به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
مانگی داهاتوو هەڵبژاردنی سەرۆكایەتی كۆمار لە ئازەربایجان ئەنجام دەدرێت و كوردێكی دانیشتووی ئەو وڵاتەش بە ناوی تاهیر سلێمان خۆی كاندید كردووە.
تاهیر سلێمان ساڵی 1954 لە گوندێك بەناوی خاڵس كە سەر بە ناحیەی ڤەدیای ئەرمەنستانە لەدایكبووە. خوێندنی سەرەتایی و ناوەندی لەهەمان گوند تەواو كردووە، خوێندنی باڵاشی لە باكوی پایتەختی ئازەربایجان تەواو كردووە. ساڵی 1980، لە دەڤەری ڤەدیا ئەرمەنیستان وەكو مامۆستا دەستیكرد بە گوتنەوەی وانەی كوردی و ئازەری.
تاهیر باسی چیرۆكی باب و باپیرانی بۆ (رووداو) كرد و گوتی “باب و باپیرانمان لەسەردەمی پەیمانی قەسری شیریندا دوای شەڕی شیعە و سوننە لە دەڤەری بارزان و دهۆكەوە هاتوونەتە دیاربەكر. لەوێش چوون بۆ شاری وان و دوای شەڕی ئەرمەن و تورك چوونەتە ئەرمەنستان.”
كوردانی قەفقاسیا لە سەردەمی جوزێف ستالین، سەرۆك یەكێتی سۆڤیەتی پێشوو، لە ساڵی 1937 لە ئەرمەنستان و لە ساڵی 1944 لە جۆرجیاوە دەگوازرێنەوە بۆ بیابانەكانی ئاسیای ناوەڕاست. ئەو راگواستنە دوو مانگی سەرما و سۆڵەی زستانی خایاند، بەهەزاران كورد لەنێو شەمەندەفەرە بارهەڵگرەكان و كامیۆنی ئاژەڵەكاندا تووشی نەخۆشی بوون و گیانیان لەدەست دا.
بنەماڵەی تاهیر سلێمانیش لەگەڵ چەندین بنەماڵەی دیكەی كورد لەساڵی 1937دا بە فەرمانی جۆزێف ستالین، لە ئەرمەنستانەوە راگوازران بۆ كازاخستان، قیرغیزستان و ئۆزبەكستان. بنەماڵەی تاهیر بەر ئۆزبەكستان كەوتن، بەڵام ساڵی 1940 باپیری دووبارە دەگەڕێتەوە ئەرمەنستان.
لەساڵی 1988 خێزانەكەی تاهیر سلێمان جارێكی دیكە نەفی دەكرێن، ئەویش بەهۆی شەڕی قەرەباخ لە نێوان ئەرمەنی و ئازەرییەكان. زۆر كەس لە هەردوولا لەو شەڕەدا كوژران. ئەرمەنییەكانی ئازەربایجان روودەكەنە ئەرمەنستان. كوردانی موسڵمانی ئەرمەنستانیش روودەكەنە كازاخستان، قیرغیزستان و ئۆزبەكستان بۆ لای ئامۆزا و خزمی خۆیان كە ساڵی 1937 نەفیكرابوونە ئەوێ و بەشێكیشیان روودەكەنە رووسیا.
تاهیر سلێمان و بنەماڵەكەی لە هەمانساڵدا لەگەڵ هەزاران بنەماڵەی كوردی ئەرمەنستان روودەكەنە ئازەربایجان. ئەو دەڵێ “كاكە گیان هیوادارم ئەوەی بەسەر كوردی قەفقاسیا هاتووە، بەسەر گورگی چۆڵایی و شاخەكانیش نەیێت! تاوەكو ئێستا دوو گۆڕی باب و باپیرانمان لە یەك شوێن نییە.”
دوای هاتنی تاهیر سلێمان بۆ باكو لە رۆژنامەی “رێسپوبلیكا”دا كاری كرد كە سەر بە سەرۆكایەتی ئازەربایجانە. دواتر بەپێویست دەزانێت كە رۆژنامەیەكی تایبەت بۆ كورد دەربكات. لەساڵی 2003 رۆژنامەی “دیپلۆماتا كورد” دەردەكات كە بۆ ماوەی پتر لە 10 ساڵە بە كوردی، ئازەری، رووسی و توركی هەوڵدەدات خزمەتی كورد بكات. رۆژنامەی دیپلۆماتا كورد 16 لاپەڕەیە و هەفتانە دەردەچێت. تاوەكو ئێستاش 230 ژمارەی لێدەرچووە.
“متمانەم بە خۆم هەیە”
ئێستا تاهیر سلێمان خۆی كاندید كردووە بۆ هەڵبژاردنەكانی سەرۆكایەتی كۆماری ئازەربایجان كە بڕیارە مانگی داهاتوو ئەنجام بدرێ.
تاهیر متمانەی بە خۆی هەیە كە ببێتە سەرۆك كۆمار و دەڵێت “كۆمەڵگای كوردی ئازەربایجان باش دەمناسن. بۆیەش پشتیوانی كاندیدكردنم دەكەن بۆ پۆستی سەركۆماریی ئازەربایجان. ئامانجمان ئەوەیە نەتەوەكانی دیكەش بزانن كە نەتەوەی كورد لە ئازەربایجان نەتەوەیەكی گرنگە.”
21 كەس خۆیان بۆ هەڵبژاردنی سەركۆماری كاندید كردووە. دەكرێ كوردیش لەنێو ئەم كاندیدانە هەبن، بەڵام بێجگە لە تاهیر سلێمان كەسی دیكە بەناوی كورد بەشداری نەكردووە.
بەپێی زانیارییەكانی تاهیر سلێمان، دەسەڵات و گەلی ئازەریش بە خۆكاندیدكردنی دڵخۆشن. رەنگە زەحمەت بێ، رۆژنامەنووسێكی كوردی بێ پشت و پەنا بچێتە كۆشكی سەرۆك كۆماری ئازەربایجان و حكومی وڵاتێك بكات، كە زۆرینەی ئازەرین.
تاهیر سلێمان هۆكاری خۆكاندیدكردنی روونكردەوە و گوتی “هۆكاری سەرەكی ئەوەیە كە من ورە دەبەخشم بە كۆمەڵگای كوردی لە ئازەربایجان و كوردی سەرانسەری دونیا. هۆكاری دووەمیش نەهێشتنی ئەو ترس و دڵەڕاوكێیەی لە یەكێتی سۆڤیەتی جاران ماوە. هۆكاری سێیەمیش ئەوەیە كە من بنچینەیەكی باش دابنێم بۆ هەڵبژاردنەكانی پەرلەمان.”
تاهیر سلێمان داوا لە حكومەتی هەرێمی كوردستان دەكات پەیوەندی لەگەڵ حكومەتی ئازەربایجان دروست بكات و بۆیان بیسەلمێنێت كە ئەوان پشتیوانی كوردی ئازەربایجان دەكەن. تاهیر پێیوایە ئەگەر حكومەتی هەرێمی كوردستان ئەو كارە بكات، ئەوە نەك تەنیا دەنگی كوردی ئازەربایجان لەنێو ئەو وڵاتەدا بەرزدەبێتەوە، بەڵكو كورد لە سەرانسەری دونیا ناوبانگی دەبێت.
زیاتر لە ملیۆنێك كورد لە ئازەربایجان هەن
ژمارەیەكی زۆر كورد لەو وڵاتە هەن و پێگەشیان دیارە، تەنانەت دەگوترێ ئیلهام عەلیێڤ، سەرۆك كۆماری ئێستای ئازەربایجان و حەیدەر عەلیێڤ، سەرۆك كۆماری پێشووتری ئازەربایجان كوردن.
