<sup>بڕیارە بۆ پشتیوانی لە کۆبانێ، بۆ چوارەم رۆژ لە زۆربەی شار و شارۆچکەکانی رۆژهەڵاتی کوردستان خۆپێشاندانێکی جەماوەری لەژێر ناوی "کۆبانێ بە تەنیا مەهێڵن" بەڕێوەبچێت.

خۆپێشاندانە جەماوەرییەکانی رۆژهەڵاتی کوردستان کە بە نیشانەی ناڕەزایەتی لە بێدەنگیی کۆمەڵگای نێودەوڵەتی سەبارەت بە گەمارۆدانی کۆبانێ لەلایەن داعش بەڕێوەدەچن، ئەمڕۆ پێدەنێنە چوارەم رۆژەوە.

ئەو خۆپێشاندانانە بە دەستپێشخەری چالاکڤانانی مەدەنی رۆژهەڵاتی کوردستان بەڕێوەدەچن و لە هەندێک لە شارەکان بەرپرسانی ئیداری ناوچەکە پشتیوانی خۆیان بۆ "بەڕێوەچوونی خۆپێشاندانێکی هێمنانە" دەربڕیوە، بەڵام خۆپێشاندانەکان لە هەندێک ناوچەدا گرژییان لێکەوتووەتەوە و بەهۆیەوە ژمارەیەک خۆپێشاندەر دەستگیرکراون. وەکو چالاکڤانانی مەدەنی پارێزگای سنە بانگەشەی بۆ دەکەن، ئەمڕۆ هەینیش خۆپێشاندانێکی بەرفراوان لە سنە بەڕێوە دەچێت.</sup>

^10/10/2014

^{ڕێکخراوی تیرۆریستانی داعش، ناوی ئەو وڵاتانەی ئاشکرا کردن کە، کۆی وڵاتانی عەرەب و هەندێ وڵاتی ئەفریکایی و ئەورووپایی و ئاسیا لەخۆ دەگرێ و لە داهاتوودا هەوڵی داگیرکردنیان دەدات و ئەمارەت و هەرێمی سەربە ڕێکخراوەکەیان لەسەر دادەمەزرێنێ.}

^{وەک ئەوەی کە "میسر ئەلیەوم" بڵاوی کردووەتەوە و ڕێکخراوەکە بڕیاری لێی داوە، لە ماوەی داهاتوودا ئەو وڵاتانە داگیر دەکات کە ئەمانەن: عێراق، شام، حیجاز، ئەمەن، خوراسان، کوردستان، قەوقاز، ئانادۆڵ، ئەورووپا، ئەندەلوس، خاکی کەنانە، خاکی حەبەشە و مەغریب.
ڕێکخراوی تیرۆریستیی داعش ڕوونیشی کردووەتەوە، نەخشەی ڕۆژهەڵاتی نێوەڕاست دابەشکردنی ئەو وڵاتانە بۆ چەند هەرێمێک دابەش دەکات و هەر هەرێمێکیش چەند ئەمارەتێک لەخۆ دەگرێ، ئاماژەیشی داوە کە، هەرێمی عێراق، هەریەک لە عێراق و کوێت لەخۆ دەگرێ، هەریمی شامیش، سووریا، لوبنان، فەلەستین، ئەردەن و سینا دەگرێتەوە، هاوکات هەرێمی حیجاز، سعوودیە، ئیمارات، قەتەر، بەحرێن و سەڵتەنەی عوممان لەخۆ دەگرێ، بەڵام ئەمەن وەک خۆی دەمێنێتەوە، هەرێمی خوراسانیش هەریەک لە ئێران، ئەفغانستان و ئۆزبەکستان دەگرێتەوە.}

^{سەرچاۆە:} هەولێر-KDP.info

^10/10/2014

<sup>یەكێتیی زانایانی ئایینی ئیسلامی كوردستان داوا لە گوتاربێژ و مامۆستایانی ئایینی مزگەوتەكان دەكات، گوتاری رۆژی هەینی بۆ  كۆبانێ‌‌ و بەرەنگاربوونەوەی ستەمكاری ‌و پاراستنی یەكڕیزی گەلی كورد تەرخانبكەن.

