ژنێکی چینی کە ناوی ( شیاو ) ە، لە ناوچەی ( شنتشن ) لە وڵاتی چیندا دەژێت، قژە درێژەکەی، کە درێژییەکەی دەگاتە ( دوو مەتر ) .. بە هەڕاجکردنێکی ئاشکرا لە سەر تۆڕی ئینتەرنێت، بۆ فرۆشتن راگەیاند  .. ئەم ژنە، پانگزە ساڵە قژی نەبڕیوە و درێژی دەکات، هۆی فرۆشتنی قژەکەشی، ئەوەیە، بۆ ئەوەی ئەو پارەیەی لە هەڕاجکردنی قژەکەی دەستی دەکەوێت، دەیبەخشێت بە منداڵە هەژارەکانی، قوتابخانەیەکی ناوەندی لە ( نینغشیا ).

( شیاو ) بە رۆژنامەنووسەکانی گوت : " کاتێ کە زانیم، قوتابییە هەژارەکانی قوتابخانەی ( نینغشیا )لە دۆخێکی خراپدان، بڕیارم دا، کە قژ درێژەکەم، بۆ فرۆشت بخەمە سەر ئینتەرنێت ..ئەو پارەی لە فرۆشتنی قژەکەم دەستم دەکەوێت، دەیبەخشم بە قوتابییە هەژارەکانی قوتابخانەی ناوبراو .. لە قژە درێژەکەم بەولاوە، چیتر شک نابەم بیفروشم بۆ یارمەتیدانی ئەو منداڵانە "

زیاترین نرخی قژە درێژەکەی ( شیاو )، گەیشتە ( ١٠) هەزا دۆلاری ئەمریکی . 

3/12/2014

<sup>سەرچاوە یەمەنییەكان رایانگەیاند ئۆتۆمبێلێكی بۆمبڕێژكراو لە نزیك ماڵی باڵیۆزی‌ ئێران لە سەنعای‌ پایتەختی‌ یەمەن تەقییەوە و كوژراو و برینداریش هەیە.

سەرلەبەیانی ئەمڕۆ چوارشەممە (3ی كانوونی یەكەمی 2014)، ئۆتۆمبێلێكی بۆمبڕێژكراو لە بەردەم ماڵی‌ حوسێن سەید نام، باڵیۆزی‌ ئێران، لە گەڕەكی حەیدە، لە سەنعای‌ پایتەختی‌ یەمەن تەقییەوە.

هەرچەندە سەرچاوەكان باس لە كوژراو و بریندار دەكەن بەهۆی تەقینەوەكە، بەڵام تائێستا ژمارەی قوربانییان بە فەرمی ئاشكرانەكراوە.</sup>

^3/12/2014

http://rudaw.net/sorani/kurdistan/0212201424

<sup>مانگرتنی زیندانیانی سیاسی بەندیخانەی ورمێی رۆژهەڵاتی کوردستان، پێینایە 14یەمین رۆژی خۆی و تاوەکو ئێستاش لەلایەن بەرپرسانی بەندیخانەوە وەڵامیان نەدراوەتەوە.

28 کەس لەو زیندانییانە کوردن، کە سێیان خەڵکی باکووری کوردستانن.

بەپێی هەندێک ئاماری نافەرمی، نزیکەی 40 لەسەدی زیندانیانی سیاسی ئێران، کوردن. زۆربەی ئەو زیندانیانە بە تۆمەتی پەیوەندی بە حیزب و لایەنە سیاسییەکانی رۆژهەڵاتی کوردستانەوە بەندکراون و ئەو حیزبانەش دەڵێن، هەوڵدەدەن دەنگی زیندانیانی سیاسی بە ناوەندە نێودەوڵەتییەکانی مافی مرۆڤ بگەیێنن.</sup>  

^rudaw

^3/12/2014

<sup>بۆ یەكەمجار لەجیاتی فڕۆكەی جەنگی، توركیا شاندێكی خۆی دەنێرێتە قەندیل و لەگەڵ بەرپرسانی كۆما جڤاكێن كوردستان  KCK  رێوشوێنەكانی چەكدانان تاوتوێ دەكەن.

بەپێی هەواڵێك، كە لەمیدیای توركیدا بڵاوبووەتەوە، شاندێكی حكومەتی توركیا بە یاوەری شاندەكەی پارتی دیموكراتی گەلان HDP بۆ یەكەمجار سەردانی قەندیل دەكات و چاوەڕێ دەكرێت لەو سەردانەیاندا رێككەوتنی دانانی چەك تاوتوێ بكرێت.

