^{شێرزاد زاخۆیی ئەفسەر بەپلەی نەقیب لە هێزەكانی پێشمەرگە بە ئاژانسی ئەنادۆڵ ڕاگەیاندوە" هێزەكانی پێشمەرگە بە هاوكاری هێزەكانی یەپەگە و چەكدارانی ئێزیدی لە بۆسەیەكدا 52 چەكداری داعشیان دەستگیركردوە".}

^{ڕاشیگەیاندوە" ئەو چەكدارانە لە كاتێكدا دەستگیركران كە دەیان ویست بچنە ناو باڵەخانەیەكەوە لە سەنتەری قەزای سنونی لەدووری 60 كیلۆمەتر لە قەزای شەنگال و دواتر هیزەكانی پێشمەرگە گەمارۆی باڵەخانەكەیان داو ئەوچەكدارانەیان دەستگیركرد".}

^{شێرزاد زاخۆیی، ئاماژەی بەوەشكرد" لەكاتی گەمارۆدانی باڵەخانەكەدا بەچەكدارەكانمان راِگەیاند لەنێوان مردن و ڕادەستكردندا یەكێكان هەڵبژێرن و ئەوانیش چەكیان داناو خۆیان ڕادەستی ئێمە كرد".}

^{ئه‌و ئه‌فسه‌ره‌ی‌ هێزه‌كانی‌ پێشمه‌رگه‌ ئه‌وه‌شی‌ خسته‌ ڕوو" تەواوی چەكدارەكانیان بۆ ناوچەیەكی ژێر دەسەڵاتی هیزەكانی پێشمەرگە گواستۆتەو".}

^30/11/2014

<sup>رێکخراوی دەوڵەتی ئیسلامی (ناسراو بە داعش)، 25 برینداری خۆی کوشت، کە لەشەڕەکانی ئەم دواییە برینداربووبوون.

سەعید مەموزینی، بەرپرسی راگەیاندنی لقی ١٤ی پارتی دیموکراتی کوردستان لە مووسڵ بە رووداوی راگەیاند: "لە سەرچاوەی باوەڕپێکراوەوە زانیارییمان پێگەیشتووە، کە داعش 25 برینداری خۆی کوشتوون، ئەوانەی لە شەڕی ئەو دواییەی بەنداوی مووسڵ برینداربووبوون، هەندێکی دیکەشیان بەهۆی فڕۆکەوە برینداربووبوون".

مەموزینی، لەبارەی هۆکاری کوشتنی ئەو بریندارانە گوتی: "ئەو بریندارانە بیانی بوون و دەست و قاچیان لەدەستدابوو لە شەڕەکان و بۆردوومانەکان، لەبەرئەوە داعش لێیان نائومێدبووە، ئەگەر نەشمرن، ناتوانن جارێکی دیکە بچنەوە بەرەکانی شەڕ و شەڕبکەن، لەبەرئەوە لە نەخۆشخانەی مووسڵ بردوونیەتییە دەرەوە و کوشتوونی".</sup>

^29/11/2014

<sup>ئەو شاندەی پارتی دیموکراسی گەلان HDP کە چاوەڕێ دەکرا سبەی 30-11-2014 سەردانی ئیمراڵی بکات ئەمڕۆ 29-11-2014 چووە ئەو دورگەیە.

شاندەکەی پارتی دیموکراسی گەلان HDP پێکهاتبوو لە پەروین بوڵدان، ئیدریس باڵوکەن، سرری سورەییا ئۆندەر و خەتیب دیجلە، کە دوایینیان یەکەم جارە بەشدار دەبێت لەو شاندەدا.

پێشتر سەڵاحەددین دەمیرتاش، هاوسەرۆکی HDP رایگەیاندبوو کە خەتیب دیجلە هاوسەرۆکی کۆنگرەی کۆمەڵگەی دیموکراسی DTK سەردانی ئیمراڵی دەکات بۆ بینینی عەبدوڵڵا ئۆجەلان.

