به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
ئەمڕۆ مەسعود بارزانی سەرۆکی ھەرێمی کوردستان لەگەڵ کۆمیتەی ئامادەکاریی کۆنگرەی نەتەوەیی کورد کۆبۆوە لە کۆبوونەوەکە سەرۆک بارزانی جەختی کردەوە کە دەبێ بەرژەوەندیی کورد بکەنە بنەمای کارکردنیان و ھەموویان پێکەوە وەک یەک تیم کار بکەن و کەس ھەوڵ نەدات ھەژموون و ئەجێندای حزبەکەی بەسەر کاری کۆمیتەکەدا بسەپێنێ.
لەو کۆبوونەوەیەدا کە بەمەبەستی ئاگادار کردنەوەی سەرۆکی ھەرێمی کوردستان لە قۆناخە سەرەتاییەکانی کاری کۆمیتەی ئامادەکاری ئەنجام درا، سەرۆک بارزانی داوای لە ھەموو لایەنەکان کرد کە وەک نوێنەری نەتەوەی کورد کار بکەن نەک وەک نوێنەری حزب و لایەنە سیاسییەکان.
سەرۆک بارزانی جەختی کردەوە کە دەبێ بەرژەوەندیی کورد بکەنە بنەمای کارکردنیان و ھەموویان پێکەوە وەک یەک تیم کار بکەن و کەس ھەوڵ نەدات ھەژموون و ئەجێندای حزبەکەی بەسەر کاری کۆمیتەکەدا بسەپێنێ.
سەرۆک بارزانی پاڵپشتیی خۆی و دامەزراوەی سەرۆکایەتیی ھەرێمی کوردستانی بۆ ھەموو ھەنگاو و قۆناخەکانی بەستنی کۆنگرە ڕاگەیاند و دووپاتی کردەوە کە ڕۆڵی جەنابیان کۆکردنەوە و کارئاسانی و پشتیوانیی سەرخستنی کاری کۆنگرەی نەتەوەیی کوردە و دەبێ کۆمیتەی ئامادەکار و سەرجەم لایەنە سیاسییەکان لە گفتوگۆی بەردەوامدا بن بۆ سەرخستنی کۆنگرەکە.
لە تەوەرێکی دیکەی دانیشتنەکەدا ئەندامانی کۆمیتەی ئامادەکاریی کۆنگرەی نەتەوەیی کورد کە لەم کۆبوونەوەیەدا بەشدار بوون ڕا و بۆچوون و پێشنیارەکانی خۆیان لەبارەی لایەنە تەکنیکییەکانی کۆنگرەکە خستەڕوو و لەسەر ئەوە ھاوڕا بوون کە پێویستە ئامانجی ھەموو لایەک سەرخستنی کۆنگرەکە بێت و نابێ ھیچ لایەنێک ڕێگە بەخۆی بدات کۆسپ و تەگەرە بۆ کاروباری کۆنگرە درووست بکات، چونکە ھەموو کورد و دۆستانی کورد لە سەرانسەری جیھان چاوەڕوانی ئەو ھەنگاوە مێژووییەن کە لایەنە سیاسییەکانی ھەر چوار پارچەی کوردستان لە پێناو بەستنی کۆنگرەی نەتەوەیی کورد دەستیان پێکردووە.
ئەندامانی کۆمیتەی ئامادەکاری ئەوەیان دووپات کردەوە کە کۆمیتەکە تەنیا کاری تەکنیکی و ئیداری دەکات بۆ چۆنییەتیی بەستنی کۆنگرەکە، نەک بڕیاری سیاسیی لەسەر ئەرک و تەوەر و بڕیارەکانی کۆنگرە بدات، بۆیە ھەموولایەک داوایان کرد سەرجەم لایەنە سیاسییە کوردستانییەکان وەک تیمێک کار بکەن و لە ئێستاوە کۆسپ بۆ سەرخستنی کۆنگرەکە دروست نەکەن. ھەروەھا ھەموو لایەک دڵنیاییان دا بە سەرۆک بارزانی کە کارەکانی سەرخستنی بەستنی کۆنگرەی نەتەوەیی کورد بەردەوام دەبێت.
25/07/2013
شەوی رابردوو 24-7-2013 شەمەندەفەرێكی هێڵی خێرا، لە باكو‌وری رۆژئاوای ئیسپانیا و نزیك شاری سەنتیاگۆ كۆمپوستێلا لە هێڵەكەی دەردەچێت، بەو هۆیەشەوە 217 هاووڵاتی دەبنە قوربانی.
بەپێی هەواڵی ئاژانسی فەرەنسا و بە گوتەی گوتەبێژێكی دادوەری، تەرمی 73 كەس لە ژێر فارگۆنی شەمەندەفەرەكە دەرهێنراوە و چوار كەسی دیكەش لە نەخۆشخانە گیانیان لەدەستداوە، هەروەها 140 كەسی دیكەش بریندار بوون، کە تەندروستی 15 كەس لە بریندارەكان ناجێگیرە.
لەساڵی 1972 بەدواوە ئەو رووداوە بە خراپترین رووداوی شەمەندەفەر لەو وڵاتە هەژمار دەكرێت. بە پێی ئاماری كۆمپانیای رینفە، كە خاوەنی ئەو شەمەندەفەرەیە،247 گەشتیار لە شەمەندەفەرەكەدا بوون. رۆیتەرز لە زاری یەكێك لە گەشتیارەكان بڵاویكردووەتەوە "ئەو شەمەندەفەرە زۆر خێرا بووە و بۆیان كۆنترۆڵ نەكراوە".
ساڵی 2004-یش لە ئاكامی تەقاندنەوەی شەمەندەفەرێك191 كەس لە ئیسپانیا كوژران.
25&07&2013
حەسەن رووحانی سەرۆک کۆماری هەڵبژێردراوی ئێران، لە کاتی پڕوپاگەندەی هەڵبژاردندا، بەڵێنی بە کورد دا داخوازییەکانیان جێبەجێ بکات، بۆیە لە سەدا حەفتاویەکی خەڵکی رۆژهەڵاتی کوردستان دەنگیان بە رووحانی دا. گەرچی هێشتا کابینەی حکومەت پێک نەهاتووە ریفۆرمخوازانی کورد دەترسن رووحانی بەڵێنەکانی لە بیر بکات بۆیەلە نامەیەکدا داواکاریەکانی خۆیان وەبیر روحانی هێناوەتەوە.
25/07/2013
شه‌وی رابردوو، چه‌كداره تیرۆریسته‌كان هێرشیان كرده‌وه سه‌ر شاره‌دێی سڵێمانبه‌گ و 14 كه‌سیان كوشت و هه‌تا ئێستاش كۆنترۆڵی شاره‌دێیه‌كه‌یان به‌ده‌سته‌وه‌یه.
شه‌وی رابردوو، به ده‌یان چه‌كداری نه‌ناسراو، كه‌مینیان له سه‌ر رێگه‌ی سه‌ره‌كیی دووزخورماتوو- كه‌ركووك دانا و پاشان هێرشیان كرده سه‌ر شاره‌دێی سڵێمانبه‌گ و هه‌تا ئێستا كۆنترۆڵی ناو شاره‌دێیه‌كه‌یان به ده‌سته‌وه‌یه.
