<sup>مەسعود بارزانی، سەرۆكی هەرێمی كوردستان بەمەبەستی بەخێرهاتنەوە‌و هەواڵپرسینی مام جەلال سەردانی سلێمانی كرد و ئێستا لە ماڵی تاڵەبانییە لە دەباشان.

هەر ئەمڕۆ سێشەممە 22.7.2014، نەوشیروان مستەفا، رێکخەری گشتی بزووتنەوەی گۆڕان بە یاوەری محەممەد تۆفیق رەحیم سەردانی مام جەلالیان کرد.

مام جەلال لە شەوی 17/12/2012 دا لەشاری بەغدا تووشی جەڵتەی مێشك بوو، پاشان گەیێندرایە نەخۆشخانەی مەدینەی توب لە بەغدا. دوای ئەنجامدانی چەند پشكنینێك بۆی و سێ رۆژ مانەوە، سەرلەبەیانی رۆژی 20-12-2012، بە چاودێری تیمێكی پزیشكی تایبەت، سەرۆك كۆماری عێراق بەمەبەستی چارەسەر بەرەو ئەڵمانیا بەڕێکرا و رۆژی شەممە 19.7.2014، گەڕایەوە باشووری کوردستان.</sup>

^22/7/2014

<sup>نێچیرڤان بارزانی، سەرۆكی حكومەتی هەرێمی كوردستان رایگەیاند، كە هەوڵدەدەن كاندیدەكانی كورد بۆ وەرگرتنی پۆستی سەرۆك كۆمار بكەنە یەك كاندید.

پۆستی سەرۆك كۆماری عێراق بۆ كورد ‌و لەنێو كوردیشدا بۆ یەكێتیی نیشتمانیی كوردستان یەكلایی بووەتەوە، بەڵام ئەو حیزبە دوای چەندین كۆبوونەوە نەیتوانی بگاتە كاندیدێكی دیاریكراو.

چەند رۆژێكە مەكتەبی سیاسی یەكێتی نیشتمانیی كوردستان لە كۆبوونەوەدایە كە كاندیدێك پێشكەش بكات، بەڵام بەهۆی كێشەی ناوخۆییەوە بە راگەیاندنی دوو كاندید  هەریەكە لە بەرهەم ساڵح و فوئاد مەعسوم كۆتاییهات، ئەمە جگە لەوەی نەجمەدین كەریم پارێزگاری كەركووك و ئەندامی مەكتەبی سیاسیی یەكێتی لە دەرەوەی حیزبەكەی خۆی پاڵاوتووەو دەشڵێ ناكشێتەوە.

بەڵام ئەمڕۆ لە كۆبوونەوەیدا لەگەڵ سەرۆكی فراكسیۆنەكانی نێو پەرلەمانی كوردستان، نێچیرڤان بارزانی رایگەیاندووە، كە ئەوان هەوڵدەدەن لەڕێی گفتوگۆی سیاسییەوە كاندیدەكانی یەكێتی كەمبكەنەوە بۆ یەك كاندید.

هەر سەبارەت بەو پرسە رۆژی دووشەممە 21-7-2014 پارتی و یەكێتی و گۆڕان، كۆمەڵ و یەكگرتوو لە مەكتەبی سیاسی یەكێتیی نیشتمانیی كوردستان لە سلێمانی كۆبوونەوە‌و لایەنەكان داواكاربوون یەكێتی تەنیا یەك كاندید دیاری بكات.</sup>

^22/7/2014

<sup>ئاژانسی نێودەوڵەتی وزەی ناوەکیی رۆژی یەکشەممە لە راپۆرتی مانگانەیدا، سەبارەت بە پڕۆگڕامی ناوەکیی ئێران رایگەیاندووە کە تاران لە چوارچێوەی رێککەوتننامەی سەرەتایی جنێڤ زۆربەی پاشکەوتەکانی هەستیاری گازی یۆرانیۆمی لەنێوبردووە.

بەپێی ئاژانسی رۆیتەرز ، راپۆرتی تازەی ئاژانسی وزەی ناوەکی نیشانی دەدات کە ئێران پابەند بووە بە بەڵێنەکانی خۆی لە چوارچێوەی رێککەوتننامەی شەش مانگەی سەرەتایی جنێڤ.

