به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
سەرۆكی وڵاتە یەكگرتووەكانی ئەمەریكا، باراك ئۆباما، داوای لە كۆنگرێس كرد ڕێی پێ بدەن تا كردەی سەربازی لە دژی ڕژێمی ئەسەد ئەنجام بدات، بەو بیانوەی كە دیمەشق چەكی كیمیایی دژ بە هاووڵاتیانی بەكار هێناوە.
ماڵپەڕی بەشی عەرەبی تۆڕی مێدیایی "سی ئێن ئێن"ـیش نیازی دنگدانی یەك بە یەكەی ئەندامانی ئەنجوومەنی نوێنەران و پێرانی تا دوێنێ سێشەممە بەم شێوەیە بڵاو كردووەتەوە:
ئەنجوومەنی پێران:
لەگەڵ گورزوەشاندنن: 23(15 دیموكرات و 8 كۆماری)
دژ بە گورزوەشاندنن: 10(2 دیموكرات و 8 كۆماری)
هێشتا یەكلایی نەبوونەتەوە: 58(31 دیموكرات و 25 كۆماری و 2 سەربەخۆ)
هەڵوێستیان دیار نییە: 9(4 دیموكرات و 5 كۆماری)
ئەنجوومەنی نوێنەران:
لەگەڵ گورزوەشاندنن: 24(18 دیموكرات و 6 كۆماری)
دژ بە گورزوەشاندنن: 57(16 دیموكرات و 41 كۆماری)
هێشتا یەكلایی نەبوونەتەوە: 248(128 دیموكرات و 120 كۆماری)
هەڵوێستیان دیار نییە: 104(39 دیموكرات و 65 كۆماری)
4/09/2013
راگەیاندنی رۆژنامەوانی
روونكردنەوەیەك بۆ جەماوەری سەربەرزی كوردستان
وەكو ئاگادارن، ماوەیەكە كار دەكرێت بۆ ئامادەكردنی یه‌كه‌مین كۆنگرەی نەتەوەیی كورد، لەو بارەوە كاری زۆر ئەرێنی ئەنجام دراوە. ئەوەی سەرنجی زۆربەی لایەنەكانی ناو كۆمیتەی ئامادەكاری راكێشا، ئەوەبوو كە رۆژی ئەنجامدانی یه‌كه‌مین كۆنگره‌ی نه‌ته‌وه‌یی كورد لە كاتی دیاری كراو لە 15-9-2013 كە دەكەوێتە پێش ئەنجامدانی هەڵبژاردنی پەرلەمانی كوردستان و هەڵمەتی راگەیاندنی گشت لایەنەكان كەوتۆتە پێش هەڵبژاردنی پەرلەرمان بە چەند رۆژێك بۆیە دوای گفتوگۆ لەسەری بەباش زاندرا كە بەستنی كۆنگرەكە دوابخرێت بۆ 25-11-2013 كه له‌و كاته‌دا هه‌ڵبژاردنی ئه‌نجوومه‌نی پارێزگاكانیش ته‌واو بووه.
لەگەڵ ئەوەی گشت ئەندامان، بەستنی كۆنگرەكە بە گرنگ دەزانن و لەوبارەوە كاری باش ئەنجامدراوە, ئەم دواخستنەش تەنها و تەنها لەبەر هەڵمەتی هەڵبژاردنی پەرلەمانی كوردستانە لە باشووری كوردستان, تاوەكو كۆنگره‌كه له كه‌ش و هه‌وایه‌كی ئارام و دوور له هه‌ڵمه‌تی هه‌ڵبژاردن ئه‌نجام بدرێت.
كۆمیتەی ئامادەكاری یەكەمین كۆنگرەی نەتەوەیی كورد
3-9-2013
سووریە داوای لە ڕێکخراوی نەتەوە یەکگرتووەکان کردوه پیش بە هەر جۆرە دەستدرێژییەکی دەرەکی بۆ سەر ئەو وڵاتە بگرێ.
بە پێی راپۆرتی هەواڵدەری رۆیتێرز بەشار جەعفەری، نوێنەری سووریە لە نەتەوە یەکگرتووەکان لە نامەیەک دا بۆ سکرتێری گشتیی نه‌ته‌وه یه‌کگرتووه‌کان‌‌و بەرپرسی شوورای ئەمنیەتی ئه‌و رێکخراوه‌یه داوای کردوه کە ئەو ناوەندە جیهانی‌یه ئەرکی خۆی لەمەڕ رێگەچارەیەکی سیاسی بۆ چارەسەری قەیرانی سووریەو پێشگرتن بە هێرشی نیزامی بۆ سەر سووریە بەجێ بێنێ.
ئه‌و په‌له‌قاژه‌یه‌ی سووریه له کاتێک دایه باراک ئۆباما، سەرکۆماری ئەمریکارۆژی دووشەممە گوتی ئەمریکا بڕیاری داوە هێرشی نیزامی بکاته سەر سووریە، بەڵام خوازیاری ئەوەیە کە کۆنگرەی ئەمریکاش ڕه‌زامه‌ندیی له‌سه‌ر ئه‌و هێرشە هه‌بێ.
شایانی باسه ئەمریکا دەڵێ حکومەتی سووریە بەرپرسیارە لەو هێرشە شیمیاییەی بۆ سەر ناوچه‌کانی دەمیشق کرا کە زیاتر لە ١٤٠٠ کەس کوژراوی لێ که‌وته‌وه، بەڵام دەمیشق حاشا له‌وه ده‌کا ئه‌وان ئه‌و تاوانه‌یان کردبێ.
3/09/2013
كەمێك پێش ئێستا ئاهەنگی راگەیاندنی هەڵمەتی هەڵبژاردنی پارتی دیموكراتی كوردستان لە یاریگای فرانسۆ هەریری دەستیپێكرد، لە مەراسیمەكەدا ناساندنی سەرجەم كاندیدەكانی لیستی پارتی دیموكراتی كوردستان ئەنجام دراو دواتر مەسعود بارزانی پەیامێكی ئاراستەی لیستەكەی كرد.
مەسعود بارزانی، سەرۆكی پارتی دیموكراتی كوردستان لە پەیامەكەیدا ئاماژەی بەوەدا پارتی ماوەیەكە كەوتۆتە بەر پەلاماری چەواشەكاری و دووژمنكاری، داواشی لە ئەندامان و لایەنگرانی حیزبەكەی كرد خۆیان خەریك نەكەن بە وەڵامدانەوەی تۆمەتەكان و گوتی:"كاتی خۆتان بە وەڵامدانەوەی خەڵكانێك مەكوژن كە هەموو ئامانجیان هێرشكردنە سەرپارتییە".