لە بەیاننامەیەكدا كە رۆژی پێنجشەممە 9/10/2014 بڵاوكراوەتەوە، یەكێتیی زانایانی ئایینی ئیسلامی كوردستان بە تووندی ئیدانەی گەمارۆدانی شاری كۆبانێ‌ دەكات و رایدەگەیێنێت:" بێگومان بەرەنگاربوونەوەی زوڵم‌ و ستەم‌ و پارێزگاریكردن لە خاك ‌و وڵات ‌و گیان‌ و سامانی هاووڵاتیان ئەركێكی پیرۆزی ئایینی‌ و نیشتمانی ‌و مرۆڤانەیە".

لە بەشێكی دیكەی بەیاننامەكەدا یەكێتی زانایان داوا لە مامۆستایانی ئایینی ‌و گوتاربێژانی كوردستان دەكات "وەك هەمیشە‌و بۆ درێژەپێدانی كارە جوامێرانەكانیان وتاری هەینی ئەم هەفتەیە تایبەت بكەن بە رەوشی كوردستان بەتایبەتی كۆبانێ‌ ‌و بەرەنگاربوونەوەی زوڵم‌ و ستەمكاری ‌و پاراستنی یەكڕیزی گەلی كورد".


دەقی بەیاننامەكە:

بەناوی خوای گەورە‌و میهرەبان

ئەوە ماوەی چەند مانگێكە زوڵم‌و دەستدرێژی تیرۆریستان‌ باشوور‌و رۆژئاوای كوردستانی گرتۆتەوە، كە دواجار گەمارۆدانی شاری كۆبانێی رۆژئاوای كوردستانە،‌ لێرەوە تەئكید لەسەر پەیامەكانی پێشوومان دەكەینەوە‌و، بە تووندی ئەم كارە نامرۆڤانە شەرمەزار دەكەین‌، بێگومان بەرەنگاربوونەوەی زوڵم‌و ستەم‌و پارێزگاریكردن لە خاك‌و وڵات‌و گیان‌و سامانی هاووڵاتیان بە ئەركێكی پیرۆزی ئایینی‌و نیشتیمانی‌و مرۆڤانەیە.

هەر لێرەشەوە داوا لە كۆمەڵگەی نێودەوڵەتی دەكەین هاوكارییەكانیان چڕتر‌و زیاتر بكەن، هەروەك داوا لە هەموو لایەنە سیاسیەكانی هەر چوار پارچەی كوردستان دەكەین دەست لە ناو دەستی یەك بنێن‌و یەكریزیان بپارێزن‌، نەهێڵن كەسانێكی نامۆ بە هەستی كوردانە بە هەر بیانووێك یەكریزی كورد تێك بدات، بۆ ئەوەی بە یەكەوە بەرەنگاری ئەم دەستدرێژیانە ببنەوە‌، بێگومان دادگەری‌و یەكریزی - بە پشتیوانی خوا- تاكە زامنی سەركەوتنی گەلی كوردە.

هەروەها داوا لە مامۆستایانی ئایینی‌و وتاربێژانی كوردستان دەكەین وەك هەمیشە‌و بۆ درێژەپێدانی كارە جوامێرانەكانیان وتاری هەینی ئەم هەفتەیە تایبەت بكەن بە رەوشی كوردستان بەتایبەتی كۆبانێ‌‌و بەرەنگاربوونەوەی زوڵم‌و ستەمكاری‌و پاراستنی یەكریزی گەلی كورد</sup>

<sup>كلاودیا رۆس ، جێگری سەرۆكی پەرلەمانی ئەڵمانیا دەڵێ " توركیا سیاسەتێكی ناشیرین بەڕێوەدەبات و ، پشتیوانی داعش دەكات و رۆژی ئەوە هاتووە ناتۆ بە توركیا بڵێت : ئیدی بەسە".
 
كلاودیا رۆس ، جێگری سەرۆكی پەرلەمانی ئەڵمانیا كە بۆ بینینی پەنابەرانی كوردی شنگال و كۆبانێ چووبووە توركیا و باكووری كوردستان ، بە تووندی رەخنەی لە حكومەتی توركیا گرت و، بە پشتیوانیكردن لە داعش تۆمەتباری كرد.
 