به‌رپرسی حه‌وزه‌ی حه‌مرینی یه‌كێتیی نیشتمانیی كوردستان، مه‌لا كه‌ریم، به ئاژانسی په‌یامنێری راگه‌یاند، چه‌كداره‌كان شه‌وی رابردوو سه‌عات 9ی شه‌و كه‌مینیان داناوه و 14 شۆفێری عه‌ره‌بیان گرتووه كه زۆربه‌یان شیعه بوون و دواتر كوشتوویانن.
گوتیشی دوای كوشتنی ئه‌و شۆفێرانه، گرووپه چه‌كداره‌كه كه ژماره‌یان نزیكه‌ی 150 كه‌س ده‌بێت، هێرشیان كردووه‌ته سه‌ر شاره‌دێی سڵێمانبه‌گ و ئێستا كۆنترۆڵی شاره‌دێیه‌كه‌یان به‌ده‌سته‌وه‌یه.
هاوكات هێزه‌كانی سوپای عێراقیش، بنكه‌كانی پۆلیس و به‌شێك له به‌ڕێوه‌به‌رایه‌تییه حكوومییه‌كانیان له سه‌ر شه‌قامی سه‌ره‌كیی ناوچه‌كه به‌ده‌سته‌وه‌یه.
شایانی باسه، له چه‌ند مانگی رابردووشدا، جارێكی دیكه گرووپه چه‌كداره‌كان، بۆ ماوه‌ی 3 رۆژ، شاره‌دێی سڵێمانبه‌گیان گرت و دوای كوژرانی چه‌ندین چه‌كدار و پۆلیس و هاووڵاتی، به گفتوگۆ، ناوچه‌كه‌یان راده‌ستی حكوومه‌ت كرده‌وه.
سیروان حه‌سه‌ن/ ئا. ر
pna
25/07/2013
بەرپرسانی زۆربەی حیزبەكانی رۆژئاوای كوردستان لە هوتێلەكانی شاری هەولێر لە دانوستاندندان، هەندێكیان لەو پێناوەدا دانوستاندن دەكەن كە ژمارەی حیزبەكان لە رۆژئاوای كوردستان كەمبكەنەوە، هەندێكیش گفتوگۆ لەسەر ئایندەی رۆژئاوای كوردستان دەكەن بە تایبەتی دوای پێشنیازەكەی PYD بۆ دامەزراندنی حكومەتێكی كاتی.
نزیكەی هەشت مانگە چوار پارتی رۆژئاوای كوردستان كە یەكێتیەكی سیاسییان دروستكردووە، دەیانەوێ یەكبگرن، بەڵام هێشتا هەر لە بازنەی راوێژ و گفتوگۆدا دەخولێنەوە، یەكێك لەو چوار پارتەش لە یەكێتییەكە دەكشێتەوە.
ئەو چوار پارتە بریتین لە: پارتی دیموكراتی كورد لە سووریا (ئەلپارتی)، كە لە ساڵی 1957 دامەزراوە و عەبدولحەكیم بەشار سەرۆكایەتی دەكات. پارتی یەكێتی كورد، كە لە ساڵی 2000 دامەزراوە و ئیبراهیم برۆ سەرۆكایەتی دەكات. هەروەها هەردوو پارتی ئازادی كورد بە سەرۆكایەتی مستەفا ئوسێ و مستەفا جومعە. ئەو چوار لایەنە رۆژی 30/11/2012 لە شاری هەولێر یەكێتییەكیان بەناوی (یەكێتی سیاسی دیموكراتی كورد/ سوریا) راگەیاند.
كورد كشایەوە و كوردستان جێی گرتەوە
هەرچەندە بەرپرسانی ئەو چوار حیزبە بەو نیازە ئەو یەكێتییەیان دروستكرد كە لە ئایندەدا ببنە یەك حیزب، بەڵام خەریكە یەكێتییەكە بەرەو هەڵوەشانەوە دەچێ، بە تایبەتی دوای ئەوەی پارتی یەكێتی كورد، بە سەرۆكایەتی ئیبراهیم برۆ لە یەكێتیەكە كشایەوە.
سەرەڕای كشانەوەی ئەو پارتە، هەرسێ پارتەكەی دیكە بەردەوامن لە هەوڵەكانیان و پێنج رۆژە لە هەولێر كۆدەبنەوە لەپێناو گەیشتن بە راگەیاندنی هەواڵی یەكگرتنیان.
بەشار ئەمین، ئەندامی مەكتەبی سیاسی پارتی ئازادی كورد لە سووریا بە(رووداو)ی گوت “یەكێتی سیاسی لە قۆناخی وتووێژكردنەوە پەڕیوەتەوە بۆ قۆناخی داڕشتنی لێكحاڵیبوون”. گوتیشی “كۆبوونەوەكانی هەولێر لەپێناوی گەیشتنە بۆ راگەیاندنی پارتێكی سیاسی یەكگرتوو”.
بەشار ئەمین ئاشكرای كرد كە دوای چوونە دەرەوەی پارتی یەكێتی كورد لەو یەكێتییە سیاسییە، پارتێكی دیكە شوێنی گرتووەتەوە، ئەویش پارتی یەكێتی كوردستانە. ناوبراو دامەزراندنی ئەو یەكێتییە بە گرنگ دەزانێت “بەهۆی ترسناكی دۆخی رۆژئاوای كوردستان، پێویست بە یەكێتییەك دەكات لەپێناو گەیشتن بە داواكارییە رەواكانی گەلی كورد”.
بەو نزیكانە یەكگرتنەكە رادەگەیەنن
كۆنترین پارتی رۆژئاوای كوردستان، پارتی دیموكراتی كورد لە سووریا (ئەلپارتی)یە كە لە ساڵی 1970 بووە دوو پارچە و بەسەر چەپ و راستدا دابەشبوو، ئیدی لەوە بەدواوە پارچەبوونی پارتەكانی كورد لە رۆژئاوا بووە دیاردە، ئەو دیاردەیە لەناو ئەنجوومەنی نیشتمانی كوردیش هەر درێژەی هەبوو. لە ماوەی تەمەنی یەك ساڵەی ئەم ئەنجوومەنەدا 3 پارتی ناو ئەو ئەنجوومەنە لێكترازان. ئێستا پتر لە 20 حیزب لە رۆژئاوای كوردستان هەن. بەڵام شەقامی كوردی لە رۆژئاوای كوردستان و خودی پارتە كوردییەكانیش باوەڕیان بە یەكگرتنەوە نییە و پێیانوایە بانگەشەكردنی ئەم 4 پارتەش تەنیا ئامانجی حیزبی و شەخسی لەپشتە.
بەڵام نوری بریمۆ، وتەبێژی ئەلپارتی دەڵێت كە ئەو یەكگرتنە سیاسییە قۆناخی زۆری بڕیوە “ئەو یەكێتییە سیاسییە وەك پرۆژەیەكی سیاسی لە پێناو یەكێتی مافی چوار پارتە كوردییەكە بوو، ئێمەش هەر كە بڕیاری یەكبوونمان دا لەروانگەی یەكخستن و رێكخستنی ماڵی كورد بوو لەپێناو بەدەستهێنانی مافە رەواكانی گەلی كورد”. گوتیشی “ئەنجامەكانی ئەو پرۆژەیە بەو نزیكانە دەردەكەون”.