بارزانی ئاماژەی بەوەدا " با سوكایەتیتان پێ بكەن و با ئیرهابی فیكرتان بكەن، بەڵام ئێوە ئیرادەتان بەهێزبێت". بارزانی داوای لە ئافرەتان و گەنجان و لاوان كرد بە جۆش و خرۆشەوە بەشداری هەڵبژاردن بكەن، گوتیشی:"پێویستە گەنجەكان بەشدارییەكی بەرچاویان هەبێت لە هەڵبژاردنداو بەشداربن لە دارشتنی نەخشەی سیاسیدا".
بارزانی گوتیشی:"داواتان لێدەكەم ئیرادەتان بەهێزتر بكەن، ئیرادەی ئێوە دەبێتە تێكشكانی هەوڵێك كە دەیەوێت تاكی كورد لە نیشتیمانەكەی بشۆرێنێت". ئەوەشی خستەڕوو مایەی شانازی گەلی كوردە هەرێمی كوردستانی عێراق سەنگی خۆی هەیە، سەردەمی نكۆڵی كردنی كورد بەسەر چوو، هەرێمی كوردستان بە هەڵسوكەوتی ئاشتیانە بۆ دەرەوەی سەلملاندووە كە چەند حەزی لە پێشكەوتن و ئاشتییە.
سەرۆكی پارتی دیموكراتی كوردستان داوای لە كاندیدەكانی حیزبەكەی كرد كە خۆیان لە هەموو شێوازێكی ناشیرن بپارێزن بۆ كۆكردنەوەی دەنگ، گوتیشی:" پێویستە كاندیدانی پارتی پابەندی بنەماكانی نەتەوەیی و پارتی بن". داواشی لە لایەنگرانی حیزبەكەی كرد پێویستە ئەوەندەی لە دەستدان دێت رەچاوی بنەماكانی دیموكراسی و مەدەنیەت و یاسا بكەن
لە درێژەی وتارەكەیدا بارزانی جەختیكردەوە چاوەڕوانییەكی زۆر لە كاندیدانی پارتی هەیە، "داواتان لێدەكەم بەڵێنی وا بە خەڵك نەدەن كە پێتان جێبەجێ نەكرێت و راستگۆیی پارتی لە كورسی گەورەترە".
3/09/2013
وەزیری دەرەوەی پێشووی ئیسرائیل، ئەردۆغان بە هاندانی خەڵك بۆ دژایەتی ئیسرائیل تۆمەتبار دەكات و بە جێگرەوەی یوزیف گۆبلزی، وەزیری پڕوپاگەندەی نازییەكانی دەچوێنێت.
ئەفیگدور لیبەرمان، وەزیری دەرەوەی پێشووی ئیسرائیل، لە بەرامبەر لێدوانەكانی ئەردۆغان دژ بە ئیسرائیل، گوتی: "ئەوەی قسەكانی ئەردۆغانی گوێ لێبووبێت، كە خەڵك لە دژی ئیسڕائیل هاندەدات، وادەزانێ شاگردی گۆبلزی، وەزیری پڕوپاگەندەی نازییەكانە لە سەردەمی هیتلەر".
رەجەب تەیب ئەردۆغان، سەرۆك وەزیرانی توركیا، ئیسرائیلی بەوە تۆمەتباركردبوو، كە لەپاڵ لەكارلادانی محەممەد مورسی، سەرۆكی پێشووی میسرە.
پەیوەندیی نێوان توركیا و ئیسرائیل، كە پێشتر دوو وڵاتی هاوپەیمانی ستراتیژی بوون، بەهۆی هێرشی هێزی كۆماندۆزی ئیسرائیلی تێكچوو، كاتێك هێرشیان كردە سەر كەشتییەكی توركیا و 9 چالاكوانی توركیان كوژران، كە دەیانویست گەمارۆی سەپێنراوی سەر كەرتی غەززە لەلایەن ئیسرائیلەوە لە ساڵی 2010 بشكێنن.
ئەو وتانەی وەزیری دەرەوەی پێشووی ئیسرائیل لە كاتێكدایە، ئەردۆغان پێشتر گوتبووی "بەڵگەمان هەیە ئیسڕائیل لەپشت لەكار لادانی مورسییە"، حكومەتی ئێستای میسریش لەبەرامبەردا رایانگەیاندبوو "ئەو قسانەی ئەردۆغان جێگای سەرسووڕمانن".
3/09/2013
شارەزایان ئامۆژگاریی ئەو كەسانە دەكەن كە رۆژانە ماوەیەكی زۆر بەدیار كۆمپیوتەرەوە دەمێننەوە رەچاوی ئەم خاڵانە بکەن:
ئاگاداربوون لەوەی كە رووناكی ئەو ژوورەی كاری تێدادەكەیت هاوسەنگ بێت تا چاو تووشی ماندووبوونی زیاتر نەبێت، هەروەها نابێ لە ژوورێكی پڕ غاز و شێدا كار بكەیت و پێویستە دڵنیابیت كە چاوەكانت ماوەی 30 سانتیمەتر لە شاشەی كۆمپیوتەرەكەوە دوورن.
هەروەها پێویستە مرۆڤ بە شێوەیەكی تەندروست بەرامبەر كۆمپیوتەر دابنیشێت و ئەم شێوازە بۆ چاو ئەوەیە كە سەر لە كۆمپیوتەر لە شاشەی كۆمپیوتەر بەرزتر بێت.
تەلەڤزیۆنی ناپڵس بڵاوی كردووەتەوە، پسپۆران دەڵێن پێویستە هەر 10خولەك جارێك پشوویەك بە چاوەكان بدرێت لە رێگەی تەماشاكردنی شتی تری وەك تابلۆ یان كتێب یان هەر شتێكی دیکە تا چاو هەندێك لە كاریگەرییەكانی تیشكە بەهێزەكانی كۆمپیوتەر بپارێزرێت.
ئەوان هەروەها دووپاتی ئەوە دەكەنەوە كە پێویستە چاو بە شێوەیەك رابهێنرێت، هەر 5 چركە جارێك بترووكێت و پێویستە شاشەی كۆمپیوتەر پاكوخاوێن بێت تا دیتن روون و بێكێشە بێت.
