویست بێت لەم بوارەدا دەیکەین".

لە بەشی کۆتایی وتارەکەیدا داودئۆغڵو باسی لە هەڵبژاردنە گشتییەکانی وڵاتەکەی کرد کە چاوەڕێدەکرێت مانگی حوزەیرانی 2015 سازبکرێت و گوتی:" دەنگ بە هەر پارتێک بدەن، گرنگ ئیرادەی میللی و دیموکراسی میللییە".</sup>

^31/12/2014

<sup>میدیا لوبنانییەكان باسی کوژرانی ژن و مێردە لوبنانییەكە لە هەولێر دەكەن و بەهۆی ئەوەی سەرەتا وازانراوە بەهۆی تەقینی غازەوە گیانیان لەدەستداوە، ئەوەندە گرنگی بە هەواڵەكە نەدراوە.

ماڵپەڕی لیبانۆن دیبەیت-ی لوبنانی بە پشتبەستن بە گەواهیدانی چەند ئەندامێكی خێزانەكانیان، باسی كوژرانی عەبدولڕەحمان حەموزە و زەحا ریزوان-ی هاوسەری دەكات.

دایكی ژنە لوبنانییەكە دەڵێت، کچەکەی پێش كوژرانی پەیوەندی لەگەڵدا كردووە و گوتویەتی میوانێكیان هەیە، كە زۆر رەزای گرانە و بەنیازیشە شەو لە ماڵمان بمێنێتەوە. دایكەكە دەگێڕێتەوە و دەڵێت، "كچەكەم گوتی ئەوە مێردەكەم چووە چێشتخانە و ئەو دیارییە دەكاتەوە كە هاوڕێكەی هێناوییەتی".

لەكاتێكدا كچەكەی ئەو رستەیەی بە دایكی دەڵێت، دەنگی تەقینەوەیەكی بچوك دێت و پەیوەندییەكەی دەپچڕێت، دایكەكە لە پەرۆشی كچەكەی چەندین جار پەیوەندی دەكاتەوە و تاوەكو بەیانیش خەوی لێناكەوێت.

رۆژی 25ـی كانوونی یەكەم، كۆمپانیای سۆداكۆ، كە عەبدولڕەحمان تێیدا كارمەند بووە، پەیوەندی بە خێزانەكانییانەوە دەكات و پێیان رادەگەینێت، كە بەهۆی تەقینەوەی غاز ژن و مێردەكە مردوون.

كەسێكی نزیك لە عەبدولڕەحمان، بە میدیا لوبنانییەكانی راگەیاندووە، دوای سەری ساڵ پلەی عەبدولڕەحمان بەرزدەكرێتەوە لە كۆمپانیاكەی، بۆیە ئەگەری ئەوە هەیە ئەو بەهۆی ئیرەییەوە كوژرابێت.

عەبدولڕەحمان، كە لە بواری كیما بڕوانامەی باڵای هەبووە، پێش دوو ساڵ لەگەڵ ژنەكەی هاتووەتە هەولێر و لە كۆمپانیای سۆداكۆ بە مووچەیەكی زۆر دەوامی كردووە.


عەمید عەبدولخالق تەڵعەت، بەڕێوەبەری گشتیی پۆلیسی هەولێر لە كۆنگرەیەكی رۆژنامەوانیدا رایگەیاند، كە توانراوە لەماوەی ٤٨ كاژێر بكوژەكە، کە پێشەی ئەندازیار بووە، دەستگیربكرێت.

پۆلیسی هەولێر هۆكاری رووداوەكەی بۆ بوونی كێشەیەكی كۆمەڵایەتی گەڕاندەوە لە نێوان بكوژ و كوژراوەكان. بەڕێوەبەری گشتیی پۆلیسی هەولێر گوتیشی "تۆمەتبارەكە بەپێی مادەی ٤٠٦ یاسایی سزادانی عێراقی دادگایی دەكرێت".