تاهیر سلێمان لەبارەی ژمارەی كوردی ئازەربایجانەوە دەڵێت “بەپێی لێكۆڵینەوەیەك كە خۆم كردوومە، نزیكەی ملیۆنێك و 500 هەزار كورد لە ئازەربایجان هەن، بەڵام زۆربەیان ئاسیمیلەبوون، واتە لەنێو كۆمەڵگای ئازەریدا تواونەتەوە. دۆكومێنت و بەڵگەنامە فەرمییەكان دەڵێن 13 هەزار كورد لەو وڵاتەدا هەن”.
گوتیشی “راستە، حەیدەر عەلیێڤ كوردە و بەرەچەڵەك خەڵكی شاری دیاربەكرە. 150 – 200 ساڵ لەمەوبەر بەهۆی كێشەیەكی كوشتنەوە هاتوونەتە ئازەربایجان”.
ساڵح كەڤربڕی
رووداو - باكو
14/09/2013
پەرلەمانتاری سەربەخۆی شاری ماردین ئەحمەد تورک سەبارەت بە لێدوانی پەکەکە بۆ راوەستاندنی کێشانەوەی ھێزە چەکدارەکانی خۆی رایگەیاند کە کۆتایی بە قۆناغی چارەسەری نەھاتووە بەڵام قۆناغەکە رووبەرووی کێشە بووەتەوە.
لە میانەی کۆنگرەیەکی رۆژنامەوانیدا کە بە بۆنەی دەستپێکردنی ساڵی نوێ خوێندنەوە لە بەردەم ھۆڵی کۆبوونەوەکانی سۆمەرپارکی تورکیادا ساز کرابوو ئەحمەد تورک ئاماژەی بەوە کرد کە ئەوان پشتگیری لە قۆناغی چارەسەری، بێدەنگ کردنی چەکەکان و جێبەجێ کردنی ماف و داواکارییە رەواکانی گەلی کورد دەکەن و پێویستە حکوومەتیش ئەرکی سەر شانی خۆی جێبەجێ بکات.
.ئەحمەد تورک لە بەشێکی دیکەی لێدوانەکانیدا ئاماژەی بەوە کرد کە ناکرێت خۆبەرێوەبردنی کورد و قەبووڵ کردنی زمانی کوردی وەکو زمانی رەسمی لە قۆناغی چارەسەری جیا بکرێنەوە چونکە ئەم داواکارییانە داواکاری سرۆشتین و سەرچاوەیان نەتەوەبوونی گەلی کورد و یاسا نێونەتەوەییەکانە و ئەم ماف و داواکارییانە بە ھیچ شێوەیەک نابنە بابەتی مامەڵە کردن.
تورک جەختی لە سەر ئەوە کردەوە کە بریاری ئاگر بەست کە پێشتر لە لایەن پەکەکەیەوە بۆ رای گشتی ئاشکرا کرابوو و گرێدراو بوونی پەکەکە بەم بڕیارەی خۆی گرنگە و ئەوانیش پشتگیری لێوە دەکەن.
ناوبراو وتیشی “لێدوانی پەکەکە سەبارەت بە راوەستاندنی کێشانەوەی ھێزەکانی خۆی نیشانەی کۆتایی ھاتنی قۆناغی چارەسەری نییە بەڵکو نیشانەی ھەبوونی کێشە لە نێو ئەم قۆناغە دایە و ئەم کەسانە کە ھاووڵاتی کۆماری تورکیان دەبێت ھاوکات لەگەڵ قۆناغی چارەسەریدا بەشداری لە ژیانی کۆمەڵایەتی و سیاسی بکەن و بۆ ئەمە مەبەستەیش پێویستی بە گۆڕانکاری بە پەلەی یاسایی ھەیە و بۆ باشتر بەرێوە بردنی ئەم قۆناغە دەبێت رۆلی ئوجەلانیش لە بەرچاو بگیڕدرێت و ئاستەنگییەکانی بەردەم پەیوەندی کردنی بە رای گشتییەوە چارەسەر بکرن و گیراوانی دۆزی کەجەکەیش بە پەلە ئازاد بکرن و رێژەی سەدا ١٠ی ھەڵبژاردنەکانیش کە کاریگەری زۆری لە سەر قۆناغی چارەسەری دەبێت ھەڵبوەشێنرێتەوە.
تورک باسی پەروەردە بە زمانی زگماکیشی کرد و گوتی” پێویستە بە پەلە گفتوگو لە سەر پەروەردە بە زمانی زگماکیش بکرێَت و حکوومەت و بەرپرسانیش واز لە لێدوانە نائیجابییەکانی خۆیان لەمبارەوە بھێنن، بۆیە داوا لە گەلی کورد دەکەم کە بە مەبەستی گرنگی دانی دەوڵەت بە زمانی زگماکی و بەکار ھێنانی زمانی کوردی لە ھەر ھەمووی بوارەکاندا پێویستە بەشداری لە ھەڵمەتی بایکوت کردنی یەک حەفتەیی پەروەردە بکات.
ئه‌نادۆڵ
14/09/2013
یاریدەدەری سەرۆکی گشتیی CHP، سەزگین تانرکولو، نیگەرانە لەوەی هێشتا رووداوە خوێناوییەکەی رۆبۆسکێ ئەنجامێکی دەرنەکەوتووە و، دەڵێت "ھەموو کەس دەزانێ کاتێ دز لە ماڵەوەبێ پێویستی بە کلیل نییە."
شاندێکی پارتیی گەلی کۆماری CHP سەردانی گوندی رۆبۆسکێیان کرد و لەگەڵ خێزانی ٣٤ قوربانیی ئەو گوندە کە دوو ساڵ لەمەوبەر بە ھۆی بۆردومانی فڕۆکە شەڕکەرەکانی تورکیاوە کوژران.
شاندەکە بە سەرۆکایەتیی (حەسەن ئۆرەن) بە ھاورێیەتی ھەریەکە لە (سەزگین تانرکولو) یاریدەدەری سەرۆکی گشتیی CHP و چەند پەرلەمانتار لە رۆبۆسکێ سەرەخۆشیان لە ماڵباتی قوربانیان کرد.
حەسەن ئۆرەنی سەرۆکی شاندەکە لە ناو کەسوکاری قوربانیان گوتی "ئەمە ئازارێکی بەسوێیە ھەست بە ئازارەکانتان دەکەین. نامانەوێ چیتر دایکان رەشپۆش بن، ئێمە باش دەزانین ماڵباتی قوربانییان چاوەڕێی دەکەن حکومەت ئەنجامدەرانی ئەو کۆمەڵکوژییە بدرێنە دادگا، ئەمە پرسی گوندێک یا ناوچەیەک نییە بە تەنیا، بەڵکو ئەمە پرسی تورکیایە بەگشتی و حیزبەکانی تورکیایە. ئەو کەسانەی فرمێسک بۆ میسر و رابیعە دەڕێژن چۆن دەبێ ھەست بە ئازاری دایکێکی جەرگ سووتاوی رۆبۆسکێ نەکەن. ئەمە نیشانی دەدا ئەو کەسانە ھیچ دڵسۆز نین."
هاوکات سەزگین تانرکولو، یاریدەدەری سەرۆکی گشتیی CHP نیگەرانیی خۆی دەرخست بۆ ئەوەی تا ئێستا لەبارەی ئەو رووداوە خوێناوییە ھیچ ئەنجامێک دەرنەکەوتووە، تانرکولو گوتی "بۆ ئەم پرسە تا ئێستا ھیچ چارەسەرێ نەدۆزراوەتەوە ٦٢٥ رۆژە رووداوەکە قەوماوەو ئەنجامدەرانیش دەستگیر نەکراون. ئەگەر حکومەت بیوستایە لە١٥ رۆژدا دەیتوانی ئەنجامدەران دەستگیر بکا، بەڵام ھەموو کەس دەزانێ کاتێ دز لە ماڵەوەبێ پێویستی بە کلیل نییە. لەبەر ئەوە ئەنجامدەران لەناو ماڵن. ھەمووان داوا لە حکوومەت دەکەن بە زووترین کات ئەنجامدەران دەستگیر بکرێن و ئاشتی بێتە ئاراوە."
