هاوسەرۆكی پارتی یەكێتی دیموكراتی رایدەگەیێنێت، رەنگە داعش بتوانن گو‌وندەكان بگرن و پاشەكشێ بەهێزەكانی ئەوان بكەن و بگەنە نزیك كۆبانێ، بەڵام جەختدەكاتەوە "كەوتنی كۆبانێ مەحاڵە".

ساڵح موسلیم دەڵێ: "كۆبانی هەرگیز ناكەوێ،  كاتێك ئەگەری كەوتنی هەیە كە ئەوانەی لەوێن هەموویان كوژرابن، سەرباری ئەوەی چەتەكان چەكی قوڕس و تانكیان پێیە، بەڵام شەڕڤانەكانمان زەبرێكی كوشندەیان لێداون".

موسلیم گوتیشی: "هێرشەكانی داعشمان وەستاندووە و ژمارەیەكی زۆر لە تانك و زرێپۆشمان تێكشكاندوون، بەڵام شەڕ بەردەوامە". دەشڵێ "كێشەی چەك و پێداویستی سەربازیمان هەیە".

هاوسەرۆكی PYD لە وەڵامی بەیاننامەكەی مەسعود بارزانی، سەرۆكی هەرێمی كوردستان دەڵێ: "هەرچی زووە پێویستە ئەو بەیاننامەیە بكرێتە كردار، ئەگەر پێشمەرگە بیەوێ بێت با بفەرموێ، بانگهێشتی دەكەین، مەگەر ئێمە رێگامان لەكێ گرتووە؟".

موسلیم دەڵێ، "پێشمەرگە دەتوانێ بە رێگەی توركیا بێتە رۆژئاوا، ئەگەر ئەمە ناكەن با داوا لە توركیا بكەن شەڕوانانی YPG لە قامشلۆوە بتوانن خۆیان بگەیێننە كۆبانێ، پەیوەندییان لەگەڵ توركیا باشە، با ئەم دەرفەتە دەستەبەر بكەن".

لەبارەی پاشەكشەی یەكینەكانی پاراستنی گەل و چۆڵكردنی ژمارەیەك گو‌وند موسلیم گوتی: "ئەو گوندانە لەبەر هۆكاری ئەمنی چۆڵكراون، كە لەژێر رەحمەتی تۆپ و هاوەنی مەودادرێژدابوون، ئەو گوندانە هێشتا لە كۆنتڕۆڵی یەپەگەدان، بەڵام مەیدانی شەڕن".

بە گوتەی ساڵح موسلیم توركیا پێیانگوتووە "ئێمە بەشێوەیەكی راستەوخۆ پەیوەندیمان لەگەڵ داعش نییە، بەڵام لایەنێك هەیە بەشێوەیەكی ناڕاستەوخۆ یارمەتیان دەدا، گوتیان كە هەوڵ دەدەین رێگری لەو هاوكارییە بگرین، بەڵام ئەمڕۆ كە دووڕووانە لەلایەك دەڵێن پڕۆسەی ئاشتی و لایەكی دیكەوە داعش بە گژ كوردەوە دەنێن هەموو شتێك روون و ئاشكرا بوو".

22/09/2014

سەرچاوەیەكی ئەمنی ئاشكرایكرد، دەیان چەكداری داعش كوژراوو برینداربوون بەهۆی بۆردومانی هێزەئاسمانیەكانی عیراق بۆ سەر مۆڵگەیەكیان لە باكوری شاری تكریت. 

بەوتەی سەرچاوەكە، "هێزە ئاسمانیەكانی سوپای عیراق ئەمڕۆ، شەممە ( 20 ئەیلولی 2014) چوار موشەكیان ناوە بە باڵەخانەی وێستگەی شەمەندەفەر ی بێجی لە خۆرئاوای قەزاكەگ، وتیشی: ئەو باڵەخانەیە لەلایەن چەكدارانی داعشەوە كرابووە مۆڵگەو بەوهۆیە بەدەیان لەو چەكدارانە كوژراوو بریندار بوون و ئۆتۆمبێلیكیشیان بەتەواوی سووتا". 

سەرچاوەكە ئەوەشی راگەیاند، "هێزە ئاسمانیەكانی عیراق هەر ئەمڕۆ بۆردومانی پرۆژەی ئاوی ناحیەی سینیەیان كرد لە خۆرئاوای قەزای بێجی، بەهۆی بۆردومانەكەوە چەكدارانی داعش زیانی ماددی زۆریان بەركەوت".  