راپۆرتی ئەو ئاژانسە دەڵێت ئێران لەکاتی گەیشتن بە رێککەوتننامەی سەرەتایی جنێڤ 200 کیلۆگرام یۆرانیۆمی پیتێندراوی 20 لەسەدی هەبووە و لەو کاتەوە تا ئێستا بە ئۆکسیدەکردن ئەو یۆرانیۆمانەی دابەزاندووە.

رەزا نەجەفی نوێنەری ئێران لە ئاژانسی وزە رایگەیاندبوو کە دوای پشتڕاستکردنەوەی ئاژانس دوایین بەش لە داراییە راگیراوەکانی ئێران ئازاد دەکرێن .

ئەوە لە کاتێکدایە کە شەشەمین دانوستاندنی ناوەکیی ئێران و وڵاتانی پێنج کۆ یەک لە جنێڤی پایتەختی نەمسا بێ ئاکام مایەوە .

ئێران و گرووپی پێنج کۆ یەک رێککەوتوون دانوستاندنەکان سەبارەت بە پرۆگرامی ناوەکی و گەمارۆکانی وڵاتانی رۆژئاوایی لە دژی ئێران بۆ چوار مانگی دیکەش درێژەی پێبدەن .

هاوکات ولایەتە یەکگرتووەکانی ئەمریکا رایگەیاندووە کە سێ ملیار دۆلار لە داراییەکانی ئێران وەک بەشێک لە رێککەوتنی سەرەتایی جنێڤ ئازاد دەکات و  بڕیارە ئێران لە بەرامبەردا چڕیی یۆرانیۆمی دامەزراوە ئەتۆمییەکانی بۆ ژێر بیست لەسەد دابەزێنێت .

دیپلۆماتێکی ئەمریکی لە ڤییەنا رایگەیاندووە کە خولی نوێی دانوستاندنەکان لە مانگی داهاتوودا دەستپێدەکات و هاوکات بەرپرسانی ئەمریکی رایانگەیاندووە بە باوەڕی ئەوان لەکاتی درێژکراوەدا بۆ دانوستاندنەکان پێویست نییە گەمارۆی نوێ لە دژی ئێران پەسەند بکرێ .</sup>

^22/7/2014

<sup>سبەی مەسعود بارزانی و نەوشیروان مستەفا سەردانی مام جەلال دەكەن لە دەباشان.

بەپێی میدیاكانی یەكێتی، بڕیارە سبەی سێشەممە 22ی تەمموزی 2014، مەسعود بارزانی، سەرۆكی هەرێمی كوردستان و نەوشیروان مستەفا، رێكخەری گشتیی بزووتنەوەی گۆڕان سەردانی مام جەلال، سەرۆككۆماری عێراق و سكرتێری گشتیی یەكێتیی نیشتمانیی كوردستان  بكەن.

پێشنیوەڕۆی ئەمڕۆ دووشەممە ئەندامانی مەكتەبی سیاسی یەكێتی سەردانی جەلال تاڵەبانی-یان كرد كە لە دوای ساڵێك و حەوت مانگ لە نەخۆشكەوتنی و وەرگرتنی چارەسەری پزیشكی، رۆژی شەممە لە ئەڵمانیاوە گەڕایەوە باشووری كوردستان. دوای سەردانەكەش لەلایەن میدیاكانی ئەو حیزبەوە بۆ یەكەمجار دوای گەڕانەوەی ڤیدیۆیەكی تاڵەبانی بڵاوكرایەوە.

رۆژی شەممە 19ی تەمموزی 2014،  بە فڕۆكەیەكی تایبەت تاڵەبانی لە ئەڵمانیاوە گەڕایەوە سلێمانی، بەڵام بە چەند هۆكارێك پێشوازی فەرمی لێنەكرا و تەنها خێزانەكەی لە فڕۆكەخانەی سلێمانی ئامادەبوون، یەكێك لە هۆكارەكان ئەوە بوو كە ماڵباتی تاڵەبانی بڕیاری ئەوەیاندابوو، كە رێوڕەسمی پێشوازیكردن رێوڕەسمێكی خێزانی بێت.</sup>

^21/7/2014

<sup>دوای ئەوەی محەممەد جەواد زەریف، وەزیری دەرەوەی ئێران و کاترین ئاشتۆن بەرپرسی سیاسەتی دەرەوەی یەکێتی ئەوروپا لە راگەیەنراوێکی هاوبەشدا رایانگەیاند: دانوستاندنە ئەتۆمییەکانی نێوان ئێران و وڵاتانی 1+5 بۆ ماوەی چوار مانگی دیکە درێژدەکرێتەوە.