ئەم سەردانەی شاندی دانوستاندنکاری HDP یەکەم سەردانە بۆ ئیمراڵی لە دوای خۆپیشاندانەکانی کۆبانێ لە باکووری کوردستان و تورکیا، کە بووبووە هۆی هەڵپەساردنی پرۆسەی چارەسەری.</sup>

^29/11/2014

<sup>رۆژنامەی ئافتونبلادتی سوێدی راپۆرتێکی لەسەر کورد بڵاوکردووەتەوە و بەهۆی گرنگی راپۆرتەکە، رووداو وەری گێڕاوەتە سەر زمانی کوردی.

دەقی راپۆرتەکە:
 
سەرۆكی پارتی یەكێتی دیموكراتی (پەیەدە)، گەورەترین پارتی كورد لە سووریا (رۆژئاوای کوردستان)، کە پیاوێكی بەخۆوەیە و سمێڵێكی تەنك و قاتێكی رەشی لەبەردایە. ئەو لە پێشەوە لە هۆڵی رێكخراوی كوردی "كۆنسەی كورد لە ستۆكهۆڵم" دانیشتووە. لەسەر سەریەوە وێنەیەكی عەبدوڵڵا ئۆجەلان، سەرۆكی پارتی كرێكارانی كوردستان (پەکەکە) هەڵواسراوە، كە بە زیندانی هەتاهەتایی لە توركیا حكومدراوە. 
كاتێك باسی رەوشی كۆبانێ دەكات، كە دەكەوێتە سەر سنووری توركیا (باكووری كوردستان)، دەنگی دەگۆڕێت.

شاری كۆبانێ بووەتە سیمبووڵی رووبەڕووبوونەوەی رێکخراوی دەوڵەتی ئیسلامی (داعش). رێكخراوێك، كە لە بەرەكانی شەڕی سووریا و عێراق سەركەوتنی بەرچاوی بەدەستهێناوە و ترسی خستووەتە نێو دنیاوە. مانگێك پێش ئێستا خەریك بوو كۆبانێ بكەوێتە ژێر دەستی داعشەوە. كورد داوای هاوكارییان لە ئەمریكا و توركیا كرد، هەردووك لایان نەیاندەویست هاوكاری بكەن و بەهانەی خۆیان هەبوو.

گوشاری نێوەدەوڵەتی وایكرد، كە خۆیان بگۆڕن، ئەوە قسەی ساڵح موسلیمە.
 
چڕكردنەوەی بۆردوومانی فرۆكە ئەمریكیەكان و رێگاپێدانی توركیا بە پێشمەرگە (لە باشووری کوردستانەوە) بۆ چوونە نێو كۆبانێ، كوردی سووریای رزگاركرد. 

ئەمریكا نەیدەتوانی هەروا بە ئاسانی دەستبەرداری شارێك ببێت، كە ببووە سیمبوول و بكەوێتە ژێر دەستی داعشەوە، ئەوەش لە كاتێكدا، كە تازە باراك ئۆباما هاوپەیمانییەكی بۆ تێكشكاندنی داعش پێكهێنابوو.

دوای ئەوە بێدەنگی لە كۆبانێ كرا. ئەمەیش بەو مانایە نایەت، كە شەڕەكە كۆتایی هاتووە.

لەم رۆژانەی دواییدا توانیومانە لە بەرەكانی رۆژهەڵات و باشووری كۆبانێ پێشڕەوی بكەین، ئەوە قسەی ساڵح موسلیمە. فڕۆكەكانی ئەمریكا رێگاكانی هاتنی كۆمەك بۆ داعشیان خاپووركردووە.

بەڵام سەرەڕای پشتیوانی پێشمەرگە و فڕۆكەكانی ئەمریكا، داعش توانیویەتی لە قەراخ شاردا بمێنێتنەوە.

هەموو ئەو خانووانەی لە دوای خۆیان بەجێیان دەهێڵن، مینرێژ دەكەن، هەر بۆیە دەبێت زۆر ئاگامان لە خۆمان بێت، موسلیم وادەڵیت.

ساڵح موسلیم خۆی دەزانێت شەڕ چەند بەئازارە، ئاخر ساڵێك پێش ئێستا كوڕێكی خۆی لە شەری گرووپە تووندڕەوەکان، كوژراوە.  