بڕیارە سبەی تەرمی ئەو ژن و مێردە لوبنانیە لە رێگەی كونسوڵخانەی لوبنان لە هەولێر بگەڕێندرێتەوە وڵاتەكەیان.</sup>

رووداو – هەولێر

^30/12/2014

<sup>ساڵی 2014 روو لە كۆتاییە و دەچینە ساڵی نوێی 2015 . فەلەكناسێكی كورد پێیوایە، ساڵی داهاتوو بۆ كورد ساڵێكی "زۆر باشتر" دەبێت لە 2014 و ئاماژە بە مانگێكی دیاریكراویش دەكات كە كورد تێیدا سوودمەند دەبێت.

ئایار فەلەكی بە تۆڕی میدیایی رووداوی راگەیاند: "بە گشتی ساڵی 2015 بە بەراورد لەگەڵ 2014 ساڵێكی زۆر زۆر خۆشتر و باشتر دەبێت". ئەو فەلەكناسە بەدیاریكراوی دەڵێت "بەبڕوای من نەورۆزی ئەمساڵ تایبەتمەندی خۆی دەبێت و گرینگی خۆی هەیە بۆ كورد".

ئایار فەلەكی بۆ ساڵی 2015 تیشك دەخاتە سەر مانگی 10 و پێیوایە: "مانگی 10 مانگێكی جیاوازە، ئەو مانگە لە مێژووی جیهاندا رووداوی زۆری تێیدا رووداوە لە سیاسەت و شۆڕش و ئابووری و زانستدا، من هەستدەكەم لەو مانگەدا بۆ ئێمەی كورد شتێك روودەدات".</sup>

^30/12/2014

<sup>دانیشتوویەكی شاری هەولێر، كە پیشەكەی ئەندازیارە، ژن و مێردێكی بە رەگەز لوبنانی بە چەكی جۆری ویزە كوشتووەو دوای كوشتنیشان تەرمەكانی لەژووری نوستنەكەیان سووتاندووە.

عەمید عەبدولخالق تەڵعەت، بەڕێوەبەری گشتیی پۆلیسی هەولێر لە كۆنگرەیەكی رۆژنامەوانیدا رایگەیاند، كە توانراوە لەماوەی ٤٨ كاژێر بكوژەكە دەستگیربكرێت.

پۆلیسی هەولێر هۆكاری رووداوەكەی بۆ بوونی كێشەیەكی كۆمەڵایەتی گەڕاندەوە لە نێوان بكوژ و كوژراوەكان. بەڕێوەبەری گشتیی پۆلیسی هەولێر گوتیشی "تۆمەتبارەكە بەپێی مادەی ٤٠٦ یاسایی سزادانی عێراقی دادگایی دەكرێت".

بەڕێوەبەری پۆلیسی هەولێر کات و چۆنێتی رووداوەکە رووندەکاتەوەو دەڵێ: "تاوانبارەکە لەشەوی ٢٣ لەسەر ٢٤ی ئەم مانگە دەچێتە ماڵی ژن و پیاوە لوبنانییەکە بە بیانووی بردنی شیرینی بۆیان چەکێکی پێشکەوتوو لە جۆری (ویزە) لەگەڵ خۆی دەبات و ھەردووکیان دەکوژێت، دوای کوشتنی ئەو دوو کەسە تاوانبارەکە ھەردووکیان دەباتە ژووری نوستنی ماڵەکە و بەھۆی سۆپای غازەوە ئاگر لە ژوورەکە بەردەدات و ھەردووکیان دەسووتێنێت بە ئامانجی شاردنەوەی تاوانەکەی، بەڵام دوای گواستنەوەی تەرمەکان بۆ پزیشکی دادوەری دەرکەوتووە ئەوانە کوژراون و پاشان سووتێنراون و لێکۆڵینەوە لە روداوەکە دەستی پێکردو توانرا بکوژەکە کە خۆی ئامادەکردووە بچێتە دەرەوەی وڵات دەستگیربکرێت".