21/09/2014

دوای ماوەیەكی بەرچاو لە تێكچوونی پەیوەندییەكانیان، میسر بانگهێشتی توركیای كردووە بۆ بەشداریكردن لە كۆنفرانسی وڵاتانی بەخشەر لە قاهیرە، بە مەبەستی بنیاتنانەوەی كەرتی غەززە.

كۆنفرانسەكە بە دەستپێشخەری میسر و نەرویج دەبەسترێت و لەسەر ئاستی وەزیرانی دەرەوەی وڵاتان دەبێت. باڵیۆزی میسر لە توركیا بانگهێشتنامەیەكی گەیاندووەتە وەزارەتی دەرەوەی توركیا بۆ بەشداری لە كۆنفرانسەكە.

سەرچاوەیەكی وەزارەتی دەرەوەی توركیا بە رۆژنامەی حورییەتی تورکی گوتووە، كە ئەوان لەڕووی مەبدەئییەوە بڕیاری بەشداری کردنیان لە كۆنفرانسەكە داوە، بەڵام جارێ‌ بڕیاریان نەداوە لە چ ئاستێكدا بەشداری دەکەن.

ئەگەر مەولود چاوشئۆغڵو، وەزیری دەرەوەی توركیا لە 12ـی مانگی داهاتوو بەشداری ئەو كۆنفرانسە بكات، ئەوە خاڵی وەرچەرخان دەبێت لە پەیوەندییەكانی هەردوولادا، چونكە لەو كاتەوە سوپای میسر كۆتاییان بە فەرمانڕەوایی محەممەد مورسی هێنا لە 2013 دا، لەسەر ئاستی باڵا سەردانی نێوان شاندی هەردو وڵات ئەنجام نەدراوە.

لە ساڵی 2013 وە، دووای لەسەر کارلادانی محەممەد مورسی، سەرۆککۆماری میسر و قەدەخەکردنی ئیخوان موسلیمین، هەردوو وڵات باڵیۆزی لایەنی بەرامبەریان وەك (كەسی نەخوازراو) ناوبردووە لەسەر خاكی وڵاتەكەیان و ئاستی نوێنەرایەتی دیبلۆماسییان لەسەر خاكی یەكدی دابەزاندووە.

ئەو هەوڵانەی پێشتر هەبوون بۆ چاككردنەوەی پەیوەندییەكانی نێوان هەردوو وڵات، بەهۆی لێدوانی سەرانی هەردوولاوە پەكیان كەوتووە. 

بەمدواییانە توركیا بانگهێشتی حوسێن ئەلسەهەرتی ،كاربەڕێكەری باڵیۆزخانەی میسر لە ئەنکەرەی کردبوو بۆ بەشداری لە هەریەك لە رێوڕەسمی سوێندخواردنی رەجەب تەیب ئەردۆغان، سەرۆککۆماری تورکیا لە 28ـی ئاب و رۆژی پێشوازی لە سەركەوتن لە 30ـی ئابدا. حوسێن ئەلسەهەرتی لە 28ی ئاب بەشداری لە رێوڕەسمی سوێندخواردنی ئەردۆغان كرد، بەڵام بەهۆی ئەوەی ئەردۆغان لە چاوپێكەوتنێكدا لەگەڵ جەزیرە، حكومەتی میسری رەخنەباران كرد، ئەلسەهەرتی ئامادە نەبوو لە 30ـی ئابدا بەشداری لە رێوڕەسمی پێشوازی لە رۆژی سەركەوتندا بکات.

21/09/2014

جێگری سەرۆک وەزیرانی تورکیا رایگەیاند، کە لە چەند کاژێری رابردوودا، 45 هەزار کوردی رۆژئاوای کوردستان، روویان لە تورکیا کردووە.

نوعمان کورتوڵمووش، جێگری سەرۆک وەزیرانی تورکیا رایگەیاند، لە شەوی 19/20.9.2014، نزیکەی 45 هاووڵاتی کۆبانی، روویان لە وڵاتی تورکیا کردووە.

بە پێی گوتەی نوعمان کورتوڵمووش، ئەو ئاوارانە لە هەمان شەودا شوێنی مانەوەیان بۆ دابینکراوە.

بەهۆی هێرشی چەکدارانی گرووپی داعش بۆ سەر کانتۆنی کۆبانی لە رۆژئاوای کوردستان، دەیان گوند چۆڵکراون و چەکدارانی داعش دەستیان بەسەردا گرتوون و هاونیشتمانییانیش، لە ترسی چەکدارانی داعش، روویان لە باکووری کوردستان و تورکیا کردووە.