داعش بە بەردەوامی هێزی پشتیوانی دەگاتێ. ئەوان كۆنترۆڵی دوو دەروازەی سنووری لەگەڵ توركیادا دەكەن، خەڵكانی تازە لەوێوە پەیوەندییان پێوە دەكەن. هەروەها ئەوان دەستیان بەسەر ژمارەیەكی زۆری چەكی پێشكەوتووی سوپای عێراقیدا گرتووە. 

تێكۆشان بۆ پاراستنی شاری كۆبانێی كورد، كوردی كردووەتە یەك. 

هەموو نەتەوەی كورد لە خەباتی پاراستنی كۆبانێدا بوونەتە یەك، ئەوە قسەی ساڵح موسلیمە، كە هیوادارە هەنگاوی دیكەش بهاوێژرێن بەرەو دەوڵەتێكی یەكگرتوو بۆ كوردەكان، كە بەسەر وڵاتانی توركیا، سووریا، ئێران و عێراقدا دابەشکراون. 

ئەوەی لە هەمووان زیاتر دژایەتی دەوڵەتی کورد دەكات، توركیایە، ژمارەیەكی زۆر كورد لە وڵاتەدا دەژین، وەكو كێشەیەكی ئەمنی سەیری كێشەكەیان دەكرێت. 

رەجەب تەیب ئەردۆغان، سەرۆککۆماری تورکیا زیاتر دڵەڕاوكێی كوردەكانیەتی نەوەک دەوڵەتی ئیسلامی (داعش).

ئێستا، ساڵح موسلیم وەكو براوەیەك سەیر دەكرێت، بەڵام پرسیارەكە ئەوەیە، كە ئاخۆ لەداهاتوودا چی روودەدات.</sup> 

^{سالە كوردە 
رووداو- ستۆکهۆڵم}

^29/11/2014

^{کۆمەڵەی شێخ سەعیدی پیران پاش وەرگرتنی مۆڵەت لە پارێزگاری ئامەد بەشێوەیەکی فەرمی کرایەوە. بەڕێوەبەرانی کۆمەڵەکە دەیانەوێ هەمان کۆمەڵە لە باشووری کوردستانیش بکەنەوە و لەبارەی سەرهەڵدانی شێخ سەعید هەر چوار پارچەی کوردستان ئاگادار بکەنەوە.}  

http://rudaw.net/sorani/kurdistan/2711201426

^29/11/2014

<sup>بەریتانیا یاسای توندی بۆ ئەو هاووڵاتیانەی دەركردووە كە لە سووریا و عێراق لە ریزی چەكدارانی دەوڵەتی ئیسلامیدا شەڕ دەكەن. ئەو هاووڵاتیانە بۆ ماوەی 2 ساڵ رێگەیان نادرێت بۆ بەریتانیا بگەڕێنەوە.

سەرۆك وەزیرانی بەریتانیا رایگەیاند كە ئەم رێوشوێنە تایبەتانە دوای تاوتوێكردنێكی درێژ گیراونەتە بەر و بە مەرجێك رێگە بەو هاووڵاتییە گومانلێكراوانە دەدرێت بۆ بەریتانیا بگەڕێنەوە كە ئامادەی دادگا بن و ئەگەر یاسا بە گونجاوی زانی لە ماڵەوە دەستبەسەر بكرێن و لەلایەن پۆلیسەوە چاودێریی بەردەوامیان لەسەر بێت، هەروەها بەشداری بكەن لە خولی دژی توندڕۆیی.

دەیڤید كامیرۆن گوتی "ئێمە دەبێ رێوشوێن بدۆزینەوە بۆ رووبەڕووبوونەوە لەگەڵ ئەو شەڕكەرە بیانیانەی بە بەرنامەوە دەیانەوێت هێرش بۆ سەر خەڵكی ئێمە بكەن". ئەو گوتی "دەسەڵاتە تازەكانی دەوڵەت رێگە لە گەڕانەوەی شەڕكەری بیانی دەگرێت ئەگەر بە مەرجەكانی ئێمە رازی نەبێ".