بەرپرسی پەیوەندییەکانی دەرەوەی کۆنگرێسی ئەمریکا ئیدوارد رۆیس لە بەیاننامەیەکدا ناڕەزایەتی خۆی بەرامبەر ئەو بڕیارە پیشانداو رایگەیاند، ئەو بڕیارە لە بەرژەوەندی ئێرانە و دەرفەتی زیاتر بە ئێرانییەکان دەدات، بۆیە پێویستە گوشاری ئابووری لەو وڵاتە بکرێت. رۆیس هەروەها نیگەرانی دەربڕیوە لەوەی "ئێران بەردەوامە لە پشتگیریکردنی گروپە چەکدارەکان" و ئاماژە بە ناردنی نایاسایی مووشەک دەکات لەلایەن ئێرانەوە بۆ بزووتنەوەی حەماسی فەڵەستین و دەڵێت "هەموو ئاماژەکان پیشاندەدەن کە ئێران لە پەرەسەندندایە و بەرەو دروستکردنی بۆمبی ئەتۆمی هەنگاو دەنێت".

شرۆڤەکارانی سیاسی باس لە هاتنە ئارای گۆڕانکاری لە هەڵسوکەوتی ئێران دەکەن، کە بەهۆی رووداوەکانی خۆرهەڵاتی ناوەڕاستەوە لە دانوستاندنە ئەتۆمییەکانی داهاتوودا پێکدێت. لەو بارەیەوە شرۆڤەکارێکی ئێرانی بارودۆخی ئێستای عێراق بە فاکتەرێکی گرنگ دەزانێ بۆ هاتنە ئارای گۆڕانکاری لە هەڵسوکەوتی بەرپرسانی ئێرانی لە دانوستاندنە ئەتۆمییەکانیان لەگەڵ وڵاتانی 1+5. 

کورش عیرفانی نووسەر و شرۆڤەکاری ئێرانی لە وتارێکیدا کە لە ژێر ناوی "بارودۆخی ناوچەکە و کاریگەری لە سەر دانوستانە ئەتۆمییەکانی ئێران" بڵاویکردووەتەوە، ئاماژەی بە دۆخی عێراق کردووەو نووسیویەتی: "دۆخی نوێی عێراق ئاسۆیەکی نوێی بۆ ئەو وڵاتە وێنا کردووە ، لە لایەکەوە هەرێمی کوردستان دەرفەتەکە بە گونجاو دەزانێ بۆ راگەیاندنی سەربەخۆیی کە ئاواتی لە مێژینەیەتی و لەو پێناوەشدا ئیسرائیل پشتگیریی دەکات و کورد هیوای بەوەیە لۆبی ئیسرائیل بتوانێ لە ئەمریکا و ئەوروپا پشتگیری بۆ بە دەست بێنێت،  لە لایەکی دیکەوە سوننەکانی عێراق بە هێزی چەک هاتوونەوە مەیدانی سیاسەت و پشکی بەرچاویان لە دەسەڵاتی داهاتووی عێراقدا دەبێت و پێدەچێت لە کۆمارێکی سوننەنشینی عێراقدا حوکمڕانی بکەن. چەکدارانی دەوڵەتی ئیسلامی ناسراو بە داعش تا رادەیەک لە عێراق جێگیر بوون و مانەوەیان مەترسی جدی لە سەر سنوورەکانی ئێران دروست دەکات ، شیعەکانیش کە بۆ مانەوەیان لە دەسەڵات پشت بە هاوکارییەکانی ئێران دەبەستن دەیانەوێ لانیکەم بەشێک لە دەسەڵاتی داهاتووی عێراق یان فەرمانڕەوایی ناوچە شیعەنشینەکانی باشوور بۆ خۆیان بپارێزن".