20/09/2014

پۆڵ برێمەر، حاکمی مەدەنی ئەمریكا لە عێراق لە ساڵانی 2003 و 2004 رایگەیاند، بوونی هێزی پیادەی ئەمریكی لەسەر خاكی عێراق پێویستە بۆ رزگاركردنی ناوچەكانی ژێر دەسەڵاتی چەكدارانی گروپی داعش و كورد هەڕەشەی سەربەخۆییان دەكرد، ئەگەر سوپای پێشوو هەڵنەوەشێنرێتەوە.

پۆڵ برێمەر لە هەڤپەیڤینێكدا لەگەڵ رۆژنامەی شەرقولئەوسەتی سعودی رایگەیاند: "پێش ئەوەی من بگەمە بەغدا، سوپای عێراق بوو بە هەڵم و ونبوو، تەنانەت پێش گەیشتنی من بۆ بەغدا جەنەڕاڵ جۆن ئەبو زەید، ئەو راستییەی بە جۆرج بۆش، سەرۆكی ئەوكاتی ئەمریكا، راگەیاند".

برێمەر زیاتر دەڵێ "كورد و شیعە لە ئەگەری  هەڵنەوەشاندنەوەی سوپای عێراق، هەڕەشەیان دەکرد، تەنانەت كورد هەڕەشەی سەربەخۆییان دەكرد ئەگەر سوپای پێشوو هەڵنەوەشێنرێتەوە، شیعەش دەیانگوت ئەو سوپایە بەبێ سەدام حوسێنیش هەر سوپای سەدامە".

حاکمی مەدەنی پێشووی عێراق لەبارەی لێدانی داعش لە سووریا ئاماژەی بەوەكرد، كە "ئەمریكا هیچ كات هەماهەنگی لەگەڵ رژێمی بەشار ئەسەد لە سووریا ناكات و هێرشی ئاسمانی ئەمریكا بۆ سەر داعش لە سووریا نزیكبووەتەوە، چونكە شكستپێهێنانی داعش لە عێراق بەبێ شكستپێهێنانی لە سووریا ئەستەمە، جگە لەوەی پێویستە لەسەر ئەمریكا بە دوو هێندەی ئێستا هاوكاری كورد بكات".

پۆل برێمەر دەشڵێ، "پێویست بوو لەسەر ئەمریكا پێش سێ ساڵ هێزی ئاسمانی سووریا لەناو ببات، هاوكات هیچ هەماهەنگییەكی نهێنی لە نێوان ئەمریكا و ئێراندا نییە، تەنیا هەردوولا بەرژەوەندی هاوبەشیان هەیە لە شكستپێهێنانی داعش".

برێمەر ئەوەشی خستەڕوو، كە "نووری مالیكی ئەو ئەفسەرانەی لە سوپا دوور خستەوە، كە لەلایەن سوپای ئەمریكاوە مەشقیان پێكرابوو، بۆیە سوپای عێراق لە موسڵ بەرگری نەكرد و رووخا و ئێستاش نەیاری دروستكردنی پاسەوانی نیشتمانییە لە عێراق، هاوكات بوونی گرووپی چەكداریی عەسائیبی ئەهلی حەق كە لەلایەن ئێرانەوە پاڵپشتی دەكرێن، تووشی دڵە راوكێی كردووم".

فەرمانڕەوای مەدەنی پێشووی ئەمریكا لە عێراق هاوكات جەخت لەوەدەكات، کە "بوونی هێزی پیادەی ئەمریكی لەسەر خاكی عێراق پێویستە بۆ رزگاركردنی ئەو ناوچانەی چەكدارانی داعش داگیریان كردووە، هاوكات بڕیاری كشانەوەی سوپای ئەمریكا لە ساڵی 2011 لە عێراق، هەڵەبوو".

برێمەر هەروەها لە وەڵامی پرسیارێك لەبارەی ئەوەی ئەگەر ئەو راوێژكاری داعش بووایە، بەچی ئامۆژگارییانی دەكرد، دەڵێ "ئامۆژگارییان دەكەم درێژە بە جەنگیان لە دژی ئەمریكا بدەن، چونكە هێستا دیار نییە ئەمریكا بۆ ماوەیەكی دوور و درێژ بەشداری لە جەنگی دژی داعش دەكات یان نا، بۆ درێژكردنەوەی".