بەڕێوەبەری پۆلیسی ھەولێر ئەوەشی ئاشکراکرد، کە "باوکی بکوژەکە خاوەنی بڕوانامەی دکتۆرایە لە زانستی دەروونی و دایکی مامۆستایە. بەچەکی باوکی کە لە جۆری (ویزە) بووە ئەو تاوانەی ئەنجام داوە".

بڕیارە سبەی تەرمی ئەو ژن و مێردە لوبنانیە لە رێگەی كونسوڵخانەی لوبنان لە هەولێر بگەڕێندرێتەوە وڵاتەكەیان.</sup>

rudaw

^30/12/2014

<sup>باراک ئۆباما، سەرۆکی ویلایەتە یەکگرتووەکانی ئەمریکا رایگەیاند، دەکرێت ئێران ببێتە هێزێکی هەرێمی سەرکەوتوو، بەمەرجێک لە پرسی بەرنامە ئەتۆمییەکەیدا رێککەوتنێکی ماوەدرێژ ئەنجامبدات.

ئۆباما راشیگەیاند، ئەگەر بێت و ئێران بگاتە رێککەوتنێک سەبارەت بەپرسی ئەتۆمی وڵاتەکەی، ئەوا دەکرێت ئەو سزایانەی لەسەر کەمبکرێنەوە کە بوونەتە هۆی ئەوەی ئابووری ئێران تووشی شکستێکی گەورە ببێت.

پێشتر جۆو بایدن، جێگری سەرۆکی ئەمەریکا رایگەیاندبوو، کە هیواکان بۆ رێککەوتن لەگەڵ ئێران لاوازن و پێناچێت وڵاتان بگەنە رێککەوتن لەگەڵ ئێران، بەڵام باراک ئۆباما لەکاتی هەڤپەیڤینێکی رادیۆییدا ئاماژەی بۆ ئەوە کرد کە دەکرێت لەگەڵ ئێران رێکبکەون و هیوایەک هەیە بۆ ئەوە.</sup>

^29/12/2014

<sup>نووسینگەی راگەیاندنی وەزارەتی بەرگریی عێراق رایگەیاند لەسەر بانگهێشتی وەزیری بەرگریی ئێران، ئەمڕۆ (دووشەممە 29-12-2014) وەزیری بەرگریی عێراق بە سەرۆكایەتی شاندێكی باڵای سەربازی سەردانی تاران دەكات.

نووسینگەی راگەیاندنی وەزارەتی بەرگریی عێراق رایگەیاند، لەسەر بانگهێشتی حەمید دەهقان وەزیری بەرگریی ئێران ئەمڕۆ خالید عوبەیدی وەزیری بەرگریی عێراق بە سەرۆكایەتی شاندێكی باڵای سەربازی سەردانی تارانی پایتەخت دەكات و لەگەڵ وەزیری بەرگری و گەورە بەرپرسانی ئەم وڵاتە كۆدەبێتەوە".

گوتیشی: "ئامانج لەم سەردانەی وەزیری بەرگری بەهێزكردنی پەیوەندی دووقۆڵی نێوان هەردوو وڵاتە، هەروەها باسكردنی پرسە هەرێمی و نێودەوڵەتییەكانیش تەوەرێكی دیكەی گفتوگۆكانی وەزیری بەرگریی عێراق دەبێت لەگەڵ بەرپرسانی ئێران".

عەلی لاریجانی سەرۆكی پەرلەمانی ئێران لەمیانی سەردانەكەی بۆ عێراق گوتی "هێزە ئەمنییەكانی عێراق توانای لە ناوبردنی گرووپە چەكدارەكانیان هەیەو پێویستیان بە مەشقپێكردن و ئامادەكردنیان نییە لەلایەن هیچ وڵاتێكەوە، هەروەها عێراق سەركردەی خۆی هەیەو دەتوانن راهێنان بە هێزەكانیان بكەن بەبێ پەنابردن بۆ پسپۆڕانی وڵاتانی دیكە". دووپاتیشیكردەوە وڵاتەكەی ئامادەیە لەرووی لۆجستی و سەربازیەوە پاڵپشتی عێراق بكات لەشەڕی داعش.

