<sup>سەرۆككۆماری پێشووی توركیا پێیوایە لە ئەگەری سەربەخۆبوونی هەرێمی كوردستان ناوچەكە رووبەڕووی ناسەقامگیرییەكی دیكە دەبێتەوە، ئەوەش دەبەستێتەوە بە چەند هۆكارێكەوە.
گیول لە چاتام هاوس لە بەریتانیا بەشداری كۆنفڕاسێكی كرد و گوتی: "لەدوای شەڕی كەنداو، تەنیا هەڕەشەیەك لە ناوچەكەدا هەبووبێت سەدام حوسێن بوو، بەڵام ئێستا هەڕەشەكان زیادیانكردووە".

"نەمانی رێفراندۆم لە رۆژەڤی كورد بە ئەرێنی دەبینین"

گیول لە وەڵامی پرسیاری ئەوەی كە ئایا توركیا كوردستانێكی سەربەخۆ لە عێراق قبوڵ دەكات؟، گوتی: "بڕوامان وایە سەربەخۆبوونی هەرێمی كوردستان ناوچەكە دەخاتە نێو ناسەقامگیرییەكی دیكەوە، ئەوەی كە ئەنجامدانی ریفراندۆم لە رۆژەڤی كورد نەماوە بە ئەرێنی دەبینم، چونكە بەشێك لە سوننە و شیعەكان دەڵێن وڵاتەكەمان دابەش دەبێت".

هەروەها دەڵێ: "نەك هەر لە عێراق، بەڵكو لە هەر وڵاتێكی دیكە بێت، دەبێ مافی هاونیشتمانیبوونی یەكسان بە كورد بدرێت و بە پێی یاساكانی ئەو وڵاتە دەستەبەری ئەو مافەی بۆ بكرێت، بەڵام عێراق خۆی فیدڕاڵە و هەرێمی كوردستانیش لەنێو دەستووردا هاتووە، رێككەوتنیشیان لەسەر نەوت و گاز دڵخۆشكەرە".

عەبدوڵڵا گیول هێشتا بڕوای بە هەستانەوەی حكومەتی عێراق هەیە، بەڵام دەڵێ: "ئەگەر بێت و هەڵەكان راستبكرێنەوە پێشهاتێكی باش دەبێت، ئێمە لە زووەوە گوتومانە كە حكومەتی عێراق هەڵە دەكات كە پێكهاتەیەكی گرنگی عێراق كە سوننەكانە پەراوێز دەخات".

بە بۆچوونی گیول: "داعش زۆر باش توانی توڕەیی سوننەكان ئاراستە بكات، توڕەیی ئەو كەسانەی لە سوپای سەدام دابڕابوون، ئەوانەی هەستیان دەكرد زیندانین، ئەو كەسانەی هەستیان دەكرد وڵاتەكەیان پارچە دەبێت و بەتەواوی كەوتووەتە ژێر كاریگەری ئێران".</sup>

فه‌رهاد چۆمانی/ rudaw

^26/11/2014

<sup>سەرۆكی هەرێمی كوردستان رایدەگەیێنێت،" هەڕەشەی تیرۆریستان بۆ سەر ئاسایشی جیهان و گشت دەوڵەتان جیدییە، بۆ رووبەڕووبوونەوەیشی پێویستە لە بواری فكری و ئابوورییشەوە شەڕیان بكرێت و سەرچاوەی دارایی و داهاتیان وشك بكرێت".

مەسعود بارزانی، سەرۆكی هەرێمی كوردستان ئەمڕۆ سێشەممە 25/11/2014 لە سەڵاحەدین،  پێشوازی لە گریگۆ گیزی، سەرۆكی فراكسیۆنی پارتی چەپ لە پەرلەمانی ئەڵمانیای فیدراڵ كرد. بەپێی راگەیێندراوی كۆبوونەوەكە،  لە دیدارەكەدا سەرۆكی فراكسیۆنی پارتی چەپ لە پەرلەمانی ئەڵمانیا وێڕای ئاماژەدان بە پێشكەوتنەكانی هەرێمی كوردستان لە هەموو بوارەكاندا، خستوویەتییەڕوو،" ئێستا لەسەر ئاستی جیهاندا كورد رێز و پێگەیەكی زۆر باشی هەیە و كوردستان بۆ ماوەیەكی درێژ چەوسێندراوەتەوە، بەڵام توانیویەتی كار بۆ ئازادی بكات و رێگەی خۆی سەركەوتووانە بكاتەوە".