20/09/2014

وەزارەتی پێشمەرگەی حكومەتی هەرێمی كوردستان راگەیێندراوێكی لەبارەی هێرشی چەكدارانی داعش بۆ سەر كۆبانی بڵاوكردەوەو تێیدا هاتووە، كە وەزارەتی پێشمەرگە ئامادەیە هەرچی لەتوانایدا بێت بۆ هاوكاریكردنی كۆبانی بكات.

لە راگەیێندراوەكەدا وەزارەتی پێشمەرگە داواش لە وڵاتانی هاوپەیمان دەكات هاوكاری پێشكەش بە كوردانی رۆژئاوا بكەن و دەڵێ "چونكە هەمان دوژمن پەلاماریان دەدات".
 
دەفی راگەێندراوەكە:
راگەیێندراوێكی وەزارەتی پێشمەرگەی حكومەتی هەرێمی كوردستان
لەبارەی پەلاماردانی دڕندانەی داعش بۆ سەر كوردانی رۆژئاوا

هێرشی داعشی تیرۆرستی جیهانی بۆ سەر كوردانی برامان لە كۆبانیی رۆژئاوای كوردستان مەترسیەكی ترە بۆ سەر گەلی كوردستان بە گشتی، بۆیە ئەركی سەرشانی هەموو لایەكمانە، پشتیوانی و هاوكارییان بكەین بەهەر شیوەیەك پێویست بكات و لە تواناماندا بێت ، ئێمە وەكو وەزارەتی پێشمەرگەی حكومەتی هەرێمی كوردستان سەرەڕای ئەو رووبەڕووبو‌ونەوە فراوانەی لە ئەستۆمانە لە باشو‌وری كوردستان، ئامادەین هەرچی لە تواناماندایە لەو پێناوەدا بیكەین و داواش لە وڵاتانی هاوپەیمانمان دەكەین هاوكاری پێشكەش بە كوردانی رۆژئاوا بكەن، چونكە هەمان دوژمن پەلاماریان دەدات.

وەزارەتی پێشمەرگەی حكومەتی هەرێمی كوردستان
19 \9\2014

^{بەناوی خودای بەخشندە و میهرەبان
هێرشی دڕندانەی تیرۆریستانی داعش بۆ سەر خوشك و براكانمان لە كۆبانێ بەشێكە لە ئەو نەفیرعام و دوژمنكارییەی تیرۆریستان لەدژی گەلی كوردستان ئەنجامی دەدەن. وەحشیگەری و پەلاماری تیرۆریستانی داعش بۆسەر كۆبانێ و ڕۆژئاوای كوردستان هەڕەشەیە بۆ هەموو گەلی كوردستان و شەرەف و كەرامەت و مان و نەمانی گەلەكەمانی كردۆتە ئامانج.
داوا لە هەموو لایەنە كوردستانییەكان دەكەم هەموو ناكۆكییەكانیان وەلا بنێن و بەیەكەوە بەرگری له كەرامەت و خاك و ژیانی هاووڵاتیانی كۆبانێ بكەن. بەرگریكردن لە خاك و خەڵكی كوردستان ئەركێكە لەسەر شانی هەموومانە و لەسەرووی هەموو ئەركێكی دیكەیە.
داوا لە كۆمەڵگەی نێودەوڵەتییش دەكەم بە زووترین كات هەموو ڕێوشوێنێك بگرنەبەر بۆ پاراستنی كۆبانێ و خەڵكی ڕۆژئاوای كوردستان لە دەستی تیرۆریستان. چونكە تیرۆریستانی داعش لە هەر شوێنێك بن دەست لە تاوان و كارەسات ناپارێزن و دەبێ لە هەر شوێنێك بێت لێیان بدرێت و تێكبشكێندرێن.}

^{مسعود بارزانی
سەرۆكی هەرێمی كوردستان
19ـی ئەیلوولی 2014}

<sup>مەكتەبی سیاسی یەكێتیی نیشتمانیی كوردستان راگەیێندراوێك لەسەر گەمارۆدانی شاری كوبانی رۆژئاوای كوردستان بڵاودەكاتەوە و رایدەگەیەنێت، پێویستە ئەنجوومەنی ئاسایش‌و ئەمریكا‌و وڵاتانی رۆژئاوا بە هانای شاری كوبانی بچن ‌و خەڵكەكە لە مەترسی گرووپی داعش رزگار بكەن.