سەبارەت بە كاریگەری كشانەوەی پارتی یەكێتی كورد لەو یەكێتیە سیاسیە، نوری بریمۆ گوتی “ئەو پارتە ئازادە چ بڕیارێك دەدات، بەڵام كشانەوەیان بە ئەندازەیەكی كەم كاریگەری دەبێت”.
ئەو چوار پارتە، ئەندامن لە ئەنجوومەنی نیشتمانی كورد لە سووریا كە 16 لایەنی سیاسی لەخۆدەگرێ، بۆیە هەندێك لە پارتەكانی ناو ئەو ئەنجوومەنە پێیانوایە ئەو یەكێتییە سەرەتایەكە بۆ هەڵوەشاندنەوەی ئەنجوومەنی نیشتمانی كورد لە سووریا.
نیعمەت داود، سكرتێری پارتی یەكسانی كورد بە (رووداو)ی گوت “هەر لە رۆژی راگەیاندنی یەكێتی سیاسی تێبینی خۆیان نیشاندا وەك پارتێك سەبارەت بەو هەنگاوە “چونكە ئەو رۆژەی ئەنجوومەنی نیشتمانی كوردی راگەیەندرا، هەموو شێوازێكی دیكەی گردبوونەوەو هاوپەیمانیمان رەتكردەوە وەكو بەرە و هەماهەنگی و هاوپەیمانی، لەسەر ئەوە رێككەوتین كە ئەنجوومەنی نیشتیمانی هاوپەیمانییەكی سیاسییە لەنێوان هەموو پارتە كوردییەكان”.
دەیانەوێ ئەنجوومەن ئەكتیڤ بكەن
ئەوە لەكاتێكدایە كە 7 حیزبی نێو ئەنجوومەنی نیشتیمانی كورد لە شاری هەولێر خەریكی دانوستاندنن بۆ ئەكتیڤكردنی ئەنجومەنەكە كە ماوەیەكە دەنگی نییەو چارەنووسی دیار نییە، ئەمەش بۆ دروستكردنی هاوسەنگی لەبەرامبەر PYD كە حوكمڕانی بەكردەوەی رۆژئاوای كوردستانە.
جەدعان عەلی، نوێنەری بزووتنەوەی چاكسازی كورد لە سووریا بە (رووداو)ی راگەیاند “زۆربەی حیزبەكانی رۆژئاوای كوردستان لە شاری هەولێرن، دەبێت لە قۆناخی ئێستادا هەموو حیزبە كوردییەكانی رۆژئاوای كوردستان سازش بۆ یەكدی بكەن”.
لەبارەی ئەنجامی كۆبوونەوەكانیان، ناوبراو گوتی “حیزبەكانی یەكێتی سیاسی هەوڵدەدەن ژمارەیەكی دیكەی حیزب بهێننە نێو ریزەكانی، ئێمە و حیزبی نیشتیمانی دیموكرات، حیزبی یەكسانی و حیزبەكانی یەكێتی سیاسی، هەوڵدەدەین دووبارە ئەنجوومەنی نیشتمانی كورد لە سووریا ئەكتیف بكەینەوە بۆ ئەوەی PYD ناچار بكرێ پابەندی رێككەوتننامەی هەولێر بێت”.
ئەلپارتی داوای 50 بە 50 دەكات
رۆژی 12/7/2012 لە نێوان ئەنجوومەنی نیشتمانی كورد لە سووریا و ئەنجوومەنی گەلی رۆژئاوای كوردستان دەستەی باڵای كورد راگەیێندرا، بەڵام چارەنووسی ئەو دەستەیە دیار نییە و PYD ئەلتەرناتیڤێكی بۆ دۆزیەوە ئەویش حكومەتی كاتییە. بەڵام ئەم حكومەتە لەلایەن ئۆپۆزسیۆنی سووریاوە قبوڵكراو نییە و بە هەوڵێكی دەزانن بۆ دابەشكردنی سووریا.
پێدەچێت چەند لایەنێكی كوردیش لەگەڵ PYD بەشداری لە پێكهێنانی ئەو حكومەتە كاتییەدا بكەن. سەرچاوەیەكی نزیك لە كۆبوونەوەكانی نێوان ئەلپارتی و PYD بە (رووداو)ی راگەیاند “ماوەیەكە شاندی PYD لە هۆتێلی خانزادی هەولێر لەگەڵ ئەلپارتی كۆدەبێتەوە، مەرجی ئەلپارتی دابەشكردنی دەسەڵاتە بەشێوەی 50 بە 50، بەڵام PYD رازی نابێت”.
24/07/2013
حكومەتی توركیا وەڵامی داواكاری عەبدوڵا ئۆجەلانی دایەوە و رایگەیاند "هیچ سزادراوێك بۆی نییە داوای كۆنفرانسی رۆژنامەوانی بكات و داواكردنیشی رەوا نییە".
دوێنێ دوای كۆبوونەوەی ئەنجوومەنی وەزیرانی توركیا بولەنت ئەرینچ، گوتەبێژی حكومەتی توركیا رایگەیاند "رێكخستنی كۆنفرانسێكی رۆژنامەوانی بۆ ئۆجەلان رێی تێناچێ، هەر زیندانییەك دەكرێ داواكاری هەبێت، بەڵام ناتوانێ كۆنفرانسی رۆژنامەوانی ساز بكات، داوا كردنیشی رەوا نییە".
رۆژی 21/7/2013 شاندێكی پارتی ئاشتی و دیموكراتی BDP كە پێكهاتبوو لە سەلاحەدین دەمیرتاش، هاوسەرۆك و پەروین بوڵدان، سەرۆكی گرووپی كوردی لە پەرلەمانی توركیا سەردانی عەبدوڵڵا ئۆجەلان، رێبەری بەندكراوی پارتی كرێكارانی كوردستانیان كرد، ئۆجەلان وەك داوایكرد كۆنفرانسێكی رۆژنامەوانی بۆ سازبكرێت، بە گوتەی خۆی "لەم رێگەیەوە دەتوانم هاریكاری زیاتری سەرخستنی پرۆسەكە بكەم".
23/07/2013
فه‌رمانده‌ی ئه‌ركانی سوپای ئه‌مه‌ریكا، 5 پلانی ئاماده‌كراوی سه‌ربازیی بۆ ده‌ستێوه‌ردان له قه‌یرانی ناوخۆی سووریا، پێشكه‌ش به سیناتۆره‌كانی ئه‌نجومه‌نی پیران كرد.
ژه‌نه‌ڕاڵ مارتین دیمپسی، فه‌رمانده‌ی ئه‌ركانی سوپای ئه‌مه‌ریكا، پلانه ئاماده‌كراوه‌كانی واشنگتۆنی بۆ ده‌ستێوه‌ردانی سه‌ربازی له دژی رژێمی سووریا، خسته به‌رده‌م كۆمیته‌ی هێزه سه‌ربازییه‌كانی ئه‌نجومه‌نی پیران.