رێنوێنییەكی دیکە ئەوەیە كە پێویستە ئەو كەسانە رۆژانە 2 لیتر ئاو بخۆنەوە، چونكە ئاو جیا لەوەی سوودی بۆ هەموو لەش هەیە، سوود بە چاویش دەگەیەنێت و تەڕیی پێویستی بۆ دابین دەكات.
سەرچاوە: میدیا سات
ئا: زانیار نوری
3/09/2013
بان كی مون، سكرتێری گشتیی نەتەوە یەكگرتووەكان، نیگەرانیی خۆی دەربڕی لەو هێرشەی دوێنێ كرایە سەر ئەندامانی موجاهیدینی خەلق لە كەمپی ئەشرەف، كە بەهۆیەوە 19 كەسیان لێ كوژرا.
سكرتێری گشتیی نەتەوە یەكگرتووەكان داوای لە حكومەتی عێراق كرد دەستبەجێ لێكۆڵینەوە لەم رووداوە بكات و ئەنجامەكانی ئاشكرابكات. هاوكات پشتگیری خۆشی بۆ نێردەی نەتەوە یەكگرتووەكان لە عێراق دووپاتكردەوە بۆ ئەو كارانەی پێشكەشی دەكات.
لە بەیاننامەیەكدا بان كی مون، داوای لە لایەنەكان كرد هەوڵ بدەن بە زوویی ئەمن و ئاسایش بۆ سەربازگەكە بگەڕێننەوەو گوتی "حكومەتی عێراق بەرپرسە لەسەر دابینكردنی ئاسایش و پاراستنی دانیشتووانی كەمپی ئەشرەف".
درەنگانی شەوی شەممەی رابردوو چەند گر‌ووپێكی چەكدار بە چەكی جۆراوجۆر هێرشیان كردە سەر كەمپی ئەشرەف و لەئاكامدا 14 كەسیان لێ كوشتن، كە ژن و منداڵیش لەناو كوژراوەكاندا هەیە. بۆ بەیانی هەمان رۆژ هێزێكی سەربازیی عێراقی هەڵیكوتاوەتە سەر سەربازگەكەو پێنج كەسی لێ كوشتو‌ون بەمەش ژمارەی كوژراوان گەیشتە 19 كەس.
رێکخراوی موجاهیدینی خەلق بەرهەڵستکاری کۆماری ئیسلامی ئێرانەو و لە ساڵی 1965 دامەزراوە بە مەبەستی رووخانی رژێمی شاه لە ئێران.
رێکخراوەکە بەشێکە لە ئەنجومەنی نیشتمانی بەرەنگاری ئێران و ئەو ئەنجوومەنە لە شێوەی پەڕڵەمانێکی بەرهەڵستکارانی ئێرانە و لە دەرەوە کارەکانی رادەپەرِێنێ. چەکدارەکانی ئەو رێکخراوە لە ساڵانی شەرِی عێراق و ئێران هاوپەیمانی رژێمی بەعس بوون و بەسەرکوتکردنی راپەرِینی خەڵکی کوردستان و شیعەکانی باشوور عێراق لە ساڵی 1991 تومەتبار دەکرێن.
لەدوای ساڵی 1988 رێكخراوی موجاهیدینی خەلقی بەرهەڵستكاری كۆماری ئیسلامیی ئێران لە كەمپی ئەشرەف لە پارێزگای دیالە نیشتەجێ كران.
دوای رووخانی حكومەتی عێراق لەساڵی 2003، بەغدا ئەندامانی ئەو رێكخراوەی چەك كرد و داوای لێكردن خاكی عێراق جێبهێڵن. هەرچەندە موجاهیدین لە سەرەتادا ئەو داوایەی قبوڵ نەكرد، بەڵام دوای چەندین هێرشی سوپای عێراق و چەكدارانی نەناسراو رازی بوون كە بۆ وڵاتانی دیكە بگوازرێنەوە.
بەپێی ئامارەكانی رێكخراوی نەتەوە یەكگرتووەكان، ژمارەی ئەندامانی رێكخراوی موجاهیدین لە عێراق لە نێوان 2500 تا 3000 كەسە كە ئێستا لە كەمپی لیبێرتی بەغدا نیشتەجێكراون و چاوەڕێی ناردنیان بۆ وڵاتێكی دیكە دەكەن.
بەگوێرەی ئامارێكی نافەرمی، 400 كەس لە ئەندامانی رێكخراوی موجاهیدنی خەڵقی ئێران لەو كەمپە كوردن. زۆربەی ئەندامانی كوردی ئەو رێكخراوە خەڵكی پارێزگاكانی ئیلام و كرماشانی رۆژهەڵاتی كوردستانن.
2/09/2013
کۆنگرەی نەتەوەیی کورد، کە دەمێکە کورد چاوەڕێی دەکات، رۆژی 15ی ئەیلوولی ئەم مانگە بەڕێوە ناچێت. ئەمەش دەبێتە دووەم جار کە کۆنگرەکە دوادەخرێت، بەبێ ئەوەی دیار بێت کە کەی دەبەسترێت.
تەنیا 14 رۆژ ماوە بۆ ئەو وادەیەی دانراوە بۆ بەستنی کۆنگرەی نەتەوەیی کورد، بەڵام ئەندامانی لێژنەی ئامادەکاریی کۆنگرەکە کاتێک باسی ئەو وادەیە دەکەن، دەموچاویان دڵەڕاوکێیەکی قووڵی پێوە دیارە. چونکە پێناچێت بتوانن لەو وادەیەی کە بۆی دانراوە، کۆنگرەکە بەڕێوەببەن.
پێشتر بڕیاروابوو کۆنگرەی نەتەوەیی کورد لە رۆژی 24/8/2013 بەڕێوەبچێت، بەڵام ئەندامانی لیژنەی ئامادەکاریی کۆنگرە، کە لە 21 کەس پێکدێن و نوێنەرایەتیی هەر چوار پارچەی کوردستان دەکەن، نەیانتوانی کارەکانیان تەواو بکەن و ناچار کۆنگرەیان بۆ رۆژی 15ی ئەیلوولی ئەمساڵ دواخست.
شێوازی دابەشکردنی ئەندامانی کۆنگرە بەسەر هەر چوار پارچەی کوردستاندا و مۆدێلی کۆنگرەکە، گەورەترین تەگەرەکانن لەبەردەم لێژنەی ئامادەکاردا و دەشبنە هۆکاری دواخستنیشی.