بەریتانیا و چەند وڵاتێكی دیكەی ئەوروپا دەیانەوێت رێ لە گەڕانەوەی ئەو كەسانە بگرن كە گومانیان لێدەكرێ لە ریزی گرووپە تیرۆریستییەكاندا شەڕیان كردبێت. ماوەیەك لەمەوبەر فەرەنسا دەسەڵاتی بە دەزگاكانی وڵات دا پاسپۆرت و كارتی ناسنامە لەو كەسانە وەربگرنەوە كە گومانی ئەوەیان لێدەكرێت دەستیان لەكاری جیهادیدا هەبێت.

تا ئێستا زیاتر لە 30 گومانلێكراو لە ئەڵمانیا دراون بە دادگا. ئەڵمانیا دەیەوێت زۆر توندتر رێگە لەو كەسانە بگرێت كە دەیانەوێ بچنە ریزی گرووپە جیهادییەكانی عێراق و سووریاوە. بە گوێرەی زانیارییەكان، تا ئێستا نزیكەی 400 كەس لە ئەڵمانیاوە بە نیازی جیهاد بەرەو ئەو دوو وڵاتە چوون.

بەمدواییە هەندێك زانیاریی تازە لەوبارەیەوە لە ئەڵمانیا بڵاوكرانەوە. نزیكەی 240 پۆلیس لە هەڵمەتێكی بەرفراواندا تۆڕێكی گومانلێكراوی تۆندڕۆكانیان لە چەند شوێنێكی ئەڵمانیا دەستگیر كرد. ئەو تۆڕە گومانی ئەوەی لێ دەكرا كە یارمەتیی جیهادییەكانی دابێت بۆ گەیشتن بە سووریا و عێراق و هەروەها بە ڕێگەی نایاسایی یارمەتی دارایی بۆ توندڕۆكان دەستەبەر كردبێت.
لە یەك شوێندا لە ئانتوێرپ، 46 كەس دەستگیركران كە گومانی ئەوەیان لێ دەكرا هاوكاریی بەرفراوانی توندڕۆكانیان كردبێ.

بە گوێرەی راپۆرتێكی سۆفان گرووپ كە بنكەكەی لە نیویۆركە، زیاتر لە 3000 ئەوروپایی بۆ یارمەتیدانی جیهادییەكان بەرەو سووریا چوون. هێزە ئەمنییەكانی بەریتانیا دەڵێن لەم ژمارەیە نزیكەی 500 كەسیان رەگەزنامەی بەریتانیایان هەیە و تا ئێستا نزیكەی 250یان گەڕاونەتەوە بەریتانیا، بۆیە مەترسیی كاری تیرۆریستی لەناو بەریتانیا بەرز بووەتەوە. ئامارەكان نیشان دەدەن كە زۆرینەی ئەو گومانلێكراوانە لەنێوان تەمەنی 16 تاوەكو 21 ساڵیدان.

پلانەكەی بەریتانیا بەشێوەیەك رێكخراوە كە كەمترین سەرئێشەی یاسایی بۆ بەریتانیا دروست دەكات لەلایەن ئەو جیهادییانەی رێگەیان پێ نادرێت بۆ خاكی بەریتانیا بگەڕێنەوە. ئەم یاسایە دوای ئەوە هات كە جێمس فۆڵی رۆژنامەنووسی ئەمریكایی بە دەستی داعشێكی بە رەگەزنامە بەریتانی سەری لە جەستەی جیاكرایەوە.

بەڵام شامی چاكرابارتی بەڕێوەبەری گرووپی هەڵمەتی ئازادی لە لەندەن رەخنە لەو رێكارە دەگرێت و دەڵێت ئەم بڕیارە هەندێك كەس بە تەواوی بێ دەوڵەت دەكات.

ئەو دەڵێت "ئەمە بڕیارێكی هەڵەیە، چونكە ناكرێت بە رێگەگرتن لە گەڕانەوەی ئەو گومانلێكراوانە، كۆمەڵێك خەڵك بە سەرگەردانی لەناو وڵاتاندا بخولێنەوە. ئەمە وەك ئەوە وایە پاشماوەی ژەهراویی خۆمان فڕێ بدەینە دەرەوەی حەوشەی ماڵی خۆمان".