سەرۆكی فراكسیۆنی پارتی چەپ دەستخۆشی لە هەرێمی كوردستان و هێزی پێشمەرگە كردووە كە توانیویانە رێگە لە تیرۆریستان بگرن و ئێزدی و مەسیحی و پێكهاتە نەتەوەیی و ئایینییەكانی ناوچەكە بپارێزن. 

گریگۆ گیزی ئاماژەی بۆ ئەوەش  كردووە كە هەرێمی كوردستان بووەتە پەناگەی سەدان هەزار ئاوارە و پاڵپشتیی وڵاتەكەیشی لە یارمەتیدانی مرۆیی بۆ كوردستان و هەروەها هاوكاریكردن و مەشقپێكردنی هێزەكانی پێشمەرگە دووپاتكردووەتەوە.

لە بەرامبەریشدا بارزانی تیشكی خستووەتەسەر بارودۆخی مەیدانی بەرەكانی رووبەڕووبوونەوەی پێشمەرگە و چەكدارانی داعش و ئاماژەی بەوەداوە، كە "هێزەكانی پێشمەرگە توانیویانە رێگە لە پێشڕەویی تیرۆریستان بگرن و تیرۆریستان لە زۆربەی ئەو ناوچانە وەدەربنێن كە داگیریان كردبوون".

سەبارەت بە ئەو هاوكارییە سەربازییانەی لە لایەن وڵاتان پێشكەشی پێشمەرگە كراوە بارزانی ئەوەی خستەڕوو كە" هێشتا ئەو هاوكارییانە لە ئاستی ئەو هەڕەشە و تەحدیاتە نییە كە لە لایەن تیرۆریستانی داعشەوە رووبەڕووی كوردستان بووەتەوە، كەچی لە بەرانبەریشدا تیرۆریستانی داعش ئیمكانیات و چەكی پێشكەوتووی دوو دەوڵەتیان كەوتووەتە دەست".

سەبارەت بە دۆخی ئەو ئاوارانەی كە ئێستا لە باشووری كوردستان جێگیركراون، سەرۆكی هەرێمی كوردستان رایگەیاندووە،" بە هەموو توانایەك یارمەتی ئاوارەكان دەدەین و دەیانپارێزین، بەڵام ئاستی كارەساتەكە و ژمارەی ئاوارەكان یەكجار زۆرە و لە تواناكانی هەرێمی كوردستان تێپەڕیوە، بە تایبەت كە لە وەرزی زستاندا پێویستییەكان زۆرتر دەبن و ئاوارەكانیش تووشی بارودۆخێكی نالەبارتر دەبنەوە". هەروەها هەر لەم دانیشتنەدا قسە لەبارەی بارودۆخی رۆژئاوای كوردستان، چوونی پێشمەرگە بۆ كۆبانێ و پەیوەندییەكانی نێوان هەرێمی كوردستان و ئەڵمانیا كراوە.</sup> 

^25/11/2014

^{لەکۆبوونەوەی پەیمانی باکوری ئەتڵەسی ناسراو بە (ناتۆ) چەند پێشنیارێک بۆ کوردستان کران و بەفەرمیش داواکرا پارتی کرێکارانی کوردستان (پەکەکە) لەلیستی تیرۆر دەربھێندرێت و سەربەخۆییش بۆ باشوری کوردستان ڕابگەیەندرێت.}