به‌پێی راپۆرتی ئاژانسی فرانس پرێس، دوو پلان بریتییه له مه‌شق پێكردنی هێزه‌كانی ئۆپۆزسیۆن و گه‌یاندنی زانیاریی سه‌ربازی، یان به‌كارهێنانی هه‌زاران سه‌ربازی تایبه‌ت بۆ هێرش كردن و كۆنترۆڵ كردنی چه‌كه كیمیاییه‌كانی رژێمی به‌عس.
هه‌روه‌ها، راگه‌یاندنی ناوچه‌ی دژه فڕین، راگه‌یاندنی ناوچه‌یه‌كی ئاشتی یان رێڕه‌وێك بۆ یارمه‌تیدانی هاووڵاتیانی سڤیل، یان هێرشی كۆنترۆڵكراو بۆ كه‌مكردنه‌وه‌ی توانای سه‌ربازیی سوپای سووریا، 3 پلانی دیكه‌ی ئه‌مه‌ریكایه.
ژه‌نه‌ڕاڵ دیمپسی پلانه‌كانی به هه‌موو ورده‌كارییه‌كان و تێچووی هه‌ر پلانێك، خستووه‌ته به‌رده‌م ئه‌نجومه‌نی پیران و رایگه‌یاندووه بڕیاری كۆتایی له‌مباره‌یه‌وه، بڕیارێكی سیاسییه و له ده‌ست رێبه‌رانی سیاسیی ئه‌مه‌ریكادایه.
ئا. ر
pna
23/07/2013
لەسەر داوای مەسعود بارزانی، سەرۆكی هەرێمی كوردستان بەیانی ئەمڕۆ دووشەممە كۆبوونەوەی هێز و لایەنە سیاسییەكانی كوردستان لە هاوینەهەواری سەلاحەدین بەڕێوەچوو.
كۆبوونەوەكە بە بەشداریی ٤٥ پارت و لایەنی سیاسی چوارپارچەی كوردستان بەڕێوەچوو و لیژنەیەكی ٢١ كەسی راسپارد بۆ تەواوكردنی ئامادەكارییەكانی سازدانی كۆنگرەی نەتەوەیی كە بڕیارە مانگی داهاتوو لە هەولێر ببەسترێت.
لە كۆبوونەوەكەدا سەرۆكی هەرێمی كوردستان وتارێكی پێشكەشكرد و گرنگی كۆبوونەوەكەی بۆ ئامادەبووان باسكرد.
بە پێی زانیارییەكانی رووداو بەشداربووان جەختیان لەیەكڕیزی میللەتی كورد كردەوە بە رەچاوكردنی تایبەتمەندی پارچەكانی كوردستان و هەروەها داوایان كرد كە كورد لە رێگەی ئاشتیانەوە داوای مافەكانی خۆی بكات.
كۆبوونەوەكە هەروەها جەختیكردەوە كە پەیامی ئاشتی و پێكەوە ژیان بۆ گەلانی رۆژهەڵاتی ناوەراست دەنێرێت
دەقی وتارەكەی بارزانی
بەناوی خودای بەخشندەو میهرەبان
ئامادەبووانی بەڕێز
پارت و لایەنە سیاسییە تێکۆشەرەکانی کوردستان
خوشك و برا خۆشەویستەكان
ئەم كاتەتان باش
زۆر خۆم بە بەختەوەر دەزانم كە ئەمڕۆ میوانداریی ئێوەی بەڕێز دەكەم لەو كۆبوونەوە مێژووییەدا بۆ دەستكردن بە ئامادەكاریی كردەیانە بۆ كۆنگرەی نەتەوەیی كورد كە ساڵانێكی زۆرە وەك هەنگاوێكی گرنگ باس و گفتوگۆی لەبارەیەوە دەكەین. زۆر سوپاسی ئامادەبوونتان دەكەم و بەخێربێن.
كۆنگرەی نەتەوەیی كورد یەكێك بووە لە ئامانجە گرینگەكانی هەموو هێز و لایەنە سیاسییەكانی كوردستان و ماوەیەكی زۆرە كاری بۆ دەكرێ و ئێمە بەردەوام لە ڕاوێژ و ڕاگۆڕینەوەدا بووین لەگەڵ بەڕێزان مام جەلال و عەبدوڵڵا ئۆجەلان و لایەن كەسایەتییەكانی دیكە بەشەكانی تری كوردستان بۆ ئەو مەبەستە. بە بیرم دێت لەنیوەی دووەمی ساڵانی حەفتاكانەوە بەردەوام لەبارەی بایەخی بەستنی كۆنگرەی نەتەوەییدا نووسیومانە. بۆیەش بەڕاستی ئەوە ڕۆژێكی مێژووییە كە هەوڵ و هەنگاوەكان ئەمڕۆ گەییشتوونەتە ئەو ئاستەی كە ئەمڕۆ ئەم كۆبوونەوەیە دەبەستین بۆ دانانی كۆمیتەی ئامادەكاریی بۆ بەستن و بەڕێوەبردنی كۆنگرەی نەتەوەیی كورد كە بڕیارە دوای مانگێكی دیكە لە شاری هەولێر ببەسترێت.
ئامانجی سەرەكیی ئێمە لەو كۆنگرەیە بریتییە لەوەی هەموو لایەنە سیاسییە كوردییەكانی هەر چوار پارچەی كوردستان ببنە خاوەنی وتار و ستراتیژییەكی هاوبەش كە لەسەر بنەمای گەیاندنی پەیامی ئاشتی و پێكەوەژیان بۆ گەلانی ناوچەكە بنیات نرا بێت. ئێمە لەو كۆنگرەیەدا دەمانەوێ بە گەلانی عەرەب و تورك و فارس بڵێین، كە كورد چاوی لە پێكەوەژیانێكی ئاشتیانە و یەكسانە لەگەڵ ئێوەدا.
ئێمە نامانەوێ دژایەتیی هیچ گەل و دەوڵەتێكی دراوسێ و ناوچەكە بكەین، بەڵكو دەمانەوێ دوژمنایەتی بەتەواوەتی نەهێڵین و بگەینە ڕێككەوتنێكی تەواو و چارەسەرێكی ئاشتیانە و عادیلانەی كێشەی كورد، چونكە لەو باوەڕەداین بەوشێوەیە نەتەوەی كورد و سەروەت و سامانەكانی كوردستان دەتوانن بەشدارییەكی زۆر گەورە بكەن لە پێشخستنی ناوچەكە و لە بەرزكردنی ئاستی ژیانی هەموو گەلانی ناوچەكە. كورد دەیەوێ هۆكاری سەقامگیری بێت و، دەیەوێ هۆكاری بەهێزكردنی دیموكراسی بێت لە ناوچەكەدا، هیچ لەوانەش بە چەك ناكرێن بەڵكو پێویستیمان بە ئاشتییە.
ئەزموونی هەرێمی كوردستانیش نیشانیدا كە ئازادیی كورد نەك نابێتە مایەی شەڕ و هەڕەشە بۆ سەر دراوسێیەكان بەڵكو دەبێتە مایەی سەقامگیری و بووژانەوەی ژیان و ئابووریی ناوچەكانی دەورووبەریش. ئەوەش بەڵگەیەكی دیار و بەرچاوە بۆ ئاشتیخوازیی كورد.