شرنەخ - AA
14/09/2013
ویلایه‌ته یه‌كگرتووه‌كانی ئه‌مریكا چاره‌سه‌ری سیاسی ئاشتیانه به باشترین رێگا بۆ قه‌یرانی سوریا ده‌زانێت‌و هه‌رچه‌نده جه‌خت له‌سه‌رئه‌وه ده‌كاته‌وه رژێمی سوریا چه‌كی كیمیاوی به‌كارهێناوه.
له شاری جنێفی سویسرا گفتوگۆكانی نێوان وه‌زیرانی ده‌ره‌وه‌ی ئه‌مریكا و روسیا له‌باره‌ی ده‌ستپێشخه‌رییه‌كه‌ی روسیا بۆ چاودێریكردنی چه‌كه كیمیاوییه‌كانی سوریا ده‌ستیپێكردو هه‌ردولاش هیواخوازن گفتوگۆكان بگه‌نه ئه‌نجام له پێناو دووركه‌وتنه‌وه له رێگا چاره‌ی سه‌ربازی.
جۆن كیری- وه‌زیری ده‌ره‌وه‌ی ئه‌مریكا رایگه‌یاند،گه‌یشتن له چاره‌سه‌ری ئاشتیانه له سوریا باشتره له چاره‌سه‌ری سه‌ربازی، وتیشی “رژێمی سوریا له رووبه‌رێكی فراواندا چه‌كی كیمیاوی به‌كارهێناوه‌و رێگاناده‌ن جارێكی دیكه دووباره ببێته‌وه”.
له‌لایه‌كی تره‌وه به‌شار جه‌عفه‌ری- نوێنه‌ری سوریا له نه‌ته‌وه‌یه‌كگرتوه‌كان رایگه‌یاند، وڵاته‌كه‌ی بۆته ئه‌ندامی په‌یماننامه‌ی قه‌ده‌غه‌كردنی چه‌كی كیمیاوی، ئه‌وه‌ش به یه‌كه‌م هه‌نگاوی رژێمی سوریا داده‌نرێت بۆ خۆ به‌دوورگرتن له هێرشه سه‌ربازییه‌كه‌ی ئه‌مریكا.
له‌چه‌ند رۆژی رابردودا به مه‌به‌ستی رێگرتن له هێرشی سه‌ربازی بۆ سوریا، حكومه‌تی روسیا پرۆژه‌یه‌كی ئاماده كردوه كه تێیدا داوای كرد چه‌كه كیمیاییه‌كانی سوریا بخرێنه ژێر كۆنترۆڵی كۆمه‌ڵی نێوده‌وڵه‌تی و رژێمه‌كه‌ی ئه‌سه‌د، توانای به‌كارهێنانیانی نه‌بێت، ئه‌و پێشنیازه‌ش له لایه‌ن ئه‌مریكا و سوریاوه پێشوازی لێكرا.
باراك ئۆبامای سه‌رۆكی ئه‌مریكا رایگه‌یاند، به گومانێكی قوڵه‌وه پێشوازی له پرۆژه‌كه‌ی روسیا ده‌كات و ئه‌گه‌ر رژێمه‌كه‌ی ئه‌سه‌د ئاماده بێت چه‌كه كیمیاییه‌كانی راده‌ستی كۆمه‌ڵی نێوده‌وڵه‌تی بكات، ئه‌وا ئه‌مریكاش له بڕیاری هێرشی سه‌ربازی پاشگه‌ز ده‌بێته‌وه.
وه‌لید موعه‌لمی وه‌زیری ده‌ره‌وه‌ی سوریاش، پێشوازی له پرۆژه‌كه‌ی روسیا كرد و رایگه‌یاند، پرۆژه‌كه‌ی روسیا، وڵاته‌كه‌ی له گورزی سه‌ربازی رزگار ده‌كات.
رێكخراوی چاودێری مافی مرۆڤ هیومان رایتس وۆچ سێشەمەی رابردوو 10/9 لەڕێگەی بڵاوكردنەوەی راپۆرتێكەوە دوا بزماریدا لەتابوتی رژێمی سوریا ئەویش بەئاشكراكردنی بەكارهێنانی چەكی كیمیایی دژ بەهاوڵاتیانی مەدەنی.
هیومان رایتس وۆچ رایگەیاند «دوای لێكۆڵینەوەیەكی ورد لەسەر دوو هێرشی كیمیایی بەرەبەیانی رۆژی 21ی ئاب لەسەر رۆژهەڵات‌و رۆژئاوای ناوچەی گوتەی سەر بەدیمەشقی پایتەخت بۆیان دەركەوتوە كە سوپای رژێمی سوریا بۆمبی هەڵگری كڵاوەی كیمیاییان لەو ناوچانەدا تەقاندوە«، دوابه‌دوای ئه‌وه‌ش ئه‌مریكا‌و چه‌ند وڵاتێكی هه‌ڕه‌شه‌ی وه‌شاندنی گورزی سه‌ربازییان كرد له‌سوریا.
hawlati
13/09/2013
نێچیرڤان بارزانی سه‌رۆکوه‌زیرانی هه‌رێمی کوردستان ئێوارەی دوێنێ پێشوازی له خانه‌واده‌ی شاعیری گه‌وره‌ی کورد خوالێخۆشبوو مامۆستا شێرکۆ بێکه‌س کرد .
له دیدارێکدا خانه‌واده‌ی مامۆستا شێرکۆ بێکه‌س؛ سوپاس و پێزانینی خۆیان پێشکه‌ش به نێچیرڤان بارزانی کرد بۆ به‌پیره‌وه‌چوون و به‌سه‌رکردنه‌وه و له‌ئه‌ستۆگرتنی چاره‌سه‌ری و سازدانی ڕێوڕه‌سمی پێشوازی و هێنانه‌وه‌ی ته‌رمه‌که‌ی بۆ کوردستان و ئه‌م هه‌ڵوێسته‌یان به وه‌فا و ئه‌مه‌کداری بۆ خه‌بات و ماندووبوون و به‌رهه‌م و پێگه‌ی مامۆستا شێرکۆ بێکه‌س له قه‌له‌م دا.
لای خۆیه‌وه سه‌رۆکوه‌زیرانی هەرێمی کوردستان دووباره پرسه و سه‌ره‌خۆشی پێشکه‌ش به خانه‌واده‌ی به‌ڕێزیان کرد و ڕایگه‌یاند: " که مامۆستا شێرکۆ بێکه‌س مرۆڤێکی مه‌زنی کورد و موڵکی هه‌موو خه‌ڵکی کوردستانه، بۆیه هه‌رچییه‌کی بۆ کراوه، به ئه‌رکی خۆمانی ده‌زانین و ناکاته تۆزقاڵێک له‌و خزمه‌ته مه‌زنه‌ی که مامۆستا شێرکۆ بێکه‌س بۆ گه‌ل و ووڵاته‌که‌ی و بۆ مرۆڤایه‌تی کردوویه‌تی".
ئاماژه‌یشی به‌وه دا که مامۆستا شێرکۆ بێکه‌س به شیعر و ووشه و دیوان و به‌رهه‌م و کتێبه‌کانی؛ تا هه‌تایه به نه‌مری و زیندوویی ده‌مێنێته‌وه و هه‌موو خه‌ڵکی کوردستان له هه‌موو به‌شه‌کانی کوردستان شانازی پێوه ده‌که‌ن. پشتگیریی خۆیشی بۆ بیرۆکه‌ی کردنی ماڵه‌که‌ی مامۆستا شێرکۆ بێکه‌س له سلێمانی به مۆزه‌خانه‌یه‌ک که که‌لوپه‌له‌کانی تیادا نمایش بکرێت ده‌ربڕی و ئاماده‌یی بۆ هه‌ر هاوکارییه‌ک بۆ سه‌رخستنی ئه‌م پڕۆژه‌یه نیشان دا.