دوای ئەوەی لە كۆتایی هەفتەی رابردوو شاندی HDP سەردانی دوورگەی ئیمرالیان كرد و لەگەڵ عەبدوڵڵا ئۆجەلان، رێبەری زیندانیكراوی PKK كۆبوونەوە، ئەمڕۆ لەگەڵ بەرپرسانی حكومەتی دەزگای هەواڵگری میللی(میت) كۆبوونەوە، دوای كۆبوونەوەكە شاندی HDP رایگەیاند كە حكومەتی توركیا رەزامەندی لەسەر ئەو رەشنووسە چوار خاڵییە دەربڕیوە، كە ئۆجەلان ئامادەی كردووە و  بڕیارە لەو سەردانەی شاندی توركیا ببرێتە قەندیل.

سری سورەییا ئۆندەر، پەرلەمانتاری ئیستەنبوڵی پارتی دیموكراتی گەلان HDP ئاماژە بەوە دەكات: "لەگەڵ بەرپرسانی دەوڵەت و حكومەت كۆدەبینەوە، دواتر هەر رێككەوتێك ئەوان پێیان باشبوو، دەچینە قەندیل و لەوێ كۆبوونەوە ئەنجام دەدەین، ئەگەر بكرێ كۆتایی ئەم هەفتەیە، یاخود هەفتەی داهاتوو دەچینە ئیمرالی و رێكارەكانمان دەگەیێنینە ئۆجەلان".

رێبەری زیندانیكراوی پارتی كرێكارانی كوردستان PKK داوادەكات لە جیاتی پرۆسەی "كشانەوە"ی گەریلاكان، ئەمجارە "گەڕانەوە"یان بگیرێتەبەر و دەڵێ: "جارێكیتر بانگەوازی كشانەوەی گەریلاكان لەجێی خۆیدا نابێت، چونكە ئێستا لە مانگەكانی زستانداین، ئەگەر بكشێنەوە بە 4-5 مانگ تەواونابێت".

بەپێی هەواڵێك كە لە میدیای توركیدا بڵاوبووەتەوە، چوار هەنگاوی بنچینەیی دیاریكراون بۆ پرۆسەی ئاشتی، ئەوانیش: "گەڕانەوە لە شاخ"، "دەستپێكردنی رێككەوتن"، "ئاگربەستی دوولایەنەی هەمیشەیی" و "گەڕانەوە و هەمواری دەستووری- كۆمەڵایەتی و دووبارە پێكهێنانەوەی ئاسایشی كۆمەڵایەتی"ن.</sup>

^3/12/2014

<sup>نیكۆلای میلادینۆڤ، نوێنەری تایبەتی نەتەوە یەكگرتووەكان لە عێراق پێشوازی لە رێككەوتنەكەی نێوان حكومەتی هەرێمی كوردستان و حكومەتی بەغدا دەكات و هیوادەخوازێت بە زووترین كات جێبەجێ بكرێت.
 
لە راگەيێندراوێكدا كە ماڵپەڕی نەتەوە یەكگرتووەكان بڵاویكردووەتەوە، میلادینۆڤ وێڕای ئەوەی ئاماژە بە گرنگی رێككەوتنەكە دەكات، دەڵێت،" چاوەڕێدەكەم رێككەوتنەكە بە زووترین كات جێبەجێبكرێت، كە هەناردەكردنی نەوت، كێشەی كەركووك،  بودجەی هەرێمی كوردستان و مووچەی پێشمەرگە دەگرێتەوە".
 
میلادینۆڤ ئاماژە بۆ ئەوە دەكات كە تەنیا لە رێگای گفتوگۆی راستەخۆوە دەتواندرێت رێككەوتنی لەوشێوەیە لەبەرژەوەندی گەلی عێراق واژۆبكرێت، داواش دەكات هەموو سەركردەكانی عێراق بەهەمان رووحیەتەوە لەسەر بودجەی 2015 و پڕۆژە یاساكانی دیكە كاربكەن.

ئەمڕۆ (سێشەممە 2-12-2014) ئەنجامی سەردانە سێ رۆژییەكەی شاندی حكومەتی هەرێمی كوردستان بە سەرۆكایەتی نێچیرڤان بارزانی بۆ بەغدا راگەیێندرا، كە رێككەوتنێكی سەرەتایی لەسەر پرسی بودجە و مووچەی لێكەوتەوە.

