به‌ڕێزان ( عوسمان عه‌به پێنجوێنی یان عوسمان قه‌ڵادزه‌یی) و( جه‌واد حه‌یده‌ری) به‌داخه‌وه وتیان به‌ڵێ ڕاسته و كۆچی دوایی كردووه؟
هونه‌رمه‌ند و پێشمه‌رگه ، سروودبێژ و گۆرانیبێژ...
کۆڕەوو شەنگال وتووەو دەیڵێت و بەشداریی کاریگەری لەئاهەنگەکانی سەرفیرازیدا بووەو دەبێت.
مستەفا داداری موکریانی مەهابادی خۆی بەخوێندکاری (مام هێمنی شاعیر ١٩٢١-١٩٨٦) دەزانێ و کاتێک قسە دەکا...
باسمان بۆ بکەن، ئەو ئۆرکێسترەی ئێوە چەنساڵێک ژەنیاری بوون؟ئەو ئۆرکێسترە بە ئۆرکێستری رادیۆ کرماشان ناسراو بوو و لە سەرەتاشەوە سەرپەرەشتییەکەی بەدەستی بەڕێز عەبدولسەمەدیان بوو کە...
بەر دەکەوێت بەڵام لەو لایشەوە هەر بە پاڵپشتی ئەو سامانە دەوڵەمەندە،خۆی دوو هێندە لە نێو ڕووبەری فەرهەنگیی کورددا دەردەخات. هێشتاکەیش کتێبخانەکەی پڕیەتی لە دەیان بەرهەمی...
پارتی دیموكراتی كوردستان هێرشكردنەسەر كەمالی سەید قادر ئیدانە دەكات و بە "دەستدرێژیی" لە قەڵەمی دەدات.
لە روونكردنەوەكەی مەكتەبی سیاسی پارتی دیموكراتی كوردستاندا هاتووە: "ئێمە لە مەكتەبی سیاسی پارتی دیموكراتی كوردستان بە نیگەرانییەكی زۆرەوە لەو رووداوە نەویستراوە دەڕوانین و بە توندی مەحكومی دەكەین. هاوكات ئەوەیش دووپات دەكەینەوە كە ئازادی بیروڕا و ڕا دەبڕین مافێكی بنەڕەتی مرۆڤە و لە هەرێمی كوردستانیشدا بە یاسا پارێزراوە".
ئاماژە بەوەش دراوە "جێی داخیشە كە هەندێ حزب و دەزگای راگەیاندن بۆ سوودوەرگرتن لەم رووداوە وەكو بەشێك لە پروپاگەندەی پێشوەختە بۆ هەڵبژاردن و سواڵاكردنی دەنگ، بەر لەوەی هیچ لێكۆڵینەوەیەك كرابێ و شتێك لە رووداوەكە روون بووبێتەوە، پەنجەی تۆمەت بۆ پارتی دیموكراتی كوردستان رادەكێشن".
دەقی روونكردنەوەكە:
رونكردنەوەیەك لە مەكتەبی سیاسی پارتی دیموكراتی كوردستانەوە
لەبارەی دەستدرێژیكردنە سەر دكتۆر كەمال سەید قادر
لە كاتێكدا كە دكتۆر كەمال سەید قادر پاڵێوراوی حزبی ئایندە بۆ پەرلەمانی كوردستان بە نیازی ئەنجامدانی گردبوونەوەیەكی سیاسی بووە لە بەردەم پاركی شار لە هەولێر، ژمارەیەك كەسی نەناسراو دەستدرێژییان كردۆتە سەری و بەو هۆیەوە بریندار بووە و گەیەنراوەتە یەكێك لە نەخۆشخانەكانی فریاكەوتن بۆ چارەسەر.
ئێمە لە مەكتەبی سیاسی پارتی دیموكراتی كوردستان بە نیگەرانییەكی زۆرەوە لەو رووداوە نەویستراوە دەڕوانین و بە توندی مەحكومی دەكەین. هاوكات ئەوەیش دووپات دەكەینەوە كە ئازادی بیروڕا و ڕا دەبڕین مافێكی بنەڕەتی مرۆڤە و لە هەرێمی كوردستانیشدا بە یاسا پارێزراوە. بەو پێیەش جگە لە دامودەزگا پەیوەندیدارەكانی حكومەتی هەرێم كە ئەركی پاراستنی ئەم مافەیان دەكەوێتە ئەستۆ، هەروەها پێویستە ببێتە نەریت و رۆشنبیری لەلای هاووڵاتیان كە رێز لە رای جیاواز بگرن و مافی دەربڕین و مومارەسەكردنی بە شێوەی مەدەنییانە فەراهەم و مسۆگەر بكەن و دەستدرێژی نەكەنە سەر، یان سنوورداری بكەن.
ئێمە وێڕای مەحكوم كردنی ئەم دەستدرێژی و ناهەقییە، داوا لە دەزگا پەیوەندیدارەكان دەكەین بە زووترین كات لێكۆڵینەوە لەم رووداوە بكەن و رێكاری یاسایی بگرنە بەر بۆ دۆزینەوەی بكەرەكان و بە سزا گەیاندنیان.
جێی داخیشە كە هەندێ حزب و دەزگای راگەیاندن بۆ سوود وەرگرتن لەم رووداوە وەكوو بەشێك لە پروپاگەندەی پێشوەختە بۆ هەڵبژاردن و سواڵاكردنی دەنگ، بەر لەوەی هیچ لێكۆڵینەوەیەك كرابێ و شتێك لە رووداوەكە روون بووبێتەوە، پەنجەی تۆمەت بۆ پارتی دیموكراتی كوردستان رادەكێشن. ئەم كارەیش پێشێلكردنی زەقی یاساییە بەرامبەر بە پارتیمان و حكومدانی پێشوەختەی بێ بەڵگەیە و ئێمە ناچار دەكات داكۆكی لە پارتیمان بكەین و رێكاری یاسایی بەرامبەر بەو لایەن و دەزگا میدیاییانە بگرینە بەر.
دووبارە دەستدرێژی بۆسەر دكتۆر كەمال و هەر كەس و لایەنێك مەحكوم دەكەین، هاوكات تۆمەتباركردنی پارتیشمان بە بێ بەڵگە، ریسوا دەكەین و پێویستە ئەنجامدەرانی هەر دووكیشیان رووبەرووی دادگا بكرێنەوە.
مەكتەبی سیاسی
پارتی دیموكراتی كوردستان
20/7/2013
ژمارەیەکی بەر چاو لە ئەندامانی ئەنجوومەنی نوێنەرانی ئەمریکا لە نامەیەکدا بۆ باراک ئۆبامای سەرۆک کۆمارییئەووڵاتە، داواکارن دانوستان لەگەڵ حەسەن روحانی، سەرۆکی نوێی هەڵبژێردراوی ئێران بکات.
ئەو نامەیە لەلایەن ١٣١ ئەندامی ئەنجوومەنی نوێنەرانی ئەمریکاوە، بە دیموکراتەکان و کۆماریخوازەکانەوە ئیمزا کراوە.
ئەو نامەیە لە لایەن دەیڤید پرایس، نوێنەری دیموکراتەکان لە کارۆلینای باکوورو چارلز دنت نوێنەری کۆماریخوازەکان لە پەنسیلوانیا رێکخراوە و دیارترین کاری
ئەنجموومەنی نوێنەرانە بۆ پشتیوانی دانوستان لەگەڵ ئێران.
بە گوتەی گوتەبێژی پرایس، دوێنی نامەکە گەیەنراوەتە کۆشکی سپی.
لەبەشێکی نامەکەدا هاتووە، دەەبێ هەموو رێککبکەوین کە دووباکردنەوەی رێگەی دیپلۆماسی بەشێکە لە ستراتیژی ئەمریکا بەانبەر بە ئێران".
حەڤدە کەس لەو نوێنەرانەی کە ئیمزای ئەو نامەیەیان کردووە، لە کۆماریخوازەکانن.
هەروەها لە نامەکەدا داوا لە باراک ئۆباما، کراوە کە کارێک نەکەن پێگەی روحانی لە بەرانبەر تۆندڕۆکان لە ئێران لاواز بکەن.
چەند رۆژ پێش ئیستاش لە نامەیەکدا ژمارەیەک لە کەسایەتییە دیارەکانی سیاسی و سەربازی ئەمریکا داوایان لە باراک ئۆباما کرد کە دانوستان لەگەل حەسەنروحانیلە دەست نەدات.