^{ئەمڕۆ ڕێکخراوی ناتۆ کۆبوونەوەی ژمارە ٦٠ی بۆ پەرلەمانتارانی ڕێکخراوەکە لەشاری دەنھاگ ـ ی ھۆڵەندا سازکرد، کە دەستەی پەرلەمانتارانی ناتۆ پێکھاتوون لەپەرلەمانتارانی وڵاتانی ئەندامی ڕێکخراوی پەیمانی باکوری ئەتڵەسی ناسراو بە (ناتۆ) لەپەرلەمانی ئەوروپا.}

^{لەکۆبوونەوەکەدا پەرلەمانتاران چەند باسێکیان پێشکەشکرد لەبارەی کێشەکانی ئۆکراین و ھەروەھا شەڕ دژی داعش، لەو نێوەندەشدا بەوردی باسی ڕۆڵی کورد کرا لەڕووبەڕووبونەوەی گروپی تیرۆریستی داعش لەعێراق و سوریادا.}

^{پیتەر پیلز ئەندامی پەرلەمانی ئوسترالیا کە ھاوکات ئەندامی پەرلەمانی ناتۆشە چەند پێشنیازێکی ئاراستەی ڕێکخراوی ناتۆو یەکێتی ئەوروپا کردو وتی:"پێویستە ھەرێمە کوردییەکان لەتورکیا، ئێران و سوریا مافی ئۆتۆنۆمییان پێبدرێت و ھەرێمی کوردستانیش مافی دەوڵەتی سەربەخۆی ھەیەو پێویستە ڕێگری لێنەکرێت".}

^{لەکۆتا خاڵی پێشنیارەکەیدا ئەو پەرلەمانتارە ئوسترالییە وتووشیەتی:"پێشتر ڕێکخراوی ڕزگاریی فەڵەستینی خرابووە لیستی تیرۆرەوە، بەڵام دواتر ئەو ڕێکخراوە لەلیستی تیرۆر دەرھێندرا، لەبەرئەوە پێویستە لەئێستاشدا پەکەکە ھەمان ئەو شانسەی پێبدرێت و لە لیستی تیرۆری نێودەوڵەتی دەربھێندرێت و ناوی بسڕدرێتەوە".}

^{ئەو پەرلەمانتارە باسی لەوەشکردووە، ئێستا گەورەترین شەڕی دژی گروپی تیرۆریستی داعش لەسەرئاستی جیھان، کورد دەیکات، "بۆیە پێویستە بەگرنگییەوە لەڕۆڵی کوردان بڕوانرێت و ھاوکاری بکرێن".}

^{داواشی لەناتۆو یەکێتی ئەوروپا کردووە، بەزووترین کات بکەونە ناو ھەوڵدانەکانیانەوەو نێوانگیریی تورکیاو پەکەکە بکەن، وتووشیەتی:"ئەگەر تورکیاش گرنگی بەمە نەدات، پێویستە ناتۆ فشاری بخاتەسەر".}

^{دەستەی پەرلەمانتارانی ناتۆ لەساڵی ١٩٥٥وە لەلایەن ١٥٨ پەرلەمانتاری یەکێتی ئەوروپاو پەرلەمانتارانی ئەو وڵاتانەی ئەندامی ناتۆن پێکھێندرا، دواتر لەساڵی ١٩٦٦دا وەکو دەستەی باکوری ئەتڵەنتیک ناسێندراو پاشان لە ١٩٩٩دا لەلایەن فراوانتر کراو ژمارەیەکی زیاتر لەپەرلەمانتارانی وڵاتانی ئەندامی ناتۆو پەرلەمانی ئەوروپا بەشداریی کۆبوونەوەکان دەکەن.}

^25/11/2014

<sup>سەرۆكوەزیرانی ئیسرائیل پێشوازی لە بە ئەنجام نەگەیشتنی رێككەوتنی ئەتۆمی نێوان ئێران و وڵاتانی 5+1 دەكات.