ئامادەبووانی بەڕێز
دەمەوێ لێرەدا بە باوەڕێكی تەواوەوە بڵێم كە لە سەردەمی تازەدا بەهێزترین چەك و باشترین ڕێگە بۆ مامەڵەكردن لەگەڵ دنیای دەرەوە و مسۆگەربوونی مافە ڕەواكانی گەلەكەمان گرتنەبەری زمانی دیالۆگ و ئاشتی و پەیڕەوكردنی ڕێوشوێنە دیموكراتییەكانە. سەرئەنجام ئەو زمانە دەبێتە هۆی ئەوەی شەرعییەتێكی نێودەوڵەتی بدرێتە ویست و داواكارییەكانمان و پێگەی كوردیش لە نێوەندە جیهانییەكاندا بەهێزتر ببێت.
ئەگەر پێشتر كورد دەستی بۆ خەباتی چەكداری بردبێت لە ناچاری بووە و بۆ بەرگریكردن لە مان و ناسنامەی نەتەوەیی خۆی. كورد خەباتی چەكدارانەی بەسەردا سەپێندراوە و، بە حەزی خۆی دەستی بۆ نەبردووە. نەتەوەی كورد زۆر نەهامەتی بینیوە و هەموو جۆرە چەكێكی لەدژ بەكارهێنراوە، لەبەر ئەوەشە كورد زۆر حەزی لە ژیان و جیهانێكی بە بێ چەكە.
سوپاس بۆ خودا كە ئێستاكە سەردەمێكی دیكەیە و كەس ناتوانێ بە زۆری چەك و بە مەنتقی سڕینەوە ڕووبەڕووی كورد ببێتەوە. دەوڵەت و هێزەكانی ناوچەكەش ئەو ڕاستییەیان بۆ ڕوونبووەتەوە كە لەنێوبردنی نەتەوەی كورد بە خەیاڵیش بەدیناهێت. بۆیە لەو بارودۆخە تازەیەدا پێویستە گەلی كورد و هێزە سیاسییەكانی كوردستان ستراتیژییەكی هاوبەشی ئاشكرا و ڕێكوپێكدابڕێژن لەپێناو گەیاندنی پەیامی ئاشتییانەی گەلی كورد و دەبێ هەموو لایەنە كوردییەكانیش پابەندی ئەو پەیامە بن.
هێژایان..
دانانی كۆمێتەی ئامادەكاریی كۆنگرەی نەتەوەیی كورد وەك دەستپێكێك بۆ كاروبارەكانی كۆنگرە هەنگاوێكی گرنگ و بایەخدارە. داوا لە گشت لایەنە بەشداربووان دەكەم بە گیانێكی برایانە و نیشتیمانی و دوور لە هەموو جۆرە هەڵوێست و ئایدیۆلۆژییایەكی سیاسیی بەرتەسكلەگەڵ یەكتردا كار بكەن بۆ ئەوەی ئەم هەنگاوە بە سەركەوتوویی بنرێت. من لەوە دڵنیام كە تاك تاكی هاووڵاتیانی كوردستان و هەموو ناوەندە ئاكادیمی و كۆمەڵایەتی و مەدەنیی هەر چوار پارچەی كوردستان چاوەڕوانییەكی زۆریان لە ئێمە هەیە و ئومێدێكی زۆریان لەسەر سەركەوتووبوونی كۆنگرەكە هەڵچنیوە. ئەو چاوەڕوانی و ئومێدە دەبێ هاندەرێكی گەورە بێت بۆ هەموومان كە دەست لەناو دەست كار بكەین بۆ سەرخستنی گشت قۆناغەكانی كۆنگرەی نەتەوەیی كورد و بۆ ئەوەی بتوانین بە بڕیار و ڕاسپاردەی گرنگەوە كۆنگرەكە كۆتایی پێ بێنین و هەموو لایەك بە عەمەلی پێیەوە پابەند بێت.
هیوادارم بەشداربووان بتوانن تیمێكی لێهاتوو بۆ كۆمیتەی ئامادەكاریی كۆنگرە پێك بهێنن. بێگومان ئەندامبوون لەو كۆمیتەیە شانازییەكی گەورە دەبێت و ئەو كۆمیتەیە ئەركێكی هەستیار و مێژووییشی لەسەر شانە. هەر لە دانانی ڕێوشوێن و كاری لۆجستیكی بگرە هەتا دانانی چوارچێوەیەكی گشتی بۆ پەیام و ئامانجەكانی كۆنگرە و هەروەها دانانی میكانیزمێك بۆ پێكهێنانی سكرتاریەتی گشتیی و هەمیشەیی كۆنگرە بۆ ئەوەی كۆنگرەی نەتەوەیی ببێتە دامەزراوەیەكی نەتەوەیی و هەمیشەیی و دەستەیەكی هەڵبژێردراویش هەبێ بەدواداچوونی كار و بڕیار و ڕاسپاردەكانی كۆنگرە بكات.سەرۆكایەتیی هەرێمی كوردستانیش لە ئامادەكاری و سەركەوتنی بەڕێوەچوونی كۆنگرەدا هاوكارییەكی تەواوی دەبێت.
بەڕێزان
دەمەوێ لێرەدا بەڕوونی ئەوە بڵێم كە ئێستا ئێمە باس لە كۆنگرەی نەتەوەیی كورد دەكەین، مانای ئەوە نییە ئێمە بەرژەوەندیی نەتەوەكانی دیكەی كوردستانمان لەبەرچاو نییە بەڵكو واجبی هاونیشتیمانیبوون و مرۆڤایەتی ئەوەمان بەسەردا دەسەپێنێ كە لە هەموو بڕیارێكدا بەرژەوەندیی هەموو گەلانی كوردستان و هەموو كوردستانییەكانمان لەبەر چاو بێت. هەروەها داواتان لێ دەكەم كە بەهێزكردنی دەستكەوتەكانی هەرێمی كوردستان و دەستكەوتەكانی كورد لەهەموو شوێنێك بە بایەخەوە سەیر بكەن، چونكە ئەو دەستكەوتانە بەرهەمی ماندووبوون و قوربانیدانێكی زۆری نەتەوەكەمانەن.
لە كۆتاییدا هیوای سەركەوتن بۆ كارەكانتان بۆ دەخوازم. داوا لە هەموو لایەك دەكەم بە هەستكردنی تەواو بە بایەخ و بە بەرپرسیارێتیی ئەو كارە پیرۆزە، بەهەموو توانایەك كار بۆ پتەوتركردنی یەكڕیزی و یەكهەڵوێستی نێوانیان بكەن و نموونەیەكی شارستانی و پێشكەوتووی كاری سیاسی لە ناوچەكەدا بخەنەڕوو. من ئومێدێكی زۆرم بە دواڕۆژی نەتەوەی كورد هەیە و دڵنیام بە یەكگرتن و خەباتی بەردەوام و ئاشتیخوازانە داهاتوویەكی ڕووناك چاوەڕوانیەتی.