ناردنی ئەو نامانە لە کاتێکدایە کە دوو هەفتە لەمەوبەر، کومیتەی پێوەندییە دەرەکییەکانی ئەنجوومەنی نوێنەرانی ئەمریکا کلە نامەیەکدا کە ٤٥ کەس ئیمزایایانکردبووداوایان لە ئۆباما کردووە کە بێ گوێدان بە هەڵبژرادنی رۆحانی، گەمارۆکان لەسەر ئێران توندتر بکات.
ئەنجوومەنی نوێنەرانی ئەمریکا یەکێک لە دوو ناوەندی یاسادانەرانی کۆنگرێسی ئەمریکایە کە ٤٣٥ ئەندامی هەیە و زۆرینەیان کۆماریخوازن.
ش.ب
pna
20/07/2013
به‌پێی راپۆرتێكی ماڵپه‌ڕی (وۆرڵد تریبوون)ـی ئەمەریکایی کە دوێنێ هەینی بڵاو بووەتەوە، له چه‌ند رۆژی رابردوودا و به فه‌رمانی ئه‌فسه‌رانی باڵای سوپای پاسدارانی ئێران، هێزێكی زۆر هێنراوه‌ته سه‌ر سنوور کە ژماره‌یه‌كی زۆر تانك و زرێپۆشیان پێیە.
به‌رپرسێكی سه‌ربازیی ئێرانی بە ڕۆژنامەی (وۆرڵد تریبوون)ـی راگه‌یاندووه، هێزه‌كه‌یان له‌ئاماده‌باشیدایه بۆ لێدانی چه‌كدارانی پارتیی ژیانی ئازادیی كوردستان (پژاك) كه به باڵی ئێرانی پارتیی كرێكارانی كوردستان(پەکەکە) ناسراوە و، له چیاكانی سه‌ر سنوور نیشته‌جێ بوون.
هه‌روه‌ها ئه‌و به‌رپرسه گوتووشیەتی ئێران به‌نیازه بنكه‌ی سه‌ربازی له ناوچه سنوورییه‌كان دابنێت، بۆ ئه‌وه‌ی هه‌ر كاتێك بیه‌وێت هێرش بكاته سه‌ر ئه‌و ناوچه‌یه.
هێنانی ئەو هێزە بە گوتەی سەرچاوەکە، مه‌به‌ست لێی ئه‌وه‌یە جارێكی دیكه ده‌ست بكاته‌وه به هێرشه‌كانیان بۆ سه‌ر ناوچه سنوورییه‌كانی كوردستان. ئەمەیش لە کاتێکدایە کە له ساڵی ٢٠١٢ـەوە پژاك راگرتنی شه‌ڕی دژی ئێران راگه‌یاندووە.
به‌رپرسه ئێرانییه‌کە ئاشكرایشی كردووه كه پژاكیش بۆ ئه‌م هه‌ڵمه‌ته سه‌ربازییه نوێیه‌ی ئێران، خۆی ئاماده كردووه.
20/07/2013
گوتەبێژی وەزارەتی دەرەوەی ئێران رایدەگەیەنێت تا ئێستا چەندین جار فرۆكەكانی ئەو وڵاتە لە لایەن حكومەتی عێراقەوە پشكێنراون، بەڵام چەكیان تێدا نەدۆزراوەتەوە.
عەباس عێراقچی، گوتەبێژی وەزارەتی دەرەوەی ئێران، لە وەڵامی قسەكانی هۆشیار زێباری، وەزیری دەرەوەی عێراق، دەڵێت:"حكومەتی بەغدا تا ئێستا چەندین جار ئەو فڕۆكە ئێرانیانەی پشكنیوە كە بەرەو سوریا دەچوون و دواتر بە فەرمی رایگەیاندووە كە ئەم فڕۆكانە هیچ جۆرە چەكێكیان تێدا نەبووە".
عەباس عێراقچی بێ ئەوەی ناوی هیچ كەس یان لایەنێك بهێنێ، گوتی:" بانگەشەی ناردنی چەك لە ئێرانەوە بۆ سوریا لە لایەن كەسانێكەوە دەكرێت كە پشتگیری لە ئۆپۆزیسیۆنی سوریا دەكەن".
هۆشیار زێباری، وەزیری دەرەوەی عێراق،پێشتر رایگەیاندبوو كە عێراق ناتوانێت رێگە لە ناردنی چەك لە ئێرانەوە بۆ سوریا بگرێت.
19/07/2013
عه‌لی شه‌لا، سەرکردە لەهاوپەیمانی دەوڵەتی یاسا لە کۆنگرەیەکی رۆژنامەوانیدا لەبەغدا رایگەیاند "پێداگیری هاوپەیمانی کوردستانی لەسەر بوونی دێرێکی شیعری کوردی لەنێو رەشنووسی سرودی نیشتمانیی بەشێکە لەو ناکۆکیانەی کە بوونە هۆکاری دواخستنی دەنگدان لەسەر سروودی نیشتمانیی لە دانیشتنی ئەمڕۆی پەرلەمان".
شه‌لا گوتیشی "پێشتر سه‌رجه‌م په‌رله‌مانتاران رێككه‌وتبوون له‌سه‌ر ئه‌وه‌ی ده‌نگ به پێشنیاری یاسای سرودی نوێنی نیشتمانیی عیراق بده‌ن، به‌ڵام له‌كاتی ده‌نگدان هه‌ندێك له په‌رله‌مانتاران و پێكهاته جیاوازه‌كان داواكاریی خۆیان پێشكه‌ش كردو بوونە هۆکاری دواخستنی دەنگدان لەسەر پێشنیارە یاساکە".
جەختشی کرد "ئه‌گه‌ر ئه‌و پرۆژه‌پێشنیاره سه‌ر نه‌گرێت، ئه‌وا سه‌رجه‌م هۆنراوه‌ی سرووده‌كه به زمانی عه‌ره‌بی ده‌بێت و به سه‌رجه‌م زمانه‌كانی دیكه ده‌سته‌واژه‌ی (بژی عێراق)ی كۆتایی هۆنراوه‌كه داده‌نرێت".
19/07/2013
سه‌رۆككۆماری ئێران دوای گه‌یشتنی بۆ به‌غدا، له‌گه‌ڵ جێگری سه‌رۆككۆماری عێراق و سه‌رۆكوه‌زیران كۆبووه‌وه و دواتر سه‌ردانی ئه‌نجومه‌نی نوێنه‌رانی عێراقی كرد.
پاشنیوه‌ڕۆی دوێنێ سه‌رۆككۆماری ئێران، مه‌حموود ئه‌حمه‌دی نه‌ژاد، به‌سه‌ردانێكی فه‌رمی گه‌یشته به‌غدا و له‌لایه‌ن جێگه‌ری سه‌رۆككۆماری عێراق پێشوازیی لێكرا و له كۆنگره‌یه‌كی رۆژنامه‌وانیدا جێگه‌ری سه‌رۆككۆماری عێراق خوشحاڵی خۆی ده‌بڕی به هاتنی سه‌رۆككۆماری ئێران.
ئه‌حمه‌دینژاد دواتر له‌گه‌ڵ سه‌رۆكوه‌زیرانی عێراق، نووری مالكی كۆبووه‌وه و دوابه‌دوای كۆبوونه‌وه‌كه، سه‌ردانی په‌رلمانی عێراقی كرد و كۆبوونه‌وه‌یه‌كی له‌گه‌ڵ لیسته‌كانی نێو په‌رلمان ئه‌نجام دا.
له كۆبوونه‌وه‌كه‌دا داوا كرا كه لیژنه‌یه‌ك له په‌رلمانی عێراق و په‌رلمانی ئێران پێك بهێنرێت بۆ چاره‌سه‌ركردنی كێشه‌كانی نێوان هه‌ر دوو وڵات و به‌تایبه‌تی كێشه‌ی سنووری.
بڕیار وایه سه‌رۆككۆماری ئێران چه‌ند رۆژیك له عێراق بمێنیته‌وه و سه‌ردانی پارێزگای كه‌ربلا و نه‌جه‌ف بكات.
سامان بابان/ ئا. ر
pna
19/07/2013
نەجمەدین كەریم رایگەیاندووە "تەندروستی مام جەلال بەرەو باشبوونی تەواو چووە". سەبارەت بە گەڕانەوەشی بۆ كوردستان دەڵێ "چاوەڕوانی بڕیاری پزیشكە تایبەتەكانیەتی".