بەپێچەوانەی ئەو قسانەوە، جۆن مەكین سیناتۆری كۆمارییەكانی ئەمریكا لەكاتی سەردانەكەی بۆ عێراق و هەرێمی كوردستان لە دوو رۆژی رابردوو، رایگەیاند "سوپای عێراق، سوپایەكی تێكشكاوەو پێویستی بە مەشق و رێكخستنەوەیە"، بەڵام ستایشی رۆڵی پێشمەرگەی كرد لە رووبەڕووبوونەوەی داعش و گوتیشی: "پێشمەرگە لە سوپای عێراق بەتواناترە".</sup>

rudaw

^29/12/2014

<sup>پیشە دەستییەکانی رۆژهەڵاتی کوردستان لە مێژوو و رابردووی کۆنی کۆمەڵگەی کوردستانەوە هەڵقوڵاون، بەڵام هێشتاش بۆ بەشێک لە خەڵک سەرچاوەی داهات و دابینکردنی بژێوی ژیانن.

پیشە دەستییەکان لە زۆربەی ناوچەکانی رۆژهەڵاتی کوردستان رمێنی زۆریان هەیە، بەڵام کرماشان لە هەموو ناوچەکان زیاتر بەو پیشەیە ناوی دەرکردووە. 

ئێرە ناوەندێکی فرۆشتنی پیشە دەستییەکانە لە شاری کرماشان، کە تێیدا دەیان بەرهەمی دەستی خراوەتەڕوو. لە چەشەنە جیاوازەکانی رایەخەوە وەکو فەرش و بەڕەوە بگرە تاوەکو تابلۆ فەرش، کەوشی کڵاش، ئامێری مۆسیقی و کەلوپەلی جوانکاری.

بەپێی ئامارە فەرمییەکان لە شەش مانگی یەکەمی ئەمساڵدا، بە بڕی زیاتر لە 2 ملیۆن و 40 هەزار دۆلار، کەلوپەلی دەستساز لە پارێزگای کرماشان هەناردە کراوە، بەڵام جێگری بەڕێوەبەری فەرمانگەی پیشەدەستییەکانی ئەو پارێزگایە دەڵێت، سێ هێندە زیاتری ئەو بڕە پارەیە کەلوپەلی دەستساز هەناردەکراوە. 

زیاترین رێژەی هەناردەکردنیش، جگە لەنێوخۆی رۆژهەڵاتی کوردستان و ئێران بۆ پارچەکانی دیکەی کوردستان و هەروەها وڵاتانی عەرەبی دەورووبەری کەنداو و وڵاتانی ئەوروپایە و لە زۆربەی بازاڕەکانی ئەو وڵاتانەدا پیشە دەستییەکانی پارێزگای کرماشان دەفرۆشرێن.

بەگوتەی بەرپرسانی حکومی لە کرماشان، کەرتی پیشەسازی دەستی لەو پارێزگایە سامانێکی گەورەیە کە دەبێ پەرەی پێبدرێ، بەڵام بەگوتەی ئەو کەسانەی کە ژیانیان لەسەر پیشەی دەستەکانیانە، لایەنە حکومییەکان زۆر هاوکاریان نین بۆ پەرەپێدانی کارەکەیان.</sup>

^29/12/2014

<sup>ساڵی 2014، ساڵە زێڕینەکەی کوردە لە رووی دیپلۆماسیەوە، جیاواز لە ساڵانی رابردوو ٢٠١٤ چەندینجار فەرشی سوور لە فڕۆکەخانەکانی کوردستان بۆ دیپلۆماتکارانی دونیا راخرا، لەم ساڵدا سەردانی سەرۆک و سەرۆکوەزیر و وەزیرانی دەرەوە و بەرگری وڵاتانی دنیا بۆ باشووری کوردستان ریکۆردێکی نوێی تۆمارکرد و شەڕی داعش و سیاسەتی نەوتی حکومەتی هەرێمی کوردستان پێگەی هەولێری بە‌هێزکرد.