خەلیل ئیبراهیم، ئەندامی لێژنەی ئامادەکاری کۆنگرەی نەتەوەیی کورد نەیشاردەوە کە ناکۆکیی تووند لەسەر مەسەلەی دابەشکردنی ئەندامانی کۆنگرە هەیە. نێوبراو بە (رووداو)ی گوت: "راستە، لەسەر دابەشکردنی ئەندامان نەگەیشتینە رێککەوتن و چەندین کۆبوونەوەش لەسەر ئەو بابەتە کراوە و دواجار نەگەیشتنە ئەنجام".
خەلیل ئیبراهیم، کە بە نوێنەرایەتیی یەکگرتووی ئیسلامی و کۆمەڵی ئیسلامی کوردستان بەشداریی لەو لێژنەیەدا کردووە، ئەوەشی ئاشکراکرد کە جگە لە مەسەلەی دابەشکردنی ئەندامانی کۆنگرە، "مۆدێلی کۆنگرە کێشەیەکی دیکەیە کە تاوەکو ئێستا لەسەری رێککنەکەوتوون"، مۆدێلی کۆنگرەش روونیکردەوە کە پێكدێت لە "چۆنیەتیی بەڕێوەچوونی کۆنگرە، دەزگاکانی کۆنگرە، خیتابی سیاسیی کۆنگرە، دوای کۆنگرە دەبێ چی بکرێت، پێڕەوی ناوخۆی کۆنگرە، هەیکەلی کۆنگرە"، ئەمانە هەموویان بابەتی سەرەکین، کە تاوەکو ئێستا لەسەری "رێککنەکەوتوون".
کۆنگرەی نەتەوەیی کورد یەکەم کۆبوونەوەی خۆی لە رۆژی 22/8/2013 لەگەڵ مەسعود بارزانی، سەرۆکی هەرێمی کوردستان لە هەولێر ئەنجامدا.
خەلیل ئیبراهیم پێوایە نابێ ژمارەی دانیشتووانی پارچەکانی کوردستان بکەنە پێوەر بۆ دابەشکردنی ئەندامانی کۆنگرە: "راستە ژمارەی دانیشتووانی پارچەیەک بۆ پارچەیەکی دیکە زیاترە، بەڵام لەبیرمان نەچێت کە پێگەی سیاسیی هەرێمی کوردستان، دەبێ لەبەرچاو بگیرێت". هەروەها نابێ "ئەم لایەن و ئەو لایەن بڵێن دەبێ پشکی ئێمە ئەوەندە بێت، چونکە ئەمە هەڵبژاردن نییە، بەڵکو کۆنگرەی نەتەوەیی کوردە".
لێژنەی ئامادەکاریی کۆنگرەی نەتەوەیی کورد بڕیاریداوە کە 600 ئەندام کۆنگرە هەبن و 300 کەسیش وەکو میوان بانگ بکرێن، ئەویش لەوانەی کە دۆستی کوردن.
ئەندامانی کۆنگرە بەسەر هەر چوار پارچەی کوردستان و دەرەوەی وڵاتدا دابەش بکرێت، بەشێوەیەک کە رێژەی 10% بۆ رێکخراوەکانی گەنجان، 10% بۆ کەسایەتییەکان، 35% بۆ رێکخراوەکانی کۆمەڵگەی مەدەنی، 45% بۆ پارتە سیاسییەکان دەستنیشانکراوە.
کەمال کەرکووکی، ئەندامی سکرتاریەتی لێژنەی ئامادەکاریی کۆنگرەی نەتەوەیی کورد دانی بەوەدا نا کە رای جیاواز هەیە لەسەر ئەندامانی کۆنگرە و بە (رووداو)ی گوت "لەسەر رێژەکان و دابەشکردنی ئەندامانی کۆنگرە جیاوازی هەیە لەنێوان لایەنەکاندا". کەمال کەرکووکی، کە نوێنەری پارتی دیموکراتی کوردستانە لە لێژنەی ئامادەکاری کۆنگرەی نەتەوەیی کورددا، پێیوایە ئەو کێشانە چارەسەر دەکرێن، بەڵام دەڵێت "هەندێک مەسائیلی دیکە هەن کە دەبێ حەل بکرێن".
کەرکووکی دڵنیا نییە لەوەی کە ئەو کاتەی لەبەردەمیاندا ماوە، بەس بێت بۆئەوەی کۆنگرەی تێدا ئەنجامبدەن: "ئەگەر هەموو شتێک بە پێرفێکتی بکەین، ئەوە پێڕاناگەین کۆنگرە لە کاتی خۆیدا ئەنجام بدەین"، بۆیە "ئێستا هەندێک لایەن هەن کە داوا دەکەن کۆنگرەی نەتەوەیی دوابخرێت".
ئەندامێکی لیژنەکە لە رۆژهەڵاتی کوردستانەوە، دانی بەوەدا نا کە کەمتەرخەمی کراوە لە دەستنیشانکردنی وادەی کۆنگرەی نەتەوەیی کورد.
رەزا کەعبی، ئەندامی لێژنەی ئامادەکاریی کۆنگرەی نەتەوەیی کورد، ئاشکرایکرد کە لەکاتی دەستنیشانکردنی وادەی کۆنگرەدا داواکراوە کە "کۆنگرەکە لە مانگی 10 یان مانگی 11دا بکرێت، چونکە کێشەی زۆر هەیە و کاری زۆریش ماوە کە ناتوانین لەو ماوە کورتەدا یەکلایی بکەینەوە".
بەپێی زانیارییەکانی (رووداو) پارتی کرێکارانی کوردستان PKK داوا دەکات ژمارەیەکی زۆری ئەندامانی کۆنگرە بەر بەر باکوور و رۆژئاوا بکەون. ئەوەی PKK داوای دەکات ئەوەیە کە لە کۆی 600 ئەندام، زیاتر لە 310 ئەندام بۆ ئەوان بێت.
لە دوایین کۆبوونەوەی لێژنەی ئامادەکاریی کۆنگرەی نەتەوەیی کورددا، کە رۆژی 30/8/2013 سازکرا لەسەر دابەشکردنی ئەندامانی کۆنگرە، PKK داوایکرد کە تەنیا بۆ باکوور 220 ئەندام دابنرێت، بۆ هەرێمی کوردستان 150 ئەندام، بۆ رۆژهەڵات 90 ئەندام و بۆ رۆژئاواش 140 ئەندام.