د.نەجمەدین كەریم، پزیشكی تایبەتی مام جەلال، سەرۆك كۆماری عێراق و سكرتێری گشتیی یەكێتیی نیشتیمانیی كوردستان، كە تەنها كەسی رێپێدراوە لێدوان دەربارەی تەندروستی بدات بە SNNی راگەیاندووە "تەندروستی مام جەلال رۆژبەڕۆژ بەرەو باشتر دەچێت، بەڵام هێشتا قۆناخەكانی چارەسەری پزیشكی ماوەو بۆ گەڕانەوەشی بۆ خاكی كوردستان چاوەڕوانی پزیشكە تایبەتمەندەكانی دەكەین".
گوتیشی:" ئەمڕۆ نیوەڕۆ بە تەلەفۆن قسەم لەگەڵ مام جەلال كردووە و تەندروستی باش بووە و پشت بەخوا بەرەو باشتر دەچێت".
18/07/2013
ئه‌ندامی کۆنسه‌ی سه‌رۆکایه‌تیی پارتیی کرێکارانی کوردستان، موراد قەرەیلان، ڕایگەیاند کە ئه‌گه‌ر کۆسپ و ته‌گه‌ره دروست نه‌کرێت ئه‌وا له رۆژانی ئاینده‌دا کۆنفرانسی نه‌ته‌وه‌ییی کورد ئه‌نجام ده‌درێت که ماوه‌یه‌کی دوور و درێژه باسی لێ دەکرێت و گوتیشی، پێشکه‌وتنی گرنگ له ئارادایه.
بەپێی هەواڵێکی ماڵپەڕی "فیرات نیوز"ـی نزیک لە پەکەکە کە دوێنێ چوارشەممە بڵاو بووەتەوە، سەرۆکی پێشوو و ئه‌ندامی ئێستای کۆنسه‌ی سه‌رۆکایه‌تی KCK، موراد قەرەیلان، دەربارەی کۆنفرانسی نه‌ته‌وه‌یی نێوان کوردان په‌یامێکی داوە و تێیدا دەڵێت: "وه‌کو ده‌زانرێت رێبه‌رایه‌تیمان بۆ ئه‌نجامدانی (4) کۆنفرانس بانگه‌وازی کردبوو. له‌وانه (3) کۆنفرانسی ( تورکیا ــ باکوری کوردستان ــ ده‌ره‌وه‌ی وڵات ) ئه‌نجام دران. ئێستاکه‌ش کۆنفرانسی نه‌ته‌وه‌یی له رۆژه‌ڤدایه."
قەرەیلان هاوکات دەڵێت، "ئه‌گه‌ر کۆسپێکی ئه‌وتۆ نه‌یه‌ته سه‌ر رێگا، ئه‌وا کۆنفرانسی نه‌ته‌وه‌یی له ئاینده‌یه‌کی نزیکدا ئه‌نجام ده‌درێت. له‌سه‌ر ئه‌و بناخه‌یه کار و چاوپێکه‌وتنه‌کان به‌رده‌وامن. پێشکه‌وتنی گرنگیش له ئارادان."
زیاتر گوتی، "گه‌له‌که‌مان ساڵانێکە ئاواته‌خوازی پلاتفۆرمی یه‌کێتیی نه‌ته‌وه‌ییه که له‌نێوان هه‌ر چوارلای کوردستان ئه‌نجام بدرێت. هیوادارین ئه‌م ئاواته‌ی گه‌له‌که‌مان بێته دی."
پێشتر و چەنین جار سەرۆکی هەرێمی کوردستان، مەسعوود بارزانی ئاماژەی بە بەستنی کۆنفڕانسی نه‌ته‌وه‌یی داوە که هه‌موو لایه‌نه سیاسییه‌کان، ئه‌کادیمییه‌کان، رۆشه‌نبیرییه‌کان، له هه‌موو کوردستان تێیدا بەشدار دەبن و لە ڕێیەوە، په‌یامی ئاشتی به هه‌موو گه‌لانی جیهان به تایبه‌تی به گه‌لانی برا و دراوسێ، گه‌لانی عه‌ره‌ب، تورک، فارس دەگەیەنن.
بارزانی لە زۆر لە گوتارەکانیدا ئاماژەی داوە کە "یەکڕیزی و تەبایی ناو ماڵی کورد زۆر گرینگە" و لەو پێناوەدا هەنگاوی باشیان ناوە. بارزانی هاوکات یەکڕیزیی ناوماڵی کوردی بە پرسێکی ستراتیژی ناو بردووە و گوتووشیەتی لەمەودوا کورد لە بەرانبەر کورد ناوەستێتەوە.
18/07/2013
به‌پێی گۆڤارێكی ئه‌ڵمانی: كورده‌كان گه‌وره‌ترین گه‌لن له رۆژهه‌لاَتی ناوین دا كه ده‌وڵه‌تیان نه‌بێت، باس له‌وه‌ش ده‌كات، ئێستا چانسی به‌ده‌ستهێنانی ده‌وڵه‌ت بۆ كورد ره‌خساوه.
گۆڤارێكی ئه‌ڵمانی به ناوی (زینت) كه گۆڤارێكی سیاسیه‌و زۆرترین خوێنه‌ری هه‌یه له‌و وولاَتانه‌ی كه به زمانی ئه‌ڵمانی قسه ده‌كه‌ن، ژماره‌ی ئه‌م جاره‌ی گۆڤاره‌كه ته‌رخان كراوه به كورد و له‌به‌رگه‌كه‌یدا نه‌خشه‌ی كوردستانی یه‌كگرتوو بلاَوكراوه‌ته‌وه و پێشتریش به‌دواداچونی ده‌كرد بۆ بابه‌ته سیاسی و ئابوری و كولتوری وولاَتانی رۆژهه‌لاَتی ناوین و جیهانی ئیسلامی .
ئه‌و گۆڤاره نزیكه‌ی 30 لاپه‌ڕه‌ی ته‌رخان كردوه بۆ نوسینه‌كانی له‌سه‌ر كورد كه ژماره‌یه‌ك له زانای رۆژهه‌لاَتی ناوین و كه‌سانی ئاكادیمی نوسیویانه و ئاماژه‌یان به‌وه كردوه كه كیانی كورده‌كان به شێوه‌یه‌ك گه‌شه‌ی كردوه كه ناتوانرێت بوه‌ستێنرێت .
له ئاماژه‌یه‌كی تر دا باس له‌وه‌كراوه، كورده‌كان گه‌وره‌ترین گه‌لن له رۆژهه‌لاَتی ناوین دا كه ده‌وڵه‌تیان نه‌بێت، ئیتر چانسی به‌ده‌ستهێنانی ده‌وڵه‌تیان بۆ ره‌خساوه و ئاشكرا كراوه: قۆناغی چاره‌سه‌ری له توركیا و شه‌ڕی نێوان سوننی و شیعه‌ی عێراق و كێشه‌كانی حكومه‌تی به‌غدا و شه‌ڕی ناوخۆی سوریاش ده‌ستی كورده‌كانی به‌هێزكردووه.
له گۆڤاره‌كه دا ئه‌وه‌ش هاتووه : پێكهێنانی ده‌وڵه‌تی كوردی كابوسێكه به‌ڵام دێته‌دی.
خاوەنی تاوەری بازرگانی جیهان لە ئەمریکا داوایەکی یاسایی لەدادگای فیدڕاڵی تۆمار کردووە و تێیدا داوای قەربووکردنەوەی چەند ملیار دۆلارێک دەکات لەلایەن ئەو هێڵە ئاسمانیانەی کە فڕۆکەکانیان لە 11ی سێپتێمبەری 2001 دا بوونە هۆی تەقاندنەوەی دوو تاوەرەکەی بازرگانی جیهان لە شاری نیویۆڕکی ئەمریکا.
پێگەی دەیلی مەیڵ لە هەواڵێکدا بڵاویکردەوە، لاری سیلڤەرستێین خاوەنی تاوەری بازرگانی جیهان لە نیۆڕک داوایەکی یاسایی لەسەر هەریەک لە کۆمپانیاکانی هێڵی فڕۆکەوانی (یونایتد ئێیەرلاین و یو ئێس ئێیەر وەی و هێڵی فڕۆکەوانی ئەمریکا) لە دادگای فیدڕالی تۆمار تۆمارکردووە.