له کۆتایی دیداره‌که‌دا، دوو به‌رگی بیره‌وه‌رییه‌کانی مامۆستا شێرکۆ بێکه‌س له لایه‌ن خانه‌واده‌که‌یه‌وه به دیاری پێشکه‌ش به نێچیرڤان بارزانی کران.
د.ع
13/09/2013
بڕیارە هوشیار زێباری وەزیری دەرەوەی عێراق هەفتەی داهاتوو لەسەر بانگهێشتانەمەیەکی فەرمی تورکیا سەردانی ئەو وڵاتە بکات.
ئوسامە نوجێفی سەرۆکی پەرلەمانی عێراق کە ئێستا لەسەردانێکدایە بۆ تورکیا لە لێدوانێکی رۆژنامەوانیدا رایگەیاند: " هەفتەی داهاتوو وەزیری دەرەوەی عێراق سەردانی تورکیا دەکات بەمەبەستی گفتوگۆکردن لەگەڵ بەرپرسانی تورکیا".
بەپێی چەند سەرچاوەیەکی ئاگادار زیباری لەمیانەی سەردانەکەا بۆ تورکیا چاوی بە ژمارەیەک بەرپرسی تورک دەکەوێت لەپێشەوەی هەموویان ئەحمەد داود ئۆغلۆ وەزیری دەرەوەی ئەو وڵاتە بۆ گفتوگۆکردن سەبارەت بە چۆنێتی پەرەپێدان و پێشخستنی پەیوەندییەکان نێوان هەردوو وڵات.
سەرچاوەکان ئاماژەیان بۆ ئەوەش کردووە کە وەزیری دەرەوەی تورکیان بەنیازە لە داهاتوودا سەردانی بەغداد بکات بەمەبەستی پتەوکردنی پەیوەندیەکانی نیوان هەردوولا.
جێگەی ئاماژە پێکردنە ئوسامە نوجێفی سەرۆکی ئەنجومەنی نوێنەرانی عێراق چوارشەممەی رابردوو بەسەردانێک گەیشتە تورکیا و لەگەڵ رەجەب تەیب ئۆردۆغان سەرۆکوەزیرانی تورکیا کۆبووە.
pna
13/09/2013
هێرۆ ئیبراهیم ئەحمەد لێپرسراوی مەڵبەندی یەكی ڕێكخستنی سلێمانی یەكێتی داوا لەدامودەزگا پەیوەندیدارەكان دەكات لێكۆڵینەوەی جددی و ئیجرائاتی یاسایی وورد لەڕووداوەكانی تەقەكردن و كوژرانی “ڕوپاك عومەر” ئەنجامبدەن و سزایی سەرپێچیكار و تاوانباران بدەن .
شەوی رابردو 10/9 لەشەقامی توی مەلیكی سلێمانی لەكاتی بانگەشەی لایەنگرانی یەكێتی‌و گۆڕان، روپاك (50ساڵ) بەفیشك برینداركرا، بەرەبەیانی ئەمڕۆ بەهۆی سەختی برینەكەیەوە گیانی لەدەستدا.
ئێوارەی ئەمرۆ لیژنەی ئەمنی پارێزگای سلێمانی رایگەیاند هێزەكانی بەڕێوەبەرایەتی ئاسایش گۆمانلێكراوێكیان بەتۆمەتی ئەنجامدانی تاوانی كوشتنی روپاك عومەر دەستگیركردوە‌و لەسەر فەرمانی دادوەر، رادەستی بەڕێوەبەرایەتی پۆلیسی سلێمانی كراوە.
هێرۆ ئیبراهیم ئەحمەد لەبەیاننامەیەكدا نیگەرانی خۆی لەوە نیشانداوە “ماوەی چەند ڕۆژێكە هەڵمەتی بانگەشەی هەڵبژاردن لەناوچە جیاجیاكانی هەرێم بەگشتی و لەچەند شەقامێكی شاری سلێمانی بەتایبەتی پێكهەڵپژان و بەریەككەوتن و لەوەش ناخۆشتر ڕووداوی تەقەكردن لەنێوان هەوادارن و لایەنگرانی لایەنەكان لێكەوتۆتەوە”.
هێرۆ ئیبراهیم داواش لەدەزگا ئەمنییەكانی پۆلیس و ئاسایش لەهەوڵدانیان بۆ پاراستنی هێمنی و ئاسایشی شار و پاراستنی گیانی هاوڵاتیان بەردەوام بن و چاوكراوەتر ئەركەكانیان ڕابپەڕێنن.
لیژنەی ئەمنی سلێمانی ئاماژە بەوەكرد گومانلێكراوەكە ناوی “سوارە عبدالـلە سەعید” ناسراوە بەسوارەی عەبە هەرەمە‌و لێكۆڵینەوەی لەگەڵدا دەكرێت تا بەپێی یاسا مامەڵەی پێویستی لەگەڵدا بكرێت.
hawlati
12/09/2013
كۆماری ئیسلامیی ئێران كۆمەڵێك گۆڕانكاریی لە كەرتی پیشەسازیی نەوت ئەنجامداوەو لەسەرووی هەمووشیان سەرۆكی كۆمپانیای نیشتیمانی نەوتی ئەو وڵاتەی گۆڕیوە.
ماڵپەری فەرمی وەزارەتی نەوتی ئێران (شانا) بڵاویكردووەتەوە "بیژەن زەنگەنە، وەزیری نوێی نەوت بڕیاریداوە روكن دین جەوادی وەكو سەرۆكی كۆمپانیای نەوتی نیشتیمانی لەجێگەی ئەحمەد قەڵعەبانی دەستبەكار بێت".
هاوكات جەوادی لەلایەن خۆیەوە جێگرێك و هەشت ئەندامی نوێی ئەنجوومەنی كارگێڕی ئەو كۆمپانیایەی دامەزراندووەو پرۆسەكانیش لە چوارچێوەی گۆڕانكارییەكانی كەرتی وزەدا هاتووە.
زۆربەی ئەو بەرپرسانەی لە پۆستەكانیان لادراون، لە حكومەتی مەحمود ئەحمەدی نەژاد، سەرۆكی پێشووتر دەستبەكار ببوون.
لەم هەفتەیەشدا حەمید رەزا ئاراكی، وەزیری حكومەتەكەی رۆحانی ئەندامێكی وەكو جێگرەوەی جەواد ئەوجی، سەرۆكی كۆمپانیای غازی نیشتیمانی دامەزراندووە.
ماڵپەری شانا ئاماژەی بەوەشكردووە "بڕیاردراوە عەباس شەری مقەدم، وەكو سەرۆكی كۆمپانیای پیترۆكیمیایی نیشتیمانی دابمەزرێت و جێگەی عەبدولحوسێن بەیات بگرێتەوە".
لەماوەی سەرۆكایەتی محەممەد خاتەمی، سەرۆكی پێشووتری ئێران، جەوادی بەڕێوەبەری كۆمپانیای ئەندازیاری‌و بەڵێندەرایەتی پیشەسازیی نەوت بووەو سەرۆكی كۆمپانیای غازی نیشتیمانی بووە، كەئەو كات زەنگەنە وەزیری نەوت بوو.
ئێران بە چوارەم وڵاتی گەورە یەدەگی جیهانی دادەنرێت لەبوونی نەوتداو گەورە یەدەگی غازی سر‌ووشتیشی زۆرترە، بەڵام بەهۆی سزای نێودەوڵەتییەوە هەناردەكردنی نەوت رێگر بووە لە بو‌وژانەوەی كەرتی غازی سر‌ووشتی.