سونگول بەهار كە چالاكوانێكی كوردی نیشتەجێی لەندەنە، دەڵێت كوردی ئەوروپا بە گشتی دەمێكە داواكارە كە دژ بە  جیهادییەكان رێوشوێن بگرنەبەر. بەڵام بە باوەڕی ئەو، ئەم پلانەی ئێستا وا دەكات تەنانەت ئەو كوردانەی كە دەیانەوێت بە هانای كۆبانێشەوە بچن نەتوانن ئەو كارە بكەن.
بەهار دەڵێت "زۆر كورد لێرەوە گەڕاونەتەوە بۆ ئەوەی یارمەتیی ئەو ئاوارانە بدەن. ئێمە نابێ بەو هۆیەوە سزا بدرێین."

دانیمارك نزیكەی 100 گومانلێكراوی هەیە كە بەمەبەستی جیهاد بۆ سووریا و عێراق رۆیشتوون. بەڵام بە گوێرەی یاسای دانیمارك ئەگەر لە ریزی جیهادییەكاندا شەڕ نەكەیت، ئاساییە لە سووریا بیت و دژی جیهادییەكان شەڕ بكەیت. یاسای دانیمارك بە گشتی ناتوانێت رێگە لە خەڵك بگرێت كە سەفەر بكەن.

دانیمارك هەروەها چەند خولێكی كردووەتەوە كە یارمەتیی گەنجان دەدات بۆئەوەی چۆن خۆیان لە هزری توندڕۆیی بپارێزن. ئەمە تەنانەت ئەوانەش دەگرێتەوە كە وەك جیهادی دەگەڕێنەوە دانیمارك.

پریبێن بەرتەلسەن، پرۆفیسۆری دەرونشیكاری لە زانكۆی ئارهووس دەڵێت "ئەگەر هیچ تاوانێكت نەكردبێت، ئێمە یارمەتیت دەدەین بگەڕێیتەوە."

بەڵام زۆر لە سیاسییەكانی دانیمارك داوای رێوشوێنی توندتریان كردووە. لارس ئەسلان راسموسێن كە باوكی كوردە و دایكی دانیماركییە و خۆی لەناو سۆسیال دیمۆكراتەكان چالاكە، دەڵێت پێویستە لایەنگرانی داعش لە دانیمارك دەربكرێن.</sup> 

^{فیۆنا لێنی
رووداو- لەندەن}

^28/11/2014

<sup>بۆ رزگاركردنی دارستانەكانی رۆژهەڵاتی كوردستان، چالاكانی ژینگەپارێزی لە شاری جوانڕۆ كەمپینێكیان سازكردووە بۆ چاندنی داربەڕوو كە بەردەوام ژمارەیان لە كەمبوونەوەدایە.

كەمپینی بەڕوو لەلایەن عەتا قادری، بەرپرسی ژینگەپارێزی شاری جوانڕۆوە پێشنیاز كرا. دواتر ئەنجوومەنی سەوزی ماپریسی جوانڕۆش پشتگیری كرد. عەتا قادری گوتی "ئامانجی ئەو كەمپەینە رێگرتنە لە نەخۆشكەوتن و لەنێوچوونی دار بەڕووەكان. بەشێكی زۆر لە دار بەڕووەكانی پارێزگای ئیلام تووشی نەخۆشی هاتوون، ئەم نەخۆشیەش لە هەندێ شوێنی پارێزگای كرماشانیش پەیدا بووە".

لەو كەمپەینەدا دەبێت هەر كەسێك سێ كەس بۆ كەمپەینەكە بانگهێشت بكات. هەر یەك لەوانیش دەبێت سێ بەڕوو بچێنن. یان هەر دارێكی دیكە كە لەگەڵ كەشوهەوای شوێنەكەدا گونجاو بێت. بۆئەوەی كەمپەینەكە زیاتر پەرە بستێنێ، هەریەك لەو سێ كەسە دەبێت سێ كەسی دیكە بانگهێشت بكات.