لە هەواڵەکەدا هاتووە، سیلڤەرستێین پێشر بڕی پێنج ملیار دۆلاری وەک قەرەبوو لەو کۆمپانیایانە وەرگرتووە، بەڵام لە داواکەی ئەم دواییەدا لە دادگای فیدڕاڵی، داوای بڕی 3,5 ملیار دۆلاری دیکە لەو کۆمپانیایانە دەکات بەو پێیەی کە هێرشەکەی 11ی سێپتێمبەر بۆ سەر تاوەرەکان، زیانی زیاتر لە حەوت ملیار دۆلاری پێگەیاندووە و ئەمەش زیاترە لەو بڕەی کە وەک قەرەبوو لەو کۆمپانیایانەوە وەری گرتووە.
لە ئێستاشدا تاوەرێکی نوێ لە شوێنی تاوەرە ڕوخێنراوەکان بە ناوی (تاوەری بازرگانی جیهانی یەکەم) دروست کراوە کە بڕی 3.9 ملیار دۆلاری تێچووە بەشێکە لە دیزاینێکی ئاڵۆزی سەرلەنوێ بنیاتنانەوەی تاوەری بازرگانی جیهان و بە درێژترین تاوەر دادەنرێت لە نیوە گۆی ڕۆژئاوادا و بڕیارە لەساڵی 2014دا بکرێتەوە.
بەپێی هەواڵەکە دادوەری دادگای ناوچەی مانهاتن لە نیویۆڕک ڕایگەیاندووە کە لێدوان لە هەردوو لا وەردەگرێت تا یەکلایی ببێتەوە ئایا داواکەی سیلڤەرستێین لەجێی خۆیەتی لەدژی ئەو کۆمپانیای هێڵە ئاسمانیانە و وابڕیاریشە دوابەدوای وەرگرتنی وتەی شایەت حاڵەکان لەو بارەیەوە، دادگا بڕیاری کۆتایی لەسەردا داواکە بدات.
لە ئینگلیزییەوە هاوڕێ فەریق
17/07/2013
کۆمەڵەی ئیخوان موسلیمین، ئەمریکا بە هۆکاری سەرەکی بارگرژییەکانی میسر و دەستێوەردانی سوپا بۆ لەسەرکار لابردنی موحەمەد مورسی (سەرۆکی پێشوی میسر) تاوانبار دەکات و لەوبارەیەشەوە ڕونکردنەوەیەکیان بڵاوکردەوە.
پێگەی ئاكشام-ی تورکیا لە هەواڵێکدا بڵاویکردەوە، کۆمەڵەی ئیخوان موسلیمین لە ماڵپەڕی ڕەسمی خۆیان ڕونکردنەوەیەکیان بڵاوکردۆتەوە و تێیدا هاتووە "ئەمریکا تاوانباری سەرەکییە بە لەسەرکار لابردنی یەکەم سەرۆک کۆماری بەڕەسمی هەڵبژێردروای میسر و ڕفاندنی لەلایەن هێزە چەکدارەکانی میسرەوە".
هەروەها دەڵێن " ئەمریکا گڵۆپی سەوزی بۆ هێزە چەکدارەکانی میسر داگیرساند و بووە ڕێخۆشکەر بۆ هەڵپەساردنی دەستور و لەناوبردنی پەرلەمانی وڵاتەکە".
لە ڕونکردنەوەکەی کۆمەڵەی ئیخواندا ئاماژە بەوەشکراوە "کەشو هەوای ئێستای میسر بەتەواوی دژی بنەماکانی دیموکراسی و مافەکانی مرۆڤە و سەرەڕای ئەمانەش ئەمریکا خۆی بەدوور دەگرێت لە ڕوودان یان ڕوونەدانی دەستێوەردانی هێزی چەکداری و هەڵویستێکی ڕوونی لەوبارەیەوە نەخستۆتە ڕوو".
لە کۆتایی بڵاوکراوەکەیاندا، کۆمەڵەی ئیخوان گەشبینانە تێڕوانینی خۆیان بۆ وەرگرتنەوەی دەسەڵاتی میسر دەخەنە ڕوو و ڕایانگەیاند "گرژییەکان کۆتاییان دێت، ڕزگاری لەدەست ئاژاوەگێڕان بەرپا دەبێت و ئازادی و سەرفرازیمان دووبارە بەدەست دەهێنینەوە".
ئەم ڕونکردنەوەیەی کۆمەڵەی ئیخوان موسلیمین پاش سەردانە فەرمییەکەی دوێنێی ویلیام بێرنس جێگری وه‌زیری ده‌ره‌وه‌ی ئه‌مریكا دێت کە لەگەڵ دەسەڵاتدارانی حکومەتە کاتییەکەی میسردا کۆبووەوە و لە کۆنگرەیەکی ڕۆژنامەوانیشدا پشتیوانی خۆی بۆ حکومەتە کاتییەکەی میسر ڕاگەیاند و جەختی لە هێنانەوە ئارای دیموکراتی و کۆتایی هێنان بە ئاشوبەکانی ئەو وڵاتە کردەوە.
خەندان/ لە تورکییەوە هاوڕێ فەریق
17/07/2013
له شاری سه‌رێکانی رۆژئاوای کوردستان دوای ئه‌وه‌ی گرووپێک چه‌کدار و چه‌ته‌ی سه‌ر به به‌ره‌ی نه‌سرا ( جه‌بهه‌ت ئه‌لنه‌سرا ) هێرشیان کرده سه‌ر ئۆتۆمبێلێکی یه‌کینه‌کانی پاراستنی ژن YPJ ی سه‌ر به YPG و شۆفێری ئۆتۆمبێله‌که‌یان ده‌ستگیرکرد و شه‌ڕ و پێکادان روویدا، راگه‌یه‌ندرا که شه‌ڕه‌که به‌رده‌وامه و یه‌کینه‌کانی YPG ناوه‌ندێکی چه‌ته‌کانیان کۆنترۆڵکردووه و به‌گشتی تا ئێستا (6) ئه‌ندامی گرووپه چه‌کداره‌که‌ی سه‌ر به نه‌سرا کوژراون .
دوای ئه‌وه‌ی له کاتژمێر 11:00 ــ 11:30ی نیوه‌ڕۆدا ئۆتۆمبێلێکی یه‌کینه‌کانی پاراستنی ژن YPJ که له چوار رێیانی به‌ریده‌که‌ی له گه‌ڕه‌کی محه‌ته‌ی شاری سه‌رێکانی سه‌رقاڵی جێبه‌جێکردنی ئه‌رکی خۆیاندا رووبه‌ڕووی هێرشێکی گرووپی چه‌ته‌ی سه‌ر به به‌ره‌ی نه‌سرا ده‌بنه‌وه، پێکدادان دێته ئاراوه و زانرا که (6) که‌س له گرووپه چه‌ته‌کان کوژراوه .
به‌پێی ئه‌و زانیارییانه‌ی له سه‌رچاوه‌کانی YPG وه به‌ده‌ستگه‌یشتوون، گرووپه هێرشکاره‌که راسته‌وخۆ سه‌ر به به‌ره‌ی نه‌سرا ( جه‌بهه‌ت ئه‌لنه‌سرا )یه و هه‌مان سه‌رچاوه ئه‌وه‌شی خسته‌ڕوو له پێکدادانه‌که‌دا ناوه‌ندی گروپی ( عه‌میل موسلیمین ) ی سه‌ر به به‌ره‌ی نه‌را که پێشتر وه‌کو ناوه‌ندی سیاسی سوپای رژێمی سوریابوو، له‌لایه‌ن شه‌ڕڤانانی YPG ه‌وه کۆنترۆڵ کراوه و له شه‌ڕه‌که‌دا (6) چه‌کدار کوژراون و (4)ی تریش برینداربوون .
هاوکات ئه‌وه‌ش خرایه ڕوو که ئه‌و شه‌ڕڤانه‌ی YPG ش ئازاد کراوه که له‌لایه‌ن گرووپه چه‌کداره‌کانه‌وه ده‌ستگیرکرابوو .