بەڵام ئەو پێشنیازەی PKK رەتکرایەوە، چونکە باشووری کوردستان پێشنیازیکرد کە نابێ هیچ پارچەیەک مەغدوور بکرێ و هەموو پارچەکان وەکو یەک ئەندامیان هەبێ، ئەویش 150 ئەندام بۆ هەر پارچەیەک.
رەزا کەعبی، بە نوێنەرێتیی کۆمەڵەی زەحمەتکێشانی کوردستان، دەڵێت: "ئێمەش لەگەڵ ئەو پێشنیازەی باشووری کوردستانین کە وەکو یەک ئەندامیان هەبێت".
ئەو ئەندامەی لێژنەی ئامادەکاریی کۆنگرە، بە ناڕاستەوخۆ باسی ئەوەیکرد کە PKK داوای رێژەی زۆر دەکات و ئەمەش ببووە هۆی یەکێک لە ئەگەرە هەرە سەرەکییەکان کە کۆنگرەی نەتەوەیی کورد لە وادەی خۆیدا بەڕێوە نەچێت: "ئێستا تەوەجوهی جددی هەیە کە کۆنگرەی نەتەوەیی کورد لە وادەی خۆیدا نەکرێت".
rudaw
2/09/2013
دوای ئەوەی باراك ئۆباما، دوا بڕیاری كۆشكی سپی لەبارەی هێرش بۆ سەر رژێمی سووریا دایە كۆنگرێسی ئەو وڵاتە، هاوپەیمانانی ئەمریكا پێشوازییان لەو بڕیارەی ئۆباما كرد.
دەیڤید كامیرۆن، سەرۆك وەزیرانی بەریتانیا، گوتی: "من لە هەڵوێستی ئۆباما لەبارەی سووریاوە تێدەگەم و پشتیوانی لێدەكەم".
ویلیام هێگ، وەزیری دەرەوەی بەریتانیاش، قسەكانی ئۆباما لەجێی خۆی دەزانێت.
هاوكات لە فەرەنسا بەرهەڵستكارانی فرانسوا هۆلاند سەرۆكی ئەو وڵاتە، داوایان كردووە كە هۆلاند هەروەك سەرۆكی ئەمریكا و سەرۆك وەزیرانی بەریتانیا، بڕیاری هێرش بۆ سەر رژێمی سووریا بخاتە ئەستۆی پەرلەمان.
هەروەها لۆرد ئەشدۆن، رێبەری پێشووی حیزبی لیبراڵ دیموكراتی بەریتانیا، داوای لە پەرلەمانی بەریتانیا كرد، كە ئەگەر پێویست بكات با بە بڕیاری نەرێنی خۆیان سەبارەت بە هێرش بۆ سووریا بچنەوە.
ئۆباما، لە میانی كۆنفرانسێكی رۆژنامەوانیدا كە دوێنێ شەممە 31-8-2013 لە كۆشكی سپی بەڕێوەچوو رایگەیاند: "ئێمە ئامادەی هێرشین، بەڵام لەوانەیە ئەم هێرشە بەیانی بێت، هەفتەیەكی دیكە بێت یان مانگێكی دیكە".
ئۆباما ئاماژەی بەوەدا ئەمریكا پێویستە ئەو هێرشە ئەنجامبدات و داواشی لە كۆنگرێس كرد دەنگ لەسەر بڕیارەكە بدەن، "چونكە بەشداری نوێنەرانی هاووڵاتیان زۆر گرنگە".
لەلایەكی دیكەوە ڤلادیمیر پوتین، سەرۆك كۆماری رووسیا هەر دوێنێ شەممە 31-8-2013 لە كۆنگرەیەكی رۆژنامەوانیدا رایگەیاند "بانگەشەی بەكارهێنانی چەكی كیمیایی لەلایەن حكومەتی سووریا دژ بە خەڵكی سڤیل و بەرهەڵستكارانی ئەو وڵاتە چەواشەكارییە".
پوتین ئاراستەی قسەكانی روو لە ئۆباما كرد و گوتی" تۆ كە خەڵاتی نۆبڵت بەدەستهێناوە، تێفكرە لەوەی كە لە ئەگەری هێرشی سەربازی بۆ ئەو وڵاتە چەند كەس دەبنە قوربانی".
1/09/2013
بەرپرسی لیژنەی ئاسایشی نەتەوەیی ئێران لەپێناو رێگەگرتن لە هەر هێرشێكی سەربازی بۆ سەر رژێمی سووریا، گەیشتە دیمەشق و بڕیاریشە چاوی بە بەشار ئەسەد بكەوێت.
عەلادین بروجێردی، بەرپرسی لیژنەی ئاسایشی نەتەوەیی لە ئەنجوومەنی شورای ئێران، دوێنێ شەممە 31-8-2013 گەیشتە دیمەشقی پایتەختی سووریا و لەگەڵ گەورە بەرپرسان‌و هەروەها گوتەبێژی پەرلەمانی سووریا كۆبووەوە.
ئەو بەرپرسە ئێرانییە ئەمڕۆش لە دیمەشق دەمێنێتەوە بۆ ئەوەی چاوی بە بەشار ئەسەد، سەرۆكی سووریا بكەوێت.
بروجێردی لەو سەردانەیدا دووپاتیكردەوە كە سەردانەكەی جەختكردنەوەیە لە هاوكاریكردنی وڵاتەكەی بۆ رژێمەكەی ئەسەد لەكاتی هێرشی سەربازی دژ بە رژێمەكەی ئەسەد‌و گوتی: "هاتووین بۆ ئەوەی هاوكاریی كۆماری ئیسلامی بۆ بەرگریكردن لە ناوچەكە و برا ئازیزەكانمان لە سووریا رابگەیەنین".
بروجێردی بە رۆژنامەنووسانی راگەیاند، وڵاتەكەی دژی هەر هێرشێك دەوەستێتەوە، كە بكرێتە سەر رژێمی سووریا و هەموو هەوڵێك دەدەن بۆ رێگەگرتن لەو هێرشە چاوەڕوانكراوە.
حكومەتی تاران جگە لە پشتیوانیی راستەوخۆ بۆ رژێمەكەی ئەسەد، لەلایەكی دیكەشەوە بە شێوەیەكی دیبلۆماسی لەگەڵ هەریەكە لە رووسیا و چین هەوڵی رێگەگرتن لە هێرشی سەربازی بۆ سەر سووریا دەدات.