ئومێد ئەحمەدیان، بەرپرسی ئەنجومەنی ماپریس، دەڵێ "پێشتر كەمپەینی سەهۆڵاو هەبوو، بۆیە ئێمەش لەم چوارچێوەیەدا بیرمان كردەوە شتێكی هاوشێوە بۆ ژینگە بكەین". كەمپەینەكە تەنیا لە شاری جوانڕۆدا سنووردار نەبووە. ژینگەپارێزان لە شارەكانی مەهاباد، مەریوان، سنە و تەنانەت سلێمانیش بانگهێشتی كەمپەینەكە كراون و ئەوانیش پێیەوە پەیوەست بوون.

بەگوتەی عەتا قادری، ئەوان بۆ پێشگیری لە لەنێوچوونی دارستانەكان ساڵی پار خولی راهێنانیان بۆ دەیان منداڵ كردووەتەوە و دواتر بەڵگەیەكیان پێداون تاوەكو هەر كەسێك دارێكی بڕی یان ژینگەی پیس كرد بەشێوەی سەمبۆلیك سزای بدەن.

تەنیا لە ناوچەی جوانڕۆ ئەمساڵ 20 حاڵەتی ئاگركەوتنەوە لە دارستانەكاندا روویداوە. جگە لە ئاگر مەترسییەكی دیكەش هەڕەشە لە دارستانەكانی رۆژهەڵاتی كوردستان دەكات كە ئەویش داگیركردنی دارستانەكانە لەلایەن خەڵكەوە. چالاكانی ژینگەپارێز دەڵێن، كەسانی بەرژەوەندیخواز دارستانەكان دەبڕنەوە و لە شوێنەكانیان خانووبەرە دروستدەكەن.

ئومێد ئەحمەدیان دەڵێ ئەوان وەك ئەنجومەنی ماپریس سكاڵایەكیان سەبارەت بە داگیركردنی دارستانەكان لەلایەن كەسانی بەرژەوەندیخوازەوە لە ئیدارەی سەرچاوە سروشتییەكان تۆمار كردووە. ئەحمەدیان  بە (رووداو)ی گوت ئەوان بەڵگەشیان لە بەردەستە كە كەسانێك دارستانەكان بۆ كاری كشتوكاڵی دەبڕنەوە.

بەڵام ئەو چالاكە ژینگەپارێزە زۆر بەهیوا نییە كە بتوانن كەیسەكەیان ببەنەوە. چونكە پێشتریش كەسانێك كە كەیسی داگیركردنی زەوییان هەبووە، بە پارە خۆیان لە سزا دەرباز كردووە.
 دیاردەی لەنێوبردن و داگیركردنی دارستانەكان لە زۆر لە شارەكانی رۆژهەڵاتی كوردستان دەبینرێ. 

چەند رۆژ پێش ئێستا 12 پارێزگاری زاگرۆسنشین لە شاری ئیلامی رۆژهەڵاتی كوردستان كۆبوونەوە و رێككەوتننامەیەكیان بۆ رزگاركردنی دار بەڕووەكانی زنجیرە چیاكانی زاگرۆس واژۆ كرد. زنجیرە چیاكانی زاگرۆس دەكەوێتە رۆژئاوا و باشووری رۆژئاوای ئێرانەوە. پارێزگاكانی رۆژهەڵاتی كوردستان هەموویان لە پارێزگا زاگرۆسنشینەكانن.

ناوچەی زاگرۆس نزیك بە سی ملیۆن هێكتار رووبەری هەیە و 40%ی ئاوی ئێران لەوێوە سەرچاوە دەگرێ. بۆیەشە رۆڵێكی گرنگی لە زیندووراگرتنی ژینگەی ئێراندا هەیە. لە پارێزگاكانی رۆژهەڵاتی كوردستاندا، دار بەڕووەكانی پارێزگای ئیلام زیاتر لە هەمووان مەترسی لەنێوچوونیان لەسەرە. لەم پەیوەندییەشدا ئاماری جیاواز بڵاو دەبێتەوە. شارەزایان دەڵێن: لە ماوەی ئەم ساڵانەی رابردوودا نزیكەی 100 هەزار هێكتار كە زیاتر لە یەك لەسەر شەشی كۆی دارستانەكانی ئیلام دەكات، بە هۆكاری ناسروشتی لەنێوچوون.