رێككەوتنەكە وەك نێچیرڤان بارزانی لە كۆنگرەیەكی رۆژنامەوانی لە بەغدا رایگەیاند، بریتییە لە هەناردەكردنی 250 هەزار بەرمیل نەوتی هەرێمی كوردستان و 300 هەزار بەرمیل نەوتی كەركووك لەژێر سەرپەرشتی بەغدا و لەبەرامبەردا بەغدا 17% بودجی هەرێمی كوردستان دەنێرێ. هەروەها لەسەر بودجەی وەزارەتی بەرگریی ترلیۆنێك و 200 ملیار دینار بۆ هێزی پێشمەرگە دەنێردرێ.</sup> 

^2/12/2014

<sup>داواکاریی پارێزەرێکی شاری ئامەد لە باکووری کوردستان بۆ بەکارهێنانی زمانی کوردی لەو فڕۆکانەدا کە گەشت بۆ باکووری کوردستان دەکەن، رەتکرایەوە.

ماوەی رابردوو پارێزەر مەحسوونی کارەمان کە دانیشتووی ئامەدی باکووری کوردستانە، داواکارییەکی پێشکەش بە دەزگای فڕۆکەوانی مەدەنی تورکیا کرد بۆ بەکارهێنانی زمانی کوردی هاوشانی زمانی تورکی و ئینگلیزی لە گەشتەکانی باکووری کوردستان.

دەزگای پەیوەندیدار وەڵامی نەرێنی دایەوە بۆ ئەم داواکارییە، بە پاساوی ئەوەی کوردی زمانی فەرمی نییە و ناتوانن زمان و زاراوەی هەموو گەشتیاران بەکاربهێنن. لە وەڵامەکەی دەزگای فڕۆکەوانی مەدەنی تورکیادا هاتووە،" خاک و گەلی تورکیا یەکەیەکی یەکگرتووە و دابەشنابێت".

لە بەرامبەردا پارێزەرەکە داوایەکی یاسایی لەسەر ئەو دەزگایە تۆمارکردووە و لە داواکەدا هاتووە، کە قەدەغەکردنی زمانی کوردی هیچ بنەمایەکی یاسایی نییە و رێوشوێنێکی میزاجییە.</sup>

^2/12/2014

<sup>ڤلادیمێر پوتین، سەرۆكی رووسیا لە سەردانەكەی بۆ ئەنقەرە و لە كۆنفڕانسێكی رۆژنامەوانیدا لەگەڵ رەجەب تەییب ئەردۆغان، سەرۆككۆماری توركیا مژدانەی ئەوەی دایە توركیا، كە سەدا 6 لە نرخی گازی سروشتی بۆ ئەو وڵاتە دادەبەزێنێت.

داشكاندنەكە لە سەرەتای ساڵای داهاتووەوە دەبێت و لەكۆبوونەوەی فیدراسیۆنی كۆنسەی باڵای هەماهەنگی نێوان رووسیا- توركیا بڕیاری لەسەر دراوە.

پوتین گوتی: "لە 1ی كانوونی دووەمی 2015ەوە نرخی گازی سروشتی رووسیا بۆ توركیا سەدا 6 دادەبەزێنین، لە داهاتوودا ئەو ژمارەیە زیاتریش دەبێت، ئەمە دەكەوێتە سەر ئەو هەماهەنگییەی نێوانمان چۆن دەبێت".

هاوكات لەسەر داوای توركیا 3 ملیار مەتر چوارگۆشە گازی زیاتر هەناردەی توركیا دەكرێت.

سووریا وەك تەوەرێكی سەرەكی كۆبوونەوەكە

رووسیای پشتیوانی ئەسەد و توركیای خوازیاری رۆیشتنی رژێمەكەی لە كۆبوونەوەكەیاندا نەیانتوانی بگەنە روانگە و هەڵوێستێكی هاوبەش لەسەر سووریا و هێشتا جیاوازی تێڕوانینیان درێژەی هەیە.

ئەردۆغان لە بارەی سووریاوە گوتی: "رژێمی ئێستای سووریا بەرەنجامی زوڵم، كوشتن و تیرۆرە و زۆر بە روونی گوتووومە كە دەبێ رابگیردرێ. ئەگەرچی ئێمە  و رووسیا لەسەر چارەسەركردنی ئەو كێشەیە هاوڕاین، بەڵام خاڵی بنەڕەتی چۆنێتی ئەو چارەسەركردنەیە كە جیاوازیمان هەیە".