دەنگۆی بەكارهێنانی چەكی كیمیایی لەلایەن رژێمەكەی ئەسەدەوە، ویلایەتە یەكگرتووەكانی ئەمریكای نیگەران كرد، چونكە پێشتر واشنتۆن بەكارهێنانی چەكی كیمیایی بە "هێڵی سوور" بۆ رژێمەكەی ئەسەد دانابوو. بۆیە ئێستا دەنگۆی لێدانی رژێمەكەی ئەسەد لە ئارادایەو دوێنێش باراك ئۆباما ئامادەیی خۆی بۆ هێرشكردنە سەر رژێمی سووریا راگەیاند، بەڵام دوا بڕیاریشی دایە دەست كۆنگرێسی وڵاتەكەی.
1/09/2013
سەرۆكی وڵاتە یەكگرتووەكانی ئەمەریكا، باراك ئۆباما، داوای لە كۆنگرێسی وڵاتەكەی كرد "گڵۆپی سەوز"ـی بۆ دابگیرسێنن تاكو هێرشی سەربازی بۆ سەر سووریا ئەنجام بدات.
ئۆباما دوێنێ شەممە وتارێكی دا و تێیدا گوتی، ئەو پرۆسەیەی كە هێزەكانیان دەیانەوێت لە سووریا ئەنجامی بدەن دیاریكراوە. جەختیشی كردەوە كە هێزەكانیان لە ڕۆژهەڵاتی نێوەڕاستدا هەن و دەتوانن لە هەر كاتێكدا بێت هێرشێك ئەنجام بدەن.
ئۆباما هاوكات دەڵێت، "هەنگاوەكانمان سنتووردارن و هێرشەكان لە ڕێی هێزی پیادەوە نابن. هێزەكانمان لە ئێستادا لە ناوچەكەدا هەن و سەركردەی هێزەكانیش جەخت لە ئامادەباشییان بۆ هەر هێرشێك دەكەنەوە و تەنیا لە چاوەڕوانی فەرمانن بۆ ئەنجامدانی."
سەرۆكی وڵاتە یەكگرنتووەكانی ئەمەریكا ئاشكرایشی كرد كە ئەو سەرۆكی دیموكراتیترین وڵاتی دنیایە، بۆیە چاوەڕوانی كۆنگرێسی وڵاتەكەیەتی گڵۆپی سووری بۆ پێ بكات تا هێرش بۆ سەر سووریا ئەنجام بدات. زیاتر گوتی "داوا لە یەكەیەكەی كۆنگرێسمانەكان دەكەم دەنگ بدەن لەپێناو بەرپاكردنی هێرش دژبەو تاوانە ترسناكە."
گوتیشی "درك بەوە دەكەم كە بێ گەڕانەوە بۆ كۆنگرێس هێرش ئەنجام بدەم، بەوپێیەی كە سەركردەی باڵای سوپام، بەڵام بڕیاری دووەمم دا كە گەڕانەوەیە بۆ كۆنگرێس."
ئەو هاوكات دەڵێت "لەسەر ئەو باوەڕەم كە دەتوانین بێ گەڕانەوە بۆ بڕیاری ئەنجوومەنی ئاسایش، هێرش بەرپا بكەین." زیاتر گوتی "دەزانم ئێمە سڵ لە شەڕ دەكەینەوە، جەنگی عێراق كۆتایی هات و هیی ئەفغانستانیش كۆتایی پێ دێنین، بەڵام ناشێت ئەوەی لە سووریا ڕوو دەدات نادیتە بگیرێت."
CNN
1/09/2013
سبه‌ینێ یه‌كشه‌ممه 1ی ئه‌یلول، گه‌وره‌ترین كۆنگره‌ی نێوده‌وڵه‌تی ته‌سه‌وف به‌به‌شداری سه‌دان زانا و كه‌سایه‌تی كوردستانی و عیراقی و عه‌ره‌بی و جیهانی له سه‌نته‌ری رۆشنبیری زانكۆی سه‌لاحه‌دین له‌هه‌ولێر ئه‌نجام ده‌درێت.
ئه‌ندامی لیژنه‌ی ئاماده‌كاری و وته‌بێژی كۆنگره‌كه، مه‌ریوان نه‌قشبه‌ندی، بەئاژانسی پەیامنێری ڕاگەیاند:" كۆنگره‌كه هاوكاته له‌گه‌ڵ رۆژی ئاشتی جیهانی كه نه‌ته‌وه‌یه‌كگرتوه‌كان دایناوه به به‌شداری سه‌دان زانا و كه‌سایه‌تی ته‌سه‌وف له كوردستان و عێراق و وڵاتانی عه‌ره‌بی و جیهانی، و له شاری هه‌ولێر به‌ڕێوه‌ده‌چێت".
وته‌بێژی كۆنگره‌كه، ته‌ئیكدی كرده‌وه: "كۆنگره‌كه له‌لایه‌ن سه‌نته‌ری رۆشنبیری ته‌سه‌وفەوە رێكخراوه و نوێنه‌ری هیچ حیزب و لایه‌نێكی سیاسی به‌شداری پێناكرێت، به‌دیل و دژی هیچ دامه‌زراوه و كه‌س و لایه‌نێكیش نییه.
مه‌ریوان نه‌قشبه‌ندی، گوتی: ئامانجی كۆنگره‌كه، قوڵكردنه‌وه‌ی گیانی پێكه‌وه‌ژیان و ئیدانه‌كردنی تیرۆر و توندوتیژیه كه‌به‌ناوی ئیسلامه‌وه ده‌كرێت. هه‌روه‌ها كاركردن و ئاشتی نێوان مسوڵمانان به گشتی و ئه‌هلی ته‌سه‌وف و ته‌ریقه‌ته‌كانه به تایبه‌تی".
مه‌ریوان نه‌قشبه‌ندی، هەروەها گوتی:"رێچكه‌ی راسته‌قینه‌ی ئیسلام به‌هۆی ئیختیلاف و ئیجتیهادی جیاوازوە به‌ئاقارێكی خراپدا براوه، بۆیه ئەم کۆنگرەیە هه‌وڵده‌دات نه‌خشته رێگایه‌ك بۆ راستكردنه‌وه‌ی هه‌ر لادانێكی شه‌رعی و فیكری دابنێت كه به‌هۆی گۆڕانگاریه‌كانه‌وه دێته‌ئاراوه".