12/09/2013
مەسعود بارزانی، سەرۆكی پارتی دیموكراتی كوردستان لە وتارێكدا باس لە ئامانجی دامەزراندنی پارتی و ئامادەكارییەكانی بۆ هەڵبژاردنی داهاتوو دەكات. لە بەشێكی ئەو وتارەدا بەس لە هەڵدانەوەی پەڕەی كۆن دەكات و دەڵێ "ئەگەر ناچاركراین پارتی شتی زۆری لەبەر دەستدایە".
وتارەكەی بارزانی لەمیانی كۆبوونەوەیەكیدا هات لەگەڵ رێكخراوە جەماوەرییەكانی قوتابیان و لاوان و ئافرەتان و رێكخراوە پیشەییەكانی پارتی.
لە بەشێكی وتارەكەیدا ئاماژەی بە هەڵدانەوەی لاپەڕەكانی مێژوو كرد و رایگەیاند كە حیزبەكەی لە رابردووی خۆی ناترسێ و گوتی: "پارتی لە رابردوو ناترسێ و هەرچیمان كردووە بە قەناعەتەوە كردوومانە و وەكو هەمیشە دووپاتی لێدەكەمەوەو دەیڵێمەوە ئێمە بە چاوی بەستراو فیشەك ناتەقێنین ، هەرچی كردوومانە بە قەناعەت بووە جا تێیدا سەركەوتوو بووبین یان نا و لە هیچ شتێكیش پەشیمان نین".
مەسعود بارزانی دەشڵێت "لە هەركوێ هەڵەمان كردبێت، دانمان پێداناوەو لە هەرشتێك پێویست بێت ئێمە داوای لێبووردنمان لە خەڵكی خۆمان و میللەتی خۆمان كردووە".
بارزانی رووی قسەكانی كردە ئەندامانی بەشداربووی كۆبوونەوەكەو گوتی "دەڵێم ئێوە كاتی خۆتان بەم شتانەوە مەكوژن، بەڵام ئەگەر ناچاركراین ئەوا پارتی شتی زۆری لەبەردەستدایە".
مەسعود بارزانی درووشمی حیزبەكەی بۆ هەڵبژاردنی پەرلەمانی كوردستان پێ جوانەو دەڵێت "بەڕاستی ئەو دروشمە (بەرەو كوردستانێكی گەشتر) زۆر جوانە".
سەرۆكی پارتی دیموكراتی كوردستان دڵنیایی خۆی لە بردنەوەی پارتەكەی لە هەڵبژاردنی پەرلەمانی كوردستان كە لە 21-9-2013دا بەڕێوەدەچێت خستەڕوو و گوتی: "من دڵنیام تەنیا پارتییەكان خۆیان و ماڵ و منداڵیان بچنە دەنگدان پارتی دەیباتەوە".
rudaw
11/09/2013
دواخستنی کۆنگرەی نەتەوەیی کورد لەبەر 3 هۆکار دواکەوت. دوو لەو هۆکارانەش پەیوەندیی بە ناکۆکیی نێوان لایەنەکانەوە هەبووە. ئەندامێکی لێژنەی ئامادەکاری کۆنگرەکەش دەڵێت: "پارتی کرێکارانی کوردستان PKK، هۆکاری سەرەکی بووە کە تاوەکو ئێستا لەسەر چەندین بابەت نەگەیشتووینەتە ئەنجام". دوایین هۆکاریش کە بووە هۆی دواخرانی کۆنگرەکە، هەڵبژاردنەکانی پەرلەمانی کوردستان بوو.
رۆژی 3/9/2013، لێژنەی ئامادەکاری کۆنگرەی نەتەوەیی کورد، کە لە 21 ئەندام پێکهاتووە، کۆبوونەوە. چاوەڕوانکراو بوو کە لەو کۆبوونەوەیەدا بڕیاری دواخستنی کۆنگرەی نەتەوەیی بدەن، ئەوان پێشتریش کۆنگرەکەیان دواخستبوو بۆ رۆژی 15/9/2013، بەڵام ئەمجارە رێککەوتن لەسەرئەوەی کە دوابخرێت بۆ رۆژی 25/11/2013.
ئەندامانی کۆنگرە باسی هۆکارەکان و تەگەرەکانی بەردەم دواخستنی کۆنگرەی نەتەوەیی کورد دەکەن، کە رەنگە لەو ماوەیەی بۆشی درێژکراوەتەوە هەر نەکرێت.
ئەمە لەکاتێکدایە کە لێرە و لەوێ گوترا مەسعود بارزانی، سەرۆکی هەرێمی کوردستان، کە کۆنگرەکە لەژێر چاودێریی ئەودا دەبەسترێت، داوای دواخستنی کۆنگرەکەی کردبێت. بەڵام فوئاد حوسێن، سەرۆکی دیوانی سەرۆکایەتی هەرێمی کوردستان، رەتیکردەوە بارزانی داوای دواخستنی کۆنگرەکەی کردبێ و بە (رووداو)ی گوت "سەرۆک بارزانی نە لە دوور و نە لە نزیک پێشنیازی وای نەکردووە". تەنانەت "تاوەکو ئێستاش ئەو بابەتەی بەتەواوەتی بۆ لێژنەکە بەجێهێشتووە و دەستتێوەردانی نەکردووە لە کارەکانی لێژنەکەدا". بەپێی زانیارییەکانی (رووداو)یش، کەمال کەرکووکی، ئەندامی سکرتاریەتی لێژنەی ئامادەکاری کۆنگرەی نەتەوەیی کورد، بە راپۆرتێک وردەکارییەکانی هۆی دواخستنی کۆنگرەکەی بۆ بارزانی روون کردووەتەوە.
بەڵام ئەندامێکی لێژنەی ئامادەکار هۆکاری راستەقینەی دواخستنی کۆنگرەکە ئاشکرادەکات. رەزا کەعبی سەرەڕای ئەوەی کە رەتیکردەوە بارزانی داوای پاشخستنی کۆنگرەکەی کردبێت، بە (رووداو)ی گوت "تاوەکو ئێستا 3 بابەتی سەرەکی ماون کە دەبێ لەسەری رێکبکەون، ئەویش مەسەلەی دابەشکردنی ئەندامانی کۆنگرەیە بەسەر هەر چوار پارچەی کوردستاندا، دووەم: سەرۆکایەتیی کۆنگرە، سێیەمیش: کۆنگرە دوای خۆی چی بەجێدەهێڵێت و چۆن دەبێت".
بەرپرسیکی ئاگادار لە کۆماری ئیسلامی ئێران، کە پێی باش نەبوو ناوی بڵاوبکرێتەوە، لەوبارەوە بە (رووداو)ی گوت "ئیستا لەنێو ئێراندا دوو بۆچوون هەن، بۆچوونێک لەگەڵ ئەوەدایە کە بەشداری لەو کۆنگرەیەدا بکەن و بۆچوونێکی دیکە تووندڕەون و دژی ئەو بەشدارییەن. تاوەکو ئێستاش یەکلایی نەبووەتەوە کە ئاخۆ ئێران بەشداری لەو کۆنگرەیەدا دەکات یان نا".
ئەو بەرپرسە روونیشیکردەوە کە "تەرەفی یەکەمی حکومەتی ئێران کە لەگەڵ بەشداری ئێراندایە لەو کۆنگرەیەدا، دەڵێن کۆنگرەکە هەر دەبەسترێ و دەبێتە ئەمری واقیع، بۆیە بەشداربن باشترە لەوەی رەتی بکەنەوە".