دەقی راگەیەنراوەكە:

راگەیەندراوێكی راگەیاندنی مەكتەبی سیاسی یەكێتی لەسەر گەمارۆدانی كۆبانی

جەماوەری گەلەكەمان!
وڵاتانی پشتیوانی كوردستان!
ئەی هێزە كوردستانی‌و عیراقییەكان!

چەند رۆژێكە، شاری كۆبانی كەوتۆتە بەر هێرشێكی فراوانی داعشەكان‌و بەهەموو چەكێكی قورس، ناوشارەكە بۆردومان دەكەن‌و زیانی زۆریان لەخەڵك‌و شارەكە داوە. شەهیدو بریندارێكی زۆریش دراوون. تەنانەت چاوەڕێی كارەساتی مرۆیش لەو شارەدا دەكرێ‌.

ئەم هێرش‌و شەڕە، لەكاتێكدا روو دەدات، خۆشبەختانە ئەمریكا‌و رۆژئاوا، بڕیاریان داوە لەهەموو شوێنێك هێرش بكەنە سەر داعش. كۆبانی، شارێكی رۆژئاوای كوردستانەو ئاشكرا، لەبەرچاوی هەموو دەوڵەتان‌و ناوچەكە، لەسەر دەستی داعشەكان قەتڵوعام دەكرێین.

یەكێتیی نیشتمانیی كوردستان، داوا دەكات ئەنجومەنی ئاسایش‌و ئەمریكا‌و وڵاتانی رۆژئاوا، بەهانای شاری كۆبانییەوە بچن‌و خەڵكەكە لەو جانەوەرانەی داعش رزگار بكەن. بەپەلەش كۆمەك بەخەڵكەكە بگەیەنن.

هەروەها داوا لە حكومەتی عیراق، كۆماری ئیسلامی ئێران‌و توركیاش دەكەین، هەرچییەكیان پێدەكرێ، هاوكاری ئەو قارەمانانە بكەن كە بەرگری لەشاری كۆبانی دەكەن‌و بۆ یارمەتیدانی خەڵكەكەش، بڕیاری مرۆیی بەپەلە بدەن‌و بگەیەنن.

حكومەتی كوردستانیش، ئەگەرچی هێزی پێشمەرگە لەشەڕێكی فراواندایە دژی داعش، بەڵام بەهەر رێگەیەك دەگونجێ‌‌و دەكرێ‌، پێویستە هیممەتی كوردستانی بۆ ئەو شارە كوردستانییە بكرێ‌. چونكە، هەموولایەك دەزانین شۆڕشگێڕانی رۆژئاوا، چ رۆڵێكی جوامێرانەیان لەكاتی كارەساتی شەنگالدا، بینی.

سڵاوتان لێبێ‌ .. خەڵكە خۆڕاگرەكەی كۆبانی.
سڵاوتان لێبێ‌ .. پارێزەرانی خەڵكی كۆبانی.
سڵاوتان لێبێ‌ .. شەهیدانی كۆبانی.

راگەیاندنی
مەكتەبی سیاسی
یەكێتیی نیشتمانیی كوردستان
2014/9/18</sup>

وڵاتی فەرەنسا یەكەم هێرشی ئاسمانی دژی داعش لە باكووری موسڵ ئەنجامدا.

فرانسوا ئۆلاندی سەرۆکی فەرەنسا، رۆژی پێنجشەممە 18ی ئەیلوولی 2014، لە كۆنفرانسێكی رۆژنامەوانیدا بڕیاری وڵاتەكەی لەبارەی هێرشكردنە سەر گرووپی دەوڵەتی ئیسلامی (ناسراو بە داعش) راگەیاند و گوتی، "بەدەنگ داوای هێزە عێراقییەكان دەچین و یارمەتی ئاسمانیان پێشکەش دەکەین، هەروەها بەیەکەوە بەرەنگاری تیرۆرستان دەبینەوە". 

بەپێی راگەیێندراوی كۆشكی ئیلزێ، كۆشی كۆماری فەرەنسا، كاژێر 9:40 خوولەكی بەیانی رۆژی هەینی 19ی ئەیلوول، ( 7:40 خوولەك بە كاتی هەولێر)، لە رێگەی فڕۆكەی رافال هێرشی ئاسمانی بۆ سەر عەمبارێكی چەكی گرووپی داعش لە باكووری شاری موسڵ ئەنجامدراوە.

لە راگەیەندراوەكەدا ئەوەش هاتووە، كە ئامانجەكان بە تەواوەتی پێكێندراون و لە رۆژانی داهاتووشدا ئۆپەراسیۆنەكان بەردەوام دەبن.

19/08/2014