زۆر سوپاستان دەكەم
نەمری بۆ شەهیدان و
بژی كورد بژی كوردستان
رووداو -هەولێر
٢٠١٣/٧/٢٢
دوای ئەوەی كۆمپانیای ئێرانسێڵ لە پێشبركێیەكی لە رێگەی SMSەوە سووكایەتی بە عومەری كوڕی خەتاب، خەلیفەی دووەمی موسڵمانان كرد، رووبەڕووی ناڕەزاییەتیەكی زۆری سونەكانی ئێران بوەوە، بەو هۆیەشەوە ئێرانسێڵ بە شێوەیەكی فەرمی داوای لێبوردن دەكات.
كۆمپانیای ئیرانسێڵ، رایدەگەیەنێت" ئەو پرسیارانەی كە لەو نامەیەدا نێردراوە بۆ هاووڵاتیان لە لایەن كۆمپانیای ( كلیلی زێڕین ) نووسراوە و ئیرانسێڵ تەنها بەرپرسیارەتی لەوەدایە كە بە وردی چاودێری نەكردووە و بۆ ئەوەش داوای لێبوردن دەكات".
هەروەها ئێرانسێڵ دەقی لێبوردننامەكەی كۆمپانیای ( كلیلی زێڕێن )ی بڵاوكردۆتەوە كە دەڵێ" رێكخراوی فەرهەنگی ( كلیلی زێڕێن) لە چەند ساڵی رابردوودا لە رێگەی پێكهێنانی پێشبڕكێی SMS ی لە بۆنە ئایینیەكان، هەردەم بایەخی بە یەكگرتووی شیعە و سوننە داوەو ئەوەی كە لەو پێشبڕكێیەدا روویداوە تەنها هەڵەیەكی تەكنیكی بووە".
ئەو كۆمپانیایە نووسیویەتی " لەو پرسیارەدا باس لە دادگا و دادوەری كراوە و هەر لە وەلامەكەدا ناوی "شەریح دادوەر" هێنراوە بۆ ئەوەی بە ئاسانی وەڵام بدرێتەوە و خوێنەر تووشی هەڵە نەبێت".
نووسیویەتیشی" لەو مێژووەدا كە پرسیارەكە ئاماژەی پێدەكات، جەنابی عومەری كوڕی خەتاب لە ژیاندا نەبووە تا پرسیارەكە ئەو بگرێتەوە".
لە رۆژی 17تەمووزی 2013، كەمپینی بایكۆتكردنی ئێرانسێڵ، بە هۆی سووكایەتیكردنی ئەو كۆمپانیایە بە عومەری كوڕی خەتاب، خەلیفەی دووەمی مسوڵمانان، داوایان لە خەڵكی سوننەی ئێران كرد، سیم كارت و یەكەی ئەو كۆمپانیایە نەكڕن.
هەروەها لە رۆژی هەینی 19تەمموزی2013 مەولانا عەبدولحەمید، وتاربێژی هەینی پارێزگای زاهیدان، بە تووندی ئیدانەی ئەو سوكایەتیكردنەی ئێرانسێڵی كرد و هۆشداری بەو كۆمپانیایە دا كە دەبێت"بە شێوەیەكی فەرمی داوای لێبوردن بكات" .
هەر دەربارەی ئەو سوكایەتیكردنەی ئیرانسێڵ، دادوەری گشتی زاهیدان داوای تاوانی لەسەر ئێرانسێڵ تۆماركرد بە تۆمەتی ئەوەی ناكۆكی خستۆتە نێوان شیعە و سونە لە ئێران.
كۆمپانیای ئێرانسێڵ بۆ پەیوەندی مۆبایلە و بەپێی راگەیاندنەكانی ئێران زیاتر لە 30 ملیۆن بەشداربووی هەیە.
رووداو- sunnatonline
22/07/2013
عەبدوڵڵا ئۆجەلان، سەرۆکی بەندکراوی پارتی کرێکارانی کوردستان، رایگەیاند "پرۆسەی ئاشتی لەگەڵ تورکیا بە ئامانجی کۆتایی هێنان بەو کێشانەی ماوەی 30 ساڵە درێژەیان هەیە بەردەوامە و زۆر جددین، بەڵام پێویستە ئەنکەرە هەنگاوی بەرچاوتر بهاوێژێت بەر لە کردنەوەی خولی پەرلەمان لە مانگی تشرینی یەکەم".
پارتی کرێکارانی کوردستان و حکومەتی تورکیا لە کۆتایی ساڵی رابردوو دەستیان داوەتە دانووستان بۆ کۆتایی هێنانی ملمملانێی نێوانیان، کە بووەتە مایەی کوژرانی 40 هەزار کەس و کاریگەری خراپی هەبووە لەسەر تورکیا.
لە ئەنجامی نائومێدبوونی سەرکردەکانی کورد لە ئەنجامی پرۆسەی ئاشتی، کە مەترسیان هەیە حکومەتی تورکیا پێوەی پابەند نەبێت و پرۆسەی ئاشتی نێوانیان هەرەس بێنێت، رۆژی هەینی پارتی کرێکارانی کوردستان، دواین هۆشداری دایە تورکیا.
بەگوێرەی راگەیاندراوێکی BDP، ئۆجەلان دوێنێ بە شاندی BDPەی رایگەیاندووە "ئەو پرۆسەیەی دەستمان پێکردووە، پرۆسەیەکی قووڵە و بەردەوامە، بە هەموو هێزیەوە بەروپێش دەڕوات"، روونیشیکردەوە " پێویستە حکومەت خێرا هەنگاو بنێت، بەر لە کردنەوەی پەرلەمان و چاوەڕوان دەکرێت حکومەت هەنگاوی کردەیی و بەرچاو بهاوێژێت".
ئۆجەلان رایگەیاندووە، ئەو جارێ هەر هیوای بە پرۆسەی ئاشتی هەیە و گوتیشی "پرۆسەی ئاشتی نەگەیشتووەتە بنبەست".
سەرکردەکانی کورد داوایان لە حزبی داد و گەشەپێدان کردووە، پەلە بکات لەو چاکسازیانەی، کە لە رێککەوتنی ئەنکەرە لەسەری رێککەوتبوون و بریتی بوون لە هەڵوەشاندنەوەی یاسای تیرۆر، کە بەپێی یاساکە هەزاران کورد بە تۆمەتی هەبوونی پەیوەندی لەگەڵ پارتی کرێکاران خرابوونە زیندانەکانەوە، هەروها پرۆسەی پەروەرد و فێرکردن بە زمانی کوردی و کەمکردنەوەی رێژەی دەنگ بۆ کورسی پەرلەمانی لە هەڵبژاردنەکان، لەلایەنی کوردیشەوە دەوەستایە سەر پاشەکشەی چەکدارانی پەکەکە.
لە راگەیاندراوەکەی یەکشەممەدا، ئۆجەلان داوای کردووە، رێگای پێبدرێت چاوی بە کەناڵەکانی راگەیاندن بکەوێت بۆ ئەوەی بتوانن بیرۆکەکانی بگوازنەوە بۆ بەرەو پێشبردنی پرۆسەی ئاشتی.
22/07/2013
ئەمڕۆ ئەنجومەنی نوێنەرانی عێراق ە بۆ دەنگدان لەسەر پڕۆژە یاسای بەفەرمی ناساندن و جێبەجێ‌کردنی زمانی کوردی وەکو زمانێکی فەرمی لەدام و دەزگاکانی حکومەتی عێراقدا، کۆدەبێتەوە.