كلاودیا رۆس دوای گەڕانەوەی بۆ ئەڵمانیا ، بەشداری لە بەرنامەیەكی تەلەڤزیۆنی فەرمیی ئەڵمانیادا كرد و گوتی توركیا هاوكاری پەنابەرانی كورد ناكات و گوتی " من بەهیچ شێوەیەك ناتوانم ئەو سیاسەتەی توركیا تەحەممول بكەم "، هەروەها كلاودیا رۆس گوتی كە توركیا سیاسەتێكی تەمومژاوی بەڕێوەدەبات و رێگە بەچوونی چەك دەدات بۆ داعش . هەروەها گوتی " دیارە ئەردۆغان دەیەوێت هەوڵەكانی توركیا بۆ سەربەخۆیی لاوازبكات ، چەكدارانی داعش لە نەخۆشخانەكانی توركیادا چارەسەردەكرێن ، لە رێگەی توركیاوە چەك دەگەنە داعش ، هەروەها ژمارەی كامپە سەربازییەكانی داعش لە توركیا زیاد دەبن ".

جێگری سەرۆكی پەرلەمانی ئەڵمانیا گوتی نابێ توركیا كە ئەندامێكی پەیمانی ناتۆیە، سیاسەتێكی ناشیرین بەڕێوەببات " پێویستە ناتۆ جارێك دەست لە مێزەكە بدات و بڵێ ئیدی بەسە ".

حكومەتی توركیا ئەوە رەتدەكاتەوە كە هاوكاری داعشی كردبێت و ئێستاش هاوكاری بكات و دەڵێ كاتی خۆی ئەمریكا و وڵاتانی دیكە هاوكاری هێزەكانی ئۆپۆزیسیۆنی سووریایان كردووە لە رێگەی توركیاوە ، لەوانەش چەك دراوەتە جەبهەتولنوسرە ، كە دواتر ئەمریكا خستییە لیستی تیرۆرەوەو ، داعش وەك بەشێكی جیابووەوە لە جەبهەتولنوسرە تەماشا دەكرێت . هەروەها دەڵێ ئەوان رووبەڕووی داعش دەبنەوەو هاوكاری ناكەن .</sup>

^10/10/2014

<sup>عەبدوڵڵا ئۆجەلان لە رێگەی سەڵاحەدین دەمیرتاشەوە پەیامێک لەسەر خۆپێشاندانەکانی کۆبانێ  بڵاودەکاتەوە کە لە زۆربەی شار و شارۆچکەکانی باکووری کوردستان و تورکیا بەردەوامن.

سەڵاحەدین دەمیرتاش، هاوسەرۆکی پارتی دیموکراسی گەلان HDP لە کۆنگرەیەکی رۆژنامەوانیدا رایگەیاند، شەوی رابردوو لەگەڵ عەبدوڵڵا ئۆجەلان، سەرۆکی بەندکراوی پارتی کرێکارانی کوردستان PKK لە رێگەی کورتەنامەوە پەیوەندییان بەیەكەوە کردووە و ئۆجەلان پێشنیازیکردووە سەرجەم لایەنەکان رێنمایی بکرێن بۆ بەکارهێنانی رێگەی دیالۆگ و دانوستاندن بە مەبەستی رووبەڕووبوونەوەی هەڕەشەی کۆمەڵکوژی و هاندانی تێکدەرانە.

لە ماوەی 3 رۆژی رابردوودا لەسەر بانگهێشتی سەڵاحەدین دەمیرتاش ژمارەیەک خۆپێشاندان لە شار و شارۆچکەکانی باکووری کوردستان و تورکیا  بۆ پشتگیریکردن لە کۆبانێ دەستیانپێکرد. لە ئەنجامیشدا خۆپێشاندانەکان تووندوتیژییان لێکەوتەوە و تاوەكو ئێستا 23 کەس گیان لەدەستداوە.

دەمیرتاش خەمباری خۆی لەسەر تووندوتیژییەکان دەربڕی و رایگەیاند، ئەوان بەرپرسیارنین لەو رووداوانە، لەبەرئەوەی ئەوان بانگهێشتی خەڵکیان نەکردووە بۆ تووندوتیژی و لە سەرەتاوە هیچ دیاردەیەکی تووندوتیژی نەبووە تا ئەو کاتەی لە باتمان کەسانی سیڤیل بە چەکەوە دەستڕێژیان لە خۆپێشاندەران کردووە. هاوسەرۆكی هەدەپە ئەوەشی خستەڕوو کە دوای لێدوانە تووندەکانی لایەنە حکومییەکان، ژمارەیەک تێکدەر هەوڵیانداوە ئاقاری خۆپێشاندانەکانیان بگۆڕن بۆ تاڵانی و پیاو کوشتن و سووتاندنی پەیکەر و ئاڵا.