بنیامین ناتانیاهۆ، سەرۆكوەزیرانی ئیسرائیل رایگەیاند: "ئەو رێككەوتنەی ئێران دەیویست بكرێت كارەسات بوو، چونكە دەرفەتی ئەوەی بە ئێران دەدا توانای پیتاندنی یۆرانیۆمی هەبێت بۆ بەرهەمهێنانی چەكی ئەتۆمی بە جۆرێك كە گەمارۆكانیشی لەسەر نەمێنێت".

بنیامین ناتانیاهۆ دەڵێ "شتێك بە ناوی مافی پیتاندنی یۆرانیۆم لە ئارا نییە". دەشپرسێ: "ئەگەر ئێران نایەوێت بۆمب دروست بكات ، پیتاندنی یۆرانیۆمی بۆچییە؟".

ئیسرائیل لە بەرنامەی ئەتۆمی ئێران نیگەرانە و هەڕەشەی كردووە ئەگەر دانوستاندنەكان راگرتنی چالاكییە ئەتۆمییەكانی ئێرانیان لێ نەكەوێتەوە، ئەوا بۆ بەرگرتن بە ئێران لە دەستڕاگەیشتنی بە چەكی ئەتۆمی رێگای سەربازی دەگرێتەبەر.</sup>

^25/11/2014

<sup>سەرۆككۆماری توركیا دەڵێت،"هیچ یەكسانییەك لەنێوان ژن و پیاودا نییە و ئایینی ئیسلام رۆڵی ئافرەتی لە كۆمەڵگەدا دیاریكردووە، كە ئەویش دایكایەتییە".

رەجەب تەییب ئەردۆغان، سەرۆككۆماری توركیا لەمیانەی كۆنفڕانسێكی نێوخۆیی حیزبەكەی لە ئیستەنبوڵ رایگەیاند،'' هیچ یەكسانییەك لەنێوان ژن و پیاودا نییە، رێكخراوەكانی بەناو بەرگریكار لە ژن، ژن لە گەورەترین رۆڵ بێبەش دەكەن، ئەویش دایكایەتییە كە ئایینی ئیسلام زۆر بە روونی ئەو رۆڵەی بۆ دیاریكردووە''.

ئەردۆغان هەروەها گوتی،'' ئەم بابەتە بۆ بەرگریكاران لە مافەكانی ژن شرۆڤە مەكەن، چونكە ئەوان تەنانەت باوەڕیان بە دایكایەتی نییە، ناشكرێت ژن و پیاو بە یەكشێوە مامەڵەیان لەگەڵ بكرێت، لەبەرئەوەی دەبێتە دژایەتیكردنی سرووشتی مرۆڤایەتی''.

لەدرێژەی گوتەكانیدا ئەردۆغان لەسەر جیاوازییەكانی نێوان ژن و پیاو گوتی،'' هەڵسوكەوت و خوو و جەستەی ژن و پیاو جیاوازن، ناكرێت ژنێك كە شیر بە منداڵەكەی دەدات لەگەڵ پیاو یەكسان بكرێت، نابێ ژن ناچار بەهەموو كارێك بكرێت كە پیاو دەیكات، وەك ئەوەی لە رژێمی شیوعییەكان پەیڕەودەكرێت، وەكو جووتیارێك داوای لێبكرێت زەوی بكێڵێت، چونكە ئەمە دژی سرووشتە لاوازەكەی ئافرەتە''.</sup>

^rudaw

^24/11/2014

<sup>رۆژی  دووشەممە 24ی نۆڤێمبەر، دوایین وادەی دانوستاندنەكانی نێوان ئێران و گرووپی پێنج كۆ یەكە لە ڤیەننا، بۆ ئەوەی بگەنە دوایین رێككەوتن لەبارەی پرسی دۆسیەی ئەتۆمی ئێران، بەڵام وەك چۆن لە راگەیەندنەكاندا باسدەكرێت هێشتا جیاوازییەكی زۆر لەنێوان ئێران و وڵاتە زلهێزەكانی جیهاندا هەیە. 