نووسەر دەشڵێ "ئەمانە نیگەرانییە تازەکانی تارانن لە عێراقدا ، چونکە تاران بۆ مانەوەی بەشار ئەسەد لە سووریا پشتی بە نووری مالیکی بەستبوو و ئێستا کە دەبینێ هەردوو هاوپەیمانەکەی واتە ئەسەد و مالیکی پێکەوە کەوتوونە مەترسییەوە و هەروەها پشتگیری وڵاتانی بەهێزی وەک سعودیە و قەتەر بۆ پێکهاتەی سوننەی دەسەڵاتدار لە عێراق و سوریای داهاتوو هەڕەشەیەکی گەورەی سیاسی و ئەمنی لە سەر ئێران دروست دەکات، ئەمانە ئێران ناچار دەکەن بۆ هاوڕاکردن و بەدەستهێنانی هاوکاری خۆرئاواییەکان لە ناوچەکەدا ، گۆڕانکاری لە سیاسەت و هەڵسوکەوتی خۆی لە دانوستانە ئەتۆمییەکان بێنێتە ئارا، لەگەڵ ئەمانەش هێرشەکانی ئیسرائیل بۆ سەر کەرتی غەزە لەو رووەوە فاکتەرێکی کاریگەر دەبێ".</sup>

^21/7/2014

<sup>هەرچەندە ئەندامانی ئەنجوومەنی ناوەندی یەکێتی دەڵێن مام جەلال بۆخۆی داوایكردووە، كە مەراسیمی گەورەی بۆ سازنەكرێت بۆ هاتنەوەی بۆیە بەرپرسانی حیزبەكەی تاڵەبانی نەچوونەتە پێشوازی، بەڵام جێگری سكرتێری ئەنجوومەنی ناوەند دەڵێت ئەگەر هیلاكی  تاڵەبانی و جۆری نەخۆشییەكەی نەبایە ئەوا دەبوو گەورەترین مەراسیمی گەڕانەوەی بۆ سازبكرێت.

ئەندامانی ئەنجوومەنی ناوەندی یەكێتی گەڕانەوەی تاڵەبانی بە ئومێدی گەورە وەسف دەكەن بۆ یەكلاییكردنەوەی هەموو ئەو گرێكوێرانەی لە ماوەی زیاتر لە ساڵ و نیوێك لە غیابیدا لەنێو حیزبەكەیان هاتووەتە ئاراوە، تەنانەت گرنگی گەڕانەوەی مام جەلال بۆ كوردستان بە جێی بایەخی وڵاتانی جیهانیش لەقەڵەم دەدەن.

بە گوتەی جێگری سكرتێری ئەنجوومەنی ناوەندی یەكێتی، جەلال تاڵەبانی بەرنامەی دیدار و چاوپێكەوتنەكانی لەگەڵ بەرپرسانی حیزبەكەی و كەسایەتییە سیاسییەكان رێكخستووەو لە دەستپێكی دیدارەكانیش لەدەرەوەی بنەماڵەكەی چاوی بە كۆسرەت رەسوڵ جێگری سكرتێری گشتیی یەكێتتی کەوتووە.</sup>

^21/7/2014

<sup>لە شاری ئیستەنبوڵی توركیا، كۆبوونەوەیەك بە بەشداری زانایانی ئایینی 32 وڵاتی ئیسلامی و زانایانی ئایینی هەر چوار پارچەی كوردستان لە ژێر ناوی "دەستپێشخەری زانایانی جیهانی ئیسلامی بۆ لەخۆگرتنی ئاشتی و میانڕەوی" بەڕێوەچوو.

لە كۆنفڕانسەكەدا باسی ئەو كێشە و ناكۆكییانە كرا كە لە نێو مەزهەبە جیاوازەكانی ئایینی ئیسلام روودەدەن. بە تایبەتی ناكۆكییەكانی نێوان مەزهەبی سوننە و شیعە و راگەیاندنی خەلافەت لەلایەن چەكدارنی داعش و هەروەها هێرشەكانی ئیسرائیل بۆ سەر كەرتی غەزە.

سەرۆكی یەكێتیی زانایانی ئایینی ئیسلامی كوردستانیش كە بەشداری كۆنفرانسەكەی كردبوو رایگەیاند، ئەوان لەو كۆبوونەوەیەدا باسی ئەوەیان كردووە كە زۆرجار لە ژێر ناوی ئایین ستەم لە كورد كراوە.</sup>

^21/7/2014

<sup>پەرلەمانی كوردستان ناتوانێ پێش جەژنی رەمەزانی پیرۆز لێبوردنی گشتی دەربكات، بەڵام سەرۆكی هەرێمی كوردستان دەتوانێت لێبوردنی تایبەت دەربكات.