هەروەها گوتی: "ئێمە و رووسیا لە هەمبەر داعش هەمان تێڕوانینمان هەیە و هیچ كێشەیەكمان لەبارەی بەرەنگاربوونەوەی تیرۆرەوە نییە، ئێستا داعش سەدا 40 ی خاكی عێراق و سەدا 30 خاكی سووریای بەدەستەوەیە، كە بەشێك لە پشتیوانییەكەی لە رژێمی سووریاوە وەردەگرێت".

ڤلادیمێر پوتین، سەرۆكی رووسیا تۆپی كێشەكەی خستە مەیدانی خەڵكی سووریا و گوتی، كە لەگەڵ هەموو لایەنەكان لە پەیوەندیدا دەبن و ئاماژەی بەوەكرد: "هەموومان دەزانین كە رەوشی سووریا ئاسایی نییە، ئایا ئێمە پێداگر دەبین لە مانەوەی ئەسەد؟ ئەم پرسیارە رووبەڕووی خەڵكی سووریا دەكەمەوە، لەوێ هەڵبژاردن كرا، قسەو باسی جیاوازی لەبارەوە كرا، بەڵام هەموومان بینیمان كە ئەسەد زۆرینەی دەنگەكانی بەدەستهێنا".

بازرگانی بە بەهای 100 ملیار دۆلار

ئەم سەردانەی پوتین بە ئامانجی پێشخستنی پەیوەندی و هەماهەنگییەكانی وزە و بازرگانییە، ئەردۆغان گوتی "دەمانەوێ پەیوەندی بازرگانیمان بگەیێنینە 100 ملیار دۆلار"، لە روانگەی پوتینەوە ئامانجێكی سەختە، بەڵام وەك خۆی دەڵێت "دەبێ وەدیبێت".

پوتین گوتیشی: "ئامادەین رێژەی هەناردەكردنی وزە بۆ توركیا بەپێی خواستی ئەو وڵاتە بەرز بكەینەوە و توانای بۆری هەناردەكاری گازپڕۆم زیاد بكەین".</sup>

^2/12/2014

http://rudaw.net/sorani/middleeast/iran/011220144

<sup>سوپای پاسدارانی ئێران بەردەوامە لە دروستکردنی چەک و مووشەکی درێژمەودا و رایگەیاندووە، مووشکی سجیل دوویان دروستکردووە، کە "لە توانایدایە هەموو بستێکی خاکی ئیسرائیل بکاتە ئامانج".

خێرایی ئەو مووشەکە ١٩٠٠ کیلۆمەترە و ئەمە یەکەمجارە ئێران بتوانێت، مووشەکێک دروست بکات کە سووتەمەنییەکەی لە جۆری وشک بێت. پێشتر ئێران مووشەکی قەدەر و شەهابی دروست کردبوو کە مەودای ٢ هەزار کیلۆمەتری دەبڕی بەڵام، سووتەمەنییەکەی لە جۆری شل بوو.</sup> 

^2/12/2014

<sup>ئەندامێكی شاندی دانوستاندنكاری پارتی دیموكراسی گەلان HDP لەسەر زاری عەبدوڵڵا ئۆجەلانەوە هۆشداری بە پارتی داد و گەشەپێدان دەدات بەرامبەر ئەگەری روودانی كودەتای سەربازی.

سرری سورەییا ئۆندەر، ئەندامی شاندی دانوستاندنكاری پارتی دیموكراسی گەلان رایگەیاند، كە لە داویین سەردانیاندا بۆ دوورگەی ئیمراڵی، عەبدوڵڵا ئۆجەلان، سەرۆكی بەندكراوی پارتی كرێكارانی كوردستان PKK باسی لە گۆڕانكارییەكانی نێو ئەنجوومەنی ئاسایشی نەتەوەیی توركیا و هێزە تایبەتەكان كردووە، كە لە لایەن حكومەتەوە ئەنجامدەدرێن و گوتوویەتی "ئەو جۆرە گۆڕانكارییانە میكانیزمی كودەتا دەخەنەكار و یەكەم كەسیش حكومەت دەڕووخێنن".