بەرپرسێكی باڵای وەزارەتی دەرەوەی ئەمریكاش رایگەیاندووە، لە دوایین رۆژی ئەو وادەیەدا ئەگەر ئومێدی هیچ رێككەوتنێك نەبێت، ئەوا ئەندامانی گفتوگۆكان قسە لەسەر درێژكردنەوەی ئەو وادەیە دەكەن. 

پێش دەستپێكردنی كۆبوونەوەكانی رۆژی د‌ووشەممە، بە چەند كاژێرێك ئەو بەرپرسە ئەمریكییە ئاماژەی بەوە كرد، كە ئەمریكا لەگەڵ پێنج وڵاتەكەی دیكەی بەشداربوو لە دانوستاندنەكاندا قسە لەسەر چەند بژاردەیەكی دیكە دەكەن، یەكێك لە بژاردەكانیش درێژكردنەوەی دانوستاندنەكانە. ئەمە لەكاتێكدایە پێشتر باس لەوە دەكرا 24ی نۆڤێمبەری 2014 دوایین وادەیە بۆ ئێران بۆ ئەوەی نیشانی بدات بەرنامە ئەتۆمییەكەی تەنها لەپێناو ئاشتیدایە و لەگەڵ ئێران بگەنە رێككەوتن. 

هەروەها پیێش دەستپێكردنی دانوستاندنەكان وەزیرانی دەرەوەی، ئەڵمانیا، فەرەنسا و بەریتانیا بەجیا باسیان لەوەكردبوو كە هێشتا جیاوازی بۆچوونەكان لەگەڵ ئێراندا زۆرن و لایەنەكان لە هەوڵی لیكنزیكبوونەوەدان، بۆیە بەدوای بژاردەی نوێدا دەگەڕێن.</sup>

^24/11/2014

<sup>فەرماندەی گشتی هێزەكانی بەدر، رێككەوتنێكی نێوان خۆیان و یەكێتی نیشتیمانی لەبارەی سەعدیە و جەلەولا بۆ (رووداو) ئاشكرا دەكات و دەڵێ "هیچ هێزێكی كوردی لە رزگاركردنی سەعدیە بەشدار نەبووە و ئێرانیش رۆڵی سەرەكی هەبوو لە رزگاركردنی جەلەولا و سەعدیە".

گرتنەوەی جەلەولا و سەعدیە ببووە گرێكوێرە لەبەردەم هێزەكانی پێشمەرگە، چەندین جار هەوڵی رزگاركردنی ئەو دوو شارۆچكەیە درا بەڵام بێ ئاكام بوون تاوەكو رۆژی 23/11/2014 گرێیەكە كرایەوە و هەردوو شارۆچكەكە لە دەست چەكدارانی داعش دەرهێنران.</sup>

^{هیچ پێشمەرگەیەك لە رزگاركردنی سەعدیە بەشدار نەبووە;}

هادی عامری، فەرماندەی گشتی هێزەكانی بەدر كە هێزێكی شیعەیە، لە دوای رزگاركردنی ئەو دوو شارە لە پەیوەندییەكی تەلەفۆنیدا بە(رووداو)ی راگەیاند "شارۆچكەی سەعدیە تەنیا بە هێزی حەشدی شەعبی و بە پاڵپشتی سوپای عێراق و پۆلیسی فیدراڵی رزگاركرا". گوتیشی "هیچ هێزێكی پێشمەرگە لە رزگاركردنی سەعدیە بەشدار نەبووە".

بەپێی زانیارییەكانی (رووداو)، نێوەڕاستی هەفتەی رابردوو قاسم سلێمانی، فەرماندەی گشتی سوپای قودسی ئێرانی كە ئێستا سەرپەرشتی شەڕەكانی سوپای عێراق دەكات لە دژی داعش و لەهەندێ ناوچە سەرپەرشتی هێزەكانی پێشمەرگەی یەكێتیش دەكات، پلانی بۆ رزگاركردنی سەعدیە و جەلەولا داڕشتووە.