هەرچەندە دەگوترێت ئێران و تورکیاش رۆڵی سەرەکییان هەبووە لە دواخستنی کۆنگرەدا و کار لەسەر ئەوە دەکەن کە هەر نەکرێ، بەڵام کەعبی، کە بە نوێنەرایەتیی کۆمەڵەی زەحمەتکێشانی کوردستان ئەندامە لە لێژنەی ئامادەکاریدا دەڵێت "ئەوەش راست نییە کە بگوترێت دەوڵەتان هیچ کاریگەرییان نەبووە لەسەر دواخستنی کۆنگرە".
هەروەها خەلیل ئیبراهیم، ئەندامی لێژنەی ئامادەکاری کۆنگرەی نەتەوەی کورد، بە (رووداو)ی گوت "کاتێک باسی دواخستنی کۆنگرەکە کرا، کاک سەعدی پیرە گوتی با کەس وای لێکنەداتەوە کە ئەو کۆنگرەیە لەسەر داوای دەوڵەت و کەسێک دوادەخرێت، ئەوە تەنیا مەسەلەی هەڵبژاردەنەکانی پەرلەمانی کوردستانە کە وادەکات ئەو داوایە پێشکەش بکەن، نەک زیاتر".
پێشئەوەی بڕیار لەسەر دواخستنی کۆنگرە بدرێت، لێژنەی ئامادەکاری کۆنگرە لەسەر چەند بابەتێکی گرنگ نەگەیشتبوونە ئەنجام، کە ئەو ماوەی لەپێشیان مابوو بۆ بەڕێوەچوونی کۆنگرەکە کەم بوو و نەیانتوانی لەو ماوەیەدا کێشەکان چارەسەر بکەن.
ئەندامێکی لێژنەی ئامادەکاری کۆنگرە لەوبارەوە بە (رووداو)ی گوت "ئەجێندای کۆنگرە لەنێو لێژنەی ئامادەکاریدا بە ئاسایی تێپەڕی، بەڵام کاتێک باسەکە گەیشتە سەر دابەشکردنی ئەندامانی کۆنگرە و چۆنیەتی داڕشتنی مۆدێلی کۆنگرە، مەسەلەکە لەنێو ئەندامانی لێژنەکەدا تەقییەوە و نەگەیشتنە ئەنجام". ئەو ئەندامە گوتی "نەک نەگەیشتنە ئەنجام، بگرە ناکۆکیش دروست بووە و ئەگەر بەو شێوەیە بڕوات رەنگە ناکۆکییەکان قووڵتر ببنەوە". رەزا کەعبیش باسی ئەو کێشانەی کرد کە بوونەتە هۆی دواخستنی کۆنگرەکە و گوتی "تەنیا 2 هۆکار هەبوون بۆ دواخستنی کۆنگرە، یەکەم:ئامادەکاریی باش بکرێ بۆ بەستنی کۆنگرە، دووەم: هەڵبژاردنی پەرلەمانی کوردستانمان لەپێش بوو".
تاوەکو ئێستا گەورەترین ئاستەنگ لەبەردەم لایەنەکاندا چۆنیەتی دابەشکردنی ئەندامانی کۆنگرەیە بەسەر پارچەکانی کوردستاندا، کە ژمارەیان 600 ئەندامە.
هەروەها مۆدێلی کۆنگرە، کە ئەویش کۆنگرەکە چۆن بێ و دەزگاکە چی بێت و بڕیار و راسپاردەکانی کۆنگرە چی بن و دوای تەواوبوونی کۆنگرەکەش بڕیارەکان چۆن جێبەجێ بکرێن، ئاستەنگێکی دیکەیە.
بەپێی زانیارییەکانی (رووداو)، لە کۆبوونەوەی لێژنەی ئامادەکاری کۆنگرەدا 2 پێشنیازیان خستووەتەڕوو بۆ دواخستنی کۆنگرە. پێشنیازێک هەبوو کە لە 17/10/2013 بکرێت و پێشنیازێکیش هەبوو بۆ 25/11/2013.
دواتر پێشنیازەکان خرانە دەنگدانەوە و دووەمیان قبووڵکرا، چونکە گوترا هەڵبژاردنی ئەنجومەنی پارێزگاکانیش لەپێشە، با بکەوێتە دوای ئەو هەڵبژاردنانەش. خەلیل ئیبراهیم، کە نوێنەری (کۆمەڵ و یەکگرتوو)یە لە لێژنەی ئامادەکاری کۆنگرەدا، لەسەر هەڵوێستی PKK گوتی "لایەنەکانی دیکە و بەتایبەت برادەرانی PKK پێشنیازی دواخستنی کۆنگرە و هۆکارەکانیان قبوڵکرد".
11/09/2013
باراك ئۆباما، سەرۆكی ویلایەتە یەكگرتووەكانی ئەمریكا لە نامەیەكدا بۆ ئایەتوڵڵا خامنەیی، رابەری ئێران، داوای باشتركردنی پەیوەندییەكانی نێوان هەردوو وڵات دەكات‌و 4 پێشنیازی نوێی خستووەتەڕوو.
بەپێی هەواڵێكی رۆژنامەی (ئەلحەیات)ی چاپی لەندەن، ئۆباما لە رێگەی سوڵتان قابوس، پاشای عەممان نامەیەكی ئاڕاستەی خامنەیی كردووە و تێیدا چوار خاڵ خراونەتەڕوو.
لە یەكەم خاڵی نامەكەدا، سەرۆكی ویلایەتە یەكگرتووەكانی ئەمریكا رێزگرتنی واشنتۆنی لە ئەنجامی هەڵبژاردنەكان خستووەتەڕوو. لە خاڵی دووەمدا، ئۆباما ئامادەیی وڵاتەكەی بۆ كەمكردنەوەی گەمارۆ ئابوورییەكانی دژی ئێران خستووەتەڕوو.
خاڵی سێیەم و چوارەمی نامەكەی ئۆباما جەخت لە گرینگی هەڵوێستی ئەرێنی ئێران لە وتووێژە ئەتۆمییەكانی لەگەڵ وڵاتانی 5 كۆ یەك كردووەتەوە، هەروەها ئامادەیی ئەمریكای بۆ وتو‌وێژی راستەوخۆ لەگەڵ ئێراندا نیشانداوە.
هەرچەندە تاوەكو ئێستا بەرپرسانی ئێرانی هەواڵی گەیشتنی ئەو نامەیەیان پشتڕاست یاخود رەتنەكردووەتەوە، لەهەمانكاتیشدا هیچ وەڵامێك بۆ نامەكە نییە.
11/09/2013
ورمێ لە دوای كرماشان، دووەم شاری گەورەی رۆژهەڵاتی كوردستانە. ژمارەی دانیشتووانەكەی نزیكەی یەك ملیۆن كەسە و جگە لە كورد، ئازەری، ئاشووری و ئەرمەنیشی لێ نیشتەجێن، بەڵام تا ئێستا هیچكام لە پۆستەكانی پارێزگار، قایمقام یان شارەوانی شاری ورمێ بە كورد نەدراوە.
پارێزگار و قایمقام لەلایەن وەزارەتی نێوخۆی ئێران و بە هاوئاهەنگی دامەزراوە ئەمنی و سەربازییەكان دەستنیشان دەكرێن، بەڵام شارەوانی لە لایەن ئەنجوومەنێك دیاری دەكرێ كە پێشتر بەشێوەی راستەوخۆ لەلایەن خەڵكەوە هەڵبژێردراوە.
تا ئێستا چوار خولی هەڵبژاردنەكانی ئەنجوومەنی شار و گوندەكان بەڕێوەچووە. لە خولی یەكەمی ئەو هەڵبژاردنەدا هیچكام لە 9 ئەندامەكەی ئەنجوومەنی شاری ورمێ كورد نەبوون، بەڵام لە خولی دووەمدا دوو كەسیان كورد بوون. هەروەها لە خولی سێیەم كە بەشداری خەڵكی كورد لەو هەڵبژاردنەدا بەرچاو بوو، 5 ئەندامی ئەنجوومەنی ئەو شارە لە پاڵێوراوانی كورد هەڵبژێردران. بۆ خولی چوارەمی ئەنجوومەنی شارەكانیش، ژمارەی ئەندامانی ئەو ئەنجوومەنە لە شاری ورمێ بۆ 15 كەس بەرز كرایەوە، بەڵام تەنیا سێ پاڵێوراوی كورد دەنگیان هێنا.