دارستانە بەڕووەكان 527 هەزار هێكتار لە رووبەری پارێزگای كرماشانیان داپۆشیوە. عەتا قادری باسی لەوەش كرد كە ئەوان فەرمانبەری پێویست و تەنانەت بودجەی پێویستیان بۆ راپەڕاندنی ئەركەكانیان نییە. بۆیە ناچارن قۆناغ بە قۆناغ كارەكانیان راپەڕێنن.</sup>

^{rudaw/ فواد حەقیقی} 

^28/11/2014

<sup>ئیسرائیل، تورکیا تۆمەتبار دەکات، بە داڵدەدانی سەرکردەکانی حەماس لە سەر خاکەکەی، بەوەی حەماس "لەوێ پلان بۆ  هێرشكردنە سەر ئیسرائیل دادەڕێژێت".

حكومەتی  ئیسرائیل رایگەیاند، كە پلانی  گەورەترین هێرشی بزووتنەوەی حەماسیان پووچەڵكردووەتەوە، کە بزووتنەوەکە بە نیازبووە هێرش بكاتە سەر یاریگایەكی فوتبوڵ لە شاری ئۆرشەلیم و چەند شوێنێكی دیكە لە کەناری رۆژئاوا ئەنجامبدات، لەبەرامبەردا بزووتنەوەی حەماس رەتیدەکاتەوە پلانێکی لەو جۆرەیان هەبێت.

دەزگای ئاسایشی نێوخۆی ئیسرائیل، كە بە بەیت شین ناسراوە و 30 ئەندامی بزووتنەوەی حەماسیان دەستگیركردووە، کە لە  ئوردن و غەززە مەشقیان لەسەر چەك و چۆنێتی ئەنجامدانی تەقینەوە كردووە.
 
بە گوتەی دەزگای بەیت شین، بەرپرسەكانی حەماس لە توركیا پلانی ئەنجامدانی هێرش بۆ سەر ئیسرائیل دادەڕێژن.</sup>

^28/11/2014

<sup>وەك ناڕەزاییەك بەرامبەر سەردانەكەی دەوڵەت باخچەلی، سەرۆكی بزووتنەوەی نەتەوەپەرست MHP، خاوەن دوكانەكانی ئەو شارەی باكووری كوردستان دوكانەكانیان داخست.

لە كاژێر 10:00ـی سەرلەبەیانی ئەمڕۆ هەینی 28ـی تشرینی دووەمی 2014ـەوە، لە نێوەڕاستی شاری دێرسیم، بەتایبەت گەڕەكی سیهەنگ، ژمارەیەكی زۆر پۆلیس و هێزی ئەمنی بڵاوەیان پێكراوە، ژمارەیەكی زۆر خەڵكیش لە گەڕەكی جمهوریەت كۆبوونەتەوە و بەرەو گەڕەكی سیهەنگ دەڕۆن، قوتابییانیش بایكۆتی خوێندنیان كردووە و هاتوونەتە نێو خۆپێشاندانەكەوە.

خۆپێشاندانەكە لەلایەن فیدراسیۆنی مافە دیموكراتی و پێكهاتەكانی شاری دێرسیمەوە رێكخراوە وەك ناڕەزییەك بەرامبەر ئەو قسانەی دەوڵەت باخچەلی، كە لە هەفتەی رابردوودا و  لەیادی كوشتنی سەیدرەزا، لەمیانی وتارێكیدا لەبەردەم پەرلەمانتارانی وڵاتەكەی گوتی: "ئۆجەلان چی بێت ئەو كاتەش سەید رەزا هەمان شت بووە، هەردووكیان تیرۆریستن و پێویستە ئۆجەلانیش وەك سەید رەزا بكوژرێ، لە تونجەلیش هیچ كۆمەڵكوژییەك ئەنجامنەدراوە".