سۆران عومەر، سەرۆكی لێژنەی مافی مرۆڤی پەرلەمانی كوردستان لە بارەی دەركردنی لێبوردنی گشتی بە (تۆڕی میدیایی رووداو)ی راگەیاند، "پێویستبوو لەگەڵ لایەنە پەیوەندیدارەكان كۆببینەوە كە بریتین لە وەزارەتەكانی ناوخۆی و داد و بەڕێوەبەرانی زیندانییانی سێ پارێزگاكەی هەرێمی كوردستان، بەڵام بەهۆی سەرقاڵبوونەوە نە توانرا ئەنجامبدرێت".

نێوبراو روونیكردەوە "ئێستا پەرلەمان سەرقاڵە بە پڕۆژەیاساكانی دەستەی سەربەخۆی هەڵبژاردن و راپرسی و  بوودجەی پارتەكان، ماوەیەكی كەمیش ماوە هەم جەژن و هەمیش پشووی پەرلەمان دەستپێدەكات، بۆیە ئەو پرسە بۆ دوای مانگی 9 دوادەكەوێت كە پشووی پەرلەمان كۆتایی دێت".

سۆران عومەر كە هاوكات پەرلەمانتارانی فراكسیۆنی كۆمەڵی ئیسلامییە ئاماژە بەوە دەكات كە  فراكسیۆنەكەیان سەرقاڵی گەڵاڵەكردنی پڕۆژەیەكە لەبارەی لێبوردنی گشتی، بەڵام هیشتا پڕۆژەكە تەواونەبووە، دوای تەواوبوونی پێشكەشی پەرلەمانی دەكات.

سەرۆكی لێژنەی مافی مرۆڤی پەرلەمانی كوردستان هێمای بەوەكرد كە لێبوردنی گشتی لە دەسەڵاتی پەرلەمانی كوردستانە، بەڵام سەرۆكی هەرێمی كوردستان دەتوانێت لێبوردنی تایبەت دەربكات  و ئەمەش لە دەسەڵاتی سەرۆكی هەرێمی كوردستانەو پەیوەندی بە ئەوانەوە نییە.</sup>

^21/7/2014

^{مەسرور بارزانی، راوێژکاری ئەنجوومەنی ئاسایشی هەرێمی کوردستان لە دیدارێکی لەگەڵ ئاژانسی رۆیتەرز دەڵێت، "هەڕەشەی چەکدارانی یاخیبوو لە عێراق سەرەنجام دەگاتە وڵاتانی رۆژئاوا، ئەگەر ئەو وڵاتانە نەیەن و لە سەرچاوەکەیەوە بەرەنگاری ئەو هەڕەشەیە نەبنەوە".}

^{مەسرور بارزانی کە لەگەڵ هەردوو رۆژنامەڤان ئیزابێل کۆل و نێد پارکەر قسەی کردووە دەڵێت “کوردستان سەرکەووتوانە توانیویەتی هەڕەشەی شەڕەکانی سووریا و عێراق خۆی بپارێزێت".}

^{لە دیدارەکەدا مەسرور بارزانی زیاتر باسی لە سیاسەتی وڵاتانی رۆژئاوا و هەڕەشەی گرووپە چەکدارەکان و پێویستی پێشمەرگە بۆ چەکی زیاتر کردووە. ئەو دەڵێت وڵاتانی رۆژئاوا دوو هەڵبژاردەیان لە پێشە؛ یان بێنە ئێرە و خۆیان شەڕی [گرووپە توندڕەوەکان] بکەن، یان چاوەڕێ بکەن تاکو ئەوان بێنە وڵاتەکانیان و کاری تیرۆرستی ئەنجام بدەن".}

^{راپۆرتەکەی رۆیتەرز دەڵێ هێزەکانی کورد بە درێژایی هەزار و 50 کیلۆمەتر سنووریان لەگەڵ ئەو ناوچانە هەیە کە لە ژێر کۆنتڕۆڵی چەکدارانی داعشن.}