هاوسەرۆکی HDP رەخنەی لە رەجەب تەییب ئەردۆغان، سەرۆککۆماری تورکیاش گرت کە لە یەکەم رۆژی خۆپێشاندانەکاندا گوتوویەتی "هێندەی نەماوە کۆبانێ بکەوێت" و ئەوە بووە هۆی زیادبوونی توڕەیی هاونیشتمانیان.

لە بەشێکی دیکەی لێدوانەکەیدا سەڵاحەدین دەمیرتاش رووی دەمی کردە کۆمەڵگای نێو دەوڵەتی و رایگەیاند ئەگەر کۆمەڵکوژییەک لە کۆبانێ رووبدات، ئەوان لێی بەرپرسیاردەبن. دەمیرتاش پێیوابوو کۆمەڵگای نێودەوڵەتی بەشدارە لە بەرپرسیارییەتی هێرشەکانی داعش بۆ سەر کورد و تورکمان و عەرەب لە سووریا و عێراق.

سەبارەت بە پرسیارێکیش لەسەر بەشداریکردنی پێشمەرگە، دەمیرتاش گوتی،" بۆ ئەوەی ئەنجامیان هەبێت دەبێت بە گوێرەی خواستەکانی پارتی یەکێتی دیموکراتی PYD هەنگاوبنرێت. PYD داوای هاوکاری دەکات و پێویستە خۆش بە دووربگیرێت لە شەڕی تورکیا و سووریا".</sup>

^9/10/2014

له‌لایه‌ن فرۆكه‌ جه‌نگییه‌كانی هاوپه‌یمانان، زنجیره‌یه‌ك هێرشی ئاسمانی ده‌كرێنه‌ سه‌ر چه‌كدارانی داعش له‌ده‌وروبه‌ری كۆبانی.

شه‌وی رابردوو فرۆكه‌ جه‌نگییه‌كانی ئه‌مریكاو ئوردن- 8هێرشی ئاسمانیان كرده‌  سه‌ر مۆڵگه‌كانی داعش له‌ده‌وروبه‌ری كۆبانی، له‌هه‌مان كاتیشدا سوپای ئه‌مریكا ته‌ئكیدی كردوه‌ته‌وه‌ كه‌ هێشتا كۆبانی به‌ده‌ست شه‌ڕڤانانی یه‌په‌گه‌وه‌ ماوه‌ته‌وه‌.

هاوكات رامی عه‌بدولڕه‌حمان-به‌رێوه‌به‌ری روانگه‌ی سوری‌ بۆ مافه‌كانی‌ مرۆڤ به‌ فرانس پرێسی راگه‌یاند: به‌هۆی هێرشه‌ ئاسمانیه‌كانه‌وه‌ چه‌كدارانی داعش ناچاربوون له‌ به‌شی خۆرهه‌ڵاتی كۆبانی پاشه‌كشه‌ بكه‌ن و له‌ئێستاشدا شه‌ڕێكی قورس له‌نێوان یه‌كینه‌كانی پاراستنی گه‌ل‌و چه‌كدارانی داعش له‌ئارادایه‌و شه‌ڕڤانانیش 3 شه‌هیدیان داوه‌.

لایخۆشیه‌وه‌ مسته‌فا عه‌بدی- به‌رێوه‌به‌ری رادیۆی ئارتا -ئێف ئێم له‌كۆبانی به‌ فرانس پرێسی راگه‌یاندوه‌؛ فرۆكه‌ جه‌نگیه‌كان هێرشیان كردوه‌ته‌ سه‌ر دوو مۆڵگه‌ی داعش‌و له‌ئێستاشدا چه‌كداره‌كان له‌ده‌وربه‌ری شاره‌كه‌دان و له‌به‌شی باشووری خۆرئاوای كۆبانیش ژماره‌یه‌كی زۆر له‌ته‌رمی چه‌كدارانی داعش له‌سه‌ر شه‌قام و كۆڵانه‌كان كه‌وتوون.

09/10/2014

<sup>گوتەبێژی وەزارەتی دەرەوەی ئێران رایگەیاند، بەمزووانە سەرۆك وەزیرانی نوێی عێراق سەردانی تاران دەكات.