هادی عامری ئەوە پشتڕاست دەكاتەوە كە سوپای ئێران رۆڵی سەرەكی هەبووە لە هاوكاریكردنی هێزەكانی پێشمەرگە و سوپای عێراق بۆ رزگاركردنی ئەو دوو شارۆچكەیە "ئێران هەم بۆ جەلەولا و هەم بۆ سەعدیە زۆر هاوكاریی ئێمەی كرد و دەبێ زۆر سوپاسیان بكەین، بە فەرمیش ئەو سوپاسە رابگەیەنین".

جگە لە ئێران، ئەمریكا و هاوپەیمانەكانیان لە ئاسمانەوە و لە رێگەی فڕۆكەوە لە مۆڵگەكانی داعش دەدەن. بەڵام عامری كە سەرپەرشتی پرۆسەی رزگاركردنی سەعدیەی كردووە، رەخنەی توند لە ئەمریكا دەگرێ و بە "درۆزن" ناوی دەبات. عامری هەر لە درێژەی ئەو قسانەیدا بۆ (رووداو) گوتی "ئەمریكا گاڵتەمان پێدەكات و هاوكاریمان ناكات، بەس درۆ دەكەن، بەڵام ئێران لەسەر ئەرز هاوكارییەكی جددی ئێمەی كرد".

ئێران رۆڵی سەرەكی هەبوو لە رزگاركردنی جەلەولا و سەعدیە

بە قسەی فەرماندەی بەدر بێت، هێزەكانی حەشدی شەعبی و سوپای عێراق هاوكاری هێزەكانی پێشمەرگەشیان كردووە لە رزگاركردنی جەلەولا.

لەو هێرشەدا كە هەر رۆژی یەكشەممە دەستیپێكرد و تەواوبوو، 20 پێشمەرگە شەهیدبوون و نزیكەی 40 پێشمەرگەش برینداربوون كە زۆربەیان بەهۆی بۆمبی چێنراو بوونە قوربانی.

دوای رزگاركردنی جەلەولا، مەلا بەختیار لێپرسراوی دەستەی كارگێڕیی مەكتەبی سیاسی یەكێتی كە خۆی یەكێك بوو لە بەشداربووانی شەڕەكە بە (رووداو)ی راگەیاند "ئێمە وەك هەرێمی كوردستان هەردوو ناحیەكە بە دوو شوێنی ناكۆكی لەسەر دەزانین، تكاش دەكەین هیچ كەسێك لە بەعقووبە بیر لە پەیڕەوكردنی سیاسەتی رابردوو و هەڕەشەكردن و فشار دروستكردن نەكاتەوە، چونكە ئەمەیان تاقیكردەوە".

مەلا بەختیار هۆشداریش دەداتە حكومەتی عێراق "ئەو سیاسەتەی هەندێك بەرپرسی پارێزگای دیالە و بەغدا دەیانگرتەبەر، وەك چەكداركردنی  هەندێك هۆزی خۆفرۆش و پشتبەستن بەو هێزانە بۆ دابینكردنی سەقامگیری و ئاسایش، لەمەودوا مەحاڵە".

دەبێ بە فەرمی سوپاسی ئێران بكەین

<sup>لەبارەی بوونی هێزی سوپای عێراق و حەشدی شەعبی كە ناحیەی سەعدیەی كۆنترۆڵ كردەوە، كۆسرەت رەسوڵ، جێگری سكرتێری گشتی یەكێتی نیشتیمانی كوردستان كە لە هەمانكاتدا جێگری سەرۆكی هەرێمی كوردستانە بە (رووداو)ی گوت "بڕیاریانداوە لە ماوەی 24 كاژێری داهاتوودا چۆڵی بكەن".