^{مەسروور بارزانی بە رۆیتەرزی گووتووە "داعش بووەتە خاوەن چەکی مۆدێرن و پێشکەوتوو، بۆ ئەوەی پێشمەرگە بەرەنگاریان ببێتەوە پێویستە پێشمەرگە چەکی باشتری پێبێت لەوەی ئێستا هەیە”.}

^{مەسروور بارزانی گلەیی لە وڵاتە ئەوروپییەکان و ئەمریکا دەکات بەهۆی هاوکارینەکردنی پێشمەرەگە. "ئێمە قسەمان لەگەڵ هەندێ وڵاتانی ئەوروپی و ئەمریکا کردووە، بەڵام تاکو ئێستا بە کردار هیچ هەنگاوێک نەنراوە بۆ یارمەتیدانی کورد . ئەمریکا و هەموو کۆمەڵگای نێودەوڵەتی دەبێ هەست بەرپرسیارێتی بکەن".}

^{رۆژی ١٠ی حوزەیرانی ساڵی ٢٠١٤، کۆمەڵێک چەکداری سوننە کە زۆربەیان وەکو ئەندام لە رێکخراوی داعش خۆیان ناساندووە شاری موسڵیان کۆنتڕۆڵکرد. دوای ئەوەی سوپای عێراق لەو ناوچانە کشانەوە. مەسرور بارزانی دەڵێ "ژمارەی چەکدارانی داعش کە رۆژی ١٠ی حوزەیران هێرشیانکردە سەر موسڵ لە ٢٠٠٠ کەمتربوون". بەڵام ئەو دەڵێ دوای گرتنی موسڵ، چەکدارێکی زۆر هاتوونەتە ریزەکانی داعش. نێوبراو ژمارەی چەکدارانی داعش بە ١٢ هەزار دەخەمڵێنێ.}

^{هەڕەشەی گرووپە تووندڕەوەکان بۆ سەر باشووری کوردستان هەر لە ئارادایە. "هێزەکانی ئاسایشی کوردستان توانیویانە چەند هێرشێکی کەمی تیرۆرستی لە کوردستان پووچەڵبکەنەوە".}

^{مەسرور بارزانی ئەوەی نەشاردووەتەوە کە هاتنی سەدان هەزار ئاوەرە لە ناوچەکانی دیکەی عێراق کاری ئەوانی زەحمەتر کردووە. "ئێمە هەموو شتێ دەکەین بۆ ئەوەی دڵنیا بینەوە کە خانەی خەوتوو چالاک [لە کوردستان] بوونی نییە".}

^20/7/2014

ئەمرۆ 20 ی تەمموز هاوکاتە لەگەڵ یادی لە دایکبوونی خانمە نوسەر و لێکۆڵەری کورد ( سهیر ئەلقلماوی‌) و گوگڵیش لۆگۆی سەرەکی خۆی گۆڕیوە و وێنەی ئەم خانمەی داناوە وەک هەموو جارێک کە لە یادە گرنگەکاندا وێنەکە دەگۆرێت و زانیاری تەواو لەسەر ئەو کەسە بلاودەکاتەوە.

سهیر ئەلقلماوی لە ساڵی 1900 لە شاری "طنطا" لە وڵاتی میسر لە باوکێکی کورد لە دایک بووە کە لەو شارە پزیشک بووە.

سهیر نوسەر و لێکۆڵەر و ڕەخنەگرێکی گەورەی ئەدەبی بووە کۆلێژی زمان بەشی عەرەبی تەواو کردووە لەناو هاوەڵەکانیدا تەنها خۆی کچ بووە و یەکێک بووە لە رابەرانی داکۆکیکارانی مافی ئافرەت لە میسر و بە یەکەم کچ دانراوە لەو کاتەدا کە لە زانکۆ خوێندویەتی و بڕوانامەی ماستەر و پاشان دوکتۆرای هێناوە.

ئەم خانمە لە ساڵی 1941 بروانامەی دکتۆرای بەدەستهێناوە لە زانکۆی سۆربۆن، لە 4 ئایاری 1997 لە قاهیرە کۆچی دوایی کردووە.

دیارترین بەرهەمکانیشی لە بواری ئەدەبیدا ئەمانەن:

(زكری‌ طه حسین 1974)
(ألف لیله‌ ولیله‌ 1943)
(العالم بین دفتی كتاب 1985)

20/07/2014