مەرزیە ئەفخەم، گوتەبێژی وەزارەتی دەرەوەی ئێران لە كۆنگرەیەكی رۆژنامەوانیدا لە تارانی پایتەختی ئێران رایگەیاند: "بە مەبەستی تاوتوێكردنی چەند پرسێكی گرنگ لە نێوان هەردوو وڵات بە تایبەتی پرسی بەرەنگاربوونەوەی گرووپە چەكدارەكان، بەمنزیكانە حەیدەر عەبادی، سەرۆك وەزیرانی عێراق سەردانی تاران دەكات".

لەبارەی لێدوانەكانی ئێرانیش سەبارەت بەپاراستنی ئاسایشی شاری بەغدا، مەرزیە ئەفخەم گوتی: "لە هەموو كۆبونەوەو دیدارەكانی حەسەن روحانی، سەرۆككۆمارو محەممەد جوادزەریف، وەزیری دەرەوەی ئێران لەگەڵ وڵاتانی جیهانی و عەرەبی جەخت لەسەر رۆڵی كاریگەرو یەكلاكەرەوەی ئێران كراوەتەوە سەبارەت بە چارەسەركردنی تەنگژە هەرێمیایەتییەكان و دژایەتیكردنی تیرۆر، ئەوانیش ئەم  راستییەیان بۆ روونبووەتەوەو دركیان بە گرنگی هاوكاری ئێران كردووە".

سەبارەت بە رۆڵی توركیا لەبەرامبەر تەنگژەی عێراق و  سووریا، گوتەبێژەكەی وەزارەتی دەرەوەی ئێران ئاماژەی بە پەیوەندییە تەلەفۆنییەكەی وەزیری دەرەوەی ئێران لەگەڵ وەزیری دەرەوەی توركیا كردو گوتی: "پەیوەندییە تەلەفۆنییەكەی وەزیری دەرەوەی ئێران لەگەڵ هاوتا توركییەكەی هاوكات بوو لەگەڵ بڕیاری پەرلەمانی توركیا بۆ رێگەدان بە سوپای وڵاتەكەی بە ئەنجامدانی كردەوەی سەربازی لە نێو خاکی سووریاو عێراق".

ئەفخەم راشیگەیاند، کە "نیگەرانی خۆمان نیشانداوە لەبەرامبەر هەر جوڵەیەك، كە ببێتە هۆی ئاڵۆزتركردنی رەوشی ناوچەكەو بە بەرپرسانی توركیامان راگەیاندووە، كە بەرپرسیارانەو بەو پەڕی هوشیارییەوە مامەڵە لەگەڵ دۆخەكە بكەن".

دوای وەرگرتنی پۆستی سەرۆك وەزیرانی عێراق، ئەمە یەكەم سەردانی حەیدەر عەبادییە بۆ ئێران، هاوكات ئێران رۆڵێكی باڵای هەیە لە هاوكاریكردنی عێراق بۆ بەرەنگاربوونەوەی گرووپە چەكدارەكان.</sup>

^9/10/2014

<sup>لێپرسراوی دەستەی کارگێڕی مەکتەبی سیاسی یەکێتیی نیشتمانیی کوردستان رایدەگەیەنێت،" نە ئێمە و نە پارتی درێخیمان نەکردووە بە رێگەی تایبەتی کۆمەک بگەیەنین بە رۆژئاوای کوردستان هەتا چەکیش، بەڵام ناتوانین هێز بگەیەنینە کۆبانێ بە حكومی ئەوەی 70 تا 80 کلم لە سنووری ئێمە دابڕاوە، ئەمە حکومی جوگرافیایە.

مەلا بەختیار، لێپرسراوی دەستەی کارگێڕی مەکتەبی سیاسی یەکێتیی نیشتمانیی کوردستان لە میانەی بەشداریکردنی لە بەرنامەی رووداوی ئەمڕۆی تەلەفزیۆنی رووداو رایگەیاند،" کێشەی کۆبانی لەم کاتەدا بووەتە کێشەیەکی گەورەو ناوچەکەی هەژاندووە، بۆ ئەمەش نە ئێمە و نە پارتی درێخیمان نەکردووە لە گەیاندنی کۆمەک بە رۆژئاوای کوردستان هەتا چەکیش، بەڵام ناتوانین هێز بنێرینە کۆبانێ، بە حكومی ئەوەی 70 تا 80 کلم لە سنووری ئێمە دابڕاوە، ئەمە حکومی جوگرافیایە کە ناتوانین هێز بنێرین".