زیرەک عەبدولڕەحمان/م.ش
pna
31/08/2013
فرانسوا هۆلاند، سەرۆكی فەرەنسا ریگەیاند بەدو‌وری نازانێت هێرشی ئاسمانی بۆ سەر رژێمی سووریا بەر لە رۆژی چوارشەممە دەستپێبكات. ئاماژە بەوەش دەكات كە رەتكردنەوەی بڕیاری لێدانی سووریا و بەشداریكردن لە هێرشەكە، لەلایەن پەرلەمانی بەریتانیا كارناكاتە سەر هەڵوێستی فەرەنسا.
هۆلاند لە دیمانەیەكی رۆژنامەی لۆمۆند رایگەیاندووە "پێشنیازەكەی پەرلەمانی بەریتانیا ساردمان ناكاتەوە لە خواستی ئێمە بۆ دەستوەردان لە سووریا".
هۆلاند جەختیشی لەوە كردەوە كە لایەنگری سزادانی سو‌وریایە‌و گوتی "لەگەڵ هاوپەیمانانمان بەچڕی كار بۆ ئەوە دەكەین، رژێم سزای خۆی وەربگرێت بەرامبەر ئەو كارەی كردوویەتی".
لەوەڵامی پرسیاری ئایا فەرەنسا ئامادەیە بەبێ بەریتانیا هێرش بكاتە سەر سووریا، هۆلاند گوتی "هەر وڵاتێك ئازادە بەشداریی پرۆسەكە بكات یان نا، ئەمە چۆن بۆ ئێمە رەوایە بڕیاری لێبدەین، ئاوا بەریتانیاش ئازادە چۆن بڕیاری لێدەدات".
هۆلاند بەدووریشی نەزانی بەر لە رۆژی چوارشەممە هێرشەكە ئەنجام بدرێت.
گوتیشی " كۆمەڵێك بەڵگەی تەواو هەن ئەوە دەسەلمێنن، كە سووریا بەرپرسە لە هێرشە كیمیاییەكەی رۆژی 21ی ئابی غۆتەی رۆژهەڵاتی دیمەشق، كە سەدان كەسی تێدا كوژرا و برینداربوو".
دوێنێ پێنجشەممە پەرلەمانی بەریتانیا هێرشی سەربازی بۆ سەر رژێمی سووریا رەتكردەوە. سەرۆك وەزیرانی ئەو وڵاتەش دەڵێت حكومەت پابەند دەبێت بە بڕیاری پەرلەمانەوە.
بە جیاوازی تەنیا 13 دەنگ نوێنەرانی پەرلەمانی بەریتانیا رەتیانكردەوە كە وەڵامی ئەو هێرشە كیمیاییە بدەنەوە كە رژێمەكەی بەشار ئەسەدی پێ تاوانبار كرابوو لەلایەن ویلایەتە یەكگرتووەكانەوە . ئەمەش رەنگدانەوەی ترسی بەریتانییەكان بوو لە پەلەكردن لەسەر بڕیاردان بۆ هێرشی سەربازی بۆسەر سووریا بەبێ بو‌ونی چەند بەڵگەیەكی دیاریكراو.
دایڤد كامیرۆن، بڕیاری داوە رێزی ئەنجامی ئەم دەنگدانە بگرێت، بەڵام ئەمەش باراك ئۆباما، سەرۆكی ویلایەتە یەكگرتووەكانی ئەمریكا تووشی حاڵەتێكی ناخۆش دەكات، لەبەر ئەوەی ئۆباما وەك هەموو سەرۆكەكانی دیكەی ئەمریكا لە شەڕی ڤێتنامەوە پشتی بە بەریتانیا بەستبوو لە هەر جەنگێكی سەربازی .
رووداو- ئەلحەیات
30/08/2013
پەرلەمانی بەریتانیا هێرشی سەربازی بۆ سەر رژێمی سووریا رەتكردەوە. سەرۆك وەزیرانی ئەو وڵاتەش دەڵێت حكومەت پابەند دەبێت بە بڕیاری پەرلەمانەوە.
بە جیاوازی تەنیا 13 دەنگ نوێنەرانی پەرلەمانی بەریتانیا رەتیانكردەوە كە وەڵامی ئەو هێرشە كیمیاییە بدەنەوە كە رژێمەكەی بەشار ئەسەدی پێ تاوانبار كرابوو لەلایەن ویلایەتە یەكگرتووەكانەوە . ئەمەش رەنگدانەوەی ترسی بەریتانییەكان بوو لە پەلەكردن لەسەر بڕیاردان بۆ هێرشی سەربازی بۆسەر سووریا بەبێ بو‌ونی چەند بەڵگەیەكی دیاریكراو.
دایڤد كامیرۆن، بڕیاری داوە رێزی ئەنجامی ئەم دەنگدانە بگرێت، بەڵام ئەمەش باراك ئۆباما، سەرۆكی ویلایەتە یەكگرتووەكانی ئەمریكا تووشی حاڵەتێكی ناخۆش دەكات، لەبەر ئەوەی ئۆباما وەك هەموو سەرۆكەكانی دیكەی ئەمریكا لە شەڕی ڤێتنامەوە پشتی بە بەریتانیا بەستبوو لە هەر جەنگێكی سەربازی .
بەهۆی داواكاری حیزبی كرێكاران، كە حیزبی ئۆپۆزسیۆنن بڕیاردرا جارێكی دیكە دەنگ بدەن لەسەر هێرشی سەربازی بۆ سەر سووریا، ئەمەش راستەوخۆ دوای تەواوبوونی كارەكانی UN لە سوریا بوو.
وا چاوەڕوان دەكرا لەم دەنگدانەدا كە رۆژی پێنجشەممە ئەنجامدرا كامیرۆن بیباتەوە، بەهۆی ئەوەی ساغبوونەوەی بەكارهێنانی چەكی كیمیایی دەبێت هێزی سەربازی دژی سووریا بەكاربێت، بەڵام بە ئەنجامێكی شۆككەر لە دەنگدانەكانی پەرلەمان 285 پەرلەمانتار دەنگیان بە نەرێ بۆ جەنگ دا لە كاتێكدا 272 پەرلەمانتار دەنگیان بە ئەرێ دا.
دەیڤد كامیرۆن رایگەیاند "من باوەڕێكی بەهێزم بەوە هەیە كە بە تو‌وندی وەڵامی هێرشی كیمیایی بدرێتەوە، بەڵام كە پەرلەمان دەنگی لەسەر نەداوە و پەرلەمانی بەریتانیاش كە نوێنەرایەتی خەڵكەكەی دەكات نایەوێت هێرشی سەربازی بكرێت، منیش لەوە تێدەگەم و حكومەتیش لەسەر ئەم بڕیارە كاردەكات".