عادل فەتاحی كە لە سێ خولی رابردووی ئەنجوومەنی شاری ورمێدا ئەندام بووە، لە بارەی پێدانی پۆستی شارەوانی ورمێ بە كورد بە (رووداو)ی گوت "تا ئێستا هیچكات شارەوانی لەنێو پێكهاتەی كورد هەڵنەبژێردراوە. تەنیا یەك جاریش كەسێكی كورد هەوڵی داوە ئەو پۆستە وەربگرێت كە پێی نەدرا".
ئەو ئەندامە كوردەی ئەنجوومەنی شاری ورمێ بۆ هەڵبژاردنی شارەوانی داهاتووی ئەو شارەش، پشتگیری لە هەڵبژاردنەوەی شارەوانی ئێستا دەكات كە لە پێكهاتەی ئازەری ئەو شارەیە.
تائێستا، زۆربەی پۆستە ئیداری و سیاسییەكانی ئەو شارە بەپێكهاتەی ئازەری سپێردراوەو لایەنەكانی دیكە و بەتایبەت كورد لێی بێبەشكراون. هەژار ئاریانفەر، چالاكوانی كلتووری و مەدەنی نیشتەجێی ورمێ پێیوایە، ئازەرییەكان بەهۆی تێكەڵاوی زیاتریان لەگەڵ دەسەڵاتی ناوەندی لە تاران و هەروەها باوەڕیان بە مەزهەبی فەرمیی ئێران، واتە شیعەی دوازدە ئیمامی، دەرفەتی زیاتریان لەنێو سیستەمی ئیداری، سیاسی، كلتووری و ئابووری شارەكە پێدەدرێت. لە درێژەشدا دەڵێت "لەم هەلومەرجەی ئێستادا رێگە بە‌كورد نادرێ لە ورمێ ئەو پۆستانە وەربگرێت".
عادل فەتاحی لەبارەی كار و چالاكییە كلتووری و ئەدەبییەكانی چالاكوانانی كورد لە ورمێ، دەڵێت رێگرییان لێ ناكرێ "ئەگەر لە چوارچێوەی یاسا و رێساكانی حكومەتدا بجوڵێنەوە دەتوانن هەر كارێك بكەن".
هەژار ئاریانفەر بە ئاماژەدان بەوەی لە ماوەی رابردوودا تەنیا رێكخراوی كلتووری- ئەدەبی ئەو شارە بەنێوی (ئینستتیوتی ئەحمەدی خانی) لەلایەن هێزە ئەمنییەكانەوە داخراوە، دەڵێت "چالاكوانانی كورد لە ورمێ بۆ وەرگرتنی مۆڵەتی یاسایی بڵاوكردنەوەی رۆژنامەو گۆڤار یان ئەنجامدانی چالاكی كلتووری و هونەری تووشی كێشەی زۆر دەبن و زۆرجاریش رێگرییان لێدەكرێت".
ئەندامەكەی ئەنجوومەنی شاری ورمێ گلەیی لەوەش دەكات كە تا ئێستا هیچ چالاكوان یان دامەزراوەیەكی كوردی داوای لێنەكردوون بۆ وەرگرتنی مۆڵەتی گۆڤار یان چالاكی كلتووری و هونەری، تاوەكو یارمەتییان بدات، بەڵام ئاریانفەر، ئەندامی دەستەی بەڕێوەبەری ئینستتیوتی خانی دەڵێت "بەرپرسانی كورد لەئەندامانی كوردی ئەنجوومەنی شاری ورمێوە بگرە تا نوێنەری كوردی ئەو شارە لە پەرلەمانی ئێران، بۆ برەودان بە كلتوور و هونەری كوردی هیچ هاوكارییەكمان ناكەن".
سەبارەت بە داخرانی ئینستتیوتی ئەحمەدی خانیش، عادل فەتاحی دەڵێت، ناكرێ ناوەندێك كە پشتگیری خەڵكی لە پشتە، بەهۆی چالاكی كلتووری و ئەدەبی دابخرێت و ئاماژە بەوە دەكات كە لە داهاتوودا بە هاوكاری لەگەڵ كاربەدەستانی دیكەی كورد، هەوڵدەدات دووبارە دەرگای ئەو ناوەندە بكرێتەوە. مەرجی ئەوەش بۆ بەرپرسانی ئەو ئینستتیوتە دادەنێ كە بەخۆیاندا بچنەوە و لەگەڵ ناوەندە حكومییەكان هاوئاهەنگ بن.
ئەندامەكەی دەستەی بەڕێوەبەری ئینستتیوتی ئەحمەدی خانی جەخت لەسەر ئەوە دەكاتەوە كە ئەوان لە چوارچێوەی برەودان بە كلتوور و هونەری كوردی بەشێوەی ئاشكرا چالاكییان كردووە و پێیوایە كە كێشەكانی ئینستتیوتی خانی لەڕێگای ئاسانكاری و پێوەندی نوێنەرانی ئەو شارە چارەسەر نابێ، بەڵكو لەڕێگەی قسەكردن لەگەڵ بەرپرسانی وەزارەتی رێنوێنی ئیسلامی (ئیرشادی ئیسلامی) ئاكامی دەبێت و ئەگەری كرانەوەی دەرگای ئەم ئینستتیوتەش لە ئارادایە".
10/09/2013
وەزیرانی دەرەوەی سووریا و رووسیا داوایان لە لێکۆڵەرەوانی نەتەوە یەکگرتووەکان کرد، جارێکی دیکە سەردانی سووریا بکەنەوە و بەردەوام بن لە لێکۆڵینەوەکانیان سەبارەت بە بەکارهاتنی چەکی کیمیایی لە سووریا و هۆشداریاندایە واشنتن، کە هیچ جوڵەیەکی سەربازی نەکاتە سەر ئەو وڵاتە.
ئەم هۆشداریانە دوای لێدوانەکانی باراک ئۆباما، سەرۆکی وڵاتە یەکگرتووەکانی ئەمریکا دێت، کە روونی کردەوە "ناردنی هێزی سەربازی بۆ سووریا زۆر گرنگە بۆ سزادانی ئەسەد دوای بەکارهێنانی چەکی کیمیایی دژ بە هاووڵاتیان سیڤیل".
حکومەتی سووریا سوورە لەسەر ئەوەی، کە چەکی کیمییای بەکار نەهێناوە، بەڵکو ئۆپۆزیسیۆنی چەکدار بەکاری هێناوە.
هەریەکە لە سێرجی لاڤرۆڤ، وەزیری دەرەوەی رووسیا و وەلید موعەلیم، وەزیری دەرەوەی سووریا هاوڕابوون لەسەر ئەوەی، "تیمی لێکۆڵینەوەی نەتەوە یەکگرتووەکان پێویستە دووبارە بێن و لە لێکۆڵینەوەکانیان بەردەوام بن سەبارەت بە بەکارهێنانی چەکی کیمییایی لە سووریا و بەڵگەکان پێشکەش بەرای گشتی بکەن بۆ ئەوی لێیان دڵنیابین".
لاڤرۆڤ گوتی" ئێمە هەوڵێکی جددی دەدەین لەبارەی هێنانەوەی تیمی لێکۆڵینەوەی نەتەوە یەکگرتووەکان بۆ سووریا بۆ تەواوکردنی لێکۆڵینەوەکان".