ئۆندەر ئەوەشی خستەڕوو كە ئۆجەلان فەرمانی كردووە پارتی دیموكراسی گەلان HDP لە هەڵبژاردنی داهاتوودا وەكو پارت بەشدارببێت، بە پێچەوانەی هەڵبژاردنەكانی پێشووەوە كە لەبەر مەترسی نەبڕینی بەربەستی  10% ی هەڵبژاردن بە لیستی كاندیدی سەربەخۆ بەشدارییان دەكرد.</sup>

^1/12/2014

<sup>پارێزگای سنە چەندین کانگای دەوڵەمەندی تێدایە، کە بە بەرهەمهێنانی مادەکانی، دەتوانێت رۆڵێکی باش لە بووژانەوەی ئابووری ئەو پارێزگایە بگێڕێت.

بەرهەمهێنان لە کانگاکانی ئەو پارێزگایە، یەک لەوان کانگاکانی شاری قۆروە وەک پێویست سەرمایەگوزاری بۆ نەکراوە و کەڵکێکی ئەوتۆی بۆ خەڵک نییە. هەڵبەت هەندێک لە سەرمایەداران بە پرۆژەکانیان هەلی کاریان بۆ ژمارەیەکی کەم لە خەڵک رەخساندووە، بەڵام مووچەکانیان ماندووێتییەکەیان قەرەبوو ناکاتەوە.

ئەو بەرهەمە کانگایانەش بە خاوی دەنێردرێنە دەرەوەی شار و گوندەکانی ئەو پارێزگایە و جیا لەوەی قازانجی بۆ هاونیشتمانیان نابێت، خەسارێکی بەرچاوی بۆ ژینگە و کشتوکاڵی خەڵکی بوومی بە دواوە دەبێت.

جێگری پلاندانان و ئاوەدانی  قایمقامی قۆروە دەڵێت: خاو فرۆشی، نەبوونی کەرەستەی پیشەسازی، رەچاونەکردنی یاسای ژینگەپارێزی و بەرهەمە کانگاییەکان یەکێک لە گرفتەکانی کانگاکانی شاری قۆروەیە.

بە پێی ئامارە راگەیێندراوەکان، ٣ کانگای چالاکی بەردی مەڕمەڕ، ٣٢ کانگای چالاکی بەردی مەڕمەڕیت، ٩ کانگای بەردی مەڕمەڕیتی سوور، ٣ کانگای بەردی گەچی، ١٢ کانگای بەردی ئاسن، ١٢ کانگای بەردی ئاهەک، ٦٤ کانگای بەردی لاشە، ١ کانگای بەرد، ٣ کانگا پووکە، ١ کانگای فلۆرین، ٢ کانگای سیلیس، ١ کانگای ئانتیموان و ١ کانگای تراورتن لە پارێزگای سنەدا هەن، کە بە گشتی ١٤٢٠ ئەندازیار، تێکنێسیەن و کرێکار تێیدا کار دەکەن.

عەبدولمحەممەد زاهێدی پارێزگاری سنە دەڵێت: راستە کە خام فرۆشی لەو پارێزگایەدا دەکرێت، بەڵام ئێستا یەکێک لە یەکە بەرهەمهێنەرەکان رێگەی پێدراوە کە بە ئاڵوگۆر لە مادەکانگایەکان، بەرهەمی نوێ پێکبێنێت و ئەگەر کەرتە تایبەتەکان توانای بەرهەمهێنانیان نەبێت، حکوومەت لە رێگەی کۆمپانیای ئۆمیدڕوەوە دێتە نێو کاری بەرهەمهێنانی مادە کانگاییەکان.

زاهێدی ئاماژەی بە سەرمایە سەرگەردانەکان کردووە و گوتوویەتی: بە لەبەرچاو گرتنی ئەو داهاتە کەمەی کە خەڵی ئەو پارێزگایە لە ساڵدا هەیانە، سەرمایەی سەرگەردانی زۆر هەن، کە نە لە مامەڵەی بانکییەکاندا هەن و نە لە پەرەسەندی ئابووری پارێزگای سنە بە کار دەبردرێن.

جێگری پیشەسازی، بازرگانی و بازرگانی پارێزگای سنە دەڵێت: پێویستە خەڵک و بەرپرسانی حکوومی هەوڵبدەن سەرمایەداران رابگرن و پشتیوانییان لێ بکەن بۆ ئەوەی ئەوانیش بە مەبەستی رەخساندنی هەلی کار بۆ خەڵک هەنگاو هەڵبگرن.</sup>

http://rudaw.net/sorani/kurdistan/3011201423

فەلاح رەحیمی

^1/12/2014