پێشتریش راگه‌یه‌ندرابوو که دوابه‌دوای هێرشی یه‌که‌می گرووپه چه‌ته‌کان بۆسه‌ر یه‌کینه‌که‌ی سه‌ر به YPJ ، هێزه‌کانی YPG به هه‌رێمه‌که‌دا بڵاوه بوونه‌ته‌وه و ته‌کبیری پێویستیان وه‌رگرتووه . له‌سه‌ر رووداوه‌که‌ش به‌ره‌ی نه‌سرا ئه‌ندامێکی خۆیان به‌مه‌به‌ستی چاوپێکه‌وتن ره‌وانه‌ی لای YPG کردووه، به‌ڵام فه‌رماندارانی YPG داوایان کردووه که به‌رپرسیاری گرووپه بێته‌لایان . دوای ئه‌وه‌ی به‌رپرسیاری گرووپه‌که رێگای هاتن بۆ لای فه‌رماندارانی YPG ده‌گرێته به‌ر، جارێکی تر له‌لایه‌ن گرووپه‌که‌وه به چه‌ک هێرش ده‌کرێته سه‌ر یه‌کینه‌یه‌کی YPG و پێکدادان هاته ئاراوه .
سه‌رچاوه هه‌رێمییه‌کان راشیانگه‌یاند که شه‌ڕه‌که له ناوه‌ندی شه‌بیبه‌ی گه‌ڕه‌کی محه‌ته ناوبه‌ناوێک به‌رده‌وام ده‌کات
ANF
ئەندامێكی مەكتەبی سیاسیی یەكێتی رایدەگەیەنێت، كە بارزانی یاسای درێژكردنەوەی ماوەی سەرۆكایەتییەكەی ئیمزا ناكات، بەڵام بەپێی یاسای پەرلەمان پەسەند دەكرێ.
دوای دوو رۆژ لە پەسەندكردنی هەردوو پرۆژەیاسای درێژكردنەوەی ماوەی پەرلەمان و سەرۆكایەتی هەرێمی كوردستان، كە لە 30-6-2013 لە پەرلەمانی كوردستان پەسەندكران مشتومڕێكی زۆری بەدوای خۆیدا هێنا هەردوو یاساكە لە 2-7-2013 گەیشتنە سەرۆكایەتی هەرێمی كوردستان. بەم پێیەش تەنیا دوو رۆژ لەبەردەم سەرۆكی هەرێمی كوردستان ماوە، كە ئاخۆ یاسای درێژكردنەوەی ماوەی سەرۆكایەتی خۆی بۆ دوو ساڵی دیكە پەسەند دەكات یان نا.
ئەندامێكی مەكتەبی سیاسیی یەكێتیی نیشتیمانیی كوردستان بە (رووداو)ی گوت "بارزانی گوتی پەسەندكردنی ئەو یاسایە بەو شێوەیە بۆ من زۆر قورسە".
ئەو مەكتەب سیاسییەی یەكێتی كە نەیویست ناوی بڵاوبكرێتەوە گوتیشی: "دواجار بارزانی رازی بووە یاساكە نەگەڕێنێتەوە پەرلەمان و رەتی نەكاتەوە".
ئەوەشی خستەڕوو "بە ئاگاداری هەردوو مەكتەبی سیاسیی یەكێتی و پارتی، بارزانی ئیمزا لەسەر یاساكە ناكات و بەگوێرەی یاسای پەرلەمانیش ئەگەر سەرۆكی هەرێمی كوردستان لەماوەی 15 رۆژدا یاساكە ئیمزا نەكات، ئەوا بەشێوەیەكی ئۆتۆماتیكی بە پەسەندكراو دادەنرێ و دەكەوێتە بواری جێبەجێكردنەوە".
لای خۆشیەوە تاریق جەوهەر، راوێژكاری راگەیاندنی سەرۆكی پەرلەمانی كوردستان، بۆ (رووداو) گوتی: "سەرۆكی هەرێمی كوردستان بۆی هەیە تاوەكو 17-7-2013 وەڵام بداتەوە، ئەگەر پەسەندیشی نەكات، ئەوا بەپێی یاسا بە پەسەندكراو هەژماردەكرێت".
هیوا میرزا سابیر، ئەندامی مەكتەبی سیاسیی یەكگرتووی ئیسلامیی كوردستان، بە (رووداو)ی گوت:" تا دوایین سات داوا لە سەرۆكی هەرێمی كوردستان دەكەین یاساكە رەتبكاتەوەو بیگەڕێنێتەوە پەرلەمان".
گوتیشی: "بڕیارە لەم هەفتەیەدا هەرسێ لایەنی ئۆپۆزیسیۆن كۆببنەوە‌و تێیدا هەڵوێستی خۆمان لەسەر مەسەلەی پەسەندكردنی یاساكە دەربڕین‌و چەندین ئەگەریش بۆ هەڵوێست وەرگرتن لەلایەن ئۆپۆزیسیۆنەوە واڵان" .
rudaw
15/07/2013
بۆ یەكەمجار رووسیای فیدراڵی بەشێوەیەكی فەرمی یەدەگی نەوت و غازی خۆی رادەگەیەنێت كەچەندین ساڵ بوو ئەو زانیارییانە دووربوون لەبڵاوكردنەوە.
سێرگی دۆنسكوی، وەزیری سامانە سروشتی و ژینگەییەكانی رووسیا رایگەیاند: " یەدەگی نەوتی رووسیا كە بتوانرێت دەربهێنرێت پێش دوو ساڵ گەیشتبووە 17 پۆینت هەشت ملیار تۆن كەدەكاتە 129 پۆینت نۆ ملیار بەرمیل، لەبارەی یەدەگی غازی سروشتیش قەبارەكەی گەیشتبووە 48 پۆینت 8 تریلیۆن مەتر سێجا".
دۆنسكوی روونیكردەوە كەئەو یەدەگانە دەبنە گەورەترین قەبارەی جیهانی، گوتیشی:" رەنگە ئاشكراكردنی ئەو زانیارییانە ببێتە هۆی دەرهێنانی سەرچاوەكانی ووزە لە رووسیا".
حكومەتی مۆسكۆ لە 5ی تەمموزی ئەمساڵ بڕیاریدا نهێنی زانیاری لەبارەی یەدەگی گشتی وڵاتەكەی لەنەوت و غاز هەڵبگرێت.
رووسیا بەیەكێك لەگەورەترین وڵاتی بەرهەمهێنەری نەوتی خاو دادەنرێت لەجیهانداو لەمانگی ئایاری رابردوو قەبارەی بەرهەمهێنانی گەیشتۆتە 10 پۆینت 48 ملیۆن بەرمیل لەرۆژێكدا، بەمەش بەرزترین ئاستی لەساڵی 2013 دا تۆماركرد، ئەویش بەپاڵپشتی زۆربوونی بەرهەمهێنانی رۆس نەوت كە بە گەورەترین بەرهەمهێنەری رووسیا دادەنرێت.
بەپێی ئامارەكانی وەزارەتی ووزەی رووسیا، بەرهەمهێنانی غازی سروشتی لەو وڵاتە دابەزینی بەخۆیەوە بینیوە و گەیشتۆتە 1 پۆینت حەوت ملیار مەتر سێجا لەرۆژێكدا، هۆكارەكەشی بۆ گەڕانەوەی بەرهەمهێنانی كۆمپانیایی غازپڕۆمی رووسی دەگەڕێتەوە كە بەڕێژەی 11% كەمیكردووە، ئاستەكەشی گەیشتۆتە یەك پۆینت 18 ملیار مەتر سێجا لەرۆژێكدا .
15/07/2013
مەسعود بارزانی لە پەیامێكیدا كە لە ماڵپەری سەرۆكایەتی هەرێمی كوردستان بڵاویكردەوە، هەڵوێستی خۆی لەبارەی یاسای درێژكردنەوەی ماوەی سەرۆكایەتی هەرێمی كوردستان و پرسی دەستوور دەربڕی.
سەرۆكی هەرێمی كوردستان رایگەیاندووە، كە ئەو هیچ كات لە هەوڵی بەدەستهێنانی پلەو پۆستدا نەبووە، بۆیە یاسای درێژكردنەوەی ماوەیەی سەرۆكایەتییەكەی واژوو نەكردووە. هۆكاری رەتنەكردنەوەشی دەگێڕێتەوە بۆ هەوڵدان بۆ یەكڕیزی لایەنە سیاسییەكانی هەرێم و رێزگرتن لە هاوپەیمانیی ستراتیژی یەكێتی و پارتی.
دەقی پەیامەكەی بارزانی:
بەناوی خوای گەورە و میهرەبان
گەلی خۆشەویستی كوردستان....