بەڵام هادی عامری لە قسەكانیدا بۆ (رووداو) گوتی "رێككەوتنمان هەیە لەگەڵ پێشمەرگە كە جەلەولا و سەعدیە بەهێزی هاوبەش و بە بازگەی هاوبەش بپارێزین". عامری ئاشكرای كرد كە "هیچ بەرپرسێكی كوردی یاخود هێزی پێشمەرگە بە ئێمەی نەگوتووە سەعدیە چۆڵ بكەین و رادەستی پێشمەرگەی بكەین، چونكە رێككەوتنمان هەیە و لێی ناكشێینەوە".</sup>

rudaw

^24/11/2014

<sup>هاوسەرۆكی پارتی دیموكراتی گەلان HDP دەڵێت: "هەندێك كەس لە بەرەی حكومەتی توركیا لەبەرئەوەی لە دووبارە دەستپێكردنەوەی پڕۆسەی ئاشتی ناڕەحەتن، دەیانەوێ پڕۆسەكە بە ئاراستەیەكی خراپ بوروژێنن".

سەڵاحەدین دەمیرتاش بەشداری كۆنگرەی قەزای پارتەكەی كرد لە بورسا و رووی دەمی قسەكانی لە بولەنت ئارینچ، یاریدەدەری سەرۆكوەزیرانی توركیا بوو كە هاوكات گوتەبێژی حكومەتی توركیاشە. دەمیرتاش گوتی: "ئێوە لەبەرئەوەی نەبوونەتە سەرۆكوەزیران، پێویست ناكات توڕەییەكەی لە ئێمە دەركەن، مەگەر مانایەكی هەیە وەك گەنج و منداڵانی هەرزە مامەڵە دەكەن؟ دەیەوێ قسەكانی بگەیێنێتە ئەوەی بڵێ ئێمە لە توركیا پێویستیمان بە ئاشتی نییە، بەڵام من دەمەوێ بزانم سەرۆكوەزیرانیش لەپشت قسەكانی گوتەبێژەكەیەوەیەتی یاخود نا".

دەمیرتاش هەروەها لەبارەی پڕۆسەی ئاشتییەوە داوادەكات ناوەڕۆكی رێككەوتنەكانی نێوان حكومەت و ئیمرالی ئاشكرابكرێن و لەو بارەیەوە گوتی: "هەرچی لە ئیمراڵی باسكراوە و رێككەوتنی لەسەر كراوە با ئاشكرای بكەین، ئەگەر حكومەت بڵێ ئەوەی لەوێ باسكراوە پەیوەندی بە ئێمەوە نییە، كەوابێ فێڵێكی هاوبەش لە ئارادایە".

وێڕای ئەم قسانە دەمیرتاش دەڵێت: "ئەگەرچی هەڕەشە و ناحەقیمان بەرامبەر كرا، بەڵام بێزارنەبووین و نەبەزیوین، چونكە ئاشتی بۆ هەموومان پێویستە، هەزاران سالیش تێبپەڕێ واز لە ئاشتی ناهێنین".</sup>

^rudaw/

^{فەرهاد چۆمانی}

^24/11/2014

<sup>مەزهەری خالقی هونەرمەندی ناسراوی كورد ئەمڕۆ یەكشەممە 23ـی تشرینی دووەمی 2014، سەردانی پەرلەمانی كوردستانی كرد و لە كۆبوونەوەی لەگەڵ سەرۆكایەتی پەرلەمان، رایگەیاند، "زۆر گرنگە دەوڵەت پلان و سیاسەتێكی تایبەت بە فەرهەنگی خۆی هەبێت، چونكە ئەمڕۆ لە دونیادا فەرهەنگ بووەتە ناسنامەی میللەتان و پردی پەیوەندی نێوان وڵاتانە بە هەمو كایە جیاوازەكانییانەوە".

بە پێی هەواڵی راگەیاندنی پەرلەمانی كوردستان، لە بەرامبەردا یوسف محەممەد، سەرۆكی پەرلەمانی كوردستان رایگەیاندووە، "بۆ ئەم خولەی پەرلەمان بە هاوكاری سەرجەم فراكسیۆنەكان و لیژنەی رۆشنبیریی و هونەر، لە خەمی دەركردنی چەند یاسایەكی تایبەتمەندین بە فەرهەنگ و كولتووری كوردی، چونكە پێمان وایە كولتوور لایەنێكی گرنگی كۆمەڵگەیە".