وتەبێژی لیستی هاوپەیمانی کوردستانی"موئەیەد تەیب"ڕایگەیاند:"هەموو لایەنە سیاسیەکانی ناو ئەنجومەنی نوێنەرانی عێراق لەگەڵ ئەو پڕۆژە یاسایەدا کۆکن و هیوادارین ئەمڕۆ دەنگی لەسەر بدرێت".
موئەیەد تەیب، گوتی:"ئەگەرچی ئێستا کاتێک پڕۆژە یاساکان دەنگیان لەسەر دەدرێت وەردەگێڕدرێن بۆ زمانی کوردی، بەڵام لەکاتی پێشکەش کردنی پڕۆژە یاساکان و قسەکردن لەناو ئەنجومەنی نوێنەرانی عێراقدا بەکوردی نییە و ئەو پڕۆژە یاسایە گرنگی خۆی هەیە".
ڕاشیگەیاند:"هەرکات ئەو پڕۆژەیە پەسەند کرا، هەموو ناسمانە و ئەو شتانەی لەلایەن دام و دەزگاکانی عێراقەوە دەردەهێنرێن، زمانی کوردیشیان لەسەر بێت".
زیرەک عەبدولڕەحمان/م.ش
pna
22/07/2013
ژیان‌و هاورێیه‌تی مارێك له‌سه‌ری منداڵێكی ته‌مه‌ن 10 ساڵان ماوه‌یه‌كه بووه‌ته یه‌كێك له ته‌وه‌ره‌كانی باسی زۆربه‌ی راگه‌یاندنه‌كانی جیهان.
ئه‌و ماره له‌ته‌مه‌نی بچوكییه‌وه له‌سه‌ری ئه‌و منداڵه‌دا ده‌ژی‌و ئه‌و دووانه ئه‌وه‌نده پێكه‌وه هاوڕێن‌و په‌یوه‌ستن به یه‌كتر كه نه ماره‌كه حه‌زده‌كات له‌سه‌ری منداڵه‌كه بێته ده‌رێ، نه ئه‌و كوڕه‌ش حه‌زی لێیه بۆ ده‌رهێنانی ئه‌و ماره مێشكی بداته ده‌ست پزیشكه‌كانی نه‌شته‌رگه‌ری.
ئه‌و هاوڕێیه‌تییه سه‌یره ئه‌وه‌نده په‌ره‌ی سه‌ندووه كه ئه‌و منداڵه حه‌ز به‌یاری كردن به‌هیچ له‌عابه‌یه‌ك ناكات‌و به‌رده‌وام حه‌زده‌كات ته‌واوی كاته‌كانی خۆ له‌گه‌ڵ ئه‌و ماره‌دا به‌سه‌ر ببات‌و یاری له‌گه‌ڵدا بكات.
21/07/2013
كەمبوونی دەواو دەرمان لە پارێزگای خوزستان گەیشتۆتە ئاستێك كە نەخۆشەكان بۆ "شكاندنی ئێش و ئازار"ه‌کانیان به ناچاری روویان لە ماددە هۆشبەرەكان كردوە.
بەپێی راپۆرتی سایتی "دیگەربان" ئەشرەف فەرامەزریان، بەڕێوەبەری ناوه‌ندیی هێمۆفیلیی پارێزگای خووزستان گوتوویەتی: " ئه‌و نه‌خۆشانه كاتێ ئێش و ئازاری زۆر هروژمیان بۆ دێنی‌و دەرمانیان لە بەر دەست‌دا نەبێ، بە ناچاری روو لە بەكارهێنانی ماددەی هۆشبەر دەكەن تا لەم رێگەوە ژان و ئازارەكانیان هێور بكەنەوە.
ناوبراو ده‌ڵێ گران بوونی نرخی دەرمانی یەكێكی دیكە لە هۆكارەكانی روو كردنی ئەم نەخۆشانە له ماددەی هۆشبەره‌و ده‌ڵێ ڕێکخراوی دابین كردنی كۆمەڵایەتی باری بەرز بوونەوەی نرخی دەرمانەكان ناخاتە سەر شانی خۆی‌و، نەخۆش ناچارە جیاوازیی نرخەكان لە گیرفانی خۆی دابنێ.
جێی باسە زیاتر لە ساڵێكە كەم بوونی دەرمانی نەخۆشی‌یە تایبەتەكان، لە شارە جۆراوجۆرەكانی وڵات ئەم نەخۆشانەی لەگەڵ گرفتێكی زۆر بەرەوڕوو كردۆتەوەو بە پێی راپۆرتەكان هێندێك لە بنەماڵەی ئەم نەخۆشانە بەدوای گرانبوونی نرخی دەرمانە تایبەتەكان که‌وتوونه‌ته ژێر هێڵی هەژاری.
شایانی باسه ئەم راپۆرتە پێوەندی بە بەشێك لە گیرو گرفتی نەخۆشە تایبەتی‌یەكان لە ئێران هەیەو كاربەدەستانی دەوڵەت ئێستاشی لەگەڵ بێ بۆ چارەسەری ئەم گرفتانە هیچ هەنگاوێكی كاریگەریان هەڵنەهێناوەتەوە.
۲۱ ژوئیه ۲۰۱۳
لە درێژەی ئامادەکارییەکان بۆ ئەنجامی کۆنفڕانسی نەتەوەیی لە هەولێر، سەرۆکی هەرێم نامەی بۆ سەرجەم لایەنە سیاسییەکانی کوردستان ناردووە.
پاش بڵاوبوونەوەی لێدوانی بەرپرسانی بەدەپە لەمەڕ دەستپێکی ئامادەکارییەکان بۆ ئەنجامی کۆنفڕانسی نەتەوەیی لە هەولێر، زانرا کە سەرۆکی هەرێمی کوردستانیش بە ناردنی نامە، سەرجەم لایەنە سیاسییەکانی کوردستانی ئاگادار کردۆتەوە کە کۆنفرانسەکە لە داهاتوویەکی نزیکدا بەڕێوەدەچێت.
زانیارییەکە لە لایەن دوکتۆر "ئومێد سەباح"، گوتەبێژی فەرمیی سەرۆکایەتیی هەرێمی کوردستانەوە بڵاوکراوەتە و تێیدا هاتووە کە "سەرۆکی هەرێم لە نامەیەکدا کە ئاراستەی سەرجەم لایەنە سیاسییەکانی هەر چوارپارچەیکوردستان کراوە"، داوای لێکردوون کە "کۆبوونەوەیەک بەمەبەستی پێکهێنانی کۆمیتەی ئامادەکار بۆ کۆنگرەینەتەوەیی کوردی" ئەنجام بدەن.
لە روونکردنەوەکەدا چ زانیارییەک سەبارەت بە رێکەوتی کۆنفرانسەکە نەهاتووە و تەنیا گوتراوە کە "لە ئایندەیەکەینزیکدا" قەناعەت کراوە.
لە رۆژانی رابردوودا، وەفدێکی پارتی ئاشتی و دێمۆکراسی لە باکووری کوردستانەوە سەردانی هەولێریان کردبوو تا لەمبارەوە گفتگۆ لەگەڵ بەرپرسانی هەرێمی کوردستان و حیزب و لایەنە سیاسییەکانی باشوور بکەن.