هێز و لایەنە سیاسییەكان و رێكخراوەكانی كۆمەڵگەی مەدەنی...
بۆ من خۆشترین بڕیار ئەوە بووە كە لە تەمەنی 16 ساڵیدا لە پێناو ئازادی و مافە نەتەوەیی و دیموكراتییەكانی گەلی كوردستان و ڕزگاركردنی خاكی كوردستاندا بوومە پێشمەرگەی كوردستان.
پێشمەرگایەتیش گەورەترین شانازیی ژیانی منه و، لە هەر پلە و پۆستێكدا بووبم بە گیانی پێشمەرگانە كار و خەباتم كردووە و، بە بیروباوەڕی پێشمەرگانەوە كارم بۆ بەرژەوەندیی گەلەكەم كردووە و، هەر لەو ڕوانگەشەوە هەموو پۆستەكانم بۆ بەرژەوەندیی باڵای نیشتمانەكەم بەكارهێناوەن.
زۆریش سەربەرزم بەوەی كە هەر لە سەرەتای راپەڕینی شكۆداری گەلی كوردستان لە بەهاری 1991ـەوە وەك پابەندبوون بە ئامانجەكانمان لە ئازادی و دیموكراسی لە كاتی شۆڕش و خەباتی پێشمەرگایەتیدا لە شاخ، هەروەها وەك ئەركێكی نیشتمانی و چەسپاندنی بنەماكانی دیموكراسی و دامەزراندنی سیستەمێكی سیاسی و ئیداریی دیموكراسیانە، داوام كرد بەرەی كوردستانی بە زووترین كات هەڵبژاردنێكی ئازاد ئەنجام بدات، بۆ ئەوەی گەلی كوردستان لە ڕێگەی سندوقەكانی دەنگدانەوە، چارەنووس و سیستەمی سیاسیی خۆی دیاری بكات.
لەوكاتەوە گەلی كوردستان، بە هاوكاریی هەموو لایەنە شۆڕشگێرەكانییەوە پڕۆسەیەكی دیموكراسییانەی دەستپێكرد. ئێستاش بە پشتێوانیی خوای گەورە و هاوكاریی دڵسۆزان و خەبات و خۆڕاگریی گەلەكەمان، پێشكەوتنی گەورە لە هەموو ئاستەكانی ژیانی خەڵكی كوردستاندا بەدیهاتوون. هەر بەو هۆیەوە كوردستان ئەمڕۆ نێوبانگێكی باشی هەیە لە ڕووی جێگیریی سیستەمی سیاسی و سەقامگیریی باری ئەمنی و پێكەوەژیان. هەروەها پێشكەوتنەكان لە بواری ئابووری و ئاوەدانیدا، ڕۆژ بە ڕۆژ پێگەی كوردستان لە جیهاندا بەهێزتر دەكەن.
لە ماوەی ڕابردوودا لە هەرێمی كوردستاندا، وەك بەشێك لە نەریتی دیموكراسی، گفتوگۆ و گەنگەشەیەكی زۆر لەسەر سروشت و پێناسەی سیستەمی سیاسی و پڕۆژەی دەستوور هاتە ئاراوە.
بۆ پێشكەشكردنی نموونەیەكی جوانتری پڕۆسەی دیموكراسی و پابەندبوون بە یاساوە، نامەی فەرمیم نارد بۆ كۆمسیۆنی باڵای سەربەخۆی هەڵبژاردنەكان، تاوەكو لە مانگی 9ی ئەمساڵدا هەڵبژاردنەكانی پەرلەمان و سەرۆكایەتیی هەرێمی كوردستان ئەنجام بدرێن. بەو شێوەیە ئەوەی ئەركی سەرشانی من بووە بەجێمگەیاندووە، لە نامەناردن و داواكردنی ئەنجامدانی هەڵبژاردنەكان و پاشان دیاریكردنی كاتی هەڵبژاردنەكان، كە ئەویش رۆژی 21/9/2013 بووە. لە دوای ئەو فەرمانە و پێش دەرچوونیشی، جیاوازیی بیروڕا هەبوو لەسەر میكانیزمی هەڵبژاردنی سەرۆكی هەرێمی كوردستان، كە ئایا بەپێی یاسای سەرۆكایەتی هەرێمی كوردستان ژمارە 1ی ساڵی 2005ی هەمواركراو و پڕۆژەی دەستوور بێت، كە سەرۆكی هەرێم راستەوخۆ لە لایەن خەڵكەوە هەڵبژێردرێت، یان بە پێی بۆچوونی چەند حیزبێك كە داوا دەكەن سەرۆكی هەرێمی كوردستان لە نێو پەرلەماندا هەڵبژێردرێت. ئەمەیش جیاوازی خستە ناو لایەنەكانەوە پاشان پرسی پڕۆژەی دەستووری هەرێمی خرایە سەر و دەرئەنجام بەداخەوە مامەڵەكردنی توندی هەندێ لایەن پڕۆسەی سیاسی بەرەو قەیران برد.
بۆ ئەوەی بتوانین زەمینەی پێكەوەكاركردنێكی باشتر بهێنینە ئارا سەبارەت بەو پرسانە و بۆ ئەوەی نموونەیەكی جوانتری پڕۆسەی سیاسی لە هەرێمی كوردستان پێشانی خەڵكی خۆمان و دەرەوەش بدەین، هەروەها بۆ ئەوەی بتوانین زەمینەی تەوافوق بڕەخسێنین و لایەنە سیاسییەكان و پێكهاتەكانی كۆمەڵگەی كوردستان، سەرنج و تێڕوانینی خۆیان لەسەر شێوازی هەڵبژاردنی سەرۆك و پڕۆژەی دەستوور بخەنەڕوو، بەنامەیەك لە 25ـی 5ـی 2013 داوام لە هەموو لایەنە سیاسییەكانی كوردستان كرد، تێبینی و سەرنجەكانیان لەسەر پڕۆژەی دەستوور بۆ ئێمە بنێرن. دوای گەیشتنی وەڵامەكان، داوام لە سەرۆكایەتیی پەرلەمان كرد لەگەڵ سەرجەم لایەن و پێكهاتەكانی كۆمەڵگەی كوردستان كۆ ببنەوە بۆ ئەوەی بگەنە ئەنجامێك.
ئامانجی من لە ناردنی تێبینیی لایەنەكان بۆ سەرۆكایەتیی پەرلەمان بۆ ئەوە بوو كە تەوافوقی لایەنەكانی ناو پەرلەمان و دەرەوەی پەرلەمان و سەرنجی هەموو پێكهاتەكان ببێتە نەخشەڕێگەیەكی باشتر و زەمینەیەكی گونجاوتر دابین بكەین بۆ پڕۆژەی دەستوور و هەڵبژاردنەكان، ئینجا بە هەموو سەراحەتێكەوە بە گەلی كوردستان ڕابگەیێنم كە من وەك شەخسی خۆم هیچ نییەتێكم بۆ خۆكاندیدكردنەوە نییە و ڕێز لە هەموو یاساكان دەگرم و ئەمانەتی سەرۆكایەتی هەرێمی كوردستان ڕادەستی هەر بەڕێزێكی دیكە دەكەم كە هەڵدەبژێردرێت.
بەڵام بە داخەوە ئۆپۆزیسیۆن سەركەوتوو نەبوون لە هاوكاریكردن بۆ سەرخستنی پڕۆسەكە، بەڵكو بەو شێوە ڕەفتارەیان كە قبووڵیان نەكرد لایەنەكانی دیكە لە كۆبوونەوەكانی سەرۆكایەتی پەرلەماندا بەشدار بن، هەوڵ و پرۆسەكەیان پەكخست. لەوەدا دەركەوت كە مەفهوومی تەوافوق لای ئۆپۆزیسیۆن تەنیا سەپاندن و جێبەجێكردنی ئەو داوایانەیە كە خۆیان هەیانە، بە بێ گوێدانە داواكانی لایەنەكانی دیكە.