هاوشانی ئەمریكاو فەرەنسا، بەریتانیاش یەكێك بوو لەو وڵاتانەی سووربوو لەسەر ئەوەی كە دەبێت هێرشی سەربازیی بكرێتە سەر رژێمەكەی ئەسەد و هێزیشی بۆ ئەو مەبەستە ئامادەكردبوو، بەڵام پەرلەمانی ئەو وڵاتە هەموو ئەو ئامادەكارییانەی پوچەڵكردەوە. بۆیە دەبێت چاوەڕوانی بڕیاری ئۆباما بكرێت، كە ئایا ئەویش پەشیمان دەكرێتەوە یان هێرشەكە بە هاوبەشی لەگەڵ فەرەنسا ئەنجام دەدات.
30/08/2013
وڵاتانی ئەندام لە ئەنجوومەنی هاریكاری كەنداو رایدەگەیەنن، لە ناوەڕاستی ساڵی داهاتووەوە كار بە ڤیزای هاوبەش دەكەن.
بەپێی هەواڵێكی رۆژنامەی ئەلرەئی كوەیتی، دوای تێپەڕاندنی هەندێك گرفتی تەكنیكی، هاوشێوەی ڤیزای هاوبەشی شنگن لە ئەوروپا، سیستمی ڤیزای هاوبەش لەنێوان وڵاتانی ئەندام لە ئەنجوومەنی هاریكاری كەنداو پەیڕەو دەكرێت.
ئەو كەسانەی بەشێوەیەكی هەمیشەیی لەو وڵاتانە دەمێننەوە تەنیا یەك جار وەرگرتنی ڤیزایان پێویستە، بەڵام ئەوانەی تەنیا جارێك سەردان دەكەن بۆ ماوەی مانگێك و ئەوانەیشی زوو زوو سەردانی ئەو وڵاتە دەكەن بۆ ماوەی ساڵێك ڤیزایان پێدەدرێت.
هاوكات ئاماژە بە پرسی ئەوانەش کراوە، کە بەهۆكاری یاسایی دەخرێنە دەرەوەی سنووری كەنداوەوە ڤیزای هاوبەشی كەنداویان پێنادرێت، هەروەها هەر كام لە وڵاتانی كەنداو وێڕای هەبوونی ڤیزای هاوبەش، دەتوانن ڤیزای تایبەتی وڵاتی خۆیان ببەخشن.
رۆژنامەی رەئی زیاتر نووسیویەتی "ئەو كەسانەی ڤیزای هاوبەشی وڵاتانی كەنداویان دەوێ، دەبێ بەپێی پێویست بەڵگەنامەی پێبێت، ئامانجیش لەو ڤیزایە دروستكردنی گەشتوگوزاری هاوبەش و كارگوزاری هاوبەشە لەنێوان ئەو وڵاتانەدا.
ئەنجوومەنی هاریكاری كەنداو لە 25/5/1981 لە هەریەكە لە وڵاتانی ئیمارات، بەحرەین، سعودیە، كوەیت، قەتەر و عوممان پێكدێ.
رووداو-ahaber
31/08/2013
- داواکاری گشتیی کرماشان: لێکۆڵینەوە لەبارەی لێدانی قوتابیان دەکەین
- هونەرمەندی نەتەوەیی کورد سەید عەلی سەردەشتی لەوڵاتی سوید کۆچیدوایی کرد
- گفتوگۆكانی ئێران و ئەمریكا لە عومان دوای دو کاتژمێر کۆتایی هات
- ئێران شەڕو دانوستانی ناڕاستەوخۆی پێ باشە!
- داواکارییەکانی ئێران و ئەمریکا لەیەکتریی چیە؟
- وەزیری بەرگریی ئیسرائیل هۆشداری دەداتە ئەحمەد شەرع
- وادەی هێرشی ئەمریکا بۆ سەر ئێران ئاشکرا کرا
- دەستووری کاتی سوریا نیگەرانی لایەن کوردییەکان و چاودێرانی لێدەکەوێتەوە
- بارودۆخی نالەباری ئابووریی ئێران پێدەچێت کۆماری ئیسلامی ناچار بکات لەگەڵ سەرۆک ترامپ ڕێککەوتن بکات
- عڕاقچی: هێشتا نامەکەی ترەمپ بە دەستمان نەگەیشتووە
- وەزیری دەرەوەی ئێران دەڵێت بڕیارە نامەکەی ترامپ لە لایەن نێردراوێکی وڵاتێکی عەرەبیەوە بگەیەنرێتە تاران
- مەزڵوم عەبدی و ئەحمەد ئەلشەرع بە ڕێکەوتن دەگەن
- 8ی مارس.. شۆڕشێك لەپێناو مافی ژنان
- سری سورەییا ئۆندەر: باخچهلی پێی گوتم، ڕۆژێک دێت پێکەوە هەڵپەڕکێی ئاشتیی دەکەین
- حكوومهتی ئێران : له‌گه‌ڵ ئهورووپا درێژه به گفتوگۆ ئهتۆمییهكان دهدهین
- عەلی باپیر، سەرۆکی کۆمەڵی دادگەری کوردستان سەبارەت بە پەیامی ئۆجەلان"هیوادارم هەردوولا بە کردەوە بەدەم بانگەوازەکەوە بچن."
- ئەمینداری گشتیی یەکگرتوو پەیامی ئۆجەلان "پەیامێکی پڕ لە بەرپرسیاریەتی و بایەخ و واقعیەتە"
- سەرۆك بافڵ جەلال تاڵەبانی: پێشوازی لە پەیامەکەی بەڕێز عـ.ـەبدوڵا ئـ.ـۆجەلان دەکەین
- سەرۆک بارزانی: هیوادارین پەیامەکەی ئۆجەلان دەستپێکێک بێت بۆ ئەوەی پڕۆسەی ئاشتی رێی خۆی بگرێت
- زەینەب جەلالیان لە 17هەمین ساڵی زیندانیکردنیدا لە ناو زیندانەوە باس لە ئازارەکانی دەکات
- بزووتنەوەی کۆماریخوازانی ڕۆژهەڵاتی کوردستان ٢ی ڕێبەندان، ٧٩هەمین سالرۆژی دامەزرانی یەکەم کۆماری کوردستان، لە نەتەوەی کورد پیرۆزدەکات
- پەیامی پیرۆزبایی کۆماریخوازان بۆ بەرێز مەسعوود پزیشکیان
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