یوسف محەممەد ئاماژەی بەوەکرد، کە "لە رابردووشدا دوژمنانی نەتەوەكەمان پێش هەموشتێك پەلاماری فەرهەنگ و مێژووەكەیان داوین و هەوڵی وێرانكردنیان داوە".

مەزهەرهەری خالقی، سەرۆكی ئینستیوتی كەلەپوری كورد، ئاماژەی بەوە كرد، كە "وزە و چالاكی لەم خولەی پەرلەماندا دەبینم، گرنگە ئەو چالاكییانە بە گیانی یەك تیمی و نەتەوەییەوە دوور لە دەمارگیریی سیاسی و ئایدۆلۆژی بۆ خزمەتی دۆزی كورد بەكاربهێنرێت."

پاشان سەرۆكی پەرلەمان ستایشی  كاریگەریی و رۆڵی مەزهەری خالقی لە هونەری كوردیدا كرد و رایگەیاند، "دەنگ و هونەرەكەی خالقی هەمیشە لە كولتووری میلەتەكەماندا بە زیندوویەتی دەمێنێتەوە".

دواتر سەرۆكی پەرلەمانی کوردستان، لۆگۆی تایبەتیی پەرلەمانی پێشكەش بە مەزهەری خالقی كرد، لەبەرامبەر ئەو خزمەتانەی بە فەرهەنگ و هونەری كوردی كردووە.</sup>

عومەر شایان/rudaw

^23/11/2014

<sup>لە قوتابخانەكانی مووسڵ كچان ناچار بە جیهادی نیكاح دەكرێن و هاوكات گۆڕستانێك لەو شارە دۆزرایەوە، كە تەرمی 60 كەسی لە خۆگرتبوو.

سەرچاوەیەكی تایبەت لەنێو مووسڵەوە بە تۆڕی میدیایی رووداوی راگەیاند، "بەپێی زانیارییەكان رێكخراوی داعش لە قوتابخانە ئامادەییەكان بەدوای شوێنی نیشتەجێبوونی ئەو كچانە دەگەڕێن، كە هێشتا هاوسەرگیرییان نەكردووە، بۆ ئەوەی بەزۆر ناچاریان بكەن بۆ جیهادی نیكاح".

سەرچاوەكەی تۆڕی میدیایی رووداو باسی لەوە كرد، كە تەرمی 33 چەكداری داعش براوەتە پزیشكی دادوەری لە مووسڵ، كە زۆربەیان بە رەگەز عەرەبن و لە بۆردوومانی فڕۆكە جەنگییەكان ئەمڕۆ لە ناوچەی گەیارە و شەورا كوژراون.

ئەو سەرچاوەیە هاوكات باسی لە دۆزینەوەی گۆڕستانێكی بە كۆمەڵ لەو شارەكرد، كە قوربانییەكانی لەلایەن داعشەوە كوژراون و گوتی، "بەهۆی ئەو بارانەی لە چەند رۆژی رابردوو لە مووسڵ باریوە، گۆڕستانێكی بە كۆمەڵ لە ناوچەی ئاسكی مووسڵ، كە دەكەوێتە رۆژئاوای ئەو شارە بەدەركەوت، كە 60 زیندانیی بەندیخانەی بادۆشی لە خۆگرتبوو، كە لەلایەن داعشەوە پێشتر دەستگیر كرابوون و دواتر لەو زیندانە لەسێدارەدراون".

"جیهادی نیكاح" لە ساڵی 2011 و لەسەروبەندی شەڕی ناوخۆیی سووریا پەیدابوو، كە تێیدا داوا لە ژنان كرا بۆ ئەوەی رووبكەنە سووریا بۆ شێوازێكی تایبەتی "جیهاد"، كە بریتییە لە بەستنی پەیوەندی جەستەیی بۆ ماوەیەكی دیاریكراو لەگەڵ چەكدارانی گرووپە تووندڕەوەكان، كە لە سو‌وریا و عێراق دەجەنگن.</sup>

^rudaw 

^23/11/2014