دەمەوێت لێرەدا زۆر بە ڕاشكاوی بیڵێم، تەوافوق ئەوە نییە كە تەنیا پارتی و یەكێتی و سێ لایەنەكەی ئۆپۆزیسیۆن رێكبكەون، بەڵكو پەیوەستە بەوان و هەموو لایەن و پێكهاتە جیاجیاكانی دیكەی كوردستانیشەوە. پڕۆژەی دەستوور كاتی خۆی لە لایەن 36 حیزب و هەموو نەتەوەكانی كوردستانەوە گفتوگۆی لەسەر كراوە، لەبەر ئەوەش ئەمڕۆ نابێ پشتگوێ و پەراوێز بخرێن، چونكە كوردستان هەر تەنیا ئەو پێنج لایەنەی تێیدا نییە. لێرەشدا دووبارە داوا لە هەموو لایەنەكان دەكەمەوە، لەسەر پرسی دەستوور بەرەو تەوافوق هەنگاو بنێن و منیش بە هەموو توانایەكەوە پشتیوانیتان دەكەم، با قەیرانی سیاسی دروست نەبێ و بۆ ئەوەی ئارامیی ژیان لە خەڵكی كوردستان تێكنەدرێت و، هەموو هێز و توانای خۆمان بخەینە گەڕ بۆ ئەوەی سوود لەو دەرفەتانە وەربگرین كە ئەمڕۆ بۆ گەل و نیشتیمانەكەمان لە ناوچەكەدا هاتوونەتە پێش.
هەموو هەوڵێكی خۆم دەخەمە گەڕ بۆ ڕەخساندنی زەمینەیەكی نوێی گەییشتن بە تەوافوق. خەڵكی كوردستان و حیزبەكان شایەتی ئەوەم بۆ دەدەن، كە لە سەروبەندی پەسەندكردنی پڕۆژەی دەستووری هەرێمی كوردستان لە ساڵی 2009دا لە لایەن پەرلەمانەوە، هەوڵێكی زۆرمدا بۆ ئەوەی تەوافوقی لەسەر دروست ببێ و بە دڵی هەموو لایەنەكانی كوردستان بێت و، پێداگیریم لەسەر ئەوە كرد كە دەبێ تێڕوانینی هەموو نەتەوە و پێكهاتە ئایینییەكانی تێدا جێبكرێتەوە. هەرواش كرا و، دوای ئەوە لە پەرلەمان دەنگی لەسەر درا. ئەمجارەش دەمویست دوور لە هەموو گرژی و هەڵچوونێكی ناو پڕۆسەی سیاسی هەمان زەمینە دروست بكەمەوە بۆ گەییشتن بە تەوافوق.
بەداخەوە ئۆپۆزیسیۆن بە ڕەفتار و شێوەی مامەڵەكردنیان لەو چوار ساڵەی رابردوودا، ئەو تێڕوانینەی بەشێكی زۆر لە خەڵك و لایەنەكانیان لەسەر خۆیان چەسپاندووە، كە بە هیچ شتێك رازی نابن و، تەوافوق لە ڕوانگە و بە لێكدانەوەی ئەوان سەپاندنی بیروڕاكانی خۆیانە كە ئەوەش پێچەوانەی ڕێسا و عورفە سیاسی و دیموكراسییەكانە.
سێ لایەنەكەی ئۆپۆزیسیۆن دەبێ بزانن كە جگە لە پارتی و یەكێتی، زۆر حیزبی دییش هەن لە كوردستاندا لە سەختترین ڕۆژگاری ژێر دەستەییدا ئەو پەڕی فیداكارییان نواندووە بۆ بەرگریكردن لە هەبوونی گەلەكەمان و مانەوەی ناوی كوردستاندا، هەروەها زۆر حیزبی دیكەی مۆڵەتپێدراو هەن ئەمڕۆ ڕا و قسەیان هەیە بۆ پێشكەوتنی كوردستان. نابێ سێ لایەنەكەی ئۆپۆزیسیۆن ڕێگە بە خۆیان بدەن و هەوڵی ئەوە بدەن لە لایەن دەزگا باڵاكانی كوردستانەوە ڕا و بۆچوونی لایەنەكانی دیكە نادیتە بگیرێن. یان رێگە بە خۆیان بدەن بە شێوەیەك لە سووكایەتی پێكردنەوە باسیان بكەن، چونكە بە هیچ شێوەیەك ئەوە نەریتێكی دیموكراسیانە نییە. بۆیە داوا لە برایانی ئۆپۆزیسیۆن دەكەم بە سینگێكی فراوانی یەكترقبوڵكردنەوە و بە پێی بنەما دیموكراسییەكان كار و چالاكییە سیاسییە یاساییەكانیان ئەنجام بدەن و، هەموو ڕەفتار و مامەڵەكانیان لەسەر بنەمای قبوڵكردنی ئەوانیترەوە بێت.
خەڵكی خۆڕاگری كوردستان....
پەرلەمانی كوردستان، لە ڕۆژی 30/6/2013 دا بە دەركردنی دوو یاسا، ماوەی پەرلەمان و سەرۆكایەتی هەرێمی كوردستانی درێژ كردەوە، ئەوەش دواكەوتنی هەڵبژاردنی سەرۆكی هەرێمی كوردستانی لێكەوتەوە. لێرەدا دووپاتی دەكەمەوە هیچ كات خولیای كورسی و پۆست نەبوومە. ئەمڕۆش نامەوەێ مێژووی خۆم لە خەبات بۆ رزگاری و ئازادی كوردستان بە هیچ شتێكی دیكە بگۆڕمەوە. مرۆڤ زیاتر بە خەبات و كار و بەخشش بۆ گەل و نیشتمان و مرۆڤایەتی دەناسرێتەوە نەك بە پلە و پۆست و ناونیشانی وەزیفی و ئیدارییەوە.
یاسای درێژكردنەوەی ماوەی پەرلەمانی كوردستانم ئیمزا كرد تاوەكو هیچ بۆشاییەكی یاسایی و دەستووری لە هەرێمی كوردستاندا دروست نەبێت. ماوە و ویلایەتی سەرۆكایەتی هەرێمی كوردستان، لە لایەن پەرلەمانی كوردستانەوە بە دەنگی فراكسیۆنی كوردستانیی (پارتی و یەكیێتی) لەگەڵ فراكسیۆنەكانی حیزب و نەتەوەكانی دیكەی ناو پەرلەمان و سەربەخۆكان جگە لە فراكسیۆنەكانی حیزبەكانی ئۆپۆزیسیۆن، درێژكرایەوە.
ئێستا من لەبەردەم ئەركەكانی ئەو هاوپەیمانییەتەدام كە لە نێوان پارتی دیموكراتی كوردستان و یەكێتی نیشتمانی كوردستاندا هەیە، كە پێكەوە لەگەڵ چەند حیزب و نەتەوەی كوردستاندا لەناو پارلەمان بڕیاریان داوە ماوەی سەرۆكایەتی هەرێمی كوردستان بۆ دوو ساڵ درێژ بكرێتەوە، بە بێ ئەوەی من تێیدا بەشدار بووبم.
هەروەها من لەبەردەم بەرپرسیارێتیی ئەخلاقی و كۆمەڵێ ئەرك و كاری هاوبەشی درێژخایەندام لەگەڵ برای خۆشەویستم مام جەلال بۆ درێژەدان بە هاوپەیمانێتییەكە، بۆ ئەوەی وەفاداری ئەو كاروانە بم كە دەستمان پێكرد و ئەنجامەكانیشی بە ئیجابییەوە بەردەوام بن و، ئینشاڵڵا كە ئەویش بە خۆشی دەگەڕێتەوە بۆ كوردستان، هەموو شتێك لەوپەڕی سەقامگیریدا ببینێ. لە هەمانكاتدا من باش لە ئەركەكانی هاوپەیمانێتی نێوان یەكێتی و پارتی تێدەگەم، كە بە ڕاستیش ئەو هاوپەیمانێتییە سەقامگیری و پێشكەوتنێكی زۆر گەورەی لە كوردستاندا دروستكردووە، كە بەرهەمەكەشی ئەوەیە كە ئێستا هەرێمی كوردستان جێگەی سەرنجی هەموو جیهانە، هەروەها وایكرد كورد بەشدارێكی چالاك بێت لە گۆڕانكارییەكانی عێراق و ناوچەكەدا. ئەمڕۆش كە جەنابی مام جەلال لەبەر باری تەندروستی لە كوردستان نییە هەست دەكەم بەرپرسیارێتییەكەی ئەویش دەبێ من ئەنجامی بدەم لە پاراستن و بەهێزكردنی ئەو هاوپەیمانییەتییەدا وەك وەفادارییەك بۆ پێكەوەكاركردن و هاوخەباتیی و هاوكاریی چەندساڵەی نێوانمان لە پێناو گەل و وڵاتەكەماندا.