مانگی رابردوو، هەواڵی دیداری نهێنیی "مەسعوود بارزانی"، سەرۆکی هەرێمی کوردستان و "موراد قەرەیلان"، ئەندامی دەستەی سەرۆکایەتیی کۆما جڤاکێن کوردستان و بڵاوببۆوە و به گوێرەی زانیارییەکان، ئەنجامی کۆنفڕانسی نەتەوەیی کورد، مژاری سەرەکی گفتگۆی نێوان دوو لایەن بووە.
قەرەیلان هەفتەی رابردووش بە ئاژانسی فراتی راگەیاندبوو کە پێشکەوتنی ئەرێنی لەمبارەوە هاتوونەتە ئاراوە بەڵام ناوبراویش زانیاری زیاتری لەمبارەوە نەدابوو.
کۆنفڕانسی نەتەوەیی کورد، بڕیاربوو ساڵی رابردوو ئەنجام بدرێ بەڵام بە هۆی هەندیک ناکۆکی پشت پەردە و بە دەنگۆی بوونی هەندێک گووشاری دەرەکی، کۆنفڕانسەکە بۆ ماوەیەکی نادیار دواخرابوو.
بڕیارە لەو کۆنفڕانسەدا، سەرجەم حیزب و لایەنە سیاسییەکانی کورد لە ٤ بەشی کوردستان و تەنانەت کوردەکانی هەندەران بەشدار بن و گفتگۆ لە سەر چۆنییەتی دیاریکردنی ستراتێژییەکی نەتەوەی بکەن و هاوکاری نێوانیان پەرە پێبدەن.
20/07/2013
ڕۆژنامەی وەتەنی میسری نووسیویەتی، دەستگای هەواڵگریی وڵاتەکەی، لە چەند ڕۆژێكدا فایلێك دەدات بە لێكۆلەرەوان، كە بە هۆیەوە مورسی تۆمەتبار دەكات بە گەیەنەر و ئاشكراكەری نهێنییەكان بە ئەمەریكا و بەریتانیا.
بەپێی زانیارییەكانی ڕۆژنامەی وەتەن، كە لە ژمارەی ئەمڕۆ یەكشەممەیدا بڵاوی كردووەتەوە، سەرۆكکۆماری لە کار لابراو و دەستبەسەركراو، محەممەد مورسی، لە ڕێی ڕاوێژكارێكییەوە كە ئێستا لە شوێنێكی حەوانەوەی سوپا لەگەڵیدایە، نامەیەكی بۆ سەركردایەتیی گشتیی سوپا ناردووە و تێیدا داوای لێخۆشبوون و ئازادكردنی دەكات، لەبەرانبەردا خۆی و خێزانەكەی وڵات جێ دەهێڵن و داوایش لە هەوادار و شوێنكەوتووانی دەكات واز لە خۆپێشاندان بهێنن و بچنەوە ماڵەكانیان.
هەر لەو نامەیەدا كە بە دەستی خۆی نووسراوە(دەستنووس)ـە، مورسی داوا دەكات سەركردەكانی ئیخوان كە دەستگیر كراون ئازاد بكرێن؛ هاوكات داوا دەكات سوپا خۆی(مورسی) دادگایی نەكات.
وەك ئەوەی ڕۆژنامەكە لە زاری سەرچاوە سیاسییەكانەوە زانیویەتی، ئەو داوایانەی محەممەد مورسی، لە لایەن هێزە چەكدارەكانەوە ڕەت كراونەتەوە؛ سوپایش وەڵامی داوەتەوە كە ئەوە گەلی میسرییە كە خاوەنی وەها بڕیارێكە، چونكە بە هۆی بابەتگەلێكەوە لە لایەن دادگاوە داوا كراوە.
21/07/2013
- داواکاری گشتیی کرماشان: لێکۆڵینەوە لەبارەی لێدانی قوتابیان دەکەین
- هونەرمەندی نەتەوەیی کورد سەید عەلی سەردەشتی لەوڵاتی سوید کۆچیدوایی کرد
- گفتوگۆكانی ئێران و ئەمریكا لە عومان دوای دو کاتژمێر کۆتایی هات
- ئێران شەڕو دانوستانی ناڕاستەوخۆی پێ باشە!
- داواکارییەکانی ئێران و ئەمریکا لەیەکتریی چیە؟
- وەزیری بەرگریی ئیسرائیل هۆشداری دەداتە ئەحمەد شەرع
- وادەی هێرشی ئەمریکا بۆ سەر ئێران ئاشکرا کرا
- دەستووری کاتی سوریا نیگەرانی لایەن کوردییەکان و چاودێرانی لێدەکەوێتەوە
- بارودۆخی نالەباری ئابووریی ئێران پێدەچێت کۆماری ئیسلامی ناچار بکات لەگەڵ سەرۆک ترامپ ڕێککەوتن بکات
- عڕاقچی: هێشتا نامەکەی ترەمپ بە دەستمان نەگەیشتووە
- وەزیری دەرەوەی ئێران دەڵێت بڕیارە نامەکەی ترامپ لە لایەن نێردراوێکی وڵاتێکی عەرەبیەوە بگەیەنرێتە تاران
- مەزڵوم عەبدی و ئەحمەد ئەلشەرع بە ڕێکەوتن دەگەن
- 8ی مارس.. شۆڕشێك لەپێناو مافی ژنان
- سری سورەییا ئۆندەر: باخچهلی پێی گوتم، ڕۆژێک دێت پێکەوە هەڵپەڕکێی ئاشتیی دەکەین
- حكوومهتی ئێران : له‌گه‌ڵ ئهورووپا درێژه به گفتوگۆ ئهتۆمییهكان دهدهین
- عەلی باپیر، سەرۆکی کۆمەڵی دادگەری کوردستان سەبارەت بە پەیامی ئۆجەلان"هیوادارم هەردوولا بە کردەوە بەدەم بانگەوازەکەوە بچن."
- ئەمینداری گشتیی یەکگرتوو پەیامی ئۆجەلان "پەیامێکی پڕ لە بەرپرسیاریەتی و بایەخ و واقعیەتە"
- سەرۆك بافڵ جەلال تاڵەبانی: پێشوازی لە پەیامەکەی بەڕێز عـ.ـەبدوڵا ئـ.ـۆجەلان دەکەین
- سەرۆک بارزانی: هیوادارین پەیامەکەی ئۆجەلان دەستپێکێک بێت بۆ ئەوەی پڕۆسەی ئاشتی رێی خۆی بگرێت
- زەینەب جەلالیان لە 17هەمین ساڵی زیندانیکردنیدا لە ناو زیندانەوە باس لە ئازارەکانی دەکات
- بزووتنەوەی کۆماریخوازانی ڕۆژهەڵاتی کوردستان ٢ی ڕێبەندان، ٧٩هەمین سالرۆژی دامەزرانی یەکەم کۆماری کوردستان، لە نەتەوەی کورد پیرۆزدەکات
- پەیامی پیرۆزبایی کۆماریخوازان بۆ بەرێز مەسعوود پزیشکیان
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