ئێستا هاوپەیمانیەتییەکی نێودەوڵەتی بۆ شەڕی داعش لە جیهان دروستبووە، کوردیش بە پێگە سیاسی و سەربازییەکەی خۆی کە هێ‌زی پیشمەرگە وەک تاکە هێزی جیهان لەسەر زەوی لە رووبەڕووبونەوەدایە لەگەڵ داعش، کارەکتەرێکی سەرەکی ئەو هاوپەیمانیەتییەیە.

بەرپرسی پەیوەندییەکانی دەرەوەی پارتی دەڵێت، ئێستا هەولێر پایتەختێکە لەسەر نەخشەی جیهان پەنجەی بۆ رادەکێشرێت، رووبەڕووبونەوەکانی پێشمەرگەش لەگەڵ داعش پێگەی هەولێری بەهێزتر کردووە.

شارەزایەکی دیپلۆماسیەتی نێودەوڵەتی رۆڵی ئەمریکا لە بە‌هێزبوونی پێگەی هەولێر گەورە دەبینێت، وەک ئەو دەڵێت ئەمریکا سیاسەتی دەرەوەی خۆی لەسەر سێ خاڵ داڕشتووە، یەکەم بەرقەراری دیموکراسی لە جیهان، دووەم بنبڕکردنی تیرۆر و سێیەمیش کۆنترٶڵکردنی بیرە نەوتییەکانی جیهان بۆ بەرژەوەندی خۆی.

ئێستا نزیکەی 30 وڵات لە هەولێر کونسوڵ و نوێنەرایەتیان هەیە، ئەم نوێنەرایەتیانە کە لەناوجەرگەی رووداوەکاندان، زۆرجار رٶڵیان هەبووە لە پتەوکردنی پەیوەندییەکانی هەولێرو پایتەختی وڵاتەکانیان.</sup>

^{رووداو - پیرمام}

^29/12/2014

<sup>دوو پەرلەمانتاری پارێزگای ئەنبار لە رۆژئاوای عێراق رایدەگەیێنن، لە ٩٠%ی رووبەری ئەنبار لەژێر دەسەڵاتی داعشدایە و چەکدارانی ئەو رێکخراوە پێشڕەوی زیاتریش دەکەن.

نەهلە فەهداوی و فارس تەها، دوو پەرلەمانتاری پارێزگای ئەنبار رایانگەیاند "لە مانگی رابردوو سوپای عێراق لە ١٠% ناوچەکانی ژێر دەسەڵاتی لە ئەنبار کشایەوە و داعش ئەو ناوچانەی کۆنترۆڵکردووەتەوە، بۆیە ئێستا لە ٩٠% رووبەری ئەنبار لە ژێر دەسەڵاتی داعشدایە".

هاوکات عەبدولحەکیم جغێفی، قایمقامی شارۆچکەی حەدیسە لە رۆژئاوای پارێزگای ئەنبار رایگەیاند: "هێزە ئەمنییەکانی عێراق بە هاوکاری فڕۆکە جەنگییەکانی هاوپەیمانان توانییان ئەمڕۆ شکست بە هێرشێکی چەکدارانی داعش بۆ سەر حەدیسە بێنن و دەیان چەکداری داعش بکوژن و بریندار بکەن".

تاکە ناوچەی دەسەڵاتی سوپای عێراق لە ئەنبار، کە لەلایەن داعشەوە گەمارۆنەدراون تەنها لە شاری رومادی و شارەدێی عامرییەی فەللوجەیە، لەودەمەی داعش دەستی بەسەر زۆربەی ناوچەکانی ئەنباردا گرتووە و شارەکانی حەدیسە و بەغدادی و گەرمە و سەربازگەی عەین ئەسەدی گەمارۆداوە.</sup>

^28/12/2014