هەروەها وەزیری دەرەوەی رووسیا رایگەیاند، ولاتەکەی بەردەوامدەبێت لە هەوڵەکانی بۆ دۆزینەوەی چارەسەرێکی ئاشتیانە، لەوانەشە بتوانین هەموو لایەنەکانی ئۆپۆزیسیۆن کۆبکەینەوە و بە ئاشتییانە کۆتایی بەم تەنگژەیە بهێنین.
10/09/2013
ئەمڕۆ نێچیرڤان بارزانی، سەرۆکی حکومەتی هەرێمی کوردستان، بە ئامادەبوونی وەزیری پەروردە و کاربەدەستانی پەروەردە و ماموستایان لە یەکێک لە قوتابخانەکای پایتەخت زەنگی کردنەوەی قوتابخانەکانی بۆ ساڵی خوێندنی ٢٠١٣- ٢٠١٤ لێدا.
ئەمڕۆ سێشەممە، رێکەوتی ١٠/٩/٢٠١٣ ساڵی خویندنی قوتابخانەکانی کوردستان دەستی پێکرد و سەرۆکی حکومەتی هەرێمی کوردستان لە قوتابخانەی بنەڕەتیی روخسار لە پایتەخت بە ئامادەبوونی وەزیری پەروەدە و کاربەدەستانی وەزارەتی پەرەوەردە و ماموستایان، یەکەم زەنگی دەسپێکردنی خوێندنی قوتابیانی بۆ ئەمساڵ لێدا.
هاوکات لە گەڵ پایتەخت، ساڵی نوێی خۆێندن لە هەموو شار و شارۆچەکە و گوندەکانی هەرێمی کوردستان دەستی پێکرد.
م.ش
10/09/2013
سەرۆكوەزیرانی هەرێمی كوردستان، نێچیرڤان بارزانی، بەردی بناخەی بەنداوی دەربەندی گۆمەسپانی دانا كە مەبەست لێی سوود وەرگرتنە بۆ بەراوكردنی رووبەرێكی زۆری زەویی كشتوكاڵ لە گوندەكانی ناوچەكە و بووژاندنەوەی ئاوی ژێر زەوییە.
بەنداوی گۆمەسپان(بەستۆرە) كە بە دووری 30 كیلۆمەتر دەكەوێتە باكووری رۆژهەڵاتی شاری هەولێرەوە و ئەمڕۆ چوارشەممە لە لایەن سەرۆکوەزیرانی هەرێمی کوردستان و جێگرەکەیەوە بەردی بناخەی دانرا و مەبەست لێی سوود وەرگرتنە لێی بۆ بەراوكردنی رووبەرێكی زۆری زەویی كشتوكاڵ لە گوندەكانی ناوچەكە، وێڕای بووژاندنەوەی ئاوی ژێر زەوی، لە هەمان كاتدا بە دروستكردنی ئەم بەنداوە سیمایەكی جوانی گەشتوگوزاریی بە ناوچەكە دەبەخشێت كە دواتر وەك پرۆژەیەكی گەشتوگوزاریش سوودی لێ وەردەگیرێت ئەمە وێرای ئەوەی كە مەڕدارانی ئەو گوندانە بۆ ئاودانی مەڕ و ماڵاتەكانیان سوودی لێ وەردەگرن.
پرۆژەی بەنداوی گۆمەسپان(بەستۆڕە) بە بەهای 7,293,420.000(حەوت ملیار و دووسەد و نەوەدوسێ ملیۆن و چوارسەدوبیست هەزار دینار) بە ماوەی 1800 رۆژ تەواو دەكرێت. بەرزیی بەنداوەكە 70 مەترە و لە جۆری RCC كۆنكریتییە و درێژییەكەی لەسەرەوە دەگاتە 590 مەتر و بەرزیی لە ئاستی رووی دەریاوە 874 مەترە، پانیەكەی 13 مەترە، هەروەها بەرزیی بەنداوەكە لە كاتی لافاو دەگاتە 671 مەتر، دوای تەواوبوونی پرۆژەكە لە توانایدایە 75,000,000 م3 ئاو گل بداتەوە.
گرێبەستی پڕۆژەکە ٢٩ـی حوزێران – یۆنیۆ، لە لایەن پرۆفیسۆر سیروان بابان وەزیری كشتوكاڵ و سەرچاوەكانی ئاو و خەلیل حیكمەت ئاتامات بەڕێوەبەری گشتی كۆمپانیایAtach ی توركی و عەبدولڵا حەمەد گەردی بەڕێوەبەری گشتی گروپی سێنكی كوردییەوە واژۆ کرا.
pna
11/09/2013
- داواکاری گشتیی کرماشان: لێکۆڵینەوە لەبارەی لێدانی قوتابیان دەکەین
- هونەرمەندی نەتەوەیی کورد سەید عەلی سەردەشتی لەوڵاتی سوید کۆچیدوایی کرد
- گفتوگۆكانی ئێران و ئەمریكا لە عومان دوای دو کاتژمێر کۆتایی هات
- ئێران شەڕو دانوستانی ناڕاستەوخۆی پێ باشە!
- داواکارییەکانی ئێران و ئەمریکا لەیەکتریی چیە؟
- وەزیری بەرگریی ئیسرائیل هۆشداری دەداتە ئەحمەد شەرع
- وادەی هێرشی ئەمریکا بۆ سەر ئێران ئاشکرا کرا
- دەستووری کاتی سوریا نیگەرانی لایەن کوردییەکان و چاودێرانی لێدەکەوێتەوە
- بارودۆخی نالەباری ئابووریی ئێران پێدەچێت کۆماری ئیسلامی ناچار بکات لەگەڵ سەرۆک ترامپ ڕێککەوتن بکات
- عڕاقچی: هێشتا نامەکەی ترەمپ بە دەستمان نەگەیشتووە
- وەزیری دەرەوەی ئێران دەڵێت بڕیارە نامەکەی ترامپ لە لایەن نێردراوێکی وڵاتێکی عەرەبیەوە بگەیەنرێتە تاران
- مەزڵوم عەبدی و ئەحمەد ئەلشەرع بە ڕێکەوتن دەگەن
- 8ی مارس.. شۆڕشێك لەپێناو مافی ژنان
- سری سورەییا ئۆندەر: باخچهلی پێی گوتم، ڕۆژێک دێت پێکەوە هەڵپەڕکێی ئاشتیی دەکەین
- حكوومهتی ئێران : لهگهڵ ئهورووپا درێژه به گفتوگۆ ئهتۆمییهكان دهدهین
- عەلی باپیر، سەرۆکی کۆمەڵی دادگەری کوردستان سەبارەت بە پەیامی ئۆجەلان"هیوادارم هەردوولا بە کردەوە بەدەم بانگەوازەکەوە بچن."
- ئەمینداری گشتیی یەکگرتوو پەیامی ئۆجەلان "پەیامێکی پڕ لە بەرپرسیاریەتی و بایەخ و واقعیەتە"
- سەرۆك بافڵ جەلال تاڵەبانی: پێشوازی لە پەیامەکەی بەڕێز عـ.ـەبدوڵا ئـ.ـۆجەلان دەکەین
- سەرۆک بارزانی: هیوادارین پەیامەکەی ئۆجەلان دەستپێکێک بێت بۆ ئەوەی پڕۆسەی ئاشتی رێی خۆی بگرێت
- زەینەب جەلالیان لە 17هەمین ساڵی زیندانیکردنیدا لە ناو زیندانەوە باس لە ئازارەکانی دەکات
- بزووتنەوەی کۆماریخوازانی ڕۆژهەڵاتی کوردستان ٢ی ڕێبەندان، ٧٩هەمین سالرۆژی دامەزرانی یەکەم کۆماری کوردستان، لە نەتەوەی کورد پیرۆزدەکات
- پەیامی پیرۆزبایی کۆماریخوازان بۆ بەرێز مەسعوود پزیشکیان
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