هەروەها بۆ رەچاوكردنی نیگەرانییەكانی پێكهاتە نەتەوەیی و ئایینییەكانی كوردستان لەمەڕ ئەگەری قوڵتربوونی قەیرانی سیاسی و پاراستنی سەقامگیری لە كوردستاندا و، لەبەردەم داوای كەسایەتییە خەباتگێڕەكانی كوردستانی عێراق و پارچەكانی دیكەی كوردستاندا، و پاش ڕاوێژكردن لەگەڵ زۆربەی هێز و لایەنە سیاسییەكانی كوردستان یاسای درێژكردنەوەی ماوەی سەرۆكایەتی هەرێمی كوردستانم ڕەتنەكردەوە. بەڵام ئەو ڕەتنەكردنەوەیەش بەو مانایە نییە كە من لەگەڵ شێواز و ناوەڕۆكی یاسای درێژكردنەوەی ویلایەتی سەرۆكی هەرێمدا بم، بۆیەش ئیمزام نەكرد.
لێرەدا وەك ڕێزگرتنێك لە دەنگی زۆربەی فراكسیۆنەكانی پەرلەمانی كوردستان و بۆ ئیحراج نەكردنیان، بە گەلی خۆشەویستی كوردستان رادەگەیێنم، كە من بە شێوەیەكی كاتی تا وەكو خولی چوارەمی پەرلەمانی كوردستان دەست بەكار دەبێت و بە پەلە دەگەنە تەوافوقێك، ئەو ئەرك و ئەمانەتەی كە خراوەتە سەرشانم بەجێیدەگەیێنم، هەر لە ئێستاشەوە داوا لە سەرۆكایەتیی خولی داهاتووی پەرلەمانی كوردستان دەكەم كە لەژێر ڕۆشنایی ئەو نامەیەم كە لە 12ـی 6ـی 2013ـدا ئاراستەی سەرۆكایەتیی خولی ئێستای پەرلەمانم كردبوو، دوای هەڵبژاردنەكانی 21/9/2013 دەستبەجێ لە كۆبوونەوە دەستپێكییەكانی سەرۆكایەتیی پەرلەماندا بە زووترین كات میكانیزمێك بدۆزنەوە بۆ ئەوەی لە ماوەی كەمتر لە ساڵێكدا بگەنە تەوافوق لەسەر هەمواركردنی پڕۆژەی دەستوور و ئالییەتی هەڵبژاردنی سەرۆكی هەرێم. ئەو كات هەڵبژاردنی سەرۆكێكی نوێی هەرێمی كوردستان ئەنجام بدرێت و ئەو ئەمانەتەی لە دەست ئێمە دایە بدەینە هەر بەڕێزێكی دیكە كە متمانەی گەلی كوردستان بەدەست دەهێنێت. خۆم و كاك كۆسرەت، جێگری سەرۆكی هەرێمی كوردستان و دیوانی سەرۆكایەتی هەرێمی كوردستانیش، وەك دەزگای سەرۆكایەتی هەرێمی كوردستان هەموو هاوكارییەكی سەرۆكایەتی پەرلەمانی تازە دەكەین بۆ ئەو مەبەستە.
دەبێ بە هەموومان نموونەیەكی جوانی دیموكراسی پێشكەش بكەین، نابێت هیچ كەس بە كورسییەكەیەوە بچەسپێت و، نابێت ڕێگە بدرێت سەرۆكی هەتا هەتایی هەبێت لە كوردستاندا. من خۆم باوەڕێكی تەواوم بەوە هەیە كە كاتێك پۆستێك لە لایەن كەسێكەوە بەجێدەهێڵدرێت، دەبێ گەل ئەو پرسیارە بكات كە بۆچی ئەو پۆستە بەجێدەهێڵێت، نەك گەل بگاتە رادەی ئەوەی ئەو پرسیارە بكات كە بۆ چی ناڕوات.
گەلی خۆشەویستی كوردستان من دڵنیاتان دەكەمەوە كە تەنیا ئێوە دەتوانن بڕیار لەسەر چارەنووسی خۆتان بدەن و، كەس ناتوانێ ئەو مافەتان لێ زەوت بكات.
بژی كوردستان...
نەمری بۆ شەهیدانی ڕێگەی رزگاری كوردستان و سەرفرازی
سەربەرزی بۆ گەلی كوردستان
مسعود بارزانی
سەرۆكی هەرێمی كوردستان
16ـی 7ـی 2013
- داواکاری گشتیی کرماشان: لێکۆڵینەوە لەبارەی لێدانی قوتابیان دەکەین
- هونەرمەندی نەتەوەیی کورد سەید عەلی سەردەشتی لەوڵاتی سوید کۆچیدوایی کرد
- گفتوگۆكانی ئێران و ئەمریكا لە عومان دوای دو کاتژمێر کۆتایی هات
- ئێران شەڕو دانوستانی ناڕاستەوخۆی پێ باشە!
- داواکارییەکانی ئێران و ئەمریکا لەیەکتریی چیە؟
- وەزیری بەرگریی ئیسرائیل هۆشداری دەداتە ئەحمەد شەرع
- وادەی هێرشی ئەمریکا بۆ سەر ئێران ئاشکرا کرا
- دەستووری کاتی سوریا نیگەرانی لایەن کوردییەکان و چاودێرانی لێدەکەوێتەوە
- بارودۆخی نالەباری ئابووریی ئێران پێدەچێت کۆماری ئیسلامی ناچار بکات لەگەڵ سەرۆک ترامپ ڕێککەوتن بکات
- عڕاقچی: هێشتا نامەکەی ترەمپ بە دەستمان نەگەیشتووە
- وەزیری دەرەوەی ئێران دەڵێت بڕیارە نامەکەی ترامپ لە لایەن نێردراوێکی وڵاتێکی عەرەبیەوە بگەیەنرێتە تاران
- مەزڵوم عەبدی و ئەحمەد ئەلشەرع بە ڕێکەوتن دەگەن
- 8ی مارس.. شۆڕشێك لەپێناو مافی ژنان
- سری سورەییا ئۆندەر: باخچهلی پێی گوتم، ڕۆژێک دێت پێکەوە هەڵپەڕکێی ئاشتیی دەکەین
- حكوومهتی ئێران : له‌گه‌ڵ ئهورووپا درێژه به گفتوگۆ ئهتۆمییهكان دهدهین
- عەلی باپیر، سەرۆکی کۆمەڵی دادگەری کوردستان سەبارەت بە پەیامی ئۆجەلان"هیوادارم هەردوولا بە کردەوە بەدەم بانگەوازەکەوە بچن."
- ئەمینداری گشتیی یەکگرتوو پەیامی ئۆجەلان "پەیامێکی پڕ لە بەرپرسیاریەتی و بایەخ و واقعیەتە"
- سەرۆك بافڵ جەلال تاڵەبانی: پێشوازی لە پەیامەکەی بەڕێز عـ.ـەبدوڵا ئـ.ـۆجەلان دەکەین
- سەرۆک بارزانی: هیوادارین پەیامەکەی ئۆجەلان دەستپێکێک بێت بۆ ئەوەی پڕۆسەی ئاشتی رێی خۆی بگرێت
- زەینەب جەلالیان لە 17هەمین ساڵی زیندانیکردنیدا لە ناو زیندانەوە باس لە ئازارەکانی دەکات
- بزووتنەوەی کۆماریخوازانی ڕۆژهەڵاتی کوردستان ٢ی ڕێبەندان، ٧٩هەمین سالرۆژی دامەزرانی یەکەم کۆماری کوردستان، لە نەتەوەی کورد پیرۆزدەکات
- پەیامی پیرۆزبایی کۆماریخوازان بۆ بەرێز مەسعوود پزیشکیان
- پیرۆزبایی بزووتنەوەی کۆماریخوازانی ڕۆژهەڵاتی کوردستان بە بۆنەی جێژنی پیرۆزی قوربان
- پەیامی پیرۆزبایی بزووتنەوەی کۆماریخوازانی رۆژهەڵاتی کوردستان بە بۆنەی پێنجەمین کۆنگرەی ئاسایی هەدەپە
- پەیامی پیرۆزبایی بزوتنەوەی کۆماریخوازی ڕۆژهەڵاتی کوردستان بە بۆنەی جێژنی ڕەمەزانی پیرۆزەوە