دەربارەی موازایەدەی حیزبەکان لەسەر کۆبانێ بە تایبەت یەکێتیی نیشتمانیی کوردستان، مەلا بەختیار رایدەگەیەنێت کە ئەوان لە ساڵی 1982 سێ هەزار پێشمەرگەیان بەهانای شۆڕشگێڕەکانی رۆژهەڵاتی کوردستان بردن، ئەوە موزایەدە نەبووە، دەڵێت " کە پەکەکە هێرشی کرایەسەر لە ساڵی 1985 لە باکوور لەسەر سنوور ئێمە بەیاننامەمان دەرکرد و لە دانوستاندیش بووین و ئامادەبووین هەزاران پێشمەرگە بنێرینە سەر سنوور بۆ بەرگری لە پەکەکە"، دەشڵێت " ئێستاش کە دەڵێین ئامادەین بچین بۆ کۆبانێ، وەکو خۆم یەکەمین کەس دەبم کا ئامادەم بۆ کۆبانێ بچم".

لەبارەی وەرگرتنی رای سەرۆکی هەرێمی كوردستان، لێپرسراوی دەستەی کارگێڕی مەکتەبی سیاسی یەکێتی رایگەیاند،" وەرگرتنی رای سەرۆکی هەرێم رێزە بۆ پێگەی سەرۆکی هەرێم نەک موزایەدە، نابێت بڵێین گوێ نادەینە سەرۆکی هەرێم و حکومەت و یاسا".

سەبارەت بە خۆپیشاندان بۆ پشتگیریکردن لە کۆبانێ، مەلا بەختیار ناکۆکی حیزبی لە خۆپیشاندانەکان بە خراپ دەزانێت و دەشڵێت دۆخی باکوور جیاوازە لە باشوور، لە باکوور هاموو هاتنە سەر شەقامێک جەنگێکە بۆ هێنانەدی مافەکەت، لە باشووردا ئازادی و دیموکراسییەت هەیە. خۆپیشاندان لە باکوور تەحدایە، پەرچەکردارە، هەڵوێستوەرگرتنە، سەنگەری شەقامە، سەنگەری خەباتی مەدەنییە، قوربانیدانە".

لەبەرامبەر ئەوەی خۆپیشاندان دژی تورکا بکرێت بۆ ئەوەی یارمەتی کۆبانێ بدات، لێپرسراوی دەستەی کارگێڕی مەکتەبی سیاسی یەکێتی دەڵێت " ئاراستەی ئابووری وەکو بەشێکی پێویستی باشووری کوردستان گرنگە بیپارێزین، ئاراستەی سیاسی و راگەیاندن لە کاناڵی خۆیەوە گرنگە بایەخی پێبدەین"، دەشڵێت " واباشە ئەم مەسەلانە تێکەڵ بەیەک نەکەین".

سەبارەت بە کاریگەری ئێران بەسەر هێرشە بچڕپچڕەکان کە هەر کاتێک بیەوەێت هێرشەکان دەجوڵێنێت و بە پێچەوانەشەوە مەلا بەختیار رایگەیاند،" هەر کاتێک بمانەوێت لە جەلەولا پەلاماری داعش دەدەین، بە فەرمانی من هێرش ناکرێتە سەر داعش بەهۆی ئەو بۆمبە چێنراوانەی کە لە ناوچەکە داندراونەوەتە. ئێمە کات و شوێنی شەڕکردن لەگەڵ داعش دیاریدەکەیەن".

سەبارەت بە ئێرانیش دەڵێت " ئێران لە مەخموور و گوێڕەوە دەستیپێکرد، سەرۆکی هەرێمی كوردستان وەکو یەکەمین وڵات کە باهانای باشووری کوردستانەوە هات سوپاسی ئێرانی کرد، لەدوای مەخموور بە مانگێک هات بە هانای ئێمەوە لە ناوچەی جەلەولاو سەعدیە". دەشڵێت " ئێران بە فیعلی رۆڵێکی کاریگەری هەیە لە شەڕەکاندا دژی داعش، بەرچاوی ئێران لە هەموو ئەو وڵاتانەی دیکە بە ئیقلیمی و جیهانیشەوە رۆشنتربوو بۆ ئەوەی مەترسییەکانی داعشی خستە پێش چاوی خۆی".