بەپێی بەرنامەی سەردانەكەی باخچەلی، بڕیاربوو كاژێر 9:30 لە خارپێتەوە بچێتە دێرسیم و لە گەڕەكی سیهەنگ نوێژی هەینی بكات و دواتر بچێتە كۆشكی پارێزگا.

هەروەک بڕیاربوو باخچەلی سەردانی جەمخانەی عەلەوییەكانیش بكات، بەڵام پیرانی جەمخانە رایانگەیاندووە، كە نایانەوێ باخچەلی سەردانیان بكات.

77 ساڵ بەر لە ئێستا لە 15ـی تشرینی دووەمی 1937دا، سەید رەزای دێرسیم، كە سەركردەی شۆرشی دێرسیم بوو لەباكووری كوردستان، لەلایەن دەوڵەتی توركیاوە لەسێدارەدرا.</sup>

^{رووداو- دێرسیم}

^28/11/2014

<sup>ئەندامێکی هاوپەیمانی کوردستانی رایدەگەیێنێت کە دەنگ لەسەر پرۆژەیاسای بودجەی 2015 نادەن، ئەگەر هاتوو سزاکانی سەر هەرێمی کوردستان وەک خۆیان مانەوە.

ئەحمەد حەمە رەشید، بڕیاردەری لیژنەی دارایی لە ئەنجوومەنی نوێنەرانی عێراق، رۆژی پێنجشەممە 27ی تشرینی دووەمی 2014 بە تۆڕی میدیایی رووداوی راگەیاند، کە "رۆژی پێنجشەممە ئەنجوومەنی وەزیران گفتوگۆی لەسەر رەشنووسی پرۆژەی بودجەی گشتی عێراق بۆ ساڵی 2015 کرد، بەڵام بەهۆی کێشەی کورتهێنان لە بودجە، نەگەیشتە هیچ بڕیارێک"، ئاماژە بۆ ئەوەش دەکات کە بەهۆیەوە دانیشتنەکە بۆ رۆژی شەممە دواخرا.

حەمەرەشید ئەوەشی راگەیاند کە "کورتهێنانێکی گەورە لە بودجەی گشتی عێراق هەیە، کە بە(41 ترلیۆن دیناری عێراقی) دەخەمڵێندرێت، لەو کاتەدا کۆی داهاتی عێراق دەگاتە (108 ترلیۆن دیناری عێراقی)، کۆی بەخشینیش دەگاتە نزیکەی (150 ترلیۆن)، ئەمەش بە تەنیا دەبێتە تەحەدا لەبەردەم پەسندکردنی بودجە". حەمەرەشید ئاماژە بۆ ئەوەش دەکات کە هاوپەیمانی کوردستانی دەنگ لەسەر بودجەی 2015 نادات، لە حاڵەتی ئەوەی بەهەمان ئەو سزایانەی بەسەر هەرێمی کوردستان سەپێندراون ببردرێتە ئەنجوومەنی نوێنەران.

بڕیاردەری لیژنەی دارایی ئاماژە بۆ ئەوەش دەکات کە ئەو بەربەستانەی لە بودجەی ساڵی رابردوو 2014 هەبوون، هەمان شتیش لە بودجەی 2015دا هەن، سەبارەت بە بەشی هەرێمی کوردستانیش لە بودجەی گشتی عێراق دا، ئەگەر ئەو بڕەی تایبەتکراوە بۆ هەرێمی کوردستان بگاتە نزیکەی 12%، ئەوا هەرێمی کوردستان لە ئیستحقاقی بودجە مافی دەخورێت".

رۆژی پێنجشەممە ئەنجوومەنی وەزیرانی عێراق لە دانیشتنی نائاساییدا خۆیدا، تاوتوێکردنی پرۆژەیاسای بودجەی ساڵی 2015 بۆ رۆژی شەممەی داهاتوو دواخست، بۆ ئەوەی ئەوخاڵانەی ماون و گفوگۆیان لەبارەوە نەکراوە، لە دانیشتنی داهاتوو تاوتوێی بکرێن.</sup>

^28/11/2014