سەبارەت بە تورکیا بەختیار رایگەیاند " بە داخەوە تورکیا سیناریۆی سەردەمی لێدانی عێراقی دووبارەکردەوە، دەیتوانی رۆڵێکی گاریگەر بگێڕێ، بە داخەوە ئە هەڵوێستەی تا ئێستا تورکیا نواندویەتی، هەڵوێستێکە چووەتە خزمەتی داعشەوە".</sup>

^9/10/2014

<sup>5 پیاو بە تۆمەتی رفاندن و ئەنجامدانی دەستدرێژی سێكسی بەكۆمەڵ بۆ سەر چوار ژن، بە ئامادەبوونی چوار ژنەكە لە سێدارەدران.

23ـی ئابی ئەمساڵ، لە كاتێكدا چوار ژن بە ئۆتۆمبێلەكەیانەوە لە ئاهەنگێكی هاوسەرگیری بەرەو كابوولی پایتەختی ئەفغانستان دەگەڕانەوە، 7 پیاوی چەكدار كە جلوبەرگی پۆلیسیان پۆشیبوو، رفاندیانن و بە كۆمەڵ دەستدرێژی سێكسییان كردە سەر هەر چوار ژنەكە.

دواتر پیاوەكان دەستگیركران و  دادگایكران، دادگای باڵای وڵات بڕیاری لەسێدارەدانی بۆ پێنج لە تاوانبارەكان دەركرد و دوو كەسەكەی دیكەشی هەر یەكەیان بە 20 ساڵ زیندانی حوكم دا.

ئەم كەیسە بووە مایەی توڕەبوونێكی بێشووماری هاووڵاتیانی ئەفغانستان، كە داوای لەسێدارەدانی ئاشكرای تاوانبارانیان دەكرد.

رۆژی چوارشەممە لە گرتووخانەی بول ئایی شركی، كە لە دەوروبەری كابوولە، پێنج تاوانبارەكە بەبەرچاوی ئەو ژنانەی كە دەستدرێژییان كردبووە سەریان، سزای لەسێدارەدانەكەیان بەسەردا جێبەجێكرا.</sup>

^9/10/2014

<sup>چوار رۆژ دوای هەڵوەشانەوەی گەمارۆی بەریتانیا لەسەر کۆمپانیای نیشتمانی نەوتی ئێران، یەکێتی ئەوروپایش گەمارۆکانی لەسەر ئەو کۆمپانیایە هەڵوەشاندەوە، ئەویش بەهۆی نەبوونی هیچ داواکارییەک بۆ پێداچوونەوەی بڕیاری دادگای ئەوروپا.

راوین چاندرا سێ کێرا، پارێزەری کۆمپانیای نیشتمانی نەوتی ئێران، بە ئاژانسی هەواڵی رۆیتەرزی راگەیاندووە کە دوای بڕیاری دادگای یەکێتی ئەوروپا بە هەڵوەشاندنەوەی گەمارۆکانی لەسەر ئێران ، تاوەکو ئێستا ئەوروپا هیچ داواکارییەکی بۆ پێداچوونەوەی بڕیارەکە پێشکەش نەکردووە، بۆیە گەمارۆکانی سەر کۆمپانیای نیشتمانی نەوتی ئێران هەڵوەشانەوە.

لەگەڵ ئەمەشدا بەرپرسێکی رەسمی یەکێتی ئەوروپا بە رۆیتەرزی راگەیاندووە، کە هەرچەند داواکاری بۆ پێداچوونەوەی بڕیاری دادگا وادەی بەسەرچووە، بەڵام هەوڵی پێویست لە ئارادان بۆ ئەوەی ناوی ئەو کۆمپانیایە لە لیستی گەمارۆکاندا بمێنێتەوە.

دادگای یەکێتی ئەوروپا کە ناوەندەکەی لە لوکسمبۆرگە رایگەیاند کە لە چەند بوارێکدا گەمارۆکانی یەکێتی ئەوروپا لەسەر چەند دامەزراوە و کەسی ئێرانی، بەهۆی نەبوونی بەڵگەی پێویست هەڵدەوەشێنێتەەوە.</sup> 

^